Աշխարհի առաջին ռակետ, Իտալացի Թենիսիստ Յանիկ Սիները կարիերայում առաջին անգամ նվաճեց Ուիմբլդոնի տիտղոսը։

Տղամարդկանց մենախաղի եզրափակիչում նա 4-6, 6-4, 6-4, 6-4 հաշվով հաղթեց աշխարհի երկրորդ ռակետ Կառլոս Ալկարասին։ Խաղը տևեց 3 ժամ 6 րոպե։

Սիները դարձավ Ուիմբլդոնի տղամարդկանց մենախաղի տիտղոսը նվաճած առաջին իտալացի թենիսիստը։

23-ամյա Սիները չորրորդ անգամ դարձավ Մեծ Սաղավարտի մրցաշարերի հաղող։ Ուիմբլդոնի տիտղոսը նրա պրոֆեսիոնալ կարիերայի 20-րդն էր։

Լեհ թենիսիստուհի Իգա Շվյոնտեկը իր կարիերայում առաջին անգամ նվաճեց Ուիմբլդոնի տիտղոսը։ Կանանց մենախաղի եզրափակիչում նա 6-0, 6-0 հաշվով հաղթեց ամերիկուհի Ամանդա Անիսիմովային։ Հաղթանակի համար Շվյատեկը կստանա ավելի քան 4 միլիոն ԱՄՆ դոլար մրցանակային ֆոնդ։

Թենիսիստուհիները խաղադաշտում անցկացրին 57 րոպե։ Opta-ի տվյալներով՝ Իգա Շվյոնտեկը դարձավ Բաց դարաշրջանի (1968 թվականից սկսած) ընդամենը երկրորդ թենիսիստուհին, ով Մեծ Սաղավարտի եզրափակիչում հաղթել է 6-0, 6-0 հաշվով։

Նախկինում նման արդյունքի հասել էր միայն գերմանացի Շտեֆի Գրաֆը՝ 1988 թվականի Ռոլան Գարոսի եզրափակիչում նույն հաշվով հաղթելով խորհրդային թենիսիստուհի Նատալյա Զվերևային։

Շվյոնտեկը չորս անգամ հաղթել է Ֆրանսիայի բաց առաջնությունում (2020, 2022, 2023, 2024) և մեկ անգամ՝ ԱՄՆ բաց առաջնությունում (2022)։ Ներկայում նա զբաղեցնում է Կանանց թենիսի ասոցիացիայի (WTA) վարկանիշային աղյուսակի 4-րդ հորիզոնականը։ Ընդհանուր առմամբ, նա ունի 23 տիտղոս WTA մրցաշարերում։

Մեծ սաղավարտի 20-ակի հաղթող շվեյցարացի Ռոջեր Ֆեդերերն արձագանքել է իսպանացի Ռաֆայել Նադալի կարիերան ավարտելու մասին հայտարարությանը։

«Ինչպիսի՞ կարիերա էր, Ռաֆա: Ես միշտ հույս ունեի, որ այս օրը երբեք չի գա։ Շնորհակալություն անմոռանալի հիշողությունների և քո բոլոր անհավանական ձեռքբերումների համար մեր սիրելի խաղում: Քեզ հետ մրցելը պատիվ էր ինձ համար»,- գրել է Ֆեդերերը։

38-ամյա Ռաֆայել Նադալը հայտարարել է, որ կավարտի պրոֆեսիոնալ կարիերան 2024 թվականի Դևիսի գավաթի եզրափակիչ փուլից հետո, որը կանցկացվի նոյեմբերի 19-ից 24-ը Մալագայում (Իսպանիա)։ Իր կարիերայի ընթացքում Նադալը մենախաղում հաղթել է Ռոլան Գարոսում 14 անգամ, 2 անգամ հաղթել է Ուիմբլդոնում և Ավստրալիայի բաց առաջնությունում և 4 անգամ հաղթել ԱՄՆ բաց առաջնությունում։

Նովակ Ջոկովիչը ժամանակակից թենիսի ամենաուժեղ ներկայացուցիչն է։ Դրանում կասկած գրեթե չկա։ Իհարկե, ճաշակին ընկեր չկա. ոմանց համար Նադալն է սպորտաձևի լավագույնը, շատերն էլ ցայսօր չեն կարողանում առանց հիացմունքի ու հուզմունքի խոսել Ռոջեր Ֆեդերերի մասին։ Բայց եթե մի կողմ դնենք լիրիկական զեղումներն ու խոսենք չոր թվերի լեզվով, ամեն ինչ կընկնի տեղը՝ 24 «Մեծ սաղավարտ», ռեկորդային 400+ շաբաթ որպես աշխարհի առաջին ռակետ։ Ջոկոն միակն է, որը տարին 8 անգամ ավարտել է որպես թիվ 1 ռակետ։ Սերբն ունի 98 տիտղոս, այդ թվում՝ 40 (ի դեպ, դարձյալ ռեկորդային) Մասթերս, Դևիսի գավաթ-2010, ATP գավաթ-2020։

Այս պատկառելի ցանկում չկա միայն Օլիմպիական ոսկին։ Սերբ թենիսիստի ու ՕԽ փոխհարաբերությունները լավագույն կերպով չեն զարգացել։ Հիմա կհիշենք բոլորը, կանենք անհրաժեշտ հետևություններ ու կտանք տրամաբանական հարցը. «պատրա՞ստ է Ջոկովիչը վերջապես տուն տանել Օլիմպիական ոսկին»։

Փորձերի սկիզբ

Ջոկովիչի առաջին ծանոթությունն Օլիմպիական խաղերի հետ կայացել է 2008 թվականին։ Այդ ժամանակ սերբ թենիսիստը ընդամենը 21 տարեկան էր, բայց համաշխարհային դասակարգման աղյուսակում 3-րդն էր ու հասցրել էր հաղթել Ավստրալիայի բաց առաջնությունում։ Բավական վստահ քայլերով Ջոկոն հասավ կիսաեզրափակիչ, որտեղ նրան սպասում էր Ռաֆա Նադալը։ Գերհավասար ստացված պայքարում Ջոկովիչը երրորդ սեթում 4-5 հաշվի ժամանակ ձախողեց սմեշն ուղիղ տեղը ու զիջեց ճանապարհն ապագա հաղթող իսպանացուն։ Պարտվելուց հետո նա չկարողացավ զսպել արցունքները։ Գրեթե նույն պատկերը երրորդ տեղի համար խաղից հետո էր։ Բայց այս անգամ ամերիկացի Ջեյմս Բլեյքի հետ դիմակայությունից հետո նրա աչքերը դարձյալ թաց էին, բայց դեմքին այս անգամ ժպիտ կար, իսկ վզից կախված էր օլիմպիական բրոնզը։ Այո, այդ բրոնզը հաղթանակ էր, բայց Ջոկովիչը դժվար երազեր այն պահել որպես իր գլխավոր օլիմպիական նվաճում։

Կիսաեզրափակիչ անեծքն ու Դել Պոտրոն

2012 թվականին, Լոնդոնում կայացած Օլիմպիական խաղերի բացման արարողությանը Ջոկովիչն արդեն ներկայանում էր որպես իր սպորտաձևի առաջատար։ Ջոկովիչը Սերբիայի դրոշակակիրն էր ու թենիսի մրցաշարի հաղթողի գլխավոր ֆավորիտներից մեկը։ Այս անգամ էլ սերբ թենիսիստի ճանապարհորդությունն ընդհատվեց կիսաեզրափակիչ փուլում։ Այս անգամ ևս Ջոկովիչը պարտվեց ապագա չեմպիոնին։ Բայց, ի տարբերություն Պեկին-2008-ի, այս անգամ բրոնզե մեդալ նվաճել չհաջողվեց՝ պատվո հարթակի երրորդ աստիճանին կանգնեց արգենտինացի Խուան Մարտին դել Պոտրոն։

2016 թվականին Ռիոյում Ջոկովիչը մրցեց դել Պոտրոյի հետ արդեն առաջին շրջանում։ Արգենտինացին այն ժամանակ վերադառնում էր տուր երեք վիրահատությունից հետո: Ու թեև հանդիպումը խոստանում էր բարդ լինել, սերբը դրան մոտենում էր որպես բացահայտ ֆավորիտ՝ նա բոլոր «սլեմների» գործող չեմպիոնն էր։ Սակայն Ջոկովիչը պարտվեց 6:7 6:7 հաշվով:

Պարտությունից հետո սերբը նախ ժպտաց ու թափահարեց գլուխը, իսկ հետո արգենտինացու հետ երկար ժամանակ գրկախառնված մնաց՝ սեղմելով ձեռքերը։ Թվում էր՝ այդ ժամանակ լացում էին բոլորը՝ դել Պոտրոն թաքցրեց երեսը սրբիչով, իսկ Ջոկովիչը թողեց կորտերը՝ կրկին գլուխը շարժելով և սրբելով արցունքները, ինչպես դա եղավ 2008-ին։

Սուրբ երրորդությու՞ն։ Ոչ չենք լսել

Տոկիոյում նախատեսված խաղերում Ջոկովիչը նորից ֆավորիտ էր։ Մինչև կիսաեզրափակիչ փուլ (հա, էլի կիսաեզրափակիչ) ամեն ինչ ավելի քան հարթ էր ընթանում։ Մրցակիցներից մեկին Ջոկովիչը նույնիսկ հաղթել էր 6-0 հաշվով։ Ալեքսանդր Զվերևի հետ առաջին պարտիան սերբն անցկացրեց բարձր մակարդակով՝ հաղթելով 6-1 հաշվով։ Երկրորդում Ջոկոն ուներ առավելությույն ու հաղթում էր բրեյքով։ Բայց հանկարծ կախարդանքը կորավ, առաջ եկան բղավոցներն ու կոպիտ սխալները։ Որպես հետևանք՝ Ջոկովիչը հեռացավ տուն ձեռնունայն՝ պարտվելով Զվերևին՝ 6-1 3-6 1-6 հաշվով։ Երրորդ տեղի համար խաղն էլ չստացվեց՝ պարտություն 3 սեթում Պաբլո Կարենո Բուստայից։

Նովակը միակ թենիսիստն է, որը 3 անգամ հասել է Օլիմպիական խաղերի կիսաեզրափակիչ, բայց, միևնույն ժամանակ` 0 եզրափակիչ։ Զուգախաղերում ամեն ինչ ավելի տխուր է. 2008 թվականին նա խաղացել է Նենադ Զիմոնջիչի հետ ու պարտվել առաջին շրջանում։ Լոնդոնում նրա թիմակիցն արդեն Վիկտոր Տրոիցկին էր, բայց պատկերը նույնն էր՝ առաջին շրջանից այն կողմ գնալ չստացվեց, Ռիոյում՝ նույնպես։

Վերջին փարիզյան հույս

Բնականաբար, այս ամեն ինչը Ջոկովիչի սրտով չէ։ Այսքան երկար ու շատ օլիմպիական ամենահարկի մեդալի ձգտող մարդն ամեն օր բացում է վիճակագրությունն, ու նրա սրտից արյուն է կաթում։ Թենիսային «Մեծ քառյակից» յուրաքանչյուրն ունի օլիմպիական ոսկի տարբեր կատեգորիաներում: Ռաֆայել Նադալն ու Էնդի Մարեյը Օլիմպիական չեմպիոն են մենախաղում, իսկ Ռոջեր Ֆեդերերը՝ զուգախաղում։

«Փարիզի ոսկին իմ գլխավոր նպատակն է», — ասում է Ջոկովիչը։ Նրա խոսքով այս փորձն, ամենայն հավանականությամբ, վերջինն է։ Նովակն, իհարկե, լավատես է, նա ասուլիսներից մեկի ժամանակ չի հերքել իր մասնակցությունը նաև հաջորդ՝ 2028 թվականին Լոս Անջելեսում կայանալիք խաղին, բայց մինչև այդ հորով-մորով անել է պետք այս փարիզյանը։ իսկ Ֆրանսիայի մայրաքաղաքում նրան հեշտ կյանք ոչ ոք չի խոստանում։ Ջոկոն սկսեց պայքարը Մեթյու Էբդենի հետ խաղով, իսկ երկրորդ շրջանում այսօր կհանդիպի Օլիմպիական չեմպիոն Ռաֆայել Նադալին։

Ռոբերտ Գասպարյան

Աշխարհի երրորդ ռակետ Կառլոս Ալկարասը հաջողություն է մաղթել Իսպանիայի ֆուտբոլի ազգային հավաքականին Եվրո-2024-ի եզրափակչի Անգլիայի հավաքականի հետ այսօր՝ հուլիսի 14-ին կայանալիք խաղում։

«Ես հետևում եմ ձեզ առաջին իսկ խաղից, անհանգստանում և աջակցում ձեզ: Հուսով եմ, որ կիրակին հատուկ օր կլինի բոլորիս համար, և վստահ եմ, որ դա այդպես էլ կլինի: Ամուր գրկում եմ ձեզ, եկեք անենք դա: Առա՜ջ»,- Ալկարասի խոսքերն է մեջբերում ՈՒԵՖԱ-ի մամուլի ծառայությունը։

Այսօր՝ հուլիսի 14-ին, իսպանացի թենիսիստը Լոնդոնի խոտածածկ կորտերում Ուիմբլդոնի 2024 թվականի տղամարդկանց մենախաղի եզրափակիչում կհանդիպի ATP-ի երկրորդ համար, սերբ Նովակ Ջոկովիչի հետ։ Խաղը կկայանա Կենտրոնական կորտում և կսկսվի Երևանի ժամանակով 17:00-ից ոչ շուտ:

«Մեծ սաղավարտի» 22-ակի հաղթող, աշխարհի նախկին առաջին ռակետ, իսպանացի թենիսիստ Ռաֆայել Նադալը Ուիմբլդոնի 2024-ի եզրափակիչում Նովակ Ջոկովիչի հետ խաղից առաջ աջակցել է հայրենակից Կառլոս Ալկարասին։

Նադալը սոցցանցերի իր էջում գրառում է կատարել հուլիսի 14-ի մարզական իրադարձությունների պաստառով: Տղամարդկանց Ուիմբլդոնի չեմպիոնական խաղից բացի, այսօր տեղի կունենան ֆուտբոլային երկու եզրափակիչ. Եվրո-2024-ի եզրափակչում կմրցեն Իսպանիայի և Անգլիայի հավաքականները, իսկ Կոպա Ամերիկայի եզրափակչում՝ Արգենտինան և Կոլումբիան: Նրա հրապարկման մեջ ներառված է նաև Tour de France 2024 բազմօրյա հեծանվավազքի 15-րդ փուլը։

«Առա՜ջ, Կարլիտոս և Իսպանիայի ֆուտբոլի ազգային հավաքական»,- գրել է Նադալը:

Ալկարաս-Ջոկովիչ խաղը կկայանա Ուիմբլդոնի կենտրոնական կորտում և կմեկնարկի Երևանի ժամանակով 17:00-ից ոչ շուտ:

Իսպանիա-Անգլիա եզրափակիչը կմեկնարկի 23:00-ին:

Սերբ թենիսիստ, «Մեծ սաղավարտի» 24-ակի հաղթող Նովակ Ջոկովիչը դուրս է եկել Ուիմբլդոնի 2024 թվականի խաղարկության եզրափակիչ։ Կիսաեզրափակիչում աշխարհի երկրորդ ռակետը 6:4, 7:6 (7:2), 6:4 հաշվով հաղթել է իտալացի Լորենցո Մուսետտիին:

Հանդիպումը տևել է 2 ժամ 51 րոպե։

Ուիմբլդոն-2024-ի եզրափակիչում 37-ամյա Նովակ Ջոկովիչը կխաղա 21-ամյա իսպանացի Կառլոս Ալկարասի հետ։

Այս թենիսիստները խաղում էին Ուիմբլդոնի 2023 թվականի եզրափակչում: Ալկարասը հաղթել է մեկ տարի առաջ կայացած հինգ սեթանոց թրիլլերում:

«Մեծ սաղավարտի» մրցումների եռակի չեմպիոն և աշխարհի երրորդ ռակետ Կառլոս Ալկարասը դարձել է միայն երկրորդ իսպանացին բաց առաջնության ժամանակ, որը դուրս է եկել Ուիմբլդոնի եզրափակիչ:

Ալկարասն այսօր դուրս է եկել Ուիմբլդոն 2024-ի եզրափակիչ։ Կիսաեզրափակիչ խաղում նա 6:7 (1:7), 6:3, 6:4, 6:4 հաշվով հաղթել է ԱՄՆ բաց առաջնության 2021 թվականի չեմպիոն, աշխարհի հինգերորդ ռակետ, ռուս Դանիիլ Մեդվեդևին։

Ալկարասից առաջ միակ իսպանացին, որը Ուիմբլդոնի եզրափակիչում հանդես է եկել մեկից ավելի անգամ, Կառլոսի կուռք Ռաֆայել Նադալն էր։ Նա իր ակտիվում ունի հինգ եզրափակիչ և երկու տիտղոս:

Ուիմբլդոնի իր երկրորդ անընդմեջ չեմպիոնության համար Ալկարասը կպայքարի սերբ Նովակ Ջոկովիչի (2) կամ իտալացի Լորենցո Մուսետտիի (25) հետ:

Անգլիական «Մանչեսթեր Սիթի» ֆուտբոլային ակումբի իսպանացի մարզիչ Պեպ Գվարդիոլան ներկա է եղել Ուիմբլդոն-2024-ի երրորդ շրջանի խաղին, որում միմյանց հետ մրցել են աշխարհի չորրորդ ռակետ, գերմանացի թենիսիստ Ալեքսանդր Զվերևը և աշխարհի 42-րդ ռակետ, բրիտանացի թենիսիստ Քեմերոն Նորին։

Զվերևն այդ խաղում 6:4, 6:4, 7:6 (15) հաշվով հաղթանակ է տարել և դուրս եկել չորրորդ շրջան: Հանդիպումը 2 ժամ 30 րոպե է տևել:

1/8 եզրափակիչում Զվերևը կհանդիպի Թեյլոր Ֆրից (ԱՄՆ) — Ալեխանդրո Տաբիլո (Չիլի) զույգի հաղթողի հետ։

Գերմանացի թենիսիստը խաղից հետո կիսվել է տպավորություններով, ինչպես նաև դիմել է Գվարդիոլային.

«Մեծ պատիվ է խաղալ այս գեղեցիկ կորտում, Արքայական տրիբունայի դիմաց: Այսօր այնքան հրաշալի հյուրեր կային՝ օրինակ ֆուտբոլի լեգենդ Պեպ Գվարդիոլան։ Երբ ես տեսա նրան, այնքան նյարդայնացա մի քանի գեյմ: Շատ շնորհակալ եմ գալու համար, մեծ պատիվ է։

Իմիջայլոց! «Բավարիային» մարզիչ է պետք. Եվ եթե դուք հոգնել եք ֆուտբոլից, կարող եք ինձ մարզել կորտում ցանկացած պահի»,- ասել է Զվերևը կորտում տված հարցազրույցի ժամանակ։

Գերմանացու խոսքերին ի պատասխան՝ Գվարդիոլան ժպտացել է.

Ավեի վաղ մրցաշարին ներկա են եղել նաև Անգլիայի հավաքականի նախկին ֆուտբոլիստ Դեյվիդ Բեքհեմը, ռուս թենիսիստուհի Մարիա Շարապովան, Մեծ Բրիտանիայի նախկին վարչապետ Թերեզա Մեյը և այլք։

Ուիմբլդոն 2024-ն անցկացվում է հուլիսի 1-ից 14-ը։ Մրցույթի գործող չեմպիոնն իսպանացի թենիսիստ Կառլոս Ալկարասն է, որը նախորդ տարվա եզրափակիչում հինգ սեթում հաղթել է սերբ Նովակ Ջոկովիչին՝ 1:6, 7:6, 6:1, 3:6, 6:4:

Ռուսաստանը ներկայացնող հայազգի թենիսիստուհի Էլինա Ավանեսյանը ավարտեց պայքարը «Մեծ սաղավարտի» տարվա 3-րդ մրցաշարում:

Հայ թենիսիստուհին «Ուիմբլդոնի» երկրորդ շրջանում 1 ժամ 24 րոպե տևած խաղում 3-6, 3-6 հաշվով պարտվեց աշխարհի 15-րդ ռակետ, ռուսաստանցի Լյուդմիլա Սամսոնովային։

Հեցնենք, որ 21-ամյա թենիսիստուհին առաջիկայում ծրագրում է փոխել մարզական քաղաքացիությունը և ներկայացնել Հայաստանը։