Այսօր ինֆորմացիա տարածվեց, որ սույն թվականի դեկտեմբերի սկզբին տեղի կունենա ըմբշամարտի աշխարհի առաջնությունը:

Քիչ առաջ պատգամավոր Արսեն Ջուլֆալակյանը ֆեյսբուքում գրառում կատարեց՝ հերքելով այդ ինֆորմացիան.

«Հարգելի՛ սպորտային լրագրողներ ջան, կներեք, որ ձեր մասնագիտական օրով ստիպված եմ Ձեզ ուղղել…

UWW-ին դեռևս ոչ մի կոնկրետ որոշում չունի կայացրած մեծահասակների աշխարհի առաջնության վերաբերյալ: Երեկ UWW-ի հետ տեղի ունեցած վիդեո-կոնֆերանսի ժամանակ անձամբ եմ այդ հարցադրումն արել, այսօր էլ կրկին ստուգել եմ՝ թյուրիմացությունից խուսափելու համար։
Իսկ Սերբիայի ըմբշամարտի ազգային ֆեդերացիայի հայտարարությունը հավանաբար թյուրիմացություն է եղել, ինչը խոստացան շուտով շտկել»,-գրել է անվանի ըմբիշը:

Հունահռոմեական ոճի ըմբիշ, 2012թ.-ի օլիմպիական խաղերի արծաթե մեդալակիր, աշխարհի և Եվրոպայի չեմպիոն, այժմ նաև ՀՀ ԱԺ պատգամավոր Արսեն Ջուլֆալակյանը ֆեյսբուքի իր էջում գրառում է կատարել.

«Ես՝ Արսեն Ջուլֆալակյանս, 2002-ից մինչ այսօր ՀՀ-ում գործող առաջատար մարզիկներից մեկն եմ։ Նվաճել եմ Եվրոպայի, Աշխարհի և Օլիմպիական խաղերի 12 մեդալ ❗️(ևս 3 մեդալ պատանիների և 3-ը՝ երիտասարդների տարիքում…)։
Այդ տարիներին օրենքով նախատեսված կարգով պարգևատրվել եմ

✅ պետությունից-կառավարություն
✅Հայաստանի Ազգային Օլիմպիական Կոմիտեից(ՀԱՕԿ)
✅Միջազգային Օլիմպիական Կոմիտեից(ՄՕԿ)
✅Ըմբշամարտի ազգային ֆեդերացիայից

2002-2019թթ. վերոնշյալ ինստիտուտները/կառույցները ղեկավարել են

✅Նախագահներ — Ռոբերտ Քոչարյան(2002-2008)
Սերժ Սարգսյան(2008-2018)
✅Վարչապետ-Նիկոլ Փաշինյան

✅ՀԱՕԿ- Գագիկ Ծառուկյան

✅ՄՕԿ — Թոմաս Բախ՝ մարզիկների սոլիդարության ծրագրով…(athlete’s solidarity program)

✅ Ըմբշամարտի Ազգային ֆեդերացիա — Սամվել Ալեքսանյան(2002-2008թթ), Սամվել Կարապետյան(2008-2016թթ), Ռոբերտ Խաչատրյան

Այդ բոլոր կառույցներից ստացել եմ աշխատավարձ, պարգևավճար, հավելավճար, թոշակ, պարգևատրում։ Այդ կարգը գործել է բոլոր,ԿՐԿՆՈՒՄ ԵՄ, բոլոր տիտղոսակիր մարզիկների համար՝ առանց բացառության❗️
Նրանք, ովքեր հաղթել են, պարգևատրվել են, ովքեր պարտվել են, չեն պարգևատրվել (կներեք շատ պարզ գրելու համար…)։

Հարց. արդյո՞ք մարզիկը ՊԱՐՏՔ Է նշված կառույցներին/ինստիտուտներին կամ դրանց ղեկավարներին, թե դա ուղղակի տվյալ մարզիկի հաղթանակների գնահատականն է այդ կառույցների/ինստիտուտների կողմից։ Իսկ եթե պարտք է, ապա կոնկրետ ու՞մ»,–գրել է մարզիկը։

Ջուլֆալակյանն ընդգծել է, որ շնորհակալ է բոլոր նրանց, ովքեր կարևորել ու գնահատել են իր գործը և արժեքավորել այն։ Նա նաև նշել է, որ այս թեմային այլևս չի անդրադառնալում, քանի որ կարծում է`ամեն ինչ շատ պարզ է։

Ջուլֆալակյանն, ավելի վաղ անդրադառնալով ըմբիշ Ռոման Ամոյանի`ոստիկանների կողմից բերման ենթարկվելու փաստին, նշել էր, որ անկախ ամեն ինչից՝ քննադատելի է ինչպես բռնությունը, այնպես էլ օրենքի օրինական պահանջին չենթարկվելը։

Արդեն հայտնել ենք, որ Ազգային ժողովի դիմաց այսօր անցկացվող բողոքի ակցիայի ընթացքում ոստիկանները բերման են ենթարկել ակցիայի մասնակից, Հունահռոմեական ոճի նախկին ըմբիշ, Պեկինի Ամառային Օլիմպիական խաղերի բրոնզե մեդալակիր Ռոման Ամոյանին։

ԱԺ-ում լրագրողների հետ զրույցում ՀՀ ԱԺ պատգամավոր, Հունահռոմեական ոճի ըմբշամարտի աշխարհի չեմպիոն Արսեն Ջուլֆալակյանը պատասխանելով լրագրողների հարցերին անդրադարձել է Ռոման Ամոյանին բերման ենթարկելուն։

« Այդ պահին լրացուցիչ տեղեկություններ չունեի, հետագայում կապվեցի ընտանիքի անդամներից եղբոր որդու հետ։ Տեղեկացել եմ, որ ամեն ինչ հարթվել է, Ռոմանն ազատ է արձակվել։ Այս պահին ոչ մի խնդիր չկա՝ աջակցության, օգնության անհրաժեշտություն չկա: Ամոյանի հետ չեմ խոսել, չգիտեմ ինչ հիմքով են բերման ենթարկել: Դատում եմ այն կադրերով, ինչ տեսել եմ: Այստեղ խնդիրն այլ է, պետք է հասկանանք՝ արարքը համաչա՞փ էր ուժայինների կողմից, թե՞ ոչ»։

Լրագրողներից մեկի դիտարկմանը, թե ադրբեջանցուն հաղթած մարզիկի նկատմամբ իրավունք չունեին ոստիկաններն այդպիսի գործողություններ իրականացնել, Ջուլֆալակյանը պատասխանեց.

«Կարծում եմ, որ սխալ է այդ ուղղությամբ տանել հարցը։ Օրինակ, այսպիսի համեմատություն անեմ․ եթե հայտնի մարդը ցանկացած բնագավառում ինչ-որ օրենքի խախտում է թույլ տվել, դա իրավո՞ւնք է թույլ տալիս՝ անվանի լինելը մարդուն ապահովագրո՞ւմ է պատասխանատվությունից։ Եթե ես ու մեկ այլ ոչ հայտնի մարդ դրսում ապօրինություններ թույլ տանք, ապա պետք է հայտնին պատասխանատվության չենթարկվի, իսկ մյուսը պատասխանատվության ենթարկվի՞: Եկեք այդ սկզբունքով առաջնորդվենք»։

«Հիմնավորումներով խոսում ես ոլորտային բացթողումների, սխալների մասին, մամուլը (որոշները…) սկսում է դրանում պարտադիր այլ բաներ որոնել։ Այսինքն, զուտ սրտացավություն և գործին նվիրվածություն հնարավոր չէ, պարտադիր պետք է անձնական շահ ունենաս»,- այս մասին ֆեյսբուքյան իր էջում գրել է պատգամավոր, օլիմպիական խաղերի արծաթե մեդալակիր, ըմբշամարտի աշխարհի ու Եվրոպայի չեմպիոն Արսեն Ջուլֆալականը՝ ավելացնելով․

«Վերջին 2 օրվա ընթացքում այդ թեմայով էնքան ենթադրություններ, ասեկոսեներ և նյութեր հայտնվեցին, որ նպատակահարմար գտա պարզաբանել դրանցից գոնե տեսականորեն քիչ թե շատ հնարավորները))

. ԿԳՄՍ փոխնախարար դառնալու զրո(0) ցանկություն ունեմ։ Երբեք դրան ուղղված ոչ մի քայլ չեմ արել և չեմ պատրաստվում անել։ Ավելին, երբ ժամանակին առաջարկվել է, ինքս հրաժարվել եմ։

. Ընտանիքիս ո՛չ մի անդամի, ո՛չ մի բարեկամի պետական որևէ կառույցում գործի տեղավորելու համար որևէ մեկին դիմած/խնդրած չկամ։ Եթե նման մարդ կա,թող հենց այս գրառման տակ նշի անունը։

Ավելին, պետական կառույցում աշխատող ոչ մի բարեկամ չունեմ!

Լևոն Ջուլֆալակյանի աշխատանքի մասով էլ(քաղաքապետարան) դժվար հայտնվի բանականությամբ օժտված գեթ մեկ մարդ, ով մտածի, որ նրա

գործի անցնելու համար պետք է մարդկանց խնդրել…

. Չգիտեմ, թե էդ ինչ սև ցուցակ է, որտեղից է հայտնվել և ինչ

սկզբունքով է կազմել «հրապարակը», բայց կարծում եմ վատ խումբ չի ձևավորվել։) արժի առաջիկա ազատ օրերին էդքանովս գնանք օրինակ սուրճ խմելու,

որ գոնե ինչ որ հիմք առաջանա գրածի տակ))

հ.գ. առաջարկում եմ, նշված հերյուրանքների փոխարեն զբաղվեք բարձրացրածս խնդիրների լուսաբանմամբ։ Եթե կարողանանք նույնիսկ դրանց մի մասը լուծել,կշահեն շատ-շատերը։ Չնայած՝ գրեթե վստահ եմ, նշածս թեմաները հեղինակած կայքերը դժվար թե նույնիսկ այս գրառումս տարածեն)

Առողջ ոչ աշխատանքային օրեր եմ ցանկանում բոլորիս»։

Օրեր առաջ ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի հանձնաժողովում Արսեն Ջուլֆալակյանի նախաձեռնությամբ կորոնավիրուսի տարածման հետևանքով մարզաշխարհում ստեղծված իրավիճակի վերաբերյալ աշխատանքային քննարկում էր ծավալվել, որին մասնակցել են ազգային հավաքականների մարզիչներ, ֆեդերացիաների ներկայացուցիչներ ու ՄՊՄԴ-ների ղեկավարներ: 

Հանձնաժողովից հետո ArmSport-ը զրուցել էր Ջուլֆալակյանի հետ։

Օրեր առաջ ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի հանձնաժողովում պատգամավոր, օլիմպիական խաղերի արծաթե մեդալակիր, ըմբշամարտի աշխարհի ու Եվրոպայի չեմպիոն Արսեն Ջուլֆալակյանի նախաձեռնությամբ կորոնավիրուսի տարածման հետևանքով մարզաշխարհում ստեղծված իրավիճակի վերաբերյալ աշխատանքային քննարկում էր ծավալվել, որին մասնակցել են ազգային հավաքականների մարզիչներ, ֆեդերացիաների ներկայացուցիչներ ու ՄՊՄԴ-ների ղեկավարներ: 

ArmSport-ի հետ զրույցում Արսեն Ջուլֆալակյանը պատմել է, որ ուրբաթ օրը կայացած աշխատանքային քննարկմանը հրավիրված են եղել 11 մարզադպրոցների տնօրեններ, ովքեր մի շարք խնդիրների մասին են բարձրաձայնել.

«Ընտրությունը կատարված էր պատահականության սկզբունքով, եթե չասենք, որ բացարձակ պատահականության, ապա ընտրված էին այն մարզադպրոցները, որոնց շահառուների թիվը մեծ էր, որտեղ կային մի քանի մարզաձևեր և մեծ թվով մարզիկներ, ոչ թե ինչ-որ հատուկ մարդիկ էինք հրավիրել: Բացի դրանից ընտրել էինք նաև «Աշխատանքային ռեզերվներ ՀԿ»-ի ներկայացուցիչներին: Գրեթե բոլորը եկել էին, 11 հրավիրյալից եթե չեմ սխալվում 9-ը ներկա էին, լսեցինք բոլորին, բոլորն ունեին նույն խնդիրը, այն է՝ չեն աշխատում, փակ են: Դրա մասին ես արդեն տեղյակ էի, ու հենց այդ պատճառով էլ խնդրել էի մեր հանձնաժողովին աշխատանքային քննարկում կազմակերպել, հասկանալու համար, թե այդ ինչպե՞ս է ստացվում, որ Պարետը հայտարարում է, որ մարզումները կարելի է իրականացնել որոշ սահմանափակումներով և կարգավորումներով, իսկ մարզաշխարհի ներկայացուցիչները մյուս կողմից ասում են, որ ամբողջը փակ է, ոչինչ չի աշխատում: Կար բացարձակ հակասություն: Խոսքը տալով մարզադաշտերի տնօրեններին, ներկայացուցիչներին՝ կրկին համոզվեցինք ու արդեն բոլորը տեսան, թե ինչքան խնդիր կա միայն առաջացած COVID-19-ով, այսինքն առաջացած մարտի 15-ից մայիսի 25-ն ընկած ժամանակահատվածում:

Խնդիրներից մեկն այն է, որ մարզադպրոցները փակ են, մյուս խնդիրը կապված է կոնտակտային մարզաձևերի հետ, որտեղ վիճակն ավելի բարդ է, քանզի կարգավորումները, այն է՝ պահպանել 1.5 մետր հեռավորություն, չառնչվել մեկը մյուսի հետ, կոնտակտի չգնալ, շատ բարդ է պահպանելը: Նույնիսկ եթե որոշվի, որ փակ տարածություններում մարզումներ իրականացնելիս պետք է դիմակ կրել, դարձյալ չես կարող կիրառել կոնտակտային մարզաձևերում: Այո, կոնտակայինում վիճակն ավելի բարդ է, բայց եթե ոչ կոնտակտայինը հաշվի առնենք, որտեղ կարելի է կարգավորումները ճիշտ իրականացնել ու վերսկսել մարզումները, պարզվեց՝ մարզադահլիճները պարզապես փակ են: Նույնիսկ եթե մարզիկը ցանկանա միայնակ գնալ մարզվել, դահլիճը փակ է: Այստեղ առաջացավ նաև մյուս խնդիրը, մասնավորապես՝ եթե դահլիճները փակ են, աշխատողներին ինչպե՞ս կանչես աշխատանքի, և հետո ինչպե՞ս վարձատրես: Օրինակ, պահակը, ով թիրախային խմբում է գտնվում, այսինքն 60-ից բարձր տարիքում է, կամ կան այդ տարիքի մարզիչներ և այլ աշխատողներ, եթե նրանց կանչես աշխատանքի, այդ ռիսկերն ինչպես՞ս վերացնես կամ նվազագույնի հասցնես: Ի՞նչ հիմունքներով կանչես, և ինչպե՞ս վարձատրես, քանի որ օրենքով դպրոցները հիմա փակ են:

Հետո պարզվեց, որ մասնավոր մարզադահլիճների հետ կապված լուրջ խնդիր կա. նրանք վարձակալության հիմունքներով վերցրել են տարածքներ, վարձատուն պահանջում է վճարել, բայց քանի որ մարզումները չեն իրականացվում, մասնավորը չի կարողանում այդ գումարները հավաքել իր սաներից, երեխաներից, և հետևաբար չի կարող նաև վարձատուին վճարել: Կամ եթե մեկ-երկու ամիս տվել է, այլևս գումար չունի:

Մյուս խնդիրն այն է, որ ապահովված չեն հիգիենայի պարագաներով՝ ալկոգել, դիմակներ, ախտահանիչ նյութեր, իսկ պետական մարզադպրոցները, ՏԻՄ-երի մարզադպրոցները դրա համար առանձնացված հատուկ բյուջե դեռևս չունեն: Խնդրվեց, որ դա ևս լինի»,- ասում է Արսեն Ջուլֆալակյանը:

Տեսանյութը՝ Ա1+-ի

Նրա խոսքով՝ այդ ամենը հանրագումարի բերելով՝ կետ առ կետ նշումներն արել և ուղարկել է ՀՀ Պարետատուն, ԿԳՄՍ և Երևանի Քաղաքապետարանի Սպորտի բաժին, որպեսզի ոլորտի մասնագետներն ու պատասխանատուները համախմբված քննարկում կազմակերպեն և փորձեն եղած խնդիրներին լուծում տալ:

«Ինքս և՛ իմ, և՛ հանձնաժողովի անունից պատրաստակամություն եմ հայտնել անհրաժեշտության դեպքում մասնակցելու քննարկումներին և խորհուրդներով հանդես գալու: Իմ անձնական խորհուրդները, բնականաբար, տեղում հնչեցրել եմ մասամբ, ոչ բոլորը: Մնացածը կարող եմ ավելի մանրամասն հնչեցնել, եթե նման քննարկում կազմակերպվի»,- ընդգծում է Ջուլֆալակյանը:

Բայց այստեղ մտահոգիչը մեկ այլ բան է. ՀՀ կրթության, գիտության, մշակույթի և սպորտի նախարարի տեղակալ Գրիշա Թամրազյանը հերքում է, թե որևէ խնդիր կա. 

«Նույնիսկ ուրբաթ օրվա քննարկումից հետո, երբ այդ ամենն ուղիղ եթերով հեռարձակվում էր, տեսագրությունն էլ կա ու տարբեր կայքերում հրապարակվել է, երեկ, երբ փակ քննարկում տեղի ունեցավ ԿԳՄՍ սպորտի փոխնախարարի հետ, նա մեծապես հերքեց, որ կա խնդիր: Պարզվեց՝ այդ 11 հրավիրյալ տնօրենները և այդ թվում նաև ես, սխալվում ենք: Բոլոր խնդիրները լուծված են, ոչ մի խնդիր չկա, նորմալ մարզումները կարելի է իրականացնել: Փոխնախարարը նման կարծիքի էր: Կրկին ինձ մոտ հակասություն առաջացավ. ինչպե՞ս կարող է լինել, որ մարզադպրոցի տնօրենը գալիս է կենդանի տեսաձայնագրությամբ հայտնում է խնդիրների մասին, իսկ փոխնախարարը նշում է, որ բոլոր խնդիրները լուծված են:

Հիմա՝ անկախ դրանից, ես երկուշաբթի առավոտյան բոլոր խնդիրները կետ առ կետ ֆիքսված ուղարկել եմ ԿԳՄՍ, և հուսամ, որ փոխնախարարի կողմից երեկ հնչեցրած միտքը, թե որևէ խնդիր չկա, պարզապես իրավիճակին չտիրապետելու արդյունքում է: Եվ նամակս կարդալուց և բոլոր խնդիրներին ծանոթանալուց հետո, քանի որ գուցե դեռ չէր հասցրել կարդալ, նա իր կարծիքը կփոխի: Եթե չփոխի, բնականաբար շատ բարդ կլինի այդ խնդիրներին լուծում տալը, քանի որ եթե դու չես ընդունում, որ խնդիր կա, այդ ուղղությամբ չես էլ աշխատի, որ լուծես: Իհարկե միայն ԿԳՄՍ-ով չէ, քանի որ ինչպես արդեն նշեցի այդ նամակն ուղարկել եմ նաև ՀՀ Պարետատուն և Երևանի քաղաքապետարանի սպորտի բաժին, ուստի, լիահույս եմ, որ առնվազն գոնե Պարետատունը և Երևան քաղաքի սպորտի բաժինը հետամուտ կլինեն, որ տարբեր կարգավորումներով հնարավոր լինի նախ լուծել առաջին հերթին ոչ կոնտակտային մարզաձևերի մարզումների վերսկսումը, ինչը բավականին հեշտ է, ապա նաև կոնտակտայինը»,- ասում է Արսեն Ջուլֆալակյանը:

Իսկ ո՞րն է, ըստ Արսեն Ջուլֆալակյանի, ԿԳՄՍ փոխնախարարի կողմից նման արձագանքի պատճառը, քանի որ հասկանալի է՝ 2-3 օրվա ընթացքում բոլոր խնդիրները լուծվել չէին կարող.

«Բնականաբար չէին կարող լուծել. մեր աշխատանքային քննարկումն ավարտվել է ուրբաթ երեկոյան, և հնարավոր չէր շաբաթ-կիրակի օրվա ընթացքում հասցնել որոշակի խնդիրներ լուծել, քանի որ պետք էր դեռ վերլուծել այդ ամբողջը, տեսնել խնդիրները և հետո նոր քայլեր ձեռնարկել: Գրեթե անհնարին եմ համարում, որ երկուշաբթի առավոտյան արդեն այդ բոլոր խնդիրները լուծված լինեին: Կարծում եմ՝ խնդիրը պարզապես տարբեր իրականություններում գտնվելն ու իրավիճակին չտիրապետելն է: Այդքան բան: Ես ինքս նման պատասխան չէի ակնկալում»,- նշում է Ջուլֆալակյանը:

Ինչ վերաբերում է կոնտակտային մարզաձևերում մարզումների վերսկսումը հնարավոր դարձնելուն, Արսեն Ջուլֆալակյանը դեռ մայիսի սկզբին այս առումով հանդես էր եկել առաջարկով:

Մասնավորապես, նա առաջարկում էր, որ բոլոր տարիքային խմբերի պրոֆեսիոնալ մարզիկներին՝ պատանիներ, երիտասարդներ, մեծահասակներ, նախապես թեստավորեն որեւէ մի կլինիկայում: Բացասական պատասխանների դեպքում նրանց մեկուսացնեն տարբեր մարզաբազաներում կամ հյուրանոցներում, որտեղ կա ֆիթնես: Այդպես նրանք լրիվ մեկուսացված կլինեն արտաքին աշխարհից, հանրության հետ շփումներից:

«Կշփվեն միայն իրար և բազայի կամ հյուրանոցի սպասարկող անձնակազմի հետ: Խոսքը փոքր հյուրանոցների մասին է, որտեղ կլինի ֆիթնես՝ դահլիճային պայմաններ ստեղծելու համար և լինի բնությանը մոտ՝ բացօթյա մարզվելու համար»,- ասել էր Ջուլֆալակյանը:

«Իսկ նոր խնդիրները լսելով՝ առաջարկս հիմնված է հենց տնօրենների առաջարկների վրա: Տնօրենները խոստանում են, որ կարող են փոքր խմբերով և 1.5-2 մ. հեռավորությունը պահպանելով մարզումներ կազմակերպել: Որոշ մարզաձևերում դրանք շատ հեշտ են կազմակերպել, օրինակ գեղասահք, գեղարվեստական մարմնամարզություն, սպորտային մարմնամարզություն … շատ են նման մարզաձևերը, որտեղ բավականին հեշտ է այդ կարգավորումները պահելով մարզումներ իրականացնելը, ուղղակի պետք է նրանց հրահանգ գա, որ թույլ տան մարզումները վերսկսել: Այդ առումով ավելի հեշտ է, իսկ կոնտակտային մարզաձևերի առումով պետք է մի փոքր ավելի մանրամասն ու խորքային քննարկել: Մի բան է շատ կարևոր. եթե նույնիսկ մենք թույլ ենք տվել, որ պրոֆեսիոնալ մարզիկները մարզվեն, մենք չենք նշել, թե կոնկրետ որ մարզադահլիճներում նրանք պետք է մարզվեն: Չի կարող մեկ-երկու մարզիկի համար տնօրենը բացի մարզադահլիճը, կոմունալ ծախսերի առաջ կանգնի, պահակ և հավաքար պահի:

Իմ կարծիքով, ու ես սա արդեն առաջարկել եմ, պետք է որոշենք, թե կոնկրետ մարզաձևից կոնկրետ քաղաքներում որ մարզադպրոցները պետք է բաց լինեն, որպեսզի մարզիկներն իմանան, թե ուր գնան և որտեղ մարզվեն: Թե չէ, հակառակ պարագայում, եթե դու ասում ես գնացեք մարզվեք, բայց մարզվելու տեղ չես տալիս, արդեն խնդիր է առաջանում թե՛ տնօրենների, թե՛ մարզիկների համար: Տնօրենը չի ուզում վատամարդ լինել, փակել դռները մարզիկի առաջ, բայց քանի որ չկա նման կարգավորում հետագայում նա խնդիր կունենա օրենքի առաջ: Տնօրեններն էլ հենց դա նշեցին, ասացին՝ ինչի՞ նման կլինի, եթե մեծ տուգանքի արժանանանք, և հետո մի ամբողջ տարվա բյուջեն չբավականացնի, որպեսզի կարողանանք այդ տուգանքը վճարել: Ուստի շատ կարևոր է հասկանալ, որ եթե նույնիսկ միայն պրոֆեսիոնալ մարզիկներն են վերսկսելու մարզումները, ապա որտե՞ղ են մարզվելու, ո՞ր մարզադահիլճում: Հիմա այս առումով ոչ մի ցուցում տրված չէ»,- ընդգծում է Արսեն Ջուլֆալակյանը:

Նրա խոսքով, այս պահի դրությամբ օրենսդիրն իր կողմից ինչ ակնկալվում էր արել է, այսինքն հանձնաժողովն ուղարկել է խնդիրները, հիմա պետք է սպասել ու տեսնել, թե համապատասխան գերատեսչություններն ինչ լուծումներ կառաջարկեն:

Պատգամավորներին սովորաբար պատասխանում են 5 աշխատանքային օրվա ընթացքում, բայց Արսեն Ջուլֆալակյանի խոսքով, հիմա ինքը ոչ թե պատասխան է ակնկալում, այլ միայն քննարկումների մասնակցելու առաջարկ.

«Ինչ-որ հարցով չեմ դիմել, որի համար պատասխան եմ ակնկալում: Ես ուղղակի խնդիրների մասին եմ բարձրաձայնել և լուծման որոշ առաջարկներով ուղարկել եմ համապատասխան գերատեսչություններին»:

Հիմա պետք է սպասենք նոր կարգավորումների: Արսեն Ջուլֆալակյանը հույս է հայտնում, որ մինչև շաբաթվա վերջ կտեսնենք արդյունքը:

Նարե Հովհաննիսյան

Օլիմպիական խաղերի փոխչեմպիոն, աշխարհի ու Եվրոպայի չեմպիոն, հունահռոմեական ոճի ըմբիշ, ԱԺ պատգամավոր Արսեն Ջուլֆալակյանն իր ֆեյբուքյան էջում գրառում է կատարել սպորտի մասով մայիսի 4-ից ուժի մեջ մտնող սահմանափակումների նվազեցման որոշման վերաբերյալ։

«Քանի որ սպորտի մասով մայիսի 4-ից ուժի մեջ մտնող սահմանափակումների նվազեցման որոշումը այնքան էլ պարզ չէր մարզաշխարհի համար, խնդրել եմ պարետին լրացուցիչ պարզաբանում տրամադրել»,- գրել է Արսեն Ջուլֆալակյանը ֆեյսբուքյան իր էջում։

ՍՊՈՐՏԻ ՄԱՍՈՎ ՍԱՀՄԱՆԱՓԱԿՈՒՄՆԵՐԻ ՊԱՐԶԱԲԱՆՈՒՄ

Թույլատրվում է՝

Սպորտի բնագավառում գործունեություն

✅Սպորտային օբյեկտների գործունեություն՝ բացառապես պրոֆեսիոնալ մարզիկների մարզումների և սպորտային միջոցառումների անցկացման համար

✅Սպորտային ակումբների գործունեություն՝ բացառապես պրոֆեսիոնալ ակումբների մասով

Սպորտի բնագավառում գործունեությունը ներառում է՝

Սպորտային օբյեկտների գործունեություն

Թույլատրվել է միայն պրոֆեսիոնալ մասով.

Սպորտային միջոցառումների անցկացման համար բաց և փակ կառույցների գործունեություն՝ ֆուտբոլի, հոկկեյի, կրիկետի, ռեգբիի, թեթև ատլետիկայի, գոլֆի մարզադաշտերի, ավտոմեքենաների, լողավազանների և լողավազաններով մարզադաշտերի, տափօղակով հոկկեյի, չմշկավազքի և ձմեռային այլ սպորտաձևերի սահադաշտերի և մարզադաշտերի, բռնցքամարտի դահլիճների, մարզահրապարակների և այլն։

Պրոֆեսիոնալ մարզիկների համար բացօթյա կամ փակ տարածքներում սպորտային միջոցառումների կազմակերպում և անցկացում սեփական սպորտային կառույցներ ունեցող կազմակերպությունների կողմից։

Սպորտային ակումբների գործունեություն.

Թույլատրվել է միայն պրոֆեսիոնալ մասով

Պրոֆեսիոնալ ակումբներ, որոնց անդամները հնարավորություն են ստանում մասնակցել մարզական միջոցառումներին: Մասնավորապես՝ ֆուտբոլի, լողի, բռնցքամարտի, ըմբշամարտի, կուլտուրիստական, մարմնամարզական, հրաձգային, ձմեռային սպորտաձևերի ակումբների, գոլֆ-ակումբների, շախմատի, շաշկիի և այլ ակումբներ։

Մարզադահլիճների պատկանելիությունն էական չէ (ԿԳՄՍ, ՀԱՕԿ, ՏԻՄ-եր, սպորտային հկ-եր)։ Կարգավորումը վերաբերում է բոլորին։

Օլիմպիական փոխչեմպիոն, աշխարհի ու Եվրոպայի չեմպիոն, հունահռոմեական ոճի ըմբիշ, ԱԺ պատգամավոր Արսեն Ջուլֆալակյանն առանձնացրել է մի շարք կետեր, որոնք պետք է արվեին սպորտի բնագավառում՝ կորոնավիրուսով պայմանավորված արտակարգ դրության պայմաններում:

Ջուլֆալակյանը գրառում է կատարել ֆեյսբուքյան իր էջում.

1. Ազգային հավաքականներին՝

մեծահասակների,երիտասարդների,պատանիների (գոնե հիմնական 10 մարզաձևերից), առավելագույնը 20 հոգանոց խմբերով մեկուսացում սպորտային որոշակի ենթակառուցվածք ունեցող վայրերում (օր.՝ Ծաղկաձոր, Դիլիջան, Ջերմուկ և այլն…)։ Ի դեպ,դրա համար բացարձակ կարևոր չէ, որ լինեն պռոֆեսիոնալ պայմաններ։ Անհրաժեշտ է միայն մեկուսացումը լինի բնությանը մոտ և հյուրանոցն ունենա միջին մակարդակի ֆիտնես դահլիճ։ Դրանով միանգամից մի քանի խնդիր կլուծվեր՝

1.1 Լրջորեն կնվազեր մարզիկների վարակվելու ռիսկը
1.2 Մարզիկները կպահպանեին իրենց նորմալ մարզավիճակը (հակառակ դեպքում, 2 ամիս չմարզվելու պարագայում, առնվազն 3-4 ամիս պետք է լինելու վերականգնվելու համար)
1.3 մարզիկները ստիպված չէին լինի պարետի կարգավորումները խախտել (հիմա շատերը ստիպված խախտում են, քանի որ մարզիկի համար մարզումը գրեթե նույն բանն է,ինչ սնունդը)
1.4 կաշխատեր տվյալ շրջանի հյուրանոցային ենթակառուցվածքը՝ դրանից բխող բոլոր դրական հետևանքներով (աշխատողներ,շրջանառություն և այլն)
1.5 մի շատ կարևոր գործոն՝ այդ ամենի համար պետք չէին լրացուցիչ միջոցներ։

Այդ միջոցները տարեսկզբից հատկացված էին ֆեդերացիաներին։ Ուղղակի պետք էր կազմակերպել և թույլ տալ, որ դրանք իրենց բնականոն ձևով ծախսվեին մարզումային պրոցեսի վրա՝ ԱԴ պայմաններում։ Իսկ հիմա ստացվելու է,որ տարեվերջին այդ բնագավառում բյուջեն չի կատարվել (գոնե արդյունավետ)՝ դրանից բխող բացասական հետևանքներով…

2. կարելի էր կազմակերպել հայտնի մարզիկների մասնակցությամբ online մարզումներ, որը ինչ որ հարթակով կհեռարձակվեր հանրության համար: Օրերս նման առաջարկ ստացել եմ ՄՕԿ-ից (Միջազգային Օլիմպիական կոմիտե)։ Այդ կառույցը պատրաստ է նույնիսկ վճարել յուրաքանչյուր տեսաձայնագրված և նրանց ուղարկված մարզման համար:

3. ֆիտնես մարզիչների մասնակցությամբ կարելի էր մարզումներ կազմակերպել բակերում՝ կա՜մ հասարակական հեռավորությունը պահելով՝ 15-20 հոգանոց խմբերով,կա՛մ էլ մարդիկ պատշգամբներից կհետևեին մարզիչների հրահանգներին։ Մի բան,որ լայնորեն կիրառվում է օրինակ Ֆրանսիայում:

4. Online վերապատրաստման սեմինարներ մարզիչների համար (տեսական մաս)։ Սա կարելի էր իրականացնել Ֆիզիկական կուլտուրայի և սպորտի պետ. ինստիտուտի ներգրավմամբ:

5. Շաբաթը առնվազն 2-3 սպորտային ֆիլմերի ցուցադրման ապահովում հայկական ալիքներով՝ հայերենով։ Սա անչափ մեծ դաստիարակչական ազդեցություն է ունենում:

Իրականում այս ցանկը կարելի է երկար թվարկել»,- գրել է Արսեն Ջուլֆալակյանն ու մի քանի ֆիլմերի հղումներ կցել գրառմանը:

Առաջին Ալիքի «Օրվա հերթապահը» նոր հաղորդման հյուրը երեկ Օլիմպիական խաղերի փոխչեմպիոն, Աշխարհի և Եվրոպայի չեմպիոն հունահռոմեական ոճի ըմբիշ, ԱԺ պատգամավոր Արսեն Ջուլֆալակյանն էր: Ի թիվս այլ թեմաների, նա խոսել է նաև զորակոչային տարիքի մարզիկների՝ վերաբացվող սպորտային վաշտում՝ ԲԿՄԱ-ում ծառայելու, ինչպես նաև ստեղծված իրավիճակի՝ նրանց վրա ազդեցության մասին։

Ջուլֆալակյանը նշել է, որ քանի որ աշխարհի ու Եվրոպայի առաջնությունները հետաձգվել են, և այն պատանիները, որոնք պետք է մասնակցեին ու փորձեին որակավորում ստանալ՝ տարկետման համար կամ Սպորտային վաշտում ծառայելու համար, եթե այն հասցնեին վերաբացել, կանգնել են փաստի առաջ: Ջուլֆալակյանը նշեց, որ նա դիմելու ՊՆ-ին և հարցը բարձրացնելու է ԱԺ-ում, որպեսզի հարցը շուտափույթ լուծում ստանա:

Օլիմպիական խաղերի չեմպիոն, աշխարհի 3-ակի ու Եվրոպայի 5-ակի չեմպիոն, հունահռոմեական ոճի ըմբիշ Արթուր Ալեքսանյանն ու Աշխարհի և Եվրոպայի չեմպիոն, Օլիմպիական խաղերի արծաթե մեդալակիր Արսեն Ջուլֆալակյանը միացել են United World Wrestling-ի նոր նախաձեռնությանը՝ բոլորին կոչ անելով մնալ ուժեղ և մնալ տանը:

UWW-ի պատրաստած տեսանյութում նման կոչով հանդես են եկել նաև աշխարհի մյուս ուժեղագույն ըմբիշները.

Հունահռոմեաճակ ոճի ըմբշամարտի Հայաստանի հավաքականի անդամ Կարապետ Չալյանը գրառում է կատարել ֆեյսբուքյան իր էջում:

«Աշխարհում կորոնավիրուսից արդեն 19000 մարդ է մահացել, միայն այսօր՝ 2000, Հայաստանում արտակարգ դրություն է, այսօր արդեն խստացված ռեժիմով, սակայն ազգային ժողովի պատգամավոր կոչեցյալը, իր ուշադրությունից դուրս թողնելով վիրուսի տարածման ու կանխարգելման, էլ չեմ ասում տնտեսական հետևանքների դարդ ու ցավի քննարկումը, նստած չարախնդում է Օլիմպիական խաղերի հետաձգման առիթով։ Որքան փոքրհոգի կարող է լինել մարդը, որքան ոչ իր տեղում։ Օլիմպիադան դեռ կլինի և մենք դեռ կմասնակցենք դրան, սակայն ոչինչ չի փոխի ձեր հոգու սև գույնը։ Աստված պահապան մեր ազգին»,-գրել է Չալյանը։

Հիշեցնենք, որ նույն քաշային կարգում հանդես է գալիս նաև Արսեն Ջուլֆալակյանը: Մարչզական խորհրդի որոշմամբ Տոկիո-2020-ին պետք է մասնակցեր հենց Չալյանը:

Օլիմպիական խաղերի հետաձգման հետ կապված երեկ գրառում էր կատարել նաև Արսեն Ջուլֆալակյանը: