2026 թվականի Աշխարհի գավաթի խաղարկության 3-րդ տուրում Շոտլանդիայի դեմ խմբային փուլի 3-0 հաշվով հաղթանակից հետո, 34-ամյա բրազիլացի հարձակվող Նեյմարը մեջբերել է 41-ամյա բրիտանացի մրցարշավորդ և Ֆորմուլա 1-ի յոթակի չեմպիոն Լյուիս Հեմիլթոնին, որը ներկայացնում է Ֆերարին։

«Հիշիր, թե ով ես դու», — խաղից հետո գրել է Նեյմարը՝ մեջբերելով Հեմիլթոնի խոսքերը։

«Միշտ», — պատասխանել է Հեմիլթոնը գրառմանը։

Նեյմարը խաղադաշտ է դուրս եկել երկրորդ խաղակեսի 76-րդ րոպեին և գոլ չի խփել։

Թենիսիստ Նովակ Ջոկովիչը, ինչպես նաև «Ֆորմուլա-1»-ի նախկին պիլոտներ Ֆելիպե Մասան և Կևին Մագնուսենը դարձել են ֆրանսիական «Լե Ման» ֆուտբոլային ակումբի համասեփականատերեր:

– Նովակ Ջոկովիչը թենիսի լեգենդ է և պատմության ամենահաջողակ խաղացողներից մեկը: Նրա ոգու ուժն ու եզակի մոտեցումը մեծապես կնպաստեն ակումբի զարգացմանը: Ֆելիպե Մասան (15 սեզոն «Ֆորմուլա-1»-ում) և Կևին Մագնուսենը (10 սեզոն) կօգնեն կամուրջ կառուցել ֆուտբոլի և ավտոմրցարշավի միջև, ինչը «Լե Ման» բրենդի առանձնահատկությունն է, – նշված է ակումբի պաշտոնական հայտարարությունում:

Անցած մրցաշրջանում «Լե Մանը» Ֆրանսիայի առաջնության երրորդ դիվիզիոնում գրավել է երկրորդ հորիզոնականը և նվաճել Լիգա 2-ի ուղեգիր:

27-ամյա հոլանդացի ավտոարշավորդ և «Ռեդ Բուլի» թիմից Ֆորմուլա 1-ի եռակի չեմպիոն Մաքս Ֆերստապենը Արքայական մրցավազքում առաջատարության օրերի քանակով շրջանցել է Ֆորուլա-ի յոթակի հաղթող, լեգենդար Միխայել Շումախերին:

Միխայել Շումախերը 2000-ականների սկզբին իտալական «Ֆերարի» թիմի համար վարելիս 896 օր գլխավորել  է Ֆորմուլա 1-ի վարորդների անհատական վարկանիշային աղյուսակը: Ֆերստապենը 2021 թվականից ի վեր երեք անընդմեջ տիտղոս է նվաճել և առաջնությունը գլխավորել է 897 օր՝ 2022 թվականի Իսպանիայի Գրան Պրիում հաղթելուց հետո գլխավորելով նաև վարորդների անհատական վարկանիշը։

Մոնտե Կառլոյի քաղաքային շրջապտույտում ավարտվեց Ֆորմուլա 1-ի Մոնակոյի Գրան Պրին։

Հաղթող է ճանաչվել Ferrari-ի ավտոարշավորդ Շառլ Լեկլերը։ Երկրորդ տեղում է McLaren-ի ավտոարշավորդ Օսկար Պիաստրին: Լավագույն եռյակը եզրափակել է Ferrari-ի ավտոարշավորդ Կառլոս Սաինսը։

Նշենք, որ մրցարշավն ընդհատվել է կարմիր դրոշներով ավելի քան կես ժամ՝ Սերխիո Պերեսի և Haas-ի երկու վարորդների մասնակցությամբ վթարի պատճառով առաջին շրջանում:

Ժամանակակից Ֆորմուլա 1-ի լեգենդ Լյուիս Հեմիլթոնի տեղափոխությունը «Ֆեռարի» շարունակում է մնալ ավտոսպորտի սիրահարների քննարկման գլխավոր թեման: ArmSport-ը շարունակում է ուսումնասիրել այս տրանսֆերը և զրուցել է երկուհազարականների հայկական հեռուստաեթերի ամենավարկանիշային հաղորդումներից մեկի՝ «Ավտոշքերթ»-ի հեղինակ, Ֆորմուլա 1-ի մեկնաբան Երվանդ Ղարիբյանի հետ:

— Երվանդ, որպես Ֆորմուլա-1-ի սիրահար ու մեծ գիտակ, ինչպե՞ս կգնահատեք Լյուիս Հեմիլթոնի տեղափոխությունը «Մերսեդեսից» «Ֆեռարի»: Որքանո՞վ էր այն սպասելի Ձեզ համար, եթե հաշվի առնենք, որ կողմերն, ըստ տարբեր, շշուկների, բանակցում են դեռևս 2017 թվականից:

— Սուվորովը ասել է՝ վատն է այն զինվորը, որը չի ցանկանում դառնալ գեներալ։ Տվյալ դեպքում վատն է այն մրցարշավորդը, որը երբևէ չի երազել հանդես գալ «Ֆեռարիում»։ Այդպես, Լյուիս Հեմիլթոնը համալրեց իտալական թիմի շարքերը, ինչպես ժամանակին շատերը՝ Սեբաստիան Ֆետելը, Ֆերնանդո Ալոնսոն և այլ չեմպիոններ։ 2025-ին նախատեսված այս տեղափոխությունն, այո, ռումբի էֆֆեկտ ունեցավ Ֆորմուլա 1-ում։ Այդպիսի խոսակցություններ վաղուց կային, բայց որևէ մեկը հենց այս պահին չէր սպասում այս տեղափոխությանը։ Սա անակնկալ էր նույնիսկ Հեմիլթոնի ապագա թիմակից Շառլ Լեկլերի համար։ Այս տեղափոխությամբ Ֆորմուլա 1-ում ծնվում է նոր ինտրիգ։ Բացի նրանից, որ աշխարհի 7-ակի չեմպիոնը պետք է հանդես գա աշխարհի ամենատիտղոսակիր թիմում, դրան գումարվում է բարձրակարգ 2 պիլոտների սպասվելիք մրցակցություն։ Մի կողմից աշխարհի բազմակի չեմպիոնն է, մյուս կողմից՝ այդ չեմպիոնության համը չզգացած, բայց չեմպիոնական հավակնություններ ունեցող Շառլ Լեկլերը։

— Ֆորմուլա 1-ի տրանսֆերային պատուհանն այնքան ակտիվ չէ, որքան ֆուտբոլայինը: Կարելի՞ է ասել, որ այս տեղափոխությունը 21-րդ դարում ամենալուրջն է: Թե՞ եղել են այլ տրանսֆերներ, որոնք կարող են ոտք մեկնել: Որո՞նք Դուք կառանձնացնեք:

— Այո, Ֆորմուլա 1-ի տրանսֆերները չես համեմատի ֆուտբոլի հետ, մասնավորապես քանակի տեսանկյունից։ Բայց այս սպորտաձևում կարևոր է ոչ թե քանակը, այլ որակը։ Տվյալ դեպքում տրանսֆերը կարող է դառնալ դարակազմիկ։ Կարող ենք հիշել չեմպիոնական այլ տեղափոխություններ դեպի «Ֆեռարի»՝ Ֆերնանդո Ալոնսո, Սեբաստիան Ֆետտել։ Եղել են նաև հակառակ ուղղությամբ տրանսֆերներ։ Ամենահայտնին, թերևս, Միխայել Շումախերի տեղափոխությունն էր «Մերսեդես»։ Բայց այս պարագայում կա մի նրբություն. այն ժամանակ «Կարմիր բարոնը» «Ֆեռարիից» հեռանալուց հետո հայտարարեց կարիերան ավարտելու մասին ու միայն դադարից հետո համալրեց «Մերսեդեսի» շարքերը։ Բայց, ըստ իս, համեմատական եզրեր ունեն հենց Հեմիլթոնի ու Շումախերի տեղափոխությունները, որովհետև խոսում ենք մինչև այս պահը արքայական ավտոսպորտի ամենատիտղոսակիր ու անգերազանցելի վարպետների մասին։ Ու այստեղ ևս 2 ինտրիգ կա. կկարողանա՞ Հեմիլթոնը գերազանցել Միխայել Շումախերին տիտղոսների քանակով հենց «Ֆեռարիի» ղեկին։ Բացի դրանից, կա փոքր մտավախություն, որ ամեն ինչ կարող է ավարտվել այնպես, ինչպես եղավ Շումախերի հետ «Մերսեդեսում», երբ «Կարմիր բարոնը» չկարողացավ նոր թիմում հաղթահարել իր երիտասարդ թիմակից Նիկո Ռոսբերգի դիմադրությունը ու նույնիսկ որևէ հաղթանակ չգրանցեց։ Ի՞նչ է սպասվում Հեմիլթոնին «Ֆեռարիում»՝ կապրենք, կտեսնենք, բայց վստահ եմ, որ շատ հետաքրքիր է լինելու 2025 թվականի մրցաշրջանը։

— Ըստ Ձեզ, ո՞րն էր տրանսֆերի գլխավոր մոտիվացիան: Չէ՞ որ Հեմիլթոնը 13 տարեկանից «Մերսեդեսի» համակարգում է եղել: Բացի դրանից չենք մոռանում, որ նա մոտ 40 տարեկան է: Ինչպես նաև չենք կարող հաշվի չառնել այն շշուկները, ըստ որոնց Հեմիլթոնի աշխատավարձը զգալի նվազելու է նոր թիմում:

— Հեմիլթոնի գլխավոր մոտիվացիան իհարկե հաղթելն է՝ հաղթել, հաղթել ու էլի հաղթել, դառնալ աշխարհի 8-ակի չեմպիոն և գերազանցել բոլորին Ֆորմուլա 1—ի պատմության մեջ։ Մյուս կողմից ակնհայտ է, որ «Մերսեդեսը» լավ մարզավիճակում չէ և հայտնի չէ՝ կկարողանա թիմը վերականգնել այն, թե ոչ։ Այդ պատճառով Հեմիլթոնին հարկավոր են նոր մարտահրավերներ, և նա տեղափոխվում է «Ֆեռարի» նոր հաղթանակների հետևից։ Աշխատավարձի մասով լսել եմ, որ բոնուսներով նրա աշխատավարձը պետք է հասնի մոտ 100 մլն դոլարի, ինչը, կարծում եմ՝ վատ չէ նրա համար։

— Ի վերջո այս տեղափոխությունից ով է ավելի շատ շահելու` Հեմիլթոնը, «Մերսեդեսը», թե՞ «Ֆեռարին»:

— Շատ դժվար է այս պահին ասել՝ այս տեղափոխությունից ով է շահելու, ով՝ ոչ։ Դա կիմանանք միայն 2025-ին, երբ Հեմիլթոնը նստի «Ֆեռարիի» ղեկին։ Պարզ կլինի նաև՝ նույն, հավասարազոր մեքենաներով ի՞նչ շանսեր ունեն երկու տաղանդավոր պիլոտները՝ Լեկլերը և Հեմիլթոնը։ Կարծում եմ, որ «Ռեդ Բուլի» դոմինանտությունը կշարունակվի ոչ միայն այս տարի, այլև 2025-ին։ Ուստի, Հեմիլթոնը պետք է հաղթահարի ոչ միայն իր թիմակցի արգելքը, այլև պայքար մղի «Կարմիր ցլերի» դեմ։ «Մերսեդեսից» մինչև այս պահը չեն հաղորդել՝ ո՞վ է փոխարինելու Հեմիլթոնին՝ գործող հավակնոտ երիտասարդ պիլոտ, թե՞ վաստակաշատ չեմպիոն, ինչպիսին է Ֆերնանդո Ալոնսոն կամ Սեբաստիան Ֆետելը։ Կան խոսակցություններ, որ «Մերսեդեսի» մարտական պիլոտ կարող է դառնալ Միկ Շումախերը՝ Միխայել Շումախերի որդին, որի կարիերան արքայական ավտոսպորտում մնաց մի փոքր ստվերում։ Այնպես որ, այս պահին 2025 թվականի համար կանխատեսում անելը բարդ է։ Զինվենք համբերությամբ ու սպասենք 2024-ի մեկնարկին, որովհետև այս տարի գուցե լինեն իրադարձություններ, որոնք մեզ թույլ կտան ավելի շոշափելի կարծիք կազմել հեմիլթոնյան 2025 թվականի մասին։

Ռոբերտ Գասպարյան

«Ինչպե՞ս չտառապել ռոմանտիզմով բեյսբոլում»,- այսպիսի հարցադրում էր անում Բրեդ Փիթի հերոս Բիլլի Բինին օսկարակիր «Մարդը, ով փոխեց ամեն ինչ» ֆիլմում: Բնօրինակով, ֆիլմը և գիրքը, որի հիման վրա նկարահանվել է այդ հանճարեղ կինոնկարը, կոչվում են Moneyball կամ «փողի խաղ»: Այն ցույց է տալիս սպորտի զարգացման դինամիկան դեպի մանրակրկիտ հաշվարկված բիզնես։ Տարիների ընթացքում կարծիք է ձևավորվել, որ փողի ու բիզնեսի աշխարհում այլևս տեղ չկա զգացմունքայնությանը, սենտիմենտալիզմին, ի վերջո՝ ռոմանտիզմին։ Թվում է՝ դրանց փոխարինելու են եկել ռացիոնալ մտածելակերպը, ուղիղ ու չոր հաշվարկը։

Տարիների ընթացքում Ֆորմուլա 1-ն ավելի ու ավելի շատ էր հիշատակվում նման կերպ՝ Լյուիս Հեմիլթոնի հայտնի «Cash Is King» («գումարն առաջնային է») մեջբերման շնորհիվ: Վերջին մրցաշրջաններում հենց արքայական ավտոսպորտն է ընկալվել որպես պրագմատիկության մարմնացում, որտեղ պտտվել ու պտտվում են ահռելի գումարներ, որտեղ բիզնես մտածելակերպը չի կարող տեղի տալ։

Բայց ոչ, արի ու տես, որ լինում են բացառություններ, այն էլ ինչպիսին, նույնիսկ այստեղ դեռ տեղ կա ռոմանտիկայի ու էմոցիաների համար։ Օրերս տարածվեց սենսացիոն հայտարարություն. Լյուիս Հեմիլթոնը 40 տարեկանում «Մերսեդեսից» տեղափոխվում է «Ֆեռարի»։ Սա տրանսֆերային բում է Ֆորմուլա 1-ում։ 

Ինչպես կայացավ տեղափոխությունը

Հանուն արդարության պետք է նշել, որ այս տեղափոխությունը կանխատեսելի էր, եթե հաշվի առնենք, որ կողմերը քանիցս բանակցել են նախորդ տարիների ընթացքում։ Անգլիացին բազմիցս խոստովանել է իր սերը իտալական ավտոմեքենաների հանդեպ։ Չնայած «Մերսեդեսում» իր ելույթներին՝ Լյուիսը չի վարանել հետաքրքրություն ցուցաբերել մրցակիցների արտադրանքի նկատմամբ։ Դրա ամենավառ ապացույցն իր անձնական ավտոտնակն է, որտեղ կա «Ֆեռարի» մակնիշի 2 ավտոմեքենա, հատկապես տպավորիչ է նրա եզակի և հազվագյուտ LaFerrari Aperta սուպերքարը:

«Երկար տարիներ ես գալիս էի Մոնցա ու լսում էի երկրպագուներին, որոնք ամեն անկյունից ասում էին «Արի «Ֆեռարի», արի «Ֆեռարի»»: Բնականաբար, դա անչափ հաճելի ու նույնիսկ փշաքաղեցնող էր։ Բայց չեմ տեղափոխվում Սկուդերիա, չնայած սա յուրաքանչյուր վարորդի երազանքն ու նպատակն է», — երեք տարի առաջ խոստովանել էր Լյուիսը՝ հավաստիացնելով,- «Ես ունեմ իմ դրդապատճառները՝ ես «Մերսեդեսի» համակարգում եմ 13 տարեկանից ու այստեղ էլ կմնամ մինչև վերջ»։

Իրականում, կարմիր թիմի ղեկավարները վերջին տասնամյակում ընդհուպ մի քանի անգամ են մոտեցել աշխարհի ամենատիտղոսակիր արշավորդին։ Բանակցություններում ակտիվության գագաթնակետը գրանցվել է 2017-2019 թվականներին։ Բանը հասել է նրան, որ աստղային «հաճախորդի» հետ ընթրել է անձամբ Պիերո Ֆեռարին՝ լեգենդար Էնցո Ֆեռարիի որդին, մի փոքր ավելի ուշ՝ արդեն ընկերության նախագահ Ջոն Էլկանը։ Այնուամենայնիվ, Լյուիսն այդ ժամանակ քաջ գիտակցում էր, որ «արծաթե թիմն» այդ պահին ավելի ուժեղ է ու կարող է պայքարել չեմպիոնության համար։ Բրիտանացի արշավորդն ավելի շուտ այս բանակցությունները օգտագործեց, որպես «Մերսեդեսի» վրա ճնշում գործադրելու միջոց, և, ի վերջո, պայմանագիր կնքեց «Մերսեդեսի» հետ իրեն հարմար պայմաններով՝ տարեկան 63 մլն դոլար արժողությամբ։ Որոշումը, ինչպես ցույց տվեց ժամանակը, ճիշտ էր. Լյուիսը նվաճեց իր 7-րդ չեմպիոնական տիտղոսը, իսկ «կարմիրները» երկար ժամանակով դուրս մնացին չեմպիոնական պայքարից։

Սակայն վերջին տարիների ընթացքում տեղի ունեցան իրադարձություններ, որոնք ստիպեցին Լյուիսին փոխել իր որոշումը։ «Մերսեդեսը» և «Ֆեռարին»-ն 2023 մրցաշրջանն ավարտեցին մոտավորապես նույն դիրքերում։ Նոր մեքենաների մասին շատ տեղեկություններ առայժմ չկան, չեն կարող լինել (ուր մնաց 2025-ի համար լինեն որոշակի նորություններ)։ Տրամաբանական հարց է ծագում՝ կա՞ն արդյոք տրանսֆերի ողջամիտ պատճառներ:

Հոլանդական RacingNews365-ը ինսայդ է հրապարակել, որի համաձայն «Մերսեդեսից» «Ֆեռարի» է տեղափոխվել կարևոր ինժեներ։ Այդ մասին հայտարարվել է դեռևս նախորդ մրցաշրջանի կեսերին. իտալական թիմը հանրությանը տեղեկացրել է Լոիկ Սերայի տեղափոխության մասին. նա ղեկավարում էր «Մերսեդեսի» մեքենաների կատարողականի բաժինը, սակայն ընդունել է «Ֆեռարիի» առաջարկը և կսկսի աշխատել իտալական թիմում 2025 թվականին: Ինժեների հեռանալու վրա ազդող գործոններից մեկը տարաձայնությունն էր թիմի տեխնիկական բաժնի հետ, որն այն ժամանակ ղեկավարում էր Մայք Էլիոթը։ Սերան կարծում էր, որ թիմը սխալ ուղղությամբ է շարժվում W13 և W14 մեքենաները նախագծելիս: Հեմիլթոնը ժամանակի ընթացքում համաձայնեց ինժեների հետ և հայտարարեց, որ մեքենան ունի թերություններ։ Չգալով ընդհանուր հայտարարի՝ Սերան հեռացավ «Ֆեռարի», բայց կսկսի աշխատել միայն 2025 թվականից՝ պայմանավորված տեխնիկական աշխատողների համար նախատեսված պարտադիր արձակուրդով։ Սա Ֆորմուլա 1-ի կանոնակարգի պարտադիր կետ է։

Ֆինանսական կողմերը

 «Ֆեռարիի» գլխավոր ինսայդեր Լեո Տուրինին բլոգում գրում է, որ ֆինանսական կողմը ոչ մի դեր չի խաղացել։ Ըստ իտալական La Gazzetta dello Sport-ի և La Stampa-ի՝ Լյուիսը միանշանակ գումարային տեսանկյունից չի շահում։ «Ֆեռարին» նրան նույնիսկ ավելի քիչ կվճարի, քան «Մերսեդեսը»: Խոսքը 50 միլիոն եվրո բազային աշխատավարձի մասին է։ «№ 44»-ը, սովորաբար, իմիջային իրավունքներն ամբողջությամբ վերցնում է իրեն, իսկ բոնուսներն ու մարքեթինգային արշավները կնքվում են առանձին գործարքներով։

Նույն աղբյուրները գնահատում են վճարումների ամբողջ ծավալը՝ բոլոր հովանավորներով և մրցանակային հավելավճարներով վերցրած։ Ըստ դրա, Հեմիլթոնի հոնորարը կարող է հասնել տարեկան մինչև 87 միլիոն եվրոյի, սակայն դրանց հասնելու համար Լյուիսը պետք է կատարի բոլոր պարտավորությունները, ներկա գտնվի բոլոր միջոցառումներին և հաղթի, հավանաբար, հնարավոր ամեն ինչ։

Այստեղ կա մի նրբություն։ Corierre della Serra-ի և Formula1uno.com-ի ինսայդեր Ջուլիանո Դուչեսայի տեղեկություններով, «Ֆեռարիի» տնօրեն Էլկանը Հեմիլթոնին առաջարկել է դառնալ նրա գործընկերը հետագա բոլոր ներդրումներում և նախաձեռնություններում։ Ըստ ինդայդերի՝ «Ֆեռարիի» նախագահը Exor ընտանիքի հիմնադրամի միջոցով խոստացել է առանձին ենթակառուցվածք հատկացնել՝ 250 միլիոն եվրո աշխատանքային կապիտալով, որը կներդրվի յոթակի չեմպիոնի բոլոր բիզնեսներում։

Պայմանները շատ առատաձեռն են թվում, բայց, այնուամենայնիվ, Հեմիլթոնն ուներ (կամ կարող էր ստանալ) մոտավորապես նույն պայմանները «Մերսեդեսում»՝ միլիարդատեր Տոտո Վոլֆը, հավանաբար, նման քայլի կգնար և կներգրավեր թիմի երկրորդ ներդրող ու հովանավոր INEOS-ի սեփականատեր սըր Ջիմ Ռեթքլիֆին։ Սակայն, ըստ լուրերի, ավելի մեծ դեր է խաղում բրենդի՝ մինչև 2035 թվականը Հեմիլթոնին «Մերսեդեսի» գլխավոր դեսպան չնշանակելու որոշումը։ Աշխարհի 7-ակի չեմպիոնին դուր չի եկել իր կարիերայի միակ թիմի նման անսպասելի որոշումը և, հետևաբար, նա չի մերժել այլ թիմերի հետ բանակցությունները։

Ի՞նչ կշահեն կողմերը

«Ֆեռարին» կստանա ոչ միայն մեծագույն չեմպիոնին, նրա մարքեթինգային ներուժը և լրացուցիչ մեդիա ազդեցությունը, այլև, այսպես ասած, անձնակազմի համար գրավչություն. ի վերջո, տեխնիկական ոլորտում բոլոր լավագույնները նույնպես ցանկանում են աշխատել Հեմիլթոնի հետ: Նույն ինսայդեր Լեո Տուրինի խոսքով՝  «Ֆեռարիի» նախագահ Ջոն Էլկանը շատ էր ցանկանում ձեռք բերել Լյուիս Հեմիլթոնին, քանի որ նրա գալը երաշխավորում է ինժեներների և մասնագետների նոր խումբ ձևավորելու հնարավորությունը՝ թիմն ուժեղացնելու համար։ Լոիկ Սերայի տեղափոխությունը միայն ամրապնդում է այս տեսությունը։ Հեմիլթոնը կարող է ստանալ «Ֆեռարիի» նախագահի լիակատար աջակցությունը՝ հենց իր ուզած մեքենան ստանալու համար, և այդ նպատակով էլ կայացավ Հեմիլթոնի տեղափոխությունը:

Ի վերջո, ո՞վ չի ցանկանա աշխատել մոլորակի ամենատիտղոսակիր արշավորդի հետ՝ մոլորակի ամենատիտղոսակիր թիմի կազմում։ Այո, լավագույնները կարող են համաձայնվել աշխատավարձի որոշակի կրճատման, բայց գաղափարն ամենաթանկ կապիտալից թանկ է: Օրինակ, ըստ ինսայդերների, 2025 թվականին Մարանելոյում սպասելու են «Մերսեդեսի» թրեքային թիմի ղեկավար Ռիկարդո Մուսկոնիին, ում La Gazzetta-ն նույնպես համարում է Հեմիլթոնի մտերիմը, որի հետ նրանք չեմպիոնական տիտղոսներ են նվաճել։

Կարելի է միայն կռահել, թե կոնկրետ ինչ է խոստացել Էլկանը Համիլթոնին։ Ինչ-որ անհավանական առաջընթաց տեխնոլոգիա (ինչպես Ռոս Բրաունը մինչև 2013 թվականի սեզոնը), որը, գուցե, կբացահայտվի միայն 2026 թվականին: Իսկ գուցե այս անգամ բավական էր պարզապես վարորդին գայթակղել «Ֆեռարիի» լեգենդով: Ի վերջո, տեղափոխվելու այլ հնարավորություն չկար։ «Մերսեդեսը» ճգնաժամի մեջ է, իսկ ինքը՝ մեծ չեմպիոնը, դեռ չի կորցրել իր ռեֆլեքսներն ու հմտությունները, դուրս չի եկել լավ մրցարշավային մարզավիճակից, չի կորցրել մոտիվացիան:

«Ֆեռարիում» Լյուիսը վերջապես կիրականացնի իր վաղեմի երազանքը և կմրցի «արքայական» ավտոսպորտում կարմիր մեքենայի ղեկին: Դեռ վաղ է խոսել տիտղոսի շանսերի մասին, բայց դժվար թե դրանք ավելի ցածր լինեն, քան «Մերսեդեսում»։ Քիչ հավանական է, որ Հեմիլթոնը վախենալու է իր Շառլ Լեկլերից: Իհարկե, մոնեգասկը կլինի Հեմիլթոնի ամենաարագ և ամենավտանգավոր թիմակիցը երկար տարիների ընթացքում, բայց նա մնում է հոգեբանորեն խոցելի և անկայուն, ոչ միշտ հուսալի և դեռ թույլ է տալիս աննկարագրելի կոպիտ սխալներ: Եթե ​​Լյուիսը վստահ չլիներ իր վրա, չէր միանա մի թիմի, որտեղ Լեկլերն է։ Ուրեմն այնտեղ ավելի մեծ գրավչություն կա, քան գումարը, քան տիտղոսը։ Խոսքը միևնույն ժամանակ ռոմանտիզմի և գիշատչին հատուկ հարձակողական բնազդի զարգացման մասին է։ Լյուիսը հաղթանակի ծարավ է, «Ֆեռարին»՝ նույնպես։ Այս դուետից կշահենք բոլորս։ Մնում է մի կերպ «գլորենք» այս 2024-ը ու ահմամբերությամբ սպասենք 2025-ին։

Ռոբերտ Գասպարյան

Ֆորմուլա 1-ի եռակի չեմպիոն, հոլանդացի Մաքս Ֆերստապենը բացատրել է, թե ինչու է մանկուց երկրպագում ՊՍՎ ֆուտբոլային ակումբին։

«Դա սկսվեց իմ հորից, մի ժամանակ նրան հովանավորում էր Philips-ը: Հետո նրան պարբերաբար հրավիրում էին ՊՍՎ-ի հանդիպումներին, երբեմն էլ ես նրա հետ գնում էի։ Աստիճանաբար կապ է հայտնվում, այն սեղմվում է, և դու արդեն քեզ ասոցացնում ես ակումբի հետ։ Էմոցիոնալ առումով ՊՍՎ-ն ինձ ավելի է սազում, քան, ասենք, «Այաքսը»: Ամստերդամը տարբերվում է Էյնդհովենից։

Ես ինձ որևէ կոնկրետ ֆուտբոլիստի հետ չեմ կապում։ Եվ ես ինքս ինձ ֆուտբոլիստ չեմ զգում, չնայած երբեմն կարող եմ հարվածել գնդակին։ Հաճույքով եմ դիտում հանդիպումները։ Ես իսկապես փորձում եմ հետևել ՊՍՎ-ի հանդիպումներին, եթե կարող եմ»,- Ֆերստապենի խոսքերն է մեջբերում Formula1-ը:

«Մերսեդեսի» ավտոարշավորդ Լյուիս Հեմիլթոնը, ում պայմանագիրը թիմի հետ ավարտվում է այս տարի, մտածում է «Ֆերարի» տեղափոխվելու մասին, հայտնում է Sky Sports-ը:

Հեմիլթոնը, ըստ աղբյուրի, դժգոհ է այն փաստից, որ «Մերսեդեսը» չկարողացավ ստեղծել այնպիսի բոլիդ, որով երկու տարվա ընթացքում կարող էր լրջորեն հավակնել չեմպիոնության։

Հնարավոր է, որ մրցաշրջանի ավարտից հետո բրիտանացին փոխի թիմը։

Այնուամենայնիվ, նշվում է, որ «Ֆերարիի» համար հեշտ չի լինի պայմանագիր կնքել Հեմիլթոնի հետ, քանի որ Շարլ Լեկլերն ու Կառլոս Սայնսը պայմանագրերով կապված են թիմի հետ մինչև 2024 թվականի ավարտը:

Ամերիկյան Haas-ը հայտարարել է, որ Ֆորմուլա 1-ի յոթակի չեմպիոն Միխայել Շումախերի որդին՝ Միք Շումախերը, մրցաշրջանի ավարտից հետո կլքի թիմը։

Շումախեր կրտսերը Haas-ում խաղացել է երկու մրցաշրջան՝ 2021 թվականին նա դարձել է 19-րդը ավտոարշավորդների անհատական հաշվարկում, իսկ 2022 թվականի մրցաշրջանի ավարտից մեկ փուլ առաջ նա 12 միավորով 16-րդ տեղում է։ 23-ամյա գերմանացու լավագույն արդյունքը «արքայական մրցավազքում» եղել է վեցերորդ տեղը հուլիսին Ավստրիայի Գրան Պրիում։

Մյուս մրցաշրջանում Haas-ում հանդես են գալու դանիացի Կևին Մագնուսենն ու գերմանացի Նիկո Հյուլկենբերգը, որը 2022-ին Aston Martin-ի պահեստային վարորդն էր։

Ֆորմուլա 1-ի վերջին մրցավազքը կկայանա նոյեմբերի 20-ին Աբու Դաբիում։ Ժամանակից շուտ չեմպիոն է հռչակվել Մաքս Ֆերստապենը Red Bull-ից։

Բրազիլիայում կայացել է 2022 մրցաշրջանի Ֆորմուլա 1-ի 21-րդ փուլը։ Առաջին տեղը գրավել է Mercedes-ի վարորդ Ջորջ Ռասելը, որը կարիերայում առաջին անգամ էր հաղթում մրցավազքը։

Երկրորդ տեղում հայտնվել է կրկին Mercedes-ի ավտոարշավորդ Լյուիս Հեմիլթոնը, ինչը թույլ տվեց նրա թիմին  առաջին դուբլը նվաճել 2022 թվականին։

Սան Պաուլուում մրցանակակիրների եռյակը եզրափակեց Ferrari-ի վարորդ Կառլոս Սայնսը։

Red Bull-ի վարորդ Մաքս Ֆերստապենը, որը ժամանակից շուտ չեմպիոն էր դարձել, մրցավազքն ավարտեց 6-րդ տեղում։

2022 մրցաշրջանի վերջին փուլը կկայանա նոյեմբերի 18-20-ը Աբու-Դաբիի «Յաս Մարինա» մայրուղում։