Մարզական մամուլի միջազգային ասոցիացիայի (AIPS) վարկածով՝ աշխարհի 2026 թվականի առաջնության լավագույն ֆուտբոլիստ է ճանաչվել Արգենտինայի ազգային հավաքականի ավագ Լիոնել Մեսսին։

Քվեարկությանն ընդհանուր առմամբ մասնակցել է 472 լրագրող՝ 121 երկրից։ Արդյունքների ամփոփումից հետո 39-ամյա արգենտինացին վաստակել է 1179 միավոր։ Նշենք, որ Մեսսին մրցաշարն ավարտել է 8 խփած գնդակով՝ դառնալով աշխարհի առաջնության լավագույն ռմբարկուների ցուցակի երկրորդ համարը։

AIPS-ի վարկածով ԱԱ-2026-ի լավագույն 10 ֆուտբոլիստները․

1. Լիոնել Մեսսի (Արգենտինա) — 1179 միավոր
2. Կիլիան Մբապե (Ֆրանսիա) — 717 միավոր (10 գոլով՝ մրցաշարի լավագույն ռմբարկու)
3. Ջուդ Բելինգեմ (Անգլիա) — 470 միավոր
4. Էրլինգ Հալանդ (Նորվեգիա) — 460 միավոր
5. Լամին Յամալ (Իսպանիա) — 304 միավոր
6. Ռոդրի (Իսպանիա) — 285 միավոր (մրցաշարի պաշտոնական լավագույն խաղացող)
7. Վոզինյա (Կաբո Վերդե) — 189 միավոր
8. Հարի Քեյն (Անգլիա) — 130 միավոր
9. Միկել Օյարսաբալ (Իսպանիա) — 118 միավոր
10. Մայքլ Օլիսե (Ֆրանսիա) — 91 միավոր

Հիշեցնենք, որ աշխարհի 2026 թվականի առաջնության չեմպիոն է հռչակվել Իսպանիայի հավաքականը՝ եզրափակիչում 1-0 հաշվով պարտության մատնելով Արգենտինայի ընտրանուն։

Կաբո Վերդեի ազգային հավաքականի դարպասապահ Ժոզիմար Վոզինյան դարպասապահների շրջանում հետևորդների քանակով դարձել է պատմության ռեկորդակիր։

Սոցցանցում` Inatagram-ում նրա լսարանը գերազանցել է 25,4 միլիոնի սահմանագիծը։

Այսպիսով, Վոզինյան շրջանցել է Մադրիդի «Ռեալի», «Պորտուի» և Իսպանիայի հավաքականի լեգենդ Իկեր Կասիլյասին, որն ունի 20,5 միլիոն հետևորդ։

Գործող դարպասապահների շրջանում Վոզինյայի գլխավոր հետապնդողը նույնպես Մադրիդի «Ռեալի» ներկայացուցիչ է՝ ի դեմս Տիբո Կուրտուայի (18 միլիոն)։

Հիշեցնենք, որ 2026 թվականի աշխարհի առաջնության խմբային փուլում Իսպանիայի դեմ կայացած առաջին խաղում Վոզինյան դարձել էր Կաբո Վերդեի հավաքականի հերոսը։ Նա 7 սեյվ էր կատարել և օգնել իր թիմին հանդիպումն ավարտել ոչ-ոքի (0-0)։

Արդյունքում Կաբո Վերդեն դուրս էր եկել խմբից և 1/16 եզրափակիչում միայն լրացուցիչ ժամանակում էր զիջել Արգենտինային (2-3):

Կաբո Վերդեի ազգային հավաքականի դարպասապահ Վոզինյան մեկնաբանել է թիմի դուրս մնալը 2026 թվականի Աշխարհի առաջնությունից:

Հիշեցնենք, որ ԱԱ-2026-ի 1/16 եզրափակչում Կաբո Վերդեի ընտրանին համառ պայքարում, լրացուցիչ ժամանակում 2:3 հաշվով զիջեց Արգենտինայի հավաքականին՝ ավարտելով իր ելույթները մրցաշարում: Նշենք, որ 40-ամյա դարպասապահը դարձել է այս Մունդիալի ամենասիրված և քննարկվող ֆուտբոլիստներից մեկը։

«Շատերը կարծում էին, թե Արգենտինայի համար սա հեշտ հաղթանակ է լինելու, բայց մենք հավասարը հավասարի պես էինք պայքարում։ Թիմն արեց հնարավոր ամեն ինչ հանդիպումը հաղթելու համար, սակայն մեզ դա չհաջողվեց։ Մենք տխրել ենք արդյունքից, բայց միևնույն ժամանակ ունենք բոլոր հիմքերը՝ գոհ լինելու և հպարտանալու այն ամենով, ինչի հասանք այս Աշխարհի առաջնությունում»,- Վոզինյայի խոսքերն է մեջբերում հայտնի լրագրող Դևիդ Օրնշտեյնը X սոցիալական ցանցում:

Փորձառու դարպասապահը նաև ընդգծել է, որ իրենք կարողացան աշխարհի քարտեզի վրա նորովի ներկայացնել իրենց երկիրը.

«Ես հպարտ եմ տղաներով և ինքս ինձնով: Մենք արժանապատվորեն ներկայացրինք Կաբո Վերդեն աշխարհի շատ երկրների համար: Արեցինք այն ամենն, ինչ կարող էինք, և այժմ հաջողություն եմ մաղթում ապագա հաղթողներին»,- եզրափակել է Վոզինյան:

Արգենտինայի ազգային հավաքականի ավագ Լիոնել Մեսսին կիսվել է 2026 թվականի Աշխարհի առաջնության 1/16 եզրափակչում Կաբո Վերդեի դարպասապահ Վոզինյայի ցուցադրած խաղից ստացած տպավորություններով։

Հիշեցնենք, որ հանդիպումն ավարտվել է արգենտինացիների դժվարին հաղթանակով՝ լրացուցիչ ժամանակում գրանցված 3:2 հաշվով։

Խաղից հետո կայացած ճեպազրույցի ընթացքում արգենտինացի աստղը պատասխանել է լրագրողների հարցերին.

— Կաբո Վերդեի դարպասապահն այսօր հետ մղեց Ձեր բազմաթիվ հարվածները…

— Մի փոքր հիասթափված էի գոլ խփելու բազմաթիվ անհաջող փորձերից, բայց, ի վերջո, հաջողվեց մեկ անգամ աչքի ընկնել, և դա շատ կարևոր գոլ էր։ Ինձ ասացին, որ նա արդեն 40 տարեկան է, և, անկեղծ ասած, ես պարզապես ապշած էի նրա այսօրվա խաղով: Եզրափակիչ սուլիչից հետո մոտեցա նրան, և նա շնորհավորեց ինձ,- Մեսսիի խոսքերն է մեջբերում հայտնի լրագրող Դեյվիդ Օրնշտեյնը X  սոցիալական ցանցում։

Նշենք, որ ԱԱ-2026-ի 1/8 եզրափակչում Արգենտինայի հավաքականն ուժերն է չափելու Եգիպտոսի ընտրանու հետ։

ԱՄՆ-ում, Կանադայում և Մեքսիկայում ընթացող ֆուտբոլի 2026 թվականի աշխարհի առաջնության H խմբի առաջին տուրում գրանցվել է մրցաշարի առաջին իսկական սենսացիան: Կաբո-Վերդեի հավաքականը գոլազուրկ ոչ-ոքի (0:0) է խաղացել աշխարհի ուժեղագույն թիմերից մեկի՝ Իսպանիայի ազգային ընտրանու հետ։ Խաղի գլխավոր հերոսը Կաբո-Վերդեի 40-ամյա դարպասապահ Ժոզիմար Վոզինյան էր։

Ատլանտայի «Մերսեդես-Բենց Սթեդիում» մարզադաշտում կայացած խաղում իսպանացիները 27 հարված են կատարել դեպի դարպասը (7-ը՝ դիպուկ), սակայն Վոզինյան կատարել է 7 տպավորիչ սեյվ և անառիկ պահել սեփական դարպասը: Այս ցուցանիշի շնորհիվ նա ճանաչվել է հանդիպման լավագույն ֆուտբոլիստ:

Ավելին, 40-ամյա Ժոզիմարը դարձել է աշխարհի առաջնությունների պատմության ամենատարեց դարպասապահը, ով իր նորամուտի խաղում դարպասը պահել է անառիկ: Հատկանշական է ուժերի հարաբերակցությունը մինչև հանդիպումը. ՖԻՖԱ-ի համաշխարհային վարկանիշային աղյուսակում Իսպանիան զբաղեցնում է 3-րդ, իսկ Կաբո-Վերդեն՝ ընդամենը 64-րդ հորիզոնականը:

Սենսացիոն արդյունքն ապահովելուց հետո Վոզինյան չի կարողացել զսպել արցունքները խաղադաշտում: Ավելի ուշ դարպասապահը կիսվել է իր հույզերով AS պարբերականի հետ զրույցում.

«Հիանալի հանդիպում էր: Մենք աներևակայելի շատ էինք աշխատել այս պահի և այս երազանքի համար: Մենք շատ հպարտ ենք: Գիտեինք, որ հեշտ չի լինելու: Մենք եկել ենք աշխարհի առաջնություն մրցակցելու համար: Գիտեմ, որ կան մարդիկ, ովքեր մեզ համարում են փոքր և թույլ թիմ, սակայն մենք այստեղ ենք պայքարելու և մեր առավելագույնը տալու համար»։

ԱԱ-2026-ում գրանցած ֆանտաստիկ ելույթից հետո դարպասապահի հայտնիությունը համացանցում կտրուկ աճել է: Մինչև իսպանացիների դեմ խաղը նրա սոցցանցերի հետևորդների քանակը 46 հազար էր, իսկ խաղից անմիջապես հետո այն հասել է 1,6 միլիոնի:

Հետաքրքիր է, որ Վոզինյան այժմ հանդես է գալիս պորտուգալական Երկրորդ լիգան ներկայացնող «Շավեշ» ակումբում: Transfermarkt պորտալի տվյալներով՝ նրա պայմանագիրն ակումբի հետ ավարտվում է այս տարվա հունիսի 30-ին, և նա կդառնա ազատ գործակալ։

Նշենք, որ H խմբի երկրորդ տուրում Կաբո-Վերդեն կմրցի Ուրուգվայի հետ (հունիսի 22), իսկ երրորդ տուրում ուժերը կչափի Սաուդյան Արաբիայի ընտրանու հետ (հունիսի 27):