Կատալոնական «Բարսելոնայի» և Իսպանիայի հավաքականի աստղային հարձակվող Լամին Յամալը հայտարարել է, որ մեծ ցանկություն ունի գլխավոր եվրոպական ակումբային մրցաշարում ուժերը չափելու Մադրիդի «Ռեալի» հետ։

«Ես ուզում եմ հանդիպել «Ռեալին» Չեմպիոնների լիգայում։ Ես դեռ երբեք չեմ խաղացել նրանց դեմ այս մրցաշարում»,- երիտասարդ ֆուտբոլիստի խոսքերն է մեջբերում The Touchline-ը։

Հիշեցնենք, որ «Բարսելոնան» ու «Ռեալը» Չեմպիոնների լիգայում վերջին անգամ միմյանց հանդիպել են 2010/11 թվականների մրցաշրջանում։ Այն ժամանակ կատալոնացիներն ավելի ուժեղ գտնվեցին կիսաեզրափակիչում՝ Մադրիդի «Սանտյագո Բեռնաբեու» մարզադաշտում հաղթելով 2-0 հաշվով, իսկ «Կամպ Նոուում» գրանցելով 1-1 հաշվով ոչ-ոքի։ Դրանից հետո «կապտանռնագույնները» եզրափակիչում պարտության մատնեցին անգլիական «Մանչեսթեր Յունայթեդին»՝ նվաճելով «ականջավոր» գավաթը։

Հավելենք, որ իսպանական ֆուտբոլի առաջիկա «Էլ Կլասիկոն» կկայանա հոկտեմբերի 25-ին. Իսպանիայի Լա լիգայի հերթական տուրի շրջանակում «Բարսելոնան» սեփական հարկի տակ կընդունի «սերուցքայիններին»։

Կատալոնական «Բարսելոնայի» և Իսպանիայի հավաքականի եզրային հարձակվող Լամին Յամալն առանձնացրել է այն թիմերին, որոնք ունակ են լուրջ խնդիրներ ստեղծել կատալոնացիների համար Չեմպիոնների լիգայի ընթացիկ խաղարկությունում։

Բացատրելով, թե հատկապես ինչով են Մյունխենի «Բավարիան» ու ֆրանսիական ՊՍԺ-ն գերազանցում «կապտանռնագույններին», երիտասարդ ֆուտբոլիստը նշել է․

«Մեր թուլությունն ի հայտ է գալիս այնպիսի թիմերի դեմ խաղերում, ինչպիսիք են «Բավարիան» կամ ՊՍԺ-ն։ Պատճառն այն է, որ նրանք ֆիզիկապես ավելի ուժեղ են․ նրանք ստիպում են քեզ շատ վազել և պահպանել կենտրոնացվածությունն ամբողջ հանդիպման ընթացքում։ «Արսենալն» այլ պատմություն է։ Այնտեղ խաղն ավելի տակտիկական է և առավելապես կապված է գնդակի վերահսկողության հետ։

Կարծում եմ՝ ՊՍԺ-ն Չեմպիոնների լիգան հաղթելու գլխավոր ֆավորիտներից մեկն է, բայց նրանց խնդիրն այն է, որ տիտղոսը պաշտպանելը շատ բարդ է։ Դա ամենադժվար բանն է ֆուտբոլում։ Դա է նաև իմ վախը հաղթանակներից հետո՝ մենք կարող ենք թուլանալ»,- ասել է Յամալը Movistar-ին տված հարցազրույցից։

Հավելենք, որ Չեմպիոնների լիգայի շրջանակում «Բարսելոնան» իր առաջիկա հանդիպումը կանցկացնի հոկտեմբերի 13-ին՝ արտագնա խաղում ուժերը չափելով թուրքական «Գալաթասարայի» հետ։

«Բարսելոնայի» տնային մարզադաշտը՝ վերակառուցվող «Կամպ Նոուն», կընդունի Չեմպիոնների լիգայի 2028/29 մրցաշրջանի եզրափակիչը։

ՈւԵՖԱ-ի այս որոշումը խորհրդանշական է, քանի որ այն տեղի կունենա կատալոնական մարզադաշտում կայացած վերջին եզրափակիչից ուղիղ 30 տարի անց։ Մինչ այդ՝ 2027/28 մրցաշրջանի գլխավոր հանդիպումը կկայանա Մյունխենի «Ալյանց Արենայում»։

Թեև լայնամասշտաբ շինարարական աշխատանքների պատճառով «Բարսելոնան» հաջորդ մրցաշրջանում ևս ստիպված կլինի խաղալ «Մոնտժուիկում», ՈւԵՖԱ-ում վստահ են՝ 2029 թվականի հունիսին «Կամպ Նոուն» իդեալական պատրաստ կլինի ընդունելու մայրցամաքի գլխավոր ֆուտբոլային իրադարձությունը: Ակումբը դեռ մոտ երեք տարի ունի նախապատրաստվելու համար, իսկ քվեարկության արդյունքում Բարսելոնան առաջ է անցել Լոնդոնի «Ուեմբլիից»:

Վերակառուցումից հետո նորացված «Կամպ Նոուն» կտեղավորի 105 հազար հանդիսականի՝ դառնալով աշխարհի լավագույն և ամենաժամանակակից մարզադաշտերից մեկը, ինչն էլ վճռորոշ դեր է խաղացել ՈւԵՖԱ-ի որոշման մեջ։

Բացի այդ, այս նշանակումն արդյունք է ՈւԵՖԱ-ի նախագահ Ալեքսանդր Չեֆերինի և «Բարսելոնայի» նախագահ Ժոան Լապորտայի միջև հարաբերությունների ջերմացման, որը սկիզբ առավ մեկ տարի առաջ։ Նախկինում «Կամպ Նոուն» ՉԼ եզրափակիչներ հյուրընկալել է երկու անգամ՝ 1989 և 1999 թվականներին:

ՈւԵՖԱ-ն հրապարակել է նաև եվրագավաթային մյուս մրցաշարերի առաջիկա եզրափակիչների անցկացման վայրերը.

ՈւԵՖԱ Չեմպիոնների լիգա

• 2028: Մյունխենի մարզադաշտ (Գերմանիա)
• 2029: «Կամպ Նոու», Բարսելոնա (Իսպանիա)

Կանանց Չեմպիոնների լիգա

• 2028: Լիոնի Օլիմպիական զբոսայգի (Ֆրանսիա)
• 2029: Ուելսի ազգային մարզադաշտ, Քարդիֆ (Ուելս)

Եվրոպա լիգա

• 2028: Ազգային մարզադաշտ, Բուխարեստ (Ռումինիա)
• 2029: Սերբիայի ազգային մարզադաշտ, Բելգրադ (Սերբիա)

Կոնֆերենցիաների լիգա

• 2028: «Յուվենտուսի» մարզադաշտ, Թուրին (Իտալիա)
• 2029: «Պուշկաշ Արենա», Բուդապեշտ (Հունգարիա)

ՈւԵՖԱ Սուպերգավաթ

• 2027: «Յոհան Կրոյֆ Արենա», Ամստերդամ (Նիդերլանդներ)
• 2028: «Աստանա Արենա», Աստանա (Ղազախստան)

Ֆուտզալի Չեմպիոնների լիգա

• 2027: «Բիլ/Բիեն Արենա» (Շվեյցարիա)

Կատալոնական «Բարսելոնան» մեծ հույսեր ունի, որ նորացված «Սփոթիֆայ Կամպ Նոու» մարզադաշտը կդառնա Չեմպիոնների լիգայի 2029 թվականի եզրափակիչի անցկացման վայրը։

Ակումբի նախագահ Ժոան Լապորտան խոսել է այս մասին հենց այն օրը, երբ ՈւԵՖԱ-ն պետք է վերջնական որոշում կայացնի կատալոնական մարզադաշտի և լոնդոնյան «Ուեմբլիի» միջև:

«Մենք կցանկանայինք ընտրվել 2029 թվականի Չեմպիոնների լիգայի եզրափակիչի համար, բայց մինչ այդ պետք է շատ աշխատենք, որպեսզի մարզադաշտի մուտքերն ու ենթակառուցվածքները լիովին հասանելի դառնան, և մենք ունենանք նմանատիպ մակարդակի հանդիպում կազմակերպելու համար 100 տոկոսով պատրաստ դաշտ»,- պարզաբանել է Լապորտան:

Ակումբի ղեկավարը գիտակցում է, որ նման մասշտաբի միջոցառում հյուրընկալելուց առաջ «Սփոթիֆայ Կամպ Նոուի» տարածքում դեռ կարևոր քայլեր կան անելու։ Այնուամենայնիվ, նա իր գոհունակությունն է հայտնել շինարարական աշխատանքների ընթացքից և նախագծի զարգացումից.

«Մենք ունենք մարզադաշտ, որտեղ ամեն օր տեսանելի առաջընթաց կա։ Այն լինելու է աշխարհի լավագույն մարզադաշտը՝ վայել «Բարսելոնայի» պես թիմին: Ես հպարտ եմ այն աշխատանքով, որն այժմ արվում է։ Հուսով եմ՝ ՈւԵՖԱ-ն մեզ կտա այս խաղը»:

Լապորտայի այս խոսքերը հնչել են կատալոնական ակումբի համար վճռորոշ օրը: Սեպտեմբերի 15-ին Հունաստանում կայանալու է ՈւԵՖԱ-ի գործկոմի նիստը, որտեղ նախատեսվում է հաստատել եվրոպական մրցաշարերի 2028 և 2029 թվականների եզրափակիչների անցկացման վայրերը։ ՈւԵՖԱ-ն պաշտոնապես հաստատել է, որ տղամարդկանց Չեմպիոնների լիգայի 2029թ. եզրափակիչի համար մրցակցում են երկու հայտ՝ Բարսելոնան («Կամպ Նոու») և Լոնդոնը («Ուեմբլի»):

Բարսելոնայի հայտն ունի ինստիտուցիոնալ լուրջ աջակցություն. այն պաշտպանում են «Բարսելոնա» ակումբը, քաղաքապետարանը, Կատալոնիայի կառավարությունը, Իսպանիայի ֆուտբոլի ֆեդերացիան (RFEF) և Իսպանիայի կառավարությունը: Գլխավոր պայմաններից մեկն այն է, որ պետք է ոչ միայն ավարտին հասցնել բուն մարզադաշտի կառուցումը, այլև երաշխավորել, որ հարակից ողջ տարածքն ու ենթակառուցվածքները պատրաստ լինեն նման կարևորության իրադարձության:

Շինարարական պլանի համաձայն՝ նորացված «Սփոթիֆայ Կամպ Նոուն» ամբողջությամբ պատրաստ կլինի 2029 թվականից շատ ավելի վաղ: Վերակառուցման ավարտից հետո մարզադաշտի տարողունակությունը կկազմի մոտ 104,600 հանդիսական:

ՈւԵՖԱ-ի դրական որոշման դեպքում «Կամպ Նոուն» երրորդ անգամ կընդունի Եվրոպայի գլխավոր ակումբային մրցաշարի եզրափակիչը: Նախկինում այնտեղ կայացել են 1989թ. («Միլան» — «Ստյաուա»՝ 4-0) և 1999թ. պատմական եզրափակիչները, երբ «Մանչեսթեր Յունայթեդը» լրացուցիչ ժամանակում երկու գոլ խփելով՝ կամային հաղթանակ կորզեց Մյունխենի «Բավարիայից» (2-1):

Ավելի քան երեք տասնամյակ անց «Բարսելոնան» կրկին ցանկանում է նոր «Կամպ Նոուն» վերածել եվրոպական ֆուտբոլի կենտրոնի։ Խոսքն այժմ ՈւԵՖԱ-ինն է:

Երեքշաբթի, չորեքշաբթի և հինգշաբթի՝ սեպտեմբերի 8-ին, 9-ին և 10-ին, կայացան Չեմպիոնների լիգայի խաղարկության 2026/27 մրցաշրջանի լիգայի փուլի առաջին տուրի հանդիպումները։

Եվրոպական ակումբային ամենահեղինակավոր մրցաշարի շաբաթվա լավագույն խաղացող է ճանաչվել ՊՍԺ-ի իսպանացի հարձակվող Ֆերան Տորեսը։ Այս մասին հայտնում է ՈւԵՖԱ-ի պաշտոնական կայքը։

Քվեարկության արդյունքում Տորեսը շրջանցել է «Բարսելոնայի» բրազիլացի հարձակվող Ռաֆինյային, «Բետիսի» իսպանացի պաշտպան Մարկ Բարտրային և «Շտուտգարտի» բոսնիացի հարձակվող Էրմեդին Դեմիրովիչին։

26-ամյա իսպանացի ֆուտբոլիստը հեթ-տրիկ ձևակերպեց Բրատիսլավայի «Սլովանի» նկատմամբ տնային խաղում՝ 6-1 հաշվով հաղթանակի ժամանակ։ Սա Տորեսի առաջին հանդիպումն էր փարիզյան գրանդի կազմում Չեմպիոնների լիգայի շրջանակում՝ «Բարսելոնայից» տեղափոխվելուց հետո։

Մյունխենի «Բավարիան» Չեմպիոնների լիգայի լիգայի փուլի առաջին տուրում սեփական հարկի տակ 5:0 հաշվով անպատասխան գնդակներ է ուղարկել նորվեգական «Բուդյո-Գլիմտի» դարպասը։

Խաղի հաշիվը բացած Ջամալ Մուսիալայի գոլը պատմական էր մյունխենյան ակումբի համար։ Դա «Բավարիայի» 900-րդ գնդակն էր Եվրոպական չեմպիոնների գավաթի և Չեմպիոնների լիգայի խաղարկությունների պատմության մեջ։

ՈւԵՖԱ-ի պաշտոնական կայքը հայտնում է, որ գերմանական գրանդը մրցաշարի պատմության մեջ ընդամենը երկրորդ ակումբն է, որը հատում է 900 գոլի սահմանագիծը։ Խփած գնդակների քանակով բացարձակ ռեկորդակիրը Մադրիդի «Ռեալն» է, որի ակտիվում կա 1139 գոլ։

ՉԼ լիգայի փուլի երկրորդ տուրում «Բավարիան» հոկտեմբերի 13-ին կմրցի նորվեգական մեկ այլ ակումբի՝ «Վիկինգի» հետ, իսկ «Բուդյո-Գլիմտը» հոկտեմբերի 14-ին ուժերը կչափի Դորտմունդի «Բորուսիայի» հետ։

Իտալական «Կոմոյի» գլխավոր մարզիչ Սեսկ Ֆաբրեգասը կիսվել է Չեմպիոնների լիգայում իր թիմի պատմական նորամուտի և «Լայպցիգի» նկատմամբ տոնած 4:1 հաշվով տպավորիչ հաղթանակի տպավորություններով։

Նորացված «Սինիգալիա» մարզադաշտում կայացած խաղում իտալական ակումբի կազմում աչքի են ընկել Մարտին Բատուրինան, Տասոս Դուվիկասը, Ասանե Դիաոն և փոխարինման դուրս եկած Մաքսի Պերոնեն։ Ընդ որում՝ «Կոմոն» միակ իտալական թիմն է, որը հաղթանակ է տարել ՉԼ-ի առաջին տուրում։ Այդուհանդերձ, իսպանացի մասնագետը թույլ չի տալիս իր ֆուտբոլիստներին տարվել էյֆորիայով։

«Ես երջանիկ եմ, բայց դա կտևի ընդամենը հինգ րոպե, քանի որ երկուշաբթի օրը մենք պետք է պատրաստվենք «Պարմայի» դեմ խաղին։ Մեզ անհրաժեշտ է նույն էներգիան, ինչ այսօր։ Հասկանում եմ, որ սա պատմական երեկո է քաղաքի և ակումբի համար. սա նվեր է, որին մենք արժանացել ենք նախորդ մրցաշրջանում կատարած ահռելի աշխատանքի շնորհիվ: Բայց Սերիա Ա-ն մնում է մեր գլխավոր նպատակը, քանի որ հենց դա է թույլ տալիս նորից հայտնվել Չեմպիոնների լիգայում։ Մենք երիտասարդ թիմ ենք, մեզ ոգեշնչում է այս մրցաշարի էներգիան, բայց ես շատ կբարկանամ, եթե մենք ամբողջությամբ չնվիրվենք Սերիա Ա-ին»,- նշել է Ֆաբրեգասը Sky Sport Italia-ի եթերում:

🎥 ՉԼ․ Ֆաբրեգասի հեքիաթը ՉԼ-ում սկսվում է ջախջախումով, Բավարիան ոչնչացնում է Բուդյո-Գլիմտին

Անդրադառնալով տակտիկական փոփոխություններին՝ մարզիչը նշել է, որ 3:0 հաշվի ժամանակ «Լայպցիգը» փոխել է սխեման և սկսել ավելի շատ ֆիզիկական ճնշում գործադրել եզրերում։ Ուստի հոգնածության ֆոնին թիմը ստիպված է եղել անցնել վերահսկողության՝ փոխելով խաղի ընթացքը։

«Սովորաբար ես կձգտեի խփել չորրորդ գոլը, բայց սա Չեմպիոնների լիգան է. նրանք դարձրին 3:1, և դեռ ոչինչ ավարտված չէր: Բարեբախտաբար, մենք ցուցադրեցինք մեր կուռ պաշտպանությունն ու կազմակերպեցինք վտանգավոր հակագրոհներ, որոնցից մեկն ավարտվեց Պերոնեի գոլով: Մենք պետք է կարողանանք ադապտացվել տարբեր իրավիճակների»։

Ֆաբրեգասը նաև հիշեցրել է, որ թիմը դեռ կայացման փուլում է, քանի որ կազմում կան բազմաթիվ նորեկներ՝ այդ թվում Կայկին ու Մոյզե Քինը, որոնց հարմարվելու համար ժամանակ է հարկավոր։

«Դա համբերություն է պահանջում, իսկ ֆուտբոլում այն հաճախ պակասում է»,- եզրափակել է նա։

«Կոմոն» Չեմպիոնների լիգայի լիգայի փուլի երկրորդ տուրում ուժերը կչափի «Ֆեյենորդի» հետ։ 

Թուրքական «Ֆեներբահչեի» նախագահ Ազիզ Յըլդըրըմը հրաժարվել է ընդունել գլխավոր մարզիչ Իսմայիլ Քարթալի հրաժարականը՝ Չեմպիոնների լիգայի լիգայի փուլի առաջին տուրում իտալական «Ռոմայի» հետ գրանցված ոչ-ոքիից (1:1) հետո։

65-ամյա թուրք մասնագետը հեռանալու որոշման մասին հայտարարել էր անմիջապես հանդիպման ավարտին։ Լրագրող Ֆաբրիցիո Ռոմանոյի փոխանցմամբ՝ Քարթալն իր քայլը մեկնաբանել էր այսպես.

«Ես հեռանում եմ, որպեսզի ազատեմ ակումբի ճանապարհը՝ առանց երբևէ վերադառնալու մտադրության»։

Պարզվում է՝ մարզչի վրդովմունքի պատճառը եղել է երկրպագուների ճնշումն ու խաղի ընթացքում իր ուղղությամբ նետված շիշը։

Ակումբի նախագահ Ազիզ Յըլդըրըմի համար մարզչի այս մտադրությունն անակնկալ է եղել։ beIN SPORTS-ի հետ զրույցում նա կոշտ քննադատության է ենթարկել թիմի երկրպագուներին ու սպորտային մեկնաբաններին՝ նրանց մեղադրելով ակումբին դավաճանելու մեջ։

«Չեմպիոնների լիգա դուրս գալն արդեն հաջողություն է: Եթե մարզիչը 18 տարվա մեջ առաջին անգամ նման արդյունքի է հասնում, դուք նրան «թաղում եք»՝ ծափահարելու փոխարեն։ Մենք դաշտում տակտիկական պայքար էինք մղում, և ամոթ է դա չնկատելը։

Ես խոսել եմ Իսմայիլ Քարթալի հետ. նա պատմեց նետված շշի և ճնշումների մասին։ Ես նրանից մեծ եմ և անձամբ եմ ասել, որ նա շարունակելու է աշխատանքը։ Որպես նախագահ կարող եմ ասել՝ բացառությամբ երկու դեպքի, ես երբեք մարզչին չեմ հեռացրել մինչև մրցաշրջանի ավարտը։ Մենք մեկ ընտանիք ենք։ Քանի դեռ ես այստեղ եմ, Իսմայիլ Քարթալն այստեղից չի հեռանա»,- հայտարարել է Յըլդըրըմը։

Չեմպիոնների լիգայի լիգայի փուլի երկրորդ տուրում «Ֆեներբահչեն» հոկտեմբերի 14-ին արտագնա խաղում կմրցի անգլիական «Ասթոն Վիլայի» հետ։ Նույն օրը «Ռոման» կընդունի Մադրիդի «Ռեալին»։

Թուրքական «Ֆեներբահչեի» գլխավոր մարզիչ Իսմայիլ Քարթալը Չեմպիոնների լիգայի լիգայի փուլում հռոմեական «Ռոմայի» հետ ոչ-ոքիից (1:1) անմիջապես հետո հրաժարական է տվել:

Մրցաշարի առաջին տուրի հանդիպումը կայացել է սեպտեմբերի 10-ին Ստամբուլի «Շյուքրյու Սարաջօղլու» ստադիոնում։

Խաղը սպասարկում էր իսպանացի մրցավար Խեսուս Խիլ Մանսանոյի գլխավորած բրիգադը:

«Հրաժարական եմ տալիս, քանի դեռ նման հնարավորություն կա, և այն պայմանով, որ այլևս երբեք չեմ վերադառնա։ Բոլորիդ բարի երեկո եմ մաղթում»,- հետխաղյա մամուլի ասուլիսի ժամանակ հայտարարել է թուրքական ակումբի արդեն նախկին գլխավոր մարզիչը:

Մասնագետն իր այս կտրուկ որոշման հստակ պատճառները չի բարձրաձայնել:

Նշենք, որ ՉԼ-ի 2-րդ տուրում «Ֆեներբահչեն» կմրցի «Ասթոն Վիլայի» հետ, իսկ «Ռոման» կհանդիպի Մադրիդի «Ռեալին»։ Երկու խաղերն էլ նախատեսված են հոկտեմբերի 14-ին:

ՈւԵՖԱ-ի Չեմպիոնների լիգայի 2026/2027 մրցաշրջանի լիգայի փուլի 1-ին տուրում կայացան ևս երկու հանդիպումներ։

Ստամբուլում թուրքական «Ֆեներբահչեն» ընդունեց իտալական «Ռոմային», իսկ Էյնդհովենում հոլանդական ՊՍՎ-ն ուժերը չափեց ուկրաինական «Շախտյորի» հետ։

Երկու դիմակայություններն էլ ավարտվեցին միևնույն՝ 1։1 հաշվով։

«Ուլկեր Ֆեներբահչե Շյուքրյու Սարաջօղլու» մարզադաշտում կայացած խաղում հաշիվը բացվեց առաջին խաղակեսի վերջնամասում․ աչքի ընկավ «գայլերի» կիսապաշտպան Բրիան Կրիստանտեն։ Սակայն տանտերերին հաջողվեց արագ վերականգնել հավասարությունը. 48-րդ րոպեին գոլի հեղինակ դարձավ պաշտպան Արչի Բրաունը:

Տեսանյութը՝ ԱՅՍՏԵՂ

«Ֆիլիպս» մարզադաշտում ևս թիմերը մեկական գնդակ փոխանակեցին խաղակեսերի միջնամասում։ 45-րդ րոպեին վենեսուելացի կիսապաշտպան Գլեյկեր Մենդոսան առաջ մղեց «Շախտյորին», սակայն ընդմիջումից անմիջապես հետո՝ 48-րդ րոպեին, ՊՍՎ-ի պաշտպան, նախկինում «Բարսելոնայում» և «Միլանում» հանդես եկած Սերժինյո Դեստը խփեց պատասխան գնդակը։

2-րդ տուրում «Ֆեներբահչեն» կհանդիպի «Ասթոն Վիլայի», «Ռոման»՝ Մադրիդի «Ռեալի», իսկ «Շախտյորն» ուժերը կչափի հունական ԱԵԿ-ի հետ (բոլոր խաղերը կկայանան հոկտեմբերի 14-ին)։ ՊՍՎ-ն հոկտեմբերի 13-ին արտագնա խաղում կմրցի գերմանական «Լայպցիգի» հետ։

Հիշեցնենք, որ Չեմպիոնների լիգայի գործող գավաթակիրը ՊՍԺ-ն է։ Նախորդ խաղարկության եզրափակիչում փարիզյան ակումբը հետխաղյա 11-մետրանոցներով հաղթել էր Լոնդոնի «Արսենալին» (1:1, 4:3 11մ.): ՊՍԺ-ն ՉԼ-ի հաղթող էր դարձել նաև 2024/2025 մրցաշրջանում:

Տեսանյութը՝ ԱՅՍՏԵՂ

Մրցաշարային աղյուսակն այս պահին