Համացանցում տարածվել է տեսանյութ Անգլիայի հավաքականի նախկին վինգեր Ռահիմ Ստերլինգի մասնակցությամբ, որն արվել է ավտովթարից անմիջապես առաջ. միջադեպից հետո հայտնի ֆուտբոլիստը ձերբակալվել է ոստիկանության կողմից։

Հրապարակված կադրերում երևում է Lamborghini մակնիշի ավտոմեքենա, որը, ըստ շրջանառվող լուրերի, պատկանում է ֆուտբոլիստին։ Նշվում է, որ տեսանյութը նկարահանվել է M3 մայրուղու վրա տեղի ունեցած վթարից հաշված րոպեներ առաջ։

Ավելի վաղ ոստիկանությունը պաշտոնական հաղորդագրություն էր տարածել առ այն, որ մայիսի 30-ին՝ առավոտյան ժամը 09:00-ի սահմաններում, Lamborghini-ն բախվել է մայրուղու հարավային հատվածում գտնվող արգելապատնեշին։ Բարեբախտաբար, վթարի հետևանքով այլ տրանսպորտային միջոցներ չեն վնասվել, իսկ տուժածներ չկան։

Այնուամենայնիվ, մեքենայի վարորդը՝ Բերքշիրի 31-ամյա բնակիչը, ձերբակալվել է թմրանյութերի ազդեցության տակ ավտոմեքենա վարելու, վտանգավոր վարքագծի, արգելված նյութեր պահելու և բժշկական փորձաքննությունից հրաժարվելու կասկածանքով։ Ավելի ուշ նրան ազատ են արձակել գրավի դիմաց, սակայն հետաքննությունը շարունակվում է։

Բրիտանական հեղինակավոր The Sun պարբերականի տվյալներով՝ ձերբակալված անձը հենց Ռահիմ Ստերլինգն է։ Պարբերականը մեջբերում է նաև ֆուտբոլիստին մոտ կանգնած աղբյուրի խոսքերը, ըստ որի՝ վերջին տարիներին խաղացողը բախվել է հոգեբանական լուրջ և շարունակական ճնշումների։

Հիշեցնենք, որ 2025/26 մրցաշրջանում Ստերլինգը վարձավճարով հանդես էր գալիս նիդերլանդական «Ֆեյենորդում», որտեղ անցկացրած 8 հանդիպումներում այդպես էլ աչքի չէր ընկել արդյունավետ գործողություններով։

Opta վերլուծական հարթակը թարմացրել է աշխարհի 2026 թվականի առաջնության կանխատեսումը և որոշել մրցաշարում հաղթելու գլխավոր հավակնորդին։

Սուպերհամակարգչի հաշվարկներով՝ տիտղոսը նվաճելու ամենամեծ շանսերն ունի Իսպանիայի հավաքականը։ Իսպանացիների հաղթանակի հավանականությունը գնահատվում է 16,1 տոկոս։

Մրցաշարի երկրորդ ֆավորիտը Ֆրանսիայի հավաքականն է՝ 13 տոկոս ցուցանիշով։ Հավակնորդների լավագույն եռյակը եզրափակում է Անգլիան՝ 11,2 տոկոսով։

Գլխավոր ֆավորիտների հնգյակում ընդգրկվել են նաև աշխարհի գործող չեմպիոն Արգենտինան և Պորտուգալիան։

ԱԱ-2026-ում հաղթելու հավակնորդների լավագույն տասնյակն ըստ Opta-ի ունի հետևյալ տեսքը.

1. Իսպանիա — 16,1 տոկոս
2. Ֆրանսիա — 13 տոկոս
3. Անգլիա — 11,2 տոկոս
4. Արգենտինա — 10,4 տոկոս
5. Պորտուգալիա — 7 տոկոս
6. Բրազիլիա — 6,6 տոկոս
7. Գերմանիա — 5,1 տոկոս
8. Նիդերլանդներ — 3,6 տոկոս
9. Նորվեգիա — 3,5 տոկոս
10. Բելգիա — 2,4 տոկոս

Հիշեցնենք, որ աշխարհի 2026 թվականի առաջնությունը կմեկնարկի հունիսի 11-ին և պատմության մեջ առաջին անգամ կանցկացվի միանգամից երեք երկրում՝ ԱՄՆ-ում, Կանադայում և Մեքսիկայում։ Մրցաշարին կմասնակցի ռեկորդային՝ 48 ազգային հավաքական։

Անգլիայի ազգային հավաքականի մարզչական շտաբը՝ գերմանացի մասնագետ Թոմաս Տուխելի գլխավորությամբ, հրապարակել է թիմի վերջնական հայտացուցակը աշխարհի 2026 թվականի առաջնության համար։

​Ինչպես և սպասվում էր, գերմանացի մասնագետը մրցաշարին չի հրավիրել «Չելսիի» կիսապաշտպան Քոուլ Պալմերին, «Մանչեսթեր Սիթիի» կիսապաշտպան Ֆիլ Ֆոդենին և «Ռեալ Մադրիդի» պաշտպան Տրենտ Ալեքսանդր-Առնոլդին։

​«Երեք առյուծների» վերջնական հայտացուցակում ընդգրկվել են հետևյալ ֆուտբոլիստները․

​Դարպասապահներ՝ Ջորդան Փիքֆորդ («Էվերթոն»), Դին Հենդերսոն («Քրիստալ Փելաս»), Ջեյմս Թրաֆորդ («Մանչեսթեր Սիթի»)։

​Պաշտպաններ՝ Ռիս Ջեյմս («Չելսի»), Տինո Լիվրամենտո («Նյուքասլ»), Մարկ Գուեհի, Ջոն Սթոունս, Նիկո Օ’Ռեյլի (բոլորը՝ «Մանչեսթեր Սիթի»), Էզրի Կոնսա («Աստոն Վիլա»), Ջարել Քուանսահ («Բայեր»), Դեն Բիրն («Նյուքասլ»), Ջեդ Սփենս («Տոտենհեմ»)։

​Կիսապաշտպաններ՝ Դեկլան Ռայս, Բուկայո Սակա, Նոնի Մադուեկե, Էբերեչի Էզե (բոլորը՝ «Արսենալ»), Էլիոթ Անդերսոն («Նոթինգհեմ Ֆորեսթ»), Ջորդան Հենդերսոն («Բրենտֆորդ»), Ջուդ Բելինգեմ («Ռեալ Մադրիդ»)։

​Հարձակվողներ՝ Հարի Քեյն («Բավարիա»), Իվան Թոնի («Ալ-Ահլի»), Օլի Ուոթքինս («Աստոն Վիլա»), Մարկուս Ռեշֆորդ («Բարսելոնա»), Էնթոնի Գորդոն («Նյուքասլ»)։

​Մունդիալի խմբային փուլում Անգլիայի ընտրանին կմրցի Պանամայի, Գանայի և Խորվաթիայի հավաքականների հետ։

Հեղինակավոր ESPN մարզական պարբերականը հրապարակել է ֆուտբոլի աշխարհի 2026 թվականի առաջնության գլխավոր ֆավորիտների թարմացված վարկանիշային աղյուսակը։

​Եթե վարկանիշի նախորդ տարբերակում միանձնյա առաջատարը Ֆրանսիայի ազգային հավաքականն էր, ապա այժմ աղյուսակի առաջին հորիզոնականն զբաղեցնում է Իսպանիայի ընտրանին։

​ESPN-ի վարկածով աշխարհի առաջնության ֆավորիտների լավագույն տասնյակն ունի հետևյալ տեսքը.

1. Իսպանիա
2. Ֆրանսիա
3. Արգենտինա
4. Անգլիա
5. Բրազիլիա
6. Պորտուգալիա
7. Գերմանիա
8. Նիդերլանդներ
9. Մարոկկո
10. Նորվեգիա

​Հիշեցնենք, որ ԱԱ-2026-ը կհյուրընկալվի միանգամից երեք երկրում՝ ԱՄՆ-ում, Կանադայում և Մեքսիկայում։ Մունդիալը կանցկացվի հունիսի 11-ից հուլիսի 19-ը։

Մարտին կայացած միջազգային հանդիպումներից հետո ՖԻՖԱ-ն այսօր՝ ապրիլի 1-ին, հրապարակել է ազգային հավաքականների դասակարգման թարմացված վարկանիշային աղյուսակը։

Հայաստանի ազգային հավաքականը նախորդ անգամվա համեմատ նահանջել է մեկ հորիզոնականով և այժմ 106-րդն է։

Եվրոպայի գործող չեմպիոն Իսպանիայի հավաքականը առաջատարությունը զիջել է աշխարհի փոխչեմպիոն Ֆրանսիային։ Լավագույն եռյակը եզրափակում է աշխարհի գործող չեմպիոն Արգենտինայի հավաքականը։

Թոփ-10 հավաքականները՝

1. Ֆրանսիա
2. Իսպանիա
3. Արգենտինա
4. Անգլիա
5. Պորտուգալիա
6. Բրազիլիա
7. Նիդերլանդներ
8. Մարոկկո
9. Բելգիա
10. Գերմանիա

Հիշեցնենք, որ մարտի 29-ին մեր ընտրանին Երևանում ընկերական հանդիպում էր անցկացրել Բելառուսի հավաքականի հետ ու պարտվել 1-2 հաշվով։

ԱԱ-2026-ին ընդառաջ ազգային հավաքականները շարունակում են ստուգատեսային հանդիպումներ անցկացնել։ Ներկայացնում ենք կայացած մի քանի ուշագրավ ընկերական խաղերի արդյունքները.

Էյնդհովենի «Ֆիլիպս» մարզադաշտում Նիդերլանդների հավաքականը ոչ-ոքի խաղաց Էկվադորի ընտրանու հետ։ Հանդիպումը բավականին բուռն սկիզբ ունեցավ. արդեն 3-րդ րոպեին էկվադորցի Վիլյան Պաչոն դարձավ ինքնագոլի հեղինակ՝ առաջ մղելով տանտերերին։ Սակայն 12-րդ րոպեին նիդերլանդցիները մնացին 10 հոգով՝ Դենզել Դումֆրիսի կարմիր քարտի պատճառով։ Էկվադորն օգտվեց քանակական առավելությունից, և 24-րդ րոպեին Էններ Վալենսիան անվրեպ իրացրեց 11-մետրանոցը՝ ձևակերպելով խաղի վերջնահաշիվը:

Տեսանյութը՝ ԱՅՍՏԵՂ

Լոնդոնի լեգենդար «Ուեմբլի» մարզադաշտում Անգլիայի հավաքականը նվազագույն հաշվով զիջեց Ճապոնիային։ Ասիական թիմին հաղթանակ պարգևեց Կաորու Միտոմայի՝ 23-րդ րոպեին խփած միակ գոլը։

Տեսանյութը՝ ԱՅՍՏԵՂ

Բարսելոնայի «Կոռնելիա-Էլ Պրատ» մարզադաշտում Իսպանիայի հավաքականը չկարողացավ կոտրել Եգիպտոսի դիմադրությունը։ Հանդիպումն ավարտվեց գոլազուրկ ոչ-ոքիով։ Հատկանշական է, որ աֆրիկյան թիմը հանդես էր գալիս առանց իր պատմության լավագույն ռմբարկու Մոհամեդ Սալահի։

Տեսանյութը՝ ԱՅՍՏԵՂ

Ավարտվել են ազգային հավաքականների մասնակցությամբ մի շարք ընկերական հանդիպումներ, որոնք աչքի են ընկել գոլառատությամբ և դրամատիկ սցենարներով։

Իսպանիան վստահ հաղթանակ տարավ Սերբիայի նկատմամբ

Վիլյառեալի «Կերամիկա» մարզադաշտում Իսպանիայի հավաքականը 3:0 հաշվով ջախջախեց Սերբիային։ Հանդիպման հերոս դարձավ Միկել Օյարսաբալը՝ դառնալով դուբլի հեղինակ (16-րդ և 44-րդ րոպեներ)։ Հանդիպման վերջնահաշիվը 72-րդ րոպեին ձևակերպեց Վիկտոր Մունյոսը։

Հիշեցնենք, որ Իսպանիան վաստակած 16 միավորով հաղթել է Եվրոպայի գոտու որակավորման E խմբում և ապահովել իր տեղը ԱԱ-2026-ում (որը կկայանա ԱՄՆ-ում, Կանադայում և Մեքսիկայում)։ Սերբիան K խմբում գրավել է երրորդ տեղը (13 միավոր) և լքել պայքարը։

Տեսանյութը՝ ԱՅՍՏԵՂ

Գերմանիան Բազելում հաղթեց գոլառատ խաղում, Վիրցը փայլում է

Գերմանիայի ընտրանին արտագնա խաղում 4:3 հաշվով առավելության հասավ Շվեյցարիայի նկատմամբ։ Բունդեսթիմի կազմում հիանալի հանդիպում անցկացրեց Ֆլորիան Վիրցը՝ իր ակտիվում գրանցելով երկու գոլ և երկու գոլային փոխանցում։ Գերմանացիներից աչքի ընկան նաև Ջոնաթան Տան և Սերժ Գնաբրին, իսկ դաշտի տերերի կազմում գոլերը հեղինակեցին Դան Նդոյեն, Բրիլ Էմբոլոն և Ժոել Մոնտեյրոն։

Հաջորդ խաղում (մարտի 30) Գերմանիան կմրցի Գանայի, իսկ Շվեյցարիան (մարտի 31)՝ Նորվեգիայի հետ։

Տեսանյութը՝ ԱՅՍՏԵՂ

Նիդերլանդների կամային հաղթանակը Նորվեգիայի նկատմամբ

Ամստերդամի «Յոհան Կրոյֆ Արենայում» կայացած խաղում Նիդերլանդների հավաքականը 2:1 հաշվով կամային հաղթանակ տարավ Նորվեգիայի նկատմամբ։ Առաջին խաղակեսի միջնամասում հյուրերի հարձակվող Անդրեաս Շելդերուպը բացեց հաշիվը, սակայն 35-րդ րոպեին Վիրջիլ վան Դեյկը վերականգնեց հավասարությունը, իսկ 51-րդ րոպեին Տիջանի Ռեյնդերսը հաղթանակ պարգևեց «նարնջագույններին»։

Երկու հավաքականներն էլ հանդես կգան ԱԱ-2026-ում։ Նիդերլանդները կխաղա F խմբում (Ճապոնիա, Թունիս, եվրոպական B ուղու հաղթող), իսկ Նորվեգիան՝ I խմբում (Ֆրանսիա, Սենեգալ, միջմայրցամաքային 2-րդ ուղու հաղթող)։

Տեսանյութը՝ ԱՅՍՏԵՂ

Վալվերդեն փրկեց Ուրուգվային «Ուեմբլիում»

Անգլիայի հավաքականը Լոնդոնում ձեռքից բաց թողեց հաղթանակը Ուրուգվայի դեմ խաղում՝ 1:1։ 81-րդ րոպեին Բեն Ուայթն առաջ մղեց անգլիացիներին, սակայն մրցավարի կողմից ավելացված ժամանակում (90+4′) Ֆեդերիկո Վալվերդեն անվրեպ իրացրեց 11-մետրանոցն ու վերականգնեց հաշվի հավասարությունը։

Մարտի 31-ին Անգլիան կխաղա Ճապոնիայի, իսկ Ուրուգվայը՝ Ալժիրի հետ։

Տեսանյութը՝ ԱՅՍՏԵՂ

Անգլիայի հավաքականի նախկին ֆուտբոլիստ, լեգենդար Դևիդ Բեքհեմն արձագանքել է իր որդու՝ Բրուքլինի կողմից ընտանիքի հասցեին հնչեցրած վերջին կոշտ հայտարարություններին։

26-ամյա Բրուքլին Բեքհեմը ծնողներին մեղադրել էր իր և Նիկոլա Պելտցի հարաբերությունները «անվերջ քանդելու փորձերի» մեջ՝ թե՛ մինչև հարսանիքը, թե՛ դրանից հետո։ Բրուքլինը հայտարարել էր, որ ենթարկվել է «անվերջ հարձակումների թե՛ մասնավոր, թե՛ հրապարակային դաշտում», իսկ ընտանեկան մանրամասները ծնողների ցուցումով փոխանցվել են մամուլին։ Նա նաև պնդել էր, որ ծնողները փորձել են տապալել իր հարսանիքը։

CNBC-ին տված հարցազրույցում «Ինտեր Մայամիի» սեփականատերը փիլիսոփայորեն է մոտեցել հարցին.

«Ես փորձում եմ դաստիարակել երեխաներիս, չէ՞ որ նրանք սխալներ են գործում։ Երեխաներին թույլատրվում է սխալվել, այդպես նրանք սովորում են։ Բայց, գիտեք, երբեմն պետք է թույլ տալ նրանց անել այդ սխալները»։

Ավելի վաղ Բրուքլին Բեքհեմը գրառում էր կատարել՝ նշելով, որ ստիպված է բարձրաձայնել ճշմարտությունը, քանի որ «այլ ելք չունի»։ Նա սոցիալական ցանցերում արգելափակել է ծնողներին և կոչ արել Վիկտորիային ու Դևիդին իր հետ այսուհետ շփվել միայն փաստաբանների միջոցով։

Հիշեցնենք, որ Դևիդ և Վիկտորիա Բեքհեմները ամուսնացած են 1999 թվականից և ունեն չորս զավակ՝ Բրուքլինը, Ռոմեոն, Կրուզը և Հարփերը։

«Մանչեսթեր Յունայթեդի» և Անգլիայի ազգային հավաքականի նախկին հարձակվող Ուեյն Ռունին պատմել է, որ լսողության հետ կապված խնդիրներ ունի։

Ռունին այժմ որպես փորձագետ աշխատում է BBC-ի Match of the Day հաղորդման շրջանակներում։ Էֆիերներից մեկի նախապատրաստման ընթացքում «Էվերթոնի» նախկին ֆուտբոլիստը դիմել է նկարահանող խմբին՝ խնդրելով տեխնիկական ականջակալը տեղափոխել աջ ականջին։

«Կարո՞ղ ենք օգտագործել այս ականջը։ Խնդիրն այն է, որ ես խուլ եմ ձախ ականջով։ Այդ պատճառով, երբ ձայնը շատ բարձր է, ես դժվարանում եմ լսել, թե ինչ է ասում Քելի Քեյթսը կամ որևէ այլ մեկը»,- ասել է Ռունին YouTube-ում հրապարակված տեսանյութում։

Հիշեցնենք, որ 40-ամյա Ռունին «Մանչեսթեր Յունայթեդի» գույները պաշտպանել է 2004–2017 թվականներին։ Մանկունիացիների կազմում նա դարձել է Անգլիայի հնգակի չեմպիոն, Չեմպիոնների լիգայի հաղթող և Եվրոպայի լիգայի գավաթակիր։ Նա խաղացել է նաև «Էվերթոնում», «Դի Սի Յունայթեդում» և «Դերբի Քաունթիում»։

Անգլիայի հավաքականի կազմում անցկացրած 120 խաղում Ռունին խփել է 53 գոլ և երկար ժամանակ համարվում էր թիմի պատմության լավագույն ռմբարկուն, մինչև 2023 թվականին նրան գերազանցեց Հարի Քեյնը։ Կարիերան ավարտելուց հետո Ռունին անցել է մարզչական աշխատանքի։

«Մանչեսթեր Յունայթեդի» և Անգլիայի հավաքականի նախկին հարձակվող Ուեյն Ռունին կիսվել է իր կարծիքով Լոնդոնի «Արսենալի» կիսապաշտպան Դեկլան Ռայսի վերաբերյալ։

«Ես Դեկլանին համարում եմ Քեյնի հետնորդը Անգլիայի հավաքականում։ Կարծում եմ՝ հենց նա պետք է դառնա հավաքականի առաջատարն ու ավագը Հարիի հեռանալուց հետո։ Նա ունի դրա համար անհրաժեշտ բոլոր որակները։ Բոլորը հարգանքով են վերաբերվում Ռայսին։ Նա անփոխարինելի է ազգային թիմում», — Ռունիի խոսքերն է մեջբերում BBC Sport-ը։

26-ամյա Ռայսը «զինագործների» կազմում հանդես է գալիս 2023 թվականից, իսկ նրա պայմանագրի ժամկետը նախատեսված է մինչև 2028 թվականի հունիսի վերջը։ Անգլիայի հավաքականի կազմում Դեկլան Ռայսն անցկացրել է 72 հանդիպում և դարձել 6 գոլի հեղինակ։