Ազատ ոճի — Armsport.am

🎥 RAF 10. Ծառուկյանն ու Հարությունյանը հանդիպել են իրենց մրցակիցներին և անցկացրել հայացքների մենամարտեր

Suren Sahakyan — Sat, 13 Jun 2026 09:10:31 +0000

ԱՄՆ-ի Սենթ Լուիս քաղաքում անցկացվել են հունիսի 13-ին կայանալիք RAF 10 (Real American Freestyle) մրցաշարի մամուլի ասուլիսն ու մարզիկների հայացքների մենամարտերը։

Առաջիկա մրցաշարի սպասված իրադարձություններից է UFC-ի թեթև քաշային կարգի դասակարգման երկրորդ համար Արման Ծառուկյանի և պրոմոուշենի նախկին ժամանակավոր չեմպիոն Թոնի Ֆերգյուսոնի գոտեմարտը։ Մարտիկների դեմառդեմ հանդիպումն աչքի է ընկել զավեշտալի միջադեպով. ամերիկացին անսպասելիորեն կատակով կսմթել է Ծառուկյանին, ինչից հետո երկուսն էլ ծիծաղել են ու շարունակել կեցվածք ընդունել լրատվամիջոցների համար։ Ի դեպ, նույն մրցաշարում նորամուտը կնշի նաև Խամզատ Չիմաևը, որի մրցակիցը կլինի Դիլլոն Դանիսը։

Why did Tony Ferguson grab Arman Tsarukyan’s nipple during their face off? 😭 pic.twitter.com/YEOfAqgEPs

— ACD MMA (@acdmma_) June 12, 2026

RAF-ում իր նորամուտին է պատրաստվում նաև ազատ ոճի ըմբշամարտի Եվրոպայի քառակի չեմպիոն և աշխարհի առաջնության քառակի բրոնզե մեդալակիր Արսեն Հարությունյանը։ 26-ամյա հայ ըմբիշն արդեն հայացքների մենամարտ է անցկացրել իր նոր մրցակցի՝ ամերիկացի Քեյլեբ Սմիթի հետ։

Հիշեցնենք, որ նախապես նշվում էր, որ Արսեն Հարությունյանը գոտեմարտելու է Փարիզի Օլիմպիական խաղերի չեմպիոն, ճապոնացի Ռեյ Հիգուչիի հետ: Օլիմպիական չեմպիոնը դուրս է եկել մրցաշարից:

View this post on Instagram

Ծառուկյանը կրկին կգոտեմարտի RAF-ի կազմում՝ Վրաստանում կայանալիք դեբյուտային մրցաշարում

Suren Sahakyan — Sat, 06 Jun 2026 11:35:34 +0000

UFC-ի թեթև քաշային կարգի դասակարգման երկրորդ համար, Հայաստանը ներկայացնող Արման Ծառուկյանը ազատ ոճի ըմբշամարտի կանոններով հերթական գոտեմարտը կանցկացնի Ղազախստանի ներկայացուցիչ Քուաթ Խամիտովի հետ։

Այս մասին հայտնում է RAF (Real American Freestyle) կազմակերպության մամուլի ծառայությունը։ Դիմակայությունը կկայանա միջին քաշային կարգում՝ Վրաստանի մայրաքաղաք Թբիլիսիում անցկացվելիք RAF-ի դեբյուտային մրցաշարի շրջանակում։

Այսպիսով, 29-ամյա Ծառուկյանը կազմակերպության հովանու ներքո արդեն երեք հաստատված գոտեմարտ ունի առաջիկայում։ Արդեն հունիսի 13-ին նա ուժերը կչափի լեգենդար ամերիկացի Թոնի Ֆերգյուսոնի հետ, հուլիսի 11-ին կմրցի Խամիտովի, իսկ հուլիսի 18-ին՝ Քոլբի Քովինգթոնի դեմ։ Նշենք, որ մինչ այս Ծառուկյանը շատ հաջող է հանդես եկել RAF-ում՝ անցկացրած 5 գոտեմարտում տոնելով նույնքան հաղթանակ։

Ինչ վերաբերում է մարզիկների պրոֆեսիոնալ ուղուն, ապա Ծառուկյանի ակտիվում կա 23 հաղթանակ (15-ը՝ ժամանակից շուտ) և 3 պարտություն։ Խոշորագույն լիգայում՝ UFC-ում հայ մարտիկը հանդես է գալիս 2019 թվականի ապրիլից։

Նրա նոր մրցակիցը՝ 38-ամյա Քուաթ Խամիտովը, խառը մենամարտերում իր նորամուտը նշել է 2011 թվականին։ Ղազախստանի ներկայացուցիչն իր հաշվին ունի 28 հաղթանակ (8-ը՝ նոկաուտով), 8 պարտություն և 2 ոչ-ոքի։

🎥 Շահեն Մարտիրոսյանը եզրափակիչում 40 վայրկյանում հաղթել է թուրք ըմբիշին և դարձել Եվրոպայի Մ-15 չեմպիոն

Suren Sahakyan — Sat, 23 May 2026 19:46:58 +0000

Բուլղարիայի Սամոկով քաղաքում ընթացող ազատ ոճի ըմբշամարտի Եվրոպայի մինչև 15 տարեկանների առաջնությունում Հայաստանի ներկայացուցիչ Շահեն Մարտիրոսյանը նվաճել է ոսկե մեդալ։

68 կգ քաշային կարգի եզրափակիչում հայ ըմբիշը մրցել է Թուրքիան ներկայացնող Սարուհան Կարաօղլուի հետ։ Գոտեմարտի արդյունքում Մարտիրոսյանը ժամանակից շուտ 10-0 հաշվով պարտության է մատնել մրցակցին և հռչակվել չեմպիոն։

Հայաստանի հավաքականի կազմում ևս երկու մարզիկներ՝ 41 կգ քաշային Տիգրան Աղաջանյանը և 57 կգ քաշային Ատոմ Եսայանը, իրավունք են ստացել գորգ դուրս գալ բրոնզե մեդալների համար մղվող գոտեմարտերում։ Մրցաշարում իրենց ելույթները կշարունակեն նաև 38 կգ քաշային Նորայր Գևորգյանն ու 52 կգ քաշային Նարեկ Դալլաքյանը, որոնք կանցկացնեն սփոփիչ գոտեմարտեր։

Ըմբշամարտի Մ-15 ԵԱ․ Հայաստանի հավաքականների կազմերը

Suren Sahakyan — Wed, 20 May 2026 09:11:59 +0000

Բուլղարիայի Սամոկով քաղաքում մայիսի 20-ից 24-ը կայանալու է ըմբշամարտի մինչև 15 տարեկանների Եվրոպայի առաջնությունը:

Հայաստանն այս ստուգատեսին կմասնակցի ամբողջական թիմերով՝ ներկայացուցիչներ ունենալով ինչպես հունահռոմեական, այնպես էլ ազատ ոճի ըմբշամարտում: Այս մասին հայտնում է ՀԸՖ-ի մամուլի ծառայությունը։

Հունահռոմեական ոճ.

38 կգ Գոռ Կարապետյան
41 կգ Սևակ Մանուկյան
44 կգ Փաշա Խուդոյան
48 կգ Միհրան Թաթոյան
52 կգ Վարդան Սահակյան
57 կգ Արայիկ Խեմչյան
62 կգ Ալեքս Գևորգյան
68 կգ Պավել Նազարյան
75 կգ Արման Գինոսյան
85 կգ Արման Թովմասյան

Ազատ ոճ.

38 կգ Նորայր Գևորգյան
41 կգ Տիգրան Աղաջանյան
44 կգ Ալեքս Ղազարյան
48 կգ Ռոման Հովհաննիսյան
52 կգ Նարեկ Դալլաքյան
57 կգ Ատոմ Եսայան
62 կգ Մհեր Պապիկյան
68 կգ Շահեն Մարտիրոսյան
75 կգ Դավիթ Վարդանյան
85 կգ Արմեն Մոսեսյան

Եվրոպայի առաջնության մրցումային առաջին օրը պայքարը սկսում են հունահռոմեական ոճի ըմբիշները:

Այսօր` մայիսի 20-ին Հայաստանի հավաքականից գորգ դուրս կգան և մեդալների համար կպայքարեն 7 ներկայացուցիչներ՝ Գոռ Կարապետյանը, Սևակ Մանուկյանը, Փաշա Խուդոյանը, Միհրան Թաթոյանը, Վարդան Սահակյանը, Արայիկ Խեմչյանը և Ալեքս Գևորգյանը, որոնք հանդես են գալիս 38-ից մինչև 62 կգ քաշային կարգերում:

🎥 Ըմբշամարտի Մ17 ԵԱ․ Սուրեն Իշխանյանը՝ Եվրոպայի չեմպիոն

Gevorg Martirosyan — Sat, 16 May 2026 16:10:59 +0000

Բուլղարիայում շարունակվող ազատ ոճի ըմբշամարտի Եվրոպայի մինչև 17 տարեկանների առաջնությունում Հայաստանն ունի չեմպիոն. 55 կգ քաշային կարգում պատվո հարթակի ամենաբարձր աստիճանին է կանգնել Սուրեն Իշխանյանը։

Ոսկե մեդալի համար վճռորոշ գոտեմարտում հայ ըմբիշը վստահ հաղթանակ է տոնել՝ 8:2 հաշվով պարտության մատնելով Ռուսաստանի ներկայացուցիչ Օսման Թեմիրսուլթանովին:

Մինչև եզրափակիչ հասնելը Իշխանյանը տպավորիչ ելույթներ է ունեցել. նա երկու գոտեմարտ ավարտել է ժամանակից շուտ, իսկ կիսաեզրափակիչում 15:4 հաշվով բացարձակ առավելության է հասել ադրբեջանցի Աբբաս Շաֆիևի նկատմամբ։

🎥 Ըմբշամարտի Մ17 ԵԱ. Սուրեն Իշխանյանը հաղթել է ադրբեջանցի ըմբիշին և դուրս եկել եզրափակիչ

Gevorg Martirosyan — Fri, 15 May 2026 14:21:09 +0000

Բուլղարիայում շարունակվող ըմբշամարտի մինչև 17 տարեկանների Եվրոպայի առաջնությունում պայքարի մեջ են մտել ազատ ոճային ըմբիշները:

Հայաստանի ներկայացուցիչ, 55 կգ քաշային Սուրեն Իշխանյանը փայլուն մրցելույթներ է անցկացրել և նվաճել է եզրափակչի ուղեգիր: Հայ ըմբիշը տպավորիչ մեկնարկ էր գրանցել՝ տանելով երկու վաղաժամ հաղթանակ և հասնելով կիսաեզրափակիչ: Եզրափակիչ դուրս գալու համար գոտեմարտում Իշխանյանը կրկին ժամանակից շուտ բացահայտ առավելության է հասել ադրբեջանցի Աբբաս Շաֆիևի նկատմամբ: Վաղը հայ մարզիկը կգոտեմարտի առաջնության ոսկե մեդալի համար:

Հավելենք, որ այսօր Հայաստանի հավաքականի կազմում մրցագորգ են դուրս եկել նաև ևս չորս ըմբիշներ՝ Գեղամ Հովսեփյանը (48 կգ), Ռազմիկ Ոսկանյանը (65 կգ), Եղիշե Մոսեսյանը (80 կգ) և Վռամ Սահակյանը (110 կգ):

Ըմբշամարտի Մ17 ԵԱ․ Հայաստանի ազատ ոճայիններն այսօր սկսում են պայքարը. ովքեր են մրցակիցները

Gevorg Martirosyan — Fri, 15 May 2026 08:09:53 +0000

Ըմբշամարտի Եվրոպայի մինչև 17 տարեկանների առաջնությունում այսօրվանից պայքարի մեջ են մտնում ազատ ոճային ըմբիշները:

Հայաստանի հավաքականից այսօր գորգ դուրս կգա հինգ ըմբիշ:

Ներկայացնում ենք մեր մարզիկների այսօրվա գոտեմարտերն ու մեկնարկային մրցակիցներին.

48 կգ քաշային Գեղամ Հովսեփյանը պայքարը կսկսի որակավորման փուլից, որտեղ նրա մրցակիցը կլինի Ալեքսանդրոս Սերետիդիսը:

55 կգ քաշային Սուրեն Իշխանյանը ազատված է որակավորման փուլից և պայքարը կսկսի 1/8 եզրափակչից, որտեղ դեռևս սպասում է իր մրցակցին (կպարզվի նախնական գոտեմարտերից հետո):

65 կգ քաշային Ռազմիկ Ոսկանյանի առաջին մրցակիցը որակավորման փուլում կլինի Էլվինաս Զակաիտիսը:

80 կգ քաշային Եղիշե Մոսեսյանը ելույթները կսկսի միանգամից 1/8 եզրափակչից. այս փուլում նա ուժերը կչափի Վիկտոր Կովերխայի հետ:

110 կգ քաշային Վռամ Սահակյանը որակավորման փուլում կգոտեմարտի Սերգկո Չուտսիսվիլիի դեմ:

Արսեն Հարությունյանը RAF լիգայում նորամուտը կնշի Օլիմպիական խաղերի չեմպիոնի դեմ գոտեմարտով

Suren Sahakyan — Thu, 14 May 2026 12:10:43 +0000

Հունիսի 13-ին ԱՄՆ-ի Սենթ Լուիս քաղաքում կայանալիք RAF 10 (Real American Freestyle) մրցաշարում իր նորամուտը կնշի ազատ ոճի ըմբշամարտի Եվրոպայի քառակի չեմպիոն և աշխարհի առաջնության քառակի բրոնզե մեդալակիր Արսեն Հարությունյանը:

Կազմակերպության մամուլի ծառայության հաղորդմամբ՝ 26-ամյա հայ ըմբիշի մրցակիցը կլինի Փարիզի Օլիմպիական խաղերի ոսկե մեդալակիր, ճապոնացի Ռեյ Հիգուչին:

Նույն մրցաշարին կմասնակցի նաև խառը մենամարտերի UFC կազմակերպության թեթև քաշային կարգի դասակարգման երկրորդ համար Արման Ծառուկյանը: Ինչպես հայտնի էր դարձել ավելի վաղ, հայ մարտիկն ազատ ոճի ըմբշամարտի կանոններով գոտեմարտելու է UFC-ի նախկին ներկայացուցիչ Թոնի Ֆերգյուսոնի հետ:

Հիշեցնենք, որ Արսեն Հարությունյանը վերջին անգամ միջազգային ասպարեզում հանդես է եկել այս տարվա ապրիլին: Հայ ըմբիշը մասնակցել է ազատ ոճի ըմբշամարտի Եվրոպայի առաջնությանը և նվաճել մրցաշարի բրոնզե մեդալը:

Ըմբշամարտի ԵԱ. Արսեն Հարությունյանը՝ բրոնզե մեդալակիր

Gevorg Martirosyan — Sun, 26 Apr 2026 17:10:32 +0000

Ալբանիայի մայրաքաղաք Տիրանայում եզրագծին մոտեցող ազատ ոճի ըմբշամարտի Եվրոպայի առաջնությունում Հայաստանի հավաքականն ապահովեց իր երրորդ մեդալը։

61 կգ քաշային կարգում հանդես եկող 26-ամյա Արսեն Հարությունյանը կանգնեց պատվո հարթակի երրորդ աստիճանին։ Բրոնզե մեդալի համար մղվող վճռորոշ գոտեմարտում հայ ըմբիշը 7:2 հաշվով վստահ առավելության հասավ բելառուս Դմիտրի Շամելայի նկատմամբ։

Մրցաշարում Հարությունյանի անցած ուղին տպավորիչ էր. որակավորման փուլում նա բացահայտ առավելությամբ՝ 11:0 հաշվով հաղթեց հյուսիսմակեդոնացի Վլադիմիր Եգորովին, իսկ քառորդ եզրափակիչում որևէ շանս չտվեց ուկրաինացի Կամիլ Կերիմովին (11:1): Մեր մարզիկի հաղթարշավը ընդհատվեց միայն կիսաեզրափակիչում, որտեղ նա տուշեով զիջեց աշխարհի և Եվրոպայի գործող չեմպիոն, Տոկիոյի Օլիմպիական խաղերի ոսկե մեդալակիր Զաուր Ուգուևին:

Հիշեցնենք, որ Արսեն Հարությունյանը աշխարհի առաջնությունների քառակի բրոնզե մեդալակիր է։

Ըմբշամարտի ԵԱ. Վազգեն Թևանյանը գերվստահ հաղթանակ տարավ ադրբեջանցի ըմբիշի նկատմամբ՝ դառնալով բրոնզե մեդալակիր

Suren Sahakyan — Sat, 25 Apr 2026 17:05:10 +0000

Ալբանիայի մայրաքաղաք Տիրանայում ընթացող ազատ ոճի ըմբշամարտի Եվրոպայի առաջնությունում Հայաստանի հավաքականը ևս մեկ մեդալ նվաճեց։ 65 կգ քաշայինների պայքարում Վազգեն Թևանյանը բրոնզե մեդալի համար գոտեմարտում ուժերը չափեց Ադրբեջանի ներկայացուցիչ Ռաշիդ Բաբազադեի հետ և 7-0 հաշվով վստահ առավելության հասնելով՝ կանգնեց պատվո հարթակի երրորդ աստիճանին։

Հայ մարզիկը մրցաշարը սկսել էր հաղթանակներով: Որակավորման փուլում Թևանյանը 5-2 հաշվով առավելության էր հասել Ֆրանսիան ներկայացնող Խամզատ Արսամերզուևի նկատմամբ, իսկ քառորդ եզրափակիչում 2-1 հաշվով պայքարից դուրս էր թողել բուլղարացի Շամիլ Մամեդովին: Կիսաեզրափակիչի լարված գոտեմարտում նա 3-3 հաշվով ավարտեց պայքարը Ռուսաստանի ներկայացուցիչ Բաշիր Մագոմեդովի հետ և զիջեց մրցակցին միայն վերջին միավորը տանուլ տալու կանոնի հետևանքով՝ ստանալով բրոնզե մեդալի համար գոտեմարտելու իրավունք:

Հիշեցնենք, որ քիչ առաջ Հայաստանի ազատոճայինների հավաքականի կազմում բրոնզե մեդալակիր էր դարձել նաև 57 կգ քաշային Մանվել Խնձրցյանը, որը երրորդ տեղի համար գոտեմարտում 18-6 հաշվով կամային հաղթանակ էր տարել Ազամատ Տուսկաևի նկատմամբ։