Արգենտինայի հավաքականի ավագ Լիոնել Մեսսին շատ հարցերում իրեն նույնացնում է իսպանացի հայտնի թենիսիստ Ռաֆայել Նադալի հետ: Այս մասին լեգենդար ֆուտբոլիստը հայտարարել է աշխարհի առաջնության խմբային փուլում Ալժիրի հավաքականի դարպասը հեղինակած հեթ-տրիկից հետո:

Մեսսին նշել է, որ անգամ հիմա՝ մունդիալի օրերին, շարունակում է վերանայել իսպանացի թենիսիստի մրցելույթները:

 «Այդ առումով ես շատ նման եմ նրան. ես միշտ ցանկանում եմ առավելագույնս նվիրվել և ողջ ուժերս ներդնել դաշտում»,- Մեսսիի խոսքերն է մեջբերում Infobae պարբերականը:

Նշենք, որ աշխարհի առաջնություններում խփելով իր 16-րդ գոլը՝ Մեսսին այս ցուցանիշով հավասարվել է Գերմանիայի հավաքականի նախկին հարձակվող Միրոսլավ Կլոզեին: Այժմ նրանք կիսում են Մունդիալների պատմության լավագույն ռմբարկուների ցուցակի առաջին հորիզոնականը:

Հատկանշական է նաև, որ հանդիպման առաջին խաղակեսում արգենտինացին կարող էր հեռացվել խաղադաշտից ալժիրցի ֆուտբոլիստի սրունքին խաղակոշիկի ստորին հատվածով հարվածելու համար, սակայն ոչ գլխավոր մրցավարը, ոչ էլ VAR համակարգի պատասխանատուներն այս դրվագին չեն արձագանքել:

Մադրիդի «Ատլետիկոյի» և Սլովենիայի ազգային հավաքականի դարպասապահ Յան Օբլակն ամուսնանում է: 33-ամյա ֆուտբոլիստն առաջարկություն է արել սերբ հայտնի թենիսիստուհի Օլգա Դանիլովիչին։

Զույգը հանդիպում է 2023 թվականից և այժմ համատեղ արձակուրդ է անցկացնում։ 25-ամյա Դանիլովիչը սոցիալական ցանցերում լուսանկար է հրապարակել, որտեղ հստակ երևում է նշանադրության մատանին։ Թենիսիստուհին հրապարակումն ուղեկցել է սրտիկի էմոջիով և գրել․

«Ամենաերջանիկը»։

Օլգա Դանիլովիչը ներկայումս զբաղեցնում է WTA-ի դասակարգման աղյուսակի 197-րդ հորիզոնականը, թեև նրա լավագույն արդյունքը եղել է 32-րդ տեղը։ Սերբ մարզուհին WTA-ի երկու մրցաշարերի հաղթող է, ինչպես նաև հասել է «Մեծ սաղավարտի» մրցաշարերի չորրորդ շրջան («Ռոլան Գարոս-2024», Australian Open-2025):

Յան Օբլակն իսպանական Լա Լիգայի պատմության և արդի ֆուտբոլի լավագույն դարպասապահներից մեկն է։ Իր հարուստ կարիերայի ընթացքում նա «Ատլետիկոյի» հետ դարձել է Իսպանիայի չեմպիոն, նվաճել ՈւԵՖԱ-ի Սուպերգավաթն ու Եվրոպա լիգայի գավաթը, ինչպես նաև բազմիցս արժանացել Իսպանիայի առաջնության լավագույն դարպասապահի կոչմանը։

Հունիսի 1-6-ը թենիսի «Արարատ» ակումբում անցկացվեց Հրաչյա Իսրայելյանի անվան միջազգային հուշամրցաշարը (ITF J30)։

Մրցաշարին մասնակցել են մինչև 18 տարեկան 32 տղա և 32 աղջիկ թենիսիստ ինչպես Հայաստանից, այնպես էլ այլ երկրներից՝ Ռուսաստանից, Իռլանդիայից, Իտալիայից, Գերմանիայից, Չեխիայից, Հունաստանից, Բուլղարիայից, Ռումինիայից, Ուկրաինայից, Վրաստանից և այլն։

«Մասնակիցների մեծ թվով պայմանավորված՝ մայիսի 29-31-ին անցկացվել է որակավորման փուլ, որի հաղթողները նվաճել են մրցաշարի հիմնական փուլին մասնակցելու իրավունք»,- նշեց թենիսի «Արարատ» ակումբի տնօրեն Էդուարդ Սանամյանը, ով նաև մրցաշարի տնօրենն է։ Նա նաև ավելացրեց, որ մրցաշարը վարկանիշային է, և դա շատ կարևոր է, քանի որ մասնակիցները մոտիվացված են վարկանիշային միավորներ ձեռք բերելու։

Նշենք, որ սա ITF-ի առաջին մրցաշարն է, որն անցկացվել է թենիսի «Արարատ» ակումբում։

«Ունեցել ենք միջազգային, եվրոպական մրցաշարեր, սովորաբար ավելի ցածր տարիքային կատեգորիաներում, բավականին ընդգրկուն։ Այս մրցաշարից առաջ 16 տարեկանների երկու միջազգային մրցաշար անցկացրեցինք։ Եվս մեկ շաբաթ մրցաշար ունենք, այնպես որ, մեզ մոտ բավականին հետաքրքիր, միջազգային մրցաշարերով հագեցած ժամանակաշրջան է»,- ավելացրեց Էդուարդ Սանամյանը։

Հրաչյա Իսրայելյանի անվան միջազգային հուշամրցաշարն անցկացվեց փլեյ-օֆֆ ձևաչափով՝ ինչպես մենախաղերում, այնպես էլ զուգախաղերում։ Եզրափակիչ հանդիպումները կայացան հունիսի 5-ին և 6-ին։

Մեծ սաղավարտի մրցաշարերի յոթակի հաղթող, աշխարհի երկրորդ ռակետ, իսպանացի թենիսիստ Կառլոս Ալկարասը ճանաչվել է «Տարվա մարզիկ» հեղինակավոր Laureus World Sports Awards – 2026 մրցանակաբաշխության վարկածով: Գլխավոր մարզական իրադարձություններից մեկն արդեն երրորդ տարին անընդմեջ անցկացվում է Իսպանիայի մայրաքաղաք Մադրիդում։

Այս պատվավոր կոչման համար իսպանացի թենիսիստի հետ համառ պայքար էին մղում համաշխարհային սպորտի այնպիսի գերաստղեր, ինչպիսիք են.

• Յանիկ Սիներ (թենիս, Իտալիա)
• Ուսման Դեմբելե (ֆուտբոլ, Ֆրանսիա)
• Արման Դյուպլանտիս (աթլետիկա, Շվեդիա)
• Մարկ Մարկես (մոտոարշավ, Իսպանիա)
• Տադեյ Պոգաչար (հեծանվասպորտ, Սլովենիա)

Նշենք, որ Laureus Awards-ի հանրահայտ արձանիկը նախագծվել և պատրաստվել է շքեղության խորհրդանիշ հանդիսացող Cartier ապրանքանիշի կողմից: Ալկարասն իր մրցանակը ստացել է ֆուտբոլային լեգենդներ Իկեր Կասիլյասի և Լուիշ Ֆիգուի ձեռքից։

Համաձայն կանոնակարգի՝ Laureus-ի անվանակարգերի հավակնորդների կարճ ցուցակները ևավորվում են ավելի քան 70 երկրների շուրջ 1000 առաջատար մարզական ԶԼՄ-ների ներկայացուցիչների քվեարկության արդյունքում: Դրանից հետո Laureus համաշխարհային մարզական ակադեմիան գաղտնի քվեարկությամբ ընտրում է հաղթողներին:

Մադրիդում ընթացող WTA 125 շարքի մրցաշարի 1/16 եզրափակիչում Հայաստանի ներկայացուցիչ Էլինա Ավանեսյանը երկու սեթում՝ 6:4, 7:5 հաշվով, հաղթեց աշխարհի 146-րդ ռակետ, իսպանացի Անդրեա Լազարո Գարսիային։ Այս մասին հայտնում է ՀԹՖ-ի մամուլի ծառայությունը։

1/8 եզրափակիչում Ավանեսյանն այսօր՝ ապրիլի 8-ին, կմրցի աշխարհի 100-րդ ռակետ, բրիտանացի Ֆրանչեսկա Ջոնսի հետ։

Հիշեցնենք, որ որակավորման փուլում Ավանեսյանը հաղթել էր Ֆրանսիան ներկայացնող Սելենա Յանիչևիչին և Եկատերինա Կազիոնովային։

«Laureus World Sports Awards» միջազգային հեղինակավոր մրցանակաբաշխությունը հրապարակել է 2026 թվականի «Տարվա լավագույն մարզիկ» կոչման հավակնորդների անունները՝ տղամարդկանց և կանանց անվանակարգերում։

«Տարվա լավագույն մարզիկ» հավակնորդներ (կանայք).

• Արինա Սոբոլենկո (թենիս, Բելառուս)
• Այտանա Բոնմատի (ֆուտբոլ, Իսպանիա)
• Մելիսա Ջեֆերսոն (աթլետիկա, ԱՄՆ)
• Ֆեյթ Չեպնգետիչ Կիպյեգոն (աթլետիկա, Քենիա)
• Քեթի Լեդեկի (լող, ԱՄՆ)
• Սիդնի Մաքլաֆլին-Լևրոն (աթլետիկա, ԱՄՆ)

«Տարվա լավագույն մարզիկ» հավակնորդներ (տղամարդիկ).

• Կառլոս Ալկարաս (թենիս, Իսպանիա)
• Յանիկ Սիներ (թենիս, Իտալիա)
• Ուսման Դեմբելե (ֆուտբոլ, Ֆրանսիա)
• Արման Դյուպլանտիս (աթլետիկա, Շվեդիա)
• Մարկ Մարկես (մոտոսպորտ, Իսպանիա)
• Տադեյ Պոգաչար (հեծանվասպորտ, Սլովենիա)

Մրցանակակիրների անունները կհրապարակվեն ապրիլի 20-ին Իսպանիայի մայրաքաղաք Մադրիդում կայանալիք հանդիսավոր արարողության ժամանակ։

Հիշեցնենք, որ 2025 թվականին Laureus-ի վարկածով տարվա լավագույն մարզիկներ էին ճանաչվել շվեդ ձողացատկորդ Արման Դյուպլանտիսը և ամերիկացի մարմնամարզուհի Սիմոնա Բայլզը։

Պրոֆեսիոնալ թենիսիստների ասոցիացիան (ATP) հրապարակել է դասակարգման թարմացված աղյուսակը։

Հայազգի թենիսիստ Կարեն Խաչանովը բարելավել է իր դիրքը մեկ աստիճանով և այժմ զբաղեցնում է 17-րդ հորիզոնականը՝ իր ակտիվում ունենալով 2360 միավոր։

Նախորդ շաբաթ Խաչանովը մասնակցել է Նիդերլանդների Ռոտերդամ քաղաքում կայացած ATP-500 շարքի մրցաշարին, որտեղ հասել է մինչև երկրորդ շրջան։

Հավելենք, որ աշխարհի առաջին ռակետը շարունակում է մնալ իսպանացի Կառլոս Ալկարասը (13150 միավոր), որին հաջորդում են իտալացի Յաննիկ Սիներն ու սերբ Նովակ Ջոկովիչը։

WTA-ն հրապարակել է թենիսիստուհիների համաշխարհային դասակարգման թարմացված աղյուսակը։

Հայաստանը ներկայացնող Էլինա Ավանեսյանը բարձրացել է 11 հորիզոնականով և այժմ զբաղեցնում է 158-րդ տեղը։ Նշենք, որ 23-ամյա թենիսիստուհին հիվանդության պատճառով շուրջ երկու ամսվա ընդմիջումից հետո օրեր առաջ մասնակցել է Չեխիայի Օստրավա քաղաքում կայացած WTA 250 շարքի մրցաշարին։ Նա հաղթական մեկնարկ է ապահովել, սակայն դրանից հետո ավարտել է ելույթները։

Դասակարգման աղյուսակը շարունակում է գլխավորել բելառուս Արինա Սաբալենկան, երկրորդ տեղում է լեհ Իգա Շվյոնտեկը, իսկ լավագույն եռյակը եզրափակում է Ավստրալիայի բաց առաջնության նորընծա չեմպիոն, Ղազախստանը ներկայացնող Ելենա Ռիբակինան։

Չեխիայի Օստրավա քաղաքում ընթացող WTA 250 կարգի միջազգային մրցաշարի 1/16 եզրափակիչում Հայաստանի ներկայացուցիչ Էլինա Ավանեսյանը հաղթեց աշխարհի 88-րդ ռակետ, ճապոնացի Մոյուկա Ուչիջիմային։ Այս մասին հայտնում է ՀԹՖ-ի մամուլի ծառայությունը։

1 ժամ 55 րոպե տևած պայքարում Ավանեսյանը հաղթեց  6։3, 2։6, 6։3 հաշվով։

1/8 եզրափակիչում Ավանեսյանի մրցակիցը կլինի Ալիսիա Պարկս (ԱՄՆ, 99-րդ ռակետ)-Ջուլիա Գրաբեր (Ավստրիա, 95-րդ ռակետ) զույգի հաղթողը։

Իսպանացի թենիսիստ Կառլոս Ալկարասը դարձավ Ավստրալիայի 2026 թվականի բաց առաջնության հաղթող։

Մելբուրնում կայացած եզրափակիչ դիմակայությունում աշխարհի առաջին ռակետը 4 սեթում առավելության հասավ սերբ Նովակ Ջոկովիչի (4-րդ համար) նկատմամբ։ Հանդիպումն ավարտվեց 2:6, 6:2, 6:3, 7:5 հաշվով և տևեց 3 ժամ 2 րոպե։

22-ամյա իսպանացու համար սա առաջին հաղթանակն է Australian Open-ում։ Ալկարասն իր կարիերայում նվաճեց «Մեծ սաղավարտի» մրցաշարերի յոթերորդ տիտղոսը։

38-ամյա Ջոկովիչը, հիշեցնենք, մենախաղում ունի «Մեծ սաղավարտի» 24 տիտղոս։

Կառլոս Ալկարաս (Իսպանիա, 1) — Նովակ Ջոկովիչ (Սերբիա, 4) — 2:6, 6:2, 6:3, 7:5