Գերմանացի թենիսիստ, աշխարհի երկրորդ ռակետ Ալեքսանդր Զվերևը հաղթեց 2026 թվականի ԱՄՆ բաց առաջնությունը։

Նյու Յորքում կայացած «Մեծ սաղավարտի» եզրափակչում Զվերևը չորս սեթում հաղթեց ամերիկացի Բեն Շելտոնին։

3 ժամ 36 րոպե տևած հանդիպումն ավարտվեց 6:3, 7:6 (7:2), 5:7, 6:2 հաշվով։

29-ամյա Զվերևը իր կարիերայում առաջին անգամ հաղթեց ԱՄՆ բաց առաջնությունը։ Սա նրա երկրորդ «Մեծ սաղավարտի» տիտղոսն է՝ 2026 թվականին Ռոլան Գարոսում տարած հաղթանակից հետո։

Զվերևը նաև առաջին գերմանացին է, որը նվաճեց այս տիտղոսը լեգենդար Բորիս Բեքերից հետո (1989 թվականին)։

Աշխարհի 50-րդ ռակետ, հայազգի թենիսիստ Կարեն Խաչանովը դուրս է եկել US Open-ի 2026 թվականի խաղարկության կիսաեզրափակիչ։

Քառորդ եզրափակիչում Խաչանովը հաղթում էր բելգիացի Ալեքսանդր Բլոքսին՝ 6:2, 7:5, 3:2 հաշվով, երբ մրցակիցը վնասվածքի պատճառով դադարեցրեց հանդիպումը։

Խաչանովի համար սա կարիերայի երրորդ «Մեծ սաղավարտի» կիսաեզրափակիչն է և երկրորդը՝ US Open-ում։ Վերջին անգամ նա Նյու Յորքում այս փուլ հասել էր 2022 թվականին։

Կիսաեզրափակիչում Խաչանովը կհանդիպի աշխարհի 2-րդ ռակետ Ալեքսանդր Զվերևին։ Մյուս կիսաեզրափակիչում միմյանց դեմ կխաղան Ֆրենսիս Տիաֆոն և Բեն Շելթոնը։

Աշխարհի 50-րդ ռակետ, հայ թենիսիստ Կարեն Խաչանովը վստահորեն անցավ 2026 թվականի ԱՄՆ բաց առաջնության երրորդ փուլ։

Երկրորդ փուլում նա հաղթեց կանադացի Ֆելիքս Օժե-Ալիասիմին, որը ATP վարկանիշային աղյուսակում չորրորդն է։

Մրցախաղը տևեց 3 ժամ 19 րոպե, հաշիվը՝ 6:7 (5:7), 6:3, 6:2, 6:2։

Երրորդ փուլում Խաչանովը կմրցի ֆրանսիացի Բենջամին Բոնսիի և պերուացի Իգնասիո Բուսեի միջև խաղի հաղթողի հետ։

Խաչանովը Տոկիո-2020-ի մենախաղի արծաթե մեդալակիրն է։

Գերմանիայի Համբուրգ քաղաքում ընթացող WTA-250 կարգի մրցաշարում Հայաստանի ներկայացուցիչ Էլինա Ավանեսյանը նվաճել է կիսաեզրափակիչի ուղեգիր։

Քառորդ եզրափակիչում աշխարհի 208-րդ ռակետը պետք է մրցեր Ուկրաինան ներկայացնող Ալեքսանդրա Օլեյնիկովայի (45-րդ ռակետ) հետ, սակայն վերջինս վնասվածքի պատճառով հրաժարվել է կորտ դուրս գալ, ինչի արդյունքում 23-ամյա հայ թենիսիստուհին առանց պայքարի անցել է հաջորդ փուլ:

Հիշեցնենք, որ Ավանեսյանը մրցաշարը սկսել էր որակավորման փուլից, որտեղ երկու հաղթանակ տանելուց հետո հիմնական ցանցի առաջին և երկրորդ շրջաններում պայքարից դուրս էր թողել նիդերլանդցի Արանչա Ռուսին ու Ղազախստանի ներկայացուցիչ Յուլիա Պուտինցևային:

Եզրափակիչի ուղեգրի համար Էլինա Ավանեսյանը կմրցի աշխարհի 97-րդ ռակետ, հունգարացի Աննա Բոնդարի հետ: Հատկանշական է, որ հունգարացի թենիսիստուհին քառորդ եզրափակիչում 6:1, 7:6 (7:3) հաշվով առավելության էր հասել Հայաստանի մյուս ներկայացուցիչ Ալինա Չարաևայի նկատմամբ:

Հավելենք, որ Համբուրգի մրցաշարը կեզրափակվի հուլիսի 26-ին։

Աշխարհի 208-րդ ռակետ, հայ թենիսիստուհի Էլինա Ավանեսյանը դուրս եկավ Համբուրգում ընթացող WTA-250 մրցաշարի քառորդ եզրափակիչ։

Նա երկրորդ փուլում հաղթեց ղազախստանցի Յուլիա Պուտինցևային, որը զբաղեցնում է աշխարհում 79-րդ տեղը։

Հանդիպումը տևեց երկու ժամ 10 րոպե և ավարտվեց 6:3, 2:6, 6:2 հաշվով։

Հաջորդ փուլում Ավանեսյանը կմրցի ուկրաինացի Ալեքսանդրա Օլեյնիկովայի հետ։

Աշխարհի թիվ 1 ռակետ, իտալացի թենիսիստ Յանիկ Սիները նվաճեց 2026 թվականի Ուիմբլդոնի տղամարդկանց տիտղոսը՝ եզրափակիչ խաղում հաղթելով գերմանացի Ալեքսանդր Զվերևին, որը երրորդն է աշխարհում։

Եզրափակիչ խաղը տևեց 3 ժամ 46 րոպե և ավարտվեց 6:7 (9:7), 7:6 (7:2), 6:3, 6:4 հաշվով։

Այսպիսով, Սիները պահպանեց իր Ուիմբլդոնի չեմպիոնի տիտղոսը։ Անցյալ տարվա եզրափակչում նա հաղթեց իսպանացի Կարլոս Ալկարասին (4:6, 6:4, 6:4, 6:4):

24-ամյա իտալացին դարձավ տասներորդ թենիսիստը, որը երկու անգամ անընդմեջ նվաճեց Ուիմբլդոնի տիտղոսը։

Սա թենիսիստի Մեծ Սաղավարտի 5-րդ տիտղոսն է կարիերայում։ Նա նախկինում հաղթել էր 2024 և 2025 թվականների Ավստրալիայի բաց առաջնությունում, 2024 թվականի ԱՄՆ բաց առաջնությունում և 2025 թվականի Ուիմբլդոնում։

Աշխարհի 12-րդ ռակետ 21-ամյա չեխ Լինդա Նոսկովան հասել է 2026 թվականի Ուիմբլդոնի եզրափակիչ։

Կիսաեզրափակչում նա 6-4, 6-4 հաշվով հաղթել է ուկրաինացի Մարթա Կոստյուկին (13-րդ ռակետ)։

Մրցախաղը տևել է 1 ժամ 21 րոպե։

Նոսկովան 2026 թվականի Ուիմբլդոնի տիտղոսի համար կմրցի իր հայրենակից Կարոլինա Մուխովայի հետ, որը WTA-ի իններորդ համարն է։

2009 թվականից ի վեր սա կլինի կանանց մրցաշարի առաջին եզրափակիչը, որում կհանդիպեն նույն երկրի ներկայացուցիչները։ 17 տարի առաջ Սերենա Ուիլյամսը հաղթել էր իր քրոջը՝ Վինուսին։

Հայ թենիսիստ Կարեն Խաչանովը դուրս եկավ Ուիմբլդոնի երկրորդ փուլ՝ մեկնարկային փուլում հաղթելով Մեծ Բրիտանիայի ներկայացուցիչ Բիլլի Հարիսին 6-3, 5-7, 6-3, 6-3 հաշվով։

Հանդիպումը տևեց 2 ժամ 58 րոպե։

Հայ մարզիկի հաջորդ մրցակիցը կլինի աշխարհի 56-րդ համարի գերմանացի թենիսիստ Յանիկ Հանֆմանը։

Հանդիպումը կկայանա վաղը՝ հունիսի 1-ին։

Արգենտինայի հավաքականի ավագ Լիոնել Մեսսին շատ հարցերում իրեն նույնացնում է իսպանացի հայտնի թենիսիստ Ռաֆայել Նադալի հետ: Այս մասին լեգենդար ֆուտբոլիստը հայտարարել է աշխարհի առաջնության խմբային փուլում Ալժիրի հավաքականի դարպասը հեղինակած հեթ-տրիկից հետո:

Մեսսին նշել է, որ անգամ հիմա՝ մունդիալի օրերին, շարունակում է վերանայել իսպանացի թենիսիստի մրցելույթները:

 «Այդ առումով ես շատ նման եմ նրան. ես միշտ ցանկանում եմ առավելագույնս նվիրվել և ողջ ուժերս ներդնել դաշտում»,- Մեսսիի խոսքերն է մեջբերում Infobae պարբերականը:

Նշենք, որ աշխարհի առաջնություններում խփելով իր 16-րդ գոլը՝ Մեսսին այս ցուցանիշով հավասարվել է Գերմանիայի հավաքականի նախկին հարձակվող Միրոսլավ Կլոզեին: Այժմ նրանք կիսում են Մունդիալների պատմության լավագույն ռմբարկուների ցուցակի առաջին հորիզոնականը:

Հատկանշական է նաև, որ հանդիպման առաջին խաղակեսում արգենտինացին կարող էր հեռացվել խաղադաշտից ալժիրցի ֆուտբոլիստի սրունքին խաղակոշիկի ստորին հատվածով հարվածելու համար, սակայն ոչ գլխավոր մրցավարը, ոչ էլ VAR համակարգի պատասխանատուներն այս դրվագին չեն արձագանքել:

Մադրիդի «Ատլետիկոյի» և Սլովենիայի ազգային հավաքականի դարպասապահ Յան Օբլակն ամուսնանում է: 33-ամյա ֆուտբոլիստն առաջարկություն է արել սերբ հայտնի թենիսիստուհի Օլգա Դանիլովիչին։

Զույգը հանդիպում է 2023 թվականից և այժմ համատեղ արձակուրդ է անցկացնում։ 25-ամյա Դանիլովիչը սոցիալական ցանցերում լուսանկար է հրապարակել, որտեղ հստակ երևում է նշանադրության մատանին։ Թենիսիստուհին հրապարակումն ուղեկցել է սրտիկի էմոջիով և գրել․

«Ամենաերջանիկը»։

Օլգա Դանիլովիչը ներկայումս զբաղեցնում է WTA-ի դասակարգման աղյուսակի 197-րդ հորիզոնականը, թեև նրա լավագույն արդյունքը եղել է 32-րդ տեղը։ Սերբ մարզուհին WTA-ի երկու մրցաշարերի հաղթող է, ինչպես նաև հասել է «Մեծ սաղավարտի» մրցաշարերի չորրորդ շրջան («Ռոլան Գարոս-2024», Australian Open-2025):

Յան Օբլակն իսպանական Լա Լիգայի պատմության և արդի ֆուտբոլի լավագույն դարպասապահներից մեկն է։ Իր հարուստ կարիերայի ընթացքում նա «Ատլետիկոյի» հետ դարձել է Իսպանիայի չեմպիոն, նվաճել ՈւԵՖԱ-ի Սուպերգավաթն ու Եվրոպա լիգայի գավաթը, ինչպես նաև բազմիցս արժանացել Իսպանիայի առաջնության լավագույն դարպասապահի կոչմանը։