Իսպանացի թենիսիստ Կառլոս Ալկարասը Նյու Յորքում ավարտված ԱՄՆ բաց առաջնության տղամարդկանց մենախաղի եզրափակիչում հաղթեց իտալացի Յանիկ Սիներին։

Խաղն ավարտվեց 6:2, 3:6, 6:1, 6:4 հաշվով՝ իսպանացու օգտին։ Մրցախաղը տևեց 2 ժամ 44 րոպե։

Խաղին ներկա էր ԱՄՆ նախագահ Դոնալդ Թրամփը, ինչի պատճառով խաղի մեկնարկը հետաձգվեց 30 րոպեով՝ լրացուցիչ անվտանգության միջոցառումներ ձեռնարկելու համար։

Սիներն ու Ալկարասը խաղացին իրենց երրորդ անընդմեջ «Մեծ սաղավարտի» եզրափակիչում։ Իսպանացին նախկինում հաղթել էր «Ռոլան Գարոսը», իսկ իտալացին՝ «Ուիմբլդոնը»։

Սիները չկարողացավ պաշտպանել 2024 թվականին նվաճած ԱՄՆ բաց առաջնության տիտղոսը։ Իտալացին կորցրեց աշխարհի առաջին համարի կարգավիճակը։ Ալկարասը այսօրվանից՝ սեպտեմբերի 8-ից, կգլխավորի ATP վարկանիշային աղյուսակը, մինչդեռ Սիները կիջնի երկրորդ հորիզոնական։

Ալկարասը նվաճեց իր 7-րդ տիտղոսը 2025 թվականին։ Բացի «Մեծ սաղավարտի» երկու մրցաշարերից, նա հաղթեց նաև «Մասթերսի» երեք մրցաշարում (Ցինցինատի, Հռոմ, Մոնտե Կառլո) և ATP 500-ի երկու մրցաշարում (Ռոտերդամ, Լոնդոն)։

Մեծ սաղավարտի 20-ակի հաղթող շվեյցարացի Ռոջեր Ֆեդերերն արձագանքել է իսպանացի Ռաֆայել Նադալի կարիերան ավարտելու մասին հայտարարությանը։

«Ինչպիսի՞ կարիերա էր, Ռաֆա: Ես միշտ հույս ունեի, որ այս օրը երբեք չի գա։ Շնորհակալություն անմոռանալի հիշողությունների և քո բոլոր անհավանական ձեռքբերումների համար մեր սիրելի խաղում: Քեզ հետ մրցելը պատիվ էր ինձ համար»,- գրել է Ֆեդերերը։

38-ամյա Ռաֆայել Նադալը հայտարարել է, որ կավարտի պրոֆեսիոնալ կարիերան 2024 թվականի Դևիսի գավաթի եզրափակիչ փուլից հետո, որը կանցկացվի նոյեմբերի 19-ից 24-ը Մալագայում (Իսպանիա)։ Իր կարիերայի ընթացքում Նադալը մենախաղում հաղթել է Ռոլան Գարոսում 14 անգամ, 2 անգամ հաղթել է Ուիմբլդոնում և Ավստրալիայի բաց առաջնությունում և 4 անգամ հաղթել ԱՄՆ բաց առաջնությունում։

Աշխարհի առաջին ռակետ Յանիկ Սիները հայտնել է, որ մրցաշրջանի «Մեծ սաղավարտի» վերջին մրցաշարում՝ US Open-ում իր հաղթանակը նվիրում է առողջական խնդիրներ ունեցող մորաքրոջը։

«Այս տիտղոսն ինձ համար շատ բան է նշանակում, իմ կարիերայի վերջին շրջանը հեշտ չէր։ Ես սիրում եմ թենիս, շատ եմ մարզվում, բայց կյանք կա նաև կորտից դուրս։ Ցանկանում եմ այս հաղթանակը նվիրել մորաքրոջս, որը ներկայումս լավ վիճակում չէ։ Չգիտեմ, թե նա դեռ որքան կմնա իմ կյանքում: Այնքան հաճելի է, որ ես դեռ կարող եմ կիսվել նրա հետ դրական պահերով»,- Սիների խոսքերը մեջբերում է Պրոֆեսիոնալ թենիսիստների ասոցիացիայի (ATP) կայքը։

Հիշեցնենք, որ Սիները սեպտեմբերի 8-ին հաղթել է US Open-ում։ Եզրափակչում նա պարտությն մատնեց ամերիկացի Թեյլոր Ֆրիցին։ Յանիկը դարձավ առաջին իտալացին, որը հաղթեց US Open-ում։

Նյու Յորքում ավարտվել է US Open-2024-ի կիսաեզրափակիչ խաղը՝ աշխարհի 12-րդ ռակետ ամերիկացի Թեյլոր Ֆրիցի և նրա հայրենակից, ATP-ի 20-րդ համար Ֆրենսիս Տիաֆոյի միջև:

Հաղթանակը հինգ սեթում տարավ Ֆրիցը՝ 4:6, 7:5, 4:6, 6:4, 6:1: Այսպիսով, որոշվեց մրցաշարի եզրափակիչի երկրորդ մասնակիցը:

Այս հաղթանակով Ֆրիցը դարձավ առաջին ամերիկացի թենիսիստը վերջին 15 տարիների ընթացքում, ով կարողացավ դուրս գալ «Մեծ սաղավարտի» մրցաշարի եզրափակիչ տղամարդկանց մենախաղում: Մինչ Թեյլորը, վերջին անգամ դա արել էր Էնդի Ռոդիկը, որը 2009 թվականին դուրս էր եկել Ուիմբլդոնի եզրափակիչ:

Ավելի վաղ եզրափակիչ էր դուրս եկել Իտալիան ներկայացնող, աշխարհի առաջին ռակետ Յանիկ Սիները: Նա երեք սեթում հաղթել էր բրիտանացի Ջեք Դրեյփերին՝ 7:5, 7:6 (7:3), 6:2:

Տղամարդկանց եզրափակիչը կկայանա սեպտեմբերի 8-ի լույս 9-ի գիշերը:

US Open-2024-ը անցկացվում է օգոստոսի 26-ից սեպտեմբերի 8-ը: Տղամարդկանց մրցաշարի գործող չեմպիոն սերբ թենիսիստ Նովակ Ջոկովիչն է, ով լքել է մրցաշարը վաղ փուլում:

Աշխարհի երկրորդ ռակետ, բելառուս թենիսիտուհի  Արինա Սաբալենկան և աշխարհի 6-րդ ռակետ, ամերիկացի թնիսիստուհի Ջեսիկա Պեգուլան դուրս են եկել ԱՄՆ-ի բաց առաջնության կանանց մենախաղի եզրափակիչ։

Արինա Սաբալենկան կիսաեզրափակիչում 6:3, 7:6 7:2 հաշվով առավելության է հասել աշխարհի 12-րդ ռակետ, ամերիկացի Էմմա Նավարոյի նկատմամբ։ Խաղը տևել 1 ժամ 31 րոպե։

Ջեսիկա Պեգուլան 1:6, 6:4, 6:2 հաշվով պարտության է մատնել աշխարհի 52-րդ ռակետ, չեխ Կարոլինա Մուխովային։ Խաղը տևել է 2 ժամ 12 րոպե։

Նշենք, որ եզրափակիչը կկայնա վաղը՝ սեպտեմբերի 7-ին։

US Open-ում կայացավ քառորդ եզրափակիչ երկրորդ հանդիպումը, որում աշխարհի հինգերորդ ռակետ, ռուս Դանիիլ Մեդվեդևը հանդիպեց Իտալիայի ներկայացուցիչ, ATP-ի վարկանիշային առաջատար Յանիկ Սիների հետ։ Հանդիպումն ավարտվել է Սիների հաղթանակով չորս սեթում՝ 6:2, 1:6, 6:1, 6:4:

Կանանց մենախաղում լեհ թենիսիստուհի Իգա Սվիատեկը չի կարողացել դուրս գալ US Open-ի կիսաեզրափակիչ։ Քառորդ եզրափակիչում նա 2։6, 4։6 հաշվով զիջեց ամերիկուհի Ջեսիկա Պեգուլային։

Այսպիսով, հայտնի դարձան կիսաեզրափակիչ բոլոր զույգերը.

Տղամարդկանց մենախաղի կիսեզրափակիչում կկայանան հետևյալ հանդիպումները՝ Թեյլոր Ֆրից և Ֆրենսիս Տիաֆո (երկուսն էլ՝ ԱՄՆ), Ջեք Դրեյփեր (Մեծ Բրիտանիա) և Յանիկ Սիներ (Իտալիա)։

Կանանց մրցապայքարում հանդես կգան Ջեսիկա Պեգուլա (ԱՄՆ) — Կարոլինա Մուչովա (Չեխիա), Էմմա Նավարո (ԱՄՆ) — Արինա Սաբալենկո (Բելառուս) զույգերը։

1990 թվականից ի վեր Սիները (23 տարեկան 19 օրական) դարձել է երկրորդ ամենաերիտասարդ խաղացողը, որը հասել է կիսաեզրափակիչ Ավստրալիայի բաց առաջնություններում, Ինդիան Ուելսում, Մայամիում և ԱՄՆ բաց առաջնություններում նույն օրացուցային տարում՝ Ռաֆայել Նադալից հետո (22 տարեկան 93 օրական) 2008 թվականին։

Աշխարհի առաջին ռակետ, իտալացի թենիսիստ Յաննիկ Սիները դուրս է եկել US Open 2024-ի քառորդ եզրափակիչ։ Չորրորդ շրջանի խաղում նա հաղթել է ամերիկացի Թոմի Փոլին (14-րդ համարը ATP-ի դասակարգման աղյուսակում)։ Հանդիպման վերջնական հաշիվը գրանցվել է 7:6 (7:3), 7:6 (7:5), 6:1: Այսպիսով, իտալացին դարձավ ընթացիկ մրցաշարի քառորդ եզրափակիչի վերջին մասնակիցը։

US Open 2024-ի քառորդ եզրափակիչի զույգերը․

• Յաննիկ Սիներ (Իտալիա) — Դանիիլ Մեդվեդև (Ռուսաստան)
• Ջեք Դրեյփեր (Մեծ Բրիտանիա) — Ալեքս դե Մինաուր (Ավստրալիա)
• Թեյլոր Ֆրից (ԱՄՆ) — Ալեքսանդր Զվերև (Գերմանիա)
• Գրիգոր Դիմիտրով (Բուլղարիա) — Ֆրենսիս Տիաֆո (ԱՄՆ)

Հիշեցնենք, որ ԱՄՆ-ի բաց առաջնությունը կանցկացվի օգոստոսի 26-ից սեպտեմբերի 8-ը: Տղամարդկանց մենախաղի ընդհանուր մրցանակային ֆոնդը կազմում է 75 միլիոն դոլար:

Մրցաշարի գործող չեմպիոնը սերբ թենիսիստ Նովակ Ջոկովիչն է, որը նախորդ տարվա մրցաշարի եզրափակչում հաղթեց Դանիիլ Մեդվեդևին։

Աշխարհի երրորդ ռակետ, իսպանացի թենիսիստ Կառլոս Ալկարասը մեկնաբանել է US Open-2024-ի 2-րդ տուրի խաղում կրած պարտությունը համաշխարհային դասակարգման 74-րդ ռակետ հոլանդացի Բոտիկ վան դե Զանդշուլպից ՝ 1:6, 5:7, 4։6։

Երբևէ զգացե՞լ եմ, որ խաղի ժամանակ չգիտեմ ինչ անել: Այո, դա տեղի է ունեցել մի քանի անգամ։ Ամեն հանդիպումից հետո, որում ես այս խնդիրն էի ունենում, ես միշտ նույնն էի ասում. «Պետք է մտածեմ դրա մասին»: Հիմա մտածում եմ, որ չեմ փոխվում։ Սա է խնդիրը։

Եթե ​​չփոխվեմ, ինձ համար շատ դժվար կլինի․ շատ բան չեմ կարող ասել այդ մասին: Խաղի ընթացքում մտքումս պայքար էր գնում ինքս ինձ հետ։ Թենիսում խաղում ես մեկի դեմ, ով ցանկանում է նույնը, ինչ դու՝ հաղթել։ Պետք է հնարավորինս հանգիստ լինեք, որպեսզի ձեր գլխում ճիշտ մտքեր լինեն»,- ասել է Ալկարազը հետխաղյա մամուլի ասուլիսում։

US Open-2024-ի տղամարդկանց մենախաղում Բոտիկ վան դե Զանդշուլպից Կառլոս Ալկարասի պարտությունից հետո մրցաշարում ոչ մի իսպանացի թենիսիստ չմնաց։ Միաժամանակ Իսպանիայից ութ մարզիկներ մեկնարկեցին մրցաշարի հիմնական խաղարկությունում։

Իսպանացի թենիսիստ Կառլոս Ալկարասը չի կարողացել դուրս գալ US Open-ի երրորդ շրջան։

ԱՄՆ Բաց առաջնության երկրորդ շրջանում նրա մրցակիցը հոլանդացի Բոտիկ վան դե Զանդշուլպն էր։ Հանդիպումը տևել է  2 ժամ 21 րոպե և ավարտվել 1:6, 5:7, 4:6 հաշվով:

Երրորդ տուրում Վան դե Զանդշուլպը կխաղա բրիտանացի Ջեք Դրեյփերի հետ։

Ավստրալացի թենիսիստուհի Մայա Ջոյնթը կարող է կորցնել ԱՄՆ-ի բաց առաջնությունում վաստակած մրցանակային գումարի մեծ մասը՝ կապված Ամերիկյան ազգային քոլեջի մարզական ասոցիացիայի (NCAA) կանոնների հետ։ Այս մասին հայտնում է Fox Sports-ը։

18-ամյա Ջոյնտը ուղեգիր նվաճեց US Open-ում, կարիերայի ընթացքում առաջին անգամ դուրս գալով «Մեծ սաղավարտի» մրցաշարերի հիմնական խաղարկությունում, իսկ առաջին շրջանում նա հաղթեց գերմանուհի Լաուրա Զիգեմունդին (6:4, 7:5):  Ավստրալուհին երկրորդ փուլ դուրս գալու համար արդեն վաստակել է 140 հազար դոլար մրցանակային գումար։

Բայց Ջոյնթը նախկինում հաճախել է Տեխասի համալսարան, և NCAA կանոնները սահմանափակում են ուսանող-մարզիկներին, որոնք մրցում են պրոֆեսիոնալ մրցաշարերում: Նրանք կարող են ստանալ մինչև 10 հազար դոլոր մրցանակ, և ցանկացած հետագա շահում կարող է օգտագործվել միայն ծախսերը վճարելու համար: Որոշ մարզիկներ այժմ դատի են տալիս NCAA-ին այս կանոնների պատճառով:

Նշվում է, որ Ջոյնթը` աշխարհի 135-րդ ռակետը, կարող է հրաժարվել համալսարանում սովորելուց և առանց սահմանափակումների շարունակել ելույթները։

Թենիսիստուհին ասել է, որ չի պատկերացրել, որ կարող է այդքան առաջ գնալ US Open-ում և մրցաշարից հետո նախատեսում է համալսարան գնալ, որտեղ ցանկանում է սովորել հոգեբանություն և քրեագիտություն։