Հայտնի են Հայաստանի գործող չեմպիոն «Արարատ-Արմենիայի» հավանական մրցակիցները Չեմպիոնների լիգայի խաղարկության որակավորման երրորդ փուլում:

​Երևանյան թիմը որակավորման երկրորդ փուլում իռլանդական «Շեմրոկ Ռովերսի» արգելքը հաղթահարելու դեպքում կմրցի «Էգնատիա» (Ալբանիա) — «Ցելյե» (Սլովենիա) զույգի հաղթողի հետ:

​Չեմպիոնների լիգայի որակավորման երկրորդ փուլում անհաջողության հասնելու դեպքում Մանուլ Տուլիպայի գլխավորած թիմը կխաղա Եվրոպա լիգայի որակավորման երրորդ փուլում, որտեղ «Արարատ-Արմենիայի» մրցակիցը կլինի 2-րդ խմբի զույգերից մեկի պարտվողը:

​Հիշեցնենք, որ Չեմպիոնների լիգայի որակավորման երկրորդ փուլի շրջանակում հայկական ակումբն առաջին հանդիպումը կանցկացնի հուլիսի 21-ին, իսկ պատասխան խաղը նախատեսված է մեկ շաբաթ անց՝ հուլիսի 28-ին:

Չեմպիոնների լիգայի որակավորման առաջին փուլի պատասխան խաղում Հայաստանի գործող չեմպիոն «Արարատ-Արմենիան» «Սկոնտո» մարզադաշտում հյուրընկալվելիս դրամատիկ պայքարում 2-3 հաշվով զիջեց «Ռիգային»։

Դիմակայության մեկնարկը բարեհաջող էր լատվիական ակումբի համար. առաջին խաղակեսում տանտերերը երկու գնդակի առավելություն ստացան։ 14-րդ րոպեին հաշիվը բացեց Յագո Սիկեյրան, իսկ 23-րդ րոպեին Ահմեդ Անկրան կրկնապատկեց այն։ Երկրորդ խաղակեսում հայկական թիմը կարողացավ վերականգնել հավասարությունը. 46-րդ րոպեին Ժիրայր Շաղոյանը կրճատեց հաշվի տարբերությունը, իսկ 63-րդ րոպեին Սանդրո Լիման խփեց երևանյան թիմի երկրորդ գնդակը։ Այդուհանդերձ, հանդիպման հենց վերջնամասում՝ 90+4-րդ րոպեին, Ռամիրեսն անվրեպ իրացրեց 11-մետրանոց հարվածը և հաղթանակ պարգևեց «Ռիգային»։

Հիշեցնենք, որ առաջին խաղում հայկական ակումբը հաղթել էր 2-0 հաշվով, ուստի երկու հանդիպումների հանրագումարում գրանցվեց 4-3 արդյունքը՝ հօգուտ հայկական թիմի։ Սա պատմական իրադարձություն է ակումբի համար. «Արարատ-Արմենիան» իր պատմության մեջ առաջին անգամ հաղթահարեց Չեմպիոնների լիգայի որակավորման փուլը, քանի որ մինչ այս երբեք չէր կարողացել նման արդյունք գրանցել այս մրցաշարում։

Որակավորման երկրորդ փուլում «Արարատ-Արմենիան» որպես մրցակից կունենա «Ֆլորիանա» (Մալթա) – «Շեմրոկ Ռովերս» (Իռլանդիա) զույգի հաղթողին

Գոլերը՝ ԱՅՍՏԵՂ

Լատվիայի չեմպիոն «Ռիգան» հինգ տարվա դադարից հետո եվրագավաթային որակավորման փուլ վերադարձավ Հայաստանում կրած 0:2 հաշվով պարտությամբ՝ զիջելով «Արարատ-Արմենիային»։ Այսօր կայանալիք պատասխան խաղում լատվիական թիմին կօգնի ավագ և պաշտպանության առաջատար Անտոնի Չեռնոմորդին, որը վնասվածքի պատճառով բաց էր թողել առաջին հանդիպումը։ 

«Մենք գիտենք, թե ինչ ենք ուզում այս խաղից, և կանենք հնարավոր ամեն ինչ՝ մեր ճանապարհը շարունակելու համար։ Հոգեբանորեն, ֆիզիկապես և տակտիկապես մենք լիովին պատրաստ ենք։ Վերլուծել ենք առաջին հանդիպումը, գիտենք՝ ինչն է պետք բարելավել և որ սխալներն ուղղել։ Մենք 100 տոկոսով պատրաստ ենք և վստահ ենք, որ ամեն ինչ մեր ձեռքերում է», — նշել է 29-ամյա կենտրոնական պաշտպանը։

Անդրադառնալով Երևանում կայացած հանդիպմանը՝ Չեռնոմորդին ընդգծել է, որ իրենք չեն օգտագործել իրենց պահերը.

«Արդեն առաջին խաղակեսում հաշիվը կարող էր 1:0 լինել մեր օգտին, և այդ ժամանակ խաղն ամբողջությամբ այլ սցենարով կընթանար։ Երկու սխալ թույլ տվեցինք, և մրցակիցը երկու գոլ խփեց հենց մեր սխալների արդյունքում։ Առաջին գնդակն ընդունեցինք ստանդարտից հետո, որտեղ սովորաբար ուժեղ ենք, բայց այս անգամ մինչև վերջ չխաղացինք։ Իսկ երկրորդ սխալի պես բան պատահում է տասը տարին մեկ անգամ։ Բայց դա արդեն անցյալում է, վաղը նոր էջ ենք բացելու»։

Խոսելով շանսերի մասին՝ «Ռիգայի» ավագը համեմատականներ է տարել նախորդ մրցաշրջանի հետ, երբ թիմը կրկին 0:2 հաշվով պարտվել էր Պրահայի «Սպարտային».

«Նման իրավիճակ էր նաև նախորդ տարի, բայց ես չեմ կարող համեմատել այս թիմերը։ Ամենայն հարգանքով «Արարատ-Արմենիայի» հանդեպ՝ հայերը «Սպարտան» չեն։ Մենք հավատում ենք մեր ուժերին. 0:2-ը դեռ 0:4 կամ 0:5 չէ։ Մենք քամբեքների փորձ ունենք։ Ամեն ինչ կորոշվի խաղադաշտում»։

Ինչպես արդեն տեղեկացրել էինք, ՈւԵՖԱ-ի Չեմպիոնների լիգայի որակավորման առաջին փուլի շրջանակում Հայաստանի գործող չեմպիոն «Արարատ-Արմենիան» Աբովյանում վստահ հաղթանակ էր տարել Լատվիայի չեմպիոն «Ռիգայի» նկատմամբ՝ առավելության հասնելով 2:0 հաշվով:

Հայկական ակումբի եվրագավաթային այս կարևոր հաջողությունն աննկատ չի մնացել ներքին առաջնությունում մրցակիցների կողմից։ Մասնավորապես, «Նոա» ֆուտբոլային ակումբը դրսևորել է մարզական համերաշխություն և շնորհավորել գործընկերներին։

«Արարատ-Արմենիայի» հետխաղային հաղթական հրապարակման մեկնաբանություններում «Նոայի» պաշտոնական էջը թողել է հետևյալ գրառումը.

«🫶🇦🇲 Շնորհավորում ենք։ Հաջողություն ենք մաղթում առաջիկա խաղերում»։

Հիշեցնենք, որ թիմերի միջև այս դիմակայության պատասխան հանդիպումը կկայանա հուլիսի 14-ին՝ Լատվիայի մայրաքաղաք Ռիգայում:

Հայաստանի գործող չեմպիոն «Արարատ-Արմենիան» հաղթանակով մեկնարկեց ՈւԵՖԱ-ի Չեմպիոնների լիգայի որակավորման առաջին փուլում։ Երևանյան թիմը տնային հանդիպումում ուժերը չափեց Լատվիայի չեմպիոն «Ռիգայի» հետ և վստահ առավելության հասավ 2:0 հաշվով։

Աբովյանի Վահագն Թումասյանի անվան մարզադաշտում կայացած խաղում հաշիվը 63-րդ րոպեին բացեց պորտուգալացի մասնագետ Մանուել Տուլիպայի գլխավորած թիմի պորտուգալացի պաշտպան Հուգո Օլիվեյրան։ Հիմնական ժամանակի ավարտից քիչ առաջ՝ 86-րդ րոպեին, բրազիլացի հարձակվող Կառլոս Ֆրանսան կրկնապատկեց դաշտի տերերի առավելությունը՝ ձևակերպելով հանդիպման վերջնահաշիվը։

Նշենք, որ հյուրերը հանդիպման վերջնամասն անցկացրին տասը հոգով. 72-րդ րոպեին լատվիական թիմի դարպասապահ Ֆրենկս Դավիդս Օրոլսը սեփական տուգանային հրապարակից դուրս ձեռքով խաղալու և հակառակորդի հնարավոր գոլը կանխելու համար արժանացավ ուղիղ կարմիր քարտի՝ հեռացվելով խաղադաշտից։

Թիմերի միջև պատասխան հանդիպումը կկայանա հուլիսի 14-ին՝ Ռիգայում։

Չեմպիոնների լիգայի 2026/27 թթ. մրցաշրջանի որակավորման առաջին փուլում Հայաստանի գործող չեմպիոն «Արարատ-Արմենիան» պայքարը կսկսի Լատվիայի չեմպիոն «Ռիգայի» դեմ դիմակայությամբ։

Երևանյան ակումբը ներկայացրել է թիմի հայտացուցակը առաջիկա երկու հանդիպումների համար։

Թիմերի միջև առաջին հանդիպումը կկայանա հուլիսի 7-ին՝ Աբովյանի Վահագն Թումասյանի անվան մարզադաշտում, և կմեկնարկի 20:00-ին։

Հայաստանի չեմպիոն «Արարատ-Արմենիան» շարունակում է համալրել կազմը նոր մրցաշրջանին ընդառաջ:

Երևանյան ակումբը հայտարարել է նոր տրանսֆերի մասին. թիմին է միացել 29-ամյա ֆրանսիացի կիսապաշտպան Մաքսանս Կարլիեն։ Այս մասին տեղեկացնում է ակումբի մամուլի ծառայությունը։

Ֆրանսիացի ֆուտբոլիստի նախորդ ակումբը եղել է ֆրանսիական հայտնի «Նանսին», որը հանդես է գալիս երկրի մեծությամբ երկրորդ ուժեղագույն դիվիզիոնում՝ Լիգա 2-ում։

«Արարատ-Արմենիայի» մամուլի ծառայությունը ողջունել է նորեկին՝ հաջողություն մաղթելով ակումբի գույներով հանդես գալիս.

«Մաքս, մաղթում ենք հաջողություններ մեր ակումբի գույներով»,- ասված է սև-սպիտակների տարածած պաշտոնական հաղորդագրության մեջ:

Երևանի «Արարատ-Արմենիան» նոր համալրում ունի դարպասապահի դիրքում: Թիմին է միացել 28-ամյա բրազիլացի Ժոաու Բրավիմը: Այս մասին հայտնում է ակումբի մամուլի ծառայությունը։

Բրազիլացի դարպասապահի նախորդ ակումբը եղել է պորտուգալական «Ունիոն Լեյրիան», որը հանդես է գալիս Պորտուգալիայի երկրորդ լիգայում:

«Բարի գալուստ մեր ընտանիք: Միասին մենք կարող ենք»,- ասված է երևանյան ակումբի տարածած պաշտոնական հաղորդագրության մեջ։

Փոփոխություն է տեղի ունեցել Չեմպիոնների լիգայի խաղարկության որակավորման առաջին փուլի «Արարատ-Արմենիա» — «Ռիգա» (Լատվիա) դիմակայության տնային խաղի անցկացման վայրում:

Ինչպես տեղեկացնում է հայկական ակումբի մամուլի ծառայությունը, հուլիսի 7-ին կայանալիք հանդիպումը տեղի կունենա Աբովյանի Վահագն Թումասյանի անվան մարզադաշտում: Խաղի սկիզբը նախատեսված է ժամը 20:00-ին:

Նշվում է, որ մարզադաշտի ընտրությունը պայմանավորված է Վազգեն Սարգսյանի անվան «Հանրապետական» մարզադաշտում իրականացվող բարեկարգման աշխատանքներով: Եվրագավաթային մրցաշրջանի հաջորդ հանդիպումից սկսած երևանյան թիմն իր տնային խաղերը կրկին կանցկացնի «Հանրապետական» մարզադաշտում:

Հիշեցնենք, որ լատվիական ակումբի արգելքը հաղթահարելու դեպքում որակավորման երկրորդ փուլում «Արարատ-Արմենիան» որպես մրցակից կստանա «Ֆլորիանա» (Մալթա) — «Շեմրոկ Ռովերս» (Իռլանդիա) զույգի հաղթողին:

Իսկ որակավորման առաջին փուլը չհաղթահարելու դեպքում հայկական թիմը պայքարը կշարունակի Կոնֆերենցիաների լիգայում, որի որակավորման երկրորդ փուլում նրա մրցակիցը կլինի «Վարդար» (Հյուսիսային Մակեդոնիա) — «Կուոպս» (Ֆինլանդիա) զույգի պարտվողը: «Արարատ-Արմենիա» – «Ռիգա» դիմակայության պատասխան հանդիպումը կկայանա հուլիսի 14-ին:

Հայտնի են Հայաստանի չեմպիոն «Արարատ-Արմենիայի» հավանական մրցակիցները Չեմպիոնների լիգայի խաղարկության որակավորման երկրորդ փուլում:

​Երևանյան թիմը որակավորման առաջին փուլում կմրցի Լատվիայի չեմպիոն «Ռիգայի» հետ:

​Այդ դիմակայության հանրագումարում հաղթանակի հասնելու դեպքում որակավորման երկրորդ փուլում «Արարատ-Արմենիան» որպես մրցակից կստանա «Ֆլորիանա» (Մալթա) / «Շեմրոկ Ռովերս» (Իռլանդիա) զույգի հաղթողին:

​​«Արարատ-Արմենիա» – «Ռիգա» դիմակայության առաջին խաղը կկայանա հուլիսի 7-ին Երևանում, իսկ պատասխան հանդիպումը՝ հուլիսի 14-ին:

​Որակավորման առաջին փուլը չհաղթահարելու դեպքում «Արարատ-Արմենիան» պայքարը կշարունակի Կոնֆերենցիաների լիգայում, որի որակավորման երկրորդ փուլում որպես մրցակից կունենա «Վարդար» (Հյուսիսային Մակեդոնիա) / «Կուպս» (Ֆինլանդիա) զույգի պարտվողին: