Իսպանիայի արքայական ֆուտբոլի ֆեդերացիան համաձայնության է եկել ազգային հավաքականի գլխավոր մարզիչ Լուիս դե լա Ֆուենտեի հետ՝ երկարաձգելով պայմանագիրը մինչև առնվազն 2030 թվականը։ Այս մասին Մադրիդում կայացած World Football Summit ֆորումի ժամանակ պաշտոնապես հայտարարել է RFEF-ի նախագահ Ռաֆայել Լուսանը։

Նախորդ համաձայնագիրը նախատեսված էր մինչև 2028 թվականի ամառը, սակայն ֆեդերացիան որոշել է գնահատել մասնագետի բացառիկ աշխատանքը նոր և ավելի շահավետ պայմաններով։

«Մենք ունենք պատմության լավագույն գլխավոր մարզիչը, նրա նվաճած տիտղոսներն ու արդյունքներն ինքնին խոսուն են։ Նա թիմին կայունություն և վստահություն է հաղորդել։ Իսպանացի երկրպագուները սիրում ու հիանում են նրանով։ Մենք ավարտին ենք հասցնում համաձայնագրի կնքումը, որպեսզի նա ևս մի քանի տարի մնա մեզ հետ»,— նշել է Լուսանը։

Ըստ իսպանական մամուլի՝ 65-ամյա մասնագետի աշխատավարձը զգալիորեն կբարձրանա՝ տատանվելով տարեկան 4-5 միլիոն եվրոյի սահմաններում: Այս նոր պայմանագրով Դե լա Ֆուենտեն կընդգրկվի աշխարհի ամենաբարձր վարձատրվող հավաքականների մարզիչների լավագույն հնգյակում։ Բացի այդ, մարզիչը պահանջել է բարելավել նաև իր մարզչական շտաբի ֆինանսական պայմանները։

Դե լա Ֆուենտեն գլխավորել է Իսպանիայի հավաքականը 2022 թվականի դեկտեմբերին՝ փոխարինելով Լուիս Էնրիկեին․ մինչ այդ նա երկար տարիներ մարզել էր Իսպանիայի Մ-19 և երիտասարդական հավաքականները։ Այդ ժամանակահատվածում նրա գլխավորությամբ «Ֆուրիա Ռոխան» անցկացրել է 49 հանդիպում, տոնել 39 հաղթանակ, գրանցել 7 ոչ-ոքի և կրել ընդամենը 3 պարտություն:

Նրա ղեկավարությամբ Իսպանիան դարձավ իսկական ֆուտբոլային հեգեմոն՝ նվաճելով.

• ՈւԵՖԱ-ի Ազգերի լիգայի գավաթը (2022/2023)
• Եվրոպայի չեմպիոնի կոչումը (Եվրո-2024)
• Աշխարհի չեմպիոնի տիտղոսը (ԱԱ-2026), որտեղ հուլիսի 19-ին Նյու Յորքում կայացած եզրափակիչում իսպանացիները լրացուցիչ ժամանակում 1:0 հաշվով հաղթեցին Արգենտինային։

Նշենք նաև, որ թիմը հասել էր 2025թ. Ազգերի լիգայի եզրափակիչ, որտեղ հետխաղյա 11-մետրանոցներով զիջել էր Պորտուգալիային:

Ակնկալվում է, որ նոր պայմանագրով Դե լա Ֆուենտեն կնախապատրաստի թիմը նաև տնային՝ 2030 թվականի Աշխարհի առաջնությանը, որը կանցկացվի Իսպանիայում, Պորտուգալիայում և Մարոկկոյում։

Իսկ մինչ այդ՝ աշխարհի նորընծա չեմպիոնները կնշեն իրենց վերադարձը ՈւԵՖԱ-ի Ազգերի լիգայի շրջանակներում: Նորաձև՝ եռաշաբաթյա դադարի ընթացքում Իսպանիան կհանդիպի Անգլիային («Ուեմբլի» մարզադաշտում), այնուհետև տանը կընդունի Խորվաթիային և Չեխիային, իսկ վերջում արտագնա խաղում ուժերը կչափի խորվաթների հետ։

Առաջիկա հանդիպումների հայտացուցակը կհրապարակվի արդեն այս ուրբաթ։ Հայտնի է, որ հավաքականին չեն օգնի վնասվածքներ ունեցող Պեդրո Պոռոն և Բորխա Իգլեսիասը, իսկ Մարկոս Լյորենտեն արդեն իսկ հայտարարել է ազգային թիմում ելույթներն ավարտելու մասին:

«Բարսելոնայի» իսպանացի հարձակվող Լամին Յամալը նշել է ամենաբարդ մրցակցին, ում դեմ երբևէ խաղացել է։

«Ամենաբարդ մրցակիցս եղել է Դավիդ Ռաում, (Գերմանիայի հավաքականի և «Լայպցիգի» ձախ պաշտպան)։ Գերմանացիների դեմ Եվրո-2024-ի քառորդ եզրափակիչում նա բարդ մրցակից էր ինձ համար, որին դժվար էր հաղթել»,- Յամալի խոսքերն է մեջբերում Tuttosport-ը։

Հիշեցնենք, որ Իսպանիան հաղթեց Գերմանիայում կայացած Եվրոպայի առաջնությունում, իսկ Լամինը ճանաչվեց առաջնության լավագույն երիտասարդ խաղացող։

Ընթացիկ մրցաշրջանում Յամալը կատալոնական ակումբի կազմում անցկացրած 21 խաղում, դարձել է 6 գոլի և 12 գոլային փոխանցման հեղինակ։

«Նապոլիի» վրացի կիսապաշտպան Խվիչա Կվարացխելիան խոսել է Եվրոպայի առաջնության խմբային փուլում Պորտուգալիայի նկատմամբ տարած հաղթանակի մասին (2:0)։

«Եվրո-2024-ում Պորտուգալիայի դեմ խաղն ամենակարևորն էր: Ես խաղում էի մի խաղացողի դեմ, որն իմ կուռքն է եղել և ես նրան երկրպագել եմ դեռ մանկուց։

Խաղից առաջ ես ինքս ինձ ասացի. «Սա իմ լավագույն ժամն է», և ես գիտեի, որ պետք է դա ցույց տամ խաղադաշտում: Քո կուռքի դեմ խաղալը հսկայական մոտիվացիա է:

Դա անհավանական էր։ Ռոնալդուն մոտեցավ ինձ և հաջողություն մաղթեց: Ես յոթերորդ երկնքում էի։ Այդ երեկո ես տվեցի ամեն ինչ և օգնեցի իմ թիմին հասնել պատմական արդյունքի»,- ասել է Խվիչան։

Հիշեցնենք, որ Եվրո-2024-ի խմբային փուլում Վրաստանը կարողացավ 2։0 հաշվով պարտության մատնել Պորտուգալիայի ընտրանուն։

Գերմանիայի ազգային հավաքականի նախկին կիսապաշտպան Տոնի Կրոսը ծաղրել է ՈւԵՖԱ-ի դիրքորոշումն Իսպանիայի ընտրանու պաշտպան Մարկ Կուկուրելյայի ձեռքով խաղի վերաբերյալ Եվրո-2024-ում: Այս մասին տեղեկացնում է 90min-ը։

Եվրո-2024-ի 1/4 եզրափակչի Իսպանիա-Գերմանիա խաղում մրցավար Էնթոնի Թեյլորը 106-րդ րոպեին չի նշանակել 11-մետրանոց հարված գերմանական հավաքականի օգտին այն բանից հետո, երբ Ջամալ Մուսիալայի հարվածից հետո գնդակը դիպել է Մարկ Կուկուրելյայի ձեռքին: VAR-ը չի միջամտել դրվագին: Խաղը ավարտվել է Իսպանիայի հաղթանակով՝ 2:1 հաշվով: Ի վերջո, իսպանացիները հաղթել են մրցաշարը:

Երեկ ՈւԵՖԱ-ն ճանաչել է, որ Գերմանիան պետք է ստանար 11-մետրանոց՝ Կուկուրելյայի ձեռքով խաղի համար:

«Նրանց երեք ամիս էր պետք՝ հասկանալու համար, որ դա ձեռքով խաղ էր, մինչդեռ գրեթե բոլորը դա հասկացան վայրկենապես։ Այդ փաստն ինձ շատ է հանգստացնում:

Հիմա կարո՞ղ եմ ինձ Եվրոպայի չեմպիոն կոչել, քանի որ նրանք պաշտոնապես հաստատեցին դա: Ըստ իս՝ ոչ»,- ծիծաղելով ասել է Գերմանիայի հավաքականի և «Ռեալի» նախկին կիսապաշտպանը։

Անգլիայի հավաքականի պաշտպան Կայ Ուոքերը խոսել է 2024 թվականին Գերմանիայում անցկացված Եվրոպայի առաջնության ժամանակ ազգային հավաքականի հասցեին հնչող քննադատությունների մասին։

«Ես կստեմ, եթե ասեմ, թե մենք դա չենք քննարկել: Մենք բոլորս մարդ ենք, և բոլորն ուզում են դուր գալ, հատկապես երբ աշխատանքդ անում ես մեծ նվիրվածությամբ և սիրով»,- Ուոքերի խոսքերն է մեջբերում BBC-ն։

Անգլիայի հավաքականը դուրս է եկել Եվրո-2024-ի եզրափակիչ, որտեղ 2։1 հաշվով պարտվել է Իսպանիային։ Հաղթական գոլը հանդիպման 86-րդ րոպեին խփել է հարձակվող Միկել Օյարսաբալը։

Մրցաշարից հետո Գարեթ Սաութգեյթը լքել է ազգային հավաքականի գլխավոր մարզչի պաշտոնը, որը զբաղեցնում էր 2016 թվականի սեպտեմբերից։ Նրա գլխավորությամբ թիմը երկու անգամ հասել է Եվրոպայի առաջնության եզրափակիչ, ինչպես նաև խաղացել է ԱԱ-2018-ի կիսաեզրափակչում և 2022-ի աշխարհի առաջնության քառորդ եզրափակիչում։

«Բարսելոնայի» իսպանացի կիսապաշտպան Պեդրին փոխել է իր ոճը՝ այժմ խաղացողը ունի բեղեր։ Այսպիսով, ֆուտբոլիստը կատարել է այն խոստումը, որը տվել էր, եթե Իսպանիայի հավաքականը հաղթեր ԵՎՐՈ-ում։

Իսպանացին իր instagram-յան էջի story բաժնում նոր կերպարով թարմ լուսանկար է հրապարակել դրան կից գրելով. «Խոստումները պետք է պահվեն»։

Հիշեցնենք, որ ԵՎՐՈ-2024-ի եզրափակիչում Իսպանիան 2։1 հաշվով հաղթեց Անգլիային և պատմության մեջ 4-րդ անգամ հռչակվեց Եվրոպայի չեմպիոն։

Ինքը՝ Պեդրին մրցաշարը ավարտեց շատ ավելի վաղ, ԵՎՐՈ-2024-ի քառորդ եզրափակիչում Գերմանիայի հավաքականի նախկին կիսապաշտպան Տոնի Կրոսի հետ բախման արդյունքում ստացած վնասվածքի պատճառով։

Իսպանիայի հավաքականի գլխավոր մարզիչ Լուիս դե լա Ֆուենտեն պատասխանել է այն հարցին, թե փոխվե՞լ է արդյոք 2024 թվականի Եվրոպայի առաջնությունում հաղթելուց հետո։

«Բացարձակապես ոչ: Մարդու էությունը չի փոխվում. ես նույնն եմ, ինչպես միշտ: Իմ ընթացքը նույնն է՝ ամեն օր փորձիր լինել ավելի լավ մասնագետ և առաջին հերթին ավելի լավ մարդ: Դա այն է, ինչ ինձ իսկապես հուզում է այսօր՝ մեկ կամ 15 տարի առաջ՝ լինել ավելի լավ մարդ, հեշտացնել մարդկանց կյանքը: Ես փորձում եմ հետևել Մայր Թերեզայի խորհրդին՝ թույլ մի՛ տուր, որ քեզ մոտ եկողը հեռանա առանց մի փոքր ավելի լավը դառնալու։ Փորձում եմ դա անել ամեն օր»,- դե լա Ֆուենտեի խոսքերն է մեջբերում Marca-ն։

Հիշեցնենք, որ ԵՎՐՈ-2024-ի եզրափակիչում Իսպանիան 2:1 հաշվով հաղթեց Անգլիային։ «Ֆուրիա Ռոխայի» կազմում հաղթական գոլը 86-րդ րոպեին խփեց Միկել Օյարսաբալը։

Եվրոպական ֆուտբոլային ասոցիացիաների միությունը (ՈՒԵՖԱ) կարգապահական վարույթ է հարուցել Իսպանիայի հավաքականի խաղացողներ Ռոդրիի և Ալվարո Մորատայի նկատմամբ, ովքեր 2024 թվականի Եվրոպայի առաջնությունում Ֆուրիա Ռոխայի հաղթանակի տոնակատարության ժամանակ վանկարկել են «Ջիբրալթարն իսպանական է»։ Այս մասին հայտնում է ՈւԵՖԱ-ի կայքը։

Ռոդրին և Մորատան մեղադրվում են ՈՒԵՖԱ-ի Կարգապահական կանոնակարգի չորս կետերը խախտելու մեջ.

1. Վարքագծի ընդհանուր կանոնների խախտում

2. Արժանապատիվ վարքագծի տարրական կանոնների խախտում

3. Սպորտային իրադարձությունների օգտագործումը ոչ սպորտային հայտարարություններ անելու համար

4. Ֆուտբոլի և ՈՒԵՖԱ-ի հեղինակությանը վնասելը

ՈւԵՖԱ-ի հայտարարության մեջ նշվում է, որ ՈՒԵՖԱ-ի վերահսկողության, էթիկայի և կարգապահական մարմինը համապատասխան որոշում կկայացնի այդ հարցի վերաբերյալ:

ԵՎՐՈ-ի խմբային փուլում 4 սոցցանցերում հայտնաբերվել է ավելի քան 9 հազար վիրավորանք՝ ուղղված մասնակից թիմերին, որոնց մեծ մասը ջնջվել է։

ԵՎՐՈ-2024-ի ժամանակ Բելգիայի, Նիդերլանդների, Անգլիայի և Ֆրանսիայի հավաքականներն ավելի շատ են արժանացել վիրավորանքների, քան մյուս մասնակից հավաքակնները միասին, հայտնում է ՈւԵՖԱ-ի կայքը։

Facebook, Instagram, TikTok և X սոցիալական ցանցերում մոնիտորինգի հատուկ ծրագիրն ընդգրկել է ազգային հավաքականների, մարզիչների, խաղացողների և մրցավարների 696 օգտահաշիվներ։ Արդյունքում մրցաշարի ընթացքում ամենաշատ վիրավորանքները եղել են Անգլիայի հավաքականի հասցեին, որը եզրափակիչում 1։2 հաշվով պարտվեց Իսպանիային։

Ֆրանսիացի հարձակվող Կարիմ Բենզեման արձագանքել է Եվրո-2024-ում Իսպանիայի հավաքականի խաղին։

«Իսպանիան Եվրո-2024-ի լավագույն թիմն էր։

Նրանք արժանիորեն հաղթեցին մրցաշարը»,- ֆուտբոլիստի խոսքերն է մեջբերում Marca-ն։

Հուլիսի 14-ին Եվրո-2024-ի եզրափակիչում Իսպանիան հաղթեց Անգլիային (2-1): Իսպանացիները չորրորդ անգամ դարձան Եվրոպայի չեմպիոն․ սա ԵԱ-ի նոր ռեկորդ է։