Արթուր Դավթյան — Armsport.am

Արթուր Դավթյանը չկարողացավ պաշտպանել Եվրոպայի չեմպիոնի տիտղոսը

Gevorg Martirosyan — Sat, 22 Aug 2026 16:20:01 +0000

Խորվաթիայի մայրաքաղաք Զագրեբում ավարտին է մոտենում սպորտային մարմնամարզության 2026 թվականի Եվրոպայի առաջնությունը: Մրցումային վերջին օրը հենացատկի վարժության եզրափակիչում Հայաստանը ներկայացնում էր աշխարհի և Եվրոպայի բազմակի չեմպիոն, Օլիմպիական խաղերի արծաթե և բրոնզե մեդալակիր Արթուր Դավթյանը։

Հայ մարմնամարզիկը, ով ներկայանում էր որպես Եվրոպայի գործող չեմպիոն, առաջին ցատկի համար ստացավ 14.833 միավոր՝ գրանցելով լավագույն արդյունքը մասնակիցների շրջանում։ Սակայն երկրորդ մոտեցման ժամանակ Դավթյանը սխալվեց և չկարողացավ լիարժեք ավարտել ցատկը՝ վաստակելով 11.900 միավոր (երկու ցատկերի միջին գնահատականը կազմեց 13.366)։ Այս ցուցանիշով նա գրավեց 8-րդ հորիզոնականը և դուրս մնաց մեդալային պայքարից։

Այս մրցաձևում Եվրոպայի չեմպիոն հռչակվեց ուկրաինացի Նազար Չեպուրնին (14.566 միավոր)։ Արծաթե մեդալը նվաճեց Ալեքսեյ Ուսաչևը (14.399), իսկ բրոնզե մեդալակիր դարձավ բրիտանացի Սոլ Սքոթը (14.199)։

Հիշեցնենք, որ Հայաստանի հավաքականը Զագրեբում ընթացող Եվրոպայի առաջնությունում նվաճել է 3 մեդալ. օղակների վարժությունում ոսկե մեդալակիր է դարձել Արթուր Ավետիսյանը, իսկ նժույգթափերի վարժությունում Համլետ Մանուկյանն ու Մամիկոն Խաչատրյանը նվաճել են համապատասխանաբար արծաթե և բրոնզե մեդալներ։

Սպորտային մարմնամարզության ԵԱ. Համլետ Մանուկյանը՝ փոխչեմպիոն, Մամիկոն Խաչատրյանը՝ բրոնզե մեդալակիր

Suren Sahakyan — Fri, 21 Aug 2026 18:19:52 +0000

Սպորտային մարմնամարզության Հայաստանի հավաքականի անդամ, Եվրոպայի գործող չեմպիոն Համլետ Մանուկյանն արծաթե մեդալ է նվաճել Խորվաթիայի մայրաքաղաք Զագրեբում ընթացող Եվրոպայի երիտասարդների և մեծահասակների առաջնության նժույգ թափեր վարժությունում։ Այս մասին հայտնում է ԿԳՄՍՆ մամուլի ծառայությունը։

19-ամյա մարմնամարզիկը եզրափակիչում հավաքել է 15․000 միավոր։ Այս վարժությունում Հայաստանի մյուս ներկայացուցիչ աշխարհի փոխչեմպիոն Մամիկոն Խաչատրյանը 14․900 միավորով դարձել է բրոնզե մեդալակիր։

Մեծահասակաների պայքարում առանձին գործիքների որակավորման փուլի արգելքը հաղթահարել են նաև Օլիմպիական խաղերի արծաթե և բրոնզե մեդալակիր, աշխարհի ու Եվրոպայի չեմպիոն Արթուր Դավթյանը (հենացատկ), աշխարհի գավաթակիր Արթուր Ավետիսյանը (օղակներ), Վահագն Դավթյանը (օղակներ)։

Երիտասարդների պայքարում եզրափակիչ է դուրս եկել Արման Ղուկասյանը։

Սպորտային մարմնամարզության ԱԳ․ հայ մարմնամարզիկները ոսկե և բրոնզե մեդալ են նվաճել Օսիյեկում

Suren Sahakyan — Sat, 11 Apr 2026 17:18:06 +0000

Խորվաթիայի Օսիյեկ քաղաքում ընթացող սպորտային մարմնամարզության 2026 թվականի աշխարհի գավաթի խաղարկության վերջին փուլում Հայաստանի սպորտային մարմնամարզության հավաքականի անդամ Համլետ Մանուկյանը ոսկե մեդալ է նվաճել:

Նժույգթափեր վարժության եզրափակիչում Մանուկյանը 14,733 միավոր է վաստակել և զբաղեցրել առաջին տեղը: Այս վարժությունում Հայաստանի մյուս ներկայացուցիչ Մամիկ Խաչատրյանը զբաղեցրել է 6-րդ տեղը:

Հայաստանի մյուս ներկայացուցիչ Արթուր Ավետիսյանը բրոնզե մեդալ է նվաճել օղակների վարժությունում. Եզրափակiչում նա հավաքել է 14.133 միավոր և կանգնել պատվո հարթակի երրորդ աստիճանին:

Վաղը` ապրիլի12-ին աշխարհի գավաթի խաղարկության հենացատկի վարժության եզրափակչում հանդես կգա Օլիմպիական խաղերի արծաթե, բրոնզե մեդալակիր, աշխարհի չեմպիոն, Եվրոպայի եռակի չեմպիոն Արթուր Դավթյանը:

Հիշեցնենք, որ հայ մարմնամարզիկները փայլուն արդյունքներ էին գրանցել նաև Աշխարհի գավաթի նախորդ՝ Կահիրեի փուլում: Այնտեղ ևս Համլետ Մանուկյանը նժույգթափեր վարժությունում նվաճել էր ոսկե մեդալ (14,800 միավոր), իսկ Արթուր Ավետիսյանը օղակների վարժությունում դարձել էր արծաթե մեդալակիր:

Փայլուն մեկնարկ Օսիյեկում. Հայաստանի բոլոր չորս մարմնամարզիկները մեդալների համար կպայքարեն եզրափակիչում

Gevorg Martirosyan — Sat, 11 Apr 2026 11:10:11 +0000

Խորվաթիայի Օսիյեկ քաղաքում ընթացող սպորտային մարմնամարզության 2026 թվականի աշխարհի գավաթի խաղարկության հերթական փուլը խոստումնալից է դասավորվում Հայաստանի հավաքականի համար: Մեր թիմի բոլոր չորս ներկայացուցիչներն էլ վստահորեն հաղթահարել են որակավորման փուլի արգելքն ու նվաճել եզրափակիչի ուղեգրեր:

Հենացատկի վարժությունում հերթական անգամ իր բարձր կարգն է հաստատել Հայաստանի հավաքականի առաջատար Արթուր Դավթյանը։ Նա ցույց է տվել լավագույն արդյունքն ու առաջին հորիզոնականով դուրս եկել եզրափակիչ:

Նժույգ-թափերի վարժությունում մեդալների համար կպայքարեն մեր երկու մարմնամարզիկները՝ Համլետ Մանուկյանն ու Մամիկոն Խաչատրյանը։ Տղաները հաջողությամբ են հանդես եկել որակավորման փուլում և զբաղեցրել են համապատասխանաբար երրորդ և չորրորդ տեղերը:

Օղակների վարժությունում ևս Հայաստանը կունենա իր ներկայացուցիչը. Արթուր Ավետիսյանը գրանցել է երրորդ լավագույն արդյունքն ու ապահովել իր տեղը վճռորոշ փուլում:

Հիշեցնենք, որ այս նույն կազմով հայ մարմնամարզիկները տպավորիչ ելույթներ էին ունեցել նաև Եգիպտոսի մայրաքաղաք Կահիրեում կայացած աշխարհի գավաթի նախորդ փուլում։ Այն ժամանակ Արթուր Դավթյանն ու Համլետ Մանուկյանը հռչակվել էին մրցաշարի հաղթողներ և նվաճել ոսկե մեդալներ, իսկ Արթուր Ավետիսյանը կանգնել էր պատվո հարթակի երկրորդ աստիճանին՝ արժանանալով արծաթե պարգևի: Եզրափակիչներում մեր մարզիկները կփորձեն կրկնել և զարգացնել այս հաջողությունը:

📷 Օլիմպիական հսկաներից մինչև երիտասարդ տաղանդներ. ինչպե՞ս բաշխվեցին տարվա գլխավոր մարզական տիտղոսները

Gevorg Martirosyan — Tue, 07 Apr 2026 06:21:48 +0000

Սպորտի միջազգային օրվա շրջանակում կայացել է «Սպորտի ոլորտում տարվա լավագույնների ընտրություն 2025» մրցույթի հաղթողների պարգևատրման հանդիսավոր արարողությունը։

Միջոցառմանը ներկա են եղել երկրի բարձրագույն ղեկավարությունը՝ ՀՀ վարչապետ Նիկոլ Փաշինյանի գլխավորությամբ, Հանրապետության նախագահ Վահագն Խաչատուրյանը, ԱԺ նախագահ Ալեն Սիմոնյանը, ԿԳՄՍ նախարար Ժաննա Անդրեասյանը, ինչպես նաև մարզաշխարհի ներկայացուցիչներ, ֆեդերացիաների ղեկավարներ և անվանի մարզիկներ։

Նոր մարզադպրոցներ և խոշոր մրցաշարեր Հայաստանում

Մինչ բուն մրցանակաբաշխությունը, վարչապետ Նիկոլ Փաշինյանը շնորհակալություն է հայտնել մարզիկներին միջազգային հարթակներում հայկական սպորտի պատիվը բարձր պահելու համար՝ ընդգծելով սպորտի ոլորտի ինստիտուցիոնալ զարգացման կարևորությունը:

Խոսելով ենթակառուցվածքների բարելավման մասին՝ կառավարության ղեկավարը նշել է, որ այս պահին ընթացքի մեջ են կամ մեկնարկում են մեր օլիմպիական չեմպիոնների և անվանի մարզիկների անվան նոր մարզադպրոցների կառուցման աշխատանքները: Շուտով շահագործման կհանձնվեն Հրանտ Շահինյանի, Ալբերտ Ազարյանի, Արթուր Աբրահամի (Երևանում), Արթուր Ալեքսանյանի և Նազիկ Ավդալյանի (Շիրակի մարզում), Վիկ Դարչինյանի, Յուրի և Ստեփան Սարգսյանների (Լոռիում), Ռոման և Մալխաս Ամոյանների (Արագածոտնում) անվան մարզօջախները։ Բացի այդ, նախատեսվում է ստադիոնների կառուցում Երևանում, Իջևանում, Վանաձորում և Ակադեմիական քաղաքում։

Հատուկ ուշադրություն է դարձվել ֆուտզալի ազգային հավաքականի պատմական նվաճումներին, որոնք ամրագրելու նպատակով առաջիկայում կկառուցվի հավաքականի անվան հատուկ մարզադպրոց։

Անդրադառնալով սպասվող խոշոր իրադարձություններին՝ հայտարարվել է, որ առաջիկայում Հայաստանը կհյուրընկալի Ֆրանկոֆոնիայի խաղերը, ինչպես նաև Մարմնամարզության Եվրոպայի և Ծանրամարտի աշխարհի առաջնությունները:

Ովքե՞ր են 2025-ի լավագույնները

Միջոցառման կուլմինացիան տարվա լավագույնների պարգևատրումն էր։ 11 անվանակարգերում հաղթող ճանաչվածներն արժանացել են 6 միլիոն 250 հազարական դրամ դրամական պարգևի և հատուկ հուշանվերների, որոնք նրանց հանձնել է վարչապետը։

2025 թվականի մրցանակակիրներն են՝

Լավագույն մարզիկներ՝ Վարազդատ Լալայան (ծանրամարտ), Արթուր Դավթյան (սպորտային մարմնամարզություն), Մալխաս Ամոյան (հունահռոմեական ըմբշամարտ)
Լավագույն կին մարզիկ՝ Ալեքսանդրա Գրիգորյան (ծանրամարտ)
Հաշմանդամություն ունեցող լավագույն մարզիկ՝ Սարգիս Սարգսյան (շախմատ)
Լավագույն թիմ՝ Հայաստանի ֆուտզալի ազգային հավաքական
Լավագույն երիտասարդ մարզիկ՝ Գասպար Տերտերյան (հունահռոմեական ըմբշամարտ)
Վերադարձ մեծ սպորտ և/կամ հայտնություն՝ Սուրեն Հարությունյան (կարատե)
Հայաստանի Հանրապետությունը լավագույնս հանրահռչակած մարզիկ՝ Համլետ Մանուկյան (սպորտային մարմնամարզություն)
Լավագույն մարզիչ՝ Փաշիկ Ալավերդյան (ծանրամարտ)
Հանդիսատեսի համակրանք (առցանց քվեարկությամբ)՝ Սուրեն Հարությունյան (կարատե)

Հիշեցնենք, որ «Սպորտի ոլորտում տարվա լավագույնների ընտրություն» մրցույթի նպատակն է խրախուսել տարվա ընթացքում բացառիկ նվաճումներ գրանցած և Հայաստանի հեղինակությունը միջազգային ասպարեզում բարձրացրած մարզիկներին ու մարզիչներին:

🎥 Արթուր Դավթյանը՝ Աշխարհի գավաթի խաղարկության ոսկե մեդալակիր

Gevorg Martirosyan — Mon, 06 Apr 2026 16:31:01 +0000

Եգիպտոսի մայրաքաղաք Կահիրեում ընթացող սպորտային մարմնամարզության Աշխարհի գավաթի խաղարկության չորրորդ փուլը հաղթական է ստացվել Հայաստանի ազգային հավաքականի համար:

Օլիմպիական խաղերի արծաթե և բրոնզե մեդալակիր, աշխարհի ու Եվրոպայի եռակի չեմպիոն Արթուր Դավթյանը հերթական անգամ ապացուցել է իր բարձր կարգը՝ նվաճելով մրցաշարի ոսկե մեդալը։

Հենացատկի վարժության եզրափակիչում հայ մարմնամարզիկը ցուցադրել է անթերի ելույթ՝ վաստակելով 14.666 միավոր և զբաղեցնելով պատվո հարթակի առաջին աստիճանը։ Նա վստահորեն շրջանցել է երկրորդ տեղը զբաղեցրած Ղազախստանի ներկայացուցիչ Ասան Սալիմովին (14.083 միավոր) և լավագույն եռյակը եզրափակած չեխ Յոնաս Դանեկին (14.016 միավոր)։

Կահիրեի մրցահարթակում տպավորիչ արդյունքներ են գրանցել նաև մեր ընտրանու մյուս անդամները։ Ավելի վաղ նժույգ-թափեր վարժությունում հավասարը չէր ունեցել Համլետ Մանուկյանը, ով վաստակելով 14.800 միավոր՝ հռչակվել էր Աշխարհի գավաթի այս փուլի հաղթող։

Օղակների վարժությունում հաջողության էր հասել Արթուր Ավետիսյանը՝ իր ակտիվում գրանցելով 14.300 միավոր և արժանանալով արծաթե պարգևի։

Ոսկե, արծաթե մեդալներ․ Հայ մարմնամարզիկների տպավորիչ արդյունքները Կոտբուսում

Gevorg Martirosyan — Sun, 22 Feb 2026 06:35:40 +0000

Գերմանիայի Կոտբուս քաղաքում ընթացող սպորտային մարմնամարզության Աշխարհի գավաթի խաղարկության առաջին փուլում Հայաստանի հավաքականը շարունակում է ուրախացնել մեդալներով:

Հակոբ Սերոբյանի գլխավորած թիմից փայլուն ելույթ է ունեցել Արթուր Ավետիսյանը։ Օղակների վարժության եզրափակիչում հայ մարմնամարզիկը վաստակել է 14․366 միավոր՝ կանգնելով պատվո հարթակի ամենաբարձր աստիճանին և հռչակվելով Աշխարհի գավաթի խաղարկության այս փուլի հաղթող։ Նույն վարժությունում Հայաստանի մյուս ներկայացուցիչ Արթուր Դավթյանը 13․766 միավորով զբաղեցրել է 5-րդ հորիզոնականը։

Հայ մարզիկները մեդալային հաջողություն են գրանցել նաև նժույգ թափեր վարժությունում: Մամիկոն Խաչատրյանը, գերազանց ելույթ ունենալով և վաստակելով 14․966 միավոր, դարձել է մրցաշարի արծաթե մեդալակիր: Նույն մրցաձևում հանդես եկող Համլետ Մանուկյանն էլ իր ակտիվում գրանցած 14․166 միավորով մրցաշարն ավարտել է 7-րդ տեղում։

Հայտնի են Հայաստանի տարվա լավագույն մարզիկները․ ԿԳՄՍՆ-ն ամփոփել է մրցույթի արդյունքները

Gevorg Martirosyan — Fri, 26 Dec 2025 11:15:21 +0000

ՀՀ Կրթության, գիտության, մշակույթի և սպորտի նախարարությունը հրապարակել է «Սպորտի ոլորտում տարվա լավագույնների ընտրություն» մրցույթի արդյունքները։

Հաղթողների ցանկը ձևավորվել է մարզական ոլորտում հավատարմագրված 15 լրագրողների քվեարկության հիման վրա։
Ըստ քվեարկության արդյունքների՝ տարվա լավագույնները բաշխվել են հետևյալ անվանակարգերում․

Տարվա լավագույն մարզիկների եռյակ՝
Վարազդատ Լալայան (ծանրամարտ)
Մալխաս Ամոյան (հունահռոմեական ըմբշամարտ)
Արթուր Դավթյան (սպորտային մարմնամարզություն)

Լավագույն կին մարզիկ՝ Ալեքսանդրա Գրիգորյան (ծանրամարտ)

Լավագույն երիտասարդ մարզիկ՝ Գասպար Տերտերյան (ըմբշամարտ)

Տարվա հայտնություն՝ Սուրեն Հարությունյան (կարատե)

Հաշմանդամություն ունեցող լավագույն մարզիկ՝ Սարգիս Սարգսյան (շախմատ)

Լավագույն մարզիչ՝ Փաշիկ Ալավերդյան (ծանրամարտի հավաքական)

Տարվա լավագույն թիմ՝ Հայաստանի ֆուտզալի ազգային հավաքական

ՀՀ-ն լավագույնս հանրահռչակած մարզիկ՝ Համլետ Մանուկյան (մարմնամարզություն)

Սպորտային մարմնամարզության ԱԱ․ Արթուր Դավթյանը՝ աշխարհի փոխչեմպիոն

Suren Sahakyan — Sat, 25 Oct 2025 09:05:53 +0000

Ինդոնեզիայի մայրաքաղաք Ջակարտայում ավարտվող սպորտային մարմնամարզության աշխարհի առաջնությունում Հայաստանը ներկայացնող Արթուր Դավթյանը արծաթե մեդալ է նվաճել։

Օլիմպիական խաղերի արծաթե և բրոնզե մեդալակիր, աշխարհի չեմպիոն, Եվրոպայի եռակի չեմպիոն Արթուր Դավթյանը հենացատկի վարժության եզրափակիչում վաստակեց 14.883 միավոր՝ նվաճելով աշխարհի փոխչեմպիոնի կոչումը։

Դավթյանը զիջեց միայն օլիմպիական գործող չեմպիոն, ֆիլիպինցի Կառլոս Յուլոյին, որը վաստակած 14.886 միավորով դարձավ աշխարհի չեմպիոն։

Սպորտային մարմնամարզության ԱԱ․ երեք հայ մարմնամարզիկ եզրափակիչ փուլում են

Suren Sahakyan — Mon, 20 Oct 2025 09:15:50 +0000

Ինդոնեզիայի մայրաքաղաք Ջակարտայում ընթացող սպորտային մարմնամարզության աշխարհի առաջնությունում Հայաստանի չորս մարմնամարզիկներ նվաճել են եզրափակիչ փուլի ուղեգիր։

Հենացատկում օլիմպիական խաղերի արծաթե և բրոնզե մեդալակիր, աշխարհի չեմպիոն, Եվրոպայի եռակի չեմպիոն Արթուր Դավթյանը երկու ցատկերի արդյունքում վաստակել է 14.566 միավոր և երկրորդ տեղով դուրս եկել եզրափակիչ՝ զիջելով միայն օլիմպիական գործող չեմպիոն ֆիլիպինցի Կառլոս Յուլոյին։

Նժույգ թափերում Եվրոպայի չեմպիոն Համլետ Մանուկյանը վաստակել է 14.500 միավոր, իսկ Եվրոպայի փոխչեմպիոն Մամիկոն Խաչատրյանը՝ 14.400 միավոր՝ զբաղեցնելով համապատասխանաբար 4-րդ և 6-րդ տեղերը և դուրս գալով եզրափակիչ փուլ։

Նշենք, որ հայ մարմնամարզիկներից օղակների վարժության եզրափակիչ փուլի ուղեգիր չեն կարողացել նվաճել Վահագն Դավթյանն ու Արթուր Ավետիսյանը։ Եզրափակիչները կկայանան հոկտեմբերի 24-ին և 25-ին։