Նորվեգիայի Տրոնդհեմ քաղաքում ընթացող դահուկավազքի Աշխարհի առաջնության 7.5կմ դասական ոճի որակավորման փուլում ՀՀ կանանց հավաքականի առաջատար Կատյա Գալստյանը 33 երկրի 60 մարզիկների պայքարում զբաղեցրել է 5-րդ հորիզոնականը` իրավունք վաստակելով մասնակցելու եզրափակիչ փուլին:

Նշենք, որ երզափակիչ փուլ որակավորվում է ընդամենը 10 մարզիկ, հայտնում է Հայաստանի դահուկային սպորտի և սնոուբորդի ֆեդերացիան։

Հունվարի 6-9-ը Աշոցքում կայացել է Հայաստանի դահուկավազքի առաջնության առաջին փուլը, որի արդյունքներով առաջնության բացարձակ հաղթողներ են դարձել Միքայել Միքայելյանն ու Կատյա Գալստյանը:

Նրանք Հայաստանի չեմպիոնությունը նվաճել են արագավազքի 1.1 կմ դասական, 10 կմ դասական և 10 կմ ազատ ոճերում:

Հատկանշական է, որ խաղարկվող 18 մեդալներից 14-ին (6 ոսկե, 3 արծաթե և 5 բրոնզե) արժանացել են Աշոցքը ներկայացնող մարզիկները:

Ներկայացնում ենք Հայաստանի առաջնության ամփոփ արդյունքները

Արագավազքի 1.1 կմ դասական ոճ
Կանայք
1.Կատյա Գալստյան (Աշոցք),
2. Ռոզա Սիմոնյան (Գյումրի),
3. Անահիտ Մարգարյան (Աշոցք),
Տղամարդիկ
1.Միքայել Միքայելյան (Աշոցք),
2. Սպարտակ Ոսկանյան (Աշոցք),
3. Թադևոս Պողոսյան (Աշոցք)

10 կմ դասական ոճ
Կանայք
1.Կատյա Գալստյան (Աշոցք),
2. Ռոզա Սիմոնյան (Գյումրի),
3. Մարգարիտա Կարապետյան (Աշոցք),

Տղամարդիկ
1.Միքայել Միքայելյան (Աշոցք),
2. Սպարտակ Ոսկանյան (Աշոցք),
3. Թադևոս Պողոսյան (Աշոցք)

10 կմ ազատ ոճ
Կանայք
1.Կատյա Գալստյան (Աշոցք),
2. Ռոզա Սիմոնյան (Գյումրի),
3. Մարգարիտա Կարապետյան (Աշոցք),
Տղամարդիկ
1.Միքայել Միքայելյան (Աշոցք),
2. Սպարտակ Ոսկանյան (Աշոցք),
3. Զորիկ Ղազարյան (Գյումրի)

Հայաստանի դահուկավազքի առաջնության երկրորդ փուլը կկայանա հունվարի վերջին:

Գերմանիայում դահուկորդուհին «Երկու գիշերվա տուր» մրցույթի փուլում հաղթանակի համար որպես պարգև ստացել է շամպուն և ցնցուղի գել։ Այս մասին հայտնում է BR 24-ը:

Գերմանացի Սելինա Ֆրայթագը՝ հաղթելով Գարմիշ-Պարտենկիրխենի որակավորման փուլում, որպես պարգև ստացել է ցնցուղի գել, շամպուն և չորս սրբիչ:

Մինչդեռ տղամարդկանց նույն փուլում հաղթողները ստանում են 3200 եվրո դրամական պարգև, ինչը բողոքի ալիք է առաջացրել: ARD հեռուստաալիքի մեկնաբան Սվեն Հաննավալդը ուղիղ եթերում քննադատել է կազմակերպիչներին՝ պարգևների անհամապատասխանության համար:

Հայաստանի դահուկային ֆեդերացիան նոր նախագահ ունի․ այս պաշտոնում ընտրվել է Գագիկ Սարգսյանը,  որը տևական ժամանակ զբաղեցնում էր ֆեդերացիայի գլխավոր քարտուղարի պաշտոնը։

«չՇնորհակալ եմ Ֆեդերացիայի անդամներին բարձր վստահության համար, ինչպես նաև Արթուր Հարությունյանին` 2016թ.-ից Ֆեդերացիան հաջողությամբ ղեկավարելու համար։

Նորընտիր երիտասարդ, նորարար գաղափարներով լի թիմի հետ կանենք առավելագույնը` Հայաստանում ձմեռային մարզաձևերի զարգացման, հանրայնացման և միջազգային ասպարեզում մեր երկրի պատիվը բարձր պահելու համար»,- գրել է Սարգսյանը ֆեյսբուքի իր էջում։

Հայ դահուկորդների համար տարին կավարտվի Հայաստանի պատանեկան և երիտասարդական  Հայաստանի առաջնություններով, որը կմեկնարկի դեկտեմբերի 25-ից: Այս մասին ArmSport-ին տված հարցազրույցում նշեց դահուկային սպորտի ֆեդերացիայի գլխավոր քարտուղար Գագիկ Սարգսյանը:   

Մինչև այդ մեծահասակները պետք է մասնակցեն Ֆինլանդիայում կայանալիք վարկանիշային մրցաշարին, որը նախատեսված էր անցկացնել դեկտեմբերի 5-9-ը, սակայն  հետաձգվեց կորոնավիրուսի պատճառով.

«Մենք որոշակի առումով խուսափեցինք կորոնավիրուսից և մեր ներքին ծրագրերը մեծամասամբ կարողացանք իրականացնել, բայց ցավոք մեզ համար մեծ հարված էր նոյեմբերի 27-29-ը կայացած Աշխարհի գավաթին չմասնակցելը, քանի որ ամբողջ տարին մեծ ծավալի աշխատանք կատարելով, մեծ դժվարությամբ կարողացանք թիմին ուղարկել ռուսական Խանտի-Մանսիյսկ՝ ուսումնամարզական հավաքի: Դեպի Ֆինլանդիա վիզաների հարցը շատ դժվարությամբ լուծվեց: Թղթաբանությունն ուղղակի ահավոր էր: Մարզիկներին մի կերպ կարողացանք տեղափոխել Խանտի-Մանսիյսկ, հետո Մոսկվայում մի քանի օր մնալուց հետո միայն հաջողվեց ուղարկել Ֆինլանդիա և ուշացան Աշխարհի Գավաթից:  Այնուհետև պետք է կայանար վարկանիշային մրցաշար, սակայն դա էլ հետաձգվեց կորոնավիրուսի պատճառով և կկայանա դեկտեմբերի 20-ին: Նման որոշում կայացվեց մրցումներից ընդամենը երկու օր առաջ»,-ասում է Սարգսյանը:

Այս անգամ օլիմպիական վարկանիշ ձեռք բերելու համար նոր համակարգ է գործում, որը Սարգսյանի խոսքով՝ ավելի բարդ է, սակայն մեզ համար ռեալ է 3-4 ուղեգիր նվաճելը:

«Խնդիրն այն է, որ մենք գնում ենք վերջին վարկանիշային մրցաշարերի սեզոն: Իհարկե հաջորդ տարի նույնպես կան մրցումներ, բայց ինչքան պակասում են մրցաշարերը, այդքան բարդ է դառնում վարկանիշներ ձեռք բերելը: Հիմա նոր համակարգ է գործում վարկանիշի համար, և պայմաններից գլխավորն այն է, որ անպայման պետք է մասնակցել Աշխարհի Գավաթի խաղարկությանը:  Վարկանիշային վերջնական աղյուսակը հրապարակվում է հունվարի վերջին: Այսինքն մինչև դա տարբեր վարկանիշավորման մեխանիզմներով մարզիկները հավաքում են միավորներ: Դահուկավազքից առավելոագույնը 3 ուղեգիր ենք ակնկալում և մեկ վարկանիշ լեռնադահուկային սպորտում: Շատ բան կախված է լիդերից: Այսինքն, եթե լիդերը իր վարկանիշը բավարարում է, արդեն ավելի մեծ շանսեր ենք ունենում, քանի որ իր ռեյտինգից շատ բան է կախված»,-նշում է Սարգսյանը:

Անցնող տարում հնարավոր եղավ ներքին առաջնություններն անցկացնել նախատեսվածի պես, սակայն մի շարք միջազգային վարկանիշային մրցաշարեր հետաձգվեցին, և դեռ հայտնի չէ, թե երբ կանցկացվեն, իսկ գալիք տարում խիտ գրաֆիկ է լինելու դահուկային սպորտի ներկայացուցիչների համար: Հենց տարեսկզբից դահուկորդները կսկսեն մասնակցությունը տարբեր մրցաշարերի:

«Լեռնադահուկորդների համար նախատեսում ենք հունվարի 6-ից մոտ մեկ ամիս Իտալիայում անցկացնել ուսումնամարզական հավաքներ, որից հետո կմասնակցեն վարկանիշային մրցաշարերի, այնուհետև տեղի կունենա Հայաստանի առաջնությունը, Աշխարհի Գավաթի հերթական փուլը և մի շարք վարկանիշային մրցաշարեր: Գալիք տարին շատ հագեցած է լինելու մեզ համար և փորձելու ենք հնարավորինս բոլոր մրցաշարերին մասնակցել»-նկատում է ֆեդերացիայի գլխավոր քարտուղարը:

Գագիկ Սարգսյանը նաև նշում է, որ լեռնադահուկային սպորտում հավաքական թիմի մարզչի ժամանակավոր պաշտոնակատար է նշանակվել նախկին լեռնադահուկորդ Արսեն Ներսիսյանը, ով շատ լավ աշխատանք  է տանում: 

Ֆեդերացիայի ներկայացուցչի խոսքով մարզաձևը տարեց տարի ավելի մասսայական է դառնում. «Դահուկային սպորտը զարգանում ու մասսայականություն է վայելում թե՛ ներսում և թե՛ տուրիզմի առումով: Երևանում ծրագիր ենք սկսել և անվադահուկային 2 մարզում ենք անցկացրել: Ցավոք, մարզիչը վարակվեց կորոնավիրուսով,  և սպասում ենք ապաքինվի:  Նման միջոցառումները շարունակական են: Նախատեսում ենք Ֆանտան գյուղում շաբաթ-կիրակի անցկացնել անվճար ուսուցում: Տրանսպորտի հարցը կլուծենք: Ֆեդերացիան է հոգում ամբողջ ծախսը, օժանդակություն ունենք նաև միջազգային ֆեդերացիայից: Նման միջոցառումները նպաստում են մարզաձևի մասսայականացմանը: Երեխան փոքր տարիքից կապվում է ձյան և դահուկների հետ: Կոնկրետ թիվ չեմ կարող ասել, թե Հայաստանում քանի հոգի է զբաղվում պրոֆեսիոնալ դահուկային սպորտով, բայց գալիք տարում մոնիտորինգ ենք անելու և հստակ պատկերացում կունենանք»,-եզրափակում է Սարգսյանը:

Ֆինլանդիայում կայանալիք դահուկային սպորտի վարկանիշային միջազգային մրցաշարը հետաձգվել է Covid-19-ի պատճառով: Այս մասին ArmSport-ի հետ զրույցում ասաց դահուկային սպորտի ֆեդերացիայի գլխավոր քարտուղար Գագիկ Սարգսյանը:

«Դեկտեմբերի 5-ից Ֆինլանդիայում պետք է կայանար միջազգային մրցաշար, որը հետաձգվել է կորոնավիրուսի պատճառով:

Մինչ այդ նոյեմբերի վերջին Ֆինալդիայում կայացավ Աշխարհի գավաթի խաղարկությունը: Հայաստանը նույնպես պետք է մասնակցեր, սակայն վիզաների հետ կապված խնդիրներ եղան:

Իսկ մինչ այդ կրկին նոյեմբեր ամսին հավաքականը ուսումնամարզական հավաք էր անցկացնում Ռուսաստանի Խանտի Մանսիյսկ քաղաքում, որտեղից պետք է մեկներ Ֆինլանդիա՝ Աշխարհի գավաթին, բայց վերոնշյալ խնդրի պատճառով թիմը 4 օր մնաց Մոսկվայում և ուշացավ Գավաթի խաղարկությունից»,- ասաց Սարգսյանը:

Հետաձգված մրցաշարը կկայանա դեկտեմբերի 20-ից:

Գագիկ Սարգսյանի հետ հարցազրույցն ամբողջությամբ՝ շուտով: