Մեծ սաղավարտի մրցաշարերի յոթակի հաղթող, աշխարհի երկրորդ ռակետ, իսպանացի թենիսիստ Կառլոս Ալկարասը ճանաչվել է «Տարվա մարզիկ» հեղինակավոր Laureus World Sports Awards – 2026 մրցանակաբաշխության վարկածով: Գլխավոր մարզական իրադարձություններից մեկն արդեն երրորդ տարին անընդմեջ անցկացվում է Իսպանիայի մայրաքաղաք Մադրիդում։

Այս պատվավոր կոչման համար իսպանացի թենիսիստի հետ համառ պայքար էին մղում համաշխարհային սպորտի այնպիսի գերաստղեր, ինչպիսիք են.

• Յանիկ Սիներ (թենիս, Իտալիա)
• Ուսման Դեմբելե (ֆուտբոլ, Ֆրանսիա)
• Արման Դյուպլանտիս (աթլետիկա, Շվեդիա)
• Մարկ Մարկես (մոտոարշավ, Իսպանիա)
• Տադեյ Պոգաչար (հեծանվասպորտ, Սլովենիա)

Նշենք, որ Laureus Awards-ի հանրահայտ արձանիկը նախագծվել և պատրաստվել է շքեղության խորհրդանիշ հանդիսացող Cartier ապրանքանիշի կողմից: Ալկարասն իր մրցանակը ստացել է ֆուտբոլային լեգենդներ Իկեր Կասիլյասի և Լուիշ Ֆիգուի ձեռքից։

Համաձայն կանոնակարգի՝ Laureus-ի անվանակարգերի հավակնորդների կարճ ցուցակները ևավորվում են ավելի քան 70 երկրների շուրջ 1000 առաջատար մարզական ԶԼՄ-ների ներկայացուցիչների քվեարկության արդյունքում: Դրանից հետո Laureus համաշխարհային մարզական ակադեմիան գաղտնի քվեարկությամբ ընտրում է հաղթողներին:

Արտաշատի քաղաքային մարզադաշտում օրերս անցկացվել է Հայաստանի աթլետիկայի 2025 թվականի առաջնությունը, որին ավելի քան 70 մարզիկ-մարզուհի է հայտավորվել: Այս մասին հայտնում է ԿԳՄՍՆ պաշտոնական կայքը:

Հայաստանի չեմպիոններ են դարձել Մանուկ Մանուկյանը (մուրճի նետում, գնդի հրում), Մարի Սարգսյանը (800 մետր,1500 մետր վազք), Յանա Սարգսյանը (եռացատկ, հեռացատկ), Վահան Մանուկյանը (նիզակի նետում), Գոռ Հովակիմյանը (եռացատկ), Միլենա Գրիգորյանը (400 մետր վազք), Արամ Արամյանը (400 մետր վազք), Երվանդ Մկրտչյանը (800 մետր վազք), Գայանե Չիլոյանը (100 մետր, 200 մետր վազք), Սամվել Գևորգյանը (200 մետր վազք), Մելինե Ադամյանը (100 մետր, 400 մետր վազք), Սուսաննա Բաբայանը (գնդի հրում), Մարիամ Մկրտչյանը (նիզակի նետում), Լիլիթ Մկրտչյանը (սկավառակի նետում), Ժաննա Շահնազարյանը (մուրճի նետում):

Առաջնության արդյունքներով կձևավորվի Հայաստանի հավաքականը, որը հունիսի 24–25–ին Սլովենիայի Մարիբոր քաղաքում կմասնակցի Եվրոպայի թիմային առաջնությունը: Նախատեսվում է շուրջ 20 աթլետների մասնակցություն:

Լուսանկարները՝ Դավիթ Ղուշչյանի

Վազորդ Երվանդ Մկրտչյանը հաղթող է ճանաչվել Իրանի Մաշադ քաղաքում անցկացված միջազգային խոշոր մրցաշարի 1500 մետր վազքում՝ 3. 48, 17 արդյունքով:

Մրցաշարի երկրորդ օրը Երվանդը մասնակցել է 5000մ. վազքին: Այստեղ էլ նա 14. 40, 12 ժամանակ արդյունքով ճանաչվել է երկրորդը:

Հայաստանի մյուս ներկայացուցիչ, ցատկորդ Գոռ Հովակիմյանը եռացատկի մրցումներով ցույց է տվել 15 մ. 72 սմ արդյունք, իսկ հեռացատկում՝ 7մ. 41 սմ: Երկու դեպքում էլ դարձել է երկրորդ մրցանակակիր ու պարգևատրվել արծաթե մեդալներով:

Մայիսին նախատեսված են  համապետական մրցաշարերը: Կարևորվում են Հայաստանի առաջնությունը և Գառնիկ Ղուկասյանի ավանդական հուշամրցաշարը: Արտաշատում  հաջորդաբար կայանալիք այդ ստուգատեսների արդյունքներով կկազմվի երկրի գլխավոր թիմը, որը կմասնակցի միջազգային մրցումներին:

Մեր աթլետների համար ամառային մեկնարկների սկիզբը կազդարարվի հունիսի 24 – 25 –ին՝ Սլովենիայի Մարիբոր քաղաքում նախատեսված Եվրոպայի թիմային առաջնությունով:

Սերբիայի Զլատիբոր  քաղաքում  ապրիլի 8-10-ն անցկացվել է համաշխարհային գիմնազիադա անվանումով մարզական միջոցառում: Այս մասին հայտնում է ՀԱՕԿ-ի պաշտոնական կայքը:

Աթլետիկայի մրցումներին մասնակցել են Հայաստանի երեք ներկայացուցիչներ: Առավել  հաջող հանդես է եկել վանաձորցի արագավազորդ Գառնիկ Կոստանդյանը: Նա հաջողությամբ հաղթահարել է 200մ. վազքի նախնական փուլի արգելքը և դուրս է եկել եզրափակիչ: Մարզիչ Ակսել Հակոբյանի  սանը եզրափակչում մրցատարածությունը հաղթահարել է 24, 48 վայրկյանում և զբաղեցրել 7-րդ տեղը:

Երկօրյա ընդմիջումից հետո Բելգիայի մայրաքաղաք Բրյուսելում տեղի է ունեցել արդեն խճուղային վազքի Եվրոպայի անդրանիկ առաջնությունը: Մասնակիցները պայքարել են 10 կմ, 21 կմ / կիսամարաթոն և /  42 կմ 195մ / մարաթոնյան / վազքում: Հայտավորվածներից երկուսը ներկայացնում էին մեր երկիրը: Գոհացրեց ՀՀ դրոշի ներքո հանդես եկած, ամերիկաբնակ Նինա Ուսուբյանը: Մարաթոնյան վազքում 42 և ավելի կիլոմետրը նա հաղթահարել է 2 ժամ. 40 րոպե, 40 վրկ. ժամանակում, գրավել է 14-րդ  տեղը և սահմանել է Հայաստանի նոր ռեկորդ:

Մեր երկրորդ պատվիրակ Ռոման Ալեքսանյանը նույնպես հանդես է եկել մարաթոնյան վազքում: Նա եզրագիծը հատել է 2. 53, 19  ժամանակում:

Հայաստանի աթլետիկայի հավաքականի գլխավոր մարզիչ, վաստակավոր մարզիչ Գրիգոր Բարսեղյանը հայտնել է, որ ապրիլի 25-26-ին Իրանի Մաշադ քաղաքում կանցկացվի միջազգային խոշոր մրցաշար:  Մեր երկրից կմասնակցեն վազորդ Երվանդ Մկրտչյանը և ցատկորդ Գոռ Հովակիմյանը: Նրանցից առաջինը կմրցի 1500մ. և 5000մ.վազքատարծություններում, իսկ երկրորդը ՝ եռացատկում և հեռացատկում:

Վազորդ Երվանդ Մկրտչյանը ոսկե մեդալ է նվաճել Բելգրադում այսօր մեկնարկած Բալկանյան երկրների 2025 թ. ձմեռային բաց առաջնությունում՝ առաջինը հաղթահարելով 1500 մ. վազքատարածությունը:

Հայաստանի մյուս ներկայացուցիչ, եռացատկորդ Գոռ Հովակիմյանն էլ դարձել է առաջնության արծաթե մեդալակիր: Սա Հովակիմյանի առաջին մեդալն էր Բալկանյան երկրների առաջնությունում: Նա հանդես է գալու նաև հեռացատկում:

Գրիգոր Բարսեղյանի գլխավորությամբ մրցավայր են մեկնել նաև Ռազմիկ Ղազարյանը (եռացատկ), վազորդներ Սամվել Գևորգյանը (60 մ.), Միլենա Գրիգորյանը (400մ.), Յանա Սարգսյանը (հեռացատկ, եռացատկ) և Իզաբելա Առաքելյանը (հեռացատկ):

Մրցումների ավարտից հետո մեր թիմը տեղում երկշաբաթյա ուսումնամարզական հավաք կանցկացնի, որպեսզի Հայաստանի աթլետները հնարավորինս լավ մարզավիճակով ներկայանան Նիդերլանդներում մարտի 6-9-ը կայանալիք Եվրոպայի ծածկած մարզասրահների առաջնությանը:

Հայաստանի աթլետիկայի հավաքականը վաղը կմեկնի Բելգրադ՝ մասնակցելու Բալկանյան երկրների ձմեռային բաց առաջնությանը: Այս մասին հայտնում է ՀԱՕԿ-ի պաշտոնական կայքը:

Գրիգոր Բարսեղյանի գլխավորությամբ մրցավայր կմեկնեն միջին տարածության վազորդ Երվանդ Մկրտչյանը (1500մ.), Ռազմիկ Ղազարյանը (եռացատկ), Գոռ Հովակիմյանը (հեռացատկ, եռացատկ), վազորդներ Սամվել Գևորգյանը (60 մ.), Միլենա Գրիգորյանը (400մ.), Յանա Սարգսյանը (հեռացատկ, եռացատկ) և Իզաբելա Առաքելյանը (հեռացատկ):

Բալկանյան երկրների ձմեռային բաց առաջնությունը կմեկնարկի փետրվարի 15-ին:

Մրցումների ավարտից հետո մեր թիմը տեղում երկշաբաթյա ուսումնամարզական հավաք կանցկացնի, որպեսզի Հայաստանի աթլետները հնարավորինս լավ մարզավիճակով ներկայանան Նիդերլանդներում մարտի 6-9-ը կայանալիք Եվրոպայի ծածկած մարզասրահների առաջնությանը:

Հայաստանի աթլետները, ավանդույթի համաձայն, այս մրցաշրջանը նույնպես կսկսեն Լոռու ֆեդերացիայի բաց առաջնությունով, որը տեղի կունենա Վանաձորում հունվարի 25-ին: Այս մասին հայտնում է ՀԱՕԿ-ի պաշտոնական կայքը:

Դրան հաջորդող ամիսներին աթլետները կմարզվեն և կմրցեն խտացված գրաֆիկով: Նշենք փետրվարի 15–ին Բելգրադում կկայանա Բալկանյան երկրների ձմեռային բաց առաջնությունը, իսկ Նիդերլանդներում մարտի 6-9 –ը կանցկացվի Եվրոպայի ձմեռային ստուգատեսը: Դրանից երկու շաբաթ հետո՝ մարտի 21-23-ը, Չինաստանի Նանջինգում նախատեսված է փակ մարզադահլիճների աշխարհի առաջնությունը, որը չեղարկվել էր 2021թ.՝ կովիդ համավարակի պատճառով:

Մարզաձևի միջազգային օրացուցային պլանում առաջին անգամ ամրագրված է խճուղային վազքի Եվրոպայի առաջնությունը: Մասնակցող վազորդները ապրիլի 12-ից իրենց դիմացկունությունն ու տակտիկական հմտությունները կդրսևորեն Բրյուսելում կայանալիք ստուգատեսի 10 կմ, 21 կմ / կիսամարաթոն / և մարաթոնյան վազքում:

Արտաշատում մայիսին նշանակված է Հայաստանի աթլետիկայի առաջնությունը: Լավագույն արդյունք ցույց տված աթլետներով կազմվելու է հավաքական, որն ընդլայնված կազմով կմասնակցի Սլովենիայի Մարիբուր քաղաքում հունիսի 24–ին մեկնարկելիք Եվրոպայի թիմային առաջնությանը:

Տարվա գլխավոր ստուգատեսը սեպտեմբերին Տոկիոյում կայանալիք աշխարհի առաջնությունն է:

Արտաշատի քաղաքային մարզադաշտում աթլետիկայի վազքուղու կառուցման աշխատանքները թևակոխում են գործնական փուլ, գրում է ՀՀ կրթության, գիտության, մշակույթի և սպորտի նախարարության կայքը:

Նախարարի տեղակալ Կարեն Գիլոյանը երեկ աշխատանքային այց է կատարել Արտաշատ: Համայնքի ղեկավար Կարեն Բենիամինյանի հետ նախարարի տեղակալն այցելել է Արտաշատի քաղաքային մարզադաշտ, որտեղ օրեր անց մեկնարկելու են միջազգային չափանիշներին համապատասխան, Աթլետիկայի ֆեդերացիաների միջազգային ասոցիացիայի կողմից հավաստագրված վազքուղու կառուցման աշխատանքները: Այդ նպատակով ՀՀ կառավարության որոշմամբ հատկացվել է 71 մլն 860.4 հազար դրամ:

«Աշխատանքները պետք է իրականացնել հնարավորինս արագ և արդյունավետ: Հապաղել պետք չէ, քանի որ յուրաքանչյուր օրը կորուստ է սպորտի համար: Վազքուղու կառուցմամբ Արտաշատը կդառնա աթլետիկայի կենտրոն, իսկ հայ մարզիկները միջազգային մրցումներում առավել բարձր արդյունքներ կգրանցեն: Բացի դրանից՝ Արարատի մարզն ավելի սպորտային տեսք կստանա՝ հնարավորություն ունենալով անցկացնելու միջազգային մրցաշարեր»,- ասել է ԿԳՄՍ նախարարի տեղակալ Կարեն Գիլոյանը:

Արտաշատի համայնքապետ Կարեն Բենիամինյանը տեղեկացրել է, որ որոշ ընթացակարգային հարցերից հետո առաջիկա օրերին ներկայիս՝ դեռևս 1980-ականներին տեղադրված վազքուղին կապամոնտաժվի, կլուծվեն ջրահեռացման հետ կապված խնդիրները, և կմեկնարկեն նոր վազքուղու կառուցման աշխատանքները:

«Շնորհակալ ենք հետևողական վերաբերմունքի համար: Մարզում սպորտային ենթակառուցվածքների զարգացումը բխում է բոլորիս շահերից»,- ասել է Կարեն Բենիամինյանը և վստահեցրել, որ բոլոր աշխատանքները կիրականացվեն պատշաճ մակարդակով:

Արտաշատ կատարած աշխատանքային այցի շրջանակում քննարկվել են նաև համայնքի սպորտային կյանքին, ենթակառուցվածքների զարգացմանը, բարձր արդյունքներ գրանցող մարզիկներին և նրանց մարզիչներին խրախուսելու տարբերակներին առնչվող հարցեր:

Եռացատկորդ Լևոն Աղասյանը հաղթող է ճանաչվել Կիպրոսում ընթացող Եվրոպայի առաջնությունում: Հայ մարզիկը ցույց է տվել 16մ. 77սմ արդյունքն ու ամենաբարձր միավորները վաստակել Հայաստանի թիմի համար:

Աղասյանը հրապարակել է իր ցատկի տեսանյութը՝ կից գրելով.

«Ինձ լավ եմ զգում և պատրաստ ավելի քրտնաջան աշխատելու: Վերադառնում ենք ավելի ուժեղ»,- գրել է Աղասյանը:

Հիշեցնենք՝ Աղասյանն օրեր առաջ Թբիլիսիում անցկացված Վրաստանի բաց առաջնությունում ցույց տվեց 17մ. 16սմ. արդյունք, երկու սանտիմետրով գերազանցեց անհրաժեշտ ցուցանիշը և Տոկիոյի օլիմպիական խաղերի ուղեգիր ապահովեց:

Կիպրոսում ընթացող Եվրոպայի առաջնությունը ևս վարկանիշային է օլիմպիական խաղերի համար:

Այսօր Կիպրոս է մեկնել Հայաստանի աթլետիկայի հավաքականը, հայտնում է ՀԱՕԿ-ը:

Մեր 20 մարզիկ-մարզուհիները կմասնակցեն Նիկոսիայում հունիսի 19-ին մեկնարկելիք Եվրոպայի թիմային առաջնությանը: Երրորդ խմբի մրցաշարում Հայաստանի պատվիրակները հանդես կգան վազորդների, նետորդների և ցատկորդների մրցումներում: Մրցաշարը նաև վարկանիշային է ՏՈԿԻՈ-2020-ի համար, և պահանջվող արդյունքների հասնող մարզիկները կմասնակցեն Տոկիոյի օլիմպիական խաղերին:

Մեր պատվիրակության կազմում է նաև կապանցի եռացատկորդ Լևոն Աղասյանը, որը օրեր առաջ Թբիլիսիում անցկացված Վրաստանի բաց առաջնությունում ցույց տվեց 17մ 16սմ արդյունք, երկու սանտիմետրով գերազանցեց անհրաժեշտ ցուցանիշը և համալրեց մեր օլիմպիականների շարքը: