Հայաստանի չեմպիոն «Նոան» ՈւԵՖԱ Կոնֆերենցիաների լիգայի 2025/2026թթ․ խաղարկության որակավորման փլեյ-օֆֆ փուլի պատասխան խաղում տանը 3:2 հաշվով հաղթեց Սլովենիայի չեմպիոն «Օլիմպիային»։

Մրցակցի գլխավոր մարզիչը նշել է, որ առաջին խաղում գրանցված արդյունքը թույլ չտվեց իր թիմին հրաշքներ գործել։

«Երբ խաղի սկզբում հաշիվը 0:2 է, դժվար է խոսել առանց ավելորդ զգացմունքների: Այնուամենայնիվ, պատասխան խաղում մենք ստեղծեցինք բազմաթիվ գոլային հնարավորություններ, որոնցից կարող էինք ավելի շատ օգուտ քաղել: Ես գոհ եմ, թե ինչպես թիմը արձագանքեց 0:2 հաշվին և փորձեց շտկել իրավիճակը: Թեև 2:2 հաշվով հավասարեցնելուց հետո մենք ևս մի քանի գոլային պահ ունեինք, առաջին խաղում կրած պարտությունը չափազանց ծանր էր:

Երկու հանդիպումների արդյունքներն ամփոփելով՝ պարզ է, որ Կոնֆերենցիաների լիգայի լիգայի փուլ անցավ ավելի ուժեղ թիմը: Ցավոք, այս աշնանը Լյուբլյանայում եվրոպական թիմեր չենք տեսնի», — ասել է «Օլիմպիայի» գլխավոր մարզիչ, 53-ամյա հոլանդացի մասնագետը՝ եվրոպական որակավորման մրցաշարից դուրս մնալուց հետո:

Հիշեցնենք, որ «Նոան» ԿԼ-ի լիգայի փուլում կմրցի «Լեգիայի», Կիևի «Դինամոյի», «Ռիյեկայի», Աբերդինի», Սիգմայի» և «Կրայովայի» հետ։

Այսօր՝ օգոստոսի 28-ին, Աբովյանի Վահագն Թումասյանի անվան «Քաղաքային» մարզադաշտում Հայաստանի չեմպիոն «Նոան» պատասխան խաղում կընդունի Սլովենիայի չեմպիոն «Օլիմպիային»։

«Օլիմպիայի» գլխավոր մարզիչ Էրվին վան դե Լոյը գնահատել է իր թիմի հնարավորություններն առաջիկա խաղում։

«Եղանակը մեզ մի փոքր զարմացրեց։ Քամին ուժեղ է, մարզադաշտը՝ համեմատաբար փոքր, և մենք պետք է հարմարվենք։ Սովորական պայմաններ չեն, բայց դրանք կարող են նույնիսկ օգնել մեզ։ Քանի որ հաշվի մեջ հետ ենք, պետք է ավելի շատ ռիսկի դիմենք։

Առաջին խաղում, հատկապես պաշտպանությունում, շատ սխալներ թույլ տվեցինք։ Վաղը պետք է դրանք ուղղենք, և ես հավատում եմ, որ դա մեզ կհաջողվի»,- վան դե Լոյի խոսքն է մեջբերում «Օլիմպիայի» պաշտոնական կայքը։

Հիշեցնենք, որ թիմերի միջև կայացած առաջին խաղում «Նոան» հաղթել է 4:1 հաշվով։

«Օլիմպիայի» ղեկավարությունը նախորդ մրցաշրջանի ավարտից հետո կրկին որոշեց քանդել չեմպիոնական թիմը, սակայն այս անգամ գնաց չափազանց հեռու: Եթե նախկինում հեռացավ միայն Ալբերտ Ռիերան, ապա այժմ տեղի ունեցան բազմաթիվ կարևոր կադրային փոփոխություններ: Որոշ խաղացողներ չեն կարող խաղալ, մյուսները լքել են թիմը: Արդյունքում՝ ակումբը հայտնվեց ճգնաժամում, գրում է սլովենական Planet Nogomet-ը:

«Ժորժե Սիմաոն դարձավ քավության նոխազ՝ մեղադրվելով այն բանի համար, ինչ ինքը չէր արել: Էրվին վան դե Լոյին ընտրեցին, քանի որ նա «նվաճել էր տիտղոսներ» և «սիրում էր աշխատել երիտասարդների հետ»: Սակայն, երբ գնացքը սլանում է դեպի անդունդ, նույնիսկ Սուպերմենը չի կարող այն կանգնեցնել:

«Օլիմպիան» նոր հատակ գտավ հինգշաբթի երեկոյան, երբ «Ստոժիցե» մարզադաշտում խայտառակ կերպով պարտվեց «Նոային»: Տարիներ առաջ նման կործանարար պարտություն էր կրել «Ռիեկան», այժմ նույն ճակատագիրը բաժին հասավ «վիշապներին»: Էրվին վան դե Լոյն ընդամենը ականատես էր այս «կրկեսին», որը սկսվել էր շատ ավելի վաղ, քան հայկական թիմի ջախջախիչ հաղթանակը երկրի ամենամեծ մարզադաշտում:

Այժմ «Օլիմպիան» ծնկաչոք է, մինչդեռ «Նոան» մոտ է Կոնֆերենցիաների լիգայի խմբային փուլին»,- ահա այսպիսի նախաբանով է ներկայացրել սլովենական մամուլն «Օլիմպիայի» գլխավոր մարզչի հետխաղյա ասուլիսը։

«Գիտեինք, որ մրցակիցը ֆիզիկապես ուժեղ է: Բարձր պրեսինգի ժամանակ մենք լավ պահեր ունեինք, խաղի ընթացքում ավելի շատ էինք վերահսկում գնդակը, բայց ընդունեցինք չափազանց հեշտ գոլեր: Մեր պաշտպանությունը չափազանց միամիտ էր, չափազանց անորոշ։

Երկրորդ խաղակեսում մի քանի փոխարինում կատարեցինք, այդ թվում՝ որոշ խաղացողների ֆիզիկական վիճակի պատճառով: Ունեինք հնարավորություններ, բայց չափազանց թույլ ավարտեցինք մեր լավագույն հարձակումները: Երբ պաշտպանվում ես այնպես, ինչպես մենք այսօր, հաղթելը գրեթե անհնար է: Չափազանց հեշտ էինք կորցնում գնդակը: Արդյունքը վատ է, և դա, առաջին հերթին, թույլ պաշտպանության հետևանք է:

Մեզ մոտ նոր գաղափարներ չկան, մենք պարզապես հարմարեցնում ենք առկա մոտեցումները: Իմ այստեղ գտնվելու ընթացքում մենք ունեցել ենք ընդամենը մեկ լիարժեք մարզում և բազմաթիվ ժողովներ, բայց ժամանակը սուղ է: Արդյունքը վատ է, սակայն ես վստահ եմ, որ կդառնանք ավելի լավը: Կորցրել ենք մի քանի կարևոր խաղացողի, և թիմն այլևս այն չէ, ինչ նախորդ տարի: Սա արդարացում չէ, մենք պետք է ավելի լավը լինենք: Պարտությունը վնասում է ինքնավստահությանը: Մենք խփեցինք մեկ գոլ, կարող էինք ավելին: 1:4 հաշվով պարտվելը բոլորին ընկճում է, բայց պետք է կենտրոնանալ դրական պահերի վրա:

Այժմ կենտրոնանում ենք կիրակնօրյա խաղի վրա, իսկ պատասխան հանդիպման մասին խոսելը դեռ վաղ է: Խաղացողներին ընտրում եմ նաև նրանց ֆիզիկական պատրաստվածության հիման վրա, որը որոշների մոտ իդեալական չէ»,- ասել է հոլանդացի մասնագետը։

ՈւԵՖԱ Կոնֆերենցիաների լիգայի 2025/2026թթ․ խաղարկության որակավորման փլեյ-օֆֆ փուլում Հայաստանի չեմպիոն «Նոան» արտագնա խաղում կհանդիպի Սլովենիայի չեմպիոն «Օլիմպիային»։

Խաղին ընդառաջ «Օլիմպիայի» գլխավոր մարզիչ Էրվին վան դե Լոյը խոսել է «Նոայի» մասին և ընդգծել թիմի պատրաստվածությունը:

«Մենք լավ ուսումնասիրել ենք մրցակցին: «Նոան» որակյալ թիմ է, որը այս տարի արժանապատվորեն հանդես եկավ նաև Եվրոպայում: Չնայած նրան, որ դուրս մնացին ջիբրալթարական թիմից, նրանք ավելի ուժեղ էին, պարզապես չկարողացան գոլ խփել: Մյուս կողմից, մենք ևս շատ լավ որակ ունենք, այդ պատճառով էլ սպասում եմ հավասար խաղի։

Էներգիան պետք է գտնենք մեր ներսում, յուրաքանչյուր խաղացող՝ ինքն իր մեջ: Վերջին խաղում վերջին րոպեներին զգացինք հոգնածություն, սակայն այս անգամ ավելի շատ ժամանակ ունեցանք հանգստի համար: Այն փաստը, որ սա մեծ խաղ է ակումբի և ողջ սլովենական ֆուտբոլի համար, մեզ լրացուցիչ ուժ կտա, վստահ եմ դրանում»,- մասնագետի խոսքն է մեջբերում սլովենական ակումբի պաշտոնական կայքը։

Հանդիպման մեկնարկը Երևանի ժամանակով 22։00-ին է։