Ռուսաստանի հավաքականի, Սանկտ Պետերբուրգի «Զենիթի» և Լոնդոնի «Արսենալի» նախկին ֆուտբոլիստ, այժմ «Զենիթի» սպորտային զարգացման գծով գլխավոր տնօրենի տեղակալ Անդրեյ Արշավինը խոսել է «Կրասնոդարի» ավագ և Հայաստանի ազգային հավաքականի կիսապաշտպան Էդուարդ Սպերցյանի՝ եվրոպական առաջնություն տեղափոխվելու հեռանկարների մասին։

Ավելի վաղ բազմիցս հաղորդվում էր հայ կիսապաշտպանի նկատմամբ անգլիական «Սաութհեմփթոնի» հետաքրքրության մասին։

«Ռուսաստանում նա արդեն ամեն ինչ շահել է, ամեն ինչ ապացուցել է։ Ինձ թվում է, որ Սպերցյանը պետք է իրեն փորձի Եվրոպայում։

Ենթադրենք՝ «Սաութհեմփթոնը» նորից գալիս է Սպերցյանի հետևից. արժե՞ արդյոք նրան տեղափոխվել։ Ես կգնայի։ Առավել ևս, եղել են ֆուտբոլիստներ, ովքեր խաղացել են այդ թիմում, իսկ հետո տեղափոխվել ավելի ուժեղ ակումբներ»,- Արշավինի խոսքերն է մեջբերում «Матч ТВ»-ն։

Նշենք, որ ավելի վաղ 25-ամյա Սպերցյանը հայտարարել էր, որ պատրաստ է հեռանալ «Կրասնոդարից» միայն եվրոպական թոփ-ակումբ տեղափոխվելու դեպքում։

Ավարտված մրցաշրջանում Սպերցյանը «ցլերի» կազմում բոլոր մրցաշարերում անցկացրել է 41 հանդիպում՝ դառնալով 14 գոլի և 18 գոլային փոխանցման հեղինակ (ՌՊԼ-ի 30 խաղում՝ 13 գոլ և 16 ասիստ):

Հայաստանի հավաքականի ֆուտբոլիստի գործող պայմանագիրը կրասնոդարյան ակումբի հետ նախատեսված է մինչև 2029 թվականի ամառ։ Transfermarkt պորտալը նրա տրանսֆերային արժեքը գնահատում է 25 միլիոն եվրո։

Հավելենք, որ 2025/26 մրցաշրջանի արդյունքներով Ռուսաստանի Պրեմիեր լիգայի չեմպիոն դարձավ «Զենիթը» (68 միավոր)։ «Կրասնոդարը», որը վերջին տուրում 3:0 հաշվով վստահորեն հաղթեց «Օրենբուրգին», 66 միավորով գրավեց երկրորդ հորիզոնականը։

Լոնդոնի «Արսենալի» և Ռուսաստանի հավաքականի նախկին ֆուտբոլիստ Անդրեյ Արշավինը բարձր է գնահատել Հայաստանի ազգային հավաքականի և «Կրասնոդարի» կիսապաշտպան Էդուարդ Սպերցյանի խաղամակարդակը։

​Ռուսաստանի Պրեմիեր լիգայի 22-րդ տուրի՝ «Նիժնի Նովգորոդի» դեմ կայացած վերջին խաղում (5-0) հայ կիսապաշտպանը դարձել էր 2 գոլային փոխանցման հեղինակ։

​«Նա արդեն շատ տարիներ կայուն կերպով ցուցադրում է իր մակարդակը։ Շատ ուժեղ ֆուտբոլիստ է, որն, հավանաբար, արդեն գերազանցել է այն առաջնության մակարդակը, որտեղ ելույթ է ունենում»,- Արշավինի խոսքերը մեջբերում է «Матч ТВ»-ն։

Ընթացիկ մրցաշրջանում Սպերցյանն ընդհանուր առմամբ մասնակցել է 31 հանդիպման՝ դառնալով 12 գոլի և 16 արդյունավետ փոխանցման հեղինակ։

​Նշենք նաև, որ Transfermarkt պորտալը «ցուլերի» ավագի տրանսֆերային արժեքը գնահատում է 25 միլիոն եվրո։

Եվրո-2008-ը դարձավ 21-րդ դարի ամենավառ մրցաշարերից մեկը։ Այնտեղ ծնվում էին նոր աստղեր, իսկ հին կուռքերը հեռանում էին ասպարեզից։ Իսպանիան սկսեց իր «ոսկե դարաշրջանը», Ռուսաստանն ապրեց ֆուտբոլային հրաշք, իսկ Եվրոպան տեսավ հերոսների, որոնց մասին խոսեցին դեռ երկար տարիներ։

Անցել է ավելի քան 15 տարի. այն ժամանակ փայլող ֆուտբոլիստներից շատերն արդեն ավարտել են կարիերան՝ դառնալով մարզիչներ, փորձագետներ կամ ընդհանրապես փոխելով մասնագիտությունը։ Եկեք վերհիշենք, թե որտեղ են այսօր Եվրո-2008-ի աստղերը և ինչպես են դասավորվել նրանց ճակատագրերը։

Եվրո-2008. իրադարձություններ և փաստեր

Եվրոպայի առաջնությունն ընդունեցին Ավստրիան և Շվեյցարիան՝ 2008 թվականի հունիսի 7-ից 29-ը։ Եզրափակիչ փուլ դուրս եկան 16 թիմեր, որոնք բաժանված էին 4 խմբի։ Քառորդ եզրափակիչ անցնում էին խմբերում առաջին երկու տեղերը զբաղեցրած հավաքականները։

1/4 եզրափակչի արդյունքները

• Պորտուգալիա – Գերմանիա՝ 2:3
• Խորվաթիա – Թուրքիա՝ 1:1 (11մ՝ 1:3)
• Նիդերլանդներ – Ռուսաստան՝ 1:3 (լրացուցիչ ժամանակում)
• Իսպանիա – Իտալիա՝ 0:0 (11մ՝ 4:2)

1/2 եզրափակչի արդյունքները

• Գերմանիա – Թուրքիա՝ 3:2
• Ռուսաստան – Իսպանիա՝ 0:3

Եզրափակիչ

• Գերմանիա – Իսպանիա՝ 0:1

Ավանդաբար ֆավորիտ համարվող շատ հավաքականների համար այդ առաջնությունը հաջողված չես անվանի։ Անգլիայի հավաքականն ընդհանրապես չէր հայտնվել եզրափակիչ փուլում, Ֆրանսիան չկարողացավ դուրս գալ փլեյ-օֆֆ, իսկ Պորտուգալիան, Իտալիան և Նիդերլանդները պայքարը լքեցին քառորդ եզրափակչում։

Նման իրավիճակում Եվրո-2008-ի աստղերը տրամաբանորեն դարձան կիսաեզրափակիչ և եզրափակիչ հասած թիմերի խաղացողները։

Ռուսաստանի հավաքական

Եվրո-2008-ի շրջանակներում Ռուսաստանի հավաքականը երկու անգամ պարտվեց միայն մեկ թիմի՝ մրցաշարի ապագա հաղթող Իսպանիային (1:4 խմբում, 0:3 կիսաեզրափակչում)։ Փոխարենը, խմբային փուլում Գուս Հիդինկի թիմը հաղթեց գործող չեմպիոն Հունաստանին (1:0) և Շվեդիային (2:0)։ Իսկ հետո եղավ լեգենդար քառորդ եզրափակիչը Նիդերլանդների դեմ՝ լրացուցիչ ժամանակում տարած 3:1 հաշվով հաղթանակով և մեկնաբան Չերդանցևի թևավոր դարձած խոսքերով. «Ես հիմա ընդհանրապես կավարտեմ ամեն ինչ» («Я сейчас закончу вообще все!»)։

Անդրեյ Արշավին

«Զենիթի» առաջատարն աչքի ընկավ խմբային փուլի 3-րդ՝ շվեդների դեմ խաղում և Նիդերլանդների դեմ քառորդ եզրափակչի լրացուցիչ ժամանակում։ Եվրո-2008-ում ցուցադրած հաջող խաղը թույլ տվեց Արշավինին 2009 թվականից կարիերան շարունակել լոնդոնյան «Արսենալում»։
Կարիերան ավարտելուց հետո Անդրեյ Արշավինն աշխատում է «Զենիթի» կառուցվածքում. 2022 թվականից զբաղեցնում է վարչության նախագահի տեղակալի պաշտոնը սպորտային զարգացման գծով։ Նա հաջողակ է բիզնեսում, զբաղվում է բարեգործությամբ և հանդես է գալիս որպես հեռուստատեսային փորձագետ։

Ռոման Պավլյուչենկո

Հարձակվող Ռոման Պավլյուչենկոն Եվրո-2008-ում ներկայացնում էր մոսկովյան «Սպարտակը»։ Մայրցամաքային առաջնությունում բրոնզե մեդալներ նվաճելուց հետո նույն թվականին հրավիրվեց «Տոտենհեմ», որտեղ հանդես եկավ մինչև 2012 թվականը։

Խմբային փուլում Ռոմանը խփեց միակ գնդակը Իսպանիայի դեմ խաղում և բացեց հաշիվը Շվեդիայի դեմ հաղթական խաղում։ Նա նաև աչքի ընկավ Նիդերլանդների դարպասը խփած գոլով 1/4 եզրափակչի հիմնական ժամանակում՝ դառնալով Ռուսաստանի հավաքականի լավագույն ռմբարկուն ԵԱ-ում։

2022 թվականից Ռոման Պավլյուչենկոն մարզչական աշխատանք է կատարում մոսկովյան «Ռոդինա-2» ակումբի համակարգում։

Գերմանիայի հավաքական

Գերմանիայի հավաքականը խմբում զբաղեցրեց 2-րդ տեղը՝ պարտվելով միայն խորվաթներին (1:2)։ Դա գերմանացիներին քառորդ եզրափակչում դուրս բերեց Պորտուգալիայի դեմ։ Յոահիմ Լյովի սաները 3:2 հաշվով հաղթեցին ոչ համոզիչ խաղ ցուցադրած Ռոնալդուի թիմին, իսկ հետո նույն հաշվով կիսաեզրափակչում առավելության հասան Թուրքիայի նկատմամբ։ Միայն եզրափակչում «Բունդեսթիմը» զիջեց փայլուն Իսպանիային։

Միխայել Բալակ

Միխայել Բալակը Եվրո-2008-ում հանդես էր գալիս որպես «Չելսիի» խաղացող։ Նրա հաշվին գրանցվեց 2 հաղթական գոլ՝ խմբային փուլում Ավստրիայի դարպասը (1:0) և 1/4 եզրափակչում Պորտուգալիայի դարպասը (3:2)։ Մրցաշարի արդյունքներով Բալակն ընդգրկվեց խորհրդանշական հավաքականում։

Ներկայումս Միխայել Բալակն աշխատում է որպես ֆուտբոլային փորձագետ։

Բաստիան Շվայնշտայգեր

Մյունխենի «Բավարիայի» կենտրոնական կիսապաշտպանը նույնպես 2 գոլ խփեց այդ մրցաշարում։ Շվայնշտայգերը բացեց հաշիվը Պորտուգալիայի դեմ 1/4 եզրափակչի խաղում (3:2) և խփեց իր թիմի առաջին գնդակը Թուրքիայի դեմ կիսաեզրափակչի հաղթական խաղում (3:2)։
Այժմ Գերմանիայի հավաքականի նախկին խաղացողը հեռուստատեսությունում աշխատում է որպես մեկնաբան և փորձագետ։ Գործունեության բերումով Բաստիանը շատ է ճամփորդում աշխարհով մեկ։

Լուկաս Պոդոլսկի

Լուկաս Պոդոլսկին, ով «Բունդեսթիմում» խաղում էր հարձակվողի դիրքում, 2008-ի Եվրոպայի առաջնության խմբային փուլում խփեց 3 գնդակ։ Երկու գնդակ նա ուղարկեց Լեհաստանի դարպասը (2:0), և մեկը՝ խորվաթների դեմ պարտված խաղում (1:2)։

Գերմանացին մինչ օրս շարունակում է խաղացողի կարիերան։ 2021 թվականից նա հանդես է գալիս լեհական «Գուրնիկում»։

Իսպանիայի հավաքական

Իսպանացիները հեշտությամբ հաղթեցին խմբում՝ 3 խաղում տանելով 3 հաղթանակ։ «Ֆուրիա Ռոխայի» ամենալարված խաղը իտալացիների դեմ էր 1/4 եզրափակչում (0:0, 11մ՝ 4:2)։ Բայց իսպանացիների նյարդերն ավելի ամուր գտնվեցին, իսկ հետո եղան հաղթանակներ Ռուսաստանի (3:0) և Գերմանիայի (1:0) նկատմամբ։

Չավի

Կատալոնացի հանճարն այդ առաջնությունում խփեց ընդամենը մեկ գոլ՝ կիսաեզրափակչում Ռուսաստանի հավաքականի դեմ խաղում։ Չնայած դրան, կիսապաշտպանը ճանաչվեց առաջնության լավագույն խաղացող։

2021-ից 2024 թվականներին Չավին «Բարսելոնայի» մարզչական շտաբում էր։ 2025 թվականի հոկտեմբերի դրությամբ Էռնանդեսը հեռացել է ֆուտբոլային գործունեությունից, սակայն բացառված չէ, որ շուտով կգլխավորի Սաուդյան Արաբիայի ակումբներից մեկը։

Ֆեռնանդո Տորես

Իսպանացի հարձակվողի հաշվին Եվրո-2008-ում գրանցվեց 2 գնդակ։ Առաջին գոլը նա խփեց խմբային փուլում շվեդներին, իսկ երկրորդը դարձավ «ոսկե», քանի որ եզրափակչում հաղթանակ պարգևեց Իսպանիային Գերմանիայի նկատմամբ (1:0)։ Ֆեռնանդոն ընդգրկվեց Եվրո-2008-ի խորհրդանշական հավաքականում։

2024 թվականից Տորեսը Մադրիդի «Ատլետիկոյի» երկրորդ թիմի մարզիչն է։

Դավիդ Վիլյա

Վիլյան դարձավ Եվրո-2008-ի ամենաարդյունավետ խաղացողը։ Նրա հաշվին կա խաղային իրավիճակից խփած 4 գնդակ։ Խմբային փուլում նրա հեթ-տրիկը ջախջախեց Ռուսաստանի հավաքականին, ևս 1 գնդակ նա ուղարկեց Շվեդիայի դարպասը։ Փլեյ-օֆֆում Վիլյան գոլ չխփեց, եթե չհաշվենք Իտալիայի դեմ հետխաղյա 11-մետրանոցների շարքում կատարած հստակ հարվածը։

Այժմ Վիլյան զբաղվում է ֆուտբոլի հետ կապված բիզնեսով։ Նա տնօրինում է աշխարհի տարբեր երկրներում գործող մի քանի կառույցներ, որոնք ունեն ֆուտբոլային ակադեմիաներ։

Ռուսաստանի ազգային հավաքականի նախկին ֆուտբոլիստ Անդրեյ Արշավինը հայտարարել է, որ 25-ամյա հայ կիսապաշտպան Էդուարդ Սպերցյանը կարող է հաջողությամբ խաղալ Եվրոպայում և, ամենայն հավանականությամբ, շուտով կլքի «Կրասնոդար» ակումբը։

Ավելի վաղ ԶԼՄ-ները հայտնել էին, որ Սպերցյանը կարող է տեղափոխվել ՊՍԺ կամ «Ժիրոնա»։

«Սպերցյանի ֆուտբոլային տաղանդն անկասկած բավարար է Եվրոպայում խաղալու համար։ Կարծում եմ՝ նա կհեռանա ձմռանը, եթե ոչ ավելի վաղ։

Գաետան Պեռենը կարող է փոխարինել նրան «Կրասնոդարում», և եթե Սպերցյանը հեռանա, դա տրամաբանական ձեռքբերում կլինի ակումբի համար։

Կարծում եմ՝ Սպերցյանին պահել պետք չէ, եթե նա ցանկանում է հեռանալ», — հայտարարել է Արշավինը «Все на Матч!»-ի եթերում։

«Զենիթի» սպորտային զարգացման գծով փոխնախագահ Անդրեյ Արշավինը «Матч ТВ»-ի եթերում հայտարարել է, որ «Լոկոմոտիվի» համար ավելի շահավետ էր Նաիր Թիկնիզյանին վաճառել ոչ ռուսական ակումբի։

Հիշեցնենք, որ անցած շաբաթ «Ցրվենա Զվեզդան» հայտարարել էր Թիկնիզյանի հետ եռամյա պայմանագիր կնքելու մասին։ Իր նոր ակումբի կազմում ընկերական խաղում Թիկնիզյանը գոլ է խփել Չեռնոգորիայի «Սուտյեսկայի» դարպասին (5:0)։

«Ինչքան գիտեմ, Թիկնիզյանը շատ մոտ էր «Զենիթին» միանալուն, և աշխատավարձի տարբերությունը մեծ չէր։ Բայց դա արդեն անցյալում է։ Կարծում եմ՝ «Լոկոմոտիվը» չէր ցանկանում Թիկնիզյանին թողնել Ռուսաստանում, քանի որ նրան կարող էին ձեռք բերել մրցակիցները։ «Լոկոմոտիվի» համար ավելի ձեռնտու էր նրան վաճառել ոչ ռուսական ակումբի։ Ինձ թվում է՝ Թիկնիզյանը միշտ ձգտել է դեպի Եվրոպա», — ասել է Արշավինը «Все на Матч!» հաղորդման եթերում։

Ավելի վաղ ֆուտբոլիստը հայտարարել էր, որ «Լոկոմոտիվում» իրեն չի բավարարել խաղաժամանակը, ուստի մրցաշրջանի ավարտից հետո դիմել էր ակումբի ղեկավարությանը՝ թույլտվություն խնդրելով հեռանալու համար։

«Զենիթի» նախկին ֆուտբոլիստ Անդրեյ Արշավինը բացատրել է, թե ինչու են ռուս ֆուտբոլիստները հազվադեպ մեկնում Եվրոպայի առաջնություններ:

«Քանի որ կա լեգիոներների սահմանափակում, ի՞նչ էիք դուք սպասում: Տաղանդավոր երիտասարդ խաղացողները քիչ են: Սակավությունն ուռճացված գներ է ստեղծում: Անհրաժեշտ է, որ ռուսական և արտասահմանյան ակումբները ապրեն շուկայի նույն օրենքներով, բայց դա այդպես չէ:

Ինչո՞ւ էր ռուսների վերջին ալիքը արտասահմանյան ակումբներ տեղափոխվել 2008 թվականի Եվրոպայի առաջնությունից հետո: Քանի որ Ռուսաստանի առաջնությունը ոչ ոքի համար հետաքրքիր չէ, ոչ ոք դա չի դիտում: Նրանք նայում են ազգային հավաքականի ելույթներին և եվրոպական մրցումներում ակումբների խաղերին:

Նրանք վերջերս անհաջող հանդես եկան եվրոպական մրցումներում, իսկ Աշխարհի գավաթից հետո Գոլովինը հեռացավ: Մնացած խաղացողները այս կամ այն ​​կերպ լավ պայմաններ ունեին Ռուսաստանում կարիերան շարունակելու համար:

Պայմանական Կարպինը և Մոստովոյի դեպքն այլ էր Իսպանիայում, քանի որ Ռուսաստանում նրանք ստացել են 500 դոլար, իսկ այնտեղ ՝ 5000 դոլար: Այժմ հակառակն է: Հիմա կա՞ ռուս խաղացող, որին կարելի է հրավիրել եվրոպական լավ ակումբ: ՌՊԼ-ում `ոչ»,- մեջբերում է Արշավինին Match TV-ն:

«Զենիթի» նախկին ֆուտբոլիստ Անդրեյ Արշավինը դարձել է կամավոր՝ կորոնավիրուսի պանդեմիայի դեմ պայքարի օրերին:

Սանկտ Պետերբուրգի ակումբը մթերքով օգնում է 65 տարեկանից բարձր երկրպագուների և սահմանափակ շարժունակություն ունեցող մարդկանց.

«Մեր առաքչի անունն Անդրեյ է: Մինչ գործի անցնելը նրա ջերմությունը չափել են, դիմակ, ձեռնոց ու ախտահանող միջոցներ են տվել»,-գրված է ակումբի պաշտոնական էջում:

Ռուսաստանի հավաքականի, «Զենիթի» և Լոնդոնի «Արսենալի» նախկին հարձկավող Անդրեյ Արշավինը հեգնանքով է արտահայտվել այս օրերի ընթացող Բելառուսի առաջնության մասին:

«Բելառուսի առաջնությունը լավն է: Միացրեք այն և հանգիստ քնեք»,-ինստագրամյան ուղիղ եթերում ասել է ռուս ֆուտբոլիստը:

Հիշեցնենք, որ կորորնավիրուսի պանդեմիայի հետևանքով դադարեցված են աշխարհի գրեթե բոլոր ֆուտբոլային առաջնությունները: Հին աշխարհամասի երկների առաջնություններից ընթացքի մեջ է միայն Բելառուսի առաջնությունը:

Լոնդոնի «Արսենալի» և Ռուսաստանի հավաքականի նախկին ֆուտբոլիստ Անդերյ Արշավինը կիսվել է Օզիլի մասին՝ իր կարծիքով.

«Իհարկե, ես հարգում եմ Օզիլին որպես խաղացող: Մեսութը համաշխարհային մակարդակի ֆուտբոլիստ է, բայց անձամբ ինձ համար նա դանդաղեցնում է խաղը: Ես կնախընտրեի օգտագործել մեկ այլ խաղացողի իր դիրքում: Արտետան, ինչպես տեսնում ենք, այլ կարծիք ունի և հաճախ օգտագործում է Օզիլին: Այո, Մեսութը բարելավեց իր խաղը «Արսենալում», բայց, այնուամենայնիվ, ես նրան «Արսենալում» չեմ տեսնում:

«Արսենալի» կազմն այս պահին հավասարակշռված չէ: Հարձակման գծում նրանք չափազանց լավն են և իսկապես գեղեցիկ ֆուտբոլ են ցուցադրում, բայց պաշտպանությունում, և դա վերաբերում է նույնիսկ այն ժամանակահատվածին, երբ ես խաղում էի «Արսենալում», նրանք թույլ են: Երբեմն դա կապված է վնասվածքների հետ, իսկ երբեմն էլ` փորձի պակասի հետ: Չգիտեմ, թե ինչու իրավիճակը չի փոխվում»,- ասել է Արշավինը:

Ռուսաստանի հավաքականի նախկին ֆուտբոլիստ Անդրեյ Արշավինը կարծում է, որ ՌՊԼ- ի մրցաշրջանը կդադարեցվի կորոնավիրուսի համաճարակի պատճառով:

«Ինձ թվում է, որ ՌՊԼ-ն որոշելու է առաջնությունը հետաձգել, քանի որ գրեթե բոլոր եվրոպական առաջնությունները դադարեցված են: Մենք, իհարկե, չունենք նման լուրջ իրավիճակ, ինչպես Եվրոպայում, բայց հանդիսատեսի թվի սահմանափակում կա:

Մենք ավելացրել ենք խաղերի հաճախելիությունը, այնպես որ հանդիսատեսը հանդիպումների է գալիս ավելին, քան ներկայացրած սահմանը՝ 5 հազար մարդ: Կարծում եմ, որ ակումբները կողմ կլինեն առաջնությունը կասեցնելու նախաձեռնությանը»,- մեջբերում է Արշավինին Матч ТВ-ն։

Ավելացնենք, որ Sport24-ը հայտնում է, որ ռուսական Պրեմիեր լիգայի ակումբների մեծ մասը պատրաստ են աջակցել կորոնավիրուսի համաճարակի պատճառով Ռուսաստանի առաջնությունը կասեցնելու նախաձեռնությանը: