Ցանկացած ֆուտբոլիստի համար Աշխարհի առաջնությունում հաղթելը մնում է գլխավոր երազանքն ու կարիերան իդեալական ավարտելու լավագույն միջոցը։ Սակայն ժամանակն անողոք է. շատ լեգենդներ արդեն մոտեցել են 40-ի շեմին կամ նույնիսկ հատել այն։ Սա նշանակում է, որ Հյուսիսային Ամերիկայում ընթացող մրցաշարը նրանց համար կարող է վերջին ելույթը լինել մոլորակի գլխավոր ֆուտբոլային բեմում:

Ձեզ ենք ներկայացնում 9 աստղային ֆուտբոլիստների, որոնց համար ԱԱ-2026-ը մեծ հավանականությամբ վերջինը կլինի կարիերայում:

Լիոնել Մեսսի (Արգենտինա, 38 տարեկան)

Երբ 2023-ին Մեսսին տեղափոխվեց «Ինտեր Մայամի», որպես գլխավոր պատճառներից մեկը նշվում էր հենց ԱՄՆ-ում, Կանադայում և Մեքսիկայում կայանալիք ԱԱ-2026-ը: Արգենտինացին արդեն նվաճել է բաղձալի գավաթը, սակայն հավաքականի մարզաշապիկին ևս մեկ աստղ ավելացնելը նրա վերջին մեծ նպատակն է: Ի տարբերություն Ռոնալդուի՝ 38-ամյա Մեսսին շարունակում է մնալ Արգենտինայի առանցքային դեմքը։ Լիոնել Սկալոնին ստեղծել է մի համակարգ, որն ազատում է ավագին պաշտպանական աշխատանքից: Մեսսիի ժառանգությունը Մունդիալներում արդեն իսկ կատարյալ է (նա իր նորամուտը նշել է դեռ 2006-ին), իսկ նոր տիտղոսն ուղղակի կզարդարի նրա մեծագույն կարիերան։

Կրիշտիանու Ռոնալդու (Պորտուգալիա, 41 տարեկան)

Եթե Մեսսիի պատմությունն ԱԱ-ներում արդեն ունի հեքիաթային ավարտ, ապա Ռոնալդուինը դեռ գրված չէ: Աշխարհի գավաթը միակ պակասող տիտղոսն է նրա փառահեղ կարիերայում: Շատ քննադատներ կարծում են, որ առանց այս գավաթի անհնար է վերջնականապես փակել «բոլոր ժամանակների մեծագույն ֆուտբոլիստի» մասին վեճը։ Այժմ Պորտուգալիան ունի պատմության լավագույն կազմերից մեկը (Վիտինյա, Ժոաու Նևեշ, փայլուն մրցաշրջան անցկացնող Բրունու Ֆերնանդեշ): Եթե նախկինում Ռոնալդուն էր բարձրացնում թիմի մակարդակը, հիմա թիմն ինքը կարող է օգնել առաջնորդին հասնել գագաթնակետին: Հատկանշական է, որ Կրիշտիանուն ԱԱ-ների փլեյ-օֆֆում դեռ գոլ չունի, իսկ նրա լավագույն արդյունքը 2006-ի 4-րդ տեղն է:

Գիլյերմո Օչոա (Մեքսիկա, 40 տարեկան)

Մունդիալը միայն սուպերաստղերի մրցաշար չէ։ Շատ երկրպագուների համար այն ասոցացվում է մեքսիկացի դարպասապահ Գիլյերմո Օչոայի հերթական հերոսությունների հետ։ Մեսսիի և Ռոնալդուի պես՝ նրա համար սա 6-րդ Աշխարհի առաջնությունն է: Թեև նա այլևս թիմի անառարկելի առաջին համարը չէ (զիջելով Ռաուլ Ռանխելին), նույնիսկ մի քանի րոպեն բավական կլինի պատմության մեջ մտնելու համար:

Լուկա Մոդրիչ (Խորվաթիա, 40 տարեկան)

Մոդրիչը վաղուց ապահովել է Խորվաթիայի պատմության մեծագույն ֆուտբոլիստի կարգավիճակը: Հենց նրա օրոք թիմը գրանցեց լավագույն արդյունքները՝ արծաթ (2018) և բրոնզ (2022): 40-ամյա կիսապաշտպանը քննարկում է մրցաշարից հետո կարիերան ավարտելու հարցը, սակայն նույնիսկ տարեց կազմով Խորվաթիային հաշվից հանելը վտանգավոր է:

Նեյմար (Բրազիլիա, 34 տարեկան)

Նեյմարը կարող էր արդեն իսկ անցկացրած լինել իր վերջին Մունդիալը, սակայն Բրազիլիայի գլխավոր մարզիչ Կարլո Անչելոտին նրան ընդգրկել է հայտացուցակում: Հարձակվողի մասնակցությունը մրցաշարին դեռ հարցականի տակ է վնասվածքի պատճառով, բայց եթե բրազիլացիները հեռու գնան, նա կարող է հայտնվել դաշտում: Նեյմարի ազդեցությունը թիմում փոքր-ինչ նվազել է, բայց հայրենիքում նա մնում է ամենասիրելի ֆուտբոլիստներից մեկը:

Կևին դե Բրույնե (Բելգիա, 34 տարեկան)

Կիսապաշտպանը Բելգիայի հայտնի «ոսկե սերնդի» վերջին ներկայացուցիչներից է: Դե Բրույնեն Մունդիալներում անցկացրել է 13 հանդիպում՝ դառնալով 2 գոլի և 4 գոլային փոխանցման հեղինակ, թեև վստահաբար ակնկալում էր ավելի մեծ հետք թողնել: Շատ փորձագետներ Բելգիային կրկին համարում են այս մրցաշարի գաղտնի ֆավորիտներից մեկը:

Մոհամեդ Սալահ (Եգիպտոս, 33 տարեկան)

Շատերը Սալահի հեռանալը «Լիվերպուլից» ընկալեցին որպես բարձր մակարդակում կարիերայի ավարտ: Եգիպտոսը 1994-ից ի վեր միայն մեկ անգամ էր դուրս եկել ԱԱ (2018-ին, որտեղ Սալահը գոլ խփեց իր 2 խաղերում, բայց թիմը դուրս չեկավ խմբից): Այս տարի նրանց սպասում է բարդ խումբ՝ Բելգիայի և Իրանի հետ: Սակայն Նոր Զելանդիայի հետ հանդիպումը կարող է Եգիպտոսին պարգևել պատմության մեջ առաջին հաղթանակը Աշխարհի առաջնություններում:

Սադիո Մանե (Սենեգալ, 34 տարեկան)

Մանեն վերադառնում է ԱԱ՝ վնասվածքի պատճառով 2022-ի մրցաշարը բաց թողնելուց հետո: Ճակատագրի հեգնանքով, հենց առանց նրա Սենեգալը գրանցեց իր լավագույն արդյունքը Մունդիալներում: Չնայած Մանեն հանդես է գալիս Սաուդյան Արաբիայում, նա շարունակում է մնալ ազգային թիմի անփոխարինելի առաջատարը։

Խամես Ռոդրիգես (Կոլումբիա, 34 տարեկան)

ԱԱ-2014-ի գլխավոր աստղը վաղուց բարձր մակարդակով հանդես չի գալիս ակումբային ֆուտբոլում, սակայն շարունակում է փայլել Կոլումբիայի հավաքականում: Հարավամերիկյան ընտրական փուլում նա կատարեց ամենաշատ գոլային փոխանցումները՝ շրջանցելով նույնիսկ Լիոնել Մեսսիին: ԱԱ-ներում Խամեսն անցկացրել է ընդամենը 8 հանդիպում, սակայն հասցրել է աչքի ընկնել 10 արդյունավետ գործողությամբ։ Նա բաց թողեց ԱԱ-2022-ը, սակայն այժմ կրկին շարքերում է:

Սովորաբար աշխարհի առաջնություններն ուղեկցվում են մեկ գլոբալ շոուով, սակայն այս տարի ՖԻՖԱ-ն որոշել է բացման արարողությունը բաժանել մրցաշարն ընդունող երեք երկրների միջև։ Տոնական մեկնարկը տրվեց Մեքսիկայի լեգենդար «Ացտեկա» մարզադաշտում։ Դրան կհաջորդեն արարողությունները Կանադայում (Տորոնտո) և ԱՄՆ-ում (Լոս Անջելես)։

Յուրաքանչյուր երկիր կներկայացնի յուրօրինակ շոու՝ հագեցած տեղական մշակույթով, խորհրդանիշներով և հատուկ ընտրված երաժիշտներով։ Մեքսիկական շոուն տևեց մոտ 17 րոպե, իսկ Տորոնտոյի և Լոս Անջելեսի ներկայացումները հավանաբար էլ ավելի կարճ կլինեն։

«Ացտեկայի» խոտածածկը պատված էր ոսկեգույն նախշերով հսկայական փիրուզագույն ծածկոցով, որը խորհրդանշում էր ավանդական մեքսիկական թղթե ժանյակները․ դրանցով զարդարում են տներն ու փողոցները տոների ժամանակ։

Կենտրոնում վեր էր խոյանում Աշխարհի գավաթի հսկայական ոսկեզօծ կրկնօրինակը, որի շուրջ պարում էին հարյուրավոր արտիստներ՝ կրելով ֆոլկլորային տարազներ և ացտեկների ու մինչկոլումբոսյան մշակույթը մարմնավորող փետրավոր գլխարկներ։ Մեկ այլ խումբ ներկայացավ ոսկեգույն զգեստներով՝ ձեռքերին մանրակերտ գավաթներ պահած։ Այս ամենն ուղեկցվում էր թմբուկների զարկերով, ծխով ու հրավառությամբ։ Վիզուալ էֆեկտների համար պատասխանատու էր «Balich Wonder» ստուդիան՝ Մարկո Բալիչի գլխավորությամբ։

Շոուն հագեցած էր երաժշտական աստղային ելույթներով. Մեքսիկական հայտնի փոփ-ռոք խումբ Maná-ն կատարեց իր Oye Mi Amor հիթը։ Danny Ocean-ը հանդես եկավ հատուկ ԱԱ-2026-ի համար գրված Partidazo փոփ-կատարմամբ։ Մեքսիկական Los Ángeles Azules խումբն ու փոփ-երգչուհի Belinda-ն կատարեցին Por Ella կրակոտ սինգլը։ J Balvin-ը ռեգետոն և լատինո-փոփ ռիթմեր հաղորդեց մարզադաշտին։

Արարողության գագաթնակետը դարձավ Շակիրայի և Burna Boy-ի ելույթը՝ ԱԱ-2026-ի պաշտոնական Dai Dai երգով։ Ի դեպ, Շակիրան Աշխարհի առաջնության բացման արարողությանը մասնակցել էր նաև 16 տարի առաջ՝ ՀԱՀ-ում կայացած Մունդիալ-2010-ի ժամանակ։

Էկրաններին վայրկյաններով հայտնվեցին երկու «Labubu» կերպարներ։ Սա ՖԻՖԱ-ի և խաղալիքներ արտադրող Pop Mart ընկերության հատուկ գովազդային ինտեգրացիան էր, որոնք ԱԱ-ի համար համատեղ հավաքածու են թողարկել։

Մեքսիկայի դրոշի գույներով հրավառությունից հետո խաղադաշտ դուրս եկավ հոլիվուդյան դերասանուհի Սալմա Հայեկը՝ որպես ՖԻՖԱ-ի պաշտոնական դեսպան և միջոցառման հաղորդավարուհի։ Նա աչքի էր ընկնում կրակոտ կարմիր զգեստով։

Ողջունելով երկրպագուներին՝ Հայեկն ազդարարեց դրոշների շքերթի մեկնարկը։ Այնուհետև լեգենդար իտալացի տենոր Անդրեա Բոչելին և հարավկորեացի Ejae-ն կատարեցին ԱԱ-ի ևս մեկ պաշտոնական հիմն՝ DNA (More Than A Game) ստեղծագործությունը։

Արարողության եզրափակիչ հատվածում Սալմա Հայեկն ու ՖԻՖԱ-ի նախագահ Ջանի Ինֆանտինոն հանրությանը ցուցադրեցին Աշխարհի գավաթը։ Ֆուտբոլային մեծ տոնը մեկնարկած է։

Բրազիլիայի հավաքականի, «Միլանի» և Մադրիդի «Ռեալի» նախկին կիսապաշտպան Կակայի նախկին կինը՝ Կարոլինա Սելիկուն, հերքել է իրեն վերագրվող խոսքերն այն մասին, թե իբր ապահարզանի է դիմել ֆուտբոլիստի՝ «չափազանց իդեալական» լինելու պատճառով։

Տարիներ առաջ համաշխարհային լրատվամիջոցներում և սոցիալական ցանցերում լայն տարածում էին գտել կնոջ արտահայտությունները, ըստ որոնց՝ նա որոշել էր բաժանվել Կակայից հենց այդ անսովոր պատճառաբանությամբ։

«Երկար ժամանակ ես լռում էի, բայց հիմա հասկանում եմ, որ այլևս չեմ կարող։ Ոչ, ես երբեք չեմ ասել, որ բաժանվել եմ Կակայից՝ իմ ավագ երեխաների հորից, քանի որ նա չափազանց իդեալական էր։ Դուք, հավանաբար, տեսել եք այդ արտահայտությունը որպես մեմ կամ իմ դեմ ուղղված հարձակում, և ես կբացատրեմ ձեզ, թե իրականում ինչ է տեղի ունեցել»,- նշել է Սելիկուն իր սոցցանցերում արված գրառման մեջ։

Նրա խոսքով՝ այդ խոսակցությունները հայտնվել են արտասահմանյան տաբլոիդներում որպես 2022 թվականին իր տված հարցազրույցի լրագրողական սխալ մեկնաբանություն.

«Բայց դրանք իմ բառերը չեն և երբեք չեն եղել։ Այդ լեգենդը տարածվեց բազմաթիվ կայքերով թե՛ Բրազիլիայում, թե՛ ամբողջ աշխարհում որպես իմ մեջբերում, իբր ես եմ դա ասել։ Նման բան երբեք չի եղել։

Այս ամենը սկսեց տարածվել այն ժամանակ, երբ ես հղի էի կրտսեր որդիովս, խնամում էի ավագ երեխաներիս և շատ էի աշխատում իմ ընկերությունում։ Մի օր ես արթնացա և կարդացի այդ սուտը։ Ոմանց համար դա կարող է նույնիսկ անհեթեթություն թվալ, բայց պատկերացրեք. իմ ընտանիքի վերականգնումից, հղիությունից և երջանկությունից հետո ինձ սկսեցին շատ քննադատել ու վիրավորել:

Ես ենթարկվում էի կնատյաց և դաժան հարձակումների, իմ կերպարն օգտագործվում էր դասընթացներ և ապրանքներ վաճառելու, ուշադրություն գրավելու և մաչոյական դիսկուրսների համար։ Եվ դա շարունակվում է մինչ օրս»,- հավելել է Կակայի նախկին կինը։

«LEGO Group» կորպորացիան ներկայացրել է 2026 թվականի աշխարհի առաջնությանն ընդառաջ նկարահանված տեսահոլովակի կադրերից դուրս մնացած հատվածը:

Գովազդային հոլովակում նկարահանվել են ֆուտբոլի գլխավոր աստղեր Կրիշտիանու Ռոնալդուն, Լիոնել Մեսսին, Կիլիան Մբապեն և Վինիսիուս Ժունիորը:

Ավելի վաղ հայտնի բրենդը թողարկել էր ԱԱ-2026-ի համար նախատեսված իր նոր հավաքածուների գովազդը։ Դրանում մասնակից ֆուտբոլիստները փորձում էին իրենց մինի-ֆիգուրները տեղադրել սպասվելիք մրցաշարի գլխավոր գավաթի վրա:

Հիշեցնենք, որ 2026 թվականի աշխարհի առաջնությունը կանցկացվի հունիսի 11-ից հուլիսի 19-ը՝ միանգամից երեք երկրում՝ ԱՄՆ-ում, Կանադայում և Մեքսիկայում:

Ավստրալիան շատ հաճախ առանձնանում է իր յուրահատկություններով, և ֆուտբոլը ևս բացառություն չէ։ Ավստրալիայի առաջնության հերթական տուրի հանդիպումներից մեկն աչքի է ընկել զավեշտալի միջադեպով։

«Մելբուռն Վիկտորիի» և «Նյուքասլ Ջեթսի» միջև կայացած խաղի վերջնամասում (որն ավարտվել է մարտական՝ 2:2 հաշվով) խաղադաշտ է իջել ճայերի հսկայական մի երամ։

Հատկանշական է, որ թե՛ ֆուտբոլիստները, թե՛ հանդիպման գլխավոր մրցավարն այս անսովոր երևույթին գրեթե չեն արձագանքել։ Կարճ դադարից հետո մրցավարը նշան է տվել շարունակել խաղը, և թիմերը հանդիպումն ավարտել են թռչունների ներկայությամբ։

Նշենք, որ Մելբուռնում ճայերը բավականին շատ են, և տեղացիները նրանց հաճախ կատակով անվանում են «կարտոֆիլի ֆրի գողացողներ»: Քաղաքը գտնվում է Պորտ Ֆիլիպ ծոցի ափին։ Թեև ըստ Միջազգային հիդրոգրաֆիկ կազմակերպության՝ այն ուղղակիորեն օվկիանոսի մաս չի կազմում և թափվում է Բասի նեղուց (որն էլ իր հերթին միանում է Թասմանյան ծովին), ավստրալացիները հաճախ այն համարում են Խաղաղ և Հարավային օվկիանոսների մի մասը՝ պնդելով, որ երկիրն անմիջական ելք ունի դեպի օվկիանոս։

Ամեն դեպքում, աշխարհագրական այս բանավեճերը ճայերին բնավ չեն անհանգստացնում, և նրանք շարունակում են ազատորեն շրջել քաղաքում և, ինչպես պարզվեց, նաև ֆուտբոլային դաշտերում։

Լոնդոնի «Տոտենհեմը» մերժել է ամերիկացի հայտնի ռեփեր և պրոդյուսեր Քանյե Ուեսթին՝ թույլ չտալով նրան ելույթ ունենալ ակումբի տնային մարզադաշտում։ Այս մասին հայտնում է անգլիական Daily Mail պարբերականը։

Աղբյուրի համաձայն՝ ակումբի նման որոշման պատճառն արտիստի հակասեմական հայտարարություններն են, ինչպես նաև «Տոտենհեմի» պատմական կապերը հրեական համայնքի հետ։

Մերժումից հետո ռեփերը հրավեր է ստացել ելույթ ունենալու Wireless Festival-ում, ինչը մեծ աղմուկ է բարձրացրել և արժանացել կոշտ քննադատության։ Սկանդալի արդյունքում փառատոնի երկու խոշոր հովանավորներ հրաժարվել են համագործակցությունից:

Նախ Pepsi ընկերությունն է հայտարարել հովանավորությունը դադարեցնելու մասին՝ ի նշան բողոքի, որ Ուեսթն ընտրվել է որպես փառատոնի գլխավոր արտիստ: Ժամեր անց նույն քայլին է դիմել նաև Diageo ընկերությունը (որին պատկանում են Guinness, Johnnie Walker և Captain Morgan ապրանքանիշերը):

Ստեղծված իրավիճակին արձագանքել է նաև Մեծ Բրիտանիայի վարչապետ Քիր Սթարմերը։ Նա փառատոնի կազմակերպիչների որոշումն անվանել է «խորապես մտահոգիչ»՝ հավելելով, որ հաշվի առնելով ռեփերի նախկին հակասեմական հայտարարությունները՝ չի բացառվում, որ արգելվի նրա մուտքը Միացյալ Թագավորություն։

Հայաստանի ազգային հավաքականի 22-ամյա հարձակվող Հրանտ-Լեոն Ռանոսը պատրաստվում է ընտանիք կազմել։ Ֆուտբոլիստի ընտրյալը 18-ամյա երգչուհի Էլեն Բադալյանն է։

Օրերս զույգը հանդիպել է Երևանում, ինչի մասին վկայում են երգչուհու ինստագրամյան էջում հրապարակված համատեղ լուսանկարները՝ «Վերջապես. Երևանում» մակագրությամբ։

Զույգը նշանադրվել է 2025 թվականի վերջին։ Վերջերս StarHit-ին տված հարցազրույցում Էլեն Բադալյանը, ով լայն լսարանին հայտնի դարձավ «Ну-ка, все вместе!» ռուսական հեռուստաշոուից, բացահայտել է Ռանոսի հետ ծանոթության և սպասվող հարսանիքի մանրամասները։

Ըստ Էլենի՝ իրենց ծանոթությունը նախաձեռնել է հենց հայ ֆուտբոլիստը՝ տեսնելով իրեն հեռուստանախագծում.

«Եթե չլիներ այդ նախագիծը, նա ինձ չէր տեսնի և սոցիալական ցանցերում հաղորդագրություն չէր գրի։ Մենք շարունակեցինք շփվել, չնայած տարբեր երկրներում ապրելուն, ինչը բավականին դժվար է։ Բայց մեր միությունը վերջապես կայացավ»,- նշել է նա։

Քանի որ զույգն առայժմ ապրում է տարբեր երկրներում, նրանք դեռ չեն շտապում տոնել ամուսնությունը, սակայն հստակ որոշել են անցկացման վայրը.

«Հարսանիքը կարող է լինել հաջորդ ամռանը։ Կարող եմ վստահաբար ասել՝ այն կլինի Հայաստանում, քանի որ դա մեր ընդհանուր երկիրն է։ Ես մեծ տոնակատարություն չեմ ուզում. նախընտրում եմ, որ այն լինի ընտանեկան, ոճային, նրբագեղ և ջերմ»,- ընդգծել է Բադալյանը։

Երգչուհին անկեղծացել է, որ իր համար սկզբունքային էր գտնել մեկին, ով կընդունի իր մասնագիտությունը։ Հրանտ-Լեոն Ռանոսն ու նրա ընտանիքն այդ հարցում լիովին աջակցում են Էլենին.

«Ինձ համար կարևոր էր, որ այդ մարդը բարի լիներ, խելացի և ընդուներ ինձ ու իմ կարիերան: Եվ դա տեղի ունեցավ: Ես երբեք չեմ հրաժարվի երաժշտությունից և շոու-բիզնեսից: Նշանվեցի 18 տարեկանում, ճիշտ ինչպես մայրս ժամանակին։ Սկզբում հայրս մի փոքր զարմացավ և նույնիսկ բարկացավ, բայց երբ հանդիպեցինք Ռանոսի հետ, ամեն ինչ կարգավորվեց։ Իմ նշանածի ընտանիքը նույնպես շատ լավ է վերաբերվում ինձ»։

 

Посмотреть эту публикацию в Instagram

 

Публикация от ELÉN (@elen_badalyan)

Աղբյուրը՝ Tert.am-ի

Վերջին մեկ տարին Դուգլաս Լուիսի համար բավականին խառն էր: «Յուվենտուսում» հարմարվել չկարողանալուց հետո նա 2025-ի ամռանը վարձավճարով տեղափոխվեց «Նոթինգհեմ Ֆորեստ», իսկ ձմռանն արդեն վարձավճարով վերադարձավ իր նախկին ակումբ՝ «Ասթոն Վիլա»:

Կտրուկ փոփոխություններ կան նաև բրազիլացի կիսապաշտպանի անձնական կյանքում: 2025 թվականի մայիսին Լուիսը բաժանվեց աշխարհի ամենագեղեցիկ ֆուտբոլիստներից մեկից՝ Ալիշա Լեմանից, որի հետ 2024-ին միասին էին տեղափոխվել Թուրին:

Այժմ Լուիսը նոր սեր է գտել Անգլիայում. նա հանդիպում է Բրազիլիայի հավաքականի և Լոնդոնի «Արսենալի» նախկին ֆուտբոլիստ Էդու Գասպարի դստեր՝ 19-ամյա Մարիա Գասպարի հետ:

Էդու Գասպարը, ով ժամանակին նվաճել է Անգլիայի չեմպիոնի և Ամերիկայի գավաթակրի տիտղոսները, 2025 թվականին նշանակվել էր «Նոթինգհեմի» գլոբալ մարզական տնօրեն: Նրա դուստրը պարբերաբար ներկա էր լինում թիմի տնային խաղերին և ակումբային միջոցառումներին, որտեղ էլ կայացել է զույգի ծանոթությունը:

Մարիան 8 տարով փոքր է Դուգլասից: Թեև բրազիլացին այլևս չի խաղում «Նոթինգհեմում», նրանք շարունակում են շատ ժամանակ անցկացնել միասին, ինչն ակնհայտ է դառնում աղջկա ինստագրամյան հրապարակումներից:

Ջորջինա Ռոդրիգեսը գիտի՝ ինչպես գրավել ուշադրությունը, սակայն այս անգամ դա կարող է արժենալ ընտանեկան անդորրի գնով։

Կրիշտիանու Ռոնալդուի սիրելին կրկին հայտնվել է սոցցանցերի ուշադրության կենտրոնում։ Նա մասնավոր ինքնաթիռից տպավորիչ ու բավականին անկեղծ լուսանկար է հրապարակել, որը կարճ ժամանակում հիացրել է հետևորդներին։

Լուսանկարում Ջորջինան ներկայացել է համարձակ սև կերպարով՝ կրելով միայն ոճային բրա, նախշերով կիսաթափանցիկ զուգագուլպաներ և բարձրակրունկներ։ Հրապարակմանը կից նա հակիրճ գրառում է արել՝ «Միլան»։

Լուսանկարն արդեն հասցրել է հավաքել հարյուր հազարավոր հավանումներ։ Մեկնաբանություններում երկրպագուները հիանում են «Ալ-Նասրի» հարձակվողի հարսնացուի գեղեցկությամբ՝ նրան անվանելով «Աստվածուհի», «Անհավանական» և «Շքեղ»։

Սակայն, ինքնաթիռից արված այսքան բաց ու համարձակ կադրը աննկատ չի մնացել նաև մամուլի կողմից ու, ըստ շշուկների, զայրացրել է ֆուտբոլիստին։ Լրատվականներում արդեն ակտիվորեն գրում են այն մասին, որ Ռոնալդուն խիստ դժգոհ է մնացել Ջորջինայի այս հրապարակումից և իսկական սկանդալ է սարքել սիրելիի համար:

Բրազիլացի հարձակվող Հալկը հեթ-տրիկի հեղինակ է դարձել «Ատլետիկո Մինեյրոյի» կազմում։

Դա տեղի է ունեցել Մինեյրո նահանգի առաջնության 8-րդ տուրի՝ «Իտաբիրիտոյի» դեմ խաղում, որն ավարտվել է «Ատլետիկոյի» ջախջախիչ հաղթանակով՝ 7:2 հաշվով։

39-ամյա բրազիլացին աչքի է ընկել խաղային իրավիճակից, 11-մետրանոց հարվածով և տուգանայինից՝ մոտ 35 մետր հեռավորությունից կատարած հարվածով։

Հատկանշական է, որ սա Հալկի առաջին հեթ-տրիկն է «Ատլետիկո Մինեյրոյի» կազմում, որտեղ նա հանդես է գալիս 2021 թվականից։