«Նեմանի» գլխավոր մարզիչ Իգոր Կովալևիչը մեկնաբանել է Կոնֆերենցիաների լիգայի շրջանակում «Ուրարտուի» նկատմամբ 2:1 հաշվով տարած հաղթանակը:

— Դիմակայությունում դեռ ոչինչ վճռված չէ, ավարտվել է միայն առաջին խաղը: Ուրախ ենք, որ հաղթեցինք, բայց ամեն ինչ կորոշվի պատասխան խաղում:

— Գո՞հ եք թիմի խաղից:

— Երկրորդ խաղակեսն ավելի գոհացուցիչ էր, քան առաջինը: Անկեղծ ասած, եթե մեզ նախապես ասեին, որ կհաղթենք 2:1 հաշվով, գոհ կլինեինք: Երկրորդ խաղակեսում կարող էինք ևս մեկ-երկու գոլ խփել, բայց հիասթափվելու պատճառ չկա:

— 2:0-ից հետո թիմը մի փոքր նահանջեց: Ինչո՞վ զարմացրեց «Ուրարտուն»:

— Մեր կազմում լուրջ խնդիրներ կան: Լեոնարդ Գվետը մրցաշրջանի ավարտին չի խաղա, Սերգեյ Պուշնյակովին չհամարձակվեցինք դաշտ հանել, Յուրի Կլոչկովը նույնպես բացակայում էր: Յուրի Պանտին երեկ ջերմություն ուներ, ուստի նա մեկնարկային կազմում չէր: Փաստորեն, փոխարինման դուրս եկած խաղացողները խաղում էին իրենց հիմնական դիրքերից դուրս: «Ուրարտուն» 2:0-ից հետո որոշակի առավելություն ուներ, բայց չեմ կարող ասել, որ նրանք վտանգավոր պահեր ստեղծեցին:

— Ի՞նչ կասեք խաղի թեժ վերջաբանի մասին: Ինչպե՞ս հանգստացրիք ֆուտբոլիստներին:

— Դա պարզապես հույզեր էին, դա ֆուտբոլ է: Բոլորն էլ նորմալ մարդիկ են, որևէ չարություն չկար:

— Որո՞նք են թիմի առաջիկա տեղափոխման պլանները:

— Հուլիսի 12-ին թռչում ենք Վիեննա, այնուհետև կտեղափոխվենք Հունգարիայի Դյոր քաղաք:

Հիշեցնենք, որ պատասխան հանդիպումը կկայանա հուլիսի 17-ին: «Նեմանի» ֆուտբոլիստները կլինեն պայմանական դաշտի տերերը, սակայն խաղը կանցկացվի Հունգարիայում:

«Նեմանի» գլխավոր մարզիչ Իգոր Կովալևիչը կիսվել է իր սպասելիքներով Կոնֆերենցիայի լիգայի խաղարկության որակավորման առաջին փուլի՝ «Ուրարտուի» դեմ առաջիկա խաղերի վերաբերյալ։

«Նախևառաջ, ուզում եմ շնորհակալություն հայտնել հայկական կողմին ջերմ ընդունելության, մեր կացարանի, մարզումների և հանդիպումների համար ստեղծված պայմանների համար։ Ինչ վերաբերում է թիմի նախապատրաստությանը, ապա մենք լավ խաղացինք առաջնության վերջին խաղերում, բայց մեզ անհանգստացնում է այն փաստը, որ հարձակման գծում երեք ֆուտբոլիստներ վնասվածք ունեն, ուստի մեր ընտրությունը սահմանափակ է։ Ընտրելու շատ բան չկա․ խաղադաշտ դուրս եկողները կգործադրեն առավելագույն ջանքեր»։

— Այն փաստը, որ Ձեր մրցակիցը մեկամսյա ընդմիջում է ունեցել, զեզ համար պլյո՞ւս է, թե՞ մինուս։

«Կան և՛ դրական, և՛ բացասական կողմեր։ Եթե թիմը մեկ ամիս չի խաղացել, դա նշանակում է, որ այն ուժ ունի երկու խաղ խաղալու համար։ Մյուս կողմից՝ «Ուրարտուի» կազմում շատ փոփոխություններ չկան․ երկու կենտրոնական պաշտպան և մեկ դարպասապահ, թիմի միջուկը պահպանվել է։ Մենք քիչ տեղեկություններ ունենք, որոշ բաներ գիտենք անձնական զրույցներից։ Գիտենք, թե ինչպես է թիմը խաղացել անցյալ տարի։ Կարծում եմ՝ նրանք նույն ֆուտբոլը կցուցադրեն»։

— Ի՞նչ է ձեզ համար նշանակում կրկին Հայաստանի, Երևանի հետ հանդիպումը։

«Ես այստեղ էի 2014 թվականին, երբ գլխավորում էի Բելառուսի երիտասարդական հավաքականը։ Մենք պարտվեցինք 1:2 հաշվով։ Հաճելի է այս քաղաքում լինել, տեսնել հյուրընկալ մարդկանց։ Սա ընկերների հանդիպում է, և խաղը կորոշի ուժեղագույնին»։

Հիշեցնենք, որ «Նեմանի» և «Ուրարտուի» միջև առաջին խաղը կկայանա վաղը՝ հուլիսի 10-ին, ժամը 20:30-ին։