ՈւԵՖԱ-ի Եվրոպա լիգայի խաղարկության լիգայի փուլի 4-րդ տուրում պորտուգալական «Տորենսեն» տնային խաղում 3-2 հաշվով հաղթանակ տարավ Հայաստանի գործող չեմպիոն «Արարատ-Արմենիայի» նկատմամբ:

Պորտուգալական ակումբի գլխավոր մարզիչ Ժոաու Նունուն հետխաղային ասուլիսի ժամանակ ամփոփել է հանդիպումը:

Խաղի ընթացքի, կարմիր քարտի և հաղթանակի մասին

«Սա անմոռանալի երեկո է ակումբի և մեր երկրպագուների համար։ Մենք ապացուցեցինք, որ Եվրոպայում որակ ունենք ու կարող ենք մրցունակ լինել, ինչպես նշել էինք նախապես։ Խաղը երկու միանգամայն տարբեր փուլ ունեցավ։ Մենք լավ մտանք խաղի մեջ, և քանի դեռ հավասար կազմերով էինք (11-ը 11-ի դեմ), ամեն ինչ լավ էր. գնդակով ավելի որակյալ էինք գործում, կարողանում էինք ազատ տարածություններ գտնել։

Կարմիր քարտից հետո մեզ համար ավելի բարդ ժամանակահատված սկսվեց, ստիպված էինք մի փոքր տառապել։ Եղան պահեր, երբ ստիպված էինք ավելի խորը պաշտպանվել, քան ծրագրել էինք, դժվարություններ ունեինք եզրերը պաշտպանելիս, բայց մենք միշտ հավատում էինք ու սպասում մեր պահին: Ավելի լավ եվրոպական նորամուտ չէի էլ կարող ցանկանալ: Սա էպիկ հաղթանակ էր»։

Առաջիկա անելիքների և «Սելտիկի» դեմ խաղի մասին

«Գոհ եմ վաստակած երեք միավորից. դա այն էր, ինչ մենք ցանկանում էինք այս խաղում: Ցանկանում ենք շարունակել բարձր պահել պորտուգալական ֆուտբոլի պատիվը, և կարծում եմ՝ այսօր մենք դրա բարձրության վրա էինք։ Բոլոր պորտուգալացիները կարող են հպարտանալ մեզանով։ Մեր տրամադրվածությունը չի փոխվում. առջևում «Սելտիկի» դեմ խաղն է, և մենք պայքարելու ենք՝ փորձելով միավորներ վաստակել և հաղթել: Բոլոր հաշվարկները կանենք լիգայի փուլի ավարտին, բայց թույլ տվեք մեզ երազել, քանի որ մենք ցանկանում ենք շարունակել գեղեցիկ ֆուտբոլ ցուցադրել»:

Եվրոպա լիգայի խաղարկության լիգայի փուլի հաջորդ տուրում «Տորենսեն» նոյեմբերի 26-ին մրցելու է շոտլանդական «Սելտիկի» հետ:

ՈւԵՖԱ-ի Եվրոպա լիգայի խաղարկության լիգայի փուլի 4-րդ տուրում Հայաստանի գործող չեմպիոն «Արարատ-Արմենիան» արտագնա խաղում 2-3 հաշվով դրամատիկ պարտություն կրեց պորտուգալական «Տորենսեյից»:

Երևանյան ակումբի գլխավոր մարզիչ Մանուել Տուլիպան հետխաղային ասուլիսի ժամանակ ամփոփել է հանդիպումն ու պատասխանել լրագրողների հարցերին։

Խաղի ընթացքի և մրցակցի ֆուտբոլիստի հեռացման մասին

«Պաշտպանությունում մենք չէինք ցանկանում ցածր բլոկով խաղալ, այլ ուզում էինք վերահսկել խաղը։ Սկզբում դժվարություններ եղան պրեսինգի անցնելիս։ Մենք խաղում էինք 3-ը 1-ի դեմ, ինչը բարդացնում էր եզրերի վերահսկումը։ Կենտրոնում ևս վերահսկողության հետ կապված խնդիրներ եղան։ Մրցակցի կարմիր քարտից հետո խաղային իրավիճակը փոխվեց, սակայն պետք է գնդակով համբերատար լինեինք, և «Արարատ-Արմենիան» կարողացավ վերադառնալ խաղ ու հաշիվը դարձնել 2-1։ Սակայն, երբ սպասվում էր, որ կխփենք երրորդ գոլը, գնդակ բաց թողեցինք՝ խորությունը վերահսկելու խնդրի պատճառով։ «Տորենսեն» լավ փոխանցումից հետո գոլ խփեց, մինչդեռ մենք պետք է ավելի լավ դիրքավորվեինք:

Թիմը գիտեր, որ կարմիր քարտից հետո մրցակիցը կփորձի առաջ գնալ ու հավասարեցնել հաշիվը։ Բարդ պահ է, 4 խաղում՝ 4 պարտություն, բայց տղաները ցույց տվեցին, որ կարող են լավ ֆուտբոլ խաղալ և արժանապատվորեն ներկայացնել երկիրն ու ակումբը»։

Պաշտպանական սխալների և փորձի պակասի մասին

«Ինձ համար առաջին հերթին կարևոր է այն, թե ինչ է անում իմ թիմը։ Վերլուծելով նախորդ հանդիպումները՝ կարող եմ ասել, որ այս չորս խաղերից ամենալավն այս մեկն էր։

Պաշտպանությունում մենք շատ հաճախ ենք սխալներ թույլ տալիս, և դա մեզ դատապարտում է պարտությունների: Մենք եկել ենք Պորտուգալիա, երկու գոլ ենք խփել, բայց պարտվել ենք. այս իրավիճակն ինձ համար անթույլատրելի է: Նման գոլեր Հայաստանի առաջնությունում սովորաբար բաց չենք թողնում: Բայց այստեղ հենց որ մեկ-երկու հազարերորդական վայրկյան ուշանում ես, քեզ գոլ են խփում, որովհետև ֆուտբոլիստները որակ ունեն: Շատ կարևոր է, որ մենք արթնանանք այս մրցաշարի համար, քանի որ ցանկացած գործողություն մեծ նշանակություն ունի:

Այս խաղն էլ ցույց տվեց, որ, ամեն դեպքում, մեզ մոտ փորձի պակաս կա նման մակարդակի մրցաշարերում։ Օրինակ՝ որքան էլ «Տորենսեն» հանդես է գալիս երկրորդ դիվիզիոնում, ունի փորձառու ֆուտբոլիստներ, որոնք նախկինում խաղացել են Լա լիգայում՝ «Վիլյառեալում», «Էսպանյոլում», և նման սխալներ թույլ չեն տալիս. այդպիսի սխալները միշտ պատժվում են: Ու այն, որ մենք վերջին վեց րոպեների ընթացքում երկու գոլ բաց թողեցինք, հենց նման փորձի բացակայության հետևանքն էր։

Հասկանում եմ, որ հիմա հիասթափված եք… նաև ֆուտբոլիստներն են հիասթափված: Այո՛, ես մատնանշում եմ սխալները, բայց չեմ ուզում, որ մեր ֆուտբոլիստները գլուխները կախեն: Շատ եմ գնահատում նրանց կատարած աշխատանքը: Հատակին նայելը մեզ ոչինչ չի սովորեցնի, պետք է շարունակենք աշխատել, սա ընկալենք որպես դաս, փորձ և առաջ շարժվենք»:

Ժիրայր Շաղոյանի փոխարինման և նպատակների մասին

«Շաղոյանն իսկապես փայլուն ֆուտբոլ խաղաց, նա հրաշալի էր համագործակցում թե՛ հարձակման գծի ֆուտբոլիստների, թե՛ իր եզրում Էդգար Գրիգորյանի հետ: Բայց խաղի այդ հատվածում նման որոշում կայացրի՝ մտածելով, որ Կառլոս Ֆրանսան ավելի վերտիկալ ու արագ ֆուտբոլիստ է: Նա գուցե այնքան տեխնիկապես զարգացած չէ, որքան Շաղոյանը, բայց Ֆրանսան շատ արագ է, և նրա ուժեղ կողմը հենց դա է: Խաղի այդ պահին մտածեցի, որ թիմի համար դա ճիշտ որոշում է, քանի որ «Տորենսեն» մեզ պրեսինգի էր ենթարկում, և առջևի գծում ազատ տարածություններ էին առաջանում: Իհարկե, որոշումներ կան, որոնք կայացնելիս կարող ես սխալվել կամ ճիշտ դուրս գալ: Պետք է ընդգծեմ նաև «Տորենսեի» մարզչի գործողությունները. խաղի ընթացքում նրա կատարած փոփոխությունները շատ ճիշտ և խելացի էին:

2-1 հաշվի ժամանակ մեր միտումը պաշտպանվելը չէր, այլ հարձակումը, որոշեցինք գրոհել, բայց ստացվեց այնպես, ինչպես ստացվեց։

Լիգայի փուլից առաջ նպատակ էի դրել իմ ու թիմի առաջ, որ մենք հասնենք անցումային փլեյ-օֆֆ։ Հիմա դա շատ ավելի բարդ է, քիչ խաղեր են մնացել: Բայց եթե մենք չկարողանանք հասնել անցումային փլեյ-օֆֆ, դա ամբողջությամբ իմ պատասխանատվությունն է, ես իմ ուսերին եմ վերցնում այն: Մրցաշրջանում նաև այլ մեծ նպատակ ունենք՝ Հայաստանի չեմպիոն դառնալը»։

Կրիշտիանու Ռոնալդուի հավաքականից հեռանալու մասին

Անդրադառնալով Պորտուգալիայի հավաքականում Կրիշտիանու Ռոնալդուի ելույթների հնարավոր ավարտին՝ Տուլիպան նշել է.

«Նա այլ սերնդի ներկայացուցիչ է, որը մեծ ժառանգություն կթողնի ֆուտբոլում: Հայաստանում բոլորը գիտեն Պորտուգալիան հենց նրա շնորհիվ: Դա մի բան է, որով պորտուգալացիները շատ են հպարտանում: Ռոնալդուին ուղղված վերջին խոսքը միայն «Շնորհակալություն» կարող է լինել»:

Հիշեցնենք, որ Եվրոպա լիգայի խաղարկության լիգայի փուլի հաջորդ տուրի հանդիպումը կայանալու է նոյեմբերի 26-ին: «Արարատ-Արմենիան» արտագնա խաղում ուժերն է չափելու ավստրիական «Զալցբուրգի» հետ: Խաղը մեկնարկելու է Երևանի ժամանակով 21:45-ին:

ԵԼ լիգայի փուլի 4–րդ տուրի շրջանակում «Յուվենտուսը» մրցակցի հարկի տակ հյուրընկալվեց «Ալկմարին»։

Առաջին խաղակեսում թուրինյան թիմն առաջ էր հաշվի մեջ 2–0 հաշվով։ Նախ Կոլո Մուանին օգնեց աչքի ընկնել Կուպմեյներսին, իսկ հետո ֆրանսիացին ինքը դարձավ գոլի հեղինակ՝ Վոլտեմադեի փոխանցումից հետո։ 88–րդ րոպեին տանտերերի կազմում Մերդենկը մեկ գնդակ հետ բերեց, սակայն ավելին անել նիդերլանդական թիմին չհաջողվեց։

Այս հանդիպումից հետո «Յուվենտուսը» 10 միավորով մրցաշարային աղյուսակում 5–րդն է։ «Ալկմարը» 6 միավորով 14–րդն է աղյուսակում։

Գոլերն՝ ԱՅՍՏԵՂ։

«Բենֆիկան» սեփական հարկի տակ ուժերը չափեց «Լեխի» հետ։ Հանդիպումն ավարտվեց տանտերերի հաղթանակով՝ 3–1 հաշվով։ Պորտուգալական թիմը 12 միավորով առաջատարներից մեկն է աղյուսակում՝ «Բորնմութի» և «Ֆերենցվարոշի» հետ միասին։

Գոլերն՝ ԱՅՍՏԵՂ։

«Բայերը» սեփական հարկի տակ ընդունեց «Մարսելին»։ Ֆրանսիական թիմը հաղթեց 1–0 հաշվով՝ Ամին Գոուրիի գոլի շնորհիվ։

Գոլերն՝ ԱՅՍՏԵՂ։

Զուգահեռաբար ընթացող հանդիպումների արդյունքները․

«Սելթա» — «Յունիոն» / 1–2
«Սելթիկ» — «Բեշիքթաշ» / 3–2
«Բեր Շեվա» — ՕՖԻ / 0–2
«Շտուրմ» — «Ցելյե» / 2–3
«Սանդերլենդ» — «Դինամո Զ․» / 0–2

Մրցաշարային աղյուսակը

ՈւԵՖԱ-ի Եվրոպա լիգայի խաղարկության 2026/27 մրցաշրջանի լիգայի փուլի 4–րդ տուրում Հայաստանի գործող չեմպիոն «Արարատ-Արմենիան» հյուրընկալվել էր պորտուգալական «Տորենսեին»։

Առաջին խաղակեսից հետո լուսատախտակին հաշիվը 1–1 էր։ Հանդիպման 13–րդ րոպեին տանտերերի հարձակվող Ագիրեն բացեց հաշիվը։ Սակայն 25–րդ րոպեին Կուբան ներկայացնող ֆուտբոլիստը կարմիր քարտ ստացավ․ պորտուգալական թիմը մնաց 10 հոգով։ Մինչ ընդմիջման գնալը, 41–րդ րոպեին, երևանյան թիմի ֆուտբոլիստները հավասարացրին հաշիվը․ Շաղոյանի փոխանցումից աչքի ընկավ Մուրադյանը։

Երկրորդ խաղակեսում մեր թիմի ֆուտբոլիստներն արդեն առաջ անցան հաշվի մեջ․ 59–րդ րոպեին աչքի ընկավ Բրունո Վիլսոնը։ 77–րդ րոպեին թիմերի կազմերը ևս հավասարվեցին․ «Արարատ-Արմենիայի» կազմում կարմիր քարտ ստացավ դարպասապահ Բրավիմը։ Ավելացված րոպեներին տանտերերը կարողացան հավասարեցնել հաշիվը․ աչքի ընկավ Վասկեսը։ Քիչ անց պորտուգալական թիմը ևս մեկ գոլ խփեց և հաղթանակ կորզեց 3–2 հաշվով։

Չորս տուրից հետո «Արարատ-Արմենիան» դեռ միավոր չի վաստակել և եզրափակում է լիգայի փուլի մրցաշարային աղյուսակը։

«Արարատ-Արմենիան» հաջորդ՝ 5–րդ տուրում, նոյեմբերի 26–ին, կհյուրընկալվի «Զալցբուրգին»։

Հանդիպման գոլերը՝ ԱՅՍՏԵՂ։

Մրցաշարային աղյուսակը

ՈւԵՖԱ-ի Եվրոպա լիգայի խաղարկության 2026/27 մրցաշրջանի լիգայի փուլի 4–րդ տուրում Հայաստանի գործող չեմպիոն «Արարատ-Արմենիան» հյուրընկալվել է պորտուգալական «Տորենսեին»։

Առաջին խաղակեսից հետո լուսատախտակին հաշիվը 1–1 էր։

Երկրորդ խաղակեսում մեր թիմի ֆուտբոլիստներն արդեն առաջ անցան հաշվի մեջ․ 59–րդ րոպեին աչքի ընկավ Բրունո Վիլսոնը։

Հանդիպման գոլերը՝ ԱՅՍՏԵՂ։

ՈւԵՖԱ-ի Եվրոպա լիգայի խաղարկության 2026/27 մրցաշրջանի լիգայի փուլի 4–րդ տուրում Հայաստանի գործող չեմպիոն «Արարատ-Արմենիան» հյուրընկալվել է պորտուգալական «Տորենսեին»։

Առաջին խաղակեսից հետո լուսատախտակին հաշիվը 1–1 է։

Հանդիպման 13–րդ րոպեին տանտերերի հարձակվող Ագիրեն բացեց հաշիվը։ Սակայն 25–րդ րոպեին Կուբան ներկայացնող ֆուտբոլիստը կարմիր քարտ ստացավ․ պորտուգալական թիմը մնաց 10 հոգով։

Մինչ ընդմիջման գնալը, 41–րդ րոպեին, երևանյան թիմի ֆուտբոլիստները հավասարացրին հաշիվը․ Շաղոյանի փոխանցումից աչքի ընկավ Մուրադյանը։

Հանդիպման գոլերը՝ ԱՅՍՏԵՂ։

ԵԼ լիգայի փուլի 4–րդ տուրի շրջանակում «Բորնմութը» մրցակցի հարկի տակ հանդիպեց Պրահայի «Սպարտայի» հետ։

Առաջին խաղակեսից հետո Պրահան ներկայացնող թիմը հաղթում էր 1–0 հաշվով Սիգնատեի գոլի շնորհիվ։ Սակայն երկրորդ խաղակեսում անգլիական թիմը երեք անպատասխան գնդակ ուղարկեց մրցակցի դարպասը․ գոլերով աչքի ընկան Ադամսը, Էվանիլսոնը և Ռայանը։

Այս հանդիպումից հետո «Բորնմութը» ունի 100 տոկոսանոց արդյունք և 12 միավորով մրցաշարային աղյուսակի առաջատարն է։ Չեխական թիմը 4 միավորով 19–րդն է։

Գոլերն՝ ԱՅՍՏԵՂ։

«Լիոնը» մրցակցի հարկի տակ ուժերը չափեց «Ռեալ Սոսյեդադի» հետ։ Հանդիպումն ավարտվեց 1–1 հաշվով։ Օսկարսոնի գոլին հյուրերը պատասխանեցին Տոլիսոյի գոլով։

Գոլերն՝ ԱՅՍՏԵՂ։

Զուգահեռաբար ընթացող հանդիպումների արդյունքները․

«Լիլեստրյոմ» — «Վիկտորիա» / 0-1
«Նեյմիգեն» — «Օմոնիա» / 3-1

Մրցաշարային աղյուսակը

ԵԼ լիգայի փուլի 4–րդ տուրի շրջանակում «Միլանը» սեփական հարկի տակ ընդունեց «Ֆերենցվարոշին»։

Հունգարական թիմն արտագնա հաղթանակ տոնեց 2–0 հաշվով․ դուբլ ձևակերպեց Հաիթին ներկայացնող Լենի Ժոզեֆը։ Երկու դեպքում էլ գոլային փոխանցում կատարեց նորվեգացի Զաքարիսենը։

Այս հանդիպումից հետո «Միլանը» 3 միավորով մրցաշարային աղյուսակում 26–րդն է։ «Ֆերենցվարոշը» 12 միավորով «Բորնմութի» հետ գլխավորում է աղյուսակը։

Գոլերն՝ ԱՅՍՏԵՂ։

«Քրիսթալ Փելասը» սեփական հարկի տակ ուժերը չափեց «Հոֆենհայմի» հետ։ Հանդիպումն ավարտվեց ոչ–ոքի՝ 1–1 հաշվով։ Պրասի գոլին հանդիպման վերջին րոպեներին տանտերերը պատասխանեցին Կամադայի գոլով։

Գոլերն՝ ԱՅՍՏԵՂ։

Զուգահեռաբար ընթացող հանդիպումների արդյունքները․

«Անդերլեխտ» — «Զալցբուրգ» / 2–0
«Լևսկի» — «Յագելոնիա» / 1–0

Մրցաշարային աղյուսակը

Այսօր՝ նոյեմբերի 5-ին, ՈւԵՖԱ-ի Եվրոպա լիգայի խաղարկության 2026/27 մրցաշրջանի լիգայի փուլի 4–րդ տուրում Հայաստանի գործող չեմպիոն «Արարատ-Արմենիան» կհյուրընկալվի պորտուգալական «Տորենսեին»։

Հանդիպումը կմեկնարկի Երևանի ժամանակով ուղիղ կեսգիշերին։ Թիմերը խաղադաշտ դուրս կգան հետևյալ մեկնարկային կազմերով․

ՈւԵՖԱ Եվրոպա լիգայի լիգայի փուլի 4-րդ տուրում Երևանի «Արարատ-Արմենիան» Պորտուգալիայում կհյուրընկալվի տեղի «Տորենսեին»։ Հայկական ակումբի միանգամից երեք ներկայացուցիչների համար այս դիմակայությունն ունի առանձնահատուկ ենթատեքստ․ գլխավոր մարզիչ Մանուել Տուլիպան նախկինում գլխավորել է պորտուգալական թիմը, իսկ կիսապաշտպաններ Բենի Դիաշն ու Խուան Բալանտան պաշտպանել են այդ ակումբի գույները։

Չնայած մրցաշարի մեկնարկային երեք տուրերում կրած պարտություններին՝ երևանյան թիմի ճամբարում տրամադրությունը մարտական է։ Հանդիպման նախօրեին կայացած մամուլի ասուլիսի ընթացքում Մանուել Տուլիպան խոսել է առաջիկա խաղի սպասելիքների, տակտիկական վերադասավորումների և թիմի ներքին խոհանոցի մասին։

— Պորտուգալացի մասնագետները հաճախ են հաջողության հասնում իրենց նախկին ակումբների դեմ խաղերում․ վառ օրինակ է Ժոզե Մոուրինյուն։ Ձեզ համար ի՞նչ նշանակություն և լրացուցիչ մոտիվացիա ունի «Տորենսեի» դեմ դիմակայությունը։

— Դեռ ամռանը մեր առջև խնդիր էր դրված նվաճելու Կոնֆերենցիաների լիգայի ուղեգիր, սակայն մենք ավելիին հասանք և հայտնվեցինք Եվրոպա լիգայում։ Ես իրատես եմ և հստակ գիտակցում եմ, որ մենք այն թիմը չենք, որը կարող է հաղթել այս մրցաշարում, սակայն փոքր հաղթանակների միջոցով մենք քայլ առ քայլ ձևավորել ենք հաղթողի հոգեբանություն։

Ինձ համար միշտ սկզբունքային է եղել հաղթելը՝ պահպանելով սեփական խաղային ձեռագիրն ու ինքնությունը։ Սակայն Եվրոպա լիգայում հանդես գալն ինձ սովորեցրեց, որ արդյունքի կարելի է հասնել նաև տակտիկական այլ մոտեցումներով։ Մենք փորձարկեցինք տարբեր մտահղացումներ և համոզվեցինք, որ կարող ենք հաղթել նույնիսկ առանց գնդակի տիրապետման բացահայտ առավելության։

Ինձ համար կապ չունի, թե ով է մրցակիցը․ ես ցանկանում եմ հաղթել յուրաքանչյուր խաղում։ Այս պահին մենք գերմոտիվացված ենք, և «Տորենսեի» դեմ մեր միակ նպատակը հաղթանակն է։ Վառ օրինակը «Նոայի» նկատմամբ մեր վերջին հաղթանակն էր․ այդ խաղում կատարեցինք մի շարք տակտիկական փոփոխություններ, որոնք տվեցին ցանկալի արդյունքը։ Ընդհանուր առմամբ, վերջին շրջանում թիմը տակտիկական առումով լուրջ առաջընթաց է գրանցել։ Մենք ուզում ենք հաղթել ոչ միայն մեր ակումբի, այլև ամբողջ Հայաստանի համար, քանի որ մեր երկրին խիստ անհրաժեշտ են ՈւԵՖԱ-ի վարկանիշային միավորներ։

— Եվրոպա լիգայի նախորդ երեք խաղերում «Արարատ-Արմենիան» փայլուն էր անցկացնում 20-25 րոպեանոց հատվածներ, որից հետո խաղային անկում էր նկատվում։ Ինչպե՞ս պահպանել այդ տեմպը ողջ հանդիպման ընթացքում։

— Կայունության պահպանումն իսկապես մեր ամենամեծ խնդիրներից է, հատկապես՝ եվրագավաթային մակարդակում։ Առաջիկա խաղում կփորձենք շտկել այդ բացը։ Այո՛, մենք պարտվել ենք բոլոր երեք հանդիպումներում, բայց ես դրանք լիակատար ձախողում չեմ համարում։ Յուրաքանչյուր խաղում էլ եղել են դրական ժամանակահատվածներ, երբ թիմը որակյալ ֆուտբոլ է ցուցադրել։ Հիմա մենք կենտրոնանում ենք հենց այդ դրական պահերի վրա, և մեր խնդիրն է հասկանալ, թե ինչպես կարող ենք այդ հատվածներն ավելի երկար դարձնել։

Չպետք է մոռանալ նաև, որ Հայաստանի առաջնությունում մենք ընդամենը մեկ պարտություն ենք կրել, այնպես որ ամեն ինչ չէ, որ վատ է ընթանում։ Եվրոպա լիգայի երեք տուրերից հետո մենք արդեն մեծ դասեր ենք քաղել։ Հարգում եմ մրցակցին, բայց համոզված եմ, որ ունակ ենք հաղթելու «Տորենսեին»։

— Արթուր Սերոբյանը հաճախ է նահանջում խորք և մեծ ծավալի սև աշխատանք կատարում պաշտպանությունում։ Հաշվի առնելով, որ «Տորենսեն» ունի հարձակմանը շատ ակտիվ միացող ձախ պաշտպան՝ Վասկեսը, արդյո՞ք Սերոբյանը կրկին ստիպված է լինելու կենտրոնանալ պաշտպանողական գործողությունների վրա։

— Ճիշտ հակառակը․ դա նշանակում է, որ Սերոբյանը պետք է է՛լ ավելի սուր ու արդյունավետ գործի հարձակման գծում, որպեսզի Վասկեսը զրկվի առաջ շարժվելու և գրոհներին միանալու հնարավորությունից։

Միևնույն ժամանակ ուզում եմ ընդգծել, որ Արթուրը հիանալի է կատարում իր պաշտպանողական պարտականությունները։ Այն փաստը, որ նրա նկատմամբ այսքան մեծ հետաքրքրություն կա, և որ նա հունվարին հեռանալու է ակումբից, խոսում է հենց նրա բարձր որակների մասին։ Ժամանակակից ֆուտբոլում, երբ ակումբները ֆուտբոլիստ են ձեռք բերում, գնահատում են ոչ միայն նրա հարձակողական ներուժը, այլև պաշտպանվելու կարողությունը՝ անհրաժեշտության դեպքում նահանջելով ու գործելով հինգ պաշտպանի գծում։ Սերոբյանն այդ առումով գերազանց է գործում, և նա այս մակարդակին է հասել իր քրտնաջան աշխատանքի ու բնավորության շնորհիվ։

ՈւԵՖԱ Եվրոպա լիգայի լիգայի փուլի 4-րդ տուրի «Տորենսե» – «Արարատ-Արմենիա» հանդիպումը կկայանա Պորտուգալիայում նոյեմբերի 5-ին, Երևանի ժամանակով 23։55-ին։ 

Հիշեցնենք, որ Պորտուգալիայի երկրորդ դիվիզիոնը ներկայացնող «Տորենսեն» եվրագավաթային ուղեգիր է նվաճել երկրի գավաթակիր դառնալու շնորհիվ։