UFC-ի հայ մարտիկ Արման Ծառուկյանը չի բացառում, որ կարող է ուժերը փորձել 2028 թվականին Լոս Անջելեսում կայանալիք ամառային Օլիմպիական խաղերի ըմբշամարտի մրցաշարում:

2026 թվականին Ծառուկյանը պրոֆեսիոնալ ըմբշամարտի RAF լիգայում անցկացրել է արդեն 7 գոտեմարտ՝ տոնելով նույնքան հաղթանակ: Նրա վերջին հաջողությունը գրանցվել է հուլիսի 11-ին Թբիլիսիում կայացած մրցաշարում, որտեղ նա նախատեսված ժամանակից շուտ պարտության է մատնել Ղազախստանի ներկայացուցիչ Կուատ Խամիտովին:

Անդրադառնալով հայ ըմբիշ Արսեն Հարությունյանի այն հայտարարությանը, թե ինքը պատրաստվում է մասնակցել 2028-ի Օլիմպիական խաղերին՝ Ծառուկյանը պարզաբանել է իրավիճակը․

«Ինչո՞ւ է նա նման բան ասել։ Ես ընդամենն ասել եմ՝ հնարավոր է։ Ամեն գոտեմարտ ինձ լիցքավորում և մոտիվացնում է, և ես կամաց-կամաց դառնում եմ ըմբիշ: Այնպես որ, գուցե մեկ տարուց արդեն սկսեմ գոտեմարտել իսկական ըմբիշների հետ։ Նախ պետք է փակել բոլոր հարցերը UFC-ում, որից հետո նոր կարելի է փորձել որակավորվել Օլիմպիական խաղերի համար։ Եթե կարողանամ հաղթել Ռուսաստանի կամ Հայաստանի առաջնությունում․ կտեսնենք, թե որ երկրի կազմում»,- Արման Ծառուկյանի խոսքերն է մեջբերում լրագրող Վյաչեսլավ Աբդուսալամովը։

Հիշեցնենք, որ հուլիսի 19-ի վաղ առավոտյան ԱՄՆ-ի Միլուոկի քաղաքում կայանալիք RAF 11 մրցաշարի գլխավոր իրադարձության շրջանակներում Արման Ծառուկյանը գորգ դուրս կգա ամերիկացի Քոլբի Քովինգտոնի դեմ։

Իսկ ահա հայ մարտիկի վերադարձը օկտագոն, ըստ շրջանառվող լուրերի, կկայանա սեպտեմբերի 19-ին՝ Լոս Անջելեսում անցկացվելիք UFC 331 մրցաշարում:

Միջազգային օլիմպիական կոմիտեն (ՄՕԿ) պաշտոնապես արգելել է տրանսգենդեր մարզիկներին հանդես գալ Օլիմպիական խաղերի կանանց մրցումներում։ Համապատասխան հայտարարությունը հրապարակվել է կազմակերպության պաշտոնական կայքում։

Որոշումն ուժի մեջ կմտնի 2028 թվականից։ Այդ ժամանակից սկսած՝ կանանց անհատական և թիմային մրցաշարերին կթույլատրվի մասնակցել միայն այն մարզուհիներին, որոնք գենետիկական թեստավորման միջոցով կհաստատեն իրենց կենսաբանական սեռը։ Ըստ ՄՕԿ-ի՝ գիտական տվյալների և փորձագիտական գնահատականների վրա հիմնված այս նոր քաղաքականությունը կոչված է ապահովելու մրցումների արդարությունը, անվտանգությունն ու ազնվությունը։

Կանոնակարգի համաձայն՝ SRY գենի դրական թեստ ունեցող աթլետները կզրկվեն կանանց կատեգորիայում մրցելու իրավունքից. նրանց կառաջարկվի հանդես գալ տղամարդկանց մրցաշարերում։ Բացառություն կարվի միայն անդրոգենների հանդեպ լիարժեք անզգայունության համախտանիշ (CAIS) կամ սեռական զարգացման այլ խանգարումներ ունեցող մարզուհիների համար՝ պայմանով, որ նրանք չեն ընդունում անաբոլիկ ստերոիդներ։

Կոմիտեն հստակեցնում է նաև, որ նոր կանոնները հետադարձ ուժ չունեն և չեն տարածվում սիրողական սպորտի վրա։

Հիշեցնենք, որ ՄՕԿ-ի կողմից նախապատրաստվող այս սահմանափակումների մասին դեռևս 2025 թվականի նոյեմբերին հայտնել էր բրիտանական The Times պարբերականը։ Հրատարակության աղբյուրները վկայակոչել էին ՄՕԿ-ի բժշկական և գիտական հարցերով տնօրեն Ջեյն Թորնթոնի զեկույցը, որի նախնական արդյունքները փաստում են՝ արական սեռի մարզիկների ֆիզիկական առավելությունները պահպանվում են նույնիսկ հորմոնալ թերապիա անցնելուց հետո։

Իտալիայում ընթացող Ձմեռային օլիմպիական խաղերում շարունակվում են գեղասահքի կանանց մրցումները: Ռուսաստանը ներկայացնող 18-ամյա Ադելիա Պետրոսյանն արդեն հանդես է եկել ազատ ծրագրով՝ վաստակելով 141,64 միավոր:

Հայազգի մարզուհին սառույց է դուրս եկել 20-րդ մեկնարկային համարի ներքո: Հիշեցնենք, որ երեքշաբթի կայացած կարճ ծրագրում Պետրոսյանը վաստակել էր 72,89 միավոր: Երկու ծրագրերի հանրագումարում Ադելիան ունի 214,53 միավոր և այս պահին զբաղեցնում է միջանկյալ երկրորդ հորիզոնականը: Առաջատարն ամերիկացի Էմբեր Գլենն է (214,91 միավոր):

Ազատ ծրագրի ընթացքում Պետրոսյանը փորձեց կատարել իր ծրագրի միակ «ուլտրա-սի» տարրը՝ չորս պտույտով տուլուպը, սակայն թերպտույտի պատճառով վայր ընկավ վայրէջքի ժամանակ: Չնայած դրան՝ մարզուհին հաջողությամբ կատարեց մնացած բոլոր տարրերը, իսկ պտույտներն ու քայլերի հաջորդականությունը գնահատվեցին բարդության ամենաբարձր՝ չորրորդ մակարդակով:

Մրցանակային տեղերի համար պայքարը դեռ շարունակվում է. իրենց ելույթներին են սպասում ճապոնացի մարզուհիներ Մոնե Տիբան, Կաորի Սակամոտոն, Ամի Նակային և ամերիկացի Ալիսա Լյուն:

Ադելիա Պետրոսյանը Ռուսաստանի եռակի չեմպիոն է և Ռուսաստանի Գրան պրիի եզրափակչի եռակի հաղթող:

Իտալիայում Օլիմպիական խաղերը կշարունակվեն մինչև փետրվարի 22-ը: 

Իտալիայում ընթացող Ձմեռային օլիմպիական խաղերում կայացել է կանանց գեղասահքի կարճ ծրագիրը։ Ռուսաստանի գեղասահքի գործող չեմպիոն Ադելիա Պետրոսյանը ելույթից հետո զբաղեցնում է ընթացիկ 5-րդ հորիզոնականը։

18-ամյա մարզուհին սառույց է դուրս եկել երկրորդ համարի ներքո և մաքուր կատարել իր ծրագիրը՝ մրցավարներից ստանալով 72,89 միավոր։

Մրցումային առաջին օրվանից հետո առաջատարը ճապոնուհի Ամի Նակաին է (78,71): Երկրորդ տեղում է Ճապոնիայի մեկ այլ ներկայացուցիչ Կաորի Սակամոտոն (77,23), իսկ լավագույն եռյակը եզրափակում է ամերիկուհի Ալիսա Լյուն (76,59):

Հիշեցնենք, որ Ադելիա Պետրոսյանը Ռուսաստանի եռակի չեմպիոն է և Ռուսաստանի Գրան պրիի եզրափակիչների եռակի հաղթող։

Գեղասահորդուհիներն իրենց ազատ ծրագրերը կներկայացնեն հինգշաբթի՝ փետրվարի 19-ին։ Իտալիայում անցկացվող Օլիմպիական խաղերը կավարտվեն փետրվարի 22-ին։

Գեղասահքի Ռուսաստանի չեմպիոն Ադելիա Պետրոսյանը Իտալիայում ընթացող 2026 թվականի Օլիմպիական խաղերի կարճ ծրագրում վաստակել է 72,89 միավոր։

Երեքշաբթի երեկոյան ռուսաստանցի մարզուհին սառույց է դուրս եկել երկրորդ համարի ներքո և անթերի կատարել իր ելույթը։

Գեղասահորդուհիներն իրենց ազատ ծրագրերը կներկայացնեն փետրվարի 19-ին։

Հիշեցնենք, որ Իտալիայում անցկացվող Օլիմպիական խաղերը կշարունակվեն մինչև փետրվարի 22-ը։

Այսօր՝ փետրվարի 16-ին, Միլան-Կորտինայում ընթացող 25-րդ Ձմեռային օլիմպիական խաղերի 10-րդ մրցումային օրն է։ Հայաստանի հավաքականի համար այն խոստանում է լինել չափազանց կարևոր և լարված, քանի որ պայքարի են դուրս գալիս մեր երկրի ներկայացուցիչները երկու տարբեր մարզաձևերում։

Օրվա մեկնարկը կտրվի լեռնադահուկային սպորտով։ Երևանի ժամանակով 13:00-ին մեկնարկում է տղամարդկանց սլալոմի մրցաշարը, որտեղ Հայաստանը կներկայացնի Հարություն Հարությունյանը։ Հիշեցնենք, որ մեր լեռնադահուկորդն արդեն մասնակցել էր հսկա սլալոմին՝ զբաղեցնելով 59-րդ հորիզոնականը։

Երեկոյան ուշադրության կենտրոնում գեղասահքն է։ Երևանի ժամանակով 23:00-ին սառույց դուրս կգան սպորտային զույգերը՝ ներկայացնելու ազատ ծրագիրը։ Հայաստանը ներկայացնող Կարինա Ակոպովա / Նիկիտա Ռախմանին զույգը, որը վստահ ելույթ էր ունեցել կարճ ծրագրում, կփորձի բարելավել դիրքերը և պայքարել բարձր տեղերի համար։

Իտալիայում ընթացող 25-րդ ձմեռային Օլիմպիական խաղերում պայքարի մեջ մտավ Հայաստանի հերթական ներկայացուցիչը։ Լեռնադահուկորդ Հարություն Հարությունյանն ուժերը փորձեց հսկա ոլորավայրէջք մրցաձևում։

Մեկնարկին դուրս եկած 81 մարզիկների պայքարում հայ դահուկորդը գրանցեց 1:28.91 արդյունք։ Այս ցուցանիշով Հարությունյանը զբաղեցրեց 63-րդ հորիզոնականը։

Քանի որ կանոնակարգի համաձայն երկրորդ փուլի ուղեգիր էին նվաճում միայն լավագույն 30 արդյունքը գրանցած մարզիկները, Հարությունյանը չկարողացավ շարունակել պայքարը այս մրցաձևում։

Սակայն նրա օլիմպիական ելույթներն այսքանով չեն ավարտվում. փետրվարի 16-ին մեր մարզիկը հանդես կգա նաև ոլորավայրէջքի մրցումներում։

Իտալիայում ընթացող 25-րդ ձմեռային Օլիմպիական խաղերում փետրվարի 13-ի մրցումային օրը Հայաստանը կունենա մեկ մասնակից։

Մեր երկրի առաջատար դահուկավազորդ Միքայել Միքայելյանն իր ուժերը կչափի տղամարդկանց 10 կմ ազատ ոճով (ինտերվալային մեկնարկով) մրցավազքում։ Նախատեսված է, որ պայքարը կսկսվի Երևանի ժամանակով ուղիղ 14:45-ին։

Հիշեցնենք, որ ընթացիկ Օլիմպիական խաղերում սա Միքայելյանի երկրորդ մեկնարկն է։ Ավելի վաղ հայ մարզիկը հասցրել էր ուժերը փորձել նաև 20 կմ սկիաթլոնում և զբաղեցրել 48-րդ տեղը։

Իտալիայում ընթացող Ձմեռային օլիմպիական խաղերում այսօր պայքարի դուրս եկան դահուկորդուհիները։ Կանանց 10 կմ ազատ ոճի մրցատարածությունում Հայաստանը ներկայացնում էր Կատյա Գալստյանը։

​111 մասնակիցների պայքարում հայ մարզուհին գրանցել է 28:33.7 արդյունք՝ զբաղեցնելով 82-րդ հորիզոնականը։

​Գալստյանին հաջողվել է առաջ անցնել Թուրքիայի, Հունաստանի, Սերբիայի, Մոլդովայի, Լատվիայի և Արգենտինայի ներկայացուցիչներից։ Հիշեցնենք, որ ավելի վաղ կայացած սկիաթլոնի մրցումներում Գալստյանը չէր կարողացել հատել եզրագիծը, սակայն այս անգամ բարելավեց դիրքերը։

​Օլիմպիական չեմպիոնի կոչումը նվաճել է շվեդ Ֆրիդա Կարլսոնը, ով տարածությունը հաղթահարել է 22:49.2 ժամանակահատվածում՝ ձևակերպելով «ոսկե դուբլ» (նա հաղթել էր նաև սկիաթլոնում):

​Մրցանակային եռյակը.
​Ֆրիդա Կարլսոն (Շվեդիա) — 22:49.2
​Էբբա Անդերսոն (Շվեդիա) — 23:35.8
​Ջեսի Դիգինս (ԱՄՆ) — 23:38.9

Իտալիայի Միլան և Կորտինա դ’Ամպեցո քաղաքներում ընթացող 25-րդ ձմեռային Օլիմպիական խաղերում Հայաստանի ներկայացուցիչ, դահուկորդ Միքայել Միքայելյանն անցկացրեց իր առաջին մրցելույթը։

​Հայ մարզիկը ուժերը չափեց 20 կմ սկիաթլոն մրցաձևում (10 կմ դասական և 10 կմ ազատ ոճ): Մրցուղի դուրս եկած 73 դահուկորդների պայքարում Միքայելյանը գրանցեց 51:06.8 արդյունք՝ զբաղեցնելով 48-րդ հորիզոնականը։

​Օլիմպիական չեմպիոնի կոչումը նվաճեց նորվեգացի լեգենդար դահուկորդ Յոհանես Կլեբոն, որի համար սա օլիմպիական 6-րդ ոսկե մեդալն էր կարիերայում։

Հիշեցնենք, որ ավելի վաղ կանանց նույն մրցաձևում Հայաստանի պատվիրակ Կատյա Գալստյանը դուրս էր մնացել պայքարից՝ չհատելով եզրագիծը։