Պորտուգալացի ֆուտբոլիստ Հելդեր Ֆերեյրան կշարունակի ելույթները Երևանի «Նոայի» կազմում:

Ինչպես հայտնում է ակումբի մամուլի ծառայությունը, կողմերը երկարաձգել են գործող պայմանագրի ժամկետը։ Նոր համաձայնագիրը կնքվել է 2+1 ձևաչափով։

Հիշեցնենք, որ Ֆերեյրան հայկական ակումբին է միացել 2024 թվականի ամռանը։ Այս ընթացքում պորտուգալացին «Նոայի» մարզաշապիկով անցկացրել է 88 հանդիպում՝ դառնալով 27 գոլի և 26 գոլային փոխանցման հեղինակ։

«Արարատ-Արմենիան» հայտնում է նոր համալրման մասին։ Երևանյան թիմին է միացել 29-ամյա պորտուգալացի հարձակվողական ոճի կիսապաշտպան Բերնարդու Օլիվեիրան։

Ինչպես տեղեկացնում է ակումբի մամուլի ծառայությունը, իր կարիերայի ընթացքում պորտուգալացի ֆուտբոլիստը հանդես է եկել հայրենիքը ներկայացնող մի շարք թիմերում։ Բեննիի նախորդ ակումբը եղել է Անգոլայի առաջնությունում հանդես եկող «Պետրո Լուանդան»։

Հիշեցնենք, որ վաղը՝ օգոստոսի 4-ին, «Արարատ-Արմենիան» կարևոր հանդիպում կանցկացնի եվրագավաթներում։ ՈւԵՖԱ-ի Չեմպիոնների լիգայի որակավորման երրորդ փուլի «Արարատ-Արմենիա» — «Ցելյե» առաջին դիմակայությունը կմեկնարկի ժամը 20։00-ին։ Հանդիպումը կցուցադրվի Առաջին ալիքի ուղիղ եթերով։

Հայաստանի Բարձրագույն խմբի 2026/27թթ․ մրցաշրջանի մեկնարկային տուրը եզրափակվեց գոլառատ և դիտարժան դիմակայությամբ: Անդրանիկ տուրի վերջին խաղում «Ալաշկերտը» Երևանի ֆուտբոլի ակադեմիայում ուժերը չափեց «Արարատի» հետ և վստահ հաղթանակ տոնեց՝ 3:0 հաշվով։

Առաջին խաղակեսում երկրպագուները գոլեր չտեսան, սակայն ընդմիջումից հետո դաշտի տերերը սկսեցին գործել անկասելի: Հանդիպման հաշիվը բացվեց 53-րդ րոպեին. Յուրա Մահտեսյանի նշանակած 11 մետրանոցն անվրեպ իրացրեց Կարեն Նալբանդյանը՝ առաջ մղելով ալաշկերտցիներին:

Խաղավերջում փայլեց Դոմի Մասումուն՝ դառնալով արագ դուբլի հեղինակ։ Նա աչքի ընկավ 75-րդ և 79-րդ րոպեներին՝ վերջնականապես կոտրելով հյուրերի դիմադրությունն ու դնելով այս դիմակայության վերջակետը:

Այս տպավորիչ հաղթանակից հետո «Ալաշկերտը» միացավ առաջատարների խմբին։ Մեկնարկային տուրից հետո աղյուսակն ունի հետևյալ տեսքը.

• 3-ական միավոր ունեն՝ «Ալաշկերտը», «Սարդարապատը», «Նոան» և «Արարատ-Արմենիան»։
• 1-ական միավոր են վաստակել՝ «Փյունիկը», «Ուրարտուն», ԲԿՄԱ-ն և «Շիրակը»։
• Միավոր չունեն՝ «Գանձասարը», «Վանը», «Արարատը» և «Սյունիքը»:

Տեսանյութը՝ ստորև․

Մրցաշարային աղյուսակն այս պահին

Հայաստանի Պրեմիեր լիգայի 2026/27 մրցաշրջանի մեկնարկային տուրում «Փյունիկն» արտագնա խաղում ոչ-ոքի գրանցեց «Ուրարտուի» հետ։

Հանդիպումն ավարտվեց 2-2 հաշվով․ հյուրերի կազմում գոլերի հեղինակ դարձան Իման Գրիֆիթը (7′)  և Գևորգ Տարախչյանը (69′), տանտերերի կազմում դուբլ գրանցեց Միքայել Միրզոյանը՝ աչքի ընկնելով ավելացված րոպեներին։

Հանդիպման տեսանյութը՝ ստորև․

Հայաստանի Պրեմիեր լիգայի 2026/27 մրցաշրջանի մեկնարկային տուրում առաջնության գործող փոխչեմպիոն «Նոան» սեփական հարկի տակ հաղթեց ՀՊԼ-ի նորեկ «Սյունիքին»։

Հանդիպումն ավարտվեց 3-0 հաշվով․ գոլերի հեղինակ դարձան Կալիֆալա Դումբիան, Մարկո Լազետիչը և Ալբերտ Գարեգինյանը։

Հայաստանի Պրեմիեր լիգայի 2026/27թթ․ մրցաշրջանը մեկնարկել է դիտարժան և արտասովոր իրադարձություններով լի հանդիպումով։ Առաջին տուրի երրորդ խաղի շրջանակում «Գանձասարը» Երևանի «Ջունիոր սպորտ» մարզադաշտում հյուրընկալել էր երկրի գործող չեմպիոն «Արարատ-Արմենիային»։

Գոլառատ և լարված պայքարում հաջողությունն ուղեկցեց չեմպիոններին. «Արարատ-Արմենիան» կարողացավ առավելության հասնել մրցակցի նկատմամբ՝ տոնելով հաղթանակ 4:3 հաշվով։

Հատկանշական է, որ հանդիպումն աչքի ընկավ ոչ միայն գրանցված 7 գնդակով, այլև անսպասելի միջադեպով. առաջին խաղակեսում՝ 38-րդ րոպեին, մարզադաշտի հոսանքազրկման պատճառով հանդիպումը որոշ ժամանակով դադարեցվել է։

Այս ծանր, բայց կարևոր հաղթանակից հետո «Արարատ-Արմենիան» իր ակտիվում գրանցեց առաջին 3 միավորը և մրցաշարային աղյուսակի առաջին հորիզոնականը ներկայումս կիսում է «Սարդարապատի» հետ։

Հանդիպման տեսանյութը՝ ստորև․

Մրցաշարային աղյուսակն այս պահին

Հայաստանի գործող փոխչեմպիոն, գավաթակիր և սուպերգավաթակիր «Նոան» նոր մրցաշրջանի մեկնարկին ընդառաջ երկրորդ պաշտոնական հայտարարությունն է տարածել՝ այս անգամ անդրադառնալով Հայաստանի Պրեմիեր լիգայի հեռարձակման և տիտղոսային հովանավորի բացակայության խնդիրներին։

Ակումբն անընդունելի է համարում այն փաստը, որ առաջնությունը մեկնարկել է առանց պաշտոնական հեռարձակողի և նույնիսկ առանց մեկնաբանների՝ նշելով, որ դա ուղղակիորեն հարվածում է ակումբների հովանավորչական պարտավորություններին և VAR համակարգի աշխատանքին։

Ներկայացնում ենք ակումբի հայտարարությունն ամբողջությամբ.

«Սիրելի ֆուտբոլասերներ,

Այսօր գրությամբ դիմել էինք Հայաստանի ֆուտբոլի ֆեդերացիային՝ բարձրաձայնելով Հայաստանի Պրեմիեր լիգայի հեռարձակման հետ կապված մեր մտահոգությունները։
Մինչ սպասում էինք պաշտոնական պատասխանին, ՀՊԼ հանդիպումը հեռարձակվում է նույնիսկ առանց մեկնաբանի:

Ստորև ներկայացնում ենք մեր նամակի կրճատ տարբերակը.

Անընդունելի ենք համարում, որ Հայաստանի Պրեմիեր լիգայի նոր մրցաշրջանը մեկնարկել է առանց պաշտոնական հեռարձակողի, մինչդեռ ակումբները դրա վերաբերյալ նախապես չեն ստացել որևէ պաշտոնական ծանուցում կամ պարզաբանում։ Սա լուրջ խնդիր է ոչ միայն երկրպագուների, այլև ակումբների համար, որոնք միլիարդավոր դրամների ներդրումներ են կատարում հայկական ակումբային ֆուտբոլի զարգացման գործում և ստանձնել են հստակ պարտավորություններ իրենց հովանավորների և գործընկերների առջև։

Հեռարձակման խնդիրը միայն մեդիա ոլորտին չի վերաբերում։ Այն անմիջական ազդեցություն ունի առաջնության կոմերցիոն արժեքի, հովանավորների տեսանելիության, երկրպագուների ներգրավվածության, ինչպես նաև VAR համակարգի արդյունավետ աշխատանքի և, հետևաբար, մրցավարական որոշումների որակի վրա։ Առանձնակի մտահոգիչ է նաև այն հանգամանքը, որ Հայաստանի Պրեմիեր լիգան մինչ օրս չունի տիտղոսային հովանավոր։

Հաշվի առնելով վերոգրյալը՝ խնդրում ենք պարզաբանել.

● Ինչո՞ւ է Հայաստանի Պրեմիեր լիգայի մրցաշրջանը մեկնարկել առանց պաշտոնական հեռարձակողի։
● Ի՞նչ քայլեր են արդեն ձեռնարկվել խնդրի լուծման ուղղությամբ։
● Ո՞րն է Հայաստանի ֆուտբոլի ֆեդերացիայի գործողությունների ծրագիրը՝ ապահովելու առաջնության կայուն, պրոֆեսիոնալ և որակյալ հեռարձակումը։
● Ի՞նչ ժամկետներում է նախատեսվում խնդրի վերջնական լուծումը։

Ակումբները շարունակում են ներդրումներ կատարել հայկական ֆուտբոլի զարգացման գործում և ակնկալում են նույն մակարդակի պատասխանատվություն, թափանցիկություն և ռազմավարական մոտեցում նաև Հայաստանի ֆուտբոլի ֆեդերացիայից»։

Ինչպես արդեն տեղեկացրել էինք, այսօր՝ օգոստոսի 1-ին, Հայաստանի Պրեմիեր լիգայի 2026/27թթ․ մրցաշրջանի մեկնարկային տուրի «Գանձասար» — «Արարատ-Արմենիա» հանդիպումը, որն ընթանում էր Երևանի «Ջունիոր սպորտ» մարզադաշտում, անակնկալ ընդհատվել էր լուսավորության բացակայության պատճառով:

Հայաստանի Պրեմիեր լիգայի մամուլի ծառայությունը հանդես է եկել պաշտոնական հայտարարությամբ՝ պարզաբանելով ստեղծված իրավիճակը:

Ըստ պաշտոնական աղբյուրի՝ Շենգավիթ վարչական շրջանում գրանցված խոշոր հոսանքազրկումներով պայմանավորված՝ դադարեցվել է լուսավորությունը նաև մարզադաշտում:

Խաղը պաշտոնապես դադարեցվել է 38-րդ րոպեին։ ՀՊԼ-ից տեղեկացնում են, որ եթե լուսավորությունը չվերականգնվի 60 րոպեի ընթացքում, ապա խաղը կհամարվի չկայացած կամ անավարտ: Նման սցենարի դեպքում հանդիպման վերանշանակման մասին կտրվի հավելյալ տեղեկատվություն:

Հիշեցնենք, որ խաղի ընդհատման պահին երկրի գործող չեմպիոն «Արարատ-Արմենիան» արդեն վստահ առավելություն ուներ և հաղթում էր 2:0 հաշվով:

Այսօր՝ օգոստոսի 1-ին, Հայաստանի Պրեմիեր լիգայի 2026/27թթ․ մրցաշրջանի մեկնարկային տուրի շրջանակում «Գանձասարը» Երևանի «Ջունիոր սպորտ» մարզադաշտում ուժերն էր չափում երկրի գործող չեմպիոն «Արարատ-Արմենիայի» հետ:

Առաջին խաղակեսի վերջնամասում հանդիպումն անակնկալ ընդհատվել է:

Ինչպես հայտնում է «Արարատ-Արմենիայի» մամուլի ծառայությունը, խաղի 39-րդ րոպեին մրցավարը ստիպված է եղել դադարեցնել այն՝ մարզադաշտում լուսավորության հետ կապված տեխնիկական խնդիրների պատճառով:

Նշենք, որ հանդիպման դադարեցման պահին «Արարատ-Արմենիան» արդեն վստահ առավելություն ուներ՝ հաղթելով 2:0 հաշվով:

Խաղի վերսկսման և հետագա ընթացքի վերաբերյալ հավելյալ տեղեկատվություն կհաղորդվի ավելի ուշ։

Այսօր՝ օգոստոսի 1-ին, Հայաստանի Պրեմիեր լիգայի մեկնարկային տուրի շրջանակում ԲԿՄԱ-ն Երևանի ֆուտբոլի ակադեմիայում մրցեց Գյումրիի «Շիրակի» հետ։

Հանդիպումն ավարտվեց գոլազուրկ ոչ-ոքիով՝ 0:0։ Այս արդյունքից հետո թիմերը վաստակեցին մեկական միավոր՝ ժամանակավորապես զբաղեցնելով մրցաշարային աղյուսակի 2-րդ և 3-րդ հորիզոնականները։

Օրվա մյուս խաղում «Գանձասարն» ընդունել է «Արարատ-Արմենիային»։

Առաջին տուրի հաջորդ հանդիպումները կկայանան վաղը՝ օգոստոսի 2-ին. «Նոան» ուժերը կչափի «Սյունիքի», իսկ «Ուրարտուն»՝ «Փյունիկի» հետ։ Տուրը կեզրափակվի օգոստոսի 3-ին՝ «Ալաշկերտ» – «Արարատ» դիմակայությամբ։

Տեսանյութը՝ ստորև․

Մրցաշարային աղյուսակն այս պահին