Իսպանիայի հավաքականի և կատալոնական «Բարսելոնայի» հարձակվող Լամին Յամալը պատմել է, թե ինչ է ասել Արգենտինայի ազգային թիմի և «Ինտեր Մայամիի» հարձակվող Լիոնել Մեսսիին ԱԱ-2026-ի եզրափակիչից հետո, որում «Կարմիր ֆուրիան» հաղթել էր 1:0 հաշվով։

«Ես շնորհակալություն հայտնեցի այն ամենի համար, ինչ նա տվել է ֆուտբոլին։ Ես ոչինչ չեմ անում պարզապես լուսանկարում լավ տեսք ունենալու համար, ամեն ինչ բխում է ներսից։

Միշտ համարել եմ, որ նա լավագույնն է, անգամ այն ժամանակ, երբ դեռ չէր հաղթել Աշխարհի առաջնությունն ու Ամերիկայի գավաթը»,- Յամալի խոսքերն է մեջբերում The Guardian-ը։

Հիշեցնենք, որ 2026 թվականի աշխարհի առաջնությունում 39-ամյա Մեսսին մասնակցել է 8 հանդիպման՝ դառնալով նույնքան գոլի և 4 գոլային փոխանցման հեղինակ։

Իսպանիայի հավաքականի ֆուտբոլիստներից մեկն իր՝ 2026 թվականի Աշխարհի գավաթի հաղթանակի բոնուսը, որը գնահատվում է մոտ 1 միլիոն եվրո, նվիրաբերել է Իսպանիայի ֆուտբոլի ֆեդերացիայի աշխատակազմին, հաղորդում է As-ը։

Իսպանական ֆուտբոլի թագավորական ֆեդերացիան (RFEF) և ֆուտբոլիստները համաձայնության են եկել մրցանակային գումարի բաշխման համակարգի շուրջ՝ հիմնվելով թիմի՝ Աշխարհի գավաթում ցուցադրած արդյունքների վրա։ Որքան երկար էր թիմը մնում Հյուսիսային Ամերիկայում, այնքան ավելի շատ միջոցներ էին հատկացվում ֆուտբոլիստներին և մարզչական անձնակազմին։ Ընդհանուր վճարումները կազմել են մոտ 50 միլիոն եվրո։

Համաձայնագրի պայմանների համաձայն՝ 26 ֆուտբոլիստից յուրաքանչյուրը գիտեր, որ ունի գրեթե 1 միլիոն եվրո բոնուս՝ Աշխարհի գավաթի տիտղոսը նվաճելու համար։ Սակայն ֆուտբոլիստներից մեկը որոշել է հրաժարվել իր բոնուսից, որպեսզի գումարը ուղղվի RFEF-ի աշխատակազմին։

Այս ֆուտբոլիստը ցանկացել է և դեռևս ցանկանում է անանուն մնալ։ Իր արարքով նա ցանկանում էր իր երախտագիտությունը հայտնել նրանց, ում համարում է իր ուղեկիցները այս ճանապարհորդության ընթացքում՝ այն անձնակազմին, որը աշխատում է թիմի հետ «կուլիսների հետևում», հատկապես երկարատև մարզական հավաքների ժամանակ։

«Ատլետիկո Մադրիդի» պաշտպան Մարկոս ​​Լյորենտեն սոցիալական ցանցերում գրառում է կատարել՝ հայտարարելով Իսպանիայի հավաքականից հեռանալու մասին։

31-ամյա ֆուտբոլիստը օգնել է ազգային հավաքականին հաղթել 2026 թվականի Աշխարհի առաջնությունը։ Նա մասնակցել է մրցաշարի երեք հանդիպման և գոլային փոխանցում է կատարել խմբային փուլի Ուրուգվայի դեմ տարած 1-0 հաշվով հաղթանակի ժամանակ։

«Երկար մտորումներից հետո որոշեցի ավարտել կարիերաս ազգային հավաքականում։

Հասկանում եմ, որ դեռ բավականին երիտասարդ եմ, և գուցե, եթե շարունակեի լավ հանդես գալ, ևս մի քանի տարի հնարավորություն կունենայի խաղալու այս մարզաշապիկով։

Գիտեմ, որ շատերը չեն հասկանա ինձ, և ես, հավանաբար, նաև դրսից չէի հասկանա այս որոշումը։ Բայց սա անձնական որոշում է, շատ ուշադիր մտածված և, ամենից առաջ, սրտից բխող։ Անկախ նրանից՝ ես մասնակցել եմ Աշխարհի առաջնությանը, թե ոչ, հաղթել ենք այն, թե ոչ, այս որոշումն արդեն կայացված է եղել նախապես։

Ես կարող եմ միայն անսահման շնորհակալություն հայտնել բոլոր այն մարդկանց, որոնց հետ հանդիպել եմ տարիների ընթացքում, որոնց շնորհիվ ես և իմ ընտանիքը կարողացանք ապրել եզակի և անմոռանալի պահեր։ Ես կգնահատեմ այն ​​ամենը, ինչ ապրել եմ, բայց հատկապես վերջին 52 օրերը։ Այս անգամ հրաշալի թիմի հետ, որը մինչև վերջ պայքարեց Իսպանիան գագաթնակետին հասցնելու համար։ Եվ մենք հաջողության հասանք։

Պատիվ էր ներկայացնել իմ երկիրը և լինել այս պատմության մի մասը։ Շնորհակալություն ամեն ինչի համար», — գրել է Լյորենտեն։

Արգենտինայի ֆուտբոլի ասոցիացիան մտադիր է բողոքարկել ՖԻՖԱ-ի որոշումը, որով կազմակերպությունը խոշոր տուգանքների և որակազրկումների է ենթարկել արգենտինացիներին՝ ԱԱ-2026-ի եզրափակչից հետո տեղի ունեցած միջադեպերի համար։ Այս մասին հայտնում է ԱՖԱ-ի մամուլի ծառայությունը:

Հիշեցնենք, որ ԱԱ-2026-ի եզրափակչում Արգենտինայի հավաքականը լրացուցիչ ժամանակում 0:1 հաշվով զիջել էր Իսպանիային, ինչից հետո թիմերի միջև բախում էր տեղի ունեցել։

Ուրբաթ օրը ՖԻՖԱ-ն հրապարակել էր պատժամիջոցների ցանկը։ Արգենտինայի ֆուտբոլի ասոցիացիան տուգանվել է ընդհանուր 321 հազար դոլարով հետևյալ խախտումների համար.

• Մարզական միջոցառումը ոչ մարզական վարքագիծ դրսևորելու նպատակով օգտագործելը,
• Թիմի ոչ պատշաճ պահվածքը,
• Խտրականությունը և ռասիստական վիրավորանքները (երկրպագուների կողմից հնչեցված վանկարկումների և ժեստերի համար),
• Հանդիպումների ժամանակ կարգուկանոնի և անվտանգության կանոնների խախտումը։

Բացի ֆինանսական տույժերից, Արգենտինայի հավաքականն առաջիկա երկու տնային հանդիպումները պետք է անցկացնի երկրպագուների սահմանափակ քանակով՝ մարզադաշտի տարողունակության առավելագույնը 50%-ի չափով: Նշվում է, որ տուգանքից 100 հազար դոլարը պետք է ուղղվի խտրականության դեմ պայքարին, իսկ պատժամիջոցների մի մասի (մեկ հանդիպում և 100 հազար դոլար) կիրառումը հետաձգվել է փորձաշրջանի ավարտին:

Խիստ պատիժների են արժանացել նաև Արգենտինայի ընտրանու ներկայացուցիչները.

• Լեանդրո Պարեդես (կիսապաշտպան) – 10 խաղով որակազրկում և 90 հազար դոլար տուգանք,
• Նաուել Մոլինա (պաշտպան) – 7 խաղով որակազրկում և 90 հազար դոլար տուգանք,
• Տիագո Ալմադա (կիսապաշտպան) – 1 խաղով որակազրկում և 30 հազար դոլար տուգանք,
• Ռոբերտո Այալա (մարզիչ) – 3 խաղով որակազրկում և 30 հազար դոլար տուգանք։

«Ստացված ծանուցումների լույսի ներքո և ի պաշտպանություն ասոցիացիայի ու ֆուտբոլիստների իրավունքների՝ ԱՖԱ-ի իրավաբանական բաժինը սահմանված կարգով ՖԻՖԱ-ից կպահանջի որոշումների հիմնավորումը, որպեսզի այնուհետև համապատասխան բողոքներ ներկայացնի Համաշխարհային ֆուտբոլի կառավարող մարմնի բողոքարկման կոմիտե: Որպես ծայրահեղ միջոց՝ պահպանվում է նաև Մարզական արբիտրաժային դատարան (CAS) դիմելու հնարավորությունը»,- ասված է ԱՖԱ-ի պաշտոնական կայքում տեղադրված հայտարարության մեջ։

ՖԻՖԱ-ի կարգապահական կոմիտեն պատժամիջոցներ է կիրառել Արգենտինայի ազգային հավաքականի ֆուտբոլիստների, մարզչական շտաբի և ֆուտբոլի ասոցիացիայի (AFA) նկատմամբ՝ հուլիսի 19-ին կայացած ԱԱ-2026-ի եզրափակիչից հետո տեղի ունեցած միջադեպերի համար։

Հիշեցնենք, որ այդ խաղի լրացուցիչ ժամանակում Իսպանիան 1-0 հաշվով հաղթել էր Արգենտինային, իսկ եզրափակիչ սուլիչից հետո արգենտինացիների հրահրմամբ դաշտում զանգվածային քաշքշուկ էր սկսվել։

Անհատական որակազրկումներ և տուգանքներ

Կարգապահական կոմիտեի որոշմամբ ծեծկռտուքի ակտիվ մասնակիցները ստացել են հետևյալ պատիժները․

• Լեանդրո Պարեդես (Արգենտինա)․ Ամենախիստ պատիժը ստացել է արգենտինացի կիսապաշտպանը, որը ֆիզիկական ուժ էր կիրառել իսպանացի խաղացողների նկատմամբ։ Նա որակազրկվել է 10 խաղով և տուգանվել 90 հազար դոլարով։
• Նաուել Մոլինա (Արգենտինա)․ Պաշտպանը որակազրկվել է 7 խաղով և նույնպես տուգանվել 90 հազար դոլարով։ Միջադեպի ժամանակ նա բռունցքով հարվածել էր իր կողքով վազող Իսպանիայի հավաքականի ավագ Ռոդրիի կրծքավանդակին, ինչից հետո սկսվել էր վիճաբանությունը։
• Ռոբերտո Այալա (Արգենտինա, մարզիչ)․ Արգենտինայի հավաքականի մարզչական շտաբի անդամը որակազրկվել է 3 հանդիպումով և տուգանվել 30 հազար դոլարով։ Նա վիճաբանել էր իսպանացի Դանիել Օլմոյի հետ և հարվածել նրա դեմքին։
• Տիագո Ալմադա (Արգենտինա) և Գավի (Իսպանիա)․ Քաշքշուկին մասնակցելու համար արգենտինացի ու իսպանացի կիսապաշտպանները որակազրկվել են մեկական խաղով և տուգանվել 30-ական հազար դոլարով։

Կարևոր է նշել, որ վերոնշյալ բոլոր որակազրկումները վերաբերում են բացառապես ազգային հավաքականների պաշտոնական հանդիպումներին և չեն տարածվում ֆուտբոլիստների ակումբային ելույթների վրա։ 

Պատժամիջոցներ Արգենտինայի ֆուտբոլի ասոցիացիայի (AFA) նկատմամբ

Բացի խաղացողների անհատական պատիժներից, ՖԻՖԱ-ն AFA-ին տուգանել է ընդհանուր առմամբ 321 հազար դոլարով՝ աշխարհի առաջնության մի քանի խաղերում գրանցված կանոնակարգային խախտումների համար։

Խախտումների թվում նշվում են երկրպագուների խտրական վանկարկումներն ու ժեստերը, թիմի ոչ պատշաճ վարքագիծը, անվտանգության ապահովման ձախողումները, ինչպես նաև սպորտային միջոցառումը քաղաքական նպատակներով օգտագործելը (մասնավորապես՝ տրիբունաներում «Մալվինյան կղզիները պատկանում են Արգենտինային» գրությամբ պաստառի ցուցադրումը)։

Որպես լրացուցիչ պատիժ՝ Արգենտինայի հավաքականը պարտավորվել է իր հաջորդ երկու տնային հանդիպումներն անցկացնել մարզադաշտի տրիբունաների 50 տոկոս զբաղվածությամբ։ Նշվում է, որ տուգանքի գումարից 100 հազար դոլարն ուղղվելու է խտրականության դեմ պայքարի ծրագրերին:

Միջադեպի տեսանյութ՝ ստորև․

What did Leandro Paredes do?

Paredes received a 10-match international ban and a $90,000 fine for his role in a violent, chaotic on-field brawl after Argentina’s 1-0 defeat to Spain in the 2026 World Cup final.

He was found guilty of;

✅Multiple counts of violent conduct,… pic.twitter.com/dwiAURRRbs

— Casmir E. C (@BubeCassy) August 21, 2026

Ամերիկացի հայտնի դերասան Բրեդ Փիթը հայտարարել է, որ ցանկանում է ֆուտբոլիստներին սովորեցնել ավելի համոզիչ կերպով ձևացնել կանոնների խախտումները։

Esquire ամսագիրը 62-ամյա դերասանի և պրոդյուսերի հետ զրուցել է հուլիսի 29-ին՝ ԱԱ-2026-ի 1/16 եզրափակիչի Գերմանիա — Պարագվայ (1-1, 11-մետրանոցներով՝ 3-4) հանդիպման ժամանակ։ Դրվագներից մեկում հարավամերիկացի ֆուտբոլիստը վայր է ընկել ու սկսել գալարվել խոտածածկին։

«Ես պատրաստվում եմ սիմուլյացիայի դասեր տալ, որովհետև այս տղաներն ուղղակի սարսափելի են խաղում»,- ասել է Փիթը։

Դրանից հետո նա ոտքի է կանգնել և ձևացրել, թե վայր է ընկնում. նրա ձեռքերը թուլացել են, ոտքերը ծալվել են, իսկ դերասանը դեմքի ծամածռություն է արել՝ ցույց տալով չափազանցված, կեղծ ցավ։

«Սա գրեթե վատագույն դերասանական խաղն է, որը ես երբևէ տեսել եմ։ Հասկանում եմ, որ մրցակցի կողմից խախտումներ հրահրելը մարտավարության մի մասն է, բայց, գրողը տանի, նրանց լուրջ օգնություն է պետք։ Եվ ես կսկսեմ Նեյմարից, քանի որ նա դաշտում բալետի պարողի պես է, և նրան հաստատ օգնություն է հարկավոր։ Ես ցույց կտամ նրան, թե ինչպես «ծախել» խախտումը, ինչպես դա անել զուսպ և ոչ շատ հաճախ, որպեսզի այն համոզիչ դիտվի։ Ես ուսուցման մի ամբողջ ծրագիր ունեմ։

Սա այն բաներից է, որն ընդունված է, բայց ոչ մեկին դուր չի գալիս՝ ինչպես 1940-ականների դերասանական խաղը, երբ դերասանուհիները պարզապես ուշագնաց էին լինում հիացմունքից (Փիթը ձեռքի հակառակ կողմը դրել է ճակատին և կանացի բարձր ձայնով ասել՝ «Աստված իմ»)։ Վատ խաղն ինձ հունից հանում է»,- հավելել է հոլիվուդյան աստղը։

Հիշեցնենք, որ 2026 թվականի աշխարհի առաջնության եզրափակիչում Իսպանիայի հավաքականը լրացուցիչ ժամանակում 1-0 հաշվով հաղթեց Արգենտինային՝ իր պատմության մեջ երկրորդ անգամ հռչակվելով աշխարհի չեմպիոն։

Աշխարհի առաջնությունում Իսպանիայի հավաքականի կազմում հաղթանակ տոնելուց հետո Գավին վերադարձել է «Բարսելոնայի» մարզաբազա։ Երկրպագուներն անհամբերությամբ սպասում էին երիտասարդ կիսապաշտպանի վերադարձին, սակայն նա քննարկումների նոր առիթ է տվել՝ ներկայանալով բոլորովին նոր ու համարձակ իմիջով:

Չնայած հիմնական շեշտը դրված էր տակտիկայի և ֆիզիկական պատրաստվածության վրա, 22-ամյա ֆուտբոլիստի նոր սանրվածքն արագորեն դարձել է երկրպագուների և իսպանական մամուլի գլխավոր թեմաներից մեկը:

Արձակուրդից հետո Գավին մարզումները վերսկսել է միայն այս շաբաթ։ Հինգշաբթի նա աշխատել է անհատական ծրագրով. մարզչական շտաբը որոշել է աստիճանաբար ինտեգրել նրան թիմային աշխատանքին երկարատև հանգստից հետո:

Ամենատպավորիչը աշխարհի չեմպիոնին ակումբային գույներով և նկատելիորեն փոխված ոճով տեսնելն էր։ «Բարսելոնայի» երկրպագուները միշտ գնահատել են այն ֆուտբոլիստներին, ովքեր տաղանդի հետ մեկտեղ աչքի են ընկնում նաև խարիզմայով, և Գավիի նոր իմիջը լրացուցիչ ինտրիգ ու գույն հաղորդեց նրա շատ սպասված վերադարձին:

 

Посмотреть эту публикацию в Instagram

 

Публикация от FC Barcelona (@fcbarcelona)

ԱՄՆ-ի ոստիկանությունը հրապարակել է այն սպառնալիքների մանրամասները, որոնց իրենք և Հետախուզությունների դաշնային բյուրոն (ՀԴԲ) բախվել են աշխարհի 2026 թվականի ֆուտբոլի առաջնության ընթացքում։ Այս մասին հաղորդում է իսպանական Marca պարբերականը։

Աղբյուրի տեղեկություններով՝ ստացված սպառնալիքների քանակով «ռեկորդակիրը» եղել է Արգենտինայի ազգային հավաքականի հարձակվող Լիոնել Մեսսին։ Արգենտինա — Հորդանան (3-1) խմբային փուլի հանդիպումից առաջ մի տղամարդ զանգահարել է Դալասի օդանավակայան և «սպառնացել գրոհել մարզադաշտը ևս երկու անձի հետ, որոնք զինված են ինքնաշեն ռումբերով և հրացաններով՝ հատուկ շեշտելով Մեսսիի անունը՝ նրան սպանելու նպատակով»։

Մեսսիի հասցեին սպառնալիքները կրկնվել են նաև 1/8 եզրափակիչի՝ Եգիպտոսի դեմ խաղից (3-2) առաջ։

«Ես պատրաստվում եմ ներխուժել Ատլանտայի մարզադաշտ և պայթեցնել Մեսսիին իմ մարմնին ամրացված չորս ռումբով»,- սոցիալական ցանցերում գրել է մի տղամարդ։

Բացի այդ, ահազանգ է ստացվել, որ մարզադաշտի աղբամաններում երեք ռումբ է թաքցված, սակայն շների ներգրավմամբ իրականացված խուզարկությունը ցույց է տվել, որ ահազանգը կեղծ էր։

Սպառնալիքները չեն շրջանցել նաև Պորտուգալիայի ազգային հավաքականի առաջատար Կրիշտիանու Ռոնալդուին։ Հյուրանոցում, որտեղ հանգրվանել էր Պորտուգալիայի ընտրանին, նկատվել է «կասկածելի մի տղամարդ», որը մանրամասն տեղեկություններ է պահանջել Ռոնալդուի գտնվելու վայրի մասին։ Այս մասին ՀԴԲ-ն տեղեկացրել է ՖԻՖԱ-ին, իսկ երկու օր անց այդ տղամարդը Հյուսթոնի ոստիկանության կողմից ձերբակալվել է նույն հյուրանոցում։ Նմանատիպ դեպք է գրանցվել նաև Տորոնտոյում. մեկ այլ տղամարդ փորձել է մտնել այն վերելակը, որում այդ պահին գտնվել է պորտուգալացին։

Անվտանգության հետ կապված լուրջ խնդիրներ են ունեցել նաև մրցավարները։ Արգենտինա — Եգիպտոս հանդիպման գլխավոր մրցավար Ֆրանսուա Լետեքսիեն մեսենջերներից մեկում ավելի քան 6000 սպառնալիք է ստացել։ Նմանատիպ իրավիճակում է հայտնվել նաև այդ խաղի VAR-ի մրցավար Վիլի Դելաժոն։ Ստեղծված իրավիճակից ելնելով՝ Ֆրանսիայում խստացրել են նրանց տների և ընտանիքների անվտանգության պահպանման միջոցառումները։

«Բարսելոնայի» կիսապաշտպան Գավին այսուհետ հանդես կգա վարդագույն մազերով։ Դեռևս հունիսին՝ աշխարհի առաջնության խմբային փուլի ընթացքում, 22-ամյա ֆուտբոլիստը հրապարակավ հայտարարել էր, որ վարդագույն կներկի մազերը, եթե Իսպանիայի ազգային հավաքականը դառնա Մունդիալի հաղթող։

Այդպես էլ եղավ. իսպանացիները սայթաքեցին Կաբո Վերդեի դեմ առաջին խաղում (0-0), սակայն այնուհետև հաղթանակ տարան բոլոր հանդիպումներում և պատմության մեջ երկրորդ անգամ նվաճեցին աշխարհի գավաթը։ Եզրափակիչում «Ֆուրիա ռոխան» 1-0 հաշվով առավելության հասավ Արգենտինայի ընտրանու նկատմամբ։

Այժմ Գավին պահել է խոստումը. նա սոցիալական ցանցերում հրապարակել է լուսանկարներ վարդագույն մազերով՝ կից անելով հետևյալ գրառումը. «Խոսքի տեր մարդ»։

Նշենք, որ «Բարսայի» կիսապաշտպանը Իսպանիայի հաղթական աշխարհի առաջնությունում մասնակցել է երկու հանդիպման։

 

View this post on Instagram

 

Բրազիլիայի ազգային հավաքականի գլխավոր մարզիչ Կառլո Անչելոտին հաստատել է, որ աշխարհի 2026 թվականի առաջնությունից հետո ազգային թիմում ելույթներն ավարտել է ոչ միայն հարձակվող Նեյմարը, այլև պաշտպան Դանիլոն և կիսապաշտպան Կազեմիրոն։

«Աշխարհի առաջնությունից հետո մի խումբ կարևոր խաղացողներ ավարտեցին ելույթները հավաքականում՝ սկսած Նեյմարից, վերջացրած Դանիլոյով և Կազեմիրոյով։ Մեզ նոր ֆուտբոլիստներ են պետք, ընդ որում՝ ոչ միայն ԱԱ-2030-ի, այլև 2028 թվականի Ամերիկայի գավաթի խաղարկության համար»,- Անչելոտիի խոսքերն է մեջբերում The Athletic-ը։

Հիշեցնենք, որ Նեյմարը Բրազիլիայի հավաքականի կազմում անցկացրել է 130 հանդիպում, իսկ Դանիլոն ու Կազեմիրոն՝ համապատասխանաբար 75 և 91։