Մադրիդի «Ռեալի» կիսապաշտպան Ֆեդերիկո Վալվերդեն ձախ կոճի ծանր վնասվածք է ստացել «Ատլետիկոյի» դեմ կայացած դերբիում: Ակումբի մամուլի ծառայությունը պաշտոնապես հաստատել է վնասվածքը նախնական բուժզննումից հետո, սակայն ապաքինման հստակ ժամկետները պարզ կդառնան միայն առաջիկա ժամերին սպասվող լրացուցիչ հետազոտությունների արդյունքում:

Ուրուգվայցին վնասվածքը ստացել է առաջին խաղակեսի վերջնամասում՝ «Ատլետիկոյի» կիսապաշտպան Լի Կանգ-Ինի կոպիտ խաղից հետո: Հարավկորեացին խաղակոշիկի ներբանով հարվածել է Վալվերդեի կոճին, սակայն գլխավոր մրցավար Միգել Անխել Օրտիս Արիասը խախտման համար անգամ դեղին քարտ ցույց չի տվել, իսկ VAR համակարգը չի միջամտել:

Ինչպես հաղորդում է Mundo Deportivo-ն, Իսպանիայի Տեխնիկական մրցավարական կոմիտեն (CTA) արդեն արձանագրել է, որ Կանգ-Ինը պետք է հեռացվեր դաշտից, և VAR-ը պարտավոր էր արձագանքել։ Միջադեպին խիստ քննադատությամբ է անդրադարձել նաև մադրիդցիների գլխավոր մարզիչ Ժոզե Մոուրինյուն՝ հետխաղյա ասուլիսի ժամանակ ցուցադրելով վիճահարույց դրվագների լուսանկարներն ու նշելով, որ մրցակցի ֆուտբոլիստները արժանի էին կարմիր քարտերի։

Չնայած ցավին՝ Վալվերդեն հանդիպումն ավարտին է հասցրել, սակայն հավանականությունը մեծ է, որ նա շարքից դուրս է եկել մի քանի շաբաթով: Ըստ The Athletic-ի աղբյուրների՝ վերականգնումը կարող է տևել 2-3 շաբաթ: Եթե այս տեղեկությունը հաստատվի, ուրուգվայցին բաց կթողնի ոչ միայն ակումբային հանդիպումները, այլև Ուրուգվայի հավաքականի առաջիկա խաղերը Ճապոնիայի և Հարավային Կորեայի դեմ։

Սա լուրջ հարված է «Ռեալի» համար, քանի որ ընթացիկ մրցաշրջանում Վալվերդեն Մոուրինյոյի առանցքային ֆուտբոլիստներից մեկն է և մինչև այս մասնակցել էր թիմի բոլոր հանդիպումներին՝ մեկնարկային կազմում:

Իսպանիայի Լա Լիգայի 7-րդ տուրի «Ատլետիկո» — «Ռեալ Մադրիդ» (2:1) հանդիպումից հետո Մրցավարների տեխնիկական կոմիտեն (CTA) վերլուծել է գլխավոր մրցավար Միգել Անխել Օրտիս Արիասի աշխատանքը՝ արձանագրելով մի շարք կոպիտ սխալներ։

Ըստ իսպանական AS պարբերականի՝ կոմիտեում կարծում են, որ մադրիդյան դերբիի լարվածությունը խանգարել է մրցավարին, ով չի կարողացել ճիշտ որոշում կայացնել խաղի երեք ամենավիճելի դրվագներից և ոչ մեկում։

Երկու դեպքում Օրտիս Արիասին օգնության է հասել VAR համակարգը, իսկ մեկում սխալն այդպես էլ մնացել է անպատիժ։ Կոմիտեն առանձնացրել է հետևյալ երեք առանցքային դրվագները.

Շփոթմունք և Կուտի Ռոմերոյի խախտումը. Խաղային դրվագներից մեկում մրցավարը սկզբնապես տուգանային էր նշանակել և դեղին քարտ ցույց տվել «Ռեալի» կիսապաշտպան Ջուդ Բելինգհեմին։ Սակայն VAR-ի միջամտությունից հետո պարզվեց, որ իրականում խախտումը կատարել է «Ատլետիկոյի» ֆուտբոլիստ Կուտի Ռոմերոն, ընդ որում՝ դրվագը կարմիր քարտի վտանգ էր պարունակում: Թեև Օրտիս Արիասը ի վերջո հեռացման որոշում չկայացրեց, CTA-ն ներողամիտ է գտնվել այս հարցում՝ դրվագը որակելով որպես խիստ խառը և դժվար գնահատելի։

Լի Կանգ-Ինի չպատժված կոպտությունը. Ամենակոպիտ սխալը գրանցվել է այն դրվագում, երբ «Ատլետիկոյի» կիսապաշտպան Լի Կանգ-Ինը կոշտ սահանկումով խաղացել է Ֆեդերիկո Վալվերդեի դեմ։ Գլխավոր մրցավարը հարավկորեացուն կարմիր քարտ ցույց չտվեց, իսկ VAR համակարգն էլ չմիջամտեց։ Կոմիտեի միանշանակ պնդմամբ՝ Կանգ-Ինը պետք է ուղիղ կարմիր քարտով հեռացվեր խաղադաշտից։

Դին Հոյսենի հեռացումը. «Ռեալի» պաշտպանը սեփական տուգանային հրապարակում կանոնների խախտում թույլ տվեց Ջուլիանո Սիմեոնեի նկատմամբ։ Արիասը 11-մետրանոց նշանակեց, սակայն սկզբում խաղացողին չհեռացրեց։ Միայն VAR-ի հուշումից և էկրանին դրվագը վերանայելուց հետո մրցավարը Հոյսենին կարմիր քարտ ցույց տվեց, քանի որ վերջինս գնդակի համար չէր պայքարում և պարզապես քաշել էր մրցակցին։ CTA-ն այս վերջնական որոշումը և VAR-ի աշխատանքը լիովին ճիշտ է համարել։

Նշվում է, որ Օրտիս Արիասին Լա Լիգայի գլխավոր դերբին սպասարկելու հնարավորություն էր ընձեռվել որպես պարգևատրում՝ նախորդ մրցաշրջանում և ընթացիկ առաջնության մեկնարկում ցուցադրած բարձր մակարդակի համար, սակայն, ըստ կոմիտեի, արդարադատության պատասխանատուն չարդարացրեց սպասելիքներն այս բարդ խաղում:

MLS-ի կանոնավոր առաջնության հերթական խաղում «Ինտեր Մայամին» Ֆորտ-Լոդերդեյլի «DRV PNK» մարզադաշտում հյուրընկալել էր «Սան Դիեգոյին»: Չնայած ֆուտբոլային աշխարհի ամենահայտնի դուետի՝ Լիոնել Մեսսիի և Լուիս Սուարեսի խփած գոլերին, Ֆլորիդան ներկայացնող ակումբը չկարողացավ պահել հաղթական հաշիվը. գրանցվեց 2:2 մարտական ոչ-ոքի:

Հյուրերի կազմում փայլեց Անդերս Դրեյերը, ով իր ակտիվում դուբլ գրանցեց՝ փրկելով իր թիմին պարտությունից և վերջ դնելով «Սան Դիեգոյի»՝ երեք խաղից բաղկացած անհաջողությունների շարքին: Այս հանդիպումից հետո «Ինտեր Մայամին» գրանցեց իր 4-րդ անընդմեջ ոչ-ոքին MLS-ում։ Թիմն այժմ 46 միավորով զբաղեցնում է Արևելյան կոնֆերենցիայի 3-րդ հորիզոնականը, մինչդեռ «Սան Դիեգոն» 31 միավորով 10-րդն է Արևմուտքում:

Թեև թիմը չկարողացավ վաստակել 3 միավոր, օրը իսկապես պատմական էր 39-ամյա Լիոնել Մեսսիի համար։ Խաղի 24-րդ րոպեին արգենտինացին աչքի ընկավ տուգանայինից կատարած անթերի հարվածով։ Սա նրա կարիերայի 75-րդ գոլն էր ստանդարտ դիրքից: Այս ցուցանիշով Մեսսին շրջանցեց բրազիլացի Ժաիր դա Ռոզա Պինտոյին (74 գոլ)՝ դուրս գալով ֆուտբոլի պատմության մեջ մաքուր երկրորդ տեղ։ Համաշխարհային բացարձակ ռեկորդը կրկնելու համար Մեսսիին անհրաժեշտ է ևս երեք այդպիսի գոլ. ռեկորդակիրը բրազիլացի Մարսելինյո Կարիոկան է (78 գոլ)։

Այս գնդակը հոբելյանական էր նաև մեկ այլ առումով. Մեսսին խփեց իր կարիերայի 930-րդ գոլը՝ անցկացրած 1176 հանդիպումներում։ Բացի այդ, սա արգենտինացու 101-րդ գոլն էր «Ինտեր Մայամիի» կազմում, և 20-րդը՝ ընթացիկ՝ 2026 թվականի մրցաշրջանում: Լեգենդար հարձակվողի ակտիվում կա նաև 424 արդյունավետ փոխանցում:

Համեմատության համար՝ նրա հավերժական մրցակից, 41-ամյա Կրիշտիանու Ռոնալդուն 1337 խաղում դարձել է 979 գոլի և 261 արդյունավետ փոխանցման հեղինակ:

Հիշեցնենք, որ Մեսսին «Ինտեր Մայամիի» գույները պաշտպանում է 2023 թվականից, իսկ նրա գործող պայմանագիրն ակումբի հետ նախատեսված է մինչև 2028 թվականը։ Այս ընթացքում արգենտինացին հասցրել է թիմի հետ նվաճել 5 տիտղոս:

Առաջնության հաջորդ տուրում «Ինտեր Մայամին» սեպտեմբերի 28-ին ուժերը կչափի «Քոլամբուս Քրյուի» հետ, իսկ «Սան Դիեգոն» մեկ օր առաջ կմրցի «Օսթինի» դեմ։

Ֆրանսիայի ազգային հավաքականի նախկին պաշտպան Բիքսանտ Լիզարազուն խոսել է ազգային թիմի հարձակվողներ Կիլիան Մբապեի և Ուսման Դեմբելեի միջև հնարավոր հակամարտության մասին։

«Չի կարելի թույլ տալ, որ Մբապեի ու Դեմբելեի միջև լարվածություն առաջանա Կիլիանի խոսքերի պատճառով, որոնք չափազանց եսասիրական էին ու կենտրոնացած միայն իր վրա»,- Լիզարազուի խոսքերն է փոխանցում Telefoot-ը:

Հիշեցնենք, որ France Football-ին տված հարցազրույցում Մբապեն հայտարարել էր.

«Դեմբելեին միշտ համարել են տաղանդավոր ֆուտբոլիստ, իսկ ինձ՝ ընտրյալ»։

Լիգա 1-ի 4-րդ տուրի ՊՍԺ — «Բրեստ» (3:1) հանդիպումից հետո Դեմբելեն արձագանքել է «եռագույնների» ավագի հայտարարությանը.

«Ես միշտ դասարանում վերջինն եմ եղել և քրտնաջան աշխատել եմ։ Ամբողջ կարիերայիս ընթացքում ոչ մի ավելորդ խոսք թույլ չեմ տվել, պարզապես շատ եմ աշխատել։ Ինչպես արդեն ասել եմ, երբեք ընտրյալ չեմ եղել, բայց աշխատանքիս շնորհիվ նախորդ մրցաշրջանում վարձատրվեցի ՊՍԺ-ում անցկացրած ֆանտաստիկ տարվա համար»։

Ֆրանսիայի Լիգա 1-ի 2026/27 մրցաշրջանի 5-րդ տուրում կայացավ ֆրանսիական ֆուտբոլի գլխավոր դիմակայություններից մեկը. «Օրանժ Վելոդրոմ» մարզադաշտում «Մարսելը» հյուրընկալեց ՊՍԺ-ին։

Լարված և դիտարժան պայքարում հաղթանակը բաժին հասավ հյուրերին՝ 2:1 հաշվով։

Հանդիպման հաշիվը 66-րդ րոպեին բացեց փարիզեցիների հարձակվող Ֆերան Տորեսը։ Ընդամենը վեց րոպե անց Էյնջել Գոմեսը վերականգնեց հավասարությունը, սակայն 75-րդ րոպեին ՊՍԺ-ի ավագ և պաշտպան Մարկինյոսը խփեց հյուրերի հաղթական գնդակը։ Իրավիճակը տանտերերի համար առավել բարդացավ 77-րդ րոպեին, երբ Թիմոթի Վեան հեռացվեց դաշտից՝ ստանալով ուղիղ կարմիր քարտ։

Այս հաղթանակից հետո ՊՍԺ-ն վաստակեց 8 միավոր և բարձրացավ 6-րդ հորիզոնական։ «Մարսելը» 3 միավորով նախավերջին՝ 17-րդ տեղում է։

Տեսանյութը՝ ԱՅՍՏԵՂ

Մրցաշարային աղյուսակն այս պահին

Իտալիայի Ա Սերիայի 2026/27թթ․ մրցաշրջանի 5-րդ տուրում «Միլանը» սեփական հարկի տակ ընդունեց «Լեչեին»։

Միլանի «Սան Սիրո» մարզադաշտում կայացած հանդիպումն ավարտվեց տանտերերի վստահ հաղթանակով՝ 3:0 հաշվով։

Խաղի հաշիվը 14-րդ րոպեին բացեց «Միլանի» հարձակվող Քրիստիան Պուլիշիչը։ Երկրորդ խաղակեսում՝ 61-րդ րոպեին, կիսապաշտպան Ադրիեն Ռաբյոն կրկնապատկեց միլանյան ակումբի առավելությունը, իսկ 73-րդ րոպեին խաղի վերջակետը դրեց փոխարինման դուրս եկած նորեկ Դիեգու Մորեյրան։

Հատկանշական է, որ նախորդ տուրում լատերալը նույնպես փոխարինման էր դուրս եկել և դուբլ ձևակերպել «Լացիոյի» դեմ խաղում (2:2)։

Այս հաղթանակից հետո «Միլանը» վաստակեց 11 միավոր և բարձրացավ Ա Սերիայի մրցաշարային աղյուսակի 5-րդ հորիզոնական։ «Լեչեն» 6 միավորով 12-րդն է։

Տեսանյութը՝ ԱՅՍՏԵՂ

Մրցաշարային աղյուսակն այս պահին

Մադրիդի «Ատլետիկոյի» գլխավոր մարզիչ Դիեգո Սիմեոնեն մեկնաբանել է Լա լիգայի 7-րդ տուրում «Ռեալի» նկատմամբ տարած հաղթանակը (2:1) և պատասխանել «Արքայական» ակումբի գլխավոր մարզիչ Ժոզե Մոուրինյուի՝ մրցավարների հասցեին հնչեցրած քննադատությանը։

Հիշեցնենք, որ «Սիվիտաս Մետրոպոլիտանո» մարզադաշտում կայացած հանդիպումը սպասարկել էր գլխավոր մրցավար Միգել Անխել Օրտիս Արիասը, ում որոշումներից և չտրված կարմիր քարտերից խիստ դժգոհ էր մնացել պորտուգալացի մասնագետը։

«Առաջին խաղակեսում մենք լավ էինք վերահսկում խաղը՝ առանց հստակ գոլային պահեր ստեղծելու։ Լինում են դրվագներ, որոնք բեկում են մտցնում խաղի մեջ, և դա Ջուլիանոյի վրա վաստակած 11-մետրանոցն էր։ Ունենալով քանակական առավելություն՝ մենք օգտագործեցինք այն իրավիճակները, որոնցում կարող էինք բարդություններ ստեղծել նրանց համար։ Այդպես Ջոնաթան Դևիդը դարձավ գոլի հեղինակ, որից հետո նրանք իրենց վտանգավոր գրոհներից մեկի արդյունքում կրճատեցին հաշվի տարբերությունը։

Ինչ վերաբերում է Ժոզե Մոուրինյուի մեկնաբանություններին, ապա ես ասելու ոչինչ չունեմ։ Սրանք ընդամենը խաղային դրվագներ են։ Երբեմն ամեն ինչ քո օգտին է դասավորվում, երբեմն՝ ոչ։ Չի կարելի կորցնել հարգանքը մրցավարների նկատմամբ։ Ամեն ինչ չէ, որ թույլատրելի է, նույնիսկ եթե քո անունը Մոուրինյու է»,- Սիմեոնեի խոսքերն է մեջբերում DAZN-ը։

Հայաստանի ազգային հավաքականի հայտացուցակում, որը նախապատրաստվում է Ազգերի լիգայի առաջիկա հանդիպումներին, հերթական հարկադրված փոփոխությունն է տեղի ունեցել։

Ինչպես հայտնում է ՀՖՖ մամուլի ծառայությունը, գերմանական «Նյուրնբերգի» պաշտպան Ստյոպա Մկրտչյանը չի կարողանա միանալ ազգային թիմին։ Ակումբի կազմում իր վերջին մարզման ժամանակ ֆուտբոլիստին կրկին զգացնել է տվել նախկինում ստացած վնասվածքը։

Նրա փոխարեն հավաքականի գլխավոր մարզիչ Եղիշե Մելիքյանի որոշմամբ ազգային թիմ է հրավիրվել ԲԿՄԱ-ի պաշտպան Արգիշտի Պետրոսյանը։

Հիշեցնենք, որ վնասվածքների պատճառով ավելի վաղ հրապարակված հայտացուցակից բացակայում էին նաև մի շարք այլ ֆուտբոլիստներ, որոնց թվում են Վահան Բիչախչյանը, Հրանտ-Լեոն Ռանոսը, Հովհաննես Հարությունյանը, Նորբերտո Բրիասկո Բալեկյանն ու Կամո Հովհաննիսյանը, իսկ օրեր առաջ հայտնի էր դարձել նաև Էդգար Գրիգորյանի վնասվածքի և նրան Խարիտոն Այվազյանով փոխարինելու մասին։

Եղիշե Մելիքյանի գլխավորած թիմն Ազգերի լիգայի C2 խմբի շրջանակում սեպտեմբերի 25-ին՝ ժամը 20։00-ին, Երևանի Վազգեն Սարգսյանի անվան «Հանրապետական» մարզադաշտում կընդունի Լատվիային, իսկ սեպտեմբերի 28-ին՝ Չեռնոգորիային։ Հոկտեմբերի 2-ին մեր ընտրանին արտագնա խաղում ուժերը կչափի Կիպրոսի հետ, իսկ 3 օր անց կհյուրընկալվի Չեռնոգորիային։

Սեպտեմբերի 20-ին Հայաստանի ազգային հավաքականը սկսեց ուսումնամարզական հավաքը՝ նախապատրաստվելու Ազգերի լիգայի C2 խմբի խաղերին:

Եղիշե Մելիքյանի գլխավորությամբ մեր ընտրանին առաջին մարզումն անցկացրեց։

Հիշեցնենք` Հայաստանի ազգային հավաքականը սեպտեմբերի 25-ին կընդունի Լատվիայի, իսկ սեպտեմբերի 28-ին՝ Չեռնոգորիայի հավաքականներին, որից հետո արտագնա հանդիպումներ կանցկացնի Կիպրոսի ու Չեռնոգորիայի ընտրանիների հետ։

Իսպանիայի Լա լիգայի 7-րդ տուրի մադրիդյան դերբիում կրած պարտությունից (1:2) հետո «Ռեալի» գլխավոր մարզիչ Ժոզե Մոուրինյուն աչքի է ընկել սկանդալային քայլով։

Պորտուգալացի մասնագետը հետխաղյա մամուլի ասուլիսին է ներկայացել հանդիպման վիճելի դրվագների տպված լուսանկարներով՝ արտահայտելով իր խիստ դժգոհությունը մրցավարությունից։

«Սիվիտաս Մետրոպոլիտանո» մարզադաշտում կայացած հանդիպումը սպասարկում էր գլխավոր մրցավար Միգել Անխել Օրտիս Արիասը։ Ժոզե Մոուրինյուի բերած լուսանկարներից մեկում հստակ երևում էր, թե ինչպես է «Ատլետիկոյի» հարձակվող Լի Կան Ինը կոպտորեն կանգնում «Ռեալի» կիսապաշտպան Ֆեդերիկո Վալվերդեի ոտքին:

Մարզիչը ցուցադրել է տպված կադրերն ու նշել, որ մրցավարն աչքաթող է արել մրցակցի կազմում առնվազն երկու ակնհայտ հեռացում.

«Սրանք երկու կարմիր քարտ են։ Այս մրցավարը մադրիդյան դերբի սպասարկելու փորձ չունի։ Նա միջազգային հանդիպումներ չի վարում։ Գիտե՞ք՝ ինչու։ Որովհետև նա վատն է։ Բայց նրան նշանակել են այսպիսի խաղի։ Շնորհավորում եմ մրցավարների կոմիտեին, հիանալի աշխատանք է», — հայտարարել է Ժոզե Մոուրինյուն։

Նշենք, որ 7 տուրից հետո «Ատլետիկոն» վաստակած 16 միավորով Լա լիգայի մրցաշարային աղյուսակի 2-րդ հորիզոնականում է, իսկ «Ռեալը» 15 միավորով նահանջել է 4-րդ տեղ: Հաջորդ տուրում՝ հոկտեմբերի 10-ին, Ժոզե Մոուրինյուի թիմը կմրցի «Վիլյառեալի», իսկ «Ատլետիկոն»՝ «Ալավեսի» հետ։