Չեխիայի մայրաքաղաք Պրահայում ավարտված գեղասահքի աշխարհի առաջնությունը նշանավորվեց հայկական սպորտի համար աննախադեպ հաջողությամբ։ Հայաստանը ներկայացնող Կարինա Ակոպովա — Նիկիտա Ռախմանին սպորտային զույգը, գրանցելով տպավորիչ արդյունքներ երկու ծրագրերի հանրագումարով, զբաղեցրեց 8-րդ հորիզոնականը՝ պատմության մեջ առաջին անգամ ապահովելով մեր երկրի տեղը լավագույն տասնյակում։

Գերազանցված ռեկորդներ և տպավորիչ ելույթներ

Աշխարհի առաջնությունում նորամուտը նշող հայկական զույգը կայունություն դրսևորեց մրցաշարի ողջ ընթացքում։ Կարճ ծրագրում, հանդես գալով Արա Գևորգյանի հայտնի «Արցախ» ստեղծագործության հնչյունների ներքո, նրանք 67,12 միավորով գրավեցին 8-րդ տեղը։

Ազատ ծրագրում Ակոպովա-Ռախմանին զույգը ներկայացավ հնդկական երաժշտական մոտիվներով՝ ցուցադրելով բարձր տեխնիկական պատրաստվածություն։ Մրցավարական կազմը նրանց ելույթը գնահատեցին 123,34 միավորով, որից 63,75-ը տրվեց տեխնիկական տարրերի, իսկ 59,59-ը՝ ծրագրի բարդության համար։ Թեև ելույթի վերջնամասում գեղասահորդները մեկ տարրի կատարման ժամանակ վրիպում թույլ տվեցին, դա չխանգարեց նրանց գերազանցել սեփական ռեկորդը։ Երկու ծրագրերի հանրագումարով Հայաստանի ներկայացուցիչները վաստակեցին 190,46 միավոր՝ զգալիորեն բարելավելով Օլիմպիական խաղերում գրանցած իրենց իսկ արդյունքը (180,66 միավոր)։

Պատմական հաղթանակ հայկական գեղասահքի համար

Այս ցուցանիշը ոչ միայն անհատական, այլև պատմական հաղթանակ է Հայաստանի համար։ Լավագույն տասնյակում հայտնվելու շնորհիվ Կարինա Ակոպովան և Նիկիտա Ռախմանինը ճանապարհ հարթեցին հաջորդ տարվա աշխարհի առաջնությունում Հայաստանի ևս մեկ սպորտային զույգի մասնակցության համար։

Ավելին, այս պատմական արդյունքը նրանց հնարավորություն է ընձեռում մասնակցելու Միջազգային գեղասահքի միության (ISU) մեծահասակների Գրան պրի (Աշխարհի գավաթ) շարքի երկու փուլերին, ինչը բարձրագույն նվաճում է և նոր էջ մեր մարզական պատմության մեջ։

Առաջնության մրցանակակիրները

Նշենք նաև, որ 20 զույգերի պայքարում աշխարհի չեմպիոնի տիտղոսը 228,33 միավորով նվաճեց Գերմանիան ներկայացնող Միներվա Ֆաբիեն Հազե — Նիկիտա Վոլոդին զույգը։ Արծաթե մեդալներին արժանացան Վրաստանի ներկայացուցիչներ Անաստասիա Մետյոլկինան և Լուկա Բերուլավան (218,41), իսկ լավագույն եռյակը եզրափակեցին կանադացիներ Լիա Պերեյրան և Տրենտ Միշոն (216,09)։

Իտալիայի Միլան և Կորտինա դ’Ամպեցո քաղաքներում իր ավարտին մոտեցող 25-րդ ձմեռային Օլիմպիական խաղերը պատմության մեջ կմնան որպես նորվեգական սպորտի անառարկելի գերիշխանության ժամանակաշրջան: Սկանդինավյան այս երկրի հավաքականը ոչ միայն անվերապահորեն հաղթեց թիմային հաշվարկում, այլև գերազանցեց նախկինում հենց իր կողմից սահմանված պատմական ռեկորդները։

Նոր նշաձող համաշխարհային սպորտում

Այս խաղերում ընդհանուր առմամբ խաղարկվեց մեդալների 116 հավաքածու: Նորվեգիայի ընտրանին այս մրցապայքարում վաստակեց անհավանական՝ 41 մեդալ, որից 18-ը՝ ոսկե, 12-ը՝ արծաթե և 11-ը՝ բրոնզե։ Այս ցուցանիշով նորվեգացիները թարմացրին միանգամից երկու ռեկորդ՝ թե՛ ոսկե պարգևների (գերազանցելով 2022 թվականի իրենց իսկ 16 ոսկին), թե՛ նվաճած մեդալների ընդհանուր քանակով (2018-ի 39 մեդալի դիմաց այժմ ունեն 41)։

Ձմեռային Օլիմպիական խաղերի գլխավոր հերոսը

Նորվեգական հրաշքի կերտման գործում անգնահատելի է 29-ամյա դահուկավազորդ Յոհանես Կլեբոյի դերը։ Մասնակցելով վեց մրցաձևի՝ նա գրանցեց հարյուրտոկոսանոց արդյունք՝ հայրենիք տանելով 6 ոսկե մեդալ։ Այս ֆանտաստիկ նվաճման շնորհիվ Կլեբոն դարձավ 11-ակի օլիմպիական չեմպիոն՝ Օլիմպիական խաղերի պատմության բոլոր ժամանակների ամենատիտղոսակիր մարզիկների ցանկում հաստատվելով երկրորդ հորիզոնականում։ Այժմ նա զիջում է միայն ամերիկացի լեգենդար լողորդ Մայքլ Ֆելպսին, որն իր ակտիվում ունի 23 ոսկե մեդալ։

Առաջատարների եռյակը

Թիմային ընդհանուր հաշվարկում երկրորդ հորիզոնականը վստահորեն զբաղեցրեց ԱՄՆ-ի օլիմպիական հավաքականը՝ նվաճելով 33 մեդալ (12 ոսկե, 12 արծաթե և 9 բրոնզե)։ Լավագույն եռյակը եզրափակեց Նիդերլանդների թիմը, որի մարզիկները վաստակեցին 10 ոսկե, 7 արծաթե և 3 բրոնզե պարգևներ։

Հայաստանի մասնակցությունը

Ինչ վերաբերում է Հայաստանին, ապա մեր երկիրն այս խոշորագույն ստուգատեսին ներկայացավ 5 մարզիկով։ Դահուկորդներ Միքայել Միքայելյանը և Կատյա Գալստյանը, լեռնադահուկորդ Հարություն Հարությունյանը, ինչպես նաև Կարինա Ակոպովա – Նիկիտա Ռախմանին գեղասահքի սպորտային զույգը, ցավոք, չկարողացան պայքարել մրցանակային տեղերի համար։

Նշենք, որ ձմեռային այս տպավորիչ մարզական տոնի պաշտոնական փակման հանդիսավոր արարողությունը նախատեսված է փետրվարի 22-ին։

Իտալիայում ընթացող Ձմեռային օլիմպիական խաղերում շարունակվում են գեղասահքի կանանց մրցումները: Ռուսաստանը ներկայացնող 18-ամյա Ադելիա Պետրոսյանն արդեն հանդես է եկել ազատ ծրագրով՝ վաստակելով 141,64 միավոր:

Հայազգի մարզուհին սառույց է դուրս եկել 20-րդ մեկնարկային համարի ներքո: Հիշեցնենք, որ երեքշաբթի կայացած կարճ ծրագրում Պետրոսյանը վաստակել էր 72,89 միավոր: Երկու ծրագրերի հանրագումարում Ադելիան ունի 214,53 միավոր և այս պահին զբաղեցնում է միջանկյալ երկրորդ հորիզոնականը: Առաջատարն ամերիկացի Էմբեր Գլենն է (214,91 միավոր):

Ազատ ծրագրի ընթացքում Պետրոսյանը փորձեց կատարել իր ծրագրի միակ «ուլտրա-սի» տարրը՝ չորս պտույտով տուլուպը, սակայն թերպտույտի պատճառով վայր ընկավ վայրէջքի ժամանակ: Չնայած դրան՝ մարզուհին հաջողությամբ կատարեց մնացած բոլոր տարրերը, իսկ պտույտներն ու քայլերի հաջորդականությունը գնահատվեցին բարդության ամենաբարձր՝ չորրորդ մակարդակով:

Մրցանակային տեղերի համար պայքարը դեռ շարունակվում է. իրենց ելույթներին են սպասում ճապոնացի մարզուհիներ Մոնե Տիբան, Կաորի Սակամոտոն, Ամի Նակային և ամերիկացի Ալիսա Լյուն:

Ադելիա Պետրոսյանը Ռուսաստանի եռակի չեմպիոն է և Ռուսաստանի Գրան պրիի եզրափակչի եռակի հաղթող:

Իտալիայում Օլիմպիական խաղերը կշարունակվեն մինչև փետրվարի 22-ը: 

Իտալիայում ընթացող Ձմեռային օլիմպիական խաղերում կայացել է կանանց գեղասահքի կարճ ծրագիրը։ Ռուսաստանի գեղասահքի գործող չեմպիոն Ադելիա Պետրոսյանը ելույթից հետո զբաղեցնում է ընթացիկ 5-րդ հորիզոնականը։

18-ամյա մարզուհին սառույց է դուրս եկել երկրորդ համարի ներքո և մաքուր կատարել իր ծրագիրը՝ մրցավարներից ստանալով 72,89 միավոր։

Մրցումային առաջին օրվանից հետո առաջատարը ճապոնուհի Ամի Նակաին է (78,71): Երկրորդ տեղում է Ճապոնիայի մեկ այլ ներկայացուցիչ Կաորի Սակամոտոն (77,23), իսկ լավագույն եռյակը եզրափակում է ամերիկուհի Ալիսա Լյուն (76,59):

Հիշեցնենք, որ Ադելիա Պետրոսյանը Ռուսաստանի եռակի չեմպիոն է և Ռուսաստանի Գրան պրիի եզրափակիչների եռակի հաղթող։

Գեղասահորդուհիներն իրենց ազատ ծրագրերը կներկայացնեն հինգշաբթի՝ փետրվարի 19-ին։ Իտալիայում անցկացվող Օլիմպիական խաղերը կավարտվեն փետրվարի 22-ին։

Գեղասահքի Ռուսաստանի չեմպիոն Ադելիա Պետրոսյանը Իտալիայում ընթացող 2026 թվականի Օլիմպիական խաղերի կարճ ծրագրում վաստակել է 72,89 միավոր։

Երեքշաբթի երեկոյան ռուսաստանցի մարզուհին սառույց է դուրս եկել երկրորդ համարի ներքո և անթերի կատարել իր ելույթը։

Գեղասահորդուհիներն իրենց ազատ ծրագրերը կներկայացնեն փետրվարի 19-ին։

Հիշեցնենք, որ Իտալիայում անցկացվող Օլիմպիական խաղերը կշարունակվեն մինչև փետրվարի 22-ը։

Միլանում և Կորտինա դ’Ամպեցոյում ընթացող 25-րդ ձմեռային Օլիմպիական խաղերում ավարտվեց գեղասահքի զույգերի մրցաշարը, որտեղ Հայաստանն ուներ իր պատմական ներկայացուցիչները։ Կարինա Ակոպովա և Նիկիտա Ռախմանին զույգը, երկու ծրագրերի արդյունքով զբաղեցնելով 14-րդ հորիզոնականը, գրանցեց կարևոր ձեռքբերում հայկական սպորտի համար՝ առաջին անգամ ներկայացնելով անկախ Հայաստանը Օլիմպիական խաղերի այս մրցաձևում։

Հայ գեղասահորդները պայքարը սկսել էին փետրվարի 15-ին՝ կարճ ծրագրով։ Ներկայանալով «Արցախ» երաժշտության ներքո՝ զույգը վաստակել էր 66.27 միավոր և 12-րդ արդյունքով հաջողությամբ որակավորվել եզրափակիչ փուլի՝ ազատ ծրագրի համար։

Միլանի Ice Skating Arena-ում կայացած ազատ ծրագրում Ակոպովան և Ռախմանինը հանդես եկան երկրորդ ենթախմբում։ Նրանց համարը բեմադրված էր հնդիկ կոմպոզիտոր Ալա Ռահմանի ստեղծագործության հնդկական մոտիվներով։ Չնայած գեղեցիկ և տպավորիչ կատարմանը, ելույթն առանց տեխնիկական վրիպումների չանցավ. Կարինա Ակոպովան անհաջողություն ունեցավ պտույտների կատարման ժամանակ։

Մրցավարական կազմը զույգի ազատ ծրագիրը գնահատեց 114.39 միավոր (տեխնիկական տարրեր՝ 59.88, բաղադրիչներ՝ 55.51), ինչը 14-րդ ցուցանիշն էր այդ փուլում։

Երկու մրցումային օրերի արդյունքում Կարինա Ակոպովա և Նիկիտա Ռախմանին զույգը հավաքեց ընդհանուր 180.66 միավոր՝ ամփոփիչ աղյուսակում զբաղեցնելով 14-րդ տեղը։

Օլիմպիական ոսկին նվաճեց Ճապոնիան ներկայացնող Ռիկու Միուրա և Ռյուիչի Կիհարա զույգը՝ գրանցելով 231.24 միավոր արդյունք։ Արծաթե մեդալները բաժին հասան Վրաստանի հավաքականին, իսկ լավագույն եռյակը եզրափակեցին Գերմանիայի ներկայացուցիչները։

Իտալիայում ընթացող 2026 թվականի ձմեռային Օլիմպիական խաղերը նշանավորվել են բացառիկ պատմական ձեռքբերմամբ։ Օլիմպիական շարժման պատմության մեջ առաջին անգամ նույն ձմեռային խաղերի շրջանակում մրցասպարեզ են դուրս եկել մայր և որդի։

Այս յուրօրինակ ռեկորդի հեղինակներն են Մեքսիկան ներկայացնող 46-ամյա լեռնադահուկորդ Սառա Շլեպերը (ծագումով՝ ԱՄՆ-ից) և նրա 18-ամյա որդին՝ Լասե Գախիոլան։

Մարզական ծրագրի շրջանակում Շլեպերը մասնակցել է գերհսկա ոլորավայրէջքի (չի հաղթահարել որակավորման փուլը) և հսկա ոլորավայրէջքի մրցումներին։ Նրա որդին՝ Լասե Գախիոլան, հանդես է եկել հսկա ոլորավայրէջք և ոլորավայրէջք (սլալոմ) մրցաձևերում։

Հատկանշական է, որ Սառա Շլեպերը ոչ միայն ընտանեկան, այլև անհատական ռեկորդ է սահմանել։ Նա կին լեռնադահուկորդների շրջանում բացարձակ առաջատար է Օլիմպիական խաղերին մասնակցության թվով․ Իտալիայի խաղերը նրա կարիերայում արդեն յոթերորդն են։ Բացի այդ, Սառան ճանաչվել է Օլիմպիական խաղերի պատմության ամենատարեց լեռնադահուկորդը. փետրվարի 19-ին մարզուհին կտոնի իր 47-ամյակը։

Իտալական Միլան և Կորտինա դ’Ամպեցո քաղաքներում ընթացող 25-րդ ձմեռային Օլիմպիական խաղերում Հայաստանի լեռնադահուկային սպորտի ներկայացուցիչ Հարություն Հարությունյանն ավարտեց իր մրցելույթները։

Հայ մարզիկի վերջին մեկնարկը ոլորավայրէջք (slalom) մրցաձևում էր, որտեղ, ցավոք, նրան չհաջողվեց տեղ զբաղեցնել ամփոփիչ արձանագրությունում։ Առաջին վայրէջքից հետո Հարությունյանը ցույց էր տվել 1:10.12 ժամանակ և ընթանում էր 37-րդ հորիզոնականում։ Սակայն վճռորոշ՝ երկրորդ փորձի ժամանակ նա խախտում թույլ տվեց մրցուղում, ինչի պատճառով որակազրկվեց և դուրս մնաց պայքարից։

Մրցումային օրը բավականին բարդ ստացվեց նաև համաշխարհային աստղերի համար․ 57 լեռնադահուկորդ չկարողացավ հատել եզրագիծը կամ որակազրկվեց։ Նրանց թվում էին հսկա ոլորավայրէջքի օլիմպիական չեմպիոն, բրազիլացի Լուկաս Պինեյրո Բրոտենը և առաջին փորձի առաջատար, նորվեգացի Ատլե Լի Մաքգարտը։ Արդյունքում հաշվարկային տեղ գրավեց ընդամենը 39 մարզիկ։

Օլիմպիական չեմպիոնի կոչումը նվաճեց շվեյցարացի Լոիկ Մեյարը։ Պատվո հարթակի երկրորդ աստիճանին կանգնեց ավստրիացի Ֆաբիո Գշտրայնը, իսկ լավագույն եռյակը եզրափակեց նորվեգացի Հենրիկ Կրիստոֆերսենը։

Հիշեցնենք, որ ավելի վաղ՝ փետրվարի 14-ին, Հարություն Հարությունյանը հանդես էր եկել նաև հսկա ոլորավայրէջքում, որտեղ 81 մասնակիցների պայքարում գրավել էր 59-րդ տեղը։ Այսպիսով, դահուկորդներ Կատյա Գալստյանից և Միքայել Միքայելյանից հետո նա ևս ավարտեց օլիմպիական պայքարը։

Ձմեռային խաղերում Հայաստանը դեռևս ներկայացուցիչներ ունի․ գեղասահորդներ Կարինա Ակոպովա – Նիկիտա Ռախմանին զույգը այսօր՝ փետրվարի 16-ին հանդես կգա ազատ ծրագրով։ Կարճ ծրագրի արդյունքներով նրանք ընթանում են 12-րդ տեղում։

Այսօր՝ փետրվարի 16-ին, Միլան-Կորտինայում ընթացող 25-րդ Ձմեռային օլիմպիական խաղերի 10-րդ մրցումային օրն է։ Հայաստանի հավաքականի համար այն խոստանում է լինել չափազանց կարևոր և լարված, քանի որ պայքարի են դուրս գալիս մեր երկրի ներկայացուցիչները երկու տարբեր մարզաձևերում։

Օրվա մեկնարկը կտրվի լեռնադահուկային սպորտով։ Երևանի ժամանակով 13:00-ին մեկնարկում է տղամարդկանց սլալոմի մրցաշարը, որտեղ Հայաստանը կներկայացնի Հարություն Հարությունյանը։ Հիշեցնենք, որ մեր լեռնադահուկորդն արդեն մասնակցել էր հսկա սլալոմին՝ զբաղեցնելով 59-րդ հորիզոնականը։

Երեկոյան ուշադրության կենտրոնում գեղասահքն է։ Երևանի ժամանակով 23:00-ին սառույց դուրս կգան սպորտային զույգերը՝ ներկայացնելու ազատ ծրագիրը։ Հայաստանը ներկայացնող Կարինա Ակոպովա / Նիկիտա Ռախմանին զույգը, որը վստահ ելույթ էր ունեցել կարճ ծրագրում, կփորձի բարելավել դիրքերը և պայքարել բարձր տեղերի համար։

Իտալիայի Միլան և Կորտինա դ’Ամպեցո քաղաքներում ընթացող 25-րդ ձմեռային Օլիմպիական խաղերում Հայաստանի օլիմպիական հավաքականը գրանցել է առաջին լուրջ հաջողությունը։ Գեղասահքի սպորտային զույգերի մրցապայքարում Հայաստանը ներկայացնող Կարինա Ակոպովա և Նիկիտա Ռախմանին զույգը հաջողությամբ հաղթահարել է որակավորման փուլը։

Կարճ ծրագրում հայ գեղասահորդները ելույթ են ունեցել Արա Գևորգյանի հանրահայտ «Արցախ» ստեղծագործության երաժշտության ներքո՝ ցուցադրելով տպավորիչ սահք: Մրցավարները զույգի ելույթը գնահատել են ընդհանուր 66.27 միավոր: Ընդ որում, տեխնիկական տարրերի կատարման համար զույգը ստացել է 38.66 միավոր, իսկ ծրագրի բաղադրիչների (բարդության և արտիստիզմի) համար՝ 28.11 միավոր։

Մեկնարկին դուրս եկած 19 զույգերից պայքարը շարունակելու իրավունք էին ստանում լավագույն 16-ը: Ակոպովա-Ռախմանին զույգի գրանցած արդյունքը թույլ տվեց նրանց ընդգրկվել ուժեղագույնների ցանկում և իրավունք ստանալ մասնակցելու ազատ ծրագրին։ Վճռորոշ մրցելույթը, որտեղ կխաղարկվեն մեդալները, տեղի կունենա փետրվարի 16-ին։

Բացի գեղասահորդներից, փետրվարի 16-ը կարևոր օր է լինելու նաև Հայաստանի մյուս ներկայացուցչի՝ լեռնադահուկորդ Հարություն Հարությունյանի համար: Նա կավարտի իր ելույթները Օլիմպիական խաղերում՝ մասնակցելով ոլորավայրէջքի (սլալոմ) մրցմանը: Հիշեցնենք, որ ավելի վաղ Հարությունյանը հանդես էր եկել հսկա ոլորավայրէջքում՝ զբաղեցնելով 59-րդ հորիզոնականը: