Հայաստանի Գավաթ — Armsport.am

🎥 Բախում Ուրարտուի և Նոայի երկրպագուների միջև՝ Հայաստանի գավաթի եզրափակիչից հետո

Gevorg Martirosyan — Thu, 14 May 2026 17:43:54 +0000

Հայաստանի գավաթի խաղարկության եզրափակիչ հանդիպումից հետո, որում «Նոան» 4։2 հաշվով առավելության հասավ «Ուրարտուի» նկատմամբ, տհաճ միջադեպ է գրանցվել։

Հանդիպման ավարտից հետո երկու ակումբների երկրպագուների միջև բախում է տեղի ունեցել։ Այս պահի դրությամբ միջադեպի հրահրման պատճառների, ինչպես նաև հնարավոր տուժածների կամ իրավապահների կողմից ձերբակալվածների վերաբերյալ պաշտոնական տեղեկատվություն չի հաղորդվում։

Հիշեցնենք, որ կամային հաղթանակի շնորհիվ «Նոան» իր պատմության մեջ երրորդ անգամ նվաճեց Հայաստանի գավաթը՝ ապահովելով նաև Կոնֆերենցիաների լիգայի որակավորման 2-րդ փուլի ուղեգիր։

🎥 Նոան՝ Հայաստանի գավաթակիր

Gevorg Martirosyan — Thu, 14 May 2026 17:06:39 +0000

Կայացավ Հայաստանի գավաթի խաղարկության վճռորոշ հանդիպումը, որում տիտղոսը վիճարկեցին «Նոան» ու «Ուրարտուն»։

Դիտարժան և գոլառատ պայքարում երևանյան «Նոան» կամային հաղթանակ տարավ 4։2 հաշվով՝ հռչակվելով մրցաշարի հաղթող։

Հանդիպման մեկնարկը բարեհաջող էր «Ուրարտուի» համար. խաղասկզբի 9-րդ րոպեին Միքայել Միրզոյանն առաջ մղեց իր թիմին: Սակայն Սանդրո Պերկովիչի սաները շատ արագ կարողացան բեկել հանդիպման ընթացքը։ 27-րդ րոպեին Հելդեր Ֆերեյրան վերականգնեց ստատուս-քվոն, իսկ արդեն ընդմիջումից առաջ՝ մրցավարի ավելացրած 1-ին րոպեին, Մարին Յակոլիշը հաշվի մեջ առաջ մղեց «Նոային»։

Երկրորդ խաղակեսում «Նոայի» ֆուտբոլիստներն էլ ավելի զարգացրին իրենց հաջողությունը։ 52-րդ րոպեին Յակոլիշն իր հաշվին դուբլ գրանցեց, իսկ ընդամենը երեք րոպե անց Նաթանայել Սաինտինին հաշիվը դարձրեց 4:1՝ գործնականում վճռելով եզրափակիչի ելքը։

«Ուրարտուի» ուժերը պատեցին միայն հաշվի տարբերությունը փոքր-ինչ կրճատելուն. 74-րդ րոպեին աչքի ընկավ Էդիկ Վարդանյանը՝ ձևակերպելով հանդիպման վերջնահաշիվը:

Այս տպավորիչ հաղթանակի շնորհիվ «Նոան» իր ակումբային պատմության մեջ երրորդ անգամ տիրացավ Հայաստանի գավաթին: Բացի այդ, թիմն իր համար տեղ ապահովեց ՈւԵՖԱ-ի Կոնֆերենցիաների լիգայի որակավորման երկրորդ փուլում:

Տեսանյութը՝ ստորև․

🎥 Հայաստանի գավաթի եզրափակիչ. Ուրարտու — Նոա. մեկնարկային կազմեր և ուղիղ եթեր

Suren Sahakyan — Thu, 14 May 2026 14:00:06 +0000

Այսօր՝ մայիսի 14-ին, Վազգեն Սարգսյանի անվան «Հանրապետական» մարզադաշտում կկայանա Հայաստանի գավաթի խաղարկության եզրափակիչի հանդիպումը: Պատվավոր գավաթը կվիճարկեն «Ուրարտուն» և «Նոան»:

Հանդիպումը կսպասարկի բելգիական մրցավարական անձնակազմը՝ Էրիկ Լամբրեխտսի գլխավորությամբ:

Հանդիպումը կմեկնարկի ժամը 20:00-ին:

Թիմերը խաղադաշտ դուրս կգան հետևյալ մեկնարկային կազմերով.

«Ուրարտու».

«Նոա».

Հանդիպման ուղիղ հեռարձակումը կարող եք դիտել ստորև.

Չեմպիոնների լիգայի մրցավարը կսպասարկի Հայաստանի գավաթի եզրափակիչը

Suren Sahakyan — Wed, 13 May 2026 18:15:51 +0000

Վաղը` մայիսի 14-ին Վազգեն Սարգսյանի անվան «Հանրապետական» մարզադաշտում կկայանա Հայաստանի գավաթի խաղարկության եզրափակիչ հանդիպումը։

Գավաթի համար կպայքարեն «Նոան» և «Ուրարտուն»։

Հանդիպումը կսպասարկի բելգիական մրցավարական անձնակազմը։ Մրցավարը Էրիկ Լամբրեխտսն է, նրա օգնականներն են Մաթիաս Հիլարտն ու Ջոկ Դե Վեիրդտը։ 41-ամյա մրցավարը ընթացիկ մրցաշրջանում արդեն հասցիել է սպասարկել Չեմպիոնների լիգայի չորս և Եվրոպա լիգայի երեք հանդիպում։

Հայաստանի գավաթի խաղարկության եզրափակիչը կմեկնարկի ժամը 19:00-ին։ Մուտքն ազատ է։

Գավաթի եզրափակիչը կսպասարկեն արտասահմանցի մրցավարներ. Հայտնի է նաև ՀՊԼ-ի ավարտի օրը

Gevorg Martirosyan — Sat, 02 May 2026 19:44:33 +0000

Հայաստանի ֆուտբոլի ֆեդերացիան հանդես է եկել պաշտոնական հայտարարությամբ, որում հրապարակել է Fastex Հայաստանի Պրեմիեր լիգայի 2025/26 մրցաշրջանի ավարտի պաշտոնական օրը, ինչպես նաև կարևոր որոշում է կայացրել Հայաստանի Գավաթի եզրափակիչի մրցավարության վերաբերյալ։

Ինչպես հայտնում է ՀՖՖ Մրցումների բաժինը, Fastex Պրեմիեր լիգայի ընթացիկ՝ 2025/26 մրցաշրջանը կեզրափակվի մայիսի 27-ին։

Սակայն գլխավոր նորությունը վերաբերում է Հայաստանի Գավաթի 2026 թվականի խաղարկության եզրափակիչին, որտեղ տիտղոսի համար կպայքարեն «Ուրարտուն» և «Նոան»։

ՀՖՖ-ի որոշմամբ՝ այս վճռորոշ հանդիպումը կսպասարկեն արտասահմանցի մրցավարներ։

Գերատեսչությունը պարզաբանել է որոշման դրդապատճառները՝ նշելով, որ թեև լիովին վստահում է տեղացի մասնագետներին, այնուամենայնիվ նպատակահարմար է գտել կիրառել նմանատիպ կարևորագույն հանդիպումներն արտասահմանյան բրիգադներին վստահելու համաշխարհային փորձը։

«ՀՖՖ-ն բարձր է գնահատում հայ մրցավարների պրոֆեսիոնալիզմը և լիովին վստահում է նրանց, սակայն, հաշվի առնելով գավաթային եզրափակիչներն արտասահմանցիներին վստահելու միջազգային պրակտիկան, ՀՖՖ-ն որոշել է կիրառել այս մոտեցումը»,- նշված է հայտարարության մեջ:

Թե կոնկրետ որ երկիրը կներկայացնեն «Ուրարտու» — «Նոա» եզրափակիչի մրցավարները, և ովքեր կընդգրկվեն մրցավարական անձնակազմում, ՀՖՖ-ն կհրապարակի ավելի ուշ։

🎥 Հայաստանի գավաթ․ հայտնի են եզրափակիչի մասնակիցները

Suren Sahakyan — Wed, 29 Apr 2026 16:32:55 +0000

Այսօր՝ ապրիլի 29-ին, կայացան Հայաստանի գավաթի խաղարկության կիսաեզրափակիչի պատասխան հանդիպումները, որոնց արդյունքում հայտնի դարձան եզրափակիչի մասնակիցները։

Օրվա կենտրոնական խաղում գործող գավաթակիր և չեմպիոն «Նոան» Աբովյանի Վահագն Թումասյանի անվան մարզահամալիրում ընդունեց «Արարատ-Արմենիային»։ Առաջին խաղում տարած նվազագույն հաշվով (1-0) հաղթանակից հետո «Նոան» կարողացավ պահպանել առավելությունը։ Պատասխան խաղն ավարտվեց 0-0 գոլազուրկ ոչ-ոքիով, ինչը թույլ տվեց Սանդրո Պերկովիչի գլխավորած թիմին նվաճել եզրափակիչի ուղեգիր։ Նշենք, որ «Նոան» երկրորդ տարին անընդմեջ հասնում է Հայաստանի գավաթի խաղարկության եզրափակիչ։

Զուգահեռաբար ընթացող մյուս խաղում «Ուրարտուն» սեփական հարկի տակ մրցեց Առաջին խումբը ներկայացնող «Անդրանիկի» հետ։ Առաջին հանդիպման անակնկալ ոչ-ոքիից (1-1) հետո «առյուծները» պատասխան խաղում հաղթեցին նվազագույն հաշվով։ Բրունո Միշելի՝ 32-րդ րոպեին խփած միակ գոլը վճռեց դիմակայության ելքը (ընդհանուր՝ 2-1)՝ եզրափակիչի ուղեգիր պարգևելով «Ուրարտուին»։

Այսպիսով, Հայաստանի գավաթի խաղարկության եզրափակիչում կմրցեն «Նոան» և «Ուրարտուն»։

Հիշեցնենք, որ Հայաստանի գավաթի խաղարկության եզրափակիչը կկայանա մայիսի 14-ին՝ Վազգեն Սարգսյանի անվան «Հանրապետական» մարզադաշտում։ Հանդիպման մեկնարկը՝ 19:00-ին։

«Ուրարտու» — «Անդրանիկ» հանդիպման տեսագրությունը

Հայաստանի Գավաթ. հայտնի է եզրափակիչի օրը

Gevorg Martirosyan — Sat, 18 Apr 2026 16:33:15 +0000

ՀՖՖ Մրցումների բաժինը հաստատել է Հայաստանի Գավաթի խաղարկության եզրափակչի անցկացման օրն ու ժամը: Այս մասին տեղեկացնում է ՀՖՖ պաշտոնական կայքը։

Վճռորոշ խաղը տեղի կունենա մայիսի 14-ին՝ Վազգեն Սարգսյանի անվան «Հանրապետական» մարզադաշտում: Մեկնարկը 19:00-ին է:

Եզրափակիչի մասնակիցները հայտի կդառնան ապրիլի 29-ին:

Կիսաեզրափակիչ առաջին դիմակայությունում գործող գավաթակիր «Նոան» 1:0 հաշվով հաղթել է «Արարատ-Արմենիային», իսկ «Անդրանիկ» — «Ուրարտու» զույգում հավասարություն է՝ 1:1։

🎥 Լարված պայքար և հեռացումներ. Սանդրո Պերկովիչի սաները հաղթանակով մեկնարկեցին ՀՀ Գավաթի կիսաեզրափակիչում

Gevorg Martirosyan — Thu, 16 Apr 2026 16:50:23 +0000

Հայաստանի գավաթի խաղարկության 1/2 եզրափակիչ փուլի շրջանակներում կայացած «Արարատ-Արմենիա» — «Նոա» առաջին հանդիպումն ավարտվեց Սանդրո Պերկովիչի գլխավորած թիմի նվազագույն հաղթանակով:

Խաղի ճակատագիրը վճռվեց առաջին խաղակեսի միջնամասում՝ 25-րդ րոպեին, երբ Նարդին Մուլահուսեյնովիչի դիպուկ հարվածը դարձավ մրցավեճի միակ և հաղթական գոլը:

Երկրորդ խաղակեսն աչքի ընկավ մեծ լարվածությամբ ու կոշտ պայքարով։

Հանդիպման 70-րդ րոպեին գլխավոր արբիտր Վարդան Մանուկյանը դաշտում կրքերը հանդարտեցնելու համար ստիպված եղավ գրպանից հանել միանգամից երկու կարմիր քարտ՝ հեռացնելով Կամո Հովհաննիսյանին և Նաթանաել Սաինտինիին, ինչի արդյունքում երկու կողմերն էլ մնացին տասական խաղացողներով։

Այս զույգի վճռորոշ՝ պատասխան հանդիպումը նախատեսված է անցկացնել ապրիլի 29-ին:

Հայաստանի գավաթ. Անդրանիկն ու Ուրարտուն կիսաեզրափակիչի առաջին խաղում չպարզեցին հաղթողին

Suren Sahakyan — Wed, 15 Apr 2026 16:15:20 +0000

Հայաստանի գավաթի խաղարկության կիսաեզրափակիչի առաջին խաղում «Ուրարտուն» հյուրընկալվելիս ոչ-ոքի խաղաց Առաջին խումբը ներկայացնող «Անդրանիկի» հետ (1-1):

Հանդիպման հաշիվը 12-րդ րոպեին բացեց երևանյան ակումբի ֆուտբոլիստ Արտյոմ Պոլյարուսը՝ հստակ իրացնելով 11-մետրանոցը: Հիմնական ժամանակի ավարտից 2 րոպե առաջ տանտերերից պատասխան գոլը խփեց Միքայել Նդինդին:

Թիմերի միջև պատասխան հանդիպումը կկայանա ապրիլի 29-ին՝ «Ուրարտուի» հարկի տակ:

Հայաստանի գավաթ․ կիսաեզրափակիչի խաղերի ժամանակացույցը

Suren Sahakyan — Fri, 03 Apr 2026 16:49:31 +0000

ՀՖՖ Մրցումների բաժինը հաստատել է Հայաստանի գավաթի խաղարկության կիսաեզրափակիչի խաղերի օրերն ու ժամերը, հայտնում է կառույցի մամուլի ծառայությունը։

Հայաստանի Գավաթի խաղարկություն, կիսաեզրափակիչ առաջին խաղեր

15.04.2026, 18:00 | «Անդրանիկ» — «Ուրարտու», Երևան, «Ջունիոր սպորտ»
16.04.2026, 18:30 | «Արարատ-Արմենիա» — «Նոա», Աբովյան, Վահագն Թումասյանի անվան մարզահամալիր

Հայաստանի Գավաթի խաղարկություն, կիսաեզրափակիչ 2-րդ (պատասխան) խաղեր

29.04.2026, 16:00 | «Ուրարտու» — «Անդրանիկ», Երևան, Ուրարտու-1
29.04.2026, 18:30 | «Նոա» — «Արարատ-Արմենիա», Աբովյան, Վահագն Թումասյանի անվան մարզահամալիր

Հիշեցնենք, որ մրցաշարի կիսաեզրափակիչում հանդես է գալիս նաև Հայաստանի գործող չեմպիոն և գավաթակիր «Նոան», որը եզրափակիչի ուղեգրի համար երկխաղյա դիմակայությունում կպայքարի «Արարատ-Արմենիայի» հետ։