«Արարատ-Արմենիայի» իսպանացի գլխավոր մարզիչ ճանաչվել է VBNET Հայաստանի Պրեմիեր լիգայի աշնանային հատվածի լավագույն մարզիչ: Այս մասին տեղեկացնում է ակումբի պաշտոնական կայքը:

46-ամյա մասնագետի գլխավորած թիմն առաջնության առաջին հատվածից հետո զբաղեցնում է 1-ին հորիզոնականը ՝ վաստակած 18 միավորով:

Հիշեցնենք, որ Կամպանյան նախկինում մարզել է լիտվական «Ուտենիս», իսպանական «Ալկալա» ակումբները:

Հավելենք, որ «Արարատ-Արմենիայից» առաջ, իսպանացին մարզում էր «Լոռին»:

«Արարատ-Արմենիայի» գլխավոր մարզիչ Դավիդ Կամպանյան Vbet Հայաստանի Պրեմիեր լիգայի 12-րդ տուրում «Նոայի» նկատմամբ տոնած հաղթանակից հետո (3-1) պատասխանել է խաղի վերաբերյալ մի քանի հարցի.

«Խաղը լավ սկսեցինք: Արագ գոլ խփեցինք: Սակայն հետո սկսեցինք նյարդայնանալ ու ավելի շատ գնդակ կորցնել: Առաջին խաղակասում չէինք օգտագործում մեր հնարավորությունները: Երկրորդ խաղակեսում սկսեցին կոմպակտ գործել ու տիրեցինք նախաձեռնությանը»,-ասել է Կամպանյան:

Մանրամասները՝ տեսանյութում.

«Արարատ-Արմենիայի» գլխավոր մարզիչ Դավիդ Կամպանյան գոհ է իր ֆուտբոլիստների կատարած աշխատանքից։ Իսպանացի մասնագետը «Ցելյեի» դեմ խաղից հետո (1-0) կայացած մամուլի ասուլիսի ընթացքում արժանին է մատուցել երևանյան թիմի ֆուտբոլիստներին կատարած աշխատանքի համար։ 

«Տակտիկապես շատ հարուստ խաղ էր։ Հակառակորդը ֆիզիկապես շատ ուժեղ էր թիմ է։ Նրանք ունեին լավ հարձակվողներ, վինգերներ։ Բայց մենք ամեն ինչ գիտեինք նրանց մասին։ Գիտեինք, թե ինչպես են նրանք խաղում։ Գիտեինք նույնիսկ անհատական որակների մասին։

Իմ խաղացողները հիանալի աշխատանք են կատարել։ Մենք շատ լավ ուսումնասիրել էինք մրցակցին։ Շատ ուրախ եմ իմ խաղացողների համար։ Նրանք արժանի էին։ Չնայած լրացուցիչ ժամանակին, մենք ֆիզիկապես լավ տեսք ունենք»,-ասաց Կամպանյան։

Կամպանյան արդեն 2-րդ խաղն անընդմեջ հաղթական գոլ խփած Սերգեյ Վակուլենկոյին հատուկ առանձնացրեց ու համեմատեց «Ռեալի» պաշտպան Սերխիո Ռամոսի հետ։

«Ուրախ եմ մեր Սերխիո Ռամոս Վակուլենկոյի համար։ Մենք կարողանում էինք շատ լավ գնդակ պահել այսօր։ Կային պահեր, երբ դա շատ անհրաժեշտ էր անել, որպեսզի մրցակիցը չհակագրոհի։ Որքան ժամանակն անցնում էր, թիմն իրեն ավելի լավ էր զգում ու վերջապես մենք կարողացանք գոլ խփել։  Կարող եմ ասել, որ Ես ամեն օր այս թիմին ավելի ու ավելի լավ եմ ճանաչում ու հասկանում»,-եզրափակել է Կամպանյան։

«Արարատ-Արմենիան» 2-րդ անգամ է դուրս գալիս Եվրոպա լիգայի որակավորման փլեյ-օֆֆ փուլ։ Խմբային փուլի ուղեգրի համար պայքարում «Արարատ-Արմենիան» ուժերն է չափելու «Ցրվենա Զվեզդայի» հետ։

Եվրոպա լիգայի որակավորման 3-րդ փուլի՝ «Արարատ-Արմենիա»-«Ցելյե» խաղից առաջ այսօր՝ սեպտեմբերի 23-ին, կայացել է մեր թիմի գլխավոր մարզիչ Դավիդ Կամպանյայի նախախաղային մամուլի ասուլիսը:

««Ցելյեն» շատ հետաքրքիր թիմ է: Կազմված է հետաքրքիր ու երիտասարդ խաղացողներից, բայց միևնույն ժամանակ բալանսավորված թիմ է: Կարծում եմ՝ տակտիկապես հետաքրքիր խաղ է սպասվում:

Ֆուտբոլը ազգությունների մասին չէ, այն ցուցադրած խաղի ու հնարավորությունների մասին է: Մենք ֆուտբոլիստներին դաշտ դուրս բերելիս չենք նայում ազգությանը, այլ նայում ենք նրան, թե այդ պահին ովքեր են այդ դիրքում ամենալավը հանդես գալիս: Ամեն ինչ կախված է նրանց ցուցադրած խաղից ու տվյալ իրավիճակում նրանց կարողություններից:

Այս պահին չեմ ուզում խոսել «Ցրվենա Զվեզդային» հանդիպելու հավանականության մասին: Իմ մտքերը միայն վաղվա խաղի մասին են:

Վաղվա խաղում բացի որակազրկում ունեցող Ալեքս Ջունիորից, այլ բացականեր չունենք»,- ասաց Կամպանյան:

Եվրոպա  լիգայի որակավորման 2-րդ փուլի՝ «Ֆոլա Էշի» հետ հաղթական խաղից հետո «Արարատ-Արմենիայի» գլխավոր մարզիչ Դավիդ Կամպանյան կիսվեց տպավորություններով.

«Խաղի ընթացքում ես 3-4 ինֆարկտ ստացա: Մենք շատ լավ սկսեցինք խաղը, և կրկին չիրացրեցինք մեր գոլային պահերը: Մենք սկսեցինք մրցակցին հնարավորություն տալ, որ ավելի լավ խաղան: Միգուցե մենք շատ ուրախացանք գոլ խփելուց, և դրանից հետո գոլ բաց թողեցինք ու խաղակեսն ավարտվեց ոչ-ոքի: Թիմը լավ էր խաղում, փորձում էր պրեսինգ անել և 11 մետրանոց նշանակվեց մեր դարպասին: Կարող եմ ասել, որ ֆուտբոլիստները նվիրվեցին խաղին ու ամեն ինչ արեցին, այդ պատճառով խաղավերջում վաստակեցինք 2՝ 11 մետրանոց հարված: Մենք գնդակով լավ ենք խաղում, մեզ ուղղակի հարկավոր է աշխատել պահերի իրացման վրա: Եթե դուք տեսնեիք՝ հանդերձարանում ինչ էր կատարվում.. բոլորս բղավում էինք և հուզված էինք: Մենք հիմա ավելի հանգիստ ենք: Սա այն էր, ինչ պետք էր մեզ:

Մենք պայքարում ենք և փորձում ենք իրացնել մեր բոլոր պահերը: Կարող էր ավելի լավ ստացվել ամեն ինչ, բայց սրանք յուրահատուկ էմոցիաներ են: Բնավորությունն ամենակարևորն է: Մենք տեսանք, որ ֆուտբոլիստները չկոտրվեցին և ամեն ինչ արեցին հաղթանակի հասնելու համար: Ես շատ ուրախ եմ իմ ֆուտբոլիստներով՝ ներկայացնելով Հայաստանը»,-ասել Է Կամպանյան:

Եվրոպա լիգայի որակավորման 2-րդ փուլում Հայաստանի գործող չեմպիոն «Արարատ-Արմենիան» վաղը կմրցի Լյուքսեմբուրգը ներկայացնող «Ֆոլա-Էշի» հետ: Այսօր կայացել է երևանյան թիմի պաշտպան Սերգեյ Վակուլենկոյի և գլխավոր մարզիչ Դավիդ Կամպանյայի մամուլի ասուլիսը:

«Ֆոլա-Էշը» ֆիզիկապես ուժեղ թիմ է: Նրանք առաջնությունում խաղում են պաշտպանողական ֆուտբոլ: Կարծում եմ, որ վաղը մրցակիցը կգործի 2-րդ համարով: Մենք ֆիզիկապես լիարժեք պատրաստ ենք: Վերջին խաղերին անհաջող ենք հանդես եկել, բայց մենք ճիշտ ճանապարհին ենք, և ամեն խաղին փորձում ենք ավելացնել: Մեր էներգիան մեզ թույլ կտա վաղը չպարտվել: Շատ դժվար է ընդհանուր գնահատական տալ: Ամեն խաղ յուրովի է: Ես կարող եմ ասել, որ մեր թիմը պատրաստ է լավ խաղալու, մեզ պետք  է մի փոքր հաջողություն: Թիմը լավ տրամադրություն ունի և բոլոր ֆուտբոլիստները պատրաստ են ամեն ինչ անել հաղթանակի համար»,-ասել է Կամպանյան:

Անդրադառնալով թիմի նորեկ Ջեիսոն Մարտինեզին, Կամպանյան ասել է. «Ջեիսոնը հիանալի ֆուտբոլիստը է: Նա ունիվեսալ է՝ շատ արագաշարժ: Նա կարող է շատ մեծ օգուտ տալ մեր թիմին»

Իսպանացի մասնագետին նաև հարց է տրվել «Լոռիում» ու «Արարատ-Արմենիայում» աշխատանքի տարբերության մասին. «Ես կարող եմ ասել, որ «Լոռիում» ու «Արարատ-Արմենիայում» տարբեր ֆուտբոլիստներ են: Այստեղ ֆուտբոլիստներն ավելի արագ են և անհատապես ավելի լավ ֆուտբոլ են խաղում, բայց միշտ ունենք ավելացնելու տեղ: Երբ պարտվում ես, պետք է միշտ իմանաս ինչու և ուղղել այդ սխալները, իսկ դա հնարավոր է անել միայն համատեղ աշխատանքի շնորհիվ: Հիմա պետք է ժամանակ, որ ստեղծենք մեր ցանկացած թիմը: Մենք վաղը խաղալու ենք Հայաստանի համար և պետք է  լավ հանդես գանք»:

«Արարատ-Արմենիայի» գլխավոր մարզիչ Դավիդ Կամպանյան Չեմպիոնների լիգայի որակավորման առաջին փուլում «Օմոնիայից» կրած պարտությունից հետո հեռավար եղանակով պատասխանել է լրագրողների հարցերին.

«Հավասար խաղ էր: Կարծում եմ՝ առաջին կեսում մենք ավելի շատ պահեր ստեղծեցինք, վերահսկում էինք խաղի ընթացքը: Մենք խաղում էինք շատ հասուն թիմի դեմ, որը շատ լավ ֆուտբոլիստներ ուներ:

Մենք ունեցանք պահեր, բայց դրանք իրականացնելու համար բավարար հաջողություն չունեցանք: Երկրորդ կեսում ևս վերահսկում էինք խաղի ընթացքը, բայց նրանք սկսեցին ավելի շատ հարձակվել: Բայց մենք հաջողության խակաս ունեինք, մեկ խաղացողով պակաս էինք խաղում, շատ պատժվեցինք դեղին քարտերով, ինչից հետո գոլ բաց թողեցինք, ու փորձեցինք անընդհատ հարձակվել, անգամ գոլային պահ ունեցանք: Իմ ֆուտբոլիստները շատ քաջ գտնվեցին, ամեն ինչ ներդրեցին խաղադաշտում, մենք պայքարեցինք շատ հասուն թիմի դեմ, բայց , ցավոք, հաջողություն չունեցանք: Պետք է շարունակենք աշխատել՝ զարգանալու համար»,- ասել է Դավիդ Կամպանյան:

Հարց է հնչել այն մասին, որ «Արարատ-Արմենիան» չի հաղթում Դավիդ Կամպանյայի գլխավորությամբ արդեն երրորդ խաղում: Ո՞րն է անհաջողությունների պատճառը.

«Իրավիճակն ինձ համար այնքան էլ վտանգավոր չէ: Իհարկե, մենք ցանկանում ենք հաղթել ամեն խաղում, բայց պարզ է՝ այս թիմին հաղթելը բարդ էր: Ամեն խաղում ես տեսնում եմ, որ իմ ֆուտբոլիստներն ավելի լավ են հանդես գալիս: «Օմոնիայի» նման թիմ չունենք մեր առաջնությունում: Մեզ պարզապես մի փոքր ավելի շատ ժամանակ է անհրաժեշտ: Ընդամենը 15-20 օր է՝ աշխատում ենք, ունենք վնասվածք ստացած խաղացողներ, այնպես որ կարծում եմ՝ դեռ հաջողություններ կունենանք»:

-Չե՞ք կարծում, որ «Օմոնիան» այն թիմը չէր, որի դեմ պետք էր այսքան զգույշ ֆուտբոլ  խաղալ:

-Մենք շատ ագրեսիվ խաղացինք, ամբողջ ընթացքում խլում էինք գնդակն ու հակագրոհներ էինք իրականացնում: Հնարավոր է՝ հեռուստացույցով պատկերն այլ է, բայց երբ դաշտում տեսնեք այդ ֆուտբոլիստներին, կհասկանաք, որ նրանց դեմ իրոք շատ դժվար է խաղալը:

-Ինչո՞ւ փոխարինեցիք Օտուբանջոյին, որը հարձակման առաջատարն էր:

-Նա թարմ տեսք չուներ: Մենք կարիք ունեինք մեկի, ով կկարողանար փակել ազատ տարածությունները: Մեր թիմի մյուս խաղացողներն էլ ունեն իրավունք և որակ՝ նման խաղերում դաշտ դուրս գալու համար:

Մանրամասները՝ «Արարատ-Արմենիայի» ներկայացրած տեսանյութում.

Չեմպիոնների լիգայի նոր մրցաշրջանի որակավորման առաջին փուլում Հայաստանի չեմպիոն «Արարատ-Արմենիան» կմրցի Կիպրոսի չեմպիոն «Օմոնիայի» հետ: «Արարատ-Արմենիայի» գլխավոր մարզիչ Դավիդ Կամպանյան իր կարծիքն է հայտնել այդ խաղի վերաբերյալ։

«Օմոնիան» շատ լավ թիմ է, շատ լավ ֆուտբոլիստներով։ Թիմը խաղում է հակագրոհներով, բարդ թիմ է, բայց, կարծում եմ, որ մենք հնարավորություն ունենք անցնելու հաջորդ փուլ վաղվա խաղում։

Թիմի հիմնական դարպասահ Աբակումովի բացակայությունը վերջին խաղերում պայմանավորված է նրանով, որ նա մի փոքր խնդիրներ ունի ոտքի հետ կապված։ Նարսինգը նույնպես ունի փոքր վնասվածք։ Մեզ համար ամենակարևորը ֆուտբոլիստների առողջությունն է։

Մեկ խաղում պայմանները հավասար են բոլորի համար։ Մենք այս Չեմպիոնների Լիգայում տեսանք, որ շատ անակնկալներ եղան և ամեն ինչ հնարավոր է», – ասել է Դավիդ Կամպանյան «Արարատ-Արմենիա» – «Օմոնիա» հանդիպման նախաղային մամուլի ասուլի ժամանակ։

Չեմպիոնների Լիգայի որակավորման առաջին փուլի «Արարատ-Արմենիա» – «Օմոնիա» հանդիպումը կկայանա օգոստոսի 19-ին, ժամը 19:00-ին՝ ՀՖՖ Ակադեմիա մարզադաշտում:

Adjarabet բուքմեյքերական ընկերությունը «Արարատ-Արմենիայի» հաղթանակը գնահատում է 4,50 գործակցով, ոչ ոքին՝ 3,60, իսկ «Օմոնիայի» հաղթանակը՝ 1,80։

Վարդան Մինասյանը Հայաստանի ավարտված առաջնությունում ևս «Արարատ-Արմենիայի» հետ նվաճեց երկրի չեմպիոնությունը, սակայն ավելի ուշ հեռացավ երևանյան ակումբի գլխավոր մարզչի պաշտոնից:

Մինասյանից հետո թիմը լքեցին նաև մի քանի առաջատար խաղացողներ՝ թիմի ավագ Դմիտրի Գուզը, ռուս հարձակվող Անտոն Կոբյալկոն, մարոկացի պաշտպան Ռուժդի Աշենտեն:

«Արարատ-Արմենիայի» գլխավոր մարզչի պաշտոնը ստանձնեց 46-ամյա իսպանացի մասնագետ Դավիդ Կամպանյան և հենց նա թիմին կուղեկցի դեպի եվրոպական ակումբային ֆուտբոլի ամենահեղինակավոր մրցաշար՝ Չեմպիոնների լիգա, նախորդ տարվա հաջողությունը կրկնելու,և ինչու ոչ՝ այն գերազանցելու հույսով:

ArmSport սկետչի անդրադարձը.

Հայաստանի գործող չեմպիոն «Արարատ-Արմենիան» ներկայացրել է թիմի նորանշանակ գլխավոր մարզիչ Դավիդ Կամպանիայի հետ առաջին հարցազրույցը:

—Ինչպե՞ս որոշեցիք ընդունել «Արարատ-Արմենիային» միանալու առաջարկը:

— «Արարատ-Արմենիան» ցանկություն հայտնեց ինձ հետ աշխատելու: Ես զգում էի, որ իմ աշխատանքը Հայաստանում դեռ չեմ ավարտել, երբ ակումբին միանալու առաջարկ ստացա, որոշեցի ընդունել այն: Կարող եմ ասել, որ սա փոխադարձ համակրանք էր իմ և ակումբի միջև:

-Հետևե՞լ եք «Արարատ-Արմենիայի» խաղերին, ի՞նչ տպավորություն ունեք թիմի մասին:

— «Արարատ-Արմենիան» հաղթող թիմ է՝ շատ լավ ֆուտբոլիստներով, ովքեր լավ մարզված են Վարդան Մինասյանի գլխավորությամբ: Վստահ կարող եմ ասել, որ այս ակումբին միանալը մեծ մարտահրավեր է այն ավելի զարգացնելու, նոր խաղաոճ ստեղծելու և ֆուտբոլիստների հետ աշխատանք կատարելու առումով:

-Ի՞նչ նպատակներ են դրվել Ձեր առաջ որպես ակումբի գլխավոր մարզիչ:

— Ես հավատում եմ, որ լավ արդյունքի հասնելու համար հարկավոր է ամեն օր քրտնաջան աշխատել: Պետք է աշխատել քայլ առ քայլ, և մի օր երբ ետ նայես, կտեսնես, թե ինչերի ես հասել: Առաջին նպատակն է հստակ խաղաոճ ունենալը:

-Արդեն հանդիպե՞լ եք թիմի ֆուտբոլիստներին:

— Դեռ ոչ, քանի որ Իսպանիայից ժամանելուց հետո խիստ մեկուսացման մեջ էինք: Վաղը այդ կարևոր օրն է մեզ համար, երբ հանդիպելու ենք ֆուտբոլիստների հետ:

-Շատ կարճ ժամանակ է մնացել մինչև Չեմպիոնների Լիգայի որակավորման առաջին փուլի հանդիպումը, ինչպե՞ս եք պատրաստելու թիմին այս կարևոր մրցաշարին:

— Ֆուտբոլը մի խաղ է, որտեղ ամենակարևորը սեփական ուժերին վստահելն է: Իմ առաջ խնդիր է դրված հզոր խաղային մոդել ստեղծել` առանց վախերի: Ինչքան շուտ սկսենք մեր մարզումները, այդքան պատրաստ կլինենք մրցել եվրոպական ակումբների հետ:

-Բոլորիս համար բարդ ժամանակներ են, կորոնավիրուսի համաճարակը ազդել է գրեթե բոլոր ոլորտների վրա. անմասն չի մնացել նաև ֆուտբոլը: Ինչ եք կարծում, կլինե՞ն գլոբալ փոփոխություններ ֆուտբոլում համաճարակի ավարտից հետո:

— Ես կարծում եմ, որ լուրջ և պրոֆեսիոնալ ակումբներն ավելի լավ կգոյատևեն այս ընթացքում, քան մյուսները: Փոփոխություններին արագ և հեշտ հարմարվելը հաջողության գրավականներից մեկը կլինի ապագայում:

-Ի՞նչ կասեք Հայաստանի մասին:

— Հայաստանը հիանալի երկիր է՝ յուրահատուկ մշակույթով և լավ մարդկանցով: Կարծում եմ, որ հայերը հպարտ ժողովուրդ են: Նրանք շատ նման են իսպանացիներին, հենց դրա համար էլ ես այստեղ ինձ զգում եմ ինչպես տանը: Ի դեպ, հայկական խորովածն ուղղակի հիանալի է (ծիծաղում է):

-Եվ վերջում, Ձեր խոսքն ուղղված մեր երկրպագուներին:

— Ես չեմ կարող մեծ խոստումներ տալ մեր երկրպագուներին, բայց ես կարող եմ խոսք տալ, որ նրանք կտեսնեն քրտնաջան աշխատող և կատաղի սոված թիմ, որը կպայքարեն մինչև վերջ: Խոստանում եմ միշտ կատարել իմ պարտականությունները: