Ռուսական «Վիստա» ակումբի նախկին սեփականատեր Անտոն Զինգարևիչն ու Բագրատ Նավոյանը ստորագրել են պայմանագիր, ըստ որի նրանք կհանդիսանան «Ալաշկերտ» ՖԱ-ի համասեփականատերեր։ Այս մասին հայտնում է ակումբի մամուլի ծառայությունը։

Կողմերը համատեղ սկսում են նոր ճանապարհ։ Գործակցության նպատակն է «Ալաշկերտ» ՖԱ-ն դարձնել հզոր ու մարտունակ ակումբ։

Նախորդ մրցաշրջանում «Վանում» սկսված նախագիծը կշարունակվի «Ալաշկերտում»։ «Վանի» մարզչական շտաբն ու ֆուտբոլիստների ամբողջ կազմը կպաշտպանեն «Ալաշկերտի» գույները։

Հունիսի 20-ից թիմը կսկսի նախապատրաստությունը նոր մրցաշրջանին։ «Ալաշկերտի» փոխնախագահի պաշտոնը կզբաղեցնի Տիգրան Մկրտչյանը։

«Ալաշկերտի» սեփականատեր Բագրատ Նավոյանն ArmSport-ի հետ զրույցում խոսել է «Արարատի» նկատմամբ երեկ տարած կամային հաղթանակի, գլխավոր մարզչի բացակայության, մրցավարների թերացման, ինչպես նաև եվրագավաթային մրցաշարերից առաջ թիմում սպասվելիք համալրումների մասին:

-Պարոն Նավոյան, «Արարատի» հետ խաղին հետևում էիք տեխնիկական գոտուց: Գլխավոր մարզչի բացակայությունն ինչո՞վ էր պայմանավորված:

-Արմեն Ադամյանը շատ բարձրակարգ մասնագետ է, շատ ինտելիգենտ անձնավորություն: Նրա բացակայությունը պայմանավորված էր միայն առողջական պատճառներով: Երկու-երեք խաղ շատ վատ էինք անցկացրել, ու որպեսզի նա ավելի չնյարդայնանար, չջղայնանար, ես խնդրեցի, որ հանդիպմանը հետևի տրիբունայից: Այնքան, ինչքան ես եմ մտածում, չարչարվում, նույն չարչարանքը նաև գլխավոր մարզիչն է կատարում: Ասեմ, որ տրիբունայից ավելի լավ է երևում թե՛ դրական, թե՛ թերի, բաց կողմերը: Որպես ակումբի սեփականատեր՝ ես գտնվեցի տեխնիկական գոտում: Հուսով եմ՝ Արմեն Ադամյանի առողջական վիճակը լավ կլինի ու հաջորդ խաղին նա արդեն ներկա կլինի դաշտում: Մարզումներն ինքն է անցկացնում, թիմն ինքն է ղեկավարում: Եթե առողջականը ների ու հաջորդ խաղին նա վերադառնա, ես էլ իր կողքին կլինեմ ու երկուսով միասին ավելի հետաքրքիր խաղ կանցկացնենք:

-Կարելի՞ է ենթադրել, որ շարունակելու եք վստահել մարզչական շտաբին նաև ընթացիկ առաջնության ավարտից հետո:

-Նույն կերպ շարունակում եմ վստահել: Բայց երբեք մի ասա երբեք, ամեն ինչ էլ հնարավոր է: Հնարավոր է՝ դրսից մասնագետներ հրավիրենք, հնարավոր է՝ չհրավիրենք: Եթե ամեն ինչ նորմալ լինի, ոչ մի փոփոխություն չի լինի, բայց եթե եղան թույլ տեղեր, սխալներ կամ թերացումներ, միանշանակ լինելու են թե՛ մարզիչների, թե՛ ֆուտբոլիստների փոփոխություններ: Մենք շատ ենք տուժել, վնասներ կրել, ոչ ոք չգիտի՝ վաղն ինչ կլինի, բայց քանի դեռ մի փոքր հնարավորություն կա շարունակելու, պայքարելու ենք եվրագավաթներում բարձր տեղ գրավելու համար: Դա է մեր միակ նպատակը:

— «Արարատի» հետ խաղում Ձեր թիմը կարողացավ 10 հոգով կամային հաղթանակ տանել: Այդ խաղն ինչպե՞ս կմեկնաբանեք:

-Շատ հետաքրքիր խաղ ստացվեց: Մրցավարը մեր խաղացողին կարմիր քարտ ցույց տվեց, բայց միանշանակ ճիշտ էր, քանի որ դա վերջին հույսի խախտում էր համարվում: Մենք ընդունում ենք: Տղաները 10 հոգով արեցին այն, ինչը միայն գովեստի է արժանի: Արեցին ամեն ինչ հաղթանակի համար, բայց գլխավոր մրցավարի ու աջ եզրային մրցավարի գործողություններում որոշակի բաներ կար, որոնցից ես դժգոհ եմ: Մրցակցի տուգանային հրապարակում բոլորս ականատես եղանք, թե ինչպես գնդակը դիպավ մրցակցի խաղացողի ձեռքին, բայց գլխավոր մրցավարը, չգիտես ինչու, 11-մետրանոց չնշանակեց: Ոչ էլ նրան օգնեց եզրայինը, որը պարտավոր էր օգնելու: Երկու անգամ դիտել եմ խաղի տեսագրությունը: Այն, որ գլխավոր մրցավարը՝ կողքը կանգնած, և եզրայինը, չեն նկատում նման բանը, պարզապես անթույլատրելի է: Եթե մեր թիմը պարտվեր կամ խաղն ավարտվեր ոչ-ոքի, մրցավարը կազդեր խաղի ելքի վրա: ՀՖՖ նախագահին ու փոխնախագահին բանավոր հայտնել եմ իմ դժգոհությունը, չեմ բողոքարկելու, բայց իրենք էլ են զգացել, որ դա միանշանակ պատիժ էր «Ալաշկերտի» համար: Ի դեպ, որպես մրցավար՝ նրա աշխատանքը հավանում եմ, նորմալ մրցավար է (խմբ. — «Արարատ»-«Ալաշկերտ» խաղի գլխավոր մրցավարն Աշոտ Ղալթախչյանն էր), բայց երեկվա խաղում, չգիտես ինչու, շատ ագրեսիվ էր տրամադրված: Խնդրել եմ, որ նման դեպքեր այլևս չկրկնվեն: 16-րդ րոպեին կարմիր քարտ ստացանք, մնացինք 10 հոգով, ընդունում եմ՝ արժանի էինք կարմիր քարտին, բայց լիարժեք 11-մետրանոց չնշանակել չէր կարելի, կլինի «Ալաշկերտի» խաղը, Կիրակոսի թիմը, թե Մարտիրոսի: Դա համարում եմ մրցավարների ոչ պրոֆեսիոնալ աշխատանքի արդյունք: Բաներ կան, որ փչացնում են խաղը:

Ինչ վերաբերում է խաղին, նորից պետք է կրկնեմ, որ տղաները 10 հոգով արտակարգ հանդիպում անցկացրին, մինչև վերջին վայրկյանը պայքարեցին ու կարելի է ասել՝ «Արարատի» բախտն ինչ-որ տեղ ժպտաց, քանի որ նվազագույնը 4-5 գնդակ ևս կարող էինք խփել: Խաղն ավելի խոշոր՝ 7-1, 8-1 հաշվով պետք է ավարտվեր: Ամեն դեպքում շնորհակալ եմ տղաներին, շատ կարևոր 3 միավոր վաստակեցինք:

— Նշեցիք, որ չեք պատրաստվում բողոքարկել: Ինչո՞ւ:

-Իրենք էլ են համոզված, որ մրցավարի սխալն էր դա: Կցանկանամ, որ իրենք բացատրեն, թե ինչումն է խնդիրը: Ամեն դեպքում նման սխալներ չպետք է լինեն ֆուտբոլում:

-Շարունակելով մրցավարության թեման՝ ՀՖՖ-ն վերջերս դիմել էր ակումբներին՝ առաջարկելով նշել 1 մրցավարի անուն, որին չեն ցանկանա տեսնել իրենց խաղերը սպասարկելիս: «Ալաշկերտն» օգտվե՞լ է այդ հնարավորությունից:

-Ոչ: Ամեն խաղում էլ մի բան լինում է: Մի օր կարող է սխալ թույլ տա օրինակ Զավեն Հովհաննիսյանը, մյուս օրը՝ Հենրիկ Նալբանդյանը, և այլն: Սա ֆուտբոլ է: Եթե լինում է պահ, որ մրցավարը սխալվում է, ընդունելի է, պահ է, կարող է չզգացվի: Ես նստած էի տեխնիկական գոտում ու ինձնից էլ չերևաց, որ ձեռքին դիպել է: Բայց գլխավոր մրցավարը՝ կողքը կանգնած, կամ եզրայինը, որի աչքի առաջ էր, պարտավոր էր զգուշացնել: Մեզ համար չկան անցանկալի կամ հակառակը՝ սիրելի մրցավարներ: Չեմ ասում, որ մեզ մոտ շատ բարձր մակարդակ է, բայց ունենք այն, ինչ ունենք: Պետք է հարմարվենք: Կարծում եմ՝ մեր ֆեդերացիան ամեն ինչ կանի, որ պատժի նման սխալներ թույլ տվող մարդկանց, որպեսզի հաջորդ խաղերում մյուս թիմերի հանդեպ նման սխալներ թույլ չտրվեն:Հուսով եմ՝ դա կլինի:

-Մեր առաջնությունում մրցավարության մակարդակից ընդհանուր առմամբ գո՞հ եք, եթե երեկվա խաղը չհաշվենք:

-Ունենք այն, ինչ ունենք: Պետք է բավարարվենք: Գրեթե բոլոր խաղերին ներկա եմ լինում: Հենրիկ Նալբանդյանը դատում է «Շիրակ»-«Արարատ-Արմենիա» խաղը և ոչ մի սխալ թույլ չի տալիս: Անձամբ հետևել եմ նաև «Նոայի» խաղին «Լոռիի» հետ, որը ևս շատ արտակարգ հանդիպում էր: Մրցավարական ոչ մի սխալ չեղավ: Շատ են նման դեպքեր լինում ոչ միայն մեր, այլև՝ մյուս թիմերի պարագայում:

Առհասարակ, բոլորին խնդրում եմ՝ աշխատեք սեփականատերերին վնաս չտալ: Մրցավարի ամեն մի սուլիչը կարող է ազդել թիմի վրա: Լինում են սխալներ՝ չէի ասի, թե միտումնավոր կամ դիտավորյալ, բայց երբ գլխավոր մրցավարի աչքերի առաջ գնդակը մրցակցի տուգանային հրապարակում դիպչում է ձեռքին ու 11-մետրանոց չի նշանակվում, այն էլ այն դեպքում, որ այդ թիմին ինքն արդեն 16-րդ րոպեին պատժել է՝ թողնելով 10 հոգով … եթե ինքը պատրաստ է պատժել կարմիր քարտով, ուրեմն պետք է պատրաստ լինի նաև 100 տոկոսանոց 11-մետրանոցը նշանակել:

-Այսինքն այստեղ ինչ-որ դիտավորությո՞ւն եք տեսնում:

-Ոչ մի դիտավորություն, պարզապես դա էր մակարդակը, ավելին չես պահանջի: Դա անփորձություն է: Իրենք պարտավոր են շատ աշխատել, դրսի խաղերին հետևել: Իմ հանդեպ հնարավոր չէ միտումնավոր բան անել … ինչի՞ համար: Ես բոլորի հետ շատ ընկերական ու հարգալից վերաբերմունք ունեմ: Ինձ պետք չէ օգնել, բայց ինձ չպետք է խանգարեն: Դա է իմ սկզբունքը: Ոչ մի մրցավարի չեմ ասել՝ խնդրում եմ ինձ այս խաղում օգնեք: Պարզապես բոլոր խաղերից առաջ խնդրում եմ՝ խաղը չփչացնեք, մաքուր, օրինական դատեք: Երբեմն սխալներ լինում են, բայց իրենց էլ չես կարող մեղադրել, մարդ են:

-Մրցաշարային աղյուսակի տեսանկյունից բավականին կարևոր հաղթանակ տարաք: Առաջնության ավարտին 4 տուր է մնացել, իսկ մրցանակային տեղերի համար պայքարը շատ սուր է: Ի՞նչ խնդիրներ եք դրել թիմի առջև՝ կապված այս մրցաշրջանի հետ և որքանո՞վ եք դրանք իրատեսական համարում:

-Յուրաքանչյուր խաղ կարելի է ասել՝ 6 միավորի, ոսկու արժեք ունի բոլոր թիմերի համար: Նախորդ խաղում «Լոռին» 6 թանկարժեք միավոր կորցրեց, «Նոան» հաղթեց և առաջ անցավ: «Շիրակը» հաղթեց «Արարատ-Արմենիային» ու ոսկու արժեք ունեցող միավորներ վաստակեց: 4 խաղ է մնացել, բոլորն էլ ուզում են խաղալ եվրագավաթներում: Նույնը՝ «Ալաշկերտը»: Ես մաքսիմալիստ եմ ու առաջին իսկ օրվանից իմ թիմի առջև չեմպիոնության խնդիր եմ դրել: Պայքարելու ենք չեմպիոնության համար:

Ինչ վերաբերում է մյուս թիմերին, ապա միայն «Արարատի» համար եմ ցավում, կարծես՝ վիճակն այն չէ: «Արարատը» շատ լավ թիմ է, շատ լավ վերելք ապրեց, բայց ձմեռային դադարից հետո արդեն մի քանի տարի է՝ զգում եմ, որ վերջին պահին ինչ-որ բան չի ստացվում: Հիմա 6-յակում են, պետք է պայքարեն եվրագավաթների համար, բայց ամեն ինչ այնպես չի գնում, ինչպես՝ կցանկանային: Այս պահի դրությամբ 4-5 թիմ լիարժեք պայքարում են եվրագավաթների ուղեգրի համար: «Արարատ-Արմենիան», «Շիրակը», «Ալաշկերտն» ու «Նոան» լավ վիճակում են, մի փոքր զիջում է «Լոռին»: Ամեն դեպքում, դեռևս լարված պայքար է ընթանում, ամեն տուրից հետո դեռ չես կարող վստահ ասել, թե որ թիմը չեմպիոն կդառնա կամ մրցանակային տեղերն ինչպես կբաշխվեն:

Ողջունում եմ, որ շատ հաճելի ու ուժեղ մրցակցություն է ընթանում:

-Ըստ Ձեզ, պատրա՞ստ եք այս թիմով արժանի պայքար մղել եվրագավաթներում: Առհասարակ, արդեն մտածո՞ւմ եք այն մասին, թե ինչպես եք պատրաստվելու եվրագավաթային խաղերին կամ ինչ տրանսֆերներ եք իրականացնելու:

-Սուտ կլինի եթե ասեմ, որ ունենք բաց տեղեր: Ունենք 23 պրոֆեսիոնալ ֆուտբոլիստներ: Տղաների մոտ կա ցանկություն, երեկվա խաղում անգամ չէին ցանկանում փոփարինվել ու պատրաստ էին մինչև վերջ պայքարել: Մեր հիմնական նպատակը հենց այս թիմով եվրագավաթներում հանդես գալն է, բայց տրանսֆերային պատուհանի բացվելուց հետո, հնարավոր է՝ 2-3 խաղացողով ուժեղացնենք կազմը: Բայց ասեմ՝ ունենք շատ ուժեղ, կայուն և հզոր թիմ: Պայքարելու ենք չեմպիոնության և ՉԼ-ի ուղեգրի համար, բայց եթե որևէ բան չստացվի, միանշանակ պայքար կմղենք Եվրոպա լիգայում հանդես գալու համար:

— Վերջերս լուրեր տարածվեցին, թե «Ալաշկերտը» և ևս 3 ակումբ ֆինանսական խնդիրների պատճառով կարող են լքել Հայաստանի առաջնությունը: Դուք այս տեղեկությունը հերքեցիք՝ նշելով, որ նման սցենարի մասին անգամ խոսք չկա: Ամեն դեպքում, պանդեմիայի պատճառով թիմի համար արդյոք որոշակի խնդիրներ առաջացե՞լ են:

-Համավարակը բոլորին էլ խանգարեց՝ թե՛ մեզ, թե՛ ֆուտբոլիստներին, թե՛ մյուս ակումբների սեփականատերերին, թե՛ առհասարակ տնտեսությանը: Դժվար է, երբ թիմը չի խաղում, բայց պետք է շարունակես աշխատավարձերը վճարել: Ամեն դեպքում, «Ալաշկերտում» ոչ մի խնդիր չի եղել կապված աշխատավարձերի վճարման հետ, դրանք միշտ եղել են ժամանակին ու առանց որևէ պահումների: Ամենակարևորն այն է, որ տղաներ կային, որոնց պայմանագրերն ավարտվում էին, բայց դրանք ևս մեկ ամսով երկարաձգեցինք:

Ես նաև ուրախ եմ, որ այս պահի դրությամբ մի քանի այլ թիմերից կան պրոֆեսիոնալ տղաներ՝ հավաքականում խաղացած, ովքեր ցանկանում են համալրել «Ալաշկերտի» շարքերը: Շատ ուրախ եմ, որ մեզ վստահում են: Չեմ ցանկանա ժամանակից առաջ ընկնել ու նշել, թե որ ֆուտբոլիստների մասին է խոսքը: Մոտ 1 ամիս ժամանակ ունենք, չեմ ուզում շտապել, բայց անպայման կլինեն փոփոխություններ՝ ինչպես հայկական մյուս թիմերից համալրումներ, այնպես էլ՝ գուցե խաղացողներ արտերկրից:

Նարե Հովհաննիսյան

«Ալաշկերտի» սեփականատեր Բագրատ Նավոյանը ՀՀ Բարձրագույն խմբի առաջնության 24-րդ տուրի՝ «Արարատի» հետ խաղին հետևում էր անմիջապես տեխնիկական գոտուց. խաղից առաջ հայտնի դարձավ, որ «Ալաշկերտի» գլխավոր մարզիչ Արմեն Ադամյանը կբացակայի տեխնիկական գոտուց:

«Ալաշկերտն» այդ խաղում 10 հոգով կամային հաղթանակ տարավ 3-1 հաշվով, իսկ ArmSport-ի հետ զրույցում Բագրատ Նավոյանը նշեց, որ Արմեն Ադամյանի բացակայությունը կապված էր առողջական որոշակի խնդիրների հետ:

-Պարոն Նավոյան, «Արարատի» հետ խաղին հետևում էիք տեխնիկական գոտուց: Գլխավոր մարզչի բացակայությունն ինչո՞վ էր պայմանավորված:

-Արմեն Ադամյանը շատ բարձրակարգ մասնագետ է, շատ ինտելիգենտ անձնավորություն: Նրա բացակայությունը պայմանավորված էր միայն առողջական պատճառներով: Երկու-երեք խաղ շատ վատ էինք անցկացրել, ու որպեսզի նա ավելի չնյարդայնանար, չջղայնանար, ես խնդրեցի, որ հանդիպմանը հետևի տրիբունայից: Այնքան, ինչքան ես եմ մտածում, չարչարվում, նույն չարչարանքը նաև գլխավոր մարզիչն է կատարում: Ասեմ, որ տրիբունայից ավելի լավ է երևում թե՛ դրական, թե՛ թերի, բաց կողմերը: Որպես ակումբի սեփականատեր՝ ես գտնվեցի տեխնիկական գոտում: Հուսով եմ՝ Արմեն Ադամյանի առողջական վիճակը լավ կլինի ու հաջորդ խաղին նա արդեն ներկա կլինի դաշտում: Մարզումներն ինքն է անցկացնում, թիմն ինքն է ղեկավարում: Եթե առողջականը ների ու հաջորդ խաղին նա վերադառնա, ես էլ իր կողքին կլինեմ ու երկուսովս միասին ավելի հետաքրքիր խաղ կանցկացնենք:

-Կարելի՞ է ենթադրել, որ շարունակելու եք վստահել մարզչական շտաբին նաև ընթացիկ առաջնության ավարտից հետո:

-Նույն կերպ շարունակում եմ վստահել: Բայց երբեք մի ասա երբեք, ամեն ինչ էլ հնարավոր է: Հնարավոր է՝ դրսից մասնագետներ հրավիրենք, հնարավոր է՝ չհրավիրենք: Եթե ամեն ինչ նորմալ լինի, ոչ մի փոփոխություն չի լինի, բայց եթե եղան թույլ տեղեր, սխալներ կամ թերացումներ, միանշանակ լինելու են թե՛ մարզիչների, թե՛ ֆուտբոլիստների փոփոխություններ: Մենք շատ ենք տուժել, վնասներ կրել, ոչ ոք չգիտի՝ վաղն ինչ կլինի, բայց քանի դեռ մի փոքր հնարավորություն կա շարունակելու, պայքարելու ենք եվրագավաթներում բարձր տեղ գրավելու համար: Դա է մեր միակ նպատակը:

Բագրատ Նավոյանի հետ ArmSport-ի հարցազրույցն ամբողջությամբ կայքում կլինի շուտով:

Այս րոպեներին ընթանում է Հայաստանի Բարձրագույն խմբի առաջնության 24-րդ տուրի «Արարատ» — «Ալաշկերտ» հանդիպումը։

Խաղի մեկնարկից րոպեներ առաջ հայտնի դարձավ, որ «Ալաշկերտի» գլխավոր մարզիչ Արմեն Ադամյանն ու նրա օգնական Աղվան Մկրտչյանը չեն լինելու տեխնիկական գոտում։

Նրանց փոխարեն տեխնիկական գոտուց հանդիպման ընթացքին հետևում է ակումբի սեփականատեր Բագրատ Նավոյանը։

Կայացել է Հայաստանի ֆուտբոլի ֆեդերացիայի Կարգապահական կոմիտեի հերթական նիստը` ՀՖՖ Կարգապահական կոմիտեի նախագահ Ռուբեն Սինոյանի նախագահությամբ:

33 կետից բաղկացած նիստում կան մի շարք ուշագրավ կետեր:

Մասնավորապես, «ՈՒրարտու-2»-«Ալաշկերտ-2» խաղին («Ալաշկերտ» ակումբի սեփականատեր Բագրատ Նավոյանը մրցավարի որոշման հետ անհամաձայնություն հայտնելու) համար, ՀՖՖ կարգապահական և Էթիկայի կանոնակարգի 31-րդ հոդվածի 27-րդ կետի համաձայն` «Ալաշկերտ» ակումբի սեփականատեր Բագրատ Նավոյանը որակազրկվել 1 խաղով, «Ալաշկերտ» ֆուտբոլային ակումբ տուգանվել է 50000 ՀՀ դրամով:

Նիստի ամբողջական արձանագրությունը կարող եք տեսնել այստեղ:

«Ալաշկերտում» կրկին մարզչական փոփոխություն եղավ: Մրցաշրջանի մեկնարկից թիմը 4 խաղում ընդամենը 1 հաղթանակ էր տարել, կրել 2 պարտություն և 1 խաղ ավարտել ոչ-ոքի: 

Թիմի բյուջեն կրճատելու մասին լուրերի, 2 անընդմեջ հաղթանակների, նոր գլխավոր մարզչին դեռևս պաշտոնապես չներկայացնելու, առաջադրանքների ու Աբրահամ Խաշմանյանի հեռանալու մասին ArmSport.am-ը զրուցել է «Ալաշկերտի» նախագահ Բագրատ Նավոյանի հետ:

— Վերջին երկու տուրերում «Ալաշկերտը» բավականին վստահ տեսք ունի: Ի՞նչ եք կարծում, թիմի այս «կերպարանափոխությունն» ինչո՞վ է պայմանավորված:

— Ինձ թվում է՝ դուք էլ եք զգում, որ թիմը շատ նորմալ ֆուտբոլ է ցուցադրում և, կարելի է ասել, ավելի են ուժեղացել այս երկու խաղերում: «Ալաշկերտը» միշտ էլ ուժեղ է եղել, պարզապես սկզբնական մի քանի խաղ չստացվեցին, բայց դա ոչ մարզչական շտաբի մեղքով էր, ոչ՝ թիմի: Պարզապես ֆուտբոլում ամեն ինչ էլ հնարավոր է: Բայց մենք զգում ենք, որ ունենք շատ ուժեղ թիմ և ամեն ինչ անելու ենք, պայքարելու ենք քառյակում տեղ գրավելու համար:

— Ըստ Ձեզ, այս պահին ձևավորված մարզչական շտաբն ամենաօպտիմա՞լն է «Ալաշկերտի» համար, թեպետ, Արմեն Ադամյանը դեռ պաշտոնապես հաստատված չէ մարզչի պաշտոնում:

— Ճիշտն ասած՝ մենք չենք ուզում շտապել: Լրատվամիջոցներն էլ են ասում, որ մենք անընդհատ պայմանագիր ենք կնքում Աբրահամ Խաշմանյանի հետ, խզում ենք այն, բայց սա ֆուտբոլ է, ամեն ինչ էլ հնարավոր է: Աբրահամը՝ որպես մարդ, շատ հրաշալի անձնավորություն է, ես նրան շատ եմ հարգում, բայց մենք իրար հետ հասկացանք, որ փոփոխություն է պետք: Նա էլ շատ նորմալ ընդունեց տարբերակը: Պարզապես այդ ժամանակ թիմի խաղը չէր ստացվում, ոչ թե Աբրահամի հետ չէին խաղում: Հիմա ստացվում է խաղը: Ես Խաշմանյանին այդ հարցում չեմ մեղադրում, բայց զգում եմ, որ մեր թիմը գնալով ուժեղանում է: Միակ բանը, որից նեղացել եմ Խաշմանյանից, այն է, որ մի երկու անգամ ասել է, թե թիմը շատ թույլ է, երկու ուրիշ ուժեղ թիմ կա՝ «Փյունիկը» և «Արարատ-Արմենիան»: Բայց խաղը ցույց տվեց, որ այսօր ուժեղ ու թույլ թիմեր չկան, բոլոր թիմերն էլ հավասար են՝ նայած, թե ում բախտն ինչպես կբերի: «Երևանը» «Լոռիի» հետ խաղում է, վանաձորյան թիմը հազիվ վերջին վայրկյաններին է գոլ խփում, իսկ մենք պարտվում ենք «Լոռիին» 2-1 հաշվով, իսկ այս խաղում ցույց տվեցինք, որ 5-1 հաշվով հաղթեցինք, բայց կարելի էր 5 գոլ էլ խփել:

— Պարոն Խաշմանյանը նաև նշել էր, որ ակումբում ֆինանսական խնդիրներ կան, Դուք որոշել եք բյուջեն կրճատել 50 տոկոսով: Այդ մասին ի՞նչ կասեք:

— Բյուջեն այս պահին էլ կրճատված է 50 տոկոսով: Տղաների առջև պայման է դրված, նույնը Աբրահամ Խաշմանյանին էի ասել, որ մենք 2-3 խաղ անցկացնելու ենք 50 տոկոսով կրճատված բյուջեով, եթե թիմն առաջ գնա, հաղթանակներ լինեն, բյուջեն նորից վերականգնվելու է, բայց նա չընդունեց այդ տարբերակը: Բայց թիմում մարդիկ կան, որ այս ամիս կարող է աշխատավարձ էլ չստանան, քանի որ իրենք պետք է ապացուցեն. ես չեմ սիրում թոշակ տալ, ֆուտբոլիստը պետք է խաղա ու աշխատավարձ ստանա: Նրանք հաղթանակի համար էլ իրենց պարգևավճարներն են ստանում, ինչը նույն կերպ շարունակվելու է:

— Այսինքն, բյուջեի կրճատումը ոչ թե մշտական բնույթ է կրելու, այլ ժամանակավոր հարց է:

— Ոչ, ոչ, ոչ մի մշտական բան: Ես նույն բանը ասել եմ Խաշմանյանին: 50 տոկոսով բյուջեն կրճատվում էր, քանի որ թիմը պարտվում էր, 4 խաղից 4 միավոր էինք վաստակել, իսկ ես չեմ սիրում գումարը վատնել: Պետք է որոշ փոփոխություններ լինեն: Երբ կպնում ես գումարին, թիմը սկսում է խաղալ: 

— Իսկ նոր մարզչական շտաբի առաջ ի՞նչ խնդիր եք դրել:

— Առայժմ չեմ ուզում շտապել: Ես գոհ եմ բոլոր մարզիչներից էլ: Եթե ամեն բան լավ ընթանա, նրանք են լինելու մեր հիմանական մարզիչները: Բայց եթե, Աստված մի արասցե, նորից զգամ փոփոխություններ, արդեն պետք է բյուջեն ավելացնեմ ու դրսից մարզիչներ հրավիրեմ: Բայց, կրկնում եմ, շտապել չեմ ուզում: Ես զգում եմ, որ և´ Ադամյանը, և´ Ոսկանյանը լավ վիճակում են, թիմը նրանց նորմալ ընդունում է: Թիմին որպես մարզիչ օգնում է նաև մեր հավաքականի նախկին ֆուտբոլիստ Աղվան Մկրտչյանը: Թիմում լավ մթնոլորտ է, լավ տրամադրությամբ սպասում են հաղթանակից հետո հասանելիք պարգևավճարներին:

— Դուք մի քանի տարի շարունակ տեղացի մասնագետների ու հիմնականում հայ խաղացողներից կազմված թիմով լավ հաջողությունների եք հասել առաջնությունում էլ, եվրագավաթներում էլ: Այս տարվա համար «Ալաշկերտի» առջև դրված առաջադրանքը ո՞րն է:

— «Ալաշկերտը» պետք է պայքարի չեմպիոնության համար: Վատագույն դեպքում՝ եվրագոտու ուղեգրի համար: Մեր հիմնական նպատակը դա է, եթե չլինի՝ իմաստ չունի թիմ պահել: Ժամանակի հետ մյուս թիմերն էլ են ուժեղացել: Նախորդ տարիներին կարելի էր ասել, որ գրեթե հավասար թիմեր էինք, բայց հիմա գնալով ուժեղանում են թիմերը: Մենք էլ ամեն ինչ պետք է անենք, եթե զգանք, որ որևէ դիրքում թույլ տեղ ունենք, դեկտեմբերից պետք է ուժեղացնենք այդ դիրքերը:

— Իսկ շեշտն այդ ժամանակ կդնեք լեգեոներների վրա՞:

— Ոչ: «Ալաշկերտը» միակ թիմն է, որը հույսը դնում է տեղացի խաղացողների վրա: Մեր թիմի 24 ֆուտբոլիստներից 16-ը հայ տղաներ են: Եվ մենք զգում ենք, որ բոլորն էլ հավաքականի թեկնածուներ են, ունենք Ղադիմյան, Ավագիմյան, որոնք ևս ձգտելու են հավաքականում տեղ գրավելու: 

— «Երևանի» հետ Ձեր թիմի խաղին որոշ ժամանակով ներկա էր նաև Ազգային հավաքականի գլխավոր մարզիչը: Նրա հետ զրույց ունեցե՞լ եք: 

— Զրույց չենք ունեցել, բայց ես նկատում եմ, որ Գյուլբուդաղյանցը գրեթե բոլոր խաղերին էլ ներկա է լինում: Դա շատ կարևոր է: Ուրախ կլինեի, որ բոլոր մասնագետներն էլ, որոնք առնչվում են ֆուտբոլի հետ, հնարավորության դեպքում բոլոր խաղերին էլ ներկա լինեին: Դա շատ օգուտ կտա:

— Իսկ Ձեր թիմից հավաքական գնացող տղաների խաղն ինչպե՞ս կգնահատեք:

— Ես գտնում եմ, որ մերոնցից Արտակ Գրիգորյանը և Տարոն Ոսկանյանը արտակարգ խաղ ցուցադրեցին: Ոսկանյանը ոտքն էր ցավեցրել: Հաջորդ խաղում նա էլ կրկին խաղադաշտ դուրս կգա: Ես հույս ունեմ նաև, որ Գագիկ Դաղբաշյանն էլ կրկին իր տեղը կգտնի հավաքականում: Նա դրա համար ամեն ինչ անում է: Կարծում եմ, որ այդ դիրքի համար Գագիկն ամենաուժեղներից մեկն է:

— Պարոն Նավոյան, ես այս հարցը նաև Աբրահամ Խաշմանյանին եմ տվել, կցանկանայի լսել նաև Ձեզ: Ինքներդ էլ նշեցիք, որ Խաշմանյանը մի քանի անգամ հեռացել է, կրկին վերադարձել: Նման բանի կարո՞ղ ենք նորից սպասել, թե՞ այս անգամ վերջնական է:

— Ամեն ինչ էլ հնարավոր է: Մարդիկ էլ բաժանվում են, հետո նորից միանում են: Ֆուտբոլում էլ ամեն ինչ հնարավոր է, երբեք մի ասա երբեք: Աբրահամն իմ ընկերն է, իմ կողքին է, մենք հանդիպում ենք, զրուցում ենք, բայց ֆուտբոլ է, չստացվեց: Նա ինձ շատ լավ հասկացավ: «Ալաշկերտի» վատ արդյունքներն իր մեղքը չէին:

Հռիփսիմե Գալստյան