UFC-ի թեթև քաշային կարգում գործող չեմպիոն, իսպանացի Իլիա Թոփուրիան կոշտ է արտահայտվել Հայաստանը ներկայացնող Արման Ծառուկյանի դեմ հնարավոր մենամարտի վերաբերյալ։

«Եթե մենամարտեմ Արմանի հետ, դա լավ դիմակայություն կլինի: Ես պատրաստվում եմ նրան խայտառակել բոլորի աչքի առաջ: Նա կարծում է, թե իր ըմբշամարտը յուրահատուկ մի բան է, կարծես օլիմպիական չեմպիոն կամ աշխարհի լավագույն ըմբիշը լինի, բայց երբ մենք մտնում ենք օկտագոն, արքան ես եմ: Ես նրա հետ կանեմ այն, ինչ ցանկանամ»,- Թոփուրիայի խոսքերն է մեջբերում Վիկ Բլենդսին տված հարցազրույցից։

Իսպանացի մարտիկը նաև վստահություն է հայտնել, որ մենամարտը երկար չի տևի.

«Ես արդեն ասել եմ, որ կկոտրեմ նրա ծնոտն առաջին ռաունդում: Նա կփորձի գետնել ինձ հենց մենամարտի սկզբում, բայց երբ հասկանա, որ ինձ այդքան էլ հեշտ չէ բռնել ոտքերից ու տեղափոխել պարտեր, առավել ևս՝ վերահսկել գետնին, կսկսի խուճապի մատնվել։ Իսկ երբ նա խուճապի մատնվի, ես կկոտրեմ նրա ծնոտը»,- հավելել է չեմպիոնը։

Իլիա Թոփուրիան իր հաջորդ մենամարտը կանցկացնի հունիսի 14-ին Սպիտակ տանը կայանալիք UFC մրցաշարի գլխավոր իրադարձության շրջանակներում՝ ուժերը չափելով թեթև քաշային կարգի ժամանակավոր չեմպիոն Ջասթին Գեյջիի հետ: Նա թեթև քաշային կարգի տիտղոսը նվաճել է 2025-ի հունիսին կայացած UFC 317-ում՝ առաջին ռաունդում նոկաուտի ենթարկելով Չարլզ Օլիվեյրային: Թոփուրիան անպարտելի է՝ 17 հաղթանակով:

Արման Ծառուկյանը վերջին անգամ օկտագոն է դուրս եկել 2025 թվականի նոյեմբերին՝ Կատարում կայացած UFC Fight Night 265 մրցաշարում: Նա երկրորդ ռաունդում խեղդող հնարքով պարտության է մատնել Դեն Հուքերին: Հայ մարտիկի ակտիվում կա 23 հաղթանակ և 3 պարտություն:

UFC-ի անպարտելի չեմպիոն Իլիա Թոփուրիան հետաքրքրված է մինչև 70 կգ քաշային կարգի վարկանիշային աղյուսակի 2-րդ համար Արման Ծառուկյանի դեմ մենամարտով՝ դիտարկելով այն որպես տիտղոսի պաշտպանության առաջիկա տարբերակներից մեկը:

Ինչպես հայտնում է ESPN-ի լրագրող Կարլոս Լեգասպին, դա կարող է տեղի ունենալ Ջասթին Գեյջիի հետ դիմակայությունից հետո կայանալիք UFC-ի մրցաշարում։

«Նա իսկապես ցանկանում է մենամարտել Արմանի հետ: Եթե նա տիտղոսի ևս մեկ պաշտպանություն ունենա, ապա ցանկանում է, որ հաջորդ մրցակիցը հենց Արմանը լինի: Այս փուլում դա արդեն անհնար կլինի հերքել:

Կարծում եմ՝ եթե Իլիան հաղթի, տիտղոսի հաջորդ պաշտպանությունը կլինի Արման Ծառուկյանի դեմ, իսկ հետո կտեսնենք, թե ինչ կլինի, քանի որ նա ունի նաև Իսլամ Մախաչևի հետ մենամարտելու հավակնություններ»,- Լեգասպիի խոսքերն է մեջբերում Championship Rounds էջը X սոցիալական ցանցում:

UFC-ի կիսաթեթև քաշային կարգի անպարտելի չեմպիոն, վրաց-իսպանացի Իլիա Թոփուրիան անդրադարձել է կազմակերպության թեթև քաշային կարգի (մինչև 70 կգ) դասակարգման աղյուսակի երկրորդ համար, Հայաստանը ներկայացնող Արման Ծառուկյանի հնչեցրած արտահայտություններին։

Ավելի վաղ հայ մարտիկն իր հարցազրույցներում պարբերաբար խոսել էր Թոփուրիայի մասին՝ կիրառելով թրեշ-թոքի հնարքներ, ինչին ի պատասխան 29-ամյա չեմպիոնը նշել է, որ դրանք իրեն չեն անհանգստացնում։

«Անհնար է այդ լակոտի խոսքերը սրտին մոտ ընդունել։ Նա կարող է ասել այն ամենը, ինչ ցանկանում է. Արմանն իր ողջ օրը նվիրում է ինձ։ Ի՞նչ կարող եմ ասել։ Ես ոչ մեկի խոսքերը սրտին մոտ չեմ ընդունում։ Պետք է էշ լինել՝ դրանք նման կերպ ընդունելու համար»,- Թոփուրիայի խոսքերն է մեջբերում FREAK.MMA-ի X-ի էջը։

Նշենք, որ վրաց-իսպանացի մարզիկը խառը մենամարտերում իր պրոֆեսիոնալ նորամուտը նշել է 2015 թվականի ապրիլին։ Հյուսիսամերիկյան լիգայում (UFC) «Մատադորը» սկսել է հանդես գալ 2020 թվականի հոկտեմբերից։ Իլիայի ակտիվում կա 17 հաղթանակ (որոնցից միայն 2-ն են գրանցվել մրցավարների որոշմամբ) և ոչ մի պարտություն։ Արման Ծառուկյանն իր վերջին մենամարտն անցկացրել է այս տարվա ապրիլին՝ հաղթելով Չարլզ Օլիվեյրային։

UFC-ի թեթև քաշային կարգի գործող չեմպիոն Իլիա Թոփուրիան հայտարարել է, որ նույն քաշային կարգի դասակարգման երկրորդ համար Արման Ծառուկյանը, որը նրա և Ջասթին Գեյջիի մենամարտի պահեստային մարտիկն է, կհրաժարվի մենամարտից, եթե ամերիկացին դուրս գա պայքարից։

​«Եթե Գեյջին մենամարտից մեկ շաբաթ առաջ հրաժարվի, Ծառուկյանը չի փոխարինի նրան։ Նա չի մենամարտի։ Եթե նրան առաջարկեն ինձ հետ մենամարտել մեկ շաբաթվա ծանուցմամբ, նա դա չի անի։ Նա կներկայանա միայն կշռման արարողությանը, քանի որ նրան միշտ որպես պահեստային են պահում իմ մենամարտերի համար», — նշել է Թոփուրիան Ալվարո Կոլմեներոյին տված հարցազրույցում։

​Հիշեցնենք, որ Թոփուրիայի և Գեյջիի միջև տիտղոսայիմ մենամարտը կկայանա հունիսի 14-ին՝ ԱՄՆ-ի Սպիտակ տանն անցկացվող մրցաշարի շրջանակում։

UFC-ի չեմպիոն Իլիա Թոփուրիան կիսվել է իր կարծիքով թեթև քաշային կարգի առաջատար մարտիկ Արման Ծառուկյանի վերաբերյալ՝ կոշտ քննադատության ենթարկելով նրա պահվածքը։

«Նա փոքր երեխայի ուղեղ ունի, կարծես մեծացած, բայց չհասունացած տղա լինի։ Չգիտես ինչու՝ նա իրեն հարուստի տեղ է դնում։ Ընդ որում՝ նա այնքան էլ հարուստ չէ, ինչպես և իր հայրը։ Ես բազմաթիվ հարուստ մարդկանց եմ ճանաչում, նրանք իրենց այդպես չեն պահում։ Նրանցից ոչ մեկը, ոչ ոք։

Նա իրենից հարուստ է ձևացնում, ով կարող է մեքենա գնել և վերավաճառելու նպատակով այն ուղարկել Ռուսաստան։ Բայց իրականում նա այդքան էլ հարուստ չէ։ Նա պարզապես անհաջողակ է»,- Թոփուրիայի խոսքերն է մեջբերում ABC-ն։

UFC-ի թեթև քաշային կարգի դասակարգման երկրորդ համար Արման Ծառուկյանը խոստովանել է, որ իր համար տհաճ է լինել մինչև 70 կգ քաշային կարգում UFC-ի 29-ամյա անպարտելի չեմպիոն Իլիա Թոփուրիայի և ամերիկացի Ջասթին Գեյջիի միջև մենամարտի պահեստայինը:

Այդ դիմակայությունը կդառնա Սպիտակ տանը կայանալիք UFC-ի մրցաշարի գլխավոր իրադարձությունը։

​«Ես սպասումների մեջ եմ։ Եթե որևէ բան պատահի, ինձ կկանչեն, և ես դրան եմ պատրաստվում։ Արդեն դիետա եմ պահում։ Միշտ էլ տհաճ է պահեստային լինել, բայց ի՞նչ արած», — Ծառուկյանի խոսքերն է մեջբերում FREAK.MMA-ը։

Հիշեցնենք, որ Թոփուրիայի և Գեյջիի միջև չեմպիոնական գոտու համար գլխավոր մենամարտը կկայանա հունիսի 15-ին ԱՄՆ-ում՝ Սպիտակ տանը նախատեսված UFC-ի մրցաշարի շրջանակում։

Այսօր` մայիսի 12-ին UFC-ն թարմացրել է վարկանիշային աղյուսակն անկախ քաշային կարգերից, որտեղ ամենազգալի անկումը գրանցել է Խամզաթ Չիմաևը:

ԱՄԷ-ն ներկայացնող մարզիկը նահանջել է միանգամից յոթ հորիզոնականով և այժմ զբաղեցնում է 10-րդ տեղը: Այս նահանջն ուղղակիորեն կապված է UFC 328 մրցաշարում ամերիկացի Շոն Սթրիքլենդից մրցավարների ոչ միաձայն որոշմամբ կրած պարտության հետ: Սթրիքլենդն իր հերթին նորամուտը նշելով լավագույն տասնյակում՝ միանգամից հայտնվել է 7-րդ հորիզոնականում:

​Անկախ քաշային կարգերից լավագույն մարտիկների (Pound-For-Pound) աղյուսակում դիրքերի վատթարացում է ունեցել նաև Հայաստանի ներկայացուցիչ Արման Ծառուկյանը: Թեթև քաշային կարգի դասակարգման երկրորդ համարը վարկանիշում նահանջել է երկու հորիզոնականով՝ հանգրվանելով 15-րդ տեղում:

Հիշեցնենք, որ օրերս Ծառուկյանն աջակցել էր պարտություն կրած իր ընկերոջը՝ Չիմաևին, իսկ ինքը հունիսի 15-ին որպես պահեստային մարտիկ սպասելու է Իլիա Թոփուրիա — Ջասթին Գեյջի տիտղոսային դիմակայությանը:

Pound-For-Pound վարկանիշի լավագույն տասնյակն ունի հետևյալ տեսքը.

1. ​Իսլամ Մախաչև (Ռուսաստան)
2. Իլիա Թոփուրիա (Իսպանիա)
3. Ալեքսանդր Վոլկանովսկի (Ավստրալիա)
4. Ալեքս Պերեյրա (Բրազիլիա)
5. Պետր Յան (Ռուսաստան)
6. Թոմ Ասպինալ (Մեծ Բրիտանիա)
7. Մերաբ Դվալիշվիլի (Վրաստան)
8. ​Շոն Սթրիքլենդ (ԱՄՆ)
9. Ջոշուա Վան (ԱՄՆ)
10. Խամզաթ Չիմաև (ԱՄԷ)

UFC-ի թեթև քաշային կարգի գործող չեմպիոն Իլիա Թոփուրիան արձագանքել է նույն քաշային կարգի դասակարգման երկրորդ համար Արման Ծառուկյանին ամերիկացի Ջասթին Գեյջիի դեմ տիտղոսային մենամարտում որպես պահեստային նշանակելու որոշմանը։

«Ինձ բացարձակապես միևնույնն է։ Ինձ համար կարևոր է միայն այն, որ ամեն ինչ լավ անցնի։ Ես պատրաստվում եմ լինել օկտագոնում, ինչ էլ որ պատահի։ Իմ դեմ հանեք Ջասթինին, հանեք Արմանին կամ թեկուզ հենց ձեզ, ես լինելու եմ օկտագոնում։ Եվ արդյունքը նույնն է լինելու», — լրագրող Կոնտրերաս Լեգասպիին տված հարցազրույցում հայտարարել է Թոփուրիան։

Հիշեցնենք, որ Թոփուրիայի և Գեյջիի միջև չեմպիոնական գոտու համար գլխավոր մենամարտը կկայանա հունիսի 15-ին ԱՄՆ-ում՝ Սպիտակ տանը նախատեսված UFC-ի մրցաշարի շրջանակում։

UFC-ի թեթև քաշային կարգի դասակարգման երկրորդ համար, հայ մարտիկ Արման Ծառուկյանը պաշտոնապես հաստատվել է որպես Իլիա ԹոՓուրիայի և Ջասթին Գեյջիի միջև տիտղոսային մենամարտի պահեստային մասնակից:

Թեթև քաշային կարգում UFC-ի գործող չեմպիոն Թոփուրիայի և ժամանակավոր չեմպիոն Գեյջիի միջև կայանալիք մենամարտը գլխավորելու է UFC Freedom 250 տոնական մրցաշարը, որը կկայանա հունիսի 14-ին Վաշինգտոնում՝ Սպիտակ տան հարավային մարգագետնում։

Բլոգեր Նինա Դրամայի հետ զրույցում UFC-ի նախագահ Դանա Ուայթը հաստատել է այս տեղեկությունը։ Որպես պաշտոնական պահեստային մարտիկ՝ Ծառուկյանը կվարձատրվի մարզումների և թեթև քաշային կարգի լիմիտը (155 ֆունտ) ապահովելու համար. եթե գլխավոր մենամարտի մասնակիցներից մեկը որևէ պատճառով չկարողանա դուրս գալ օկտագոն, հայ մարտիկը կպայքարի չեմպիոնական գոտու համար:

«Արմանը Սպիտակ տանը կայանալիք գլխավոր մենամարտի պահեստայինն է։ Եթե այս մենամարտի հետ որևէ բան պատահի, նա փոխարինման դուրս կգա: Ահա թե ինչպես են գործերը»,- հայտարարել է կազմակերպության ղեկավարը։

Միևնույն ժամանակ, առայժմ հստակ չէ, թե ինչպես է Ծառուկյանը համատեղելու այս պարտավորությունն իր նախապես ծրագրված մենամարտի հետ: Բանն այն է, որ հունիսի 13-ին Սենթ Լուիսում կայանալիք RAF 10 մրցաշարում նա պետք է միջին քաշային կարգում մրցի վետերան Թոնի Ֆերգյուսոնի հետ: Թեև պաշտոնական պահեստայինի կարգավիճակը ենթադրում է քաշի նվազեցում մինչև թեթև քաշային կարգի սահմանագիծը, Real American Freestyle (RAF) լիգան առայժմ որևէ հայտարարություն չի տարածել Ֆերգյուսոնի հետ գոտեմարտի չեղարկման կամ հետաձգման վերաբերյալ։

UFC-ի միջին քաշային կարգի չեմպիոն Խամզաթ Չիմաևը խոսել է Արման Ծառուկյանի և Իլիա Թոփուրիայի միջև առկա կոնֆլիկտի, ինչպես նաև նրանց հնարավոր մենամարտում իր ունենալիք դերի մասին։

Sport24-ի հետ զրույցում, պատասխանելով այն հարցին, թե ում կընտրի և ում կողքին կլինի, եթե երկու մարտիկներն էլ նրան հրավիրեն իրենց անկյուն, Չիմաևը նշել է.

«Գուրամ Կուտատելաձեն՝ մի կողմում, իսկ ես՝ այս կողմում»։

Չիմաևը խոսել է նաև մարտիկների միջև վիրավորանքների տարափը դադարեցնելու և նրանց հաշտեցնելու հնարավորության մասին.

«Ինչո՞ւ հաշտեցնել նրանց։ Ավելի լավ է բիզնես անել և գումար վաստակել։ Եթե նրանց հաշտեցնես, գումար չի լինի»։

Լրագրողը հիշեցրել է նաև Արման Ծառուկյանի խոսքերն առ այն, որ հայազգի մարտիկը պատրաստ է գորգի վրա հաղթել Չիմաևին, եթե վերջինս իջեցնի քաշը։ Հարցին, թե ինչ շանսեր կունենա Ծառուկյանը միջին քաշային կարգ (185 ֆունտ) բարձրանալու դեպքում, չեմպիոնը պատասխանել է.

«Ես նրան ուսապարկիս մեջ կգցեմ, նա չափազանց փոքր է։ Բայց եթե լուրջ, Արմանը շատ լավ մակարդակ ունի, նրա հետ մարզվելը հիանալի է։ Նա շատ բարձրակարգ և ճկուն ըմբիշ է»։

Վերջում Խամզատ Չիմաևն անդրադարձել է երկրորդ չեմպիոնական գոտին նվաճելու իր ցանկությանն ու քաշային կարգը փոխելու հնարավորությանը.

«Ես չեմ սիրում շատ քաշ գցել։ Ավելի բարձր քաշային կարգ տեղափոխվելը միշտ էլ տարբերակ է, եթե դրա դիմաց լավ վճարեն»։

Հիշեցնենք, որ մայիսի 10-ին Խամզատ Չիմաևն իր հաջորդ մենամարտը կանցկացնի ԱՄՆ-ի Նյու Ջերսի նահանգում կայանալիք UFC 328 մրցաշարում։ Նա կպաշտպանի միջինքաշային կարգի չեմպիոնական տիտղոսը՝ ուժերը չափելով ամերիկացի Շոն Ստրիկլենդի հետ։