Հայաստան — Armsport.am

🎥 Հաղթական մեկնարկ Ազգերի լիգայում. ՀՖՖ պատրաստած տեսանյութը

Editor — Sun, 27 Sep 2026 19:18:06 +0000

Սեպտեմբերի 25-ին, Ազգերի լիգայի խաղարկության C լիգայի առաջին տուրի շրջանակում Հայաստանի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում ընդունեց Լատվիայի ընտրանուն և հաղթեց 2-0 հաշվով։ Հանդիպման մանրամասները՝ այստեղ։

ՀՖՖ մամուլի ծառայությունը տեսանյութ է հրապարակել յութուբյան էջում․

Հիշեցնենք` Հայաստանի ազգային հավաքականը սեպտեմբերի 28-ին կընդունի Չեռնոգորիայի հավաքականին, որից հետո արտագնա հանդիպումներ կանցկացնի Կիպրոսի ու Չեռնոգորիայի ընտրանիների հետ։

Մրցաշարային աղյուսակն այս պահին՝ ստորև․

Խաղալու ենք երեք հարձակվողով․ Վուչինիչը՝ Հայաստանի հետ խաղի և Երևանում կրած պարտությունների մասին

Editor — Sun, 27 Sep 2026 18:05:55 +0000

ՈւԵՖԱ Ազգերի լիգայի C2 խմբի շրջանակում Հայաստանի հավաքականը վաղը՝ սեպտեմբերի 28-ին, Երևանի Վազգեն Սարգսյանի անվան «Հանրապետական» մարզադաշտում կընդունի Չեռնոգորիայի ընտրանուն։

Չեռնոգորիայի հավաքականը երրորդ անգամ է ժամանել Երևան։ Նախորդ երկու այցերի ընթացքում թիմը պարտվել է՝ 2:3 և 0:1 հաշվով։ Նախախաղային մամուլի ասուլիսին Չեռնոգորիայի հավաքականի գլխավոր մարզիչ Միրկո Վուչինիչը հայտարարել է, որ Հայաստանի դեմ Ազգերի լիգայի հանդիպմանը թիմը կխաղա երեք հարձակվողով։ Միաժամանակ մասնագետը նշել է, որ կազմի որոշ փոփոխություններ նույնպես կլինեն։

«Կխաղանք երեք հարձակվողով։ Դա հարձակողական է, թե ոչ՝ դուք ինքներդ որոշեք։ Կարևոր է, որ բոլորը վազեն, պայքարեն, լինեն մեկ ամբողջություն և միասնականություն ցուցաբերեն։ Դա է այն, ինչ ես նրանցից պահանջում եմ»,- Վուչինիչի խոսքերը մեջբերում է Vijesti-ն։

Վուչինիչը նշել է, որ Հայաստանի դեմ խաղում կազմի փոփոխություններ կլինեն։

«Կազմում փոփոխություններ կլինեն։ Թիմի յուրաքանչյուր գծում մեկական ֆուտբոլիստ կփոխարինենք։ Կտեսնենք՝ արդյոք ևս որոշ փոփոխություններ կլինեն»,- ասել է Չեռնոգորիայի հավաքականի գլխավոր մարզիչը։

Մասնագետը նաև ընդգծել է, որ հանդիպման ընթացքը մեծապես կախված կլինի հենց Չեռնոգորիայի խաղից։

«Տնային խաղերում նրանք, անկասկած, ավելի շատ են ձգտում հաղթանակի։ Այստեղ նրանք երկու անգամ հաղթել են մեզ։ Շատ բան կախված է մեզանից՝ արդյո՞ք Հայաստանը ավելի շատ կհարձակվի և ավելի շատ կվերահսկի գնդակը»,- նշել է Վուչինիչը։

Մարզիչը նաև խոսել է ֆուտբոլիստներին փոխանցած գլխավոր ուղերձի մասին։

«Մենք պետք է հաղթանակի և արդյունքի ծարավ լինենք։ Մենք կարող ենք առաջադիմել միայն այն դեպքում, եթե միասին թիավարենք նույն ուղղությամբ»։

Վուչինիչը չի թաքցրել, որ Չեռնոգորիայի նպատակն է հաղթել Երևանում և Ազգերի լիգայի C2 խմբում զբաղեցնել առաջին տեղը։

«Մենք նպատակ ունենք։ Որպես ֆուտբոլիստ և այժմ արդեն որպես մարզիչ՝ միշտ ձգտել եմ առավելագույնը ստանալ։ Անկասկած, գնում ենք հաղթանակի հետևից, իսկ թե որքան գոհ կլինեմ արդյունքից, կախված կլինի խաղի զարգացումից։ Նպատակն, իհարկե, խմբում առաջին տեղը զբաղեցնելն է, բայց ամենակարևորը միշտ հաջորդ հանդիպումն է»,- ասել է նա։

Միաժամանակ Վուչինիչը նշել է, որ Հայաստանի դեմ հաղթանակը դեռևս որոշիչ չի լինի խմբում առաջին տեղը զբաղեցնելու պայքարում։

«Ոչ մի արդյունք մեզ չի մոտեցնի առաջին տեղին։ Ինչ արդյունք էլ գրանցվի, մենք դեռ պայքարի մեջ ենք՝ հաղթանակ, ոչ-ոքի կամ այն ելքը, որի մասին հիմա նույնիսկ չեմ ցանկանում խոսել։ Ֆուտբոլիստները դա պետք է իմանան»։

Երկու հավաքականներն էլ Ազգերի լիգայի այս խաղարկությունը սկսել են հաղթանակով․ Չեռնոգորիան 2:1 հաշվով հաղթել է Կիպրոսին, իսկ Հայաստանը 2:0 հաշվով՝ Լատվիային։

Հիշեցնենք, որ վաղը կայանալիք հանդիպման մեկնարկը 20։00-ին է։

Հայաստանի, Լատվիայի, Չեռնոգորիայի և Կիպրոսի հավաքականներն ընդգրկված են 2-րդ խմբում։ Հիշեցնենք` Հայաստանի ազգային հավաքականը սեպտեմբերի 28-ին կընդունի Չեռնոգորիայի հավաքականին, որից հետո արտագնա հանդիպումներ կանցկացնի Կիպրոսի ու Չեռնոգորիայի ընտրանիների հետ։

Մրցաշարային աղյուսակը՝ ստորև․

Եկել ենք երեք միավորի հետևից․ Սավիչ

Editor — Sun, 27 Sep 2026 16:30:53 +0000

Չեռնոգորիայի հավաքականը երրորդ անգամ է ժամանել Երևան։ Նախորդ երկու այցերի ընթացքում թիմը պարտվել է՝ 2:3 և 0:1 հաշվով։ Առաջիկա հանդիպման մասին նախախաղային մամուլի ասուլիսի ժամանակ խոսել է չեռոգորացիների ֆուտբոլիստը Ստեֆան Սավիչը։

«Այս անգամ նույնպես դժվար է լինելու, դա հաստատ է։ Նրանք նույնպես հաղթել են առաջին խաղում և մեծ ինքնավստահություն ունեն։ Այժմ այլ ժամանակներ են, երկու հավաքականներն էլ ամբողջությամբ փոխվել են։ Հանդիպումը ծանր ու դժվար է լինելու, բայց մենք պատրաստ ենք ամեն ինչի։ Համոզված եմ՝ կարող ենք հասնել մեր նպատակին»,- ասել է Սավիչը։

Չեռնոգորիայի հավաքականի պաշտպանը նաև նշել է, որ իր թիմը Երևան է ժամանել երեք միավոր վաստակելու նպատակով։

«Մենք ունենք մեր նպատակները և եկել ենք երեք միավորի հետևից։ Կիպրոսի դեմ խաղում երևաց, որ թիմում համախմբվածություն կա՝ ոչ միայն ֆուտբոլիստների միջև, այլև երկրպագուների հետ։ Հավաքականի շուրջ ամբողջ մթնոլորտը դրական է։ Գոհ ենք նրանից, թե ինչպես է ամեն ինչ ընթանում»,- նշել է Սավիչը։

Նա նաև անդրադարձել է Կիպրոսի դեմ խաղում գրանցված արդյունքը կրկնելու հնարավորությանը։

«Համոզված եմ, որ այս անգամ ևս ճիշտ մոտեցմամբ դուրս կգանք խաղադաշտ և կհասնենք այն նպատակին, որի համար եկել ենք։ Իհարկե, հույս ունեմ, որ կարող ենք կրկնել առաջին խաղի արդյունքը։ Մենք որակ ունենք, բոլորը պատրաստ են, այդ թվում՝ նրանք, ովքեր չեն հայտնվի հայտացուցակում։ Բոլոր տղաները մեծ ցանկություն ունեն խաղալու»,- մեջբերում է Սավիչին Vijesti-ն։

Սավիչը նախկինում արդեն խաղացել է Երևանում՝ Չեռնոգորիայի հավաքականի կազմում։ 2016 թվականին կայացած հանդիպումն ավարտվել էր Հայաստանի հաղթանակով՝ 3:2 հաշվով։

Հիշեցնենք, որ վաղը կայանալիք հանդիպման մեկնարկը 20։00-ին է։

Մրցաշարային աղյուսակը՝ ստորև․

Սա իմ ցանկությունն էր, երբ փչեցի տորթի մոմը. Օգնեն Չանչարևիչը՝ Լատվիայի դեմ խաղից առաջ պահած երազանքի մասին

Suren Sahakyan — Sat, 26 Sep 2026 08:15:37 +0000

Ազգերի լիգայի խաղարկության C2 խմբի առաջին տուրում Հայաստանի ազգային հավաքականը երեկ՝ սեպտեմբերի 25-ին, Երևանի Վազգեն Սարգսյանի անվան «Հանրապետական» մարզադաշտում 2-0 հաշվով վստահ հաղթանակ տարավ Լատվիայի ընտրանու նկատմամբ։

Հայաստանի հավաքականի դարպասապահ Օգնեն Չանչարևիչը, որը երեկ նշել էր ծննդյան 37-ամյակը, խաղից հետո ՀՖՖ-ի մամուլի ծառայության հետ զրույցում կիսվել է տպավորություններով։

Ծննդյան օրվա ցանկության և խաղի ընթացքի մասին

«Սա իմ ցանկությունն էր, երբ խաղից առաջ փչեցի տորթի մոմը. սա իմ առաջին չոր հաշվով հաղթանակն էր Հայաստանի ազգային հավաքականում։ 90 րոպե վերահսկում էինք խաղը, միայն վերջնամասում մի փոքր նահանջեցինք, ինչը բնական է՝ ֆուտբոլիստները հոգնել էին։ Մրցակիցը կոմպակտ էր ու շատ կարգապահ, ինչ պատճառով բարդ հանդիպում ստացվեց, բայց գտանք երկու գոլ խփելու ճանապարհը, և դա ամենակարևորն է»։

Ինքնավստահության վերականգնման և առաջիկա անելիքների մասին

Խոսելով թիմի ցուցադրած գործողությունների և ապագա ծրագրերի մասին՝ Չանչարևիչը հավելել է.

«Հիանալի խաղ անցկացրեցինք, որը կօգնի վերականգնել մեր ինքնավստահությունը։ Այս խաղում ամեն բան պարզապես հրաշալի էր, հատկապես՝ մեր պրեսինգը. այդ ճնշումից մրցակիցը չէր կարողանում դուրս գալ։ Հուսով եմ՝ Չեռնոգորիայի դեմ ևս լավ կխաղանք, մենք և երկրպագուներն արժանի ենք դրան»։

Հիշեցնենք, որ հաջորդ հանդիպումը մեր ընտրանին Ազգերի լիգայի խաղարկության շրջանակում կանցկացնի սեպտեմբերի 28-ին՝ ժամը 20:00-ին, Վազգեն Սարգսյանի անվան «Հանրապետական» մարզադաշտում՝ հյուրընկալելով Չեռնոգորիայի ընտրանուն։

Գոլս նվիրեցի նրան. ազգային թիմի նորեկ Արթուր Ղարիբյանն ամփոփել է իր հաղթական նորամուտը

Suren Sahakyan — Sat, 26 Sep 2026 06:10:57 +0000

Ազգերի լիգայի խաղարկության C2 խմբի առաջին տուրում Հայաստանի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում 2-0 հաշվով վստահ հաղթանակ տարավ Լատվիայի ընտրանու նկատմամբ:

Հայաստանի հավաքականի կազմում իր նորամուտը նշեց և խաղի վերջնամասում գոլի հեղինակ դարձավ ռուսական «Ռոդինայի» հարձակվող Արթուր Ղարիբյանը։ Խաղից հետո նա կիսվել է իր տպավորություններով:

Նորամուտի գոլի և ընտանիքի աջակցության մասին

«Շատ էի ցանկանում գոլ խփել, և դա ինձ հաջողվեց։ Հասկանալի է, երբ ասում եմ՝ ինձ համար ամենակարևոր գոլը հաջորդն է, միշտ չէ, որ դա կստացվի։ Գոլս նվիրեցի կնոջս։ Խաղին ներկա էին նաև հայրս ու տատիկս՝ մի քանի ընկերներիս հետ. գոլից հետո արված ժեստը հենց նրանց էր ուղղված»,- նշել է հարձակվողը։

Խաղի ընթացքի և թիմային աշխատանքի մասին

Անդրադառնալով հանդիպման լարվածությանն ու պաշտպանների կատարած աշխատանքին՝ Ղարիբյանը հավելել է.

«1-0-ն բարդ հաշիվ է, քանի որ ամեն պահի կարող ես գոլ բաց թողնել։ Սակայն, երբ խաղի վերջնամասում առավելությունը երկու գնդակի է հասնում, դա որոշ չափով հեշտացնում է գործը։ Մրցակիցն իսկապես շատ վտանգավոր խաղացողներ ունի երկրորդ հարկում, բայց բրավո մեր պաշտպաններին և ամբողջ թիմին՝ լավ խաղի ու հաղթանակի համար»։

Հատկանշական է, որ այս դիպուկ հարվածի շնորհիվ Արթուր Ղարիբյանն Ազգերի լիգայում դարձավ Հայաստանի ազգային հավաքականի պատմության ամենաերիտասարդ գոլահարը:

Հայաստանի հավաքականը շատ լավ ֆուտբոլ է խաղում․ Լատվիայի ընտրանու մարզիչ

Editor — Fri, 25 Sep 2026 21:18:35 +0000

Սեպտեմբերի 25-ին, Ազգերի լիգայի խաղարկության C լիգայի առաջին տուրի շրջանակում, Հայաստանի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում ընդունեց Լատվիայի ընտրանուն և հաղթեց 2-0 հաշվով։ Հանդիպման մանրամասները՝ այստեղ։

Հետխաղյա մամուլի ասուլիսի ընթացքում լրագրողների հարցերին է պատասխանել Լատվիայի ազգային հավաքականի գլխավոր մարզիչ Պաոլո Նիկոլատոն։

«Մեր ծրագիրը մի փոքր այլ էր։ Մենք գիտեինք, որ նրանք շատ, շատ ուժեղ են դիրքերի միջև խաղում, ուստի որոշեցինք մի փոքր հետ քաշվել, թույլ տալ նրանց խաղալ սեփական կիսադաշտում և ավելի լավ փակել տարածությունները»,- ասել է Նիկոլատոն։

«Մեզ համար կարևոր չէր շատ բարձր պրեսինգ կիրառելը, քանի որ այդ դեպքում ստիպված էինք լինելու մեծացնել հեռավորությունները դիրքերի և մեր օղակների միջև։ Անկեղծ ասած՝ առաջին խաղակեսում մենք շատ հնարավորություններ չտվեցինք։ Գոլ բաց թողեցինք անկյունայինից, և դա այնպիսի իրավիճակ է, որից պետք է խուսափենք»։

Այդ անկյունայինից հետո Հայաստանի հավաքականը 32-րդ րոպեին առաջ անցավ Գեորգի Հարությունյանի գոլի շնորհիվ։ Տանտերերը 75-րդ րոպեին կրկնապատկեցին առավելությունը՝ հավաքականում նորամուտը նշող Արթուր Ղարիբյանի գոլով։ Այդ ընթացքում Լատվիան հատկապես դժվարություններ ունեցավ խաղադաշտի մի եզրով Հայաստանի հավաքականի գրոհները կասեցնելու հարցում։

«Դա այն հատվածն էր, որտեղ մենք շատ տուժեցինք,- խոստովանել է Նիկոլատոն։- Փորձեցի ինչ-որ բան փոխել, բայց չեմ կարող ասել, որ դա աշխատեց։ Մենք այդ հատվածում շատ դժվարություններ ունեցանք։ Դա ճիշտ է։

Մենք թույլ տվեցինք որոշ տեխնիկական սխալներ և կատարեցինք սխալ փոխանցումներ։ Նման երկար փոխանցումներից հետո պետք է շատ վազել, երբ մրցակիցը նման հակագրոհ է կազմակերպում։ Ես ցանկանում եմ, որ մենք տեխնիկական ֆուտբոլ խաղանք, քանի որ կարծում եմ՝ դա նաև նրանց դեմ պաշտպանվելու միջոցներից մեկն է։ Այո, մենք որոշ սխալներ թույլ տվեցինք, բայց չեմ կարող ասել, որ պարտվեցինք ինչ-որ մեծ սխալների պատճառով։ Որոշ իրավիճակներ առաջացան նրանց ֆուտբոլիստների բարձր որակի պատճառով»,- ասել է Նիկոլատոն։

Խաղից առաջ Նիկոլատոյի ամենակարևոր որոշումներից մեկը Մարկուս Ստրոդսին մեկնարկային կազմում ընդգրկելն էր։ 19-ամյա ֆուտբոլիստը այդ երեկո Լատվիայի հավաքականում նորամուտը նշած հինգ խաղացողներից մեկն էր։

Հանդիպմանը ներկա հայ լրագրողներից մեկը Նիկոլատոյին խնդրել է համեմատել Հայաստանի ներկայիս հավաքականը այն թիմի հետ, որի դեմ Լատվիան խաղացել էր երկու տարի առաջ։ Մասնագետը նշել է, որ Հայաստանի հավաքականը զգալի առաջընթաց է գրանցել։

«Կարծում եմ՝ ներկայումս Հայաստանը շատ ավելի լավն է կազմակերպվածության, խաղային գաղափարների և սկզբունքների առումով,- ասել է նա։- Նրանք շատ լավ ֆուտբոլ են խաղում, և ոչ միայն մեր դեմ։ Ես դիտել եմ նրանց բազմաթիվ հանդիպումներ, և նրանք շատ լավ են խաղում։ Նրանք որակյալ ֆուտբոլիստներ ունեն, և այն գաղափարները, թե ինչպես են ցանկանում խաղալ, շատ հստակ են։ Կարծում եմ՝ Հայաստանի այս հավաքականն ավելի ուժեղ է, քան այն Հայաստանը, որի դեմ մենք խաղացել էինք երկու տարի առաջ»։

Հայաստանի, Լատվիայի, Չեռնոգորիայի և Կիպրոսի հավաքականներն ընդգրկված են 2-րդ խմբում։ Այս խմբի առաջին տուրի մյուս՝ Չեռնոգորիայի և Կիպրոսի միջև հանդիպումը կմեկնարկի քիչ անց։

Մրցաշարային աղյուսակը՝ ստորև․

🎥 Հայաստանի հավաքականը գլխավորեց աղյուսակը․ Չեռնոգորիան հաղթեց Կիպրոսին

Editor — Fri, 25 Sep 2026 20:40:59 +0000

Սեպտեմբերի 25-ին, Ազգերի լիգայի խաղարկության C լիգայի առաջին տուրի շրջանակում Չեռնոգորիայի հավաքականն ընդունեց Կիպրոսի ընտրանուն և հաղթեց 2-1 հաշվով։

Չեռնոգորիան կամային հաղթանակ տոնեց Կրստովիչի և Օսմայիչի գոլերի շնորհիվ, իսկ կղզիաբնակների կազմում աչքի ընկավ Ռիչարդսը։

Հանդիպման գոլերը՝ ԱՅՍՏԵՂ։

Հայաստանի, Լատվիայի, Չեռնոգորիայի և Կիպրոսի հավաքականներն ընդգրկված են 2-րդ խմբում։ Հայաստանի հավաքականը գոլերի ավելի լավ տարբերությամբ գլխավորեց 2-րդ խմբի մրցաշարային աղյուսակը։

Մրցաշարային աղյուսակը՝ ստորև․

🎥 Փյունիկի ֆուտբոլիստն օգնեց Մոզամբիկին ոչ-ոքի խաղալ Սենեգալի հետ, Վիլսոնը նորամուտը նշեց հավաքականում

Editor — Fri, 25 Sep 2026 20:15:32 +0000

Աֆրիկայի Ազգերի լիգայի որակավորման փուլի առաջին տուրում Մոզամբիկի հավաքականը ոչ-ոքի է ավարտել հանդիպումը Սենեգալի թիմի հետ՝ 1-1։

Նիկոլաս Ջեքսոնի գոլին տանտերերը պատասխանել են Կատամոյի գոլով, որին օգնեց աչքի ընկնել «Փյունիկի» ֆուտբոլիստ Վիտին՝ դառնալով գոլային փոխանցման հեղինակ։

Հանդիպման գոլերը՝ ԱՅՍՏԵՂ։

Այս հանդիպմանը Մոզամբիկի հավաքականի կազմում ամբողջությամ մասնակցել է նաև «Արարատ-Արմենիայի» ֆուտբոլիստ Բրունո Վիլսոնը, ով նորամուտը նշեց հավաքականում։

Վիտին փոխարինվել է 66-րդ րոպեին։

Մոզամբիկի հավաքականը հաջորդ հանդիպումը կանցկացնի սեպտեմբերի 29-ին․ մրցակիցը Սուդանի հավաքականն է։

🎥 Կան հայաստանցիներ, կան հայեր․․․ նա իսկական հայ է․ Մելիքյան

Editor — Fri, 25 Sep 2026 19:35:44 +0000

Այսօր՝ սեպտեմբերի 25-ին, Ազգերի լիգայի խաղարկության C լիգայի առաջին տուրի շրջանակում Հայաստանի ազգային հավաքականը Երևանի Վազգեն Սարգսյանի անվան «Հանրապետական» մարզադաշտում ընդունեց Լատվիայի ընտրանուն և հաղթեց 2-0 հաշվով։ Հանդիպման մանրամասները՝ այստեղ։

Հանդիպումից հետ իր կարծիքով է կիսվել Հայաստանի հավաքականի գլխավոր մարզիչ Եղիշե Մելիքյանը․

«Շնորհավորում եմ, ուրախ եմ, որ իմ թիմի հետ պարգևեցի դրական հույզեր։ Տակտիկայի մասին չեմ ուզում մանրամասն խոսել, առջևում դեռ հանդիպումներ կան։ Շատ դժվար էր այս մի քանի օրը, միայն ես գիտեմ՝ ինչ աշխատանք ենք տարել թիմի հետ։ Շնորհակալ եմ իրենց, որ հավատացին, շատ աշխատեցինք։ Ստացվեց այս խաղում գտնել բանալին։ Փառք Աստծո, մեր ծրագիրն աշխատեց։

Խնդիրներ շատ, չեմ խոսելու այդ մասին։ Շատ եմ ափսոսում Բուենոյի կորուստը, իմ փորձից ելնելով, կարող եմ ասել՝ նա էլ չի կարող մեզ օգնել։ Նա 1400 րոպե է անցկացրել խաղադաշտում, մյուսները՝ 1000։ Շատ եմ ափսոսում»,- ասել է Եղիշե Մելիքյանը։

Գոլ բաց չթողնելու և երկրպագուների հավատի մասին

«Մենք ապացուցեցինք ձեզ բոլորիդ՝ հավատացեք մեզ։ Դա ինձ համար կարևոր էր։ Երեկ ասուլիսում ասացի՝ կհաղթենք, զգում եմ, հավատացեք մեզ»։

Արթուր Ղարիբյանի մասին

«Երբ հանդիպեցի Ղարիբյանի հետ Մոսկվայում, ես նրա հետ խոսեցի հավաքականի նշանակության, պատասխանատվության մասին, նա ասաց, որ փշաքաղվել է։ Կարող է ֆուտբոլիստը ոչինչ չասել, բայց նրա փշաքաղվելուց ես ամեն ինչ հասկանամ։ Նա կռվող տեսակ է, հայ տեսակ է։ Կան հայաստանցիներ, կան հայեր․․․ նա իսկական հայ է»,- ասել է մարզիչը։

Անդրադառնալով հեռահար հարվածների սակավությանը՝ Մելիքյանը պարզաբանել է. «Մեր ծրագրում դա կար, բայց մրցակիցը շատ կոմպակտ խաղաց և հնարավորություն չտվեց օգտագործել դրանք»։

Սպերցյանի և մարտավարության մասին

«Դուք խոսում եք այն ֆուտբոլիստի մասին, որն ամենակարգապահն է և խստորեն հետևում է մարզչի պահանջած մարտավարական ծրագրին։ Ես նրան հիմնականում ուղարկում էի Թիկնիզյանի հետ նույն եզր, որպեսզի ստեղծվեն այդ օղակներն ու կոմբինացիաները»,- ասել է մարզիչը։

Ժիրայր Շաղոյանի ելույթի մասին

«Շատ գոհ եմ։ Գիտենք, որ նա որակ ունի, բայց նա խաղացող է, որը հազվադեպ է մտնում մեկը մեկի պայքարի մեջ։ Այսօր տեսա նրա պայքարը, նվիրումը, որակները։ Չկա ոչ մի ֆուտբոլիստ, որի մասին կարող եմ ասել, թե իր առավելագույնը չարեց»

«Եթե թիմը չի հաղթում, դժգոհությունն արդարացված է։ Պարզապես ուզում եմ հասկանաք, որ բարդ ժամանակներում մեր ազգային հավաքականին քննադատելը հեշտ է։ Կցանկանայի միասնական լինեինք, օգնեինք մեկս մյուսին։ Այսքան կորուստներով՝ երեք հանդիպում։ Իմ տրամադրությունը, որը լիովին բարձր չէ, կապված է նրա հետ, որ գիտակցում եմ՝ դեռ ինչպիսի հարցերի ու խնդիրների եմ բախվելու առջևում… Հիմա մտածում եմ միայն այն մասին, թե ինչպես լուծումներ գտնեմ այդ խնդիրների համար»,- հավելել է Մելիքյանը։

Հետխաղյա մամուլի ասուլիսը՝ ստորև․

Մրցաշարային աղյուսակն այս պահին՝ ստորև․

Մենք չափազանց շատ հարգեցինք Հայաստանին․ Ցիրկինս

Editor — Fri, 25 Sep 2026 19:08:08 +0000

Անգլիայի Պրեմիեր լիգայում նախորդ մրցաշրջանում հանդես եկած Դենիս Ցիրկինսը Լատվիայի հավաքականի կազմում իր նորամուտից հետո չի թաքցրել Հայաստանի դեմ խաղի արդյունքից հիասթափությունը, սակայն ընդգծել է թիմի ներուժն ու այն իրացնելու ցանկությունը։

«Այսօր պարտվեցինք, սակայն ինձ համար կարևոր էր ներգրավվել խաղում և զգալ թիմը, դրա դինամիկան։ Հուսով եմ՝ այս հիմքի վրա կկարողանանք ավելի մեծ բան կառուցել»,- LTV7-ին տված հետխաղային հարցազրույցում ասել է Իռլանդիայում ծնված պաշտպանը։

Ցիրկինսը նորամուտի խաղում անցկացրել է ամբողջ հանդիպումը՝ այն սկսելով ձախ կենտրոնական պաշտպանի դիրքում, սակայն ընթացքում գործելով նաև եզրում և կիսապաշտպանության գծում։ Ֆուտբոլիստի խոսքով՝ դիրքի փոփոխությունն իր համար սովորական չէր, սակայն բավականին ծանոթ էր, ուստի դժվարություններ չի առաջացրել։

«Կարծում եմ՝ մենք կարող էինք ավելի մեծ ճնշում գործադրել նրանց վրա։ Մենք չափազանց շատ հարգեցինք Հայաստանին, չափազանց զգուշավոր էինք, թեև բավական լավ թիմ ունենք։ Երկրորդ խաղակեսում սկսեցինք մի փոքր ավելի ակտիվ խաղալ, սակայն իմ թույլ տված սխալից հետո երկրորդ բաց թողած գոլը եղավ»,- նշել է ֆուտբոլիստը։