2026 թվականի Աշխարհի գավաթի խաղարկության 3-րդ տուրում Շոտլանդիայի դեմ խմբային փուլի 3-0 հաշվով հաղթանակից հետո, 34-ամյա բրազիլացի հարձակվող Նեյմարը մեջբերել է 41-ամյա բրիտանացի մրցարշավորդ և Ֆորմուլա 1-ի յոթակի չեմպիոն Լյուիս Հեմիլթոնին, որը ներկայացնում է Ֆերարին։

«Հիշիր, թե ով ես դու», — խաղից հետո գրել է Նեյմարը՝ մեջբերելով Հեմիլթոնի խոսքերը։

«Միշտ», — պատասխանել է Հեմիլթոնը գրառմանը։

Նեյմարը խաղադաշտ է դուրս եկել երկրորդ խաղակեսի 76-րդ րոպեին և գոլ չի խփել։

Տափօղակով հոկեյի Հայաստանի հավաքականը 2027 թվականի աշխարհի առաջնությունում հանդես կգա IV A դիվիզիոնում։ Այս մասին հայտնում է ՀՀՖ-ի մամուլի ծառայությունը։

IIHF-ի խորհուրդը թույլատրել է Հնդկաստանին և Մարոկկոյին մասնակցել հոկեյի աշխարհի առաջնությանը։ Դրա հետևանքով IV դիվիզիոնում հայտնվել են ութ հավաքականներ, և ֆեդերացիան որոշել է այն բաժանել երկու ենթախմբի՝ A և B։

Հայաստանի հավաքականը A դիվիզիոնում կմրցի Քուվեյթի, Ինդոնեզիայի և Սինգապուրի հավաքականների դեմ։ Ամենաուժեղ թիմը կբարձրանա 2028 թվականի IIIB դիվիզիոն։

Մրցաշարի անցկացման հայտ են ներկայացրել Քուվեյթն ու Ինդոնեզիան։ Թե որտեղ կանցկացվի մրցաշարը, հայտնի կդառնա ավելի ուշ։ IV B դիվիզիոնում հանդես կգան Իրանը, Մալայզիան, Հնդկաստանը և Մարոկկոն։

Հեղինակավոր Forbes ամսագիրը հրապարակել է 2026 թվականի աշխարհի ամենաբարձր վարձատրվող մարզիկների ամենամյա վարկանիշային աղյուսակը, որը գլխավորել է «Ալ Նասրի» և Պորտուգալիայի հավաքականի հարձակվող Կրիշտիանու Ռոնալդուն։ «Ոսկե գնդակի» հնգակի դափնեկիրն արդեն չորրորդ տարին անընդմեջ պահպանում է առաջատարի դիրքը։

Ռեյտինգը կազմվել է՝ հաշվի առնելով ինչպես մարզիկների մրցելույթներից ստացված եկամուտները (աշխատավարձ, բոնուսներ, մրցանակային հիմնադրամներ), այնպես էլ սպորտից դուրս կնքված գովազդային և հովանավորչական պայմանագրերը։

41-ամյա Ռոնալդուի ընդհանուր տարեկան եկամուտը կազմել է ֆանտաստիկ 300 միլիոն դոլար, որից 235 միլիոնը նա վաստակել է խաղադաշտում, իսկ 65 միլիոնը՝ դրա սահմաններից դուրս։

Երկրորդ հորիզոնականը զբաղեցրել է մեքսիկացի անվանի բռնցքամարտիկ Սաուլ «Կանելո» Ալվարեսը (170 մլն դոլար), իսկ լավագույն եռյակը եզրափակել է ամերիկյան «Ինտեր Մայամիի» հարձակվող Լիոնել Մեսսին, ում տարեկան եկամուտը գնահատվել է 140 միլիոն դոլար։

Ստորև ներկայացնում ենք Forbes-ի վարկածով 2026 թվականի ամենաբարձր վարձատրվող մարզիկների լավագույն տասնյակը (միլիոն դոլար).

• Կրիշտիանու Ռոնալդու (Պորտուգալիա, ֆուտբոլ) – 300 (235 սպորտում + 65 սպորտից դուրս)
• Սաուլ Ալվարես (Մեքսիկա, բռնցքամարտ) – 170 (160 + 10)
• Լիոնել Մեսսի (Արգենտինա, ֆուտբոլ) – 140 (70 + 70)
• Լեբրոն Ջեյմս (ԱՄՆ, բասկետբոլ) – 137.8 (52.8 + 85)
• Սյոհեյ Օտանի (Ճապոնիա, բեյսբոլ) – 127.6 (2.6 + 125)
• Ստեֆեն Քարի (ԱՄՆ, բասկետբոլ) – 124.7 (59.7 + 65)
• Ջոն Ռամ (Իսպանիա, գոլֆ) – 107 (97 + 10)
• Կարիմ Բենզեմա (Ֆրանսիա, ֆուտբոլ) – 104 (100 + 4)
• Քևին Դյուրանտ (ԱՄՆ, բասկետբոլ) – 103.8 (54.8 + 49)
• Լյուիս Հեմիլթոն (Մեծ Բրիտանիա, Ֆորմուլա-1) – 100 (70 + 30)

Սերբիայում շարունակվում է սամբոյի պատանիների և երիտասարդների Եվրոպայի առաջնությունը, որտեղ Հայաստանի ներկայացուցիչները շարունակում են փայլուն արդյունքներ գրանցել։

Մրցումային հերթական օրը չափազանց հաջող էր մեր երիտասարդական հավաքականի համար. ասպարեզ դուրս եկած 8 հայ մարզիկներից 7-ը կանգնել են պատվո հարթակին՝ նվաճելով 2 ոսկե, 4 արծաթե և 1 բրոնզե մեդալներ։

Մարզական սամբոյի մրցաշարում հիանալի ելույթներ են ունեցել Ալեքս Խաչատրյանը (58 կգ) և Մհեր Օհանյանը (71 կգ): Երկու հայ մարզիկներն էլ եզրափակիչ գոտեմարտերում վստահ հաղթանակներ են տարել Ադրբեջանի ներկայացուցիչների նկատմամբ և հռչակվել Եվրոպայի երիտասարդների չեմպիոններ:

Մարտական սամբոյի մրցումներում Հայաստանն ուներ եզրափակչի երեք մասնակից։ Վճռորոշ գոտեմարտերում Միքայել Թումասյանը (64 կգ), Վադիս Համբարձումյանը (79 կգ) և Արեն Հարությունյանը (98 կգ) զիջեցին Ռուսաստանի մարզիկներին և դարձան ԵԱ-ի փոխչեմպիոններ:

Աղջիկների 72 կգ քաշային կարգում Հայաստանի հավաքականի ակտիվը արծաթե մեդալով հարստացրեց Սյուզաննա Մանուկյանը, ով եզրափակիչում պարտվեց Բելառուսը ներկայացնող մարզուհուն։

Մարզական սամբոյի 88 կգ քաշային կարգում էլ հանդես եկող Սեյրան Սարուխանյանը, տոնելով երկու հաղթանակ և կրելով մեկ պարտություն, արժանացավ բրոնզե պարգևի: Հայաստանի ներկայացուցիչներից միայն Միլենա Առաքելյանին չհաջողվեց մեդալ նվաճել. նա պայքարը լքեց մեկ հաղթանակից հետո։

Հայաստանի Սամբոյի ֆեդերացիայից հայտնում են, որ վաղը՝ ապրիլի 23-ին, մեդալների համար պայքարի դուրս կգա ևս 7 հայ մարզիկ։

Հիշեցնենք, որ ավելի վաղ այս առաջնությունում Հայաստանի պատանեկան հավաքականն արդեն նվաճել էր 2 արծաթե և 4 բրոնզե մեդալ:

Ապրիլի 21-ից 23-ը Սերբիայի Նովի Սադ քաղաքում կանցկացվի սամբոյի Եվրոպայի պատանիների և երիտասարդների առաջնությունը, որին Հայաստանը կներկայանա մեծ պատվիրակությամբ։

​Ինչպես հայտնում է Հայաստանի սամբոյի ֆեդերացիայի մամուլի ծառայությունը, աշխարհամասի առաջնությանը գործուղվել է 27 մարզիկ։ Հավաքականները մրցավայր են մեկնել մարզիչներ Վովիկ Խոջայանի և Հայկ Ավետիսյանի գլխավորությամբ:

​Հայկական պատվիրակությունը ղեկավարում է Հայաստանի սամբոյի ֆեդերացիայի նախագահ, Եվրոպայի սամբոյի ֆեդերացիայի փոխնախագահ Միքայել Հայրապետյանը:

​Ստորև ներկայացնում ենք մրցումային օրերն ու Հայաստանի ներկայացուցիչներին.

​Ապրիլի 21 (Պատանիներ)

​Տղաներ

​Սևակ Դավոյան (53 կգ)
​Նարեկ Սիմոնյան (58 կգ)
​Հակոբ Ումուրշատյան (64 կգ)
​Գոռ Շատվերյան (71 կգ)
​Գոռ Մուրադյան (79 կգ)
​Գոգա Բաբայան (88 կգ)
​Սերգեյ Զաքարյան (98 կգ)
​Սասուն Դալլաքյան (+98 կգ)

​Աղջիկներ

​Վիկտորիա Լիպարիտյան (47 կգ)
​Միլենա Բաբայան (50 կգ)
​Մանուշակ Խաչատրյան (54 կգ)
​Ալյոնա Ապրեսյան (59 կգ)

​Ապրիլի 22 (Երիտասարդներ)

​Մարզական սամբո, տղաներ

​Ալեքս Խաչատրյան (58 կգ)
​Մհեր Օհանյան (71 կգ)
​Սեյրան Սարուխանյան (88 կգ)
​Մարզական սամբո, աղջիկներ
​Միլենա Առաքելյան (50 կգ)
​Սյուզաննա Մանուկյան (72 կգ)
​Մարտական սամբո, տղաներ
​Միքայել Թումասյան (64 կգ)
​Վադիս Համբարձումյան (79 կգ)
​Արեն Հարությունյան (98 կգ)

​Ապրիլի 23 (Երիտասարդներ)

​Մարզական սամբո, տղաներ

​Միհրան Սլոյան (64 կգ)
​Լևոն Վանոյան (79 կգ)
​Տիգրան Ալիզյան (98 կգ)

​Մարզական սամբո, աղջիկներ

​Յուլյա Մարտիրոսյան (54 կգ)

​Մարտական սամբո, տղաներ

​Գագիկ Գրիգորյան (58 կգ)
​Արմեն Ադամյան (71 կգ)
​Արտյոմ Հովակիմյան (88 կգ)

Խորվաթիայի Օսիյեկ քաղաքում ընթացող սպորտային մարմնամարզության 2026 թվականի աշխարհի գավաթի խաղարկության վերջին փուլում Հայաստանի սպորտային մարմնամարզության հավաքականի անդամ Արթուր Ավետիսյանը դարձել է բացարձակ գավաթակիր:

​Ինչպես հայտնում են Հայաստանի մարմնամարզության ֆեդերացիայից, հայ մարմնամարզիկն այս բացառիկ նվաճմանը հասել է օղակների վարժությունում։

​Աշխարհի գավաթի խաղարկության 6 փուլերից երեքում Արթուր Ավետիսյանը դարձել է ոսկե, արծաթե ու բրոնզե մեդալակիր:

Ինչպես ավելի վաղ տեղեկացրել էինք, Հայաստանի սպորտային մարմնամարզության հավաքականի ներկայացուցիչ Համլետ Մանուկյանը փայլուն ելույթներ է ունեցել աշխարհի գավաթի խաղարկության տարբեր փուլերում՝ նվաճելով երկու ոսկե մեդալ։

Հայ մարմնամարզիկի գրանցած տպավորիչ արդյունքներին անդրադարձել է Մարմնամարզության միջազգային ֆեդերացիան (FIG)՝ իր պաշտոնական էջերում հրապարակելով Մանուկյանի ելույթի տեսանյութն ու կից կատարելով ուշագրավ գրառում։

«Այնպիսի տպավորություն է, կարծես դիտում ենք Համլետ Մանուկյանի ելույթը 1.5 անգամ արագացված ռեժիմով, այնպես չէ՞։ Երկու ոսկե մեդալ վեց օրում։ Ահա թե ինչ է նա անում»,- ասված է ֆեդերացիայի հրապարակման մեջ։

Հիշեցնենք, որ Համլետ Մանուկյանը նժույգթափեր վարժությունում անգերազանցելի էր աշխարհի գավաթի խաղարկության ինչպես Կահիրեի, այնպես էլ Խորվաթիայի Օսիյեկ քաղաքում կայացած եզրափակիչ փուլերում՝ երկու դեպքում էլ կանգնելով պատվո հարթակի առաջին աստիճանին:

Խորվաթիայի Օսիյեկ քաղաքում ընթացող սպորտային մարմնամարզության 2026 թվականի աշխարհի գավաթի խաղարկության վերջին փուլում Հայաստանի սպորտային մարմնամարզության հավաքականի անդամ Համլետ Մանուկյանը ոսկե մեդալ է նվաճել:

Նժույգթափեր վարժության եզրափակիչում Մանուկյանը 14,733 միավոր է վաստակել և զբաղեցրել առաջին տեղը: Այս վարժությունում Հայաստանի մյուս ներկայացուցիչ Մամիկ Խաչատրյանը զբաղեցրել է 6-րդ տեղը:

Հայաստանի մյուս ներկայացուցիչ Արթուր Ավետիսյանը բրոնզե մեդալ է նվաճել օղակների վարժությունում. Եզրափակiչում նա հավաքել է 14.133 միավոր և կանգնել պատվո հարթակի երրորդ աստիճանին:

Վաղը` ապրիլի12-ին աշխարհի գավաթի խաղարկության հենացատկի վարժության եզրափակչում հանդես կգա Օլիմպիական խաղերի արծաթե, բրոնզե մեդալակիր, աշխարհի չեմպիոն, Եվրոպայի եռակի չեմպիոն Արթուր Դավթյանը:

Հիշեցնենք, որ հայ մարմնամարզիկները փայլուն արդյունքներ էին գրանցել նաև Աշխարհի գավաթի նախորդ՝ Կահիրեի փուլում: Այնտեղ ևս Համլետ Մանուկյանը նժույգթափեր վարժությունում նվաճել էր ոսկե մեդալ (14,800 միավոր), իսկ Արթուր Ավետիսյանը օղակների վարժությունում դարձել էր արծաթե մեդալակիր:

Խորվաթիայի Օսիյեկ քաղաքում ընթացող սպորտային մարմնամարզության 2026 թվականի աշխարհի գավաթի խաղարկության հերթական փուլը խոստումնալից է դասավորվում Հայաստանի հավաքականի համար: Մեր թիմի բոլոր չորս ներկայացուցիչներն էլ վստահորեն հաղթահարել են որակավորման փուլի արգելքն ու նվաճել եզրափակիչի ուղեգրեր:

Հենացատկի վարժությունում հերթական անգամ իր բարձր կարգն է հաստատել Հայաստանի հավաքականի առաջատար Արթուր Դավթյանը։ Նա ցույց է տվել լավագույն արդյունքն ու առաջին հորիզոնականով դուրս եկել եզրափակիչ:

Նժույգ-թափերի վարժությունում մեդալների համար կպայքարեն մեր երկու մարմնամարզիկները՝ Համլետ Մանուկյանն ու Մամիկոն Խաչատրյանը։ Տղաները հաջողությամբ են հանդես եկել որակավորման փուլում և զբաղեցրել են համապատասխանաբար երրորդ և չորրորդ տեղերը:

Օղակների վարժությունում ևս Հայաստանը կունենա իր ներկայացուցիչը. Արթուր Ավետիսյանը գրանցել է երրորդ լավագույն արդյունքն ու ապահովել իր տեղը վճռորոշ փուլում:

Հիշեցնենք, որ այս նույն կազմով հայ մարմնամարզիկները տպավորիչ ելույթներ էին ունեցել նաև Եգիպտոսի մայրաքաղաք Կահիրեում կայացած աշխարհի գավաթի նախորդ փուլում։ Այն ժամանակ Արթուր Դավթյանն ու Համլետ Մանուկյանը հռչակվել էին մրցաշարի հաղթողներ և նվաճել ոսկե մեդալներ, իսկ Արթուր Ավետիսյանը կանգնել էր պատվո հարթակի երկրորդ աստիճանին՝ արժանանալով արծաթե պարգևի: Եզրափակիչներում մեր մարզիկները կփորձեն կրկնել և զարգացնել այս հաջողությունը:

Սպորտի միջազգային օրվա շրջանակում կայացել է «Սպորտի ոլորտում տարվա լավագույնների ընտրություն 2025» մրցույթի հաղթողների պարգևատրման հանդիսավոր արարողությունը։

Միջոցառմանը ներկա են եղել երկրի բարձրագույն ղեկավարությունը՝ ՀՀ վարչապետ Նիկոլ Փաշինյանի գլխավորությամբ, Հանրապետության նախագահ Վահագն Խաչատուրյանը, ԱԺ նախագահ Ալեն Սիմոնյանը, ԿԳՄՍ նախարար Ժաննա Անդրեասյանը, ինչպես նաև մարզաշխարհի ներկայացուցիչներ, ֆեդերացիաների ղեկավարներ և անվանի մարզիկներ։

Նոր մարզադպրոցներ և խոշոր մրցաշարեր Հայաստանում

Մինչ բուն մրցանակաբաշխությունը, վարչապետ Նիկոլ Փաշինյանը շնորհակալություն է հայտնել մարզիկներին միջազգային հարթակներում հայկական սպորտի պատիվը բարձր պահելու համար՝ ընդգծելով սպորտի ոլորտի ինստիտուցիոնալ զարգացման կարևորությունը:

Խոսելով ենթակառուցվածքների բարելավման մասին՝ կառավարության ղեկավարը նշել է, որ այս պահին ընթացքի մեջ են կամ մեկնարկում են մեր օլիմպիական չեմպիոնների և անվանի մարզիկների անվան նոր մարզադպրոցների կառուցման աշխատանքները: Շուտով շահագործման կհանձնվեն Հրանտ Շահինյանի, Ալբերտ Ազարյանի, Արթուր Աբրահամի (Երևանում), Արթուր Ալեքսանյանի և Նազիկ Ավդալյանի (Շիրակի մարզում), Վիկ Դարչինյանի, Յուրի և Ստեփան Սարգսյանների (Լոռիում), Ռոման և Մալխաս Ամոյանների (Արագածոտնում) անվան մարզօջախները։ Բացի այդ, նախատեսվում է ստադիոնների կառուցում Երևանում, Իջևանում, Վանաձորում և Ակադեմիական քաղաքում։

Հատուկ ուշադրություն է դարձվել ֆուտզալի ազգային հավաքականի պատմական նվաճումներին, որոնք ամրագրելու նպատակով առաջիկայում կկառուցվի հավաքականի անվան հատուկ մարզադպրոց։

Անդրադառնալով սպասվող խոշոր իրադարձություններին՝ հայտարարվել է, որ առաջիկայում Հայաստանը կհյուրընկալի Ֆրանկոֆոնիայի խաղերը, ինչպես նաև Մարմնամարզության Եվրոպայի և Ծանրամարտի աշխարհի առաջնությունները:

Ովքե՞ր են 2025-ի լավագույնները

Միջոցառման կուլմինացիան տարվա լավագույնների պարգևատրումն էր։ 11 անվանակարգերում հաղթող ճանաչվածներն արժանացել են 6 միլիոն 250 հազարական դրամ դրամական պարգևի և հատուկ հուշանվերների, որոնք նրանց հանձնել է վարչապետը։

2025 թվականի մրցանակակիրներն են՝

• Լավագույն մարզիկներ՝ Վարազդատ Լալայան (ծանրամարտ), Արթուր Դավթյան (սպորտային մարմնամարզություն), Մալխաս Ամոյան (հունահռոմեական ըմբշամարտ)
• Լավագույն կին մարզիկ՝ Ալեքսանդրա Գրիգորյան (ծանրամարտ)
• Հաշմանդամություն ունեցող լավագույն մարզիկ՝ Սարգիս Սարգսյան (շախմատ)
• Լավագույն թիմ՝ Հայաստանի ֆուտզալի ազգային հավաքական
• Լավագույն երիտասարդ մարզիկ՝ Գասպար Տերտերյան (հունահռոմեական ըմբշամարտ)
• Վերադարձ մեծ սպորտ և/կամ հայտնություն՝ Սուրեն Հարությունյան (կարատե)
• Հայաստանի Հանրապետությունը լավագույնս հանրահռչակած մարզիկ՝ Համլետ Մանուկյան (սպորտային մարմնամարզություն)
• Լավագույն մարզիչ՝ Փաշիկ Ալավերդյան (ծանրամարտ)
• Հանդիսատեսի համակրանք (առցանց քվեարկությամբ)՝ Սուրեն Հարությունյան (կարատե)

Հիշեցնենք, որ «Սպորտի ոլորտում տարվա լավագույնների ընտրություն» մրցույթի նպատակն է խրախուսել տարվա ընթացքում բացառիկ նվաճումներ գրանցած և Հայաստանի հեղինակությունը միջազգային ասպարեզում բարձրացրած մարզիկներին ու մարզիչներին: