Արման Անդրեասյան — Armsport.am

🎥 Թևանյանի հաղթարշավը շարունակվում է. հայ ըմբիշը պարտության է մատնել աշխարհի փոխչեմպիոնին

Suren Sahakyan — Sat, 24 Jan 2026 17:40:01 +0000

Հնդկաստանում ընթացող ըմբշամարտի Pro Wrestling League (PWL) պրոֆեսիոնալ մրցաշարում Հայաստանի ներկայացուցիչ Վազգեն Թևանյանը շարունակում է գրանցել տպավորիչ արդյունքներ։ Ազատ ոճի ըմբշամարտի Եվրոպայի չեմպիոն և աշխարհի բրոնզե մեդալակիրը (65 կգ) իր ակտիվում գրանցել է արդեն երրորդ հաղթանակը։

«Maharashtra Kesari» թիմի կազմում հանդես եկող հայ մարզիկի հերթական մրցակիցը տիտղոսակիր ըմբիշ, 2025 թվականի աշխարհի փոխչեմպիոն, մոնղոլ Տումուր-Օչիրին Տուլգան էր։ Դիտարժան և լարված պայքարում Թևանյանին հաջողվել է վստահ առավելության հասնել մրցակցի նկատմամբ՝ գոտեմարտն ավարտելով 10։4 հաշվով։

Մինչ այս հաջողությունը, հայ ըմբիշը ևս երկու կարևոր հաղթանակ էր տարել PWL-ի շրջանակում։ Մասնավորապես, նախորդ գոտեմարտերում նա ուժեղ էր գտնվել հնդիկ ըմբիշ Վիշալ Կալիրամանայից («Up Dominators» թիմ), ում հաղթել էր 4։2 հաշվով, ինչպես նաև սկզբունքային գոտեմարտում 5։2 հաշվով առավելության էր հասել ադրբեջանցի Ալի Ռահիմզադեի նկատմամբ։

Հիշեցնենք, որ հնդկական լիգայում Հայաստանն ունի ևս մեկ ներկայացուցիչ։ «Up Dominators» թիմի կազմում մինչև 74 կգ քաշային կարգում հանդես է գալիս Եվրոպայի չեմպիոն և աշխարհի բրոնզե մեդալակիր Արման Անդրեասյանը։

🎥 PWL․ Վազգեն Թևանյանը պարտության է մատնել ադերբեջանցի մրցակցին

Suren Sahakyan — Mon, 19 Jan 2026 16:40:45 +0000

Հնդկաստանում անցկացվող ըմբշամարտի պրոֆեսիոնալ լիգայի (PWL) շրջանակում հայ մարզիկները սկսել են իրենց ելույթները։ Երկարատև դադարից հետո՝ 2026 թվականի հունվարին վերաբացված մրցաշարում Հայաստանի հավաքականի առաջատարներն ընդգրկվել են տեղական տարբեր ակումբների կազմերում։

Ազատ ոճի ըմբշամարտի Եվրոպայի չեմպիոն և աշխարհի առաջնության բրոնզե մեդալակիր Վազգեն Թևանյանը (65 կգ) տպավորիչ հաղթանակով է նշանավորել իր մասնակցությունը։ Մումբայը ներկայացնող «Maharashtra Kesari» թիմի կազմում հայ ըմբիշը ուժերը չափել է Ադրբեջանի ներկայացուցիչ Ալի Ռահիմզադեի հետ։ Լարված պայքարում Թևանյանին հաջողվել է առավելության հասնել մրցակցի նկատմամբ՝ գոտեմարտը ավարտելով 5-2 հաշվով։ Հատկանշական է, որ հայ մարզիկը վճռորոշ միավորները վաստակել և հաղթանակը կորզել է հանդիպման վերջնամասում։

Մրցումային օրը, սակայն, պակաս հաջող էր Հայաստանի մեկ այլ ներկայացուցչի՝ Արման Անդրեասյանի համար։ 2024 թվականի Եվրոպայի չեմպիոնն ու աշխարհի բրոնզե մեդալակիրը, որը հանդես է գալիս «UP Dominators» թիմի կազմում (մինչև 74 կգ քաշային կարգ), չի կարողացել հաղթահարել տանտերերի դիմադրությունը։ Հնդիկ ըմբիշ Չանդերմոհանի հետ գոտեմարտում Անդրեասյանը զիջել է 5։12 հաշվով։

Նշենք, որ Pro Wrestling League-ը (PWL) Ասիայի ամենահեղինակավոր և դիտարժան պրոֆեսիոնալ լիգաներից է, որը հիմնադրվել է 2015 թվականին։ Մրցաշարը մոտ 7 տարվա դադար էր վերցրել (վերջին անգամ անցկացվել էր 2019թ․-ին) և իր գործունեությունը վերսկսել է միայն 2026 թվականի սկզբին։

Բուդապեշտի մրցաշար․ Վազգեն Թևանյանը դարձավ բրոնզե, իսկ Արման Անդրեասյանը՝ արծաթե մեդալակիր

Suren Sahakyan — Thu, 17 Jul 2025 18:14:40 +0000

Հունգարիայի մայրաքաղաք Բուդապեշտում ընթացող ազատ ոճի ըմբշամարտի վարկանիշային մրցաշարում Եվրոպայի չեմպիոն Վազգեն Թևանյանը (65 կգ) դարձավ բրոնզե մեդալակիր։

Թևանյանը փոքր եզրափակիչում գերվստահ հաղթանակ տարավ Ֆրանսիան ներկայացնող՝ Եվրոպայի գործող արծաթե մեդալակիր Խամզատ Արսամերզուևի նկատմամբ՝ 9։0։

Ավելի ուշ ոսկե մեդալի համար պայքարի մեջ մտավ Եվրոպայի չեմպիոն Արման Անդրեասյանը (70 կգ), որը եզրափակիչում 0։8 հաշվով զիջեց ճապոնացի Յոշինոսուկե Աոյագիին։

Ըմբշամարտի ԵԱ․ Արման Անդրեասյանը հաղթեց վրացի մրցակցին և դուրս եկավ եզրափակիչ

Suren Sahakyan — Mon, 07 Apr 2025 17:29:54 +0000

Սլովակիայի մայրաքաղաք Բրատիսլավայում ընթացող ազատ ոճի ըմբշամարտի Եվրոպայի առաջնությունում Հայաստանի ներկայացուցիչ, գործող չեմպիոն Արման Անդրեասյանը (70 կգ) երկրորդ տարին անընդմեջ դուրս եկավ մրցաշարի եզրափակիչ։

25-ամյա ըմբիշը կիսաեզրափակիչում 3:1 հաշվով առավելության հասավ վրացի Ակակի Կեմերտելիձեի նկատմամբ։

Եզրափակիչը կկայանա վաղը՝ ապրիլի 8-ին։ Անդրեասյանի մրցակիցը կլինի Ռուսաստանի ներկայացուցիչ Դավիթ Բաևը։

Ըմբշամարտի ԵԱ. Այսօր պայքարը կսկսի ազատ ոճային մեկ ըմբիշ, ևս մեկը կպայքարի մեդալի համար

Erik — Tue, 20 Apr 2021 05:41:19 +0000

Լեհաստանի մայրաքաղաք Վարշավայում շարունակվում է ըմբշամարտի Եվրոպայի առաջնությունը:

Երեկ պայքարի մեջ մտավ ազատ ոճային 3 հայ ըմբիշ: 65 կգ քաշային կարգում Հայաստանի ներկայացուցիչ Գևորգ Թադևոսյանը 1/8 եզրափակչում 1-2 հաշվով պարտվեց Ալի Ռահիմզադեին: Վերջինս պարտվեց կիսաեզրափակչում ու Թադևոսյանը դուրս մնաց հետագա պայքարից:

70 կգ քաշային կարգում աշխարհի անհատական գավաթի բրոնզե մեդալակիր Արման Անդրեասյանը 2 վստահ հաղթանակ տոնեց ու հասավ կիսաեզրափակիչ: Նախ՝ մաքուր հաղթանակ Արտեմ Աուգայի նկատմամբ, իսկ հետո 10-5 հաշվով հաղթանակ Պատրիկ Կշիշտոֆի նկատմամբ, սակայն կիսաեզրափակչում համառ պայքարում Անդրեասյանը 3-5 հաշվով պարտվեց Իսրայիլ Կասումովին ու այսօր երեկոյան կպայքարի բրոնզե մեդալի համար:

79 կգ քաշային կարգի 1/8 եզրափակչում Արման Ավագյանը մաքուր հաղթանակ տոնեց Էդուարդ Տատարինովի նկատմամբ, սակայն քառորդ եզրափակչում պարտվեց Գուլաևին: Վերջինս հասավ եզրափակիչ ու Ավագյանը սփոփիչ գոտեմարտ կանցկացնի՝ բրոնզե մեդալի համար պայքարելու հնարավորություն ստանալու համար:

Այսօր պայքարի մեջ կմտնի 74 կգ քաշային Հրայր Ալիխանյանը: 1/8 եզրափակչում հայ ըմբիշի մրցակիցը Ռուսաստանի ներկայացուցիչ Ռաժամբեկ Ժամալովն է:

92 կգ քաշային Մարզպետ Գալստյանը չի մասնակցի Եվրոպայի առաջնությանը՝ ծնկի վնասվածքի պատճառով: