Հայաստան էին ժամանել «Ինիեստա» ակադեմիայի տնօրեն Իվան Կասկալեսն ու կրթական և մարզումային ծրագրի ղեկավար Ռուբեն Բոնաստրեն։ Այս մասին տեղեկացնում է ՀՖՖ-ի պաշտոնական կայքը։ 

Նրանք այցելել են Հանրապետական մարզադաշտ, ՀՖՖ Տեխնիկական կենտրոն/Ֆուտբոլի ակադեմիա, ծանոթացել ֆուտբոլային ենթակառուցվածքներին և ներկա եղել «Սարդարապատ» – «Սյունիք» հանդիպմանը։

Կասկալեսը և Բոնաստրեն ՀՖՖ ղեկավարության հետ քննարկել են «Ինիեստա» ակադեմիայի կրթական ծրագիրը Հայաստան բերելու հնարավորությունը։ Դիտարկվում է ծրագիրը ներդնել Դավթաշենում կառուցվելիք ֆուտբոլի ակադեմիայում։ Հետագայում հնարավոր է համագործակցությունը շարունակվի մարզային այլ ակադեմիաներում նույնպես։

Այս համագործակցությունը հերթական կարևոր քայլն է հայկական ֆուտբոլում ժամանակակից կրթական և զարգացման մոդելների ներդրման ճանապարհին։

ՀՖՖ-ն շարունակում է հետևողական աշխատանքը միջազգային փորձի ներգրավման, մանկապատանեկան ֆուտբոլի զարգացման ուղղությամբ։

Արմեն Մելիքբեկյանն ու Լևան Կոբիաշվիլին հանդիպել են ՖԻՖԱ-ի նախագահ Ջաննի Ինֆանտինոյին։ Այս մասին տեղեկացնում է ՀՖՖ-ի մամուլի ծառայությունը։

Նրա հետ զրույցում Հայաստանի և Վրաստանի ֆուտբոլի ֆեդերացիաների նախագահները նշել են, որ մեծագույն պատիվ և պատասխանատվություն է ստանձնել 2029 թվականի Աշխարհի երիտասարդական առաջնության հյուրընկալումը:

2 երկրների ֆուտբոլային գերատեսչությունների ղեկավարներն իրենց խորին երախտագիտությունն են հայտնել ՖԻՖԱ-ի ֆուտբոլային ընտանիքին՝ Հայաստանի և Վրաստանի նկատմամբ ցուցաբերած նման բարձր վստահության համար: Հանդիպման ընթացքում կողմերը վերահաստատել են իրենց լիակատար պատրաստակամությունը՝ միավորելու ամբողջ ներուժն ու ջանքերը՝ կազմակերպելու բարձր մակարդակի ֆուտբոլային մրցաշար:

Արմեն Մելիքբեկյանը և Լևան Կոբիաշվիլին ընդգծել են, որ երկու երկրներն էլ վճռական են տրամադրված 2029 թվականի աշխարհի առաջնությունը վերածելու իսկական ֆուտբոլային տոնի, որը կառանձնանա իր բարձրակարգ կազմակերպվածությամբ և հյուրընկալության յուրահատուկ մթնոլորտով:

Այսօր՝ հունվարի 18-ին, լրանում է Հայաստանի ֆուտբոլի ֆեդերացիայի հիմնադրման 34-ամյակը։ 1992 թվականի հենց այս օրը դրվեց հայկական ֆուտբոլի անկախ ճանապարհի սկիզբը:

ՀՖՖ նախագահ Արմեն Մելիքբեկյանը շնորհավորական ուղերձ է հղել հոբելյանի առթիվ՝ ընդգծելով կառույցի անցած ուղին, ընթացիկ ձեռքբերումներն ու ապագայի ծրագրերը։

«Այս տարիներին հայկական ֆուտբոլն անցել է զարգացման բարդ ուղի։ Այսօր մենք գտնվում ենք կարևոր շրջափուլում, երբ ձևավորվում են ոչ միայն ներկայի, այլև ապագա հաջողությունների հիմքերը։ Զարգացման նոր ծրագրերը, կառուցվածքային փոփոխությունները և միջազգային համագործակցություններն ուղղված են մեկ նպատակին՝ հայկական ֆուտբոլի կայուն առաջընթացին»,- ասված է ուղերձում։

ՀՖՖ նախագահը հատուկ անդրադարձ է կատարել ֆուտզալի Հայաստանի ազգային հավաքականի պատմական հաջողությանը՝ Եվրոպայի առաջնության եզրափակիչ փուլի ուղեգիր նվաճելուն, որը մեծ հպարտության և հավատի աղբյուր է դարձել ֆուտբոլային հանրության համար։

Մելիքբեկյանը նաև խոսել է խոշոր միջազգային մրցաշարեր հյուրընկալելու հավակնոտ ծրագրերի մասին.

«Հայաստանը և Վրաստանը համատեղ պայքարում են մինչև 20 տարեկանների աշխարհի առաջնությունը մեր երկրներում անցկացնելու համար, ինչը նոր հնարավորություն է մեր երիտասարդների, ենթակառուցվածքների և ամբողջ ֆուտբոլային համակարգի զարգացման համար»։

Ամփոփելով խոսքը՝ Արմեն Մելիքբեկյանը շնորհավորել է ֆուտբոլային աշխարհի բոլոր ներկայացուցիչներին՝ երկրպագուներին, ֆուտբոլիստներին, մարզիչներին և գործընկերներին՝ վստահեցնելով, որ միասնական ուժերով շարունակելու են կառուցել հայկական ֆուտբոլի մրցունակ ապագան։

Հայաստանի ֆուտբոլի ֆեդերացիայի նախագահ Արմեն Մելիքբեկյանը և ՀՀ կրթության, գիտության, մշակույթի և սպորտի նախարար Ժաննա Անդրեասյանն այսօր այցելել են ՀՖՖ Տեխնիկական կենտրոն/ֆուտբոլի ակադեմիա։ Այս մասին տեղեկացնում է ՀՖՖ մամուլի ծառայությունը։

Այցի շրջանակում նրանք հանդիպում են ունեցել ֆուտզալի Հայաստանի ազգային հավաքականի անդամների հետ։

Հանդիպումը կայացել է Եվրոպայի 2026 թվականի առաջնությանը ընդառաջ, որին նախապատրաստվում է ընտրանին։

Հայաստանի ֆուտբոլի ֆեդերացիայի նախագահ Արմեն Մելիքբեկյանը ցավակցական ուղերձ է հղել լեգենդար մարզիչ, ԽՍՀՄ ֆուտբոլի պատմության ամեն նշանավոր ներկայացուցիչներից մեկի՝ Նիկիտա Սիմոնյանի մահվան կապակցությամբ։

«Խորին ցավով տեղեկացանք լեգենդար մարզիչ և ֆուտբոլի մեծ աստղ Նիկիտա Սիմոնյանի մահվան մասին։

Նրա անունը տասնամյակներ շարունակ մեզ համար ֆուտբոլ խաղի հոմանիշ էր։ Նիկիտա Սիմոնյանը միշտ փայլել է, փայլել է որպես ֆուտբոլիստ, մարզիչ և պաշտոնյա՝ իր անունը ոսկե տառերով գրելով հայկական և խորհրդային ֆուտբոլի պատմության մեջ։ Հայ երկրպագուներին իր առաջնորդությամբ նա պարգևել է «Արարատ-73»-ի հաղթանակները՝ դառնալով մի ամբողջ ժողովրդի հպարտություն։

Հատկապես հիացմունքի է արժանի այն, որ Նիկիտա Սիմոնյանը մինչև կյանքի վերջին օրերը ներգրավված է եղել ֆուտբոլային առօրյայում աշխատել և նվիրվել է խաղին՝ մշտապես ի ցույց դնելով իր ապշեցուցիչ համեստությունը և ոգու կորովը։

Նիկիտա Սիմոնյանի ֆուտբոլային ժառանգությունը և անձնային հատկանիշները կմնան մշտական օրինակ մարզական ու մարդկային ամենաբարձր արժեքների:

Հայաստանի ֆուտբոլի ֆեդերացիայի, հայաստանյան ֆուտբոլային ընտանիքի անունից խորին ցավակցություն եմ հայտնում Նիկիտա Սիմոնյանի ընտանիքին, ընկերներին և բոլոր նրանց, ովքեր կապված էին նրա անվան ու գործի հետ»,- գրված է ցավակցական ուղերձում։

ՈւԵՖԱ-ի պաշտոնական կայքը հարցազրույց է ունեցել Հայաստանի ֆուտբոլի ֆեդերացիայի նախագահ Արմեն Մելիքբեկյանի հետ։ Ներկայացնում ենք լայնածավալ հարցազրույցի հայերեն թարգմանությունը։

«Որպես ցմահ ֆուտբոլի երկրպագու, ապա՝ սպորտային լրագրող, Հայաստանի ֆուտբոլի ֆեդերացիայի (ՀՖՖ) նախագահ Արմեն Մելիքբեկյանը, նախքան 20 տարի առաջ ֆեդերացիային միանալը, լավ գիտի, թե ինչ նշանակություն ունի ֆուտբոլը հայ ժողովրդի համար։

ՀՖՖ-ի նախագահ է 2019 թվականից, իսկ 2025 թվականի սկզբին Մելիքբեկյանը դարձավ առաջին հայը, ով ընտրվեց ՈՒԵՖԱ-ի գործադիր կոմիտեի անդամ։

Այստեղ նա խոսում է այդ պատվի, ինչպես նաև Եվրոպայի ամենաերիտասարդ ազգային ասոցիացիաներից մեկը ղեկավարելու մարտահրավերների մասին՝ ներկայացնելով ՀՖՖ-ի նպատակները հետաքրքիր ապագայի համար։

— Արմեն, կպատմե՞ք ՀՖՖ-ում Ձեր անցած ճանապարհի մասին։

— Ես ֆուտբոլի երկրպագու եմ եղել մանկուց։ Խաղացել եմ երիտասարդական մակարդակով և շատ ժամանակ անցկացրել եմ որպես գնդակ մատուցող մեր նախկին ազգային մարզադաշտում։ Ես ներկա եմ եղել մեր ազգային հավաքականի առաջին խաղերին 1992 թվականին, երբ նոր էինք մեկնարկել, և դեռևս հպարտ եմ, որ որպես գնդակ մատուցող ներկա էի մեր առաջին պաշտոնական գոլի ժամանակ՝ «Եվրո 96»-ի ընտրական փուլում։ Կրկնություններում կարող եք ինձ տեսնել դարպասի հետևում։

19 տարեկանում սկսել եմ աշխատել որպես սպորտային լրագրող ազգային հեռուստատեսությունում։ 2005 թվականին միացել եմ ՀՖՖ-ին որպես գործադիր տնօրենի տեղակալ։ 2009 թվականին հեռացել եմ և աշխատել եմ որպես հետաքննող լրագրող՝ կենտրոնանալով մարդու իրավունքների վրա, ապա 2018 թվականին վերադարձել եմ ՀՖՖ և 2019 թվականին ընտրվել նախագահ։

— Որքա՞ն հպարտ էիք Դուք այս տարվա սկզբին ՈւԵՖԱ-ի Գործադիր կոմիտեի անդամ ընտրվելու համար։

— Ես շատ հպարտ էի, բայց ոչ միայն իմ, այլ նաև հայկական ֆուտբոլի համար։ Դա կարևոր է, քանի որ առաջին անգամն է, որ ազգը ներկայացված է Գործադիր կոմիտեում, և դա ցույց է տալիս, որ մենք լավ ենք աշխատում որպես ազգային ֆեդերացիա։

Մեր ազդեցությունը դանդաղորեն աճում է եվրոպական ֆուտբոլում, ունենք ավելի շատ պատվիրակներ, կոմիտեի անդամներ և մրցավարներ, և դա նշանակում է, որ մենք լավ աշխատանք ենք կատարում։ Սա կարևոր ձեռքբերում է երկրի և ՀՖՖ-ի համար։

— Հայկական «Նոա» ֆուտբոլային ակումբը երկու անգամ անընդմեջ որակավորվել է ՈւԵՖԱ-ի Կոնֆերենցիաների լիգայի խմբային փուլ։ Ինչպե՞ս է դա ազդում ներքին խաղի վրա։

— Ինձ շատ է դուր գալիս «Նոայի» նախագիծը։ Ակումբի սեփականատեր Վարդգես Վարդանյանը մեծ էնտուզիաստ է և ամբողջությամբ նվիրված է իր ակումբին ու խաղին։ Նա կատարել է զգալի ներդրումներ, բայց ինձ համար թիմի արդյունքներից ավելի կարևոր է այն, ինչ նրանք անում են Վաղարշապատում։ Նրանք ներդրումներ են կատարում ժամանակակից ենթակառուցվածքներում, որոնք կօգնեն մեր խաղացողներին զարգանալ և կծառայեն մեր ազգին։ Սա չափազանց կարևոր է։
Մեր ներքին լիգան մրցունակ է։ Մենք ցանկանում ենք ունենալ պրոֆեսիոնալ լիգա, որը կնպաստի զարգացմանը։ Եվրոպայում մեր գործակիցները բարձրացել են, և մենք հնարավորություն ունենք էլ ավելի առաջ գնալ։ Սա պայմանավորված է ոչ միայն «Նոայի», այլև «Փյունիկի» նախկին նվաճումներով։

— Ինչպե՞ս է ազգային հավաքականի խաղերի և ճանապարհորդությունների զբաղված ժամանակաշրջանն ազդում Ձեզ՝ որպես ֆեդերացիայի նախագահի։

— Ազգային հավաքականի հետ ճանապարհորդելը միշտ լի է ադրենալինով։ Դեռևս հետաքրքիր է ներսից տեսնել ամեն բան, և մենք ունենք հիանալի թիմային ոգի։ ՀՖՖ-ի նման փոքր ֆեդերացիայի համար դա անընդհատ աշխատանք և մեծ սթրես է, քանի որ ակնկալիքները բարձր են, և բոլորը ցանկանում են, որ ազգային հավաքականը հաղթի։ Ինձ համար առաջնային է խաղի որակը։ Արդյունքը կարևոր է, բայց փոքր թիմերի համար կատարողականի որակը վճռորոշ է։ Այս շրջանում ես գոհ եմ, քանի որ ունենք նոր մարզիչ, կառուցում ենք նոր թիմ, և խաղի որակը բավական լավ է։

— Որքա՞ն օգտակար է ՈւԵՖԱ-ի Ազգերի լիգան Հայաստանի նման փոքր ազգերի համար։

— Ազգերի լիգան մեզ համար շատ դրական է եղել։ 2020 թվականին մենք հաղթեցինք C լիգան և բարձրացանք B լիգա, որտեղ խաղացինք Շոտլանդիայի, Իռլանդիայի և Ուկրաինայի դեմ։ Դա անգնահատելի փորձ էր։ Անցյալ մրցաշրջանում հիանալի էր տեսնել, թե ինչպես Սան Մարինոն բարձրացավ C լիգա՝ երկար սպասված մրցակցային հաղթանակից հետո։ Փոքր ազգերի համար Ազգերի լիգան հիանալի մրցաշար է։

— Կա՞ն այլ փոքր ֆեդերացիաներ, որոնք օրինակ են ծառայում։

— Այո՛, մենք շատ մտերիմ ենք Վրաստանի ֆուտբոլի ֆեդերացիայի հետ և ուշադիր հետևում ենք նրանց աշխատանքին։ Տարիներ շարունակ մեր հարաբերությունները սովորական էին, բայց այժմ մենք շատ մոտ ենք։ Ես գործընկեր եմ ՈւԵՖԱ-ի գործադիր կոմիտեում Վրաստանի ֆեդերացիայի նախագահ Լևան Կոբիաշվիլիի հետ։ Նրանց աշխատանքը, ներդրումները և ամուր համակարգը, որն օգնեց նրանց որակավորվել «Եվրո 2024»-ին, ոգեշնչում է մեզ և մյուս փոքր ազգերին։

— Որպես ՈւԵՖԱ-ի «HatTrick» կոմիտեի փոխնախագահ, ի՞նչ եք կարծում, ինչպե՞ս է այդ ծրագիրն ազդում ֆուտբոլի զարգացման վրա։

— «HatTrick» կոմիտեում աշխատելը հաճելի է, քանի որ կարելի է զգալ, թե որքան կարևոր է այն եվրոպական ֆուտբոլի զարգացման համար։ Դրա ազդեցությունը հատկապես նկատելի է փոքր ֆեդերացիաներում։ Հայաստանի համար այն կարևոր է ենթակառուցվածքների զարգացման համար։ «HatTrick»-ի ֆինանսավորմամբ և մեր ռեսուրսներով կառուցել ենք երեք փոքր մարզադաշտ։ Սա խթանել է կառավարությանը՝ ներդրումներ կատարելու չորս այլ ակադեմիաներ կառուցելու համար։ Վերջերս կառավարությունը հայտարարեց Վանաձորի մարզադաշտը 12,000 նստատեղով ընդլայնելու մասին, ինչը թույլ կտա ազգային հավաքականին խաղալ Երևանից դուրս։ Կանանց ազգային հավաքականը և տղամարդկանց մինչև 21 տարեկանների հավաքականը սկսել են խաղեր անցկացնել մայրաքաղաքից դուրս։ Սա շատ լավ հնարավորություն է՝ ընդլայնելու ֆուտբոլի աշխարհագրությունը Հայաստանում և ավելի շատ մարդկանց ոգեշնչելու՝ տեսնելու թիմերին ու ներգրավվելու սպորտում։

— Ինչպե՞ս է օգնում ՈւԵՖԱ-ի «Grow» խաղադաշտերի քարտեզագրման գործիքը։

— Մենք սերտորեն համագործակցում ենք «Grow» թիմի հետ։ Խաղադաշտերի քարտեզագրումը թույլ է տալիս վերլուծել ենթակառուցվածքները, բացահայտել թերզարգացած մարզերը և հիմնավորում ներկայացնել տեղական իշխանություններին ներդրումների համար։ Սա կարևոր է խաղի հասանելիությունն ընդլայնելու և ապագայի համար։

— Կպատմե՞ք կանանց ազգային հավաքականի վերակառուցման մասին։

— Կանանց ազգային հավաքականը նոր նախագիծ է։ 2020 թվականին, ութ տարվա ընդմիջումից հետո, վերահիմնեցինք թիմը զրոյից։ Սկսել ենք լիգայի համակարգ կառուցել։ Թիմը շատ երիտասարդ է, խաղացողների մեծ մասը ծնվել է 2006-2008 թվականներին։ Վերջին տարիներին գրանցել ենք դրական արդյունքներ, և ես վստահ եմ, որ փորձ ձեռք բերելով՝ թիմը կդառնա ավելի ուժեղ։ Կանանց ֆուտբոլը Հայաստանում երկար ժամանակ թերագնահատվել է, բայց մենք ներդրումներ ենք կատարում, և ես լավատես եմ ապագայի հանդեպ։

— Ձեր աղջիկների ակումբներից մեկը անցյալ տարի ՈւԵՖԱ-ի «Grassroots» մրցանակ է ստացել զարգացման աշխատանքների համար։ Որքանո՞վ է դա կարևոր։

— Դա «GOALS» ակումբն էր, և նրանք իսկապես հիանալի աշխատանք են կատարում։ Նրանք գործում են երկրի բազմաթիվ մարզերում՝ հաղթահարելով բարդ իրավիճակներ։ Այն, ինչ նրանք անում են կանանց ֆուտբոլում, հիանալի օրինակ է՝ ցույց տալու, թե որքան բանի կարելի է հասնել, երբ մարդը համառ է և հավատում է իր նպատակին։

Այս «Grassroots» մրցանակը շատ կարևոր էր ոչ միայն «GOALS»-ի, այլև հայկական ֆուտբոլի, մասնավորապես՝ կանանց ֆուտբոլի համար։ Դա չափազանց ոգեշնչող էր։ Նման ձեռքբերումները միշտ չէ, որ հայտնվում են վերնագրերում, և գուցե շատերը չիմացան դրա մասին, բայց թիմի և ֆեդերացիայի համար դա շատ կարևոր էր։ ՈւԵՖԱ-ի կողմից այս ճանաչումը ցույց է տալիս, որ մենք ճիշտ ուղղությամբ ենք ընթանում։

ՀՖՖ նախագահ Արմեն Մելիքբեկյանը, ԿԳՄՍ նախարարը, Պետական գույքի կառավարման կոմիտեի նախագահը և Հայաստանում «Յուվենտուսի» ակադեմիայի հիմնադիր Ալֆրեդ Սադոյանը շրջայց են կատարել Հայաստանում «Յուվենտուսի» ակադեմիայի Ավանի ենթակառուցվածքում։ Այս մասին հայտնում է ՀՖՖ պաշտոնական կայքը։

Մոտ 2 հա մակերեսով տարածքում կառուցվում է 4 խաղադաշտ՝ երկուսը 20×40, մեկը 40×60, ևս մեկը 105 մետրանոց։ 1 արհեստական խոտածածկով փակ դաշտ էլ կլինի մարզաբազայի 4-րդ հարկում՝ 5-7 տարեկանների ձմեռային մարզման համար։ Երկրորդ հարկում նախատեսված է հյուրանոց-կացարան՝ եվրոպացի մարզիչների և մարզերի երեխաների համար։

Ակադեմիայի սաներն ամեն տարի կմեկնեն Թուրին՝ In-squad մարզումների՝ հասակակիցների հետ մրցելու և որակներն առավել զարգացնելու համար։ «Յուվեն» ունի նաև իր ակադեմիաների Աշխարհի առաջնություն։ Ամեն տարի յուրաքանչյուր ակադեմիայից 2 թիմ Թուրինում մասնակցում է այդ մրցաշարին։ Հայաստանի ակադեմիայի սաները ևս ներգրավված կլինեն թուրինյան Աշխարհի առաջնությանը։

Ըստ Ալֆրեդ Սադոյանի՝ գործելու են և՛ անվճար, և՛ վճարովի խմբեր։ Անվճար խմբի սաներին կընտրի իտալացի տեխնիկական տնօրենը սելեկցիայի միջոցով։ «Եվրոպայից ժամանելու է 20 մարզիչ։ Լինելու են նաև թարգմանիչներ, քանի որ 5-7 տարեկան երեխաները կդժվարանան անգլերենով շփվել մարզիչների հետ», — նշեց Սադոյանը։

ՀՖՖ նախագահը վստահեցրել է, որ 2026 թվականին տեղի կունենա «Յուվենտուսի» ակադեմիայի բացումը ոչ միայն Ավանում, այլև «Հրազդան» մարզադաշտի շրջակայքում։

Երևանի Նոր Նորք վարչական շրջանի 9-րդ զանգվածում գտնվող թիվ 198 ավագ դպրոցի տարածքում մայիսի 8-ին տեղի ունեցավ արհեստական խոտածածկով փոքր խաղադաշտի պաշտոնական բացման հանդիսավոր արարողությունը:

Ինչպես հաղորդում է Հայաստանի ֆուտբոլի ֆեդերացիայի մամուլի ծառայությունը, միջոցառմանը մասնակցում էին ՀՖՖ նախագահ Արմեն Մելիքբեկյանը, ՖԻՖԱ-ի անդամ եվրոպական ասոցացիաների համակարգող Մարկո Ֆերին, ինչպես նաև ՖԻՖԱ-ի դեսպան Քրիստիան Կարամբյոն:

Նշենք, որ նոր խաղադաշտը կառուցվել է ՖԻՖԱ-ի «ՖԻՖԱ Արենա» ծրագրի շրջանակում, որի նպատակն է ամբողջ աշխարհում շահագործել նմանատիպ 1000 խաղադաշտ: Հայաստանը դարձել է այս գլոբալ նախաձեռնության առաջին շահառուներից մեկը:

ՈւԵՖԱ-ի և ՖԻՖԱ-ի նախագահները՝ Ալեքսանդր Չեֆերինն ու Ջիանի Ինֆանտինոն, շնորհավորական ուղերձներ են հղել ՀՖՖ նախագահ Արմեն Մելիքբեկյանին՝ ապրիլի 3-ին Բելգրադում կայացած ՈւԵՖԱ-ի 49-րդ Կոնգրեսի շրջանակում նրա՝ ՈւԵՖԱ-ի գործադիր կոմիտեի անդամ ընտրվելու առթիվ։

Չեֆերինը ընդգծել է Մելիքբեկյանի հեղինակությունն ու եվրոպական ֆուտբոլային համայնքում վաստակած վստահությունը՝ նշելով, որ նրա ձայնն ու ֆուտբոլին նվիրվածությունը մեծ արժեք են լինելու Կոմիտեում։

Ինֆանտինոն իր հերթին վստահություն է հայտնել, որ Մելիքբեկյանի փորձը, գիտելիքները և մարդկային արժեքները կօգնեն եվրոպական ֆուտբոլին դիմակայել ապագա մարտահրավերներին՝ կարևոր ներդրում ունենալով համաշխարհային սպորտի զարգացման գործում։

Աղբյուրը՝ ՀՖՖ

Այսօր Վազգեն Սարգսյանի անվան «Հանրապետական» մարզադաշտում անցկացվում է Հայաստանի Ֆուտբոլի ֆեդերացիայի նախագահ Արմեն Մելիքբեկյանի մամուլի ասուլիսը։

ՀՖՖ նախագահը խոսել է 2029 թվականի Մ20 ԱԱ-ի՝ Հայաստանի և Վրաստանի միասնական հայտի վերաբերյալ արձագանքի մասին։

«Մենք հանդիպել ենք՝ ես ու պարոն Կոբիաշվիլին (ՎՖՖ-ի նախագահ), ՈւԵՖԱ-ի նախագահի հետ։ ՈՒԵՖԱ-ն հաստատել է, որ Եվրոպական ասոցիացիաներից աջակցում են մեր հայտը։ Դա արդեն մեծ նվաճում է։ Դա նշանակում է, որ եթե այլ եվրոպական ասոցիացա ևս կդիմի, ինչը դեռ չկա, ապա ՈՒԵՖԱ-ն աջակցելու է մեր հայտը։ Նախապես հանդիպել ենք նաև ՖԻՖԱ-ի մեր գործընկերների հետ, և նրանք նախնական դրական արձագանք են տվել։

Իհարկե, ամեն ինչ կապված կլինի այն պայմանների հետ, որը մենք կառաջարկենք, որովհետև բազմաթիվ պայմաններ կան, որոնց պետք է համապատասխանենք։ Հուսանք, որ այդ փուլն էլ կանցնենք։

Դեռևս չգիտենք՝ ով կլինի մեր մրցակիցն այլ մայրցամաքներից։ Հուսանք, մինչև սեպտեմբեր մենք պատասխանը կունենանք»,- ասել է ՀՖՖ նախագահը մամուլի ասուլիսի ժամանակ։