Ալբանիայի Դուրես քաղաքում ընթացող ծանրամարտի Եվրոպայի երիտասարդների ու Մ-23 տարեկանների առաջնությունում Հայաստանը նվաճեց առաջին ոսկե մեդալը երկամարտում:

Մինչև 23 տարեկանների 57 կգ քաշային կանանց պայքարում Հայաստանի հավաքականի անդամ Ալեքսանդրա Գրիգորյանը պոկում վարժությունում հաջողությամբ գլխավերևում պահեց 85 կգ և 90 կգ ծանրաձողերը՝ արժանանալով փոքր ոսկե մեդալի:

Հայ ծանրորդուհին անգերազանցելի էր նաև հրում վարժությունում․ նա կատարեց երեք հաջող մոտեցում՝ գրանցելով 106 կգ, 109 կգ ու 112 կգ արդյունք և այստեղ ևս նվաճելով փոքր ոսկե մեդալ:

Երկամարտի 202 կգ արդյունքով Ալեքսանդրա Գրիգորյանը հռչակվեց Եվրոպայի մինչև 23 տարեկանների առաջնության չեմպիոն՝ կանգնելով պատվո հարթակի առաջին աստիճանին:

Հիշեցնենք, որ մրցումային այս օրը՝ ժամը 17:00-ին, արդեն մեկնարկել է երիտասարդների պայքարում 70 կգ քաշային Սամվել Մարտիրոսյանի ելույթը, իսկ ավելի ուշ՝ ժամը 19:00-ին, մրցահարթակ դուրս կգան 75 կգ քաշայիններ Նարեկ Գրիգորյանն ու Հովհաննես Հովհաննիսյանը:

Ալբանիայի Դուրես քաղաքում ընթացող ծանրամարտի Եվրոպայի երիտասարդների ու Մ-23 տարեկանների առաջնության մրցումային երկրորդ օրը՝ հոկտեմբերի 14-ին, Հայաստանի հավաքականը կունենա չորս ներկայացուցիչ։

​Մրցահարթակ դուրս կգան Մ23 տարեկանների պայքարում հանդես եկող 57 կգ քաշային Ալեքսանդրա Գրիգորյանը (ժամը՝ 15:00), երիտասարդների պայքարում 70 կգ քաշային Սամվել Մարտիրոսյանը (ժամը՝ 17:00), ինչպես նաև 75 կգ քաշայիններ Նարեկ Գրիգորյանն ու Հովհաննես Հովհաննիսյանը (ժամը՝ 19:00):

​Հիշեցնենք, որ առաջնության մրցումային առաջին օրը Հայաստանի ընտրանին արդեն նվաճել է առաջին մեդալները․ Մ23 տարեկանների 65 կգ քաշային կարգում Սեյրան Խուդանյանը երկամարտի 256 կգ արդյունքով դարձել է բրոնզե մեդալակիր (նաև փոքր բրոնզե մեդալ է նվաճել հրում վարժությունում), իսկ երիտասարդների 65 կգ քաշայինների պայքարում Դավիթ Առաքելյանը պոկում վարժությունում նվաճել է փոքր արծաթե մեդալ և երկամարտում զբաղեցրել 5-րդ հորիզոնականը։

Առաջնության ընթացքին և հայ ծանրորդների մրցելույթներին կարող եք հետևել ուղիղ հեռարձակմամբ՝ ԱՅՍՏԵՂ։

Ծանրամարտի Հայաստանի կանանց և տղամարդկանց հավաքականները հոկտեմբերի 27-ից նոյեմբերի 8-ը Չինաստանի Նինբո քաղաքում կմասնակցեն աշխարհի առաջնությանը:

Ծանրամարտի միջազգային ֆեդերացիայի (IWF) կողմից կազմակերպվող տարվա գլխավոր մրցաշարը հյուրընկալելու է աշխարհի ուժեղագույն ծանրորդներին և անցկացվելու է Նինբոյի օլիմպիական մարզահամալիրում: Հայաստանի ծանրամարտի ֆեդերացիան ներկայացրել է թիմերի վերջնական կազմերը: Այս մասին հայտնում է ՀԾՖ-ի մամուլի ծառայությունը:

Տղամարդկանց ընտրանու կազմը՝

• Գառնիկ Չոլաքյան (65 կգ)
• Գոռ Սահակյան, Տիգրան Կարապետյան (75 կգ)
• Ռաֆիկ Հարությունյան, Մարտին Պողոսյան (85 կգ)
• Դավիթ Հովհաննիսյան (95 կգ)
• Գարիկ Կարապետյան (110 կգ)
• Վարազդատ Լալայան (+110 կգ)

Հայաստանի տղամարդկանց թիմի գլխավոր մարզիչը Հակոբ Փիլոսյանն է, մարզիչը՝ Դավիթ Մուրադյանը:

Կանանց ընտրանու կազմը՝

• Ալեքսանդրա Գրիգորյան (57 կգ)
• Աննա Ամրոյան, Ալինա Սուքիասյան (77 կգ)
• Էմմա Պողոսյան, Լիանա Գյուրջյան (86 կգ)

Կանանց հավաքականի գլխավոր մարզիչն Արտաշես Ներսիսյանն է, մարզիչը՝ Տարոն Թովմասյանը:

Հայաստանի ծանրամարտի ֆեդերացիայի ընդհանուր ժողովի ժամանակ ֆեդերացիայի նախագահ Արայիկ Հարությունյանը դրամական պարգևներ հանձնեց Վրաստանի Բաթումի քաղաքում կայացած Եվրոպայի առաջնության մեդալակիրներին, մարզիչներին ու բժշկական անձնակազմին: Այս մասին հայտնում է ՀԾՖ-ի մամուլի ծառայությունը։

Ֆեդերացիայի նախագահ Արայիկ Հարությունյանը շնորհավորեց մեդալակիրներին ու մարզչական անձնակազմին` ընդգծելով, որ այժմ հավաքականում առկա առողջ մթնոլորտն ակնհայտ է բոլորի համար.

«Ցավոք չկարողացա ներկա լինել Եվրոպայի առաջնությանը, սակայն այն ինչ տեսա թիմում, որակական նոր իրավիճակ է: Տեսնում եմ, որ այս ընթացքում բարոյահոգեբանական վիճակը թիմում լավ է, թիմը կենտրոնանում է իր անելիքի վրա ու առաջնայինն արդյունքն է: Ֆեդերացիան մեծապես գնահատելու է մեր մարզիչների ու մարզիկների աշխատանքն այդ տրամաբանությամբ: Դրվելու է  նպատակ ու մենք տարվա վերջին գնահատելու ենք` հասել ենք այդ նպատակին, թե ոչ: Եվրոպայում մենք ամենաուժեղն ենք, Եվրոպայում ամենաշատ մեդալներն ենք նվաճում, բայց իմ կարծիքով, արդեն ժամանակն է ավելի բարձր նշաձողեր սահմանելու»,-ընդգծեց Հայաստանի ծանրամարտի ֆեդերացիայի նախագահ Արայիկ Հարությունյանը:

Հիշեցնենք, որ Բաթումիում ավարտված Եվրոպայի առաջնությունում Հայաստանի տղամարդկանց հավաքականը երկրորդ տարին անընդմեջ ճանաչվել է թիմային հաշվարկի բացարձակ հաղթող, իսկ կանանց հավաքականը գրավել է պատվավոր երրորդ տեղը: Մեր ընտրանիները նվաճել է 3 ոսկե, 4 արծաթե և 1 բրոնզե մեդալ։

Վրաստանի Բաթումի քաղաքում ընթացող Եվրոպայի առաջնությունում Հայաստանի ներկայացուցիչ Ալեքսանդրա Գրիգորյանը (58 կգ) նվաճել է արծաթե մեդալ՝ երկամարտում գրանցելով 210 կգ արդյունք:

​Պոկում վարժությունում աշխարհի ու Եվրոպայի նախկին չեմպիոնուհին բարձրացրել է 91 կգ (4-րդ տեղ), իսկ հրում վարժությունում գրանցել է 119 կգ արդյունք՝ արժանանալով փոքր բրոնզե մեդալի:

​Հատկանշական է, որ 20-ամյա մարզուհին իր պրոֆեսիոնալ կարիերայում արդեն երկրորդ անգամ է հռչակվում Եվրոպայի փոխչեմպիոն:

Վրաստանի Բաթումի քաղաքում ընթացող ծանրամարտի Եվրոպայի առաջնության մրցումային երկրորդ օրը Հայաստանն ունի երկու մասնակից։

​Այսօր՝ ապրիլի 20-ին, տղամարդկանց 60 կգ քաշայինների պայքարում մրցահարթակ դուրս կգա Գառնիկ Չոլաքյանը։ Այս քաշային կարգի մրցելույթները կմեկնարկեն ժամը 12։00-ին։

​Ավելի ուշ՝ 18։00-ին, պայքարի մեջ կմտնի կանանց 58 կգ քաշային կարգի ներկայացուցիչ Ալեքսանդրա Գրիգորյանը։

​Մեր ծանրորդների ելույթներին կարող եք հետևել Առաջին ալիքի ուղիղ եթերում։

Հայաստանի ծանրամարտի ֆեդերացիան հրապարակել է Եվրոպայի առաջնությունում Հայաստանի հավաքականների մրցելույթների ժամանակացույցը։

​Կանայք.

• ​Ապրիլի 19-ին ժամը՝ 19:00-ին, 53 կգ՝ Իզաբելլա Յայլյան ու Տանզելա Գրիգորյան
• ​Ապրիլի 20-ին ժամը՝ 18:00-ին, 58 կգ՝ Ալեքսանդրա Գրիգորյան
• ​Ապրիլի 23-ին ժամը՝ 19:00-ին, 77 կգ՝ Աննա Ամրոյան ու Ալինա Սուքիասյան
• ​Ապրիլի 24-ին ժամը՝ 19:00-ին, 86 կգ՝ Էմմա Պողոսյան ու Լիանա Գյուրջյան
• ​Ապրիլի 26-ին ժամը՝ 13:00-ին, +86 կգ՝ Տաթև Հակոբյան

​Տղամարդիկ.

• ​Ապրիլի 20-ին ժամը՝ 12:00-ին, 60 կգ՝ Գառնիկ Չոլաքյան
• ​Ապրիլի 21-ին ժամը՝ 19:00-ին, 71 կգ՝ Գոռ Սահակյան
• ​Ապրիլի 22-ին ժամը՝ 19:00-ին, 79 կգ՝ Մարտին Պողոսյան
• ​Ապրիլի 23-ին ժամը՝ 16:00-ին, 88 կգ՝ Ռաֆիկ Հարությունյան
• ​Ապրիլի 24-ին ժամը՝ 16:00-ին, 94 կգ՝ Արա Աղանյան
• ​Ապրիլի 25-ին ժամը՝ 19:00-ին, 110 կգ՝ Սիմոն Մարտիրոսյան ու Գարիկ Կարապետյան
• ​Ապրիլի 26-ին ժամը՝ 16:00-ին, +110 կգ՝ Վարազդատ Լալայան

​Նշենք, որ մրցաշարը կանցկացվի Վրաստանի Բաթումի քաղաքում ապրիլի 19-26-ը։​ Մեր ծանրորդների ելույթներին կարող եք հետևել Առաջին ալիքի ուղիղ եթերում։

Սպորտի միջազգային օրվա շրջանակում կայացել է «Սպորտի ոլորտում տարվա լավագույնների ընտրություն 2025» մրցույթի հաղթողների պարգևատրման հանդիսավոր արարողությունը։

Միջոցառմանը ներկա են եղել երկրի բարձրագույն ղեկավարությունը՝ ՀՀ վարչապետ Նիկոլ Փաշինյանի գլխավորությամբ, Հանրապետության նախագահ Վահագն Խաչատուրյանը, ԱԺ նախագահ Ալեն Սիմոնյանը, ԿԳՄՍ նախարար Ժաննա Անդրեասյանը, ինչպես նաև մարզաշխարհի ներկայացուցիչներ, ֆեդերացիաների ղեկավարներ և անվանի մարզիկներ։

Նոր մարզադպրոցներ և խոշոր մրցաշարեր Հայաստանում

Մինչ բուն մրցանակաբաշխությունը, վարչապետ Նիկոլ Փաշինյանը շնորհակալություն է հայտնել մարզիկներին միջազգային հարթակներում հայկական սպորտի պատիվը բարձր պահելու համար՝ ընդգծելով սպորտի ոլորտի ինստիտուցիոնալ զարգացման կարևորությունը:

Խոսելով ենթակառուցվածքների բարելավման մասին՝ կառավարության ղեկավարը նշել է, որ այս պահին ընթացքի մեջ են կամ մեկնարկում են մեր օլիմպիական չեմպիոնների և անվանի մարզիկների անվան նոր մարզադպրոցների կառուցման աշխատանքները: Շուտով շահագործման կհանձնվեն Հրանտ Շահինյանի, Ալբերտ Ազարյանի, Արթուր Աբրահամի (Երևանում), Արթուր Ալեքսանյանի և Նազիկ Ավդալյանի (Շիրակի մարզում), Վիկ Դարչինյանի, Յուրի և Ստեփան Սարգսյանների (Լոռիում), Ռոման և Մալխաս Ամոյանների (Արագածոտնում) անվան մարզօջախները։ Բացի այդ, նախատեսվում է ստադիոնների կառուցում Երևանում, Իջևանում, Վանաձորում և Ակադեմիական քաղաքում։

Հատուկ ուշադրություն է դարձվել ֆուտզալի ազգային հավաքականի պատմական նվաճումներին, որոնք ամրագրելու նպատակով առաջիկայում կկառուցվի հավաքականի անվան հատուկ մարզադպրոց։

Անդրադառնալով սպասվող խոշոր իրադարձություններին՝ հայտարարվել է, որ առաջիկայում Հայաստանը կհյուրընկալի Ֆրանկոֆոնիայի խաղերը, ինչպես նաև Մարմնամարզության Եվրոպայի և Ծանրամարտի աշխարհի առաջնությունները:

Ովքե՞ր են 2025-ի լավագույնները

Միջոցառման կուլմինացիան տարվա լավագույնների պարգևատրումն էր։ 11 անվանակարգերում հաղթող ճանաչվածներն արժանացել են 6 միլիոն 250 հազարական դրամ դրամական պարգևի և հատուկ հուշանվերների, որոնք նրանց հանձնել է վարչապետը։

2025 թվականի մրցանակակիրներն են՝

• Լավագույն մարզիկներ՝ Վարազդատ Լալայան (ծանրամարտ), Արթուր Դավթյան (սպորտային մարմնամարզություն), Մալխաս Ամոյան (հունահռոմեական ըմբշամարտ)
• Լավագույն կին մարզիկ՝ Ալեքսանդրա Գրիգորյան (ծանրամարտ)
• Հաշմանդամություն ունեցող լավագույն մարզիկ՝ Սարգիս Սարգսյան (շախմատ)
• Լավագույն թիմ՝ Հայաստանի ֆուտզալի ազգային հավաքական
• Լավագույն երիտասարդ մարզիկ՝ Գասպար Տերտերյան (հունահռոմեական ըմբշամարտ)
• Վերադարձ մեծ սպորտ և/կամ հայտնություն՝ Սուրեն Հարությունյան (կարատե)
• Հայաստանի Հանրապետությունը լավագույնս հանրահռչակած մարզիկ՝ Համլետ Մանուկյան (սպորտային մարմնամարզություն)
• Լավագույն մարզիչ՝ Փաշիկ Ալավերդյան (ծանրամարտ)
• Հանդիսատեսի համակրանք (առցանց քվեարկությամբ)՝ Սուրեն Հարությունյան (կարատե)

Հիշեցնենք, որ «Սպորտի ոլորտում տարվա լավագույնների ընտրություն» մրցույթի նպատակն է խրախուսել տարվա ընթացքում բացառիկ նվաճումներ գրանցած և Հայաստանի հեղինակությունը միջազգային ասպարեզում բարձրացրած մարզիկներին ու մարզիչներին:

Հայաստանի ծանրամարտի կանանց հավաքականի անդամ, 20-ամյա Ալեքսանդրա Գրիգորյանն ընդգրկվել է Եվրոպայի 2025 թվականի լավագույն կին ծանրորդի տիտղոսին հավակնող մարզուհիների պաշտոնական ցուցակում:

Ըստ Ծանրամարտի եվրոպական ֆեդերացիայի հրապարակած տվյալների՝ հեղինակավոր այս մրցանակի համար պայքարում է ընդհանուր առմամբ 10 ծանրորդուհի։ Լավագույնի անունը պարզ կդառնա հատուկ քվեարկության արդյունքներով:

Անցնող 2025 թվականը հայ մարզուհու համար հատկանշվեց մի շարք խոշոր նվաճումներով. Գրիգորյանը հռչակվել է Եվրոպայի երիտասարդական չեմպիոն, կանգնել է աշխարհի երիտասարդական առաջնության պատվո հարթակի երրորդ աստիճանին, ինչպես նաև դարձել է մեծահասակների Եվրոպայի արծաթե մեդալակիր: Հիշեցնենք նաև, որ նախորդ մրցաշրջանի արդյունքներով նա արդեն իսկ ճանաչվել էր որպես Եվրոպայի լավագույն երիտասարդ ծանրորդ:

Այժմ հայուհին ակտիվորեն նախապատրաստվում է հերթական կարևոր ստուգատեսին՝ ապրիլի 19-ից 26-ը Վրաստանի Բաթումի քաղաքում կայանալիք Եվրոպայի առաջնությանը, որտեղ հարթակ դուրս կգա 58 կգ քաշային կարգում:

Ապրիլի 19-ից 26-ը Վրաստանի Բաթումի քաղաքում կկայանա ծանրամարտի Եվրոպայի մեծահասակների առաջնությունը:

Ինչպես տեղեկացնում է Հայաստանի ծանրամարտի ֆեդերացիայի մամուլի ծառայությունը, արդեն հաստատվել են Հայաստանի կանանց և տղամարդկանց ազգային հավաքականների կազմերը, որոնք կմասնակցեն ստուգատեսին:

Ստորև ներկայացնում ենք մեր ընտրանիների հայտացուցակներն ըստ քաշային կարգերի.

Կանանց հավաքական

• 53 կգ՝ Տանզելա Գրիգորյան, Իզաբելլա Յայլյան
• 58 կգ՝ Ալեքսանդրա Գրիգորյան
• 77 կգ՝ Աննա Ամրոյան, Ալինա Սուքիասյան
• 86 կգ՝ Էմմա Պողոսյան, Լիանա Գյուրջյան
• +86 կգ՝ Տաթև Հակոբյան

Մարզչական շտաբ.

Հավաքականի գլխավոր մարզիչն է Արտաշես Ներսիսյանը, երկրորդ մարզիչը՝ Տարոն Թովմասյանը:

Տղամարդկանց հավաքական

• 60 կգ՝ Գառնիկ Չոլաքյան
• 71 կգ՝ Գոռ Սահակյան
• 79 կգ՝ Մարտին Պողոսյան
• 88 կգ՝ Ռաֆիկ Հարությունյան
• 94 կգ՝ Արա Աղանյան
• 110 կգ՝ Սիմոն Մարտիրոսյան, Գարիկ Կարապետյան
• +110 կգ՝ Վարազդատ Լալայան

Մարզչական շտաբ.

Հավաքականի գլխավոր մարզիչն է Հակոբ Փիլոսյանը, երկրորդ մարզիչը՝ Դավիթ Մուրադյանը: