Աֆրիկայի Ազգերի լիգայի որակավորման փուլի առաջին տուրում Մոզամբիկի հավաքականը ոչ-ոքի է ավարտել հանդիպումը Սենեգալի թիմի հետ՝ 1-1։

Նիկոլաս Ջեքսոնի գոլին տանտերերը պատասխանել են Կատամոյի գոլով, որին օգնեց աչքի ընկնել «Փյունիկի» ֆուտբոլիստ Վիտին՝ դառնալով գոլային փոխանցման հեղինակ։

Հանդիպման գոլերը՝ ԱՅՍՏԵՂ։

Այս հանդիպմանը Մոզամբիկի հավաքականի կազմում ամբողջությամ մասնակցել է նաև «Արարատ-Արմենիայի» ֆուտբոլիստ Բրունո Վիլսոնը, ով նորամուտը նշեց հավաքականում։

Վիտին փոխարինվել է 66-րդ րոպեին։

Մոզամբիկի հավաքականը հաջորդ հանդիպումը կանցկացնի սեպտեմբերի 29-ին․ մրցակիցը Սուդանի հավաքականն է։

ՀՖՖ Մրցումների բաժինը պաշտոնապես հաստատել է 2026-2027 խաղաշրջանի Հայաստանի Գավաթի խաղարկության 1/8 եզրափակիչի հանդիպումների անցկացման օրերն ու ժամերը։

Ինչպես հայտնում է ՀՖՖ մամուլի ծառայությունը, գավաթային այս փուլի հանդիպումները կկայանան հոկտեմբերի 25-ից 29-ը ընկած ժամանակահատվածում։

Ստորև ներկայացնում ենք 1/8 եզրափակիչի ամբողջական խաղացանկը ըստ օրերի՝

25 հոկտեմբերի

13:00. «Միկա» — «Ավշար Արարատ» (Երևան, ՄՁՀՀԿ)

26 հոկտեմբերի

15:30. «Վան» — «Գանձասար» (Չարենցավան, Քաղաքային մարզադաշտ)

27 հոկտեմբերի

19:00. «Փյունիկ» — «Արարատ» (Երևան, ՀՖՖ Տեխնիկական կենտրոն/Ֆուտբոլի ակադեմիա)

19:00. «Ուրարտու» — «Անդրանիկ» (Երևան, «Ուրարտու-1» մարզադաշտ)

28 հոկտեմբերի

15:30. «Ալաշկերտ» — ԲԿՄԱ (Արմավիր, Հ. Տոնոյանի անվան Քաղաքային մարզադաշտ)

15:30. «Լեռնային Արցախ» — «Շիրակ» (Արարատ, «Արարատ Այգ»)

29 հոկտեմբերի

15:30. «Օլիմպիա» — «Արարատ-Արմենիա» (Աշտարակ, «Քասախի մարզիկ»)

19:00. «Նոա» — «Սյունիք» (Աբովյան, Վ. Թովմասյանի անվան մարզահամալիր)

Հայաստանի ազգային հավաքականի գլխավոր մարզիչ Եղիշե Մելիքյանը «Ժողովուրդ» օրաթերթին տված հարցազրույցում խոսել է հայկական ֆուտբոլի հասցեին հնչող մշտական քննադատությունների, ենթակառուցվածքների սուր պակասի, ինչպես նաև սպորտի զարգացման գործում պետական ծրագրերի և աջակցության կենսական անհրաժեշտության մասին։

— Պարոն Մելիքյան, հայկական ֆուտբոլը, թերևս «Արարատ-73»-ից հետո, մշտապես քննադատության կենտրոնում է։ Շատերն անգամ ասում են՝ լավ կլինի ֆուտբոլի փոխարեն այլ մարզաձևով զբաղվենք։ Ինչպե՞ս եք վերաբերվում նման մոտեցմանը, և ինչպե՞ս եք տեսնում խնդիրների լուծումն ու հայկական ֆուտբոլի ապագան։

— Նման բան ասողները պարզապես հարցին մակերեսորեն են մոտենում և չեն խորանում իրական խնդիրների մեջ։ Եթե խորանանք, կհասկանանք, որ մեր երկիրը 30 տարի պատերազմի մեջ է եղել, և ֆուտբոլը երբեք չի ներառվել պետության զարգացման ծրագրերում։ Իսկ առանց պետական ծրագրի հայկական ֆուտբոլն առաջ չի գնալու։ Այս վիճակով մենք կարող ենք պարզապես մեկ-երկու խաղ հաղթանակ «փախցնել», բայց կայուն զարգացում չի լինի։ Մենք ունենք ընդամենը մեկ ազգային մարզադաշտ, այն էլ՝ հարյուր տարեկան։

Հաճախ ենք մեզ համեմատում այլ երկրների հետ. օրինակ՝ նայեք, թե Վրաստանում պետությունը որքան նոր մարզադաշտեր է կառուցել։ Իսկ մենք չունենք բավարար ենթակառուցվածքներ, իսկ նորմալ պայմաններ ստեղծելը մեծ ֆինանսների հետ է կապված։ Փառք Աստծո, որ կա «Նոան», որը ստադիոն է կառուցում և մեծ ներդրումներ է անում, բայց միայն մեկ-երկու անհատի հաշվին հայկական ֆուտբոլը չի կարող գոյատևել։

— Այսինքն՝ աջակցությունն առաջին հերթին պետությունի՞ց եք ակնկալում։

— Միանշանակ։ Մեր պետությունը, կառավարությունը, նախարարները պետք է ոչ միայն սիրեն ֆուտբոլը, այլև այն ներառեն պետական ծրագրերի մեջ։ Ես մտածում եմ՝ եթե Աստված տա և մենք մի քանի խաղ անընդմեջ հաղթենք, ես անձամբ կգնամ և կխնդրեմ, կբացատրեմ, որ մեր ժողովուրդն այսօր ուրախության, դրական տրամադրության մեծ կարիք ունի, իսկ ֆուտբոլը դա տալիս է։ Պետությունը պետք է հոգ տանի իր ժողովրդի տրամադրության մասին։

Ես ապրում եմ Օպերայի հարևանությամբ և հաճախ եմ տեսնում, որ համերգներ ու պարային միջոցառումներ են կազմակերպվում։ Ես հասկանում եմ դրա նպատակը՝ փորձում են բարձրացնել մարդկանց տրամադրությունը, ինչը շատ լավ է։ Բայց ֆուտբոլը դա անում է տասնապատիկ ավելի. այն հսկայական էմոցիաներ է պարգևում։

Ես հասկանում եմ նաև, որ այս պահին գուցե մոտիվացիա չունեն աջակցելու, քանի որ արդյունք չեն տեսնում։ Բայց մենք էլ չենք կարող առանց պայմանների անընդհատ հաղթել, որպեսզի նոր միայն գնանք ու աջակցություն խնդրենք։ Նախ ներդրում են անում, հետո՝ արդյունք ստանում։ Իսկ մեզ մոտ հիմա ներդրում չկա, բայց պահանջը շատ ուժեղ է։ Կտեսնեք՝ սեպտեմբերի 25-ին և 28-ին ինչպես են մեզնից արդյունք պահանջելու, բայց թե ինչպես հասնել այդ արդյունքին այս պայմաններում՝ շատ քչերն են մտածում։

Հիշեցնենք, որ Ազգերի լիգայի C2 խմբի շրջանակում Հայաստանի ազգային հավաքականը սեպտեմբերի 25-ին կընդունի Լատվիայի, իսկ սեպտեմբերի 28-ին՝ Չեռնոգորիայի հավաքականներին, որից հետո արտագնա հանդիպումներ կանցկացնի Կիպրոսի ու Չեռնոգորիայի ընտրանիների հետ։

Հայաստանի ազգային հավաքականի գլխավոր մարզիչ Եղիշե Մելիքյանը «Ժողովուրդ»-ին տված հարցազրույցի ժամանակ խոսել է Պորտուգալիայի դեմ անցկացրած հանդիպումից քաղած դասերի, Կրիշտիանու Ռոնալդուի գործոնի, երկրպագուների աջակցության և որոշ ակումբների կողմից հավաքականի թեկնածուներին խաղային պրակտիկայից զրկելու խնդիրների մասին։

— Պարոն Մելիքյան, կրկին վերադառնալով Պորտուգալիայի հետ խաղին. ի՞նչ դասեր քաղեցիք և ի՞նչ պլաններ փոխեցիք, որոնք կիրառելու եք Լատվիայի դեմ խաղում կամ ընդհանրապես այս մրցաշարում։

— Պորտուգալիայի հետ խաղից հետո ոչ մի խաղային պլան չեմ փոխել։ Ես լավ գիտեի, թե ում դեմ էինք դուրս գալիս խաղադաշտ։ Հասկանում էի, որ մեր հավաքականն առայժմ պատրաստ չէ նման հզոր մրցակցի հետ պայքարի, բայց մենք պետք է գնայինք ու դիմանայինք։ Դեռ շատ վաղ է նման մակարդակի հավաքականների հետ հավասար մրցակցության մեջ մտնելու համար։ Սակայն այդ հանդիպումից մենք մեծ փորձ ձեռք բերեցինք։ Այն սթրեսը, որ մենք ապրեցինք, մեզ այլևս ոչնչով չի վախեցնի։ Ընդունում եմ՝ շատ վատ ու ցավալի հաշիվ գրանցվեց, բայց դա փորձ էր թե՛ թիմի, թե՛ ինձ համար. որպես ազգային հավաքականի մարզիչ դա ընդամենը իմ չորրորդ կամ հինգերորդ խաղն էր։ Այո, ցավալի էր, բայց դա մեզ անպայման կօգնի հետագայում։

— Երկրպագուներից բացի, Պորտուգալիայի հետ խաղի ժամանակ մարզադաշտը լեփ-լեցուն էր, և կարծես հիմնական գործոնը Կրիշտիանու Ռոնալդուի ներկայությունն էր։ Հոգեբանորեն ճնշո՞ւմ է արդյոք, երբ սեփական երկրպագուները հակառակորդի աստղին են երկրպագում կամ մարզադաշտ են եկել զուտ նրա համար։

— Գիտեք, ես չեմ կարող մեղադրել երկրպագուներին, որովհետև համաշխարհային մեծության աստղ էր ժամանել։ Մենք պարզապես պետք է մեր խաղով, մեր մոտեցումով ու աշխատանքով գրավենք երկրպագուի սիրտը։ Մենք ունենք հավատարիմ երկրպագուներ, որոնք քիչ չեն և ամենադժվար պահին մեր կողքին են։ Երբ խաղն ավարտվեց 0:5 հաշվով, ես տեսա մեր երկրպագուներին. նրանք կանգնած էին ու ընդունեցին այդ ծանր պարտությունը մեզ հետ միասին։ Իսկ նրանք, ովքեր մեր կողքին չեն, մենք ինքներս ենք դրանում մեղավոր։ Պետք է մեր խաղով ստիպենք, որ նրանք մեր կողքին լինեն, և մենք աշխատելու ենք այդ ուղղությամբ։

Ուզում եմ խոսել նաև մեր ակումբների մասին։ Մի ակումբ կա, որի անունը հիմա չեմ տա, որտեղ հանդես է գալիս մի ֆուտբոլիստ, որին շատ եմ ուզում հրավիրել հավաքական։ Բայց ակումբը նրան խաղային պրակտիկա չի տալիս, խաղադաշտ դուրս չի բերում։ Արդյունքում տուժում է ազգային թիմը։ Այստեղ լրագրողներն ու երկրպագուները պետք է ներգրավվեն և պահանջեն, որ այդ ֆուտբոլիստները խաղան։ Ես չեմ կարող անձամբ բոլոր ակումբների հետ հարցեր պարզել։ Ինչո՞ւ եք լռում այդ մասին. դուք բոլորդ կարող եք օգնել հավաքականին։

Սա հենց այնպես չեմ ասում, իրական ու դրական օրինակներ ունենք։ Երբ ես աշխատում էի «Փյունիկում», ակումբի այն ժամանակվա նախագահ Արթուր Սողոմոնյանն իմ առջև խնդիր էր դրել ավելի հաճախ օգտագործել հայ ֆուտբոլիստներին, որպեսզի հետագայում նրանք կարողանան խաղալ հավաքականում։ Նա չէր միջամտում իմ աշխատանքին, բայց դա նրա սկզբունքային ցանկությունն էր, և ես այն միշտ հաշվի էի առնում։ Անգամ այն ժամանակ, երբ ֆեդերացիայի հետ լուրջ կոնֆլիկտներ ունեի, փորձում էի հնարավորինս շատ ֆուտբոլիստներ ուղարկել հավաքական։ Անկախ տարաձայնություններից՝ բոլորը պետք է օգնեն ազգային թիմին։ Գուցե հիմա ակումբները որոշ անձնական պատճառներ կամ կոնֆլիկտներ ունեն, չգիտեմ՝ ինչու են այդպես վարվում, բայց չի կարելի այդ ամենը կապել հավաքականի շահերի հետ։

Հիշեցնենք, որ Ազգերի լիգայի C2 խմբի շրջանակում Հայաստանի ազգային հավաքականը սեպտեմբերի 25-ին կընդունի Լատվիայի, իսկ սեպտեմբերի 28-ին՝ Չեռնոգորիայի հավաքականներին, որից հետո արտագնա հանդիպումներ կանցկացնի Կիպրոսի ու Չեռնոգորիայի ընտրանիների հետ։

Հայաստանի Պրեմիեր լիգայի 8-րդ տուրի վերջին խաղում «Շիրակը» սեփական հարկի տակ ընդունեց գործող չեմպիոն «Արարատ-Արմենիային»։

Խաղի հաշիվը բացվեց 18-րդ րոպեին, երբ անզգուշության արդյունքում սեփական դարպասը գրավեց գյումրեցիների 21-ամյա կիսապաշտպան Սուրեն Ծառուկյանը։ Ընդամենը հինգ րոպե անց Հայաստանի ազգային հավաքականի պաշտպան Խուլիո Բուենոն կրկնապատկեց երևանյան թիմի առավելությունը, իսկ 33-րդ րոպեին բրազիլացի հարձակվող Ֆրանսա Կառլոսը հաշիվը դարձրեց խոշոր՝ 3:0։

Երկրորդ կեսում «Շիրակին» հաջողվեց խփել միայն հեղինակության գնդակը. 74-րդ րոպեին աչքի ընկավ 27-ամյա կիսապաշտպան Ռուդիկ Մկրտչյանը։

Այս հաղթանակից հետո «Արարատ-Արմենիան» վաստակեց 19 միավոր և շարունակում է զբաղեցնել մրցաշարային աղյուսակի երկրորդ հորիզոնականը՝ առաջատար «Նոայից» հետ մնալով 5 միավորով։ «Շիրակը» 10 միավորով ընթանում է 7-րդ տեղում։

9-րդ տուրում «Արարատ-Արմենիան» կհանդիպի «Ալաշկերտին», իսկ «Շիրակը»՝ «Սյունիքին»։

Տեսանյութը՝ ստորև․

Մրցաշարային աղյուսակն այս պահին

Ֆուտբոլի Հայաստանի Պրեմիեր լիգայի 2026/27 մրցաշրջանի 8-րդ տուրում «Սյունիքը» Սիսիանի քաղաքային մարզադաշտում նվազագույն հաշվով զիջեց Երևանի «Արարատին» (0-1):

Առաջին խաղակեսում դարպասի գրավումներ չարձանագրվեցին։ Հանդիպման միակ և հաղթական գոլը երկրորդ խաղակեսում՝ 77-րդ րոպեին, հեղինակեց Բակայոկոն։

Նշենք, որ «Սյունիքը» կայացած 8 տուրերից հետո շարունակում է մնալ միակ ակումբը ՀՊԼ-ի ընթացիկ մրցաշրջանում, որը դեռ հաղթանակ չունի իր ակտիվում։

Այս խաղից հետո Երևանի «Արարատը» վաստակած միավորների քանակը հասցրեց 9-ի և զբաղեցնում է մրցաշարային աղյուսակի 8-րդ հորիզոնականը, իսկ «Սյունիքը» 2 միավորով եզրափակում է մրցաշարային աղյուսակը՝ գտնվելով 12-րդ տեղում։

Հանդիպման տեսագրությունը․

ՀՊԼ-ի մրցաշարային աղյուսակը՝ ստորև․

Հայաստանի գործող գավաթակիր և սուպերգավաթակիր «Նոա» ֆուտբոլային ակումբը պաշտոնապես բացել է իր նոր մանկապատանեկան ֆուտբոլի կենտրոնը։ Բացման հանդիսավոր արարողությանը ներկա է գտնվել նաև ՀՀ վարչապետ Նիկոլ Փաշինյանը։

Վարչապետը ակումբի նախագահ Վարդգես Վարդանյանի ուղեկցությամբ շրջայց է կատարել նորաբաց մարզաբազայում՝ ծանոթանալով իրականացված խոշորամասշտաբ ենթակառուցվածքային աշխատանքներին և երևանյան ակումբի զարգացման հետագա ծրագրերին։

Ամիսների հետևողական աշխատանքի արդյունքում վերակառուցված այս կենտրոնն ի զորու է ընդունել մինչև 1500 երեխայի և պատանու՝ հնարավորություն տալով նրանց մարզվել և կատարելագործել իրենց ֆուտբոլային հմտությունները արդիական պայմաններում։ Նախագծի շրջանակում ամբողջությամբ վերափոխվել են շենքի ներքին տարածքները, իրականացվել են ամրացման և սեյսմակայունության բարձրացման լուրջ աշխատանքներ։ Կենտրոնում արդեն իսկ կահավորվել է 15 ժամանակակից հանդերձարան, ստեղծվել են ուսումնական և վերլուծական հատուկ կենտրոն, մրցավարների սենյակներ, ընդարձակ սպասասրահ, ինչպես նաև մարզումների ու կրթական գործունեության համար անհրաժեշտ այլ ենթակառուցվածքներ։

Նորաբաց մարզաբազայում են մարզվելու «Նոայի» մանկապատանեկան վճարովի և անվճար խմբերում ընդգրկված բոլոր երեխաներն ու պատանիները, ինչպես նաև ակումբի երկրորդ թիմը։

Ակումբի ղեկավարության գլխավոր նպատակն է սերունդների համար ստեղծել լավագույն հնարավորությունները՝ պրոֆեսիոնալ ֆուտբոլային ճանապարհն անցնելու և մեծ հաջողությունների հասնելու հենց Հայաստանում։

Ֆուտբոլի Հայաստանի Պրեմիեր լիգայի 2026/27 մրցաշրջանի 8-րդ տուրում ԲԿՄԱ-ն ՀՖՖ Տեխնիկական կենտրոն/Ֆուտբոլի ակադեմիայում ընդունել էր «Սարդարապատին»։ Հանդիպումն ավարտվեց մարտական ոչ-ոքիով՝ 1-1 հաշվով։

Հանդիպման հիմնական ժամանակում դարպասի գրավումներ չարձանագրվեցին, սակայն 71-րդ րոպեին տանտերերը մնացին 10 հոգով. տուգանային հրապարակից դուրս ձեռքով խաղալու համար ուղիղ կարմիր քարտով հեռացվեց բանակայինների դարպասապահ Հայկ Ղազարյանը։

Իսկական դրաման ծավալվեց մրցավարի կողմից ավելացված ժամանակում: Նախ 90+5-րդ րոպեին տուգանայինի խաղարկման արդյունքում հյուրերը գրավեցին սեփական դարպասը՝ առաջ մղելով ԲԿՄԱ-ին: Այնուամենայնիվ, «Սարդարապատին» հաջողվեց փրկել խաղը. 90+8-րդ րոպեին Լևոն Վարդանյանը խփեց պատասխան գոլը՝ վերականգնելով հավասարությունը և ձևակերպելով հանդիպման վերջնական արդյունքը։

Այս ոչ-ոքիից հետո ԲԿՄԱ-ն վաստակած միավորների քանակը հասցրեց 8-ի և զբաղեցնում է մրցաշարային աղյուսակի 8-րդ հորիզոնականը։ «Սարդարապատը» 9 խաղից հետո ունի 12 միավոր և գտնվում է 5-րդ տեղում։

Հանդիպման տեսագրությունը․

ՀՊԼ-ի մրցաշարային աղյուսակը՝ ստորև․

Հայաստանի Բարձրագույն խմբի 8-րդ տուրում «Ալաշկերտը» Աբովյանի Վահագն Թումասյանի անվան մարզահամալիրում ընդունեց «Փյունիկին»։

Խաղի հաշիվն արդեն 5-րդ րոպեին բացեց «Փյունիկի» ֆուտբոլիստ Իասոնաս Պիկիսը։ 21-րդ րոպեին Վիտինես Չիմոյո Ժոաո Կուեմբոն կրկնապատկեց հյուրերի առավելությունը։ Սակայն առաջին խաղակեսի ավարտին՝ 43-րդ րոպեին, «Ալաշկերտին» հաջողվեց կրճատել հաշվի տարբերությունը. աչքի ընկավ Մուիս Ադեբայո Հուսեյնը։

Երկրորդ խաղակեսում դաշտի տերերին հաջողվեց բեկել հանդիպման ընթացքը։ 75-րդ րոպեին Կարեն Նալբանդյանը 11-մետրանոց հարվածով վերականգնեց հաշվի հավասարությունը։ Ընդամենը րոպեներ անց՝ 84-րդ րոպեին, Դոմի Ժորես Մասումոն արդեն առաջ մղեց «Ալաշկերտին»։ Այնուամենայնիվ, «Փյունիկը» կարողացավ խուսափել պարտությունից. մրցավարի կողմից ավելացված ժամանակում՝ 90+6-րդ րոպեին, Իասոնաս Պիկիսը դարձավ դուբլի հեղինակ և ձևակերպեց հանդիպման վերջնական հաշիվը՝ 3-3։

«Ալաշկերտը» 15 միավորով 4-րդ տեղում է: «Փյունիկը» 21 միավորով 2-րդն է:

Հաջորդ տուրում «Ալաշկերտը» կհյուրընկալվի «Արարատ-Արմենիային», իսկ «Փյունիկը» սեփական հարկի տակ կմրցի ԲԿՄԱ-ի հետ։

Տեսանյութը՝ ստորև․

Մրցաշարային աղյուսակն այս պահին

Հայաստանի գործող գավաթակիր ու սուպերգավաթակիր «Նոան» պատմական ռեկորդ է սահմանել Ֆուտբոլի Հայաստանի Պրեմիեր լիգայի 2026/27 մրցաշրջանում՝ դառնալով առաջին թիմը, որը մեկնարկային 8 խաղերում տարել է 8 անընդմեջ հաղթանակ: 

​Նախկինում Հայաստանի առաջնությունների պատմության մեջ երբևէ որևէ այլ թիմի չէր հաջողվել նման արդյունք գրանցել։ Ընդ որում, երևանյան թիմն իր հաղթանակներից 6-ը տարել է «չոր» հաշվով՝ սեփական դարպասը պահելով անառիկ։

​Այս պատմական ցուցանիշը վերջնականապես ձևակերպվեց ՀՊԼ-ի 8-րդ տուրում, երբ «Նոան» Աբովյանի Վահագն Թումասյանի անվան մարզահամալիրում երկու անպատասխան գնդակ ուղարկեց Չարենցավանի «Վանի» դարպասը (2-0)։ Հանդիպման 66-րդ րոպեին հաշիվը բացեց Մարկո Լազետիչը, իսկ ընդամենը 9 րոպե անց՝ 75-րդ րոպեին, հենց նրա փոխանցումից հետո հաշիվը կրկնապատկեց և խաղի վերջակետը դրեց երևանյան թիմի պատմության լավագույն ռմբարկու Էլդեր Ֆերեյրան։

​Այս հաղթանակից հետո երևանյան ակումբը վաստակեց 24 միավոր և շարունակում է վստահորեն ու միանձնյա գլխավորել մրցաշարային աղյուսակը: