ՖԻՖԱ-ն համագործակցում է Եվրոպական ակումբների ասոցիացիայի (EFC) հետ՝ 2029 թվականի Ակումբային Աշխարհի առաջնությունը 32-ից 48 թիմի ընդլայնելու համար:

Այս քայլը կարող է հանգեցնել մրցաշարին անգլիական Պրեմիեր լիգայի ավելի շատ ակումբների մասնակցությանը, ըստ The Guardian-ի։

Ըստ աղբյուրի՝ այն բանից հետո, երբ «Չելսին» անցյալ տարի Ակումբային Աշխարհի առաջնությունում հաղթելու համար վաստակեց մոտ 84 միլիոն ֆունտ ստեռլինգ, խոշոր եվրոպական ակումբները խնդրեցին ՖԻՖԱ-ին ընդլայնել մրցաշարը։

«Լիվերպուլը», «Բարսելոնան» և «Նապոլին»՝ այն ժամանակ Անգլիայի, Իսպանիայի և Իտալիայի չեմպիոնները, չմասնակցեցին, քանի որ որակավորումը մրցաշարին սահմանափակված էր Չեմպիոնների լիգայի նախորդ չորս հաղթողներով և ՈՒԵՖԱ-ի ամենաբարձր գործակից ունեցող ութ ակումբներով: ՖԻՖԱ-ն նաև սահմանափակեց մասնակիցների թիվը՝ յուրաքանչյուր երկրից երկուսով:

Այժմ քննարկվում է այս սահմանափակումը վերացնելու տարբերակը, որը կարող է դրական ազդեցություն ունենալ Պրեմիեր լիգայի ակումբների, մասնավորապես՝ «Արսենալի», «Լիվերպուլի» և «Մանչեսթեր Սիթիի» վրա, քանի որ նրանք ՈՒԵՖԱ-ի գործակցով լավագույն 8 թիմերի շարքում են։

Լոնդոնի «Չելսիի» ղեկավարությունը որոշել է խոշոր պարգևավճարներով խրախուսել իր խաղացողներին՝ ՖԻՖԱ-ի Ակումբային աշխարհի առաջնության եզրափակիչում ՊՍԺ-ի նկատմամբ տարած հաղթանակից հետո (3:0):

Ըստ The Athletic-ի՝ ակումբը բոնուսների համար հատկացրել է 11.4 միլիոն ֆունտ ստերլինգ, որը կբաշխվի մրցաշարին մասնակցած բոլոր խաղացողների միջև։ Յուրաքանչյուր խաղացող կստանա ավելի քան 500 հազար ֆունտ։

Պրեմիեր լիգայի նոր մրցաշրջանում լոնդոնյան ակումբը առաջին տուրում տնային խաղում կընդունի «Քրիսթալ Փելասին»։ Հանդիպումը կկայանա օգոստոսի 17-ին, Երևանի ժամանակով՝ 17:00-ին։

«Չելսին» դարձավ ՖԻՖԱ-ի աշխարհի ակումբային առաջնության նոր ձևաչփի առաջին հաղթողը, այն բանից հետո, երբ Էնցո Մարեսկայի թիմը անցյալ ամիս եզրափակիչում սենսացիոն հաղթանակ տարավ ՊՍԺ-ի նկատմամբ՝ 3:0 հաշվով։

Ինչպես հաղորդում է The Times-ը, «Չելսին» կարող է մնալ առանց ակումբային աշխարհի չեմպիոնի տիտղոսը պաշտպանելու հնարավորության։ Այս պահին կանոնները չեն նախատեսում գործող հաղթողի համար հաջորդ ակումբային աշխարհի առաջնության ավտոմատ ուղեգիր։

Այնուամենայնիվ, ՖԻՖԱ-ն քննարկում է «Չելսիին» հաջորդ մրցաշարի ավտոմատ ուղեգիր տրամադրելու հնարավորությունը։ Հաջորդ ակումբային ԱԱ-ն կկայանա 2029 թվականի ամռանը։

Մադրիդի «Ռեալի» ֆուտբոլիստները Աշխարհի ակումբային առաջնությունում մասնակցության համար կստանան 280,000 եվրո պարգևավճար։

Մադրիդյան ակումբը հասավ Ակումբային ԱԱ-ի կիսաեզրափակիչ, որտեղ 0:4 հաշվով պարտվեց ՊՍԺ-ին։ Չնայած մրցաշարից դուրս մնալուն՝ խաղացողները կստանան բոնուսներ յուրաքանչյուր փուլի համար՝ 50,000 եվրո խմբային փուլից դուրս գալու, 80,000 եվրո՝ 1/8 եզրափակիչի, և 150,000 եվրո՝ կիսաեզրափակիչի համար։

Ընդհանուր առմամբ, ակումբը մրցաշարից վաստակել է ավելի քան 80 միլիոն եվրո, իսկ հիմնական կազմի յուրաքանչյուր խաղացողի բոնուսը կկազմի 280,000 եվրո։

Հաղթանակի դեպքում յուրաքանչյուր ֆուտբոլիստ կստանար 1 միլիոն եվրո, որը կավելանար նախկինում վաստակած 500,000 եվրոյին՝ Եվրոպայի Սուպերգավաթի, Միջմայրցամաքային գավաթի հաղթանակների և Չեմպիոնների լիգայի քառորդ եզրափակիչ դուրս գալու համար։

«Չելսիի» իսպանացի պաշտպան Մարկ Կուկուրելյան խոսել է ՖԻՖԱ-ի Աշխարհի ակումբային առաջնության մրցանակաբաշխությանը ԱՄՆ նախագահ Դոնալդ Թրամփի անսպասելի մասնակցության մասին։

Մրցաշարի եզրափակիչում Էնցո Մարեսկայի թիմը սենսացիոն հաղթանակ տարավ ՊՍԺ-ի նկատմամբ 3:0 հաշվով։

«Մեզ ասացին, որ Թրամփն է մեզ հանձնելու գավաթը, բայց մենք չէինք կարող այն բարձրացնել մինչև նրա հեռանալը։ Իհարկե, մենք սպասում էինք, որ նա հեռանա, բայց դա տեղի չունեցավ, նա չէր ուզում հեռանալ։ Մենք նայեցինք նրան, և նա ասաց․ «Բարձրացրու այն, ես այստեղ եմ մնում»։ Եվ ես մտածում էի, թե ով ինչ է նրան ասելու։ Անկեղծ ասած ես մահու չափ վախեցած էի»,- Կուկուրելիայի խոսքերն է մեջբերում Jijantes FC-ն։

Հիշեցնենք, որ ակումբային ԱԱ-ն տեղի է ունեցել ԱՄՆ-ում։ Իսկ հաջորդ տարի ԱՄՆ-ն, Կանադան և Մեքսիկան կընդունեն ազգային հավաքականների միջև աշխարհի առաջնությունը։

«Ռեալը» և մի շարք եվրոպական ու հարավամերիկյան ակումբներ ցանկանում են, որ Աշխարհի ակումբային առաջնությունն անցկացվի երկու տարին մեկ։ ՖԻՖԱ-ն, սակայն, այս գաղափարը համարում է «անհնարին»։ Հաջորդ մրցաշարը կարող է կայանալ Կատարում՝ 2029 թվականին։ Այս մասին հայտնում է ESPN-ը։

Ըստ աղբյուրի՝ մի քանի առաջատար ակումբներ կողմ են մրցաշարը ավելի հաճախ կազմակերպելուն՝ նպատակ ունենալով մեծացնել եկամուտները։ Թեև ՖԻՖԱ-ին պաշտոնական առաջարկ դեռ չի ներկայացվել, մի շարք ակումբների ղեկավարներ արդեն քննարկել են այդ հնարավորությունը կազմակերպության ներկայացուցիչների հետ։

ՖԻՖԱ-ն գոհ է վերջերս ավարտված մրցաշարի արդյունքներից, սակայն նշում է, որ այն երկու տարին մեկ անցկացնելն այս պահին անհնար է։ Վերջին մրցաշարի ընթացքում մասնակից ակումբների միջև բաժանվել է 1 միլիարդ դոլար, սակայն ՖԻՖԱ-ն կարծում է, որ նման գումար հավաքելը յուրաքանչյուր երկու տարին մեկ հնարավոր չէ։

Բացի այդ, ՖԻՖԱ-ն գտնում է, որ նման որոշումը կարող է հակասություն առաջացնել ՈւԵՖԱ-ի հետ, ինչը չի բխում կազմակերպության շահերից։ Վերահսկող մարմինը նաև մատնանշում է միջազգային ֆուտբոլային օրացույցի բարդությունը։

Ներկայում ՖԻՖԱ-ն պատրաստվում է հաջորդ Աշխարհի ակումբային առաջնությանը, որը նախատեսվում է անցկացնել 2029 թվականին։ Կատարը համարվում է մրցաշարի անցկացման հավանական վայրերից մեկը։

Հրապարակվել են ԱՄՆ-ում կայացած ՖԻՖԱ-ի Աշխարհի ակումբային առաջնության մասնակից ակումբների եկամուտները։

Football Rankings-ի տվյալներով՝ մրցաշարի հաղթող Լոնդոնի «Չելսին» վաստակել է ամենաշատը՝ 114.6 միլիոն եվրո։ Եզրափակչի մասնակից ՊՍԺ-ն զբաղեցրել է երկրորդ հորիզոնականը՝ 106.9 միլիոն եվրոյով։ Լավագույն եռյակը եզրափակել է Մադրիդի «Ռեալը», որը ստացել է 82.5 միլիոն եվրո։

Լավագույն հնգյակում են նաև «Ֆլումինենսեն» (60.8 միլիոն եվրո) և «Բավարիան» (58.2 միլիոն եվրո)։ Տասնյակում են ընդգրկվել նաև Դորտմունդի «Բորուսիան» (52.3 միլիոն եվրո), «Մանչեսթեր Սիթին» (51.7 միլիոն եվրո), «Պալմեյրասը» (49.8 միլիոն եվրո), «Ինտերը» (36.8 միլիոն եվրո) և «Ալ-Հիլալը» (34.2 միլիոն եվրո)։

Հիշեցնենք, որ եզրափակչում «Չելսին» 3։0 հաշվով հաղթեց ՊՍԺ-ին՝ դառնալով ակումբային աշխարհի նոր չեմպիոն։

Մադրիդի «Ռեալի» ներկայացուցիչները առաջարկել են ՖԻՖԱ-ին՝ աշխարհի ակումբային առաջնությունը անցկացնել երկու տարին մեկ։ Այս մասին հաղորդում է բրիտանական The Guardian-ը։

Աղբյուրի համաձայն՝ գաղափարը ծագել է ակումբի երկրպագուների ազդեցության ֆոնին, որոնք վերջերս ավարտված մրցաշարի ընթացքում տոմսեր գնելու հարցում ամենաակտիվն էին՝ ապահովելով ամբողջ մրցաշարի տոմսերի մոտ 25%-ը։

Թեև ՖԻՖԱ-ն մերժել է այդ առաջարկը, կազմակերպությունը քննարկում է մրցաշարին մասնակցող թիմերի քանակը 32-ից 48-ի հասցնելու տարբերակը։

Ավելի վաղ բրազիլական Jornal O Globo պարբերականը հայտնել էր հակառակ տեղեկատվություն՝ նշելով, որ ՖԻՖԱ-ի նախագահ Ջաննի Ինֆանտինոն առաջիկայում կարող է քննարկել մրցաշարը ավելի հաճախ անցկացնելու տարբերակը։

ԱՄՆ նախագահ Դոնալդ Թրամփը հայտնել է, որ 2025 թվականի ֆուտբոլի Աշխարհի ակումբային առաջնության օրիգինալ գավաթը գտնվում է Սպիտակ տան Օվալաձև աշխատասենյակում։

Կիրակի օրը կայացած եզրափակչում Լոնդոնի «Չելսին» 3։0 հաշվով վստահ հաղթանակ է տարել Փարիզի ՊՍԺ-ի նկատմամբ։ Թրամփը ներկա է եղել մրցաշարի մրցանակաբաշխությանը և անձամբ մեդալներ է հանձնել երկու թիմերի խաղացողներին։

Թրամփը պատմել է, որ ՖԻՖԱ-ի նախագահ Ջանի Ինֆանտինոն գավաթը ներկայացրել է Սպիտակ տանը դեռևս մարտ ամսին՝ Օվալաձև աշխատասենյակում կայացած միջոցառման ժամանակ։

«Նրանք ասացին․ «Կարո՞ղ է գավաթը մնալ այստեղ»։ Մենք այն տեղադրեցինք Օվալաձև աշխատասենյակում։ Հետո ես հարցրի՝ «Ե՞րբ եք վերցնելու գավաթը»։ Նա պատասխանեց՝ «Մենք երբեք չենք վերցնի։ Այն հավերժ կմնա Օվալաձև աշխատասենյակում։ Մենք նոր գավաթ կպատրաստենք»։ Իրոք, նրանք նոր գավաթ պատրաստեցին», — ասել է Թրամփը DAZN-ի հետ զրույցում։

Մամուլում տարածվել է տեսանյութ, որտեղ երևում է, թե ինչպես է Թրամփը, ՖԻՖԱ-ի ղեկավար Ջանի Ինֆանտինոյի թույլտվությամբ, մրցանակաբաշխության ժամանակ մեկ ոսկե մեդալ դնում իր պիջակի գրպանը։

ԱՄՆ նախագահ Դոնալդ Թրամփը հայտարարել է, որ պատմության լավագույն ֆուտբոլիստ է համարում բրազիլացի նախկին հարձակվող Պելեին։

«Շատ տարիներ առաջ, երբ երիտասարդ էի, այստեղ հրավիրել էին Պելե անունով ֆուտբոլիստի։ Նա խաղում էր «Նյու Յորք Կոսմոսի» կազմում, իսկ իմ ընկեր Սթիվ Ռոսսը՝ Warner Communications-ից, այդ ամենի ոգեշնչողն էր։

Մարզադաշտը լեփ-լեցուն էր։ Ես գնացի Պելեին տեսնելու, և դա անհավատալի էր։ Դա նման էր Բեյբ Ռութի անունը լսելուն։ Պելեն աներևակայելի մեծություն էր», – ասել է Թրամփը DAZN հեռուստաալիքին տված հարցազրույցում։

Պելեն մահացել է 2022 թվականի դեկտեմբերին՝ 82 տարեկանում։ Նա միակ ֆուտբոլիստն է, որը երեք անգամ դարձել է աշխարհի չեմպիոն (1958, 1962, 1970)։ Բրազիլիայի ազգային հավաքականի կազմում անցկացրել է 92 հանդիպում և խփել 77 գոլ։ Ակումբային մակարդակում հանդես է եկել բրազիլական «Սանթոս» և ամերիկյան «Նյու Յորք Կոսմոս» ակումբներում։