Մադրիդի «Ռեալը» վերսկսել է մարզումները. Ժոզե Մոուրինյուն թիմին նախապատրաստում է մրցաշրջանի վերսկսմանը։ Իսպանական հեղինակավոր AS պարբերականն անդրադարձել է մադրիդյան ակումբի կադրային ներկայիս վիճակին և ֆուտբոլիստների ապաքինման ընթացքին։

Գլխավոր նորությունը Էդեր Միլիտաոյի վերադարձն է։ Բրազիլացի պաշտպանը, որի ապաքինումը պահանջել է ավելի քան հինգ ամիս, մարզման մի մասն արդեն անցկացրել է ընդհանուր խմբում։ Ակնկալվում է, որ նրա վերադարձը խաղադաշտ կլինի աստիճանական։

Ինչ վերաբերում է Կիլիան Մբապեին, Ֆեդերիկո Վալվերդեին և Իբրահիմա Կոնատեին, ապա նրանք երկուշաբթի՝ սեպտեբերի 28-ի մարզումն անցկացրել են մարզասրահում։

Միևնույն ժամանակ, Ֆերլան Մենդին և Ռոդրիգոն աշխատել են խոտածածկին, սակայն առանձնացված. վերականգնողական գործընթացի շրջանակում ֆուտբոլիստները կատարել են անհատական վարժություններ՝ չմիանալով ընդհանուր խմբին։

Հավելենք, որ «արքայական» ակումբն իր առաջիկա հանդիպումը կանցկացնի հոկտեմբերի 10-ին՝ սեփական հարկի տակ հյուրընկալելով «Վիլյառեալին»։

Մադրիդի «Ռեալի» և Ֆրանսիայի ազգային հավաքականի հարձակվող Կիլիան Մբապեն ծնկի վնասվածքի պատճառով լքել է ազգային թիմի ճամբարը։ Այս մասին տեղեկանում ենք «եռագույնների» մամուլի ծառայության՝ սոցիալական ցանցերում տարածած պաշտոնական հաղորդագրությունից։

«Կիլիան Մբապեն ծնկի վնասվածք է ստացել այն հարվածի ժամանակ, որն ավարտվեց հաղթական գոլով։ Խաղացողի մոտ ախտորոշվել է ջլի վնասվածք, ինչի պատճառով նա ստիպված է բաց թողնել հավաքի մնացած հատվածը։ Շուտափույթ ապաքինում, Կիլիա՛ն»,- ասված է հայտարարության մեջ։

Հիշեցնենք, որ Ֆրանսիայի հավաքականի ավագը վնասվածքն ստացել էր Ազգերի լիգայի A լիգայի խմբային փուլի առաջին տուրի՝ Թուրքիայի դեմ ուրբաթ` սեպտեմբերի 25-ին կայացած խաղում (1-0): 27-ամյա հարձակվողը 54-րդ րոպեին դարձել էր հանդիպման միակ և հաղթական գոլի հեղինակը, սակայն ծնկի հետ կապված խնդիրների պատճառով չէր կարողացել շարունակել հանդիպումն ու արդեն 59-րդ րոպեին փոխարինվել էր։

Սպասվում է, որ մոտ ժամանակներս Մբապեն կվերադառնա Մադրիդ, որտեղ կենթարկվի լրացուցիչ բժշկական հետազոտության՝ ապաքինման ստույգ ժամկետները պարզելու նպատակով։

Հիշեցնենք, որ ավելի վաղ «եռագույնների» ճամբարը ծնկի կապանի վնասվածքի պատճառով լքել էր նաև Մադրիդի «Ռեալի» կենտրոնական պաշտպան Իբրահիմա Կոնատեն։

Մադրիդի «Ռեալի» և Ֆրանսիայի ազգային հավաքականի պաշտպան Իբրահիմա Կոնատեն աջ ծնկի կապանների վնասվածք է ստացել։ Այդ պատճառով ֆուտբոլիստը ստիպված է եղել լքել ազգային թիմի ճամբարը։

Ինչպես հայտնում է «եռագույնների» մամուլի ծառայությունը, Ֆրանսիայի հավաքականի գլխավոր մարզիչ Զինեդին Զիդանը Կոնատեի փոխարեն թիմ է հրավիրել «Մանչեսթեր Յունայթեդի» պաշտպան Լենի Յորոյին։

Առաջիկայում ֆրանսիական ընտրանին մի քանի հանդիպում կանցկացնի ՈւԵՖԱ-ի Ազգերի լիգայի խմբային փուլում։ Զիզուի գլխավորած թիմի մրցակիցները կլինեն Թուրքիայի, Բելգիայի և Իտալիայի հավաքականները։

Հիշեցնենք, որ Զիդանը Ֆրանսիայի հավաքականի ղեկը ստանձնել է այս տարվա ամռանը՝ ստորագրելով 4 տարվա պայմանագիր։

Իսպանիայում մեկնարկել է Լա լիգայի նոր մրցաշրջանը։ Առաջնության գլխավոր ֆավորիտները շարունակում են մնալ կատալոնական «Բարսելոնան» ու Մադրիդի «Ռեալը», որոնց ֆուտբոլիստներն էլ վաստակում են տպավորիչ գումարներ։

Ամենաբարձր վարձատրվող խաղացողների ցուցակը գլխավորում են մադրիդյան գրանդի հարձակվողներ Կիլիան Մբապեն և Վինիսիուս Ժունիորը։ Լավագույն եռյակը բաժանում են Ջուդ Բելինգհեմը, Լամին Յամալը և Յան Օբլակը։

Լա լիգայի ամենաբարձր վարձատրվող 20 ֆուտբոլիստները (2026 թ․)

• Կիլիան Մբապե («Ռեալ Մադրիդ») – շաբաթական 513,273 եվրո
• Վինիսիուս Ժունիոր («Ռեալ Մադրիդ») – շաբաթական 513,273 եվրո
• Ջուդ Բելինգհեմ («Ռեալ Մադրիդ») – շաբաթական 342,127 եվրո
• Լամին Յամալ («Բարսելոնա») – շաբաթական 342,127 եվրո
• Յան Օբլակ («Ատլետիկո Մադրիդ») – շաբաթական 342,127 եվրո
• Ռոդրի («Բարսելոնա») – շաբաթական 329,300 եվրո
• Նիկո Ուիլյամս («Ատլետիկ Բիլբաո») – շաբաթական 282,341 եվրո
• Ֆեդերիկո Վալվերդե («Ռեալ Մադրիդ») – շաբաթական 273,800 եվրո
• Ռաֆինյա («Բարսելոնա») – շաբաթական 273,800 եվրո
• Ռոդրիգո («Ռեալ Մադրիդ») – շաբաթական 273,800 եվրո
• Տրենտ Ալեքսանդր-Առնոլդ («Ռեալ Մադրիդ») – շաբաթական 273,800 եվրո
• Իբրահիմա Կոնատե («Ռեալ Մադրիդ») – շաբաթական 273,800 եվրո
• Բերնարդու Սիլվա («Ռեալ Մադրիդ») – շաբաթական 263,453 եվրո
• Ժյուլ Կունդե («Բարսելոնա») – շաբաթական 256,718 եվրո
• Տիբո Կուրտուա («Ռեալ Մադրիդ») – շաբաթական 246,371 եվրո
• Անտոնիո Ռուդիգեր («Ռեալ Մադրիդ») – շաբաթական 239,473 եվրո
• Էդեր Միլիտաո («Ռեալ Մադրիդ») – շաբաթական 239,473 եվրո
• Ֆրենկի դե Յոնգ («Բարսելոնա») – շաբաթական 213,850 եվրո
• Խուլիան Ալվարես («Ատլետիկո Մադրիդ») – շաբաթական 205,309 եվրո
• Կարիմ Ադեյեմի («Բարսելոնա») – շաբաթական 205,309 եվրո

Մադրիդի «Ռեալի» մամուլի ծառայությունը պաշտոնապես հայտարարել է ֆրանսիացի պաշտպան Իբրահիմա Կոնատեի տեղափոխության մասին:

​Անգլիական «Լիվերպուլի» նախկին ֆուտբոլիստը «արքայական» ակումբին միացել է ազատ գործակալի կարգավիճակով։ Կողմերը կնքել են աշխատանքային համաձայնագիր, որը նախատեսված է մինչև 2030 թվականի հունիսի վերջը:

​Հիշեցնենք, որ Կոնատեի տրանսֆերը ակումբի նախագահ Ֆլորենտինո Պերեսի նախընտրական արշավի գլխավոր խոստումներից մեկն էր։ Պերեսը վերընտրվել էր իր պաշտոնում կիրակի օրը՝ հունիսի 7-ին կայացած ընտրություններում։ Ներկայումս ֆրանսիացի պաշտպանը գտնվում է ազգային հավաքականի ճամբարում և մասնակցում է 2026 թվականի աշխարհի առաջնությանը։

​Հավելենք, որ Մադրիդի «Ռեալը» նախորդ մրցաշրջանն ավարտել է Լա Լիգայի մրցաշարային աղյուսակի երկրորդ հորիզոնականում՝ Իսպանիայի չեմպիոնի տիտղոսը զիջելով կատալոնական «Բարսելոնային»։

79-ամյա Ֆլորենտինո Պերեսը վերընտրվել է Մադրիդի «Ռեալի» նախագահի պաշտոնում և կշարունակի ղեկավարել «արքայական» ակումբը մինչև 2030 թվականը։ Կիրակի օրը կայացած ընտրություններում նա վստահ հաղթանակ է տարել իր միակ մրցակցի՝ իսպանացի գործարար Էնրիկե Ռիկելմեի նկատմամբ։

Ըստ նախնական տվյալների՝ Պերեսը ստացել է ձայների շուրջ 65,95%-ը, մինչդեռ Ռիկելմեի օգտին քվեարկել է ընտրողների 34,05%-ը։ Գործող նախագահը բացարձակ առավելության է հասել բոլոր 60 ընտրատեղամասերում։ Սա Պերեսի ութերորդ անընդմեջ ժամկետն է այս պաշտոնում, որը նա զբաղեցնում է 2009 թվականից:

Պերեսի վերընտրվելու գլխավոր ինտրիգներից մեկը նոր գլխավոր մարզչի հարցն է։ Ինչպես և սպասվում էր, նախագահն իր ելույթում հաստատել է Ժոզե Մոուրինյուի վերադարձը։ Պորտուգալացի «Հատուկը» կգլխավորի մադրիդցիներին 13 տարվա դադարից հետո։ Բացի այդ, դեռևս նախընտրական փուլում Պերեսն արդեն իսկ հայտարարել էր «Լիվերպուլից» պաշտպան Իբրահիմա Կոնատեի և Միլանի «Ինտերից» Դենզել Դումֆրիսի տրանսֆերների մասին։

Ընտրությունների արդյունքների հրապարակումից հետո Ֆլորենտինո Պերեսը հանդես է եկել պաշտոնական հայտարարությամբ.

«Սա երջանիկ և մեծ օր է ինձ ու բոլոր մադրիդիստների համար։ Մենք հաղթեցինք բոլոր ընտրատեղամասերում և բոլոր տարիքային խմբերում՝ գրանցելով ակումբի պատմության մեջ երկրորդ լավագույն արդյունքը։ Մենք ընտանիք ենք և կշարունակենք միասին տիտղոսներ նվաճել։ Պայքարը 16-րդ Չեմպիոնների լիգայի գավաթի համար սկսվում է հենց այսօր։ Մենք շարունակելու ենք հպարտանալ մեր «Բեռնաբեուով», աշխարհի լավագույն թիմերից մեկով և աշխարհի լավագույն մարզիչներից մեկով՝ Ժոզե Մոուրինյուով»։

Պերեսը նաև նշել է, որ արդյունքները կարող էին ավելի տպավորիչ լինել, սակայն փոստով ուղարկված շուրջ 1000 քվե անվավեր է ճանաչվել, ինչը նրանք պատրաստվում են բողոքարկել։

Պարտված թեկնածու Էնրիկե Ռիկելմեն շնորհավորել է Պերեսին, սակայն ընդգծել է, որ իրենց պայքարը նոր է սկսվում.

«Սա մեզ համար վերջը չէ, սա միայն սկիզբն է։ Ակումբի անդամներն այլևս 20 տարի առանց ընտրության իրավունքի չեն մնա։ Մենք կարողացանք կանխել ակումբի վաճառքը»,- հայտարարել է Ռիկելմեն։

Հիշեցնենք, որ Իսպանիայի ավարտված առաջնությունում «Ռեալը» գրավել է երկրորդ տեղը՝ 8 միավորով զիջելով չեմպիոն «Բարսելոնային» և մրցաշրջանն ավարտելով առանց նվաճած տիտղոսների։ Ակումբի ղեկավարությունն ու երկրպագուները հույս ունեն, որ նոր ընտրաշրջանն ու մարզչական փոփոխությունները կվերադարձնեն թիմին հաղթական ուղի:

Մադրիդի «Ռեալի» նախագահ Ֆլորենտինո Պերեսը բացահայտել է թիմի առաջին ամառային տրանսֆերը, որը կիրագործվի այն դեպքում, եթե ինքը վերընտրվի ակումբի ղեկավարի պաշտոնում։

​Իսպանական AS պարբերականի հաղորդմամբ՝ Պերեսի վերընտրվելուց հետո «սերուցքայինների» առաջին ձեռքբերումը կլինի անգլիական «Լիվերպուլի» պաշտպան Իբրահիմա Կոնատեն։ ​Շրջանառվող լուրերի համաձայն՝ սպասվում է, որ «արքայական» ակումբը ֆրանսիացի ֆուտբոլիստի հետ կկնքի «4+1» ձևաչափով աշխատանքային պայմանագիր։

​Նշենք, որ ավարտված մրցաշրջանում 27-ամյա Կոնատեն մերսիսայդյան ակումբի կազմում անցկացրել է 51 հանդիպում՝ դառնալով 2 գոլի հեղինակ։ Ֆրանսիացին պաշտպանում էր «կարմիրների» գույները 2021 թվականից, իսկ մինչ այդ մեծահասակների մակարդակում հանդես է եկել գերմանական «Լայպցիգում» և ֆրանսիական «Սոշոյում»։

​Հավելենք նաև, որ պաշտպանն ընդգրկված է Ֆրանսիայի ազգային հավաքականի պաշտոնական հայտացուցակում՝ մասնակցելու աշխարհի 2026 թվականի առաջնությանը։

Մադրիդի «Ռեալը» մոտ է անգլիական «Լիվերպուլից» հեռացած կենտրոնական պաշտպան Իբրահիմա Կոնատեի հետ պայմանագիր կնքելուն։ Այս մասին հայտնում է հայտնի ինսայդեր Նիկոլո Սկիրան։

Աղբյուրի տեղեկություններով՝ 27-ամյա ֆուտբոլիստը մադրիդյան ակումբի հետ կկնքի աշխատանքային համաձայնագիր, որը նախատեսված կլինի մինչև 2031 թվականը։ Նշվում է, որ Կոնատեի տարեկան աշխատավարձը «արքայական» ակումբում կկազմի 10 միլիոն եվրո։

Իսպանական AS պարբերականն իր հերթին ընդգծում է, որ ֆրանսիացի խաղացողի հետ պայմանագիրը կկնքվի «4+1» ձևաչափով՝ չորս տարով՝ ևս մեկ մրցաշրջանով երկարաձգելու հնարավորությամբ:

Հիշեցնենք, որ օրեր առաջ՝ մայիսի 31-ին, «Լիվերպուլը» հայտարարել էր Կոնատեի հետ համագործակցությունը դադարեցնելու մասին: Պաշտպանը մերսիսայդյան ակումբի գույները պաշտպանում էր 2021 թվականի ամռանից։ Transfermarkt պորտալը ֆուտբոլիստի տրանսֆերային արժեքը ներկայումս գնահատում են 50 միլիոն եվրո։

Պաշտպան Իբրահիմա Կոնատեն այլևս հանդես չի գա «Լիվերպուլի» կազմում: Մերսիսայդյան ակումբը պաշտոնապես հայտարարել է, որ ֆրանսիացի ֆուտբոլիստն ամռանը կլքի թիմը՝ գործող պայմանագրի ժամկետի ավարտի պատճառով։

«Կարմիրները» շնորհակալություն են հայտնել Կոնատեին ակումբում ունեցած ելույթների համար և հաջողություն մաղթել նրան հետագա կարիերայում:

Դեռևս ապրիլին Կոնատեն լավատեսորեն էր տրամադրված «Լիվերպուլի» հետ պայմանագրի երկարաձգման բանակցությունների հարցում։ Սակայն, ըստ ամենայնի, կողմերին այդպես էլ չի հաջողվել ընդհանուր հայտարարի գալ նոր համաձայնագրի պայմանների շուրջ։ Այսպիսով, պաշտպանը հնարավորություն է ստանում որպես ազատ գործակալ տեղափոխվել այլ ակումբ։

Նշենք, որ Իբրահիմա Կոնատեն «Լիվերպուլում» անցկացրել է հինգ մրցաշրջան։ 27-ամյա ֆրանսիացու ակտիվում մերսիսայդյան ակումբի կազմում անցկացրած 183 պաշտոնական հանդիպում կա, որոնցում նա դարձել է 7 գոլի և 4 արդյունավետ փոխանցման հեղինակ։

Մադրիդի «Ռեալը» պատրաստվում է ամառային տրանսֆերային պատուհանի ընթացքում լրջորեն զբաղվել կազմի վերակառուցմամբ, որի շրջանակում պաշտպանական գծի ամրապնդումը համարվում է ակումբի առանցքային խնդիրներից մեկը։

Ինչպես հաղորդում է Diario Sport-ը, մադրիդցիների համար պաշտպանության կենտրոնում առաջնային թեկնածուն «Լիվերպուլի» ֆուտբոլիստ Իբրահիմա Կոնատեն է։ Եթե ֆրանսիացի պաշտպանը չերկարաձգի «կարմիրների» հետ գործող պայմանագիրը, որի ժամկետը լրանում է հունիսի վերջին, ապա նա տրանսֆերային շուկայում հասանելի կդառնա ազատ գործակալի կարգավիճակով։

Հատկանշական է, որ «արքայական» ակումբը դեռ անցյալ տարի համարվում էր Կոնատեի ձեռքբերման գլխավոր հավակնորդը, սակայն այն ժամանակ կողմերի հետաքրքրությունը նվազել էր։ Վերջին շաբաթներին 26-ամյա ֆուտբոլիստի՝ Մադրիդ հնարավոր տեղափոխության մասին խոսակցությունները կրկին թափ են հավաքել։

Transfermarkt պորտալը կենտրոնական պաշտպանի տրանսֆերային արժեքը գնահատում է 50 մլն եվրո։