Մադրիդի «Ռեալը» դիտարկում է Դորտմունդի «Բորուսիայի» պաշտպան Նիկո Շլոտերբեկին ձեռք բերելու հնարավորությունը: Այս մասին հայտնում է գերմանական Bild պարբերականը։

Աղբյուրի համաձայն՝ 26-ամյա ֆուտբոլիստի գործող պայմանագրով նախատեսված հրաժարագինը կազմում է 50-60 միլիոն եվրո:

Նշվում է, որ գերմանացի պաշտպանի խաղը համակրում է Ժոզե Մոուրինյուն, ով, ըստ շրջանառվող լուրերի, դառնալու է մադրիդյան ակումբի նոր գլխավոր մարզիչը: Շլոտերբեկն ինքը նույնպես դեմ չէ կարիերան Իսպանիայում շարունակելուն:

Հիշեցնենք, որ Շլոտերբեկը «Բորուսիայի» գույները պաշտպանում է 2022 թվականից:

Նախորդ մրցաշրջանում նա բոլոր մրցաշարերում մասնակցել է 37 հանդիպման՝ դառնալով 5 գոլի և 2 գոլային փոխանցման հեղինակ:

Անգլիական «Մանչեսթեր Սիթին» և Գերմանիայի գործող չեմպիոն «Բավարիան» բացարձակ առաջատարներն են աշխարհի 2026 թվականի առաջնությանը մասնակցող ֆուտբոլիստների քանակով։

​«Քաղաքայինների» կազմից աշխարհի գլխավոր ստուգատեսին կմասնակցի աննախադեպ թվով՝ 19 ֆուտբոլիստ։ Մյունխենյան գրանդն այս ցուցանիշով զիջում է ընդամենը մեկ խաղացողով՝ մունդիալ գործուղելով 18 ֆուտբոլիստի։

​Առաջատարների եռյակը եզրափակում են Չեմպիոնների լիգայի 2025/26 մրցաշրջանի եզրափակիչի մասնակիցները՝ ՊՍԺ-ն ու Լոնդոնի «Արսենալը», որոնք աշխարհի առաջնությունում կունենան 16-ական ներկայացուցիչ։

​Ներկայացնում ենք ԱԱ-2026-ի հայտացուցակներում ամենաշատ ֆուտբոլիստներ ունեցող ակումբների ամբողջական ցանկը․

• «Մանչեսթեր Սիթի» – 19
• «Բավարիա» – 18
• ՊՍԺ, «Արսենալ» – 16
• «Բարսելոնա» – 15
• «Ատլետիկո Մադրիդ», «Ալ-Հիլալ», «Քրիստալ Փելաս», «Մանչեսթեր Յունայթեդ» – 12
• «Բորուսիա Դորտմունդ», «Լիվերպուլ», «Գալաթասարայ» – 11
• «Սլավիա Պրահա», «Միլան», ՊՍՎ, «Ռեալ Մադրիդ», «Ֆեներբախչե» – 10

Հիշեցնենք, որ աշխարհի 2026 թվականի առաջնությունը կմեկնարկի հունիսի 11-ին և պատմության մեջ առաջին անգամ կանցկացվի միանգամից երեք երկրում՝ ԱՄՆ-ում, Կանադայում և Մեքսիկայում։ Մրցաշարին կմասնակցի ռեկորդային՝ 48 ազգային հավաքական։

Հայտնի են դարձել Չեմպիոնների լիգայի 2026/27 մրցաշրջանի ընդհանուր փուլի 29 մասնակիցները։ Լիգայի փուլում ամենաշատ ներկայացուցիչներ կունենան Անգլիան և Իսպանիան՝ 5-ական ակումբով։

• Անգլիա. «Արսենալ», «Մանչեսթեր Սիթի», «Մանչեսթեր Յունայթեդ», «Ասթոն Վիլա», «Լիվերպուլ»։
• Իսպանիա. «Բարսելոնա», «Ռեալ», «Վիլյառեալ», «Ատլետիկո», «Բետիս»։
• Իտալիա. «Ինտեր», «Նապոլի», «Ռոմա», «Կոմո»։
• Գերմանիա. «Բավարիա», Դորտմունդի «Բորուսիա», «Լայպցիգ», «Շտուտգարտ»։
• Ֆրանսիա. ՊՍԺ, «Լանս», «Լիլ»։
• Նիդերլանդներ. ՊՍՎ, «Ֆեյենորդ»։
• Պորտուգալիա. «Պորտու», «Սպորտինգ»։
• Բելգիա. «Բրյուգե»։
• Չեխիա. «Սլավիա»։
• Թուրքիա. «Գալաթասարայ»։
• Ուկրաինա. «Շախտյոր»։

Ընդհանուր առմամբ՝ Չեմպիոնների լիգայի 2026/27 մրցաշրջանի լիգայի փուլում հանդես կգա 36 թիմ։ ՉԼ-ի մնացած 7 ուղեգրերը կխաղարկվեն որակավորման փուլերում, որոնք կանցկացվեն ամռանը։ Մրցաշարի հիմնական փուլը կմեկնարկի 2026 թվականի սեպտեմբերի 8-ին և կեզրափակվի 2027-ի հունվարի 27-ին։

Հիշեցնենք, որ Չեմպիոնների լիգայի ընթացիկ մրցաշրջանի հաղթողը հայտնի կդառնա մայիսի 30-ին՝ ՊՍԺ — «Արսենալ» եզրափակիչ դիմակայությունում։ Հանդիպումը կկայանա Բուդապեշտի «Պուշկաշ Արենա» մարզադաշտում։

Սաուդյան Արաբիան ներկայացնող «Ալ-Նասրի» և Պորտուգալիայի ազգային հավաքականի հարձակվող Կրիշտիանու Ռոնալդուի որդին կարող է տեղափոխվել Լիսաբոնի «Սպորտինգ» կամ Դորտմունդի «Բորուսիա», հաղորդում է բրիտանական The Sun պարբերականը:

Ըստ աղբյուրի տեղեկությունների՝ Ռոնալդու կրտսերը ցանկանում է վերադառնալ և կարիերան շարունակել Եվրոպայում, որտեղ նախկինում արդեն հասցրել է հանդես գալ Թուրինի «Յուվենտուսի» և «Մանչեսթեր Յունայթեդի» պատանեկան թիմերում:

Ավելի վաղ հաղորդվում էր, որ «Ալ-Նասրը» ծրագրում է 15-ամյա ֆուտբոլիստին հաջորդ մրցաշրջանից ներգրավել գլխավոր թիմի կազմում:

Հիշեցնենք, որ Ռոնալդու կրտսերը ծնվել է 2010 թվականի հունիսին: Նախորդ տարվա՝ 2025 թվականի հոկտեմբերին, նա իր նորամուտն է նշել Պորտուգալիայի մինչև 16 տարեկանների հավաքականում:

Դորտմունդի «Բորուսիայի» պաշտպան Նիկլաս Զյուլեն հայտարարել է 30 տարեկանում պրոֆեսիոնալ ֆուտբոլիստի կարիերան ավարտելու մասին։

Գերմանացի խաղացողի խոսքով՝ ինքն այս որոշումը կայացրել է ապրիլի 18-ին «Հոֆենհայմի» դեմ խաղում (1:2) ծնկի վնասվածք ստանալուց հետո առաջացած ապրումների պատճառով։

«Ցանկանում եմ հայտարարել, որ այս ամռանն ավարտում եմ կարիերաս։ Մեր բժիշկը հանդերձարանում ստուգում անցկացրեց, նայեց ֆիզիոթերապևտին և օրորեց գլուխը։ Ես գնացի ցնցուղ ընդունելու և մոտ 10 րոպե լաց էի լինում այն մտքից, որ ծնկիս խաչաձև կապանը կրկին կտրվել է։ Հաջորդ օրը գնացի ՄՌՏ հետազոտության և լավ լուրեր ստացա. ինձ համար 1000 տոկոսով պարզ դարձավ, որ վերջ, ամեն ինչ ավարտված է։

Չէի կարող ավելի վատ բան պատկերացնել, քան սպասել ապրելու, անկախ լինելու, արձակուրդ գնալու, երեխաներիս հետ ժամանակ անցկացնելու հնարավորությանը՝ միայն նրա համար, որ հետո երրորդ անգամ կտրեմ «խաչերը»,- Զյուլեի խոսքն է մեջբերում «Բորուսիայի» պաշտոնական կայքը։

Նշենք, որ պրոֆեսիոնալ կարիերայի ընթացքում Նիկլաս Զյուլեն հանդես է եկել «Հոֆենհայմի», Մյունխենի «Բավարիայի» և Դորտմունդի «Բորուսիայի» կազմերում։ Նա ակումբային մակարդակում նվաճել է 14 տիտղոս, որոնց թվում են Գերմանիայի 5 չեմպիոնությունն ու Չեմպիոնների լիգայի գավաթը։ Գերմանիայի հավաքականի կազմում պաշտպանն անցկացրել է 49 հանդիպում և դարձել 1 գոլի հեղինակ։

Դորտմունդի «Բորուսիայի» նախկին գլխավոր մարզիչ Էդին Թերզիչը նոր աշխատանք է գտել Իսպանիայում։ Նա կստանձնի Բիլբաոյի «Ատլետիկի» գլխավոր մարզչի պաշտոնը, պաշտոնապես հայտնում է իսպանական ակումբի մամուլի ծառայությունը։

Նշվում է, որ 43-ամյա մասնագետը պաշտոնապես կներկայացվի ընթացիկ մրցաշրջանի ավարտից հետո։ Մարզիչը բասկյան ակումբի հետ կնքել է երկարաժամկետ պայմանագիր, որը նախատեսված է մինչև 2028 թվականի հունիսի 30-ը։ «Ատլետիկի» գլխավոր մարզչի պաշտոնում նա կփոխարինի փորձառու Էռնեստո Վալվերդեին։

Հիշեցնենք, որ Թերզիչը «Բորուսիայից» հեռացել էր 2024 թվականի հունիսին։ 2023/24 մրցաշրջանում դորտմունդյան թիմը նրա գլխավորությամբ հիանալի մրցելույթներ ունեցավ եվրոպական ասպարեզում՝ հասնելով մինչև Չեմպիոնների լիգայի եզրափակիչ, որտեղ, սակայն, համառ պայքարում 0:2 հաշվով զիջեց Մադրիդի «Ռեալին»։

Գերմանիայի Բունդեսլիգայի 31-րդ տուրի շրջանակում Դորտմունդի «Բորուսիան» սեփական հարկի տակ ընդունեց «Ֆրայբուրգին» և խոշոր՝ 4:0 հաշվով հաղթանակ տոնեց։

​Տանտերերի կազմում գոլերի հեղինակ դարձան Մաքսիմիլիան Բայերը (8-րդ րոպե), Սերհու Գիրասին (14′), Ռամի Բենսեբաինին (31′) և Ֆաբիո Սիլվան (87′):

​Այս խաղից հետո դորտմունդյան թիմը վաստակեց 67 միավոր և Գերմանիայի առաջնության մրցաշարային աղյուսակում զբաղեցնում է երկրորդ հորիզոնականը։ «Ֆրայբուրգը» 43 միավորով 8-րդն է։

Տեսանյութը` ԱՅՍՏԵՂ

Գերմանիայի Բունդեսլիգայի 28-րդ տուրի շրջանակում Դորտմունդի «Բորուսիան» հյուրընկալվելիս մրցեց «Շտուտգարտի» հետ։ «MHP-Արենա» մարզադաշտում կայացած հանդիպումն ավարտվեց դորտմունդյան թիմի՝ 2։0 հաշվով հաղթանակով։

Ուշագրավ է, որ երկու գոլերն էլ գրանցվեցին հանդիպման հիմնական ժամանակին ավելացված րոպեներին։ 90+4-րդ րոպեին հաշիվը բացեց Կարիմ Ադեյեմին, իսկ 90+6-րդ րոպեին Յուլիան Բրանդտը կրկնապատկեց հյուրերի առավելությունը՝ վերջակետ դնելով խաղին։

Այս հաղթանակից հետո «Բորուսիան» վաստակեց 64 միավոր և Բունդեսլիգայի մրցաշարային աղյուսակում ամրապնդվեց 2-րդ հորիզոնականում։ «Շտուտգարտը» 53 միավորով եզրափակում է լավագույն եռյակը։ Նշենք, որ սա դորտմունդյան թիմի 4-րդ անընդմեջ հաղթանակն էր առաջնությունում։

Հաջորդ տուրում դորտմունդցիները ապրիլի 11-ին կմրցեն «Բայերի» հետ, իսկ «Շտուտգարտը» ապրիլի 12-ին սեփական հարկի տակ կընդունի «Համբուրգին»։

Գոլերը՝ ԱՅՍՏԵՂ

Մրցաշարային աղյուսակն այս պահին

Դորտմունդի «Բորուսիան» իր պաշտոնական կայքում հայտարարել է ակումբի սպորտային տնօրեն Սեբաստիան Կելի հետ համագործակցությունը դադարեցնելու մասին:

«Անկեղծ զրույցի ընթացքում Սեբաստիան Կելը, Կարստեն Կրամերը և ես հանգեցինք ընդհանուր եզրակացության, որ ամառը փոփոխությունների համար լավագույն ժամանակն է: Որպեսզի երկու կողմերին էլ նախապատրաստվելու ժամանակ տանք, մենք փոխադարձ համաձայնությամբ որոշեցինք անհապաղ խզել պայմանագիրը Սեբաստիանի հետ: Նրա հետ մենք նաև երկար տարիների պատմություն ունենք: Մենք ոչ միայն միասին խաղացել ենք Դորտմունդի «Բորուսիայում», այլև միասին նվաճել ենք Գերմանիայի չեմպիոնի տիտղոսը 2002 թվականին։ Սեբաստիանը հսկայական ավանդ ունի մեր ակումբի հաջողություններում, և մենք շատ երախտապարտ ենք նրան իր նվիրվածության համար», — դորտմունդյան ակումբի տնօրեն Լարս Ռիկենի խոսքերն է մեջբերում մամուլի ծառայությունը։

2018 թվականից ի վեր Կելը չորս տարի գլխավորել է Դորտմունդի «Բորուսիայի» պրոֆեսիոնալ ֆուտբոլիստների բաժինը։ Այդ ընթացքում ակումբը 2021 թվականին նվաճել է Գերմանիայի գավաթը: 2022 թվականի ամռանը թիմի նախկին ֆուտբոլիստը ստանձնել է սպորտային տնօրենի պաշտոնը։ Նրա պաշտոնավարման ժամանակահատվածում դորտմունդյան ակումբը մշտապես նվաճել է ՈՒԵՖԱ-ի Չեմպիոնների լիգայի ուղեգիր և 2024 թվականին հասել մրցաշարի եզրափակիչ։

Նշենք, որ ներկայումս «Բորուսիան» Բունդեսլիգայի մրցաշարային աղյուսակում զբաղեցնում է երկրորդ հորիզոնականը:

Գերմանական Բունդեսլիգայի 27-րդ տուրի շրջանակում Դորտմունդի «Բորուսիան» սեփական հարկի տակ ընդունեց «Համբուրգին» և տպավորիչ կամային հաղթանակ տարավ 3:2 հաշվով:

Հանդիպման հաշիվը 19-րդ րոպեին բացեց հյուրերի հարձակվող Ֆիլիպ Օտելեն, իսկ 38-րդ րոպեին Ալբեր Սամբի Լոկոնգան կրկնապատկեց «Համբուրգի» առավելությունը՝ թիմերին ընդմիջման ուղարկելով հյուրերի հարմարավետ առավելությամբ:

Այնուամենայնիվ, երկրորդ խաղակեսում դորտմունդցիներին հաջողվեց բեկել հանդիպման ընթացքը։ Տանտերերի կազմում հերոս դարձավ պաշտպան Ռամի Բենսեբաինին, որը երկու անգամ անվրեպ իրացրեց 11-մետրանոց հարվածը (73՛, 84՛): Եվս մեկ անգամ էլ տանտերերի կազմում աչքի ընկավ Սերու Գիրասին՝ 78-րդ րոպեին խփելով իր թիմի երկրորդ գոլը:

Այս հաղթանակից հետո «Բորուսիան» վաստակեց 61 միավոր և շարունակում է զբաղեցնել Բունդեսլիգայի մրցաշարային աղյուսակի երկրորդ հորիզոնականը՝ առաջատար «Բավարիայից» հետ մնալով 9 միավորով։ «Համբուրգը» 30 միավորով 11-րդն է:

Գոլերը՝ ԱՅՍՏԵՂ

Մրցաշարային աղյուսակն այս պահին