Մադրիդի «Ռեալի» պաշտոնական կայքը՝ realmadrid.com-ը, 10-րդ տարին անընդմեջ ճանաչվել է աշխարհի ամենաշատ այցելվող ֆուտբոլային ակումբի կայքը։ Տվյալները ներկայացրել է SimilarWeb վերլուծական ընկերությունը։

Նախորդ մրցաշրջանում «Ռեալի» կայքը միջինում ամսական ունեցել է 8,7 միլիոն այց։ Ընդհանուր առմամբ գրանցվել է 86 միլիոն եզակի օգտատեր, ավելի քան 162 միլիոն սեսիա և 449 միլիոն եզակի էջադիտում։

Կայքի այցելությունների 78%-ը կատարվել է բջջային սարքերով, իսկ այցելուների 28%-ը 25-34 տարեկան օգտատերերն են։ Կայքը հասանելի է ութ լեզվով՝ իսպաներեն, անգլերեն, ֆրանսերեն, գերմաներեն, պորտուգալերեն, ճապոներեն, չինարեն և արաբերեն։

Ամսական միջին այցելությունների ցուցանիշով լավագույն տասնյակում «Ռեալին» հաջորդում են «Լիվերպուլը»՝ 7,9 միլիոն, «Արսենալը»՝ 7,8 միլիոն, «Բարսելոնան»՝ 7,6 միլիոն և «Մանչեսթեր Յունայթեդը»՝ 5,4 միլիոն։

Առաջին տասնյակը հետևյալն է.

1. Ռեալ Մադրիդ՝ ամսական միջինը 8.7 միլիոն այցելություն;
2. Լիվերպուլ՝ 7.9 միլիոն;
3. Արսենալ՝ 7.8 միլիոն;
4. Բարսելոնա՝ 7.6 միլիոն;
5. Մանչեսթեր Յունայթեդ՝ 5.4 միլիոն;
6. Բավարիա՝ 4.8 միլիոն;
7. Չելսի՝ 4.8 միլիոն;
8. Մանչեսթեր Սիթի՝ 3.2 միլիոն;
9. ՊՍԺ՝ 2.7 միլիոն;
10. Ինտեր Միլան՝ 2.6 միլիոն:

Մեղուն խայթել է կանադացի հարձակվող Փրոմիս Դեյվիդին հարցազրույցի ժամանակ։  «Բրայթոնի» և Կանադայի ազգային հավաքականի հարձակվող Փրոմիս Դեյվիդն իր առաջին մեղվի խայթոցը ստացավ կյաքում, ինչպես խոստովանել է ինքը՝ ֆուտբոլիստը։

Ազգային հավաքականի մարզումից հետո Դեյվիդը պատասխանում էր լրագրողների հարցերին և բազմիցս մատնացույց էր արել նրանց շուրջը թռչող մեղուներին։

Մի պահ մեղուներից մեկը խայթել է հենց 25-ամյա հարձակվողին։

«Օ՜հ։ Նա իսկապես խայթեց ինձ։ Սա իմ առաջին մեղվի խայթոցն է», — հուզականորեն արձագանքել է Դեյվիդը։

Լրագրողներից մեկը փորձել է հանգստացնել ֆուտբոլիստին՝ կատակելով. «Ամեն ինչ կարգին է, կապրես»։

«Մանչեսթեր Սիթիի» և Նորվեգիայի հավաքականի ռմբարկու Էրլինգ Հալանդը կրկին հայտնվել է համացանցի ուշադրության կենտրոնում։ Այս անգամ նա միավորվել է աշխարհահռչակ յութուբեր MrBeast-ի (Ջիմի Դոնալդսոն) հետ՝ վերարտադրելով արհեստական բանականության միջոցով ստեղծված հայտնի մեմը:

Հալանդն ու MrBeast-ը հանդես են եկել կարճամետրաժ տեսանյութում, որը երկուշաբթի օրը տարածվել է յութուբերի սոցիալական էջերում։ «Իմ կյանքի ամենասարսափելի ընթրիքը, Էրլինգ»,- այսպես է մակագրել տեսանյութը MrBeast-ը, որն արդեն հասցրել է միլիոնավոր դիտումներ գրանցել։

Տեսանյութում Հալանդը նստած է ճաշասեղանի շուրջ և ճշգրտությամբ կրկնում է այս տարվա սկզբին վիրուսային դարձած այն կադրերը, որտեղ նա, իբր, անսպասելիորեն նկատում է իր արտացոլանքը հայելու մեջ և կատակերգական սարսափով հետ ցատկում: Այս անգամ, սակայն, նորվեգացին անձամբ է կատարում այդ շարժումները՝ առանց որևէ թվային էֆեկտի։

Посмотреть эту публикацию в Instagram

Публикация от MrBeast (@mrbeast)

Այս տեսարանն ուղղակի հղում է հունիսին սոցցանցերում լայնորեն տարածված տեսանյութին: Սկզբում շատերը կարծում էին, թե դա իրական կադրեր են, սակայն ավելի ուշ թվային փորձագետները պարզել էին, որ տեսանյութը ստեղծվել է արհեստական բանականության միջոցով: Իրականում Հալանդի դեմքը տեղադրվել էր չինացի կատակերգուներ Ցզին Լունի և Ցյու Ցյուի օրիգինալ տեսանյութի վրա։

Այժմ ֆուտբոլիստն ու ժամանակակից ամենահայտնի բովանդակություն ստեղծողներից մեկը որոշել են իրականություն դարձնել արհեստական կադրերը։ Սա բուռն արձագանք է գտել երկրպագուների շրջանում:

«Աշխարհի առաջնության լավագույն մեմը»,- գրել է Ինստագրամի օգտատերերից մեկը: «Տղան պաշտոնապես ստեղծեց իր սեփական տարբերակը», «Հալանդը թաքնված կատակերգու է»,- նշել են այլ օգտատերեր:

Այս համագործակցությունը սպասված էր, քանի որ վերջերս Հալանդն արդեն լուսանկարներ էր հրապարակել MrBeast-ի հետ՝ ակնարկելով համատեղ նախագծի մասին։

«Ռեալ Մադրիդի» վինգեր Վինիսիուս Ժունիորի ընկերուհին ակնարկել է ֆուտբոլիստի հետ նշանադրության մասին։

Վիրջինիա Ֆոնսեկան իր Instagram Stories-ում հրապարակել է իր և Վինիսիուսի լուսանկարը, որտեղ նրանք երկուսն էլ նույն մատանիներ են կրում։

«Մեկ տարի անց մատանին վերջապես այստեղ է🤣🤣🤣», — գրել է Վիրջինիան։

Վինիսիուսը և Վիրջինիան բաժանվել էին այս տարվա մայիսին, բայց վերականգնել են իրենց հարաբերությունները Աշխարհի առաջնությունից հետո։

Հյու Ջեքմանը կարող է գնել «Նորվիչի» բաժնեմասը։ Հոլիվուդյան աստղ Հյու Ջեքմանը Talksport-ի եթերում հայտնել է, որ աշխատում է «Նորվիչի»բաժնեմասը ձեռք բերելու ուղղությամբ։

«Ես շատ-շատ հետաքրքրված եմ և ներկայումս բանակցություններ եմ վարում այդ առումով։

Ես մի քանի անգամ եղել եմ Քերոու Ռոուդում, սիրում եմ այդ թիմը, և մենք անպայման կբարձրանանք ԱՊԼ։ Սա իմ կանխատեսումն է։

Ես կանխատեսում եմ, որ և՛ «Նորվիչը», և՛ «Ռեքսեմը» կբարձրանան ԱՊԼ այս մրցաշրջանում», — ասել է դերասանը, որը մարմնավորել է Լոգանին «X-Men» ֆիլմաշարում։

Լեգենդար ֆուտբոլային գնդակը, որով Դիեգո Մարադոնան երկու գոլ խփեց Անգլիայի դեմ 1986 թվականի Աշխարհի առաջնության քառորդ եզրափակչում, վաճառվել է Heritage Auctions-ում։

Գնդակը վաճառվել է 3.35 միլիոն դոլարով, ինչը զգալիորեն ցածր է կազմակերպիչների նախնական գնահատականից՝ 10 միլիոն դոլարից։ Աճուրդը սկսվել է շաբաթ օրը՝ 2.5 միլիոն դոլարով։ Համեմատության համար, նույն խաղի Մարադոնայի մարզաշապիկը 2022 թվականին Sotheby’s-ում վաճառվել է գրեթե 9.3 միլիոն դոլարով։

Ավելին, գնդակը չի կարողացել դառնալ պատմության մեջ ամենաթանկարժեք սպորտային գնդակը. այդ ռեկորդը պատկանում է Շոհեյ Օհտանիի 50-րդ հոում ռանի համար օգտագործված գնդակին 2024 թվականին, որը վաճառվել է 4.392 միլիոն դոլարով։

Գնդակի հատուկ կարգավիճակը բխում է դրա սկանդալային պատմությունից. Մարադոնան իր առաջին գոլը խփել է ձեռքով, որը մրցավարի համար աննկատ է մնացել այն ժամանակ VAR համակարգի բացակայության պատճառով։ Նա իր երկրորդ գոլը խփել է մի քանի րոպե անց՝ օգնելով իր թիմին հաղթել 2-1 հաշվով։ Հետագայում Արգենտինան նվաճել է այդ Աշխարհի գավաթը։

Պորտուգալիայի հավաքականի և «Ալ-Նասիրի» հարձակվող Կրիշտիանու Ռոնալդուն խոսել է ընթացիկ մրցաշրջանի ավարտին կարիերան ավարտելու հնարավորության մասին։

«Սա, հավանաբար, իմ վերջին տարին է ֆուտբոլում։ Ես ուզում եմ մեծ ժառանգություն թողնել», — Ռոնալդուի խոսքերն է մեջբերել Vogue-ը։

Անցյալ մրցաշրջանում 41-ամյա հարձակվողը ակումբի կազմում անցկացրել է 37 խաղ բոլոր մրցաշարերում՝ խփելով 30 գոլ և կատարելով երեք գոլային փոխանցում։ 2026 թվականի Աշխարհի առաջնությունում պորտուգալացին հինգ խաղում խփել է երեք գոլ։

Կրիշտիանու Ռոնալդուն Չեմպիոնների լիգայի հնգակի հաղթող է, 2016 թվականի Եվրոպայի չեմպիոն և Ազգերի լիգայի երկակի հաղթող։

Ռուսական հեղինակավոր Sports.ru պորտալի բլոգեր Դենիս Ռոմանցովը կազմել է Ռուսաստանի Պրեմիեր լիգայի պատմության 15 գլխավոր հայ ֆուտբոլիստների վարկանիշային աղյուսակը։ Armsport.am-ը ներկայացնում է այդ հոդվածի ամենաուշագրավ դրվագներն ու հետաքրքիր հուշերը:

15. Արամայիս Եպիսկոպոսյան («Չեռնոմորեց», 1995-1997)

Նախկինում խաղալով «Արարատի» դուբլում Հենրիխ Մխիթարյանի հոր հետ՝ Արամայիսը բավականին արկածային ճանապարհով հայտնվեց Ռուսաստանում։ «Չեռնոմորեցի» նախկին պետ Ավալու Շամխանովը հիշում է, որ «Արարատը» Եպիսկոպոսյանի և Էդուարդ Սարկիսովի տրանսֆերի համար պահանջում էր 300 հազար դոլար։ Բանակցությունների ժամանակ Շամխանովը կատակով (կամ ոչ այնքան) ձեռնաշղթաներ է հագցրել «Արարատի» ներկայացուցչին՝ ասելով․ «Մինչև չստորագրես, բաց չեմ թողնի»։ Արդյունքում տրանսֆերը կայացավ ընդամենը 10 հազար դոլարով։ Ի դեպ, Նովոռոսիյսկում նրան անվանում էին «Մեյսոն»՝ հայտնի «Սանտա Բարբարա» սերիալի հերոսի անունով։

14. Էդգար Մանուչարյան («Ուրալ», 2013-2018)

«Այաքսում» անցկացրած տարիներին Մանուչարյանը շատ բան է տեսել, այդ թվում՝ Էդգար Դավիդսի բռնկուն բնավորությունը։ Ռուսաստանում նրա նորամուտը «Ուրալի» կազմում (2011թ․) շատ տպավորիչ էր. ընդամենը մեկ խաղակեսում Էդգարը հասցրեց գոլ խփել, գոլային փոխանցում կատարել և կարմիր քարտ ստանալ։ Վնասվածքները թույլ չտվեցին նրան ամբողջությամբ բացահայտել իր հսկայական ներուժը, սակայն նա միշտ վառ կերպար էր խաղադաշտում։

13. Կարապետ Միքայելյան («Կռիլյա Սովետով», 1999, 2000)

Բանակում որպես հաց կտրող ծառայելուց հետո նա փայլեց Սարատովում, բայց Ռուսաստանի Բարձրագույն լիգայում իր նորամուտը նշեց միայն 30-ին մոտ տարիքում՝ «Կռիլյա Սովետովի» կազմում։ 1999-ին նրա ֆանտաստիկ գոլը «Սպարտակի» դարպասը մրցաշրջանի լավագույններից մեկն էր։ Տարիներ անց նրա մոտ ծանր սրտային հիվանդություն հայտնաբերվեց։ Տևական պայքարից և սրտի փոխպատվաստման բարդագույն վիրահատությունից հետո Կարապետը կրկին ոտքի կանգնեց և անգամ սկսեց խաղալ վետերանների ֆուտբոլ։

12. Ալբերտ Սարգսյան («Լոկոմոտիվ» Մ, «Տորպեդո», «Ալանիա», «Ամկար», 1997-2006)

Մանուկ հասակում Ալբերտը դարպասապահ էր, բայց ձեռքի կոտրվածքից հետո փոխեց դիրքը։ 1997-ին տեղափոխվեց Մոսկվայի «Լոկոմոտիվ»՝ դառնալով Յուրի Սյոմինի վստահելի խաղացողներից մեկը։ Նրա թիմակից Յուրի Դրոզդովը հետաքրքիր կերպով է նկարագրում հայ ֆուտբոլիստի խաղաոճը տուգանային հրապարակում. «Սարգսյանն ինքն իրեն «պոդնոժկա» էր անում, ընկնում և բարկանում, որ 11-մետրանոց չեն նշանակում»։

11. Գառնիկ Ավալյան («Կռիլյա Սովետով», «Շիննիկ», «Ուրալան», 1993-2000)

Սամարայի «Կռիլյա Սովետով» նրա տեղափոխությունը կինոյի սցենարի էր նման. եկան, առանց հարցնելու նստեցրին մեքենան և տարան։ Նա դարձավ տեղի երկրպագուների կուռքը՝ աչքի ընկնելով շլացուցիչ գոլերով։ Հետաքրքիր դրվագ կա նրա «Ուրալանյան» կարիերայից, երբ ակումբը ֆինանսական խնդիրներ ուներ, և Ավալյանն ու թիմակիցները պատրաստ էին իրենց գրպանից վճարել ակումբի պարտքերը, միայն թե թիմից միավորներ չհանեին։

10. Մանուկ Կակոսյան («Ժեմչուժինա», «Չեռնոմորեց», 1997-2001)

1990-ականների ՌՊԼ-ի ամենակարճահասակ ֆուտբոլիստը (163 սմ)։ Սոչիի «Ժեմչուժինայում» փայլուն խաղ էր ցուցադրում։ Հայաստանի հավաքականի հետ նրա հարաբերությունները բարդ ստացվեցին. մարզումային ճամբար գալով՝ նա դժգոհ էր, որ տեղի առաջնության խաղացողներն ավելի շատ շանս են ստանում, ուստի երկու անգամ ժամանակից շուտ վերադարձավ ակումբ։ Նրա կարիերայի լավագույն շրջանը Նովոռոսիյսկում էր, մինչև ծանր վնասվածքը չկտրեց նրա ճանապարհը մեծ ֆուտբոլում։

9. Սարգիս Հովսեփյան («Զենիթ», «Տորպեդո-Մետալուրգ», 1998-2003)

Երևանի «Փյունիկից» Սանկտ Պետերբուրգ տեղափոխված Հովսեփյանն արագ դարձավ «Զենիթի» առանցքային ֆուտբոլիստներից մեկը։ Նա նվաճեց Ռուսաստանի գավաթն ու բրոնզե մեդալները։ Երբ երկրպագուները դժգոհում էին մարզիչ Վլաստիմիլ Պետրժելայից, հենց Հովսեփյանն առաջինը դուրս եկավ ֆանատների մոտ և պաշտպանեց նրան։ Ցավոք, չեխ մասնագետը դրանով չպատասխանեց և նստեցրեց նրան պահեստայինների նստարանին։ Հովսեփյանը մեծ հետք է թողել ռուսական և հայկական ֆուտբոլում՝ խաղալով մինչև 40 տարեկան։

8. Արաս Օզբիլիս («Կուբան», «Սպարտակ» Մ, 2012-2015)

«Այաքսի» ակադեմիայի սանը, ով 19 տարեկանում արդեն երկու անգամ կտրել էր խաչաձև կապանները, փայլեց «Կուբանում»։ Անմոռանալի է նրա ֆանտաստիկ հեռահար գոլը Մոսկվայի «Սպարտակի» դարպասը «Լուժնիկիում»։ Հետագայում Արասը հենց «Սպարտակ» տեղափոխվեց, որտեղ Վալերի Կարպինի գլխավորությամբ կարևոր դերակատարում ուներ, թեև նշում էր, որ թիմում լեգեոներների և ռուս ֆուտբոլիստների միջև զգալի անջրպետ կար։

7. Սարգիս Հովհաննիսյան («Դինամո» Մ, «Լոկոմոտիվ» Մ, 1992-1999)

Ֆուտբոլիստ դառնալու հարցում մեծ դեր է խաղացել նրա ավագ եղբայրը, ով ամեն առավոտ նրան ստիպում էր վազել «Հրազդան» մարզադաշտի մոտի զառիթափով՝ կշռաքարերը ձեռքերում։ Մոսկվայի «Դինամոյում» խաղալիս՝ մի անգամ հացի գնալիս ոստիկանները նրան բերման են ենթարկել՝ չհավատալով նրա ֆուտբոլիստ լինելուն։ Յուրի Սյոմինի «Լոկոմոտիվում» նա նվաճեց երկու բրոնզ և Ռուսաստանի Գավաթը։

6. Նաիր Թիկնիզյան (ԲԿՄԱ, «Լոկոմոտիվ» Մ, 2017-2025)

Դեռ մանկուց Նաիրն աչքի էր ընկնում իր ինքնուրույնությամբ։ Պետերբուրգի հեղինակավոր ակադեմիաներ տեղափոխվելու փոխարեն՝ նա նախընտրեց մնալ իր թիմում, քանի որ էլիտար դպրոցներում իրեն զգում էր «կաղապարների մեջ»։ Տարիներ անց նա կրկին մերժեց «Զենիթին»՝ չցանկանալով մնալ Դուգլաս Սանտոսի ստվերում։ «Լոկոմոտիվում» անցկացրած փայլուն մրցաշրջաններից հետո նա տեղափոխվեց Սերբիայի «Ցրվենա Զվեզդա»։

5. Կարեն Դոխոյան («Կռիլյա Սովետով», 2000-2006)

Կարենի տեղափոխությունը «Կռիլյա» գրեթե պատահական էր. ակումբի փոխնախագահը նրան նկատել էր Մոսկվայի օդանավակայանում, երբ «Արաքսը» մեկնում էր Չեխիա։ Դոխոյանը Սամարայում դարձավ անփոխարինելի խաղացող ձախ եզրում։ Զավեշտալի է նրա հետ կապված միջադեպը խաղային ծրագրերում. ազգանվան երկրորդ «Օ» տառը ռուսերեն տպագրության մեջ սխալմամբ փոխարինվել էր «Ու» տառով՝ առաջացնելով ոչ ցենզուրային բառակապակցություն (տպաքանակը ստիպված էին ձեռքով, շտրիխով ուղղել)։

4. Ռոման Բերեզովսկի («Զենիթ», «Տորպեդո», «Դինամո» Մ, «Խիմկի», 1996-2005, 2007-2009, 2012-2015)

Հայաստանի ազգային հավաքականի լեգենդը ռուսական ֆուտբոլի պատմության լավագույն դարպասապահներից է, ով հայտնի էր 11-մետրանոցների որսորդի իր անկրկնելի տաղանդով։ Նա անցավ բոլոր դժվարությունների միջով՝ հասնելով մինչև «Զենիթի» ու «Դինամոյի» հիմնական կազմ։ Բերեզովսկին ՌՊԼ-ում բարձր մակարդակով խաղաց և իր ակումբներին օգուտ տվեց ընդհուպ մինչև 40 տարեկան։

3. Խորեն Բայրամյան («Ռոստով», «Ռուբին», 2011-2013, 2015-2026)

Խորենը ծնվել է հայ-ադրբեջանական սահմանին մոտ գտնվող գյուղում, որտեղից ընտանիքը տեղափոխվել է Ռոստովի մարզ։ Վալերի Կարպինի գլխավորությամբ նա բացահայտվեց նորովի։ Շատերը հիշում են Կարպինի հետ գրազը. եթե Խորենը երկու գոլ չխփեր նշված ժամանակահատվածում, պետք է սափրեր գլուխը։ Նա խփեց այդ գոլերն ու փրկեց մազերը։

2. Յուրա Մովսիսյան («Կրասնոդար», «Սպարտակ» Մ, 2011-2015)

Սերգեյ Գալիցկին Յուրային գնելիս բարդ բանակցություններ է վարել դանիական «Ռանդերսի» հետ։ Ըստ նրա գործակալի պատմած դրվագների՝ Մովսիսյանը «Սպարտակում» հանդես գալիս նույնիսկ «Ռոլս-Ռոյս» է գնել և պարտությունից հետո դրանով եկել մարզման, ինչի պատճառով Մուրատ Յակինը նրան հանել է կազմից։ Այդուհանդերձ, Յուրան 2012/13 մրցաշրջանում դարձավ ՌՊԼ-ի լավագույն ռմբարկուներից մեկը (կիսելով տիտղոսը), իսկ հաջորդ տարի ճանաչվեց «Սպարտակի» տարվա լավագույն ֆուտբոլիստ։

1. Էդուարդ Սպերցյան («Կրասնոդար», 2020-2026)

«Կրասնոդարի» նախկին առաջատարն ու հայկական ֆուտբոլի գլխավոր աստղերից մեկը։ Նրա առաջին մարզիչ Մխիթար Դավիդյանը հիշում է, թե ինչպես է հայրը փոքրիկ Էդիկին բերել մարզադաշտ, բայց նրան չեն վերցրել՝ չափազանց փոքր տարիքի պատճառով (նա դեռ մանկապարտեզ էր հաճախում): Դավիդյանը խղճացել է և սկսել անհատապես պարապել նրա հետ։ Գոնչարենկոն հետագայում նրան նմանեցնում էր երիտասարդ Գոլովինին։ Իսկ 2025-ի հրաշալի մրցաշրջանից հետո Սպերցյանն իր դիպուկ տուգանայիններով հասավ ՌՊԼ-ի բացարձակ ռեկորդակիրներին՝ Հալկին և Ալիևին։

Օգոստոսի 8-ին Պորտուգալիայի Մադեյրա կղզու Ֆունշալ քաղաքի Մայր տաճարում իսկական իրարանցում է սկսվել: Հարյուրավոր երկրպագուներ և լրագրողներ հավաքվել էին տաճարի մոտ՝ հավատալով մամուլում շրջանառվող այն լուրերին, թե հենց այդտեղ է կայանալու Կրիշտիանու Ռոնալդուի և նրա երկարամյա ընկերուհու՝ Ջորջինա Ռոդրիգեսի պսակադրությունը: 

Չնայած այն հանգամանքին, որ Ռոնալդուի ընտանիքը հրապարակայնորեն հերքել էր հանգստյան օրերին սպասվող հարսանիքի մասին տեղեկությունները, զանգվածային լրատվամիջոցների տարածած ասեկոսեներն իրենց գործն արել էին։ Ամբոխը անհամբեր սպասում էր աստղային զույգին, սակայն շուտով բոլորին մեծ հիասթափություն էր սպասվում:

Երբ հարսնացուն՝ ավանդույթի համաձայն մի փոքր ուշացումով, ժամանել է եկեղեցի, ներկաները հասկացել են, որ նա Ջորջինան չէ: Պարզվել է՝ այդ օրը պսակադրվում էին տեղացի հասարակ երիտասարդներ՝ Նիկոլն ու Ֆաբիոն, ովքեր բացարձակապես չէին սպասում նման ուշադրության և այն բանին, որ իրենց կյանքի կարևորագույն օրը կհայտնվի համաշխարհային լրատվամիջոցների ուշադրության կենտրոնում:

«Շնորհավորում ենք Նիկոլին և Ֆաբիոյին։ Փողոցում լրագրողների և զբոսաշրջիկների առաջացրած մեծ խառնաշփոթից հետո, ի վերջո, մեզ հաջողվեց փակել եկեղեցու դռներն ու անցկացնել արարողությունը»,- ավելի ուշ նշվել է տաճարի ֆեյսբուքյան պաշտոնական էջում:

Տաճարի ներկայացուցիչները նաև հավելել են, որ երբևէ նման բան չէին տեսել, և հարսնացուի համար նույնիսկ դժվար էր մուտք գործել եկեղեցի:

Հարսանիքի հյուրերից ոմանք հումորով են մոտեցել ստեղծված իրավիճակին:

«Մենք մեզ աստղերի պես ենք զգում: Ինձ զարմացնում է, որ այս մարդիկ կարծում են, թե Ռոնալդուն կարող էր ամուսնանալ առանց անվտանգության աշխատակիցների ներկայության»,- տեղական պարբերականներից մեկի հետ զրույցում կատակել է հյուրերից մեկը:

Ստեղծված զավեշտալի իրավիճակին արձագանքել է նաև ինքը՝ Ռոնալդուն: Մադեյրայի տեղական «JM Madeira» պարբերականի ինստագրամյան հրապարակման մեկնաբանություններում «Ալ Նասրի» աստղային հարձակվողը ծիծաղող հինգ սմայլիկ է ուղարկել:

Հիշեցնենք, որ Ռոնալդուն և Ջորջինան նշանադրվել են նախորդ տարվա օգոստոսին: Կրիշտիանուն սիրելիին մոտ 5 միլիոն դոլար արժողությամբ և 30 կարատանոց ադամանդով մատանի է նվիրել, սակայն նրանց իրական հարսանիքի ժամկետները դեռևս գաղտնի են պահվում:

Նոր մրցաշրջան՝ նոր սպասումներ և, իհարկե, նոր խաղաշապիկներ։ Մինչ ֆուտբոլասերներն անհամբեր սպասում են եվրոպական թոփ-առաջնությունների մեկնարկին, առաջատար ակումբներն արդեն հասցրել են հանրության դատին հանձնել իրենց նոր համազգեստները 2026/27թթ․ մրցաշրջանի համար։

Ոմանք հավատարիմ են մնացել խիստ դասական ոճին, ոմանք էլ՝ դիմել են համարձակ էքսպերիմենտների ու գունային կտրուկ փոփոխությունների։ Ներկայացնում ենք եվրոպական ֆուտբոլի գլխավոր հսկաների նորացված հանդերձանքը:

Պրեմիեր լիգա

«Արսենալ»

«Չելսի»

«Լիվերպուլ»

«Մանչեսթեր Սիթի»

«Մանչեսթեր Յունայթեդ»

Լա Լիգա

«Բարսելոնա»

«Ռեալ»

Ա Սերիա

«Ինտեր»

«Նապոլի»

«Ռոմա»

«Միլան»

«Յուվենտուս»

Բունդեսլիգա

«Բավարիա»

«Բորուսիա» Դորտմունդ

Լիգա 1

ՊՍԺ