Հայաստանի ազգային հավաքականի երկրպագուների «Առաջին հայկական ճակատ» (FAF) շարժման անդամները ՖԱՖ-ի տանն ամփոփել են 2024 թվականը. FAF համակրանք մրցանակին արժանացել է Հայաստանի ազգային հավաքականի և արգենտինական «Բելգրանոյի» ֆուտբոլիստ Լուկաս Սելարայանը:

Տարվա ամփոփիչ միջոցառմանը մասնակցել են հայկական ֆուտբոլի մի շարք ներկայացուցիչներ՝ «Փյունիկի» գլխավոր մարզիչ Եղիշե Մելիքյանը, երևանյան թիմի և Հայաստանի հավաքականի ֆուտբոլիստ Դավիդ Դավիդյանը, «Նոայի» և Հայաստանի հավաքականի պաշտպան Հովհաննես Համբարձումյանը, «Ուրարտուի» և Հայաստանի հավաքականի կիսապաշտպան Ժիրայր Մարգարյանը, «Վեստ Արմենիայի» խաղացող Արթուր Քարտաշյանը, ներկայացուցիչներ «Արարատ», «Շիրակ», «Ուրարտու» ֆուտբոլային ակումբներից, և այլք:

ՖԱՖ շարժման համահիմնադիր Սերգեյ Ջանջոյանի խոսքով՝ FAF-համակրանք մրցանակը շնորհվում է արդեն 16-րդ անգամ:

«Առաջին անգամ մրցանակին արժանացել է Հենրիխ Մխիթարյանը , ապա այս մրցանակը ստացել են Յուրա Մովսիսյանը, Ռոման Բերեզովսկին, Մարկոս Պիզելին, Ռոբերտ Արզումանյանն ու մի շարք այլ խաղացողներ: Այս մրցանակը մենք շնորհում ենք ոչ թե լավագույնին, այլ այն խաղացողին, որն ամբողջ տարվա մեջ արժանացել է երկրպագուների համակրանքին՝ իր որևէ արարքով, թիմային խաղում ունեցած ներդրմամբ, երկրի ու զինանշանի հանդեպ ունեցած հարգանքով: Քվեարկությանը մասնակցել են ՖԱՖ-ի բոլոր անդամները, այդ թվում՝ արտերկրից: Նախորդ տարում Հայաստանի հավաքականի երկրպագուները երջանկության շատ պահեր չեն ապրել, բայց Լուկասն անկասկած եղել է մեր թիմի լուսավոր կետերից մեկը»,- ասել է Սերգեյ Ջանջոյանը:

Անդրադառնալով նախորդ տարվա իրադարձություններին՝ ՖԱՖ շարժման համահիմնադիրն անդրադարձել է նաև ՀՖՖ ղեկավար կազմի հրաժարակին ուղղված երկրպագուների ակցիաներին. «Մի սխալ պնդում կա, որ այս ամենը մենք սկսել ենք հավաքականի վատ ելույթների  պատճառով: Ո՛չ: Վատ ելույթները կապ չունեն: Այս ամենը սկսվել է մի պատճառով՝ այս ֆեդերացիայի հետ մենք սկսել ենք մի ճանապարհ, բայց տարիներ անց գտնվում ենք այլ ճանապարհի վրա և այլ հարթության մեջ: Ֆեդերացիայի նախագահի հրաժարականին հասնելը մեր գործողություններում մի փոքր կետ է: Մեր նպատակը հայկական ֆուտբոլի առողջացումն է: Կարծում եմ՝ շատ բարդ տարի է լինելու, շատ բարդ ճանապարհ է մեզ սպասվում, բայց մենք գնալու ենք մինչև վերջ»:

Այս տարի առաջին անգամ FAF-ը նոր անվանակարգ է սահմանել` «Տարվա ամենաֆուտբոլային լրագրող», որը կկրի երջանկահիշատակ Դավիթ Մարտիրոսյանի անունը: Մրցանակին արժանացել է Ռոբերտ Մարկոսյանը: Այն հանձնել է Դավիթի հայրը՝ «Ֆուտբոլ+» շաբաթաթերթի գլխավոր խմբագիր Աշոտ Մարտիրոսյանը:

Միջոցառման ընթացքում մրցանակներ են հանձնվել նաև տարվա ընթացքում աչքի ընկած շարժման լավագույն և ամենաակտիվ անդամներին, ֆուտզալի թիմի լավագույն խաղացողին: Առանձին մրցանակ է սահմանվել նաև հայազգի ամենախոստումնալից խաղացողի համար: «Լավագույն երիտասարդ ֆուտբոլիստ» մրցանակին արժանացել է «Նոայի» և Հայաստանի հավաքականի պաշտպան Սերգեյ Մուրադյանը:

Հայաստանի ազգային հավաքականի երկրպագուների First Armenian Front և Red Eagles շարժումները համատեղ հայտարարությամբ են հանդես եկել:

«Վերջին օրերի ընթացքում մի քանի անգամ փորձել ենք ըստ գործող ընթացակարգի, պայմանավորվածության ձեռք բերել Հայաստանի ազգային հավաքականի առաջիկա` Հայաստան — Ֆարերյան Կղզիներ հանդիպման տոմսերը, սակայն համապատասխան աշխատակիցը մեզ տվել է խուսափողական պատասխաններ և մինչ այժմ չունենք ինֆորմացիա այն մասին, թե ինչպես Հայաստանի ազգային հավաքականի երկու ֆան շարժումները կարող են ձեռք բերել այն տրիբունաների սեկցիաների տոմսերը, որտեղ մշտապես տեղակայվում են։

Տեղեկացնում ենք, որ այս պահին տոմսերի գնման օնլայն հարթակում թե՛ FAF-ի, թե՛ Red Eagles-ի սեկցիաների տոմսերը ամրագրված կարգավիճակ ունեն և հասանելի չեն վաճառքի համար։

Հորդորում ենք ՀՖՖ ղեկավարությանը զերծ մնալ հին բարքերը հիշեցնող գործելակերպից, մենք մարզադաշտից ազգային հավաքականին աջակցել ենք ձեր պաշտոնավարումից շատ ավելի վաղ ու աջակցելու ենք ձեզանից հետո։

Անկախ խոչնդոտներից FAF-ը և Red Eagles-ը լինելու են իրենց մշտական տրիբունաներում և եթե ՀՖՖ-ն որոշում կայացնի ֆան շարժումների սեկցիաների տոմսերը հանել ազատ վաճառքի, հետևանքների ողջ պատասխանատվությունը ընկնելու է ՀՖՖ ղեկավարության ուսերին։ Հանրային կերպով դիմում ենք ՀՖՖ-ին` ակնկալում վաղը ժամը մինչև 12:00, հստակ պատասխան ստանալ մեր ավանդական սեկցիայի տոմսերի ձեռք բերման մասին»,- ասվում է երկրպագուների տարածած հաղորդագրության մեջ:

Հոկտեմբերի 13-ին Հայաստան — Հս. Մակեդոնիա խաղից առաջ FAF-ը կազմակերպում է երկրպագուների միասնական երթ` Ֆրանսիայի հրապարակից (Արամ Խաչատրյանի արձանի մոտից), որը կավարտվի Հանրապետական մարզադաշտում:

«‎Երթի բոլոր մասնակիցներին խնդրում ենք ներկայանալ սև հագուստով, ունենալ հավաքականի կամ Հայաստանի շարֆեր, դրոշներ: Պիրոանվտանգության նկատառումներից ելնելով երթը նկարահանողներին և լրատվամիջոցների ներկայացուցիչներին խնդրում ենք լինել թմբկահարից 15 մետր հեռավորությամբ»,- ասվում է FAF-ի տարածած հաղորդագրության մեջ:

Երթը կմեկնարկի ժամը 18։00-ին, խաղի սկիզբը` 20։00:

Մարտի 28-ին տեղի կունենա Մունդիալ 2022-ի խմբային փուլի առաջին հանդիպումը «Հանրապետական» մարզադաշտում։ Հայաստանի ազգային հավաքականի երկրպագուների «Առաջին հայկական ճակատ» ՖԱՖ շարժման անդամները միասնական երթ են կազմակերպում դեպի Վ. Սարգսյանի անվան մարզադաշտ, ինչի մասին հանդես են եկել հայտարարությամբ.

«Շուրջ մեկ ու կես տարվա դադարից հետո հավաքականի երկրպագուները հնարավորություն կունենան աջակցել հավաքականին տրիբունաներից։

Դեպի մարզադաշտ երկրպագուների միասնական երթը տեղի կունենա վաղը Գարեգին Նժդեհի արձանի մոտից ( Վերնիսաժ ):

Հավաքվում ենք մարտի 28-ին՝ ժամը 17։00-ին, Լինում ենք եռագույններով և երկրպագուական շարֆերով։ Դեպի մարզադաշտ երթը կմեկնարկի 18։00-ին:

FAF-ը լինելու է սև շապիկներով մեր տրիբունան արևելյանն է»,- ասվում է FAF-ի տարածած հաղորդագրության մեջ:

Հիշեցնենք՝ J խմբի երկրորդ տուրի Հայաստան-Իսլանդիա հանդիպումը կմեկնարկի ժամը 20:00-ին:

Հայաստանի ազգային հավաքականի երկրպագուների Առաջին հայկական ճակատ (FAF) շարժման անդամներն այսօր հանդիպել են շվեդ հայտնի լրագրող, Արցախի հետ կապված ամենամեծ հետազոտություններից մեկի հեղինակ Ռասմուս Սոլվստեն Քանբաքի հետ:

Նա վերադարձել է Հայաստան ու մեկնելու է Արցախ` պատմելու հետպատերազմյան կյանքի ու մեր հերոսների մասին։

«Ապագա հոդվածի սյունակներից մեկը ՖԱՖի մասին է»,- ասվում է FAF-ի տարածած հաղորդագրության մեջ:

Հայաստանի ֆուտբոլի ազգային հավաքականը մեկնեց Սկոպիե։ Մեր ընտրանին սեպտեմբերի 5-ին կսկսի պայքարը ՈՒԵՖԱ-ի ազգերի լիգայի խաղարկությունում՝ մրցելով Հյուսիսային Մակեդոնիայի ընտրանու դեմ։

Հայաստանի հավաքականին «Զվարթնոց» օդանավակայանում ճանապարհել են «Առաջին հայկական ճակատ» ֆան շարժման անդամները։

Կեսգիշերին Հայաստան է ժամանել ազգային հավաքականի վերջին նորեկը:

Առաջին հայկական ճակատ ֆան շարժման անդամները «Զվարթնոց» օդանավակայանում դիմավորել են Վահանին:

««Դիմավորման օրը»՝ կեսգիշերին, դիմավորեցինք մեր վերջին նորեկին և ամենահեռանկարային ֆուտբոլիստներից Վահան Բիչախչյանին։ Վստահ ենք՝ Վահանը մեզ դեռ շատ է ուրախացնելու»,-գրված է FAF-ի տարածած լուսանկարի նկարագրության մեջ:

Հիշեցնենք, որ այսօր մեր ընտրանին սկսում է մարզական հավաքը:

Հայաստանի ազգային հավաքականի երկրպագուների «Առաջին հայկական ճակատ» (FAF) շարժման անդամները հայտարարությամբ են հանդես եկել՝ երկրում ստեղծված իրավիճակի վերաբերյալ.

Ի աջակցություն Հայաստանի Հանրապետության, բոլոր բուժաշխատողների և մեկս մյուսի, FAF-ը կոչ է անում պատուհաններից ծածանել հայոց եռագույնը՝ ի նշան մեր միասնականության ու հաղթանակի վճռակամության.

«Սիրելի հայրենակիցներ,

Հայաստանի Հանրապետությունը և ամբողջ աշխարհը գտնվում է պատերազմի մեջ:

Այս պատերազմն, ի տարբերություն բոլոր եղած պատերազմների ոչ թե խրամատում ու սահմաններին է, այլ մեր բակերում, փողոցներում ու պատուհանի տակ: Այս պատերազմի մեջ, կամա թե ակամա, ներքաշված ենք բոլորս ու հիմա հաղթանակը կախված է յուրաքանչյուրիս պատասխանատվությունից:

Ի աջակցություն Հայաստանի Հանրապետության, բոլոր բուժաշխատողների և մեկս մյուսի, եկեք պատուհաններից ծածանենք հայոց եռագույնը ի նշան մեր միասնականության ու հաղթանակի վճռակամության:

Եռագույն չունենալու դեպքում կարելի է պատրաստել նաև տանը, փոքրերը կարող են եռագույն նկարել թղթի վրա, ամրեցնել պատուհաններին»,- ասվում է FAF-ի տարածած հաղորդագրության մեջ:

Հիշեցնենք՝ Հայաստանում մարտի 27-ի՝ ժամը 10:00-ի դրությամբ, հաստատվել է կորոնավիրուսով վարակման ևս 39 դեպք, հաստատված դեպքերի ընդհանուրը թիվը 329 է:

Բուժվածների թիվը 18 է, փաստացի բուժվողներինը՝ 311, բացասական թեստերը՝ 1625, մահվան ելքերը՝  1:

Հայաստանի ազգային հավաքականի և ղազախական «Կայրաթի» ֆուտբոլիստ Կամո Հովհաննիսյանն Instagram-ում գրառում է կատարել` շնորհակալություն հայտնելով FAF-ականներին 2019 թվականի «FAF-համակրանք» մրցանակին իրեն արժանացնելու համար.

«Շնորհակալ եմ ձեր սիրո և վստահության համար, ինձ համար դա շատ կարևոր և պատվաբեր է:

Միշտ պատրատ եմ անմնացորդ նվիրվել խաղին և ուրախացնել մեր երկրպագուներին»,- գրել է ֆուտբոլիստը:

View this post on Instagram

Շնորհակալ եմ ձեր սիրո և վստահության համար, ինձ համար դա շատ կարևոր և պատվաբեր է: Միշտ պատրատ եմ անմնացորդ նվիրվել խաղին և ուրախացնել մեր երկրպագուներին: Thank you for your love and trust, it is very important for me Always ready to give myself for a good game and joy to the fans спасибо за вашу любовь и доверие, мне это очень важно. Всегда готов полностью отдаваться игре и дарить радость фанатом#fafultras

A post shared by Kamo Hovhannisyan (@hovhannisyan13) on Jan 21, 2020 at 9:48am PST