Եգիպտոսում շարունակվում է ծանրամարտի երիտասարդների աշխարհի առաջնությունը։ Պայքարի մեջ են մտել 71 կգ քաշային ծանրորդները, որտեղ Հայաստանի հավաքականը ներկայացված էր երկու մարզիկով՝ Նարեկ Գրիգորյանով և Հովհաննես Հովհաննիսյանով։

Նարեկ Գրիգորյանը հիանալի հանդես եկավ պոկում վարժությունում՝ իրար հաջորդող վստահ մոտեցումներով գլխավերևում պահելով 139 կգ, 142 կգ և 144 կգ ծանրաձողերը։ Այս ցուցանիշով հայ ծանրորդը նվաճեց փոքր ոսկե մեդալ: Ցավոք, հրում վարժությունում Գրիգորյանը որևէ հաջող մոտեցում չգրանցեց, ինչի հետևանքով զրո ստացավ և դուրս մնաց երկամարտի արդյունքով մեդալների համար պայքարից։

Նույն քաշային կարգում հանդես եկող Հովհաննես Հովհաննիսյանը պոկում վարժությունում գրանցեց 130 կգ արդյունք։ Հրում վարժությունում նա զգալիորեն բարելավեց դիրքերը՝ հաջողությամբ բարձրացնելով նախ 165 կգ, ապա՝ 171 կգ։ Այս վարժությունում Հովհաննիսյանը արժանացավ փոքր արծաթե մեդալի։

Երկամարտի 301 կգ ընդհանուր արդյունքով Հովհաննես Հովհաննիսյանը աշխարհի երիտասարդական առաջնությունում զբաղեցրեց 4-րդ հորիզոնականը։

Հայաստանի ծանրամարտի ֆեդերացիան հրապարակել է 2026 թվականի հանրապետության առաջնության լավագույն մարզիկների անունները։

Ըստ մամուլի ծառայության՝ տղամարդկանց պայքարում լավագույն ծանրորդ է ճանաչվել Գոռ Սահակյանը (71 կգ)։ Նա չեմպիոնի կոչումը նվաճել է բացարձակ առավելությամբ՝ երկամարտի արդյունքով 40 կգ-ով գերազանցելով երկրորդ տեղը զբաղեցրած Նարեկ Գրիգորյանին։

Կանանց մրցաշարում լավագույնի կոչմանն արժանացել է 58 կգ քաշային Ալեքսանդրա Գրիգորյանը։

Հայաստանի ծանրամարտի ֆեդերացիան հանդես է եկել խիստ հայտարարությամբ՝ ուղղված Գյումրու քաղաքապետարանին։ Ֆեդերացիան պաշտոնապես դատապարտում է ազգային հավաքականի անդամների, ծանրորդների և մարզիչների անունները քաղաքական կամ քրեաիրավական գործընթացներում շահարկելու փորձերը։

Ըստ ֆեդերացիայի՝ նման գործողությունները վնասում են հայկական սպորտի հեղինակությանը և ստեղծում են կեղծ տպավորություն, թե մարզական համայնքը պաշտպանում է իրավական խնդիրներ ունեցող անձանց, ինչը բացարձակապես չի համապատասխանում իրականությանը։ Կառույցը կոչ է անում անհապաղ դադարեցնել նման գործելաոճը։

ՀԾՖ-ի գրառումն ամբողջությամբ՝ ստորև․

«Հայաստանի ծանրամարտի ֆեդերացիան կոչ է անում զերծ մնալ ծանրորդների`ազգային հավաքականի անդամների անուններն այս կամ այն քաղաքական շահարկումների առիթ դարձնելուց:

Հայաստանի ծանրամարտի ֆեդերացիան բարձր գնահատելով մեր մարզիկների ու մարզիչների` տարիներով կառուցած հեղինակությունը, պարտավոր է արձագանքել Գյումրու քաղաքապետարանի վերջին հրապարակմանը:

Ֆեդերացիան պաշտոնապես հայտարարում է, որ մեր մարզիկների, մարզիչների ու սպորտային գործիչների անունների օգտագործումը՝ որևէ քրեաիրավական գործընթացում ներգրավված անձի պաշտպանությունն ապահովելու նպատակով՝ լիովին անընդունելի է և վնասում է հայկական սպորտի հեղինակությանը։

Այսպիսի գործողությունները կարող են ստեղծել կեղծ տպավորություն, թե մարզական համայնքը ներգրավված է կամ ներգրավվում է որոշակի անձանց անձնական կամ իրավական խնդիրների լուծման մեջ, ինչը բացարձակապես չի համապատասխանում իրականությանը։

Հայաստանի ծանրամարտի ֆեդերացիան կոչ է անում դադարեցնել ծանրորդների ու մարզիչների անունների որևէ ձևով օգտագործումը քաղաքական, անձնական կամ քրեաիրավական նպատակներով»,- գրված է հայտարարության մեջ։

Հայաստանը ներկայացնող ծանրորդները շարունակում են ելույթները Եվրոպայի երիտասարդների ու մինչև 23 տարեկանների առաջնություններում:

110 կգ քաշային ծանրորդների պայքարում Պետրոս Պետրոսյանը պոկում վարժությունում անհաջող մասնակցեց: Հրումում նա բարձրացրեց 210 կգ ու 221 կգ ու այս վարժությունում նվաճեց ոսկե մեդալ: Այս մասին տեղեկացնում է Հայաստանի ծանրամարտի ֆեդերացիան։

Նշենք, որ քիչ առաջ ոսկե մեդալ էր նվաճել նաև Գարիկ Կարապետյանը։

Հայաստանի հավաքականը 6-րդ ոսկե մեդալը նվաճեց Ալբանիայում ընթացող Եվրոպայի երիտասարդների ու մինչև 23 տարեկանների առաջնություններում:

Մրցումային վերջին օրը 110 կգ ծանրորդների պայքարում Հայաստանի հավաքականից Գարիկ Կարապետյանը պոկում վարժությունում բարձրացրեց 175 կգ ու 182 կգ: Այս ձևում Կարապետյանը դարձավ ոսկե մեդալակիր: Հրում վարժությունում նա գլխավերևում պահեց 210 կգ, 215 կգ: Այս վարժությունում նա երկրորդն տեղում էր:

Երկամարտի 397 կգ արդյունքով` Գարիկ Կարապետյանը Եվրոպայի Մ23 տարեկանների չեմպիոնն է:

Հայաստանը ներկայացնող ծանրորդները շարունակում են մրցելույթները Ալբանիայի Դյուրես քաղաքում ընթացող Եվրոպայի երիտասարդների ու մինչև 23 տարեկանների առաջնություններում:

Մնացական Աբրահամյանը դարձավ Եվրոպայի մինչև 23 տարեկանների առաջնության փոխչեմպիոն:

Եվրոպայի առաջնության 94 կգ քաշային ծանրորդների պայքարում Մնացական Աբրահամյանը պոկում վարժությունում ունեցավ երեք հաջող մոտեցում` բարձրացնելով 150 կգ, 155 կգ, 160 կգ: Այս ձևում Աբրահամյանը երրորդն էր: Հրում վարժությունում նա գլխավերևում պահեց 190 կգ, 196 կգ, 201 կգ: Այս վարժությունում հայ ծանրորդն առաջինն էր:

Երկամարտի 361 կգ արդյունքով` Մնացական Աբրահամյանը դարձավ Եվրոպայի մինչև 23 տարեկանների առաջնության արծաթե մեդալակիր:

Եվրոպայի երիտասարդների և մինչև 23 տարեկանների առաջնությունների մրցումային վերջին օրը Հայաստանն ունի 5 մասնակից:

Երևանի ժամանակով 12:00-ին մրցահարթակ դուրս կգա 94 կգ քաշային Մնացական Աբրահամյանը:

Ժամը` 14:00-ին, մինչև 23 տարեկան աղջիկներից պայքարի մեջ կմտնեն գերծանր քաշայինները, այստեղ Հայաստանը կներկայացնի Մերի Թումասյանը:

16:00-ին 110 կգ ծանրորդների մրցաշարում մեդալային պայքարի մեջ կմտնեն Գարիկ Կարապետյանն ու Պետրոս Պետրոսյանը:

Եվ ժամը`18:30-ին գերծանր քաշային ծանրորդների մրցմանը Հայաստանը կներկայացնի Աշոտ Մովսիսյանը:

Ալբանիայի Դյուրես քաղաքում ընթացող ծանրամարտի Եվրոպայի երիտասարդների ու Մ23 տարեկանների առաջնությունները մոտենում են ավարտին:

Նախավերջին մրցումային օրը եզրափակվեց երիտասարդների գերծանր քաշային ծանրորդների պայքարով:

Հայաստանի ընտրանու անդամ Վարդգես Մարգարյանը պոկեց 162 կգ, սակայն անհաջող մասնակցեց հրման վարժությանը: Այս մասին տեղեկացնում է Հայաստանի ծանրամարտի ֆեդերացիայի մամուլի ծառայությունը։

Հայաստանը ներկայացնող ծանրորդները շարունակում են մրցելույթները Ալբանիայի Դյուրես քաղաքում ընթացող Եվրոպայի երիտասարդների ու մինչև 23 տարեկանների առաջնություններում:

Երիտասարդներ ծանրորդների 110 կգ քաշայինների պայքարում Հայաստանից Միշա Մելքոնյանը պոկում վարժությունում գլխավերևում պահեց 155 կգ ու 161 կգ:

Հրում վարժությունում Մելքոնյանը բարձրացրեց 190 կգ: Երկամարտի 351 կգ արդյունքով` Միշա Մելքոնյանը Եվրոպայի երիտասարդների առաջնությունում 7-րդն է:

Մրցաշարը կավարտվի վաղը՝ նոյեմբերի 4-ին։

Ալբանիայի Դյուրես քաղաքում ընթանում է ծանրամարտի Եվրոպայի երիտասարդների և մինչև 23 տարեկանների առաջնությունը։

Երիտասարդների 94 կգ քաշային ծանրորդների պայքարում Հայաստանից Գրիգոր Ղազարյանը պոկում վարժությունում բարձրացրեց 150 կգ: Այս վարժությունում նա 5-րդն է: Ղազարյանն անհաջող հանդես եկավ հրում վարժությունում:

Հայաստանի մյուս ներկայացուցիչ Վալերիկ Մովսիսյանը պոկեց 155 կգ և այս վարժությունում զբաղեցրեց 4-րդ տեղը, իսկ հրում վարժությունում բարձրացրեց 185 կգ: Երկամարտի 340 կգ արդյունքով` Վալերիկ Մովսիսյանը Եվրոպայում 5-րդն է:

Նշենք, որ մրցաշարը կավարտվի նոյեմբերի 4-ին։