Մադրիդի «Ռեալի» պաշտոնական կայքը՝ realmadrid.com-ը, 10-րդ տարին անընդմեջ ճանաչվել է աշխարհի ամենաշատ այցելվող ֆուտբոլային ակումբի կայքը։ Տվյալները ներկայացրել է SimilarWeb վերլուծական ընկերությունը։

Նախորդ մրցաշրջանում «Ռեալի» կայքը միջինում ամսական ունեցել է 8,7 միլիոն այց։ Ընդհանուր առմամբ գրանցվել է 86 միլիոն եզակի օգտատեր, ավելի քան 162 միլիոն սեսիա և 449 միլիոն եզակի էջադիտում։

Կայքի այցելությունների 78%-ը կատարվել է բջջային սարքերով, իսկ այցելուների 28%-ը 25-34 տարեկան օգտատերերն են։ Կայքը հասանելի է ութ լեզվով՝ իսպաներեն, անգլերեն, ֆրանսերեն, գերմաներեն, պորտուգալերեն, ճապոներեն, չինարեն և արաբերեն։

Ամսական միջին այցելությունների ցուցանիշով լավագույն տասնյակում «Ռեալին» հաջորդում են «Լիվերպուլը»՝ 7,9 միլիոն, «Արսենալը»՝ 7,8 միլիոն, «Բարսելոնան»՝ 7,6 միլիոն և «Մանչեսթեր Յունայթեդը»՝ 5,4 միլիոն։

Առաջին տասնյակը հետևյալն է.

1. Ռեալ Մադրիդ՝ ամսական միջինը 8.7 միլիոն այցելություն;
2. Լիվերպուլ՝ 7.9 միլիոն;
3. Արսենալ՝ 7.8 միլիոն;
4. Բարսելոնա՝ 7.6 միլիոն;
5. Մանչեսթեր Յունայթեդ՝ 5.4 միլիոն;
6. Բավարիա՝ 4.8 միլիոն;
7. Չելսի՝ 4.8 միլիոն;
8. Մանչեսթեր Սիթի՝ 3.2 միլիոն;
9. ՊՍԺ՝ 2.7 միլիոն;
10. Ինտեր Միլան՝ 2.6 միլիոն:

Կատալոնական «Բարսելոնայի» պաշտպան Ալեխանդրո Բալդեն դուրս է մնացել թիմի հիմնական կազմից: Գլխավոր մարզիչ Հանս-Դիտեր Ֆլիկը 22-ամյա ձախ եզրայինին անփոխարինելի խաղացող չի համարում, իսկ ակումբի մարզական տնօրեն Դեկուն վաղուց ուղիներ է փնտրում նրան աշխատավարձային ցանկից հանելու համար։

Ընթացիկ մրցաշրջանում իսպանացի պաշտպանը դաշտ է դուրս եկել ընդամենը մեկ անգամ՝ փոխարինման մտնելով Լա լիգայի 6-րդ տուրի «Ռասինգի» դեմ խաղի վերջնամասում (7-2):

Այս իրավիճակին ուշիուշով հետևում է ֆրանսիական ՊՍԺ-ն։ Ինչպես հաղորդում է El Nacional-ը, փարիզեցիներն արդեն սկսել են աշխատել տրանսֆերի իրագործման ուղղությամբ՝ պարզելու դրա հնարավոր պայմանները։ Լրագրող Էքրեմ Քոնուրի տեղեկություններով՝ փարիզյան ակումբը պատրաստ է խաղացողի համար առաջարկել 40 միլիոն եվրո։

«Լուիս Էնրիկեն հիանալի գիտի, թե Բալդեի պես պաշտպանն ինչ կարող է տալ թիմին՝ շնորհիվ իր արագության, ազատ տարածություններում խաղալու և մեծ տարածություն անցնելու ունակության։ Էնրիկեն փնտրում է այնպիսի պաշտպանի, որն ի վիճակի է ապահովել գրոհի լայնությունը, և կարծում է, որ միջավայրի փոփոխությունը կարող է օգտակար լինել Բալդեի համար»,- նշված է El Nacional-ի հոդվածում։

Տեղեկությունների համաձայն՝ «Բարսելոնան» պատրաստ է դիտարկել նաև պաշտպանի՝ վարձավճարով հեռանալու տարբերակը՝ հետագայում տրանսֆերի գնման բարձր արժեքի պարտադիր պայմանով։ Աղբյուրը հավելում է, որ Բալդեի շուրջ ստեղծված իրավիճակին հետևում են նաև անգլիական «Լիվերպուլը», «Մանչեսթեր Յունայթեդը», «Չելսին» և Միլանի «Ինտերը»:

Նշենք, որ Transfermarkt պորտալի մասնագետներն իսպանացի ֆուտբոլիստի տրանսֆերային արժեքը գնահատում են 50 միլիոն եվրո։

Ազգերի լիգայի խաղարկության A1-ին խմբի երկրորդ տուրում Ֆրանսիայի ազգային հավաքականը հյուրընկալվելիս դժվարին հաղթանակ կորզեց Բելգիայի ընտրանու նկատմամբ՝ 1-0 հաշվով:  

Հանդիպման հիմնական ժամանակում երկար ժամանակ գոլեր չէին գրանցվում, սակայն խաղի ավարտից ընդամենը երկու րոպե առաջ՝ 88-րդ րոպեին, ֆրանսիացիներին հաղթանակ պարգևեց Մայքլ Օլիսեն: Հակագրոհի արդյունքում, ստանալով Ռայան Շերկիի փոխանցումը, Օլիսեն տուգանային հրապարակից դուրս կատարած դիպուկ հարվածով գրավեց դարպասը:

Գոլը ԱՅՍՏԵՂ

Խմբի զուգահեռաբար ընթացող մյուս խաղում Իտալիայի հավաքականը արտագնա խաղում վստահ և գոլառատ հաղթանակ տարավ Թուրքիայի նկատմամբ՝ ջախջախելով մրցակցին 4-1 հաշվով:

Իտալացիներն իրենց առավելությունը դրսևորեցին հենց առաջին խաղակեսում. աչքի ընկան Ալեսանդրո Բաստոնին (9), Դավիդե Ֆրատեզին (22) և Մայքլ Կայոդեն (27): Երկրորդ խաղակեսի մեկնարկում՝ 47-րդ րոպեին, Բարիշ Յըլմազը կրճատեց հաշվի տարբերությունը, սակայն շատ արագ՝ 50-րդ րոպեին, Պիո Էսպոզիտոն խփեց հյուրերի չորրորդ գնդակը՝ ձևակերպելով հանդիպման վերջնահաշիվը:

Գոլերը՝ ԱՅՍՏԵՂ

Ազգերի լիգայի A1 խմբի մրցաշարային աղյուսակը՝ ստորև․

Ֆրանսիայի ազգային հավաքականի գլխավոր մարզիչ Զինեդին Զիդանը բարձր է գնահատել ազգային թիմի կիսապաշտպան Ռայան Շերկիի խաղը։

«Այո, ես մեծ հաճույքով կխաղայի Շերկիի հետ նույն թիմում։ Բանը միայն նրա տեխնիկան չէ․ ինձ նաև հետաքրքրում է, թե ինչպես է նա գործում առանց գնդակի»,- ֆրանսիացի մասնագետի խոսքերն է մեջբերում Get French Football News-ը։

Զիդանը նշել է, որ «Մանչեսթեր Սիթիի» ֆուտբոլիստն անհավանական փոխանցումներ է կատարում, և նրա խաղը կարող է ակնթարթորեն օգուտ բերել թիմին։

Ընթացիկ մրցաշրջանում Շերկին մանչեսթերյան ակումբի կազմում արդեն անցկացրել է 7 հանդիպում՝ դառնալով 4 գոլի և 2 արդյունավետ փոխանցման հեղինակ։

Հիշեցնենք, որ Ազգերի լիգայի երկրորդ տուրի շրջանակում Ֆրանսիայի հավաքականն ուժերը կչափի Բելգիայի ընտրանու հետ։ Հանդիպումը կկայանա այսօր՝ սեպտեմբերի 28-ին, Բրյուսելում և կմեկնարկի Երևանի ժամանակով 22:45-ին։

Մադրիդի «Ռեալում» խիստ դժգոհ են Ֆրանսիայի հավաքականի մարզչական և բժշկական շտաբի գործողություններից՝ կապված Կիլիան Մբապեի առողջական վիճակի հետ:

Ինչպես հաղորդում է հեղինակավոր L’Équipe պարբերականը, մադրիդցիների զայրույթի պատճառը աստղային հարձակվողի հանդեպ ցուցաբերված անփույթ վերաբերմունքն է։

Աղբյուրի փոխանցմամբ՝ Մբապեն ազգային հավաքականի ճամբար էր ժամանել հին վնասվածքի հատվածում ունեցած թեթև ցավերով։ «Արքայական» ակումբը հատուկ կապ էր հաստատել Ֆրանսիայի հավաքականի ներկայացուցիչների հետ և նախազգուշացրել առկա խնդրի մասին։

«Սերուցքայինները» հույս ունեին, որ Մբապեին հանգստանալու հնարավորություն կտան և առավելագույն զգուշությամբ կմոտենան նրա ծանրաբեռնվածությանը։

Այդուհանդերձ, Ֆրանսիայի հավաքականում անտեսել են մադրիդցիների խնդրանքը: Մբապեն մասնակցել է Ազգերի լիգայի շրջանակում կայացած Թուրքիայի դեմ հանդիպմանը (0:1) և հենց այդ խաղում էլ վնասվածք ստացել։

Բուժզննման արդյունքում հարձակվողի մոտ ախտորոշվել է ձախ ծնկահոդի հետին պարկուճի գերձգում։

Նախնական տեղեկություններով՝ ֆրանսիացին ստիպված կլինի ապաքինմանը տրամադրել առնվազն երկու շաբաթ։

Ֆրանսիական ՊՍԺ-ի իսպանացի հարձակվող Ֆերան Տորեսը ցանկանում է, որ «Բարսելոնայում» իր նախկին թիմակից Պեդրին նույնպես տեղափոխվի Փարիզ։ Այս մասին հաղորդում է El Nacional-ը։

Աղբյուրի տեղեկություններով՝ Տորեսն ակտիվորեն համոզում է Պեդրիին միանալ փարիզյան ակումբին։ Նշվում է, որ նրանք շատ մտերիմ ընկերներ են նաև խաղադաշտից դուրս։ Ավելի վաղ Տորեսն անկեղծացել էր, որ «Բարսելոնայից» հեռանալուց հետո շատ է կարոտում իր ընկերոջը։

Հիշեցնենք, որ իսպանացի հարձակվողը կատալոնական ակումբից ՊՍԺ է տեղափոխվել ամառային տրանսֆերային պատուհանի ընթացքում։ Ֆրանսիական գրանդի կազմում նա արդեն հասցրել է մասնակցել 6 հանդիպման բոլոր մրցաշարերում՝ դառնալով 7 գոլի հեղինակ։

Ինչ վերաբերում է Պեդրիին, ապա ընթացիկ մրցաշրջանում նա «Բարսելոնայի» մարզաշապիկով դաշտ է դուրս եկել 8 անգամ՝ իր անվան դիմաց գրանցելով 1 գոլ և 2 գոլային փոխանցում։ Transfermarkt պորտալի մասնագետները 23-ամյա կիսապաշտպանի տրանսֆերային արժեքը գնահատում են 150 միլիոն եվրո։

Ֆրանսիայի ազգային հավաքականի նոր գլխավոր մարզիչ Զինեդին Զիդանը սկսել է լուրջ փոփոխություններ մտցնել Կլերֆոնտենի ուսումնամարզական բազայի առօրյայում՝ թիմում սահմանելով նոր, կարգապահական կանոններ։

Ինչպես տեղեկացնում է L’Équipe-ը, ֆրանսիացի մասնագետն արգելել է ֆուտբոլիստների անձնական վարսավիրների մուտքը հավաքականի ճամբար։ Ավելին, հավաքի մեկնարկից հետո կողմնակի անձանց մուտքը բազա այսուհետ խստագույնս արգելվելու է։

Թեև նման արգելքը փոքր-ինչ զավեշտալի է հնչում մի մարզչի կողմից, որը վաղուց աչքի չի ընկնում «ճոխ սանրվածքով», սակայն այս որոշումն ունի հստակ տրամաբանություն։ Զիդանը պահանջում է, որ խաղացողները կենտրոնանան բացառապես ֆուտբոլի և Ազգերի լիգայում հաղթելու գլխավոր նպատակի վրա, այլ ոչ թե անհանգստանան իրենց արտաքին տեսքով։

Հիշեցնենք, որ Զիդանն այս պաշտոնում փոխարինել է Դիդիե Դեշամին, որը «եռագույններին» գլխավորում էր վերջին 14 տարիների ընթացքում՝ նվաճելով աշխարհի չեմպիոնի և Ազգերի լիգայի հաղթողի տիտղոսները։ Զիդանի համար սա ազգային հավաքականի մակարդակով մարզչական աշխատանքի առաջին փորձն է։

Հավելենք, որ երեկ՝ սեպտեմբերի 25-ին, Ֆրանսիայի հավաքականն արդեն անցկացրել է իր անդրանիկ հանդիպումը նոր գլխավոր մարզչի ղեկավարությամբ՝ Ազգերի լիգայի A լիգայի խմբային փուլի առաջին տուրում նվազագույն՝ 1-0 հաշվով պարտության մատնելով Թուրքիայի ընտրանուն։

Մադրիդի «Ռեալի» և Ֆրանսիայի ազգային հավաքականի հարձակվող Կիլիան Մբապեն ծնկի վնասվածքի պատճառով լքել է ազգային թիմի ճամբարը։ Այս մասին տեղեկանում ենք «եռագույնների» մամուլի ծառայության՝ սոցիալական ցանցերում տարածած պաշտոնական հաղորդագրությունից։

«Կիլիան Մբապեն ծնկի վնասվածք է ստացել այն հարվածի ժամանակ, որն ավարտվեց հաղթական գոլով։ Խաղացողի մոտ ախտորոշվել է ջլի վնասվածք, ինչի պատճառով նա ստիպված է բաց թողնել հավաքի մնացած հատվածը։ Շուտափույթ ապաքինում, Կիլիա՛ն»,- ասված է հայտարարության մեջ։

Հիշեցնենք, որ Ֆրանսիայի հավաքականի ավագը վնասվածքն ստացել էր Ազգերի լիգայի A լիգայի խմբային փուլի առաջին տուրի՝ Թուրքիայի դեմ ուրբաթ` սեպտեմբերի 25-ին կայացած խաղում (1-0): 27-ամյա հարձակվողը 54-րդ րոպեին դարձել էր հանդիպման միակ և հաղթական գոլի հեղինակը, սակայն ծնկի հետ կապված խնդիրների պատճառով չէր կարողացել շարունակել հանդիպումն ու արդեն 59-րդ րոպեին փոխարինվել էր։

Սպասվում է, որ մոտ ժամանակներս Մբապեն կվերադառնա Մադրիդ, որտեղ կենթարկվի լրացուցիչ բժշկական հետազոտության՝ ապաքինման ստույգ ժամկետները պարզելու նպատակով։

Հիշեցնենք, որ ավելի վաղ «եռագույնների» ճամբարը ծնկի կապանի վնասվածքի պատճառով լքել էր նաև Մադրիդի «Ռեալի» կենտրոնական պաշտպան Իբրահիմա Կոնատեն։

Ֆրանսիայի ազգային հավաքականի գլխավոր մարզիչ Զինեդին Զիդանն անդրադարձել է Ազգերի լիգայի A լիգայի խմբային փուլի առաջին տուրի՝ Թուրքիայի դեմ խաղում Կիլիան Մբապեի ստացած վնասվածքին՝ խոստովանելով, որ այն կարող է բավականին լուրջ լինել։

Մադրիդի «Ռեալի» հարձակվողը 54-րդ րոպեին դարձել էր հանդիպման միակ գոլի հեղինակը, սակայն հենց հարվածի ժամանակ վնասել էր ծունկն ու 59-րդ րոպեին ստիպված լքել խաղադաշտը։

«Ցավոք, ամեն ինչ վատ է։ Կարծում եմ՝ Կիլիանը ստիպված կլինի վերադառնալ Մադրիդ։ Մենք չենք պատրաստվում ռիսկի դիմել։ Հարվածի ժամանակ նրա մոտ ծնկի գերձգվածություն է առաջացել։ Սա այնքան էլ հուսադրող չէ՝ հաշվի առնելով, որ նա չկարողացավ շարունակել հանդիպումը»,- Զիդանի խոսքերն է մեջբերում TF1-ը։

Նախնական տվյալներով՝ «եռագույնների» ավագի մոտ արձանագրվել է ծնկի կապանների վնասվածք (գերձգվածություն)։ Ապաքինման ստույգ ժամկետների վերաբերյալ հստակ տեղեկատվություն կհրապարակվի ավելի ուշ։

Հիշեցնենք, որ Թուրքիայի նկատմամբ 1-0 հաշվով տարած հաղթանակից հետո, Ֆրանսիայի հավաքականն իր հաջորդ հանդիպումը կանցկացնի սեպտեմբերի 28-ին՝ մրցելով Բելգիայի ընտրանու հետ։

Սեպտեմբերի 25-ին կայացան ՈՒԵՖԱ Ազգերի Լիգայի 2026/27 մրցաշրջանի խմբային փուլի մի շարք հանդիպումներ։ Կայացավ A Լիգայի 1-ին խմբի առաջին տուրի հանդիպումը Թուրքիայի և Ֆրանսիայի հավաքականների միջև։

Թուքիայում կայացած հանդիպումն ավարտվեց Զինեդին Զիդանի թիմի հաղթանակով՝ 1-0 հաշվով։

Հանդիպման միակ գոլը 54-րդ րոպեին խփեց Կիլիան Մբապեն՝ Մայքլ Օլիսեի փոխանցումից հետո։ Գոլ խփելուց կարճ ժամանակ անց Մբապեն անհարմարություն զգաց և լքեց խաղադաշտը։

Թուրքերը խաղն ավարտեցին մեկ ֆուտբոլիստով պակաս, քանի որ դարպասապահ Ուգուրջան Չաքուրը տուգանային հրապարակից դուրս ձեռքով խաղալու համար հեռացվեց խաղադաշտից։

Հանդիպման գոլերը՝ ԱՅՍՏԵՂ։

Երկրորդ տուրում Բելգիայի հավաքականը կհանդիպի Ֆրանսիայի, իսկ Իտալիայի հավաքականը՝ Թուրքիայի ընտրանու հետ։

Մրցաշարային աղյուսակը՝ ստորև․