Մադրիդի «Ատլետիկոյի» և Սլովենիայի ազգային հավաքականի դարպասապահ Յան Օբլակն ամուսնանում է: 33-ամյա ֆուտբոլիստն առաջարկություն է արել սերբ հայտնի թենիսիստուհի Օլգա Դանիլովիչին։

Զույգը հանդիպում է 2023 թվականից և այժմ համատեղ արձակուրդ է անցկացնում։ 25-ամյա Դանիլովիչը սոցիալական ցանցերում լուսանկար է հրապարակել, որտեղ հստակ երևում է նշանադրության մատանին։ Թենիսիստուհին հրապարակումն ուղեկցել է սրտիկի էմոջիով և գրել․

«Ամենաերջանիկը»։

Օլգա Դանիլովիչը ներկայումս զբաղեցնում է WTA-ի դասակարգման աղյուսակի 197-րդ հորիզոնականը, թեև նրա լավագույն արդյունքը եղել է 32-րդ տեղը։ Սերբ մարզուհին WTA-ի երկու մրցաշարերի հաղթող է, ինչպես նաև հասել է «Մեծ սաղավարտի» մրցաշարերի չորրորդ շրջան («Ռոլան Գարոս-2024», Australian Open-2025):

Յան Օբլակն իսպանական Լա Լիգայի պատմության և արդի ֆուտբոլի լավագույն դարպասապահներից մեկն է։ Իր հարուստ կարիերայի ընթացքում նա «Ատլետիկոյի» հետ դարձել է Իսպանիայի չեմպիոն, նվաճել ՈւԵՖԱ-ի Սուպերգավաթն ու Եվրոպա լիգայի գավաթը, ինչպես նաև բազմիցս արժանացել Իսպանիայի առաջնության լավագույն դարպասապահի կոչմանը։

Իսպանիայի հավաքականի խաղացողները 2025 թվականի Ռոլան Գարոսի տղամարդկանց մենախաղի եզրափակիչը դիտել են իրենց հեռախոսներով՝ Պորտուգալիայի դեմ ՈՒԵՖԱ-ի Ազգերի լիգայի եզրափակիչից առաջ։

Ֆրանսիայի բաց առաջնության եզրափակիչում աշխարհի առաջին ռակետ իտալացի Յանիկ Սիները մրցել է երկրորդ ռակետ իսպանացի Կառլոս Ալկարասի հետ։ Իսպանացիների հայրենակիցը հաղթել է 4-6, 6-7 (4-7), 6-4, 7-6 (7-3), 7-6 (10-2) հաշվով։

Ալկարասը և Սինները Մեծ սաղավարտի եզրափակչում առաջին անգամ էին խաղում միմյանց դեմ։ Բացի այն, որ իտալացին սեթերում 2-0 հաշվով առաջատար էր, չորրորդ սեթում նա եռակի մաթչ-փոինթ վաստակեց իսպանացու մատուցմամբ։

Իսպանիան և Պորտուգալիան միջև Ազգերի լիգայի եզրափակչի հիմնական ժամանակն ավարտվել է 2-2 հաշվով։

Աշխարհի երկրորդ ռակետ, իսպանացի թենիսիստ Կառլոս Ալկարասը դարձել է 2025 թվականի Ֆրանսիայի բաց առաջնության չեմպիոն։ Եզրափակչում նա հաղթել է աշխարհի առաջին ռակետ, իտալացի Յաննիկ Սիններին 4:6, 6:7 (4:7), 6:4, 7:6 (7:3), 7:6 (10:2) հաշվով։

Հանդիպումը տևել է 5 ժամ 29 րոպե։

Կառլոս Ալկարասի համար Փարիզում նվաճված տիտղոսը 20-րդն էր իր կարիերայում և երրորդը՝ այս մրցաշրջանում։ Նախկինում նա դարձել էր Հռոմի, Մոնտե Կառլոյի և Ռոտերդամի մրցաշարերի չեմպիոն։

Ֆրանսիայի բաց առաջնությունն անցկացվել է մայիսի 25-ից հունիսի 8-ը։ Մրցաշարի գործող չեմպիոնը Կառլոս Ալկարասն է, որը անցյալ տարվա եզրափակչում հաղթել էր գերմանացի Ալեքսանդր Զվերևին։

Մեծ սաղավարտի մրցումների 24-ակի հաղթող, աշխարհի 6-րդ ռակետ Նովակ Ջոկովիչը դուրս է եկել «Ռոլան Գարոսի» կիսաեզրափակիչ՝ քառորդ եզրափակչում տպավորիչ հաղթանակ տանելով գերմանացի Ալեքսանդր Զվերևի նկատմամբ։ Ջոկովիչը 4:6, 6:3, 6:2, 6:4 հաշվով հաղթանակ է տարել:

Սերբ թենիսիստն այս կերպ շարունակել է «Ռոլան Գարոսի» կորտերում իր անպարտելի շարքը, որը ձգվում է դեռևս 2023 թվականից։ 2025 թվականի Ռոլան Գարոսում Նովակը հաղթել է հինգ խաղում։ 2023 թվականի Ֆրանսիայի բաց առաջնությունում սերբը հաղթել է յոթ խաղում՝ նվաճելով տիտղոսը: Նույն մրցաշարում 2024 թվականին նա հաղթել է չորս խաղում, որից հետո հրաժարվել է շարունակել պայքարն առողջական խնդիրներից ելենելով: 2024 թվականի Փարիզի Օլիմպիական խաղերում 38-ամյա թենիսիստը նվաճել է չեմպիոնի տիտղոսը՝ հաղթելով մրցաշարի բոլոր վեց խաղերում։

38-ամյա լեգենդար մարզիկը ոչ միայն ապահովել է հերթական պատմական անցումը դեպի եզրափակիչ փուլ, այլև սահմանել է նոր ռեկորդ: Նա դարձել է ամենաշատ խաղերը անցկացրած թենիսիստը Մեծ սաղավարտի մրցաշարերում՝ աշխարհի վարկանիշային աղյուսակի լավագույն հնգյակում գտնվող մարզիկների դեմ։

«Մեծ սաղավարտի» 24-ակի չեմպիոն և աշխարհի 6-րդ ռակետ սերբ թենիսիստ Նովակ Ջոկովիչը վստահ հաղթանակով  է մեկնարկել 2025 թվականի Ֆրանսիայի բաց առաջնությունում։

Առաջին շրջանի խաղում Ջոկովիչը (6) 6:3, 6:3, 6:3 հաշվով առավելության է հասել ԱՄՆ-ի ներկայացուցիչ, աշխարհի 98-րդ ռակետ Մաքենզի Մաքդոնալդի նկատմամբ:

Հանդիպումը տևել է 1 ժամ 58 րոպե։

Փարիզում Ջոկովիչի հաջորդ մրցակիցը կլինի Կորենտեն Մուտետ (Ֆրանսիա) — Կլեման Տաբուր (Ֆրանսիա, Q) զույգի հաղթողը։

Մեծ սաղավարտի 20-ակի հաղթող շվեյցարացի Ռոջեր Ֆեդերերն արձագանքել է իսպանացի Ռաֆայել Նադալի կարիերան ավարտելու մասին հայտարարությանը։

«Ինչպիսի՞ կարիերա էր, Ռաֆա: Ես միշտ հույս ունեի, որ այս օրը երբեք չի գա։ Շնորհակալություն անմոռանալի հիշողությունների և քո բոլոր անհավանական ձեռքբերումների համար մեր սիրելի խաղում: Քեզ հետ մրցելը պատիվ էր ինձ համար»,- գրել է Ֆեդերերը։

38-ամյա Ռաֆայել Նադալը հայտարարել է, որ կավարտի պրոֆեսիոնալ կարիերան 2024 թվականի Դևիսի գավաթի եզրափակիչ փուլից հետո, որը կանցկացվի նոյեմբերի 19-ից 24-ը Մալագայում (Իսպանիա)։ Իր կարիերայի ընթացքում Նադալը մենախաղում հաղթել է Ռոլան Գարոսում 14 անգամ, 2 անգամ հաղթել է Ուիմբլդոնում և Ավստրալիայի բաց առաջնությունում և 4 անգամ հաղթել ԱՄՆ բաց առաջնությունում։

Նովակ Ջոկովիչը ժամանակակից թենիսի ամենաուժեղ ներկայացուցիչն է։ Դրանում կասկած գրեթե չկա։ Իհարկե, ճաշակին ընկեր չկա. ոմանց համար Նադալն է սպորտաձևի լավագույնը, շատերն էլ ցայսօր չեն կարողանում առանց հիացմունքի ու հուզմունքի խոսել Ռոջեր Ֆեդերերի մասին։ Բայց եթե մի կողմ դնենք լիրիկական զեղումներն ու խոսենք չոր թվերի լեզվով, ամեն ինչ կընկնի տեղը՝ 24 «Մեծ սաղավարտ», ռեկորդային 400+ շաբաթ որպես աշխարհի առաջին ռակետ։ Ջոկոն միակն է, որը տարին 8 անգամ ավարտել է որպես թիվ 1 ռակետ։ Սերբն ունի 98 տիտղոս, այդ թվում՝ 40 (ի դեպ, դարձյալ ռեկորդային) Մասթերս, Դևիսի գավաթ-2010, ATP գավաթ-2020։

Այս պատկառելի ցանկում չկա միայն Օլիմպիական ոսկին։ Սերբ թենիսիստի ու ՕԽ փոխհարաբերությունները լավագույն կերպով չեն զարգացել։ Հիմա կհիշենք բոլորը, կանենք անհրաժեշտ հետևություններ ու կտանք տրամաբանական հարցը. «պատրա՞ստ է Ջոկովիչը վերջապես տուն տանել Օլիմպիական ոսկին»։

Փորձերի սկիզբ

Ջոկովիչի առաջին ծանոթությունն Օլիմպիական խաղերի հետ կայացել է 2008 թվականին։ Այդ ժամանակ սերբ թենիսիստը ընդամենը 21 տարեկան էր, բայց համաշխարհային դասակարգման աղյուսակում 3-րդն էր ու հասցրել էր հաղթել Ավստրալիայի բաց առաջնությունում։ Բավական վստահ քայլերով Ջոկոն հասավ կիսաեզրափակիչ, որտեղ նրան սպասում էր Ռաֆա Նադալը։ Գերհավասար ստացված պայքարում Ջոկովիչը երրորդ սեթում 4-5 հաշվի ժամանակ ձախողեց սմեշն ուղիղ տեղը ու զիջեց ճանապարհն ապագա հաղթող իսպանացուն։ Պարտվելուց հետո նա չկարողացավ զսպել արցունքները։ Գրեթե նույն պատկերը երրորդ տեղի համար խաղից հետո էր։ Բայց այս անգամ ամերիկացի Ջեյմս Բլեյքի հետ դիմակայությունից հետո նրա աչքերը դարձյալ թաց էին, բայց դեմքին այս անգամ ժպիտ կար, իսկ վզից կախված էր օլիմպիական բրոնզը։ Այո, այդ բրոնզը հաղթանակ էր, բայց Ջոկովիչը դժվար երազեր այն պահել որպես իր գլխավոր օլիմպիական նվաճում։

Կիսաեզրափակիչ անեծքն ու Դել Պոտրոն

2012 թվականին, Լոնդոնում կայացած Օլիմպիական խաղերի բացման արարողությանը Ջոկովիչն արդեն ներկայանում էր որպես իր սպորտաձևի առաջատար։ Ջոկովիչը Սերբիայի դրոշակակիրն էր ու թենիսի մրցաշարի հաղթողի գլխավոր ֆավորիտներից մեկը։ Այս անգամ էլ սերբ թենիսիստի ճանապարհորդությունն ընդհատվեց կիսաեզրափակիչ փուլում։ Այս անգամ ևս Ջոկովիչը պարտվեց ապագա չեմպիոնին։ Բայց, ի տարբերություն Պեկին-2008-ի, այս անգամ բրոնզե մեդալ նվաճել չհաջողվեց՝ պատվո հարթակի երրորդ աստիճանին կանգնեց արգենտինացի Խուան Մարտին դել Պոտրոն։

2016 թվականին Ռիոյում Ջոկովիչը մրցեց դել Պոտրոյի հետ արդեն առաջին շրջանում։ Արգենտինացին այն ժամանակ վերադառնում էր տուր երեք վիրահատությունից հետո: Ու թեև հանդիպումը խոստանում էր բարդ լինել, սերբը դրան մոտենում էր որպես բացահայտ ֆավորիտ՝ նա բոլոր «սլեմների» գործող չեմպիոնն էր։ Սակայն Ջոկովիչը պարտվեց 6:7 6:7 հաշվով:

Պարտությունից հետո սերբը նախ ժպտաց ու թափահարեց գլուխը, իսկ հետո արգենտինացու հետ երկար ժամանակ գրկախառնված մնաց՝ սեղմելով ձեռքերը։ Թվում էր՝ այդ ժամանակ լացում էին բոլորը՝ դել Պոտրոն թաքցրեց երեսը սրբիչով, իսկ Ջոկովիչը թողեց կորտերը՝ կրկին գլուխը շարժելով և սրբելով արցունքները, ինչպես դա եղավ 2008-ին։

Սուրբ երրորդությու՞ն։ Ոչ չենք լսել

Տոկիոյում նախատեսված խաղերում Ջոկովիչը նորից ֆավորիտ էր։ Մինչև կիսաեզրափակիչ փուլ (հա, էլի կիսաեզրափակիչ) ամեն ինչ ավելի քան հարթ էր ընթանում։ Մրցակիցներից մեկին Ջոկովիչը նույնիսկ հաղթել էր 6-0 հաշվով։ Ալեքսանդր Զվերևի հետ առաջին պարտիան սերբն անցկացրեց բարձր մակարդակով՝ հաղթելով 6-1 հաշվով։ Երկրորդում Ջոկոն ուներ առավելությույն ու հաղթում էր բրեյքով։ Բայց հանկարծ կախարդանքը կորավ, առաջ եկան բղավոցներն ու կոպիտ սխալները։ Որպես հետևանք՝ Ջոկովիչը հեռացավ տուն ձեռնունայն՝ պարտվելով Զվերևին՝ 6-1 3-6 1-6 հաշվով։ Երրորդ տեղի համար խաղն էլ չստացվեց՝ պարտություն 3 սեթում Պաբլո Կարենո Բուստայից։

Նովակը միակ թենիսիստն է, որը 3 անգամ հասել է Օլիմպիական խաղերի կիսաեզրափակիչ, բայց, միևնույն ժամանակ` 0 եզրափակիչ։ Զուգախաղերում ամեն ինչ ավելի տխուր է. 2008 թվականին նա խաղացել է Նենադ Զիմոնջիչի հետ ու պարտվել առաջին շրջանում։ Լոնդոնում նրա թիմակիցն արդեն Վիկտոր Տրոիցկին էր, բայց պատկերը նույնն էր՝ առաջին շրջանից այն կողմ գնալ չստացվեց, Ռիոյում՝ նույնպես։

Վերջին փարիզյան հույս

Բնականաբար, այս ամեն ինչը Ջոկովիչի սրտով չէ։ Այսքան երկար ու շատ օլիմպիական ամենահարկի մեդալի ձգտող մարդն ամեն օր բացում է վիճակագրությունն, ու նրա սրտից արյուն է կաթում։ Թենիսային «Մեծ քառյակից» յուրաքանչյուրն ունի օլիմպիական ոսկի տարբեր կատեգորիաներում: Ռաֆայել Նադալն ու Էնդի Մարեյը Օլիմպիական չեմպիոն են մենախաղում, իսկ Ռոջեր Ֆեդերերը՝ զուգախաղում։

«Փարիզի ոսկին իմ գլխավոր նպատակն է», — ասում է Ջոկովիչը։ Նրա խոսքով այս փորձն, ամենայն հավանականությամբ, վերջինն է։ Նովակն, իհարկե, լավատես է, նա ասուլիսներից մեկի ժամանակ չի հերքել իր մասնակցությունը նաև հաջորդ՝ 2028 թվականին Լոս Անջելեսում կայանալիք խաղին, բայց մինչև այդ հորով-մորով անել է պետք այս փարիզյանը։ իսկ Ֆրանսիայի մայրաքաղաքում նրան հեշտ կյանք ոչ ոք չի խոստանում։ Ջոկոն սկսեց պայքարը Մեթյու Էբդենի հետ խաղով, իսկ երկրորդ շրջանում այսօր կհանդիպի Օլիմպիական չեմպիոն Ռաֆայել Նադալին։

Ռոբերտ Գասպարյան

Գերմանիայի հավաքականի կիսապաշտպան, Մադրիդի «Ռեալի» լեգենդ Տոնի Կրոսը և «Մեծ սաղավարտի» վեցակի հաղթող, աշխարհի նախկին առաջին թենիսիստ Բորիս Բեքերը սոցիալական ցանցերում զվարճալի զրույց են ունեցել տղամարդկանց «Ռոլան Գարոս 2024»-ի ժամանակ։

Բեքեր. մենք (նկատի ունի Գերմանիան՝ ի դեմս Ալեքսանդր Զվերևի) քո աջակցության կարիքն ունենք, Տոնի՛։
Կրոս. Իմ բեքհենդը հիմա բավականաչափ լավը չէ, Բորիս:
Բեքեր. Քո ուժը ոտքերիդ մեջ է:

Հիշեցնենք, որ «Ռոլան Գարոս 2024-ի» եզրափակչում 21-ամյա իսպանացի Կառլոս Ալկարասը հաղթել է 2020 թվականի օլիմպիական չեմպիոն, աշխարհի չորրորդ ռակետ, գերմանացի Ալեքսանդր Զվերևին։

Աշխարհի երրորդ ռակետ, իսպանացի թենիսիստ Կառլոս Ալկարասը դարձել է 2024 թվականի թենիսի Ֆրանսիայի բաց առաջնության հաղթող։

Այսօր՝ հունիսի 9-ին, նա հինգ սեթում 6 հաշվով հաղթեց ATP-ի վարկանիշային աղյուսակի չորրորդ հորիզոնականում գտնվող Ալեքսանդր Զվերևին 6:3, 2:6, 5:7, 6:1, 6:2 հաշվով։

Սա նրա առաջին հաղթանակն էր այս մրցաշարում։

Սերբ Նովակ Ջոկովիչը ծնկի վնասվածքի պատճառով հեռացավ Ռոլան Գարոսից։ ՄՌՏ արդյունքներով՝ թենիսիստի մոտ ախտորոշվել է աջ ծնկի մենիսկի պատռվածք։

Աշխարհի առաջին ռակետն աջ ծնկի հետ կապված խնդիրներ է ունեցել արգենտինացի Ֆրանսիսկո Չերունդոլոյի դեմ Ռոլան Գարոսի չորրորդ փուլի խաղում։

Քառորդ եզրափակիչում նա պետք է խաղար նորվեգացի Կասպեր Ռուդի հետ, որն այժմ դուրս կգա կիսաեզրափակիչ:

Ջոկովիչը Ռոլան Գարոսի գործող չեմպիոնն է։ 2023 թվականի եզրափակիչում նա հաղթել էր Ռուդին։