Էնցո Ֆերնանդես — Armsport.am

Ալոնսոն խոսել է Էնցո Ֆերնանդեսի և Գառնաչոյի ապագայի մասին

Gevorg Martirosyan — Mon, 13 Jul 2026 17:45:08 +0000

Լոնդոնի «Չելսիի» նորանշանակ գլխավոր մարզիչ Խաբի Ալոնսոն կիսվել է թիմի հետ աշխատանքի առաջին տպավորություններով, ինչպես նաև հստակեցրել է մի շարք առանցքային ֆուտբոլիստների ապագան ակումբում։

Նախորդ մրցաշրջանը լոնդոնցիներն ավարտեցին Պրեմիեր լիգայի 10-րդ հորիզոնականում և այս տարի հանդես չեն գա եվրագավաթներում: Չնայած դրան՝ իսպանացի մասնագետը, որը ժամանակին Անգլիայում պաշտպանել է «Լիվերպուլի» գույները, լավատեսորեն է տրամադրված մարզական նոր տարվան ընդառաջ:

«Ես արդեն զգում եմ, որ խաղացողները ցանկանում են լավ մրցաշրջան անցկացնել։ Նախորդից հետո մենք ամեն ինչ սկսում ենք զրոյից՝ ունենք նոր մարզչական շտաբ և նոր գլխավոր մարզիչ։ Տղաներն իսկապես ներգրավված են մեր աշխատանքում. կա էներգիա և ոգևորություն»,- Ալոնսոյի խոսքերն է մեջբերում բրիտանական մամուլը։

Անդրադառնալով սպասվող տրանսֆերներին՝ Ալոնսոն հաստատել է լրատվամիջոցների այն տեղեկությունները, ըստ որոնց՝ 22-ամյա արգենտինացի վինգեր Ալեխանդրո Գառնաչոն չի մտնում իր ծրագրերի մեջ և կվաճառվի այս ամռանը։

«Կհեռանա՞ արդյոք Գառնաչոն: Այո՛: Նրա նկատմամբ կա հետաքրքրություն այլ ակումբների կողմից: Հուսով եմ, որ ամեն ինչ լավագույնս կդասավորվի բոլորի համար»,- նշել է մարզիչը The Touchline-ի հետ զրույցում:

Հիշեցնենք, որ Գառնաչոն «Չելսիին» էր միացել նախորդ ամռան վերջին, սակայն այդպես էլ չկարողացավ լիովին դրսևորել իրեն: Transfermarkt-ը ֆուտբոլիստի տրանսֆերային արժեքը գնահատում է 28 միլիոն եվրո:

Խոսելով մեկ այլ արգենտինացու՝ կիսապաշտպան Էնցո Ֆերնանդեսի շուրջ ստեղծված իրավիճակի և Մադրիդի «Ռեալ» հնարավոր տեղափոխության լուրերի մասին՝ Ալոնսոն նախընտրել է շատ փակագծեր չբացել, բայց հստակեցրել է իր ցանկությունը.

«Մենք զրուցել ենք, բայց, ինչպես հասկանում եք, մեր խոսակցության բովանդակությունը կմնա գաղտնիք: Այնուամենայնիվ, այո՛, մենք իսկապես ունեցել ենք խոսակցություն, և այո՛, ես ցանկանում եմ, որ նա մնա «Չելսիում»»,- ընդգծել է իսպանացի մասնագետը։

Նշենք, որ 25-ամյա Ֆերնանդեսի գործող պայմանագիրը լոնդոնյան ակումբի հետ նախատեսված է մինչև 2032 թվականի կեսերը, իսկ նրա շուկայական արժեքը գնահատվում է տպավորիչ 90 միլիոն եվրո։

Ռեալը հատուկ հայտարարությամբ է հանդես եկել Չելսիի աստղի վերաբերյալ

Gevorg Martirosyan — Fri, 03 Jul 2026 08:01:48 +0000

Մադրիդի «Ռեալը» պաշտոնական հայտարարություն է տարածել՝ կտրականապես հերքելով Լոնդոնի «Չելսիի» կիսապաշտպան Էնցո Ֆերնանդեսի նկատմամբ հետաքրքրության մասին վերջին օրերին շրջանառվող լուրերը:

«Արքայական» ակումբի պաշտոնական կայքում զետեղված հաղորդագրության մեջ նշվում է.

«Հաշվի առնելով վերջին օրերին մամուլում հայտնված լուրերն առ այն, որ Մադրիդի «Ռեալը» հետաքրքրված է Էնցո Ֆերնանդեսի ծառայություններով՝ ակումբը ցանկանում է հայտարարել, որ ոչ մի ուղղակի կամ անուղղակի քայլ չի ձեռնարկել նշված ֆուտբոլիստի հետ պայմանագիր կնքելու ուղղությամբ և, համապատասխանաբար, մտադիր չէ նման գործարք իրականացնել։

«Ռեալն» իր խորին հարգանքն է տածում Էնցո Ֆերնանդեսի՝ հիանալի ֆուտբոլիստի նկատմամբ, որի կարիերան և վարպետությունը հանրահայտ են, ինչպես նաև «Չելսիի» նկատմամբ, որի հետ մեզ կապում են գերազանց ինստիտուցիոնալ հարաբերություններ։

Հենց այն հարգանքի պատճառով, որին արժանի է «Չելսին», և հավատարիմ մնալով կորպորատիվ օրինապահության սկզբունքներին, որոնք մշտապես ուղեկցել են Մադրիդի «Ռեալի» գործողություններին՝ ակումբն անհրաժեշտ է համարում կտրականապես հերքել իրականությանը չհամապատասխանող և անհիմն շահարկումները։

Մադրիդի «Ռեալը» ցավում է, որ չնայած փաստերի հստակությանն ու ակումբի կողմից որևէ գործողության բացակայությանը, շարունակում են տարածվել իրականության հետ աղերս չունեցող տեղեկություններ։ Դրանք միայն շփոթություն են առաջացնում երկրպագուների շրջանում և անհարկի վնաս հասցնում ներգրավված ակումբներին ու անձանց»։

Ում է պատրաստ զոհաբերել Ռեալը Էնցո Ֆերնանդեսին ձեռք բերելու համար

Gevorg Martirosyan — Fri, 26 Jun 2026 11:15:28 +0000

Մադրիդի «Ռեալի» նախագահ Ֆլորենտինո Պերեսը դիտարկում է Լոնդոնի «Չելսիի» կիսապաշտպան Էնցո Ֆերնանդեսի տրանսֆերի մեջ սեփական ֆուտբոլիստներին ներառելու տարբերակը։ Ինչպես հաղորդում է իսպանական Defensa Central-ը, նպատակը արգենտինացու տրանսֆերային արժեքը, որը գնահատվում է 120 մլն եվրո, հնարավորինս նվազեցնելն է։

Ըստ աղբյուրի տեղեկությունների՝ որպես գործարքի մաս, «սերուցքայինները» կարող են լոնդոնյան ակումբին առաջարկել պաշտպան Ալվարո Կարերասին և կիսապաշտպան Էդուարդո Կամավինգային։

Հատկանշական է, որ «Չելսիի» ներկայիս գլխավոր մարզիչ Խաբի Ալոնսոն կարող է հավանություն տալ հատկապես Կարերասի տեղափոխությանը, քանի որ իսպանացի մասնագետը ցանկանում էր իրականացնել այս ֆուտբոլիստի տրանսֆերը դեռ այն ժամանակ, երբ ինքն էր գլխավորում «Ռեալը»։

Պարբերականն ընդգծում է, որ «արքայական» ակումբը մտադիր չէ առանց երկարատև բանակցությունների 120 միլիոն եվրո վճարել Աշխարհի չեմպիոնի համար։ «Ռեալի» ղեկավարությունը կանի ամեն ինչ՝ Էնցո Ֆերնանդեսի գինը ֆուտբոլիստների փոխանակման միջոցով առավելագույնս նվազեցնելու համար։

Ռեալն վերջնական ընտրություն է կատարել Օլիսեի և Էնցո Ֆերնանդեսի միջև

Suren Sahakyan — Wed, 24 Jun 2026 15:17:31 +0000

Մադրիդի «Ռեալը» վերջնականապես հրաժարվել է Մյունխենի «Բավարիայի» ֆրանսիացի վինգեր Մայքլ Օլիսեին ձեռք բերելու մտադրությունից։

Ինչպես հայտնում է հեղինակավոր Diario AS պարբերականը, մադրիդյան ակումբին տեղեկացրել են, որ ֆրանսիացի ֆուտբոլիստի տրանսֆերն այս ամռանն անհնար է իրականացնել։ Այդ իսկ պատճառով «արքայական» ակումբը որոշել է փոխել մարտավարությունն ու իր ողջ ջանքերն ուղղել Լոնդոնի «Չելսիի» կիսապաշտպան Էնցո Ֆերնանդեսի տեղափոխությանը։ Այժմ արգենտինացին համարվում է «Ռեալի» ամառային տրանսֆերային պատուհանի գլխավոր թիրախը։

Հիշեցնենք, որ Էնցո Ֆերնանդեսը «Չելսի» է տեղափոխվել Լիսաբոնի «Բենֆիկայից» 2023 թվականին, իսկ գործարքի արժեքը կազմել էր տպավորիչ 121 միլիոն եվրո։ Նրա գործող պայմանագրի ժամկետը լոնդոնյան ակումբի հետ ուժի մեջ է մինչև 2032 թվականի հունիսի 30-ը։

Ակումբային ավարտված մրցաշրջանում արգենտինացի կիսապաշտպանը «ազնվականների» կազմում բոլոր մրցաշարերում հասցրել է անցկացնել 53 հանդիպում՝ դառնալով 15 գոլի և 7 արդյունավետ փոխանցման հեղինակ։

Ռեալը գտել է այլընտրանք. 90 միլիոն եվրո արժողությամբ տրանսֆերը կարող է իրականություն դառնալ

Gevorg Martirosyan — Tue, 23 Jun 2026 14:25:33 +0000

Մադրիդի «Ռեալը» պատրաստ է ձեռք բերել Լոնդոնի «Չելսիի» կիսապաշտպան Էնցո Ֆերնանդեսին: Այս մասին հայտնում է իսպանական հեղինակավոր AS պարբերականը։

Աղբյուրի փոխանցմամբ՝ վերջին ժամերին մադրիդյան ակումբը որոշում է կայացրել բանակցություններ սկսել «ազնվականների» հետ՝ 25-ամյա արգենտինացու տրանսֆերի շուրջ։

Այս որոշումը կայացվել է այն բանից հետո, երբ «արքայական» ակումբում հասկացել են, որ Մյունխենի «Բավարիայի» կիսապաշտպան Մայքլ Օլիսեի տրանսֆերն անհնար է, իսկ «Վեսթ Հեմի» խաղացող Մատեուշ Ֆերնանդեշը նախընտրում է տեղափոխվել այլ ակումբ։

Նշվում է, որ «Ռեալում» դիտարկել են նաև ֆրանսիական «Լիլից» Այուբ Բուադիի և Դորտմունդի «Բորուսիայից» Ֆելիքս Նմեչայի տարբերակները։ Սակայն Ֆերնանդեսի օգտին առանցքային գործոն է դարձել հենց ֆուտբոլիստի՝ Մադրիդ տեղափոխվելու մեծ ցանկությունը։

Հիշեցնենք, որ Ֆերնանդեսը «Չելսիի» գույները պաշտպանում է 2023 թվականից։ Նախորդ մրցաշրջանում նա բոլոր մրցաշարերում մասնակցել է 54 հանդիպման՝ դառնալով 15 գոլի և 7 գոլային փոխանցման հեղինակ։

Transfermarkt պորտալը արգենտինացու տրանսֆերային արժեքը ներկայումս գնահատում է 90 միլիոն եվրո։

Ռեալը համաձայնության է եկել նոր աստղի հետ. ակումբը պատրաստում է թանկարժեք առաջարկ

Suren Sahakyan — Thu, 18 Jun 2026 14:13:23 +0000

Լոնդոնի «Չելսիի» կիսապաշտպան Էնցո Ֆերնանդեսը մոտ է Մադրիդի «Ռեալ» տեղափոխությանը: Իսպանական գրանդն արգենտինացու հետ հասել է սկզբունքային համաձայնության, հաղորդում է հայտնի ինսայդեր Նիկոլո Սկիրան:

Կողմերն արդեն համաձայնեցրել են աշխատանքային նոր պայմանագրի կետերը, որը նախատեսված կլինի մինչև 2032 թվականը: Մոտ ժամանակներս մադրիդյան ակումբը պաշտոնական տրանսֆերային առաջարկով կդիմի լոնդոնցիներին. խոսքը բավականին խոշոր գումարի մասին է: Անձամբ 25-ամյա ֆուտբոլիստը վճռական է տրամադրված ակումբից հեռանալու հարցում և հույս ունի, որ գործարքը հաջողությամբ կավարտվի:

Շրջանառվող լուրերի համաձայն՝ «Չելսին» Էնցո Ֆերնանդեսի տրանսֆերի դիմաց պահանջում է շուրջ 120 միլիոն ֆունտ ստերլինգ (մոտ 140 միլիոն եվրո), մինչդեռ կիսապաշտպանի տրանսֆերային արժեքը գնահատվում է 90 միլիոն եվրո՝ ըստ Transfermarkt պորտալի:

Ռեալը բանակցություններ է սկսել Չելսիի աստղի տրանսֆերի շուրջ

Suren Sahakyan — Thu, 18 Jun 2026 07:13:04 +0000

Լոնդոնի «Չելսիի» արգենտինացի կիսապաշտպան Էնցո Ֆերնանդեսը ամառային տրանսֆերային պատուհանի ընթացքում կարող է տեղափոխվել Մադրիդի «Ռեալ»:

Ինչպես արդեն հաղորդվել էր ավելի վաղ, արգենտինացի ֆուտբոլիստը պնդում է «արքայական» ակումբ տեղափոխվելու իր ցանկությունը:

««Սերուցքայինները» նախատեսում են մոտ ժամանակներս բանակցություններ վարել կիսապաշտպանի տրանսֆերի շուրջ, իսկ իսպանական գրանդի ղեկավարությունը հույս ունի, որ լոնդոնյան ակումբը կնվազեցնի պահանջվող գումարի չափը,- հաղորդում է լրագրող Բեն Ջեյքոբսը:

Ըստ առկա տվյալների՝ «ազնվականները» Էնցո Ֆերնանդեսի տրանսֆերը գնահատում են մոտ 140 միլիոն եվրո։ Ավարտված մրցաշրջանում 25-ամյա խաղացողը լոնդոնյան թիմի կազմում բոլոր մրցաշարերում ընդհանուր առմամբ մասնակցել է 54 հանդիպման՝ իր ակտիվում գրանցելով 15 գոլ և 7 գոլային փոխանցում:

Մոուրինյուի նոր թիրախը. Ռեալը պատրաստվում է գնել Չելսիի աստղին

Gevorg Martirosyan — Wed, 17 Jun 2026 18:45:07 +0000

Մադրիդի «Ռեալը» ծրագրում է ձեռք բերել Լոնդոնի «Չելսիի» և Արգենտինայի ազգային հավաքականի կիսապաշտպան Էնցո Ֆերնանդեսին, հայտնում է իսպանական Marca պարբերականը:

Աղբյուրի տեղեկություններով՝ 25-ամյա ֆուտբոլիստի տրանսֆերն իրականացնելու հարցում անձամբ պնդում է «սերուցքայինների» նորանշանակ գլխավոր մարզիչ Ժոզե Մոուրինյուն:

2025/26 մրցաշրջանում Ֆերնանդեսն ակումբային մակարդակում անցկացրել է 54 հանդիպում՝ դառնալով 15 գոլի և 7 արդյունավետ փոխանցման հեղինակ։ Transfermarkt հեղինակավոր պորտալը արգենտինացի կիսապաշտպանի տրանսֆերային արժեքը գնահատում է շուրջ 90 միլիոն եվրո։

Հիշեցնենք, որ հունիսի 17-ին «արքայական» ակումբը պաշտոնապես պայմանագիր է կնքել պորտուգալացի կիսապաշտպան Բեռնարդու Սիլվայի հետ։

Ռեալը համաձայնության է հասել Պրեմիեր լիգայի աստղի հետ. նախապատրաստվում է խոշոր տրանսֆեր

Suren Sahakyan — Wed, 10 Jun 2026 19:15:59 +0000

Լոնդոնի «Չելսիի» արգենտինացի կիսապաշտպան Էնցո Ֆերնանդեսը հնարավոր է կարիերան շարունակի Մադրիդի «Ռեալում»։ Այս մասին հայտնում է հայտնի ինսայդեր և մարզական լրագրող Էքրեմ Քոնուրը։

Աղբյուրի տեղեկություններով՝ իսպանական գրանդն արդեն համաձայնության է հասել 25-ամյա ֆուտբոլիստի հետ անձնական պայմանագրի կետերի շուրւ՝ նախատեսելով կնքել 5 տարվա պայմանագիր։ Արգենտինացի խաղացողին Մադրիդում անձամբ ցանկանում է տեսնել «սերուցքայինների» նորանշանակ գլխավոր մարզիչ Ժոզե Մոուրինյուն։

Այնուամենայնիվ, լոնդոնյան ակումբն իր կիսապաշտպանի տրանսֆերը գնահատում է բավականին բարձր՝ 110-118 միլիոն ֆունտ ստեռլինգ։ Այդ իսկ պատճառով Մադրիդում դեռևս կքննարկն արգենտինացու տեղափոխության հարցը. չի բացառվում, որ «արքայական» ակումբը դիտարկի դաշտի կենտրոնն ուժեղացնելու ավելի մատչելի այլընտրանքային տարբերակներ։

Ավարտված մրցաշրջանում Էնցո Ֆերնանդեսն ակումբային մակարդակով անցկացրել է 54 հանդիպում՝ դառնալով 15 գոլի և 7 գոլային փոխանցման հեղինակ։

Չելսիի կիսապաշտպանն Ալոնսոյին հայտնել է Չելսիից հեռանալու մասին

Gevorg Martirosyan — Thu, 28 May 2026 18:56:59 +0000

«Չելսիի» կիսապաշտպան Էնցո Ֆերնանդեսն ակումբի ղեկավարությանն ու թիմի գլխավոր մարզիչ Խաբի Ալոնսոյին տեղեկացրել է ամառային տրանսֆերային պատուհանի ժամանակ հեռանալու իր որոշման մասին: Այս մասին հաղորդում է իսպանական հեղինակավոր Mundo Deportivo պարբերականը:

Աղբյուրի տեղեկություններով՝ լոնդոնյան ակումբը ֆուտբոլիստին փոխանցել է, որ նրա հնարավոր տեղափոխության դիմաց կպահանջի 120 միլիոն եվրո։ Սա ճիշտ այն գումարն է, որով արգենտինացին «Բենֆիկայից» գնվել էր 2023 թվականի ձմռանը։ Նշվում է, որ Ֆերնանդեսի գործակալն արդեն կապ է հաստատել Մադրիդի «Ռեալի» ներկայացուցիչների հետ՝ հնարավոր տրանսֆերն իրականացնելու նպատակով։

Ընթացիկ մրցաշրջանում արգենտինացի կիսապաշտպանը բոլոր մրցաշարերում միասին մասնակցել է 54 հանդիպման՝ դառնալով 15 գոլի և 7 արդյունավետ փոխանցման հեղինակ։

Ֆուտբոլիստի գործող պայմանագիրը «կապույտների» հետ նախատեսված է մինչև 2032 թվականի ամառը։ Transfermarkt պորտալի տվյալներով՝ խաղացողի շուկայական արժեքը ներկայումս գնահատվում է 90 միլիոն եվրո։