UFC-ի թեթև քաշային կարգի (մինչև 70 կգ) վարկանիշային աղյուսակի երկրորդ համար, Հայաստանը ներկայացնող Արման Ծառուկյանը հայտնել է, թե երբ հայտնի կդառնա աշխարհի առաջատար պրոմոուշենում իր հաջորդ մենամարտի օրը։ Նրա խոսքով՝ մանրամասները պարզ կդառնան հունիսի 14-ին ԱՄՆ Սպիտակ տանը կայանալիք մրցաշարից հետո։

«Սպասում եմ Սպիտակ տան մրցաշարին։ Երբ բոլորը մենամարտեն, UFC-ում կհայտարարեն իմ հաջորդ մենամարտի մասին։ Հնարավոր է՝ դա լինի սեպտեմբերին, հոկտեմբերին կամ այս տարվա վերջին։ Կախված է նրանից, թե ով կհաղթի։ Եթե հաղթող դառնա Իլիա Թոփուրիան, հնարավոր է՝ մենամարտենք տարեվերջին։ Եթե հաղթի Գեյջին, ապա՝ սեպտեմբեր-հոկտեմբեր ամիսներին», — ասել է Ծառուկյանը RAF-ի մամուլի ասուլիսի ժամանակ։

Նշենք, որ 29-ամյա Ծառուկյանը RAF-ի շրջանակում իր հաջորդ մենամարտերն անցկացնելու է UFC-ի նախկին մարտիկների հետ։ Արդեն հունիսի 13-ին նրա մրցակիցը կլինի լեգենդար ամերիկացի Թոնի Ֆերգյուսոնը, իսկ հուլիսի 18-ին հայ մարտիկն ուժերը կչափի Քոլբի Քովինգթոնի հետ։

Հիշեցնենք, որ MMA-ի իր վերջին մենամարտում, որը կայացել է նոյեմբերին Կատարի մայրաքաղաք Դոհայում անցկացված UFC Fight Night 264 մրցաշարում, Արման Ծառուկյանը խեղդող հնարքով տպավորիչ հաղթանակ էր տարել ավստրալացի Դեն Հուկերի նկատմամբ։

UFC-ի թեթև քաշային կարգի գործող չեմպիոն Իլիա Թոփուրիան հայտարարել է, որ նույն քաշային կարգի դասակարգման երկրորդ համար Արման Ծառուկյանը, որը նրա և Ջասթին Գեյջիի մենամարտի պահեստային մարտիկն է, կհրաժարվի մենամարտից, եթե ամերիկացին դուրս գա պայքարից։

​«Եթե Գեյջին մենամարտից մեկ շաբաթ առաջ հրաժարվի, Ծառուկյանը չի փոխարինի նրան։ Նա չի մենամարտի։ Եթե նրան առաջարկեն ինձ հետ մենամարտել մեկ շաբաթվա ծանուցմամբ, նա դա չի անի։ Նա կներկայանա միայն կշռման արարողությանը, քանի որ նրան միշտ որպես պահեստային են պահում իմ մենամարտերի համար», — նշել է Թոփուրիան Ալվարո Կոլմեներոյին տված հարցազրույցում։

​Հիշեցնենք, որ Թոփուրիայի և Գեյջիի միջև տիտղոսայիմ մենամարտը կկայանա հունիսի 14-ին՝ ԱՄՆ-ի Սպիտակ տանն անցկացվող մրցաշարի շրջանակում։

UFC-ի չեմպիոն Իլիա Թոփուրիան կիսվել է իր կարծիքով թեթև քաշային կարգի առաջատար մարտիկ Արման Ծառուկյանի վերաբերյալ՝ կոշտ քննադատության ենթարկելով նրա պահվածքը։

«Նա փոքր երեխայի ուղեղ ունի, կարծես մեծացած, բայց չհասունացած տղա լինի։ Չգիտես ինչու՝ նա իրեն հարուստի տեղ է դնում։ Ընդ որում՝ նա այնքան էլ հարուստ չէ, ինչպես և իր հայրը։ Ես բազմաթիվ հարուստ մարդկանց եմ ճանաչում, նրանք իրենց այդպես չեն պահում։ Նրանցից ոչ մեկը, ոչ ոք։

Նա իրենից հարուստ է ձևացնում, ով կարող է մեքենա գնել և վերավաճառելու նպատակով այն ուղարկել Ռուսաստան։ Բայց իրականում նա այդքան էլ հարուստ չէ։ Նա պարզապես անհաջողակ է»,- Թոփուրիայի խոսքերն է մեջբերում ABC-ն։

Քոնոր Մաքգրեգորը պաշտոնապես կվերադառնա UFC։ Այս մասին հայտնել է կազմակերպության ղեկավար Դանա Ուայթը։ Իռլանդացի մարտիկը հուլիսի 11-ին T-Mobile արենայում կայանալիք UFC 329 մրցաշարում ուժերը կչափի Մաքս Հոլոուեյի հետ։

​Մենամարտը կանցկացվի կիսամիջին քաշային կարգում։ Հոլոուեյի համար սա կլինի առաջին ելույթը մինչև 77 կգ քաշայինների դիվիզիոնում։

​Հիշեցնենք, որ իռլանդացին իր վերջին մենամարտն անցկացրել է 2021 թվականի ամռանը՝ ոտքի վնասվածքի պատճառով պարտվելով Դասթին Պորյեին։ Այդ ժամանակից ի վեր Մաքգրեգորը բազմիցս հայտարարել է օկտագոն վերադառնալու ցանկության մասին։ Հոլոուեյն էլ այս տարվա մարտին կայացած UFC 326 մրցաշարում մրցավարների միաձայն որոշմամբ պարտվել էր Չարլզ Օլիվեյրային։

​Նշենք, որ սա կլինի մարտիկների երկրորդ դեմ առ դեմ դիմակայությունը։ Առաջին անգամ Մաքգրեգորն ու Հոլոուեյը հանդիպել են 2013 թվականին. այն ժամանակ իռլանդացին առավելության էր հասել մրցավարների միաձայն որոշմամբ։

UFC-ի թեթև քաշայի կարգի դասակարգման երկրորդ համար Արման Ծառուկյանը վիճաբանություն է ունեցել Ջեյք Փոլի Most Valuable Promotions (MVP) նորամուտային մրցաշարի մասնակիցներից մեկի՝ Նամո Ֆազիլի հետ։

​Մրցաշարի մենամարտերից մեկում Ֆազիլը երկրորդ ռաունդում ցավեցնող հնարքով հաղթել էր Ջեյք Բաբիանին, ինչից հետո դիմել էր Ծառուկյանին. «Արմա՛ն, որտե՞ղ ես։ Մենք պետք է խոսենք, փոքրի՛կս»։

​Դահլիճը լքելիս Ֆազիլը գտել է Ծառուկյանին։ Մարտիկները զրուցել են բարձր տոնով, ինչից հետո Ծառուկյանը փորձել է ճեղքել արգելապատնեշը, սակայն նրան խանգարել են անվտանգության աշխատակիցները։ Ավելի ուշ կողմերի միջև հակամարտությունը շարունակվել է ենթատրիբունային հատվածում՝ Ջեյք Փոլի ներկայությամբ։

​Նշվում է, որ Ծառուկյանի և Ֆազիլի միջև լարվածությունն առաջացել էր այս շաբաթ, երբ մարտիկները լեզվակռվի էին բռնվել Հայաստանի քրդական համայնքի վերաբերյալ Ծառուկյանի արած մեկնաբանությունների պատճառով։

Arman Tsarukyan just tried to jump the gate and fight Namo Fazil 😬

Then went backstage to confront him 😳

“He wants to talk, I wanna talk!” pic.twitter.com/PuZwCYCymK

— Happy Punch (@HappyPunch) May 17, 2026

UFC-ի թեթև քաշային կարգի դասակարգման երկրորդ համար Արման Ծառուկյանը խոստովանել է, որ իր համար տհաճ է լինել մինչև 70 կգ քաշային կարգում UFC-ի 29-ամյա անպարտելի չեմպիոն Իլիա Թոփուրիայի և ամերիկացի Ջասթին Գեյջիի միջև մենամարտի պահեստայինը:

Այդ դիմակայությունը կդառնա Սպիտակ տանը կայանալիք UFC-ի մրցաշարի գլխավոր իրադարձությունը։

​«Ես սպասումների մեջ եմ։ Եթե որևէ բան պատահի, ինձ կկանչեն, և ես դրան եմ պատրաստվում։ Արդեն դիետա եմ պահում։ Միշտ էլ տհաճ է պահեստային լինել, բայց ի՞նչ արած», — Ծառուկյանի խոսքերն է մեջբերում FREAK.MMA-ը։

Հիշեցնենք, որ Թոփուրիայի և Գեյջիի միջև չեմպիոնական գոտու համար գլխավոր մենամարտը կկայանա հունիսի 15-ին ԱՄՆ-ում՝ Սպիտակ տանը նախատեսված UFC-ի մրցաշարի շրջանակում։

UFC-ի թեթև քաշային կարգի դասակարգման երկրորդ համար, Հայաստանը ներկայացնող Արման Ծառուկյանը պատմել է, թե որքան դժվարությամբ է իր ընկեր Խամզաթ Չիմաևը քաշ գցել ամերիկացի Շոն Սթրիքլենդի դեմ մենամարտին նախապատրաստվելիս։

​«Հավաքների առաջին իսկ օրվանից նա 18 կգ քաշ էր գցել։ Վերջին օրը՝ կշռման արարողությունից առաջ, նա պետք է ևս վեց կիլոգրամ նիհարեր։ Առաջին չորսը հեշտ տրվեցին, բայց գիշերը նա իրեն վատ զգաց, արթնացավ և ասաց. «Ինձ թույլ եմ զգում, ուժ չունեմ։ Չգիտեմ, թե ինչպես եմ գցելու մնացած երկու կիլոգրամը»։ Նա չէր ցանկանում շարունակել քաշ գցելը, բայց թիմը նրան ստիպեց», — Ծառուկյանի խոսքերն է մեջբերում  FREAK.MMA-ը։

​Հիշեցնենք, որ օրեր առաջ ԱՄՆ-ի Նյու Ջերսի նահանգում կայացած UFC 328 մրցաշարի գլխավոր մենամարտում Խամզաթ Չիմաևը մրցավարների ոչ միաձայն որոշմամբ (48-47, 47-48, 48-47) պարտվել էր ամերիկացի Շոն Սթրիքլենդին: Այս մարտի արդյունքով Սթրիքլենդը դարձավ UFC-ի միջին քաշային կարգի (մինչև 84 կգ) նոր չեմպիոն, իսկ Չիմաևը զրկվեց չեմպիոնական գոտուց և կրեց իր պրոֆեսիոնալ կարիերայի առաջին պարտությունը նախորդ 15 անընդմեջ հաղթանակներից հետո:

UFC-ի երկու քաշային կարգերում նախկին չեմպիոն, կանադացի Ժորժ Սեն-Պիերի մարզիչ Ֆիրաս Զահաբին դիմել է Խամզաթ Չիմաևին՝ UFC 328 մրցաշարում Շոն Ստրիքլենդից կրած պարտությունից հետո։

«Աղերսում եմ ձեզ, թող ինչ-որ մեկը սա փոխանցի նրան։ Խամզա՛թ, արի ինձ մոտ մարզվելու։ Արի Մոնրեալ։ Խոստանում եմ՝ եթե գաս, էլ երբեք շնչակտուր չես լինի։ Քեզ հետ բեր նաև Արման Ծառուկյանին։ Խամզաթ Չիմաև, Արման Ծառուկյան, եկե՛ք ինձ մոտ մարզվելու», — Զահաբիի խոսքերն է մեջբերում MMA Junkie-ն։

Մասնագետը վստահեցրել է, որ իրենց մոտ մարզվելու դեպքում մարտիկների ֆիզիկական վիճակը, հարվածային տեխնիկան և ոտքերով աշխատանքը կհասնեն նախկինում չտեսնված մակարդակի։ Նա ընդգծել է, որ եթե Չիմաևն ընդունի հրավերը, նման պարտություն այլևս երբեք չի կրկնվի։

«Շատ եմ հույս տածում, որ նա կստանա այս հաղորդագրությունը։ Խնդրում եմ, արի մարզվելու ինձ և Ժորժ Սեն-Պիերի հետ, և մենք կանենք հնարավոր ամեն ինչ, որպեսզի քո ձեռքը հաղթանակած բարձրացնեն՝ անկախ նրանից, թե դա ինչ կարժենա, որքան էներգիա կամ ժամանակ կպահանջվի։ Մենք կկենտրոնանանք միայն դրա վրա։ Եթե Խամզաթ Չիմաևն ինձ լսում է, կամ որևէ մեկը, ով ճանաչում է նրան, փոխանցեք այս ուղերձը։ Խնդրում եմ, տեղյակ պահեք նրան, որ նա ավելին է, քան ցանկալի հյուր, և ես մեծ ուրախությամբ նրան կընդունեմ իմ դահլիճում հնարավորինս շուտ», — եզրափակել Զահաբին։

Հիշեցնենք, որ օրեր առաջ ԱՄՆ-ի Նյու Ջերսի նահանգում կայացած UFC 328 մրցաշարի գլխավոր մենամարտում Խամզաթ Չիմաևը մրցավարների ոչ միաձայն որոշմամբ (48-47, 47-48, 48-47) պարտվել էր ամերիկացի Շոն Սթրիքլենդին: Այս մարտի արդյունքով Չիմաևը զրկվեց չեմպիոնական գոտուց և կրեց իր պրոֆեսիոնալ կարիերայի առաջին պարտությունը նախորդ 15 անընդմեջ հաղթանակներից հետո:

UFC-ի հայտնի ամերիկացի մեկնաբան Ջո Ռոգանն իր հիացմունքն է հայտնել կազմակերպության թեթև քաշային կարգի հայազգի մարտիկ Արման Ծառուկյանի վերաբերյալ։

Ռոգանն ընդգծել է, որ Ծառուկյանն իր օրինակով կոտրում է այն կարծրատիպը, թե ապահովված ընտանիքների զավակները չեն կարող հաջողության հասնել սպորտի այս դաժան տեսակում:

«Ծառուկյանի հայրը միլիարդատեր է, բայց Արմանը բնավ ծույլ չէ։ Նա մարտահրավեր է նետում այն արմատացած կարծիքին, թե հարուստ ընտանիքից լինելու դեպքում չես կարող մեծագույն մարտիկ դառնալ: Եվ կարևոր չէ, թե դու ծնվել ես գետտոյում. այս տղան ձեր ջարդը կտա:

Ոմանք ասում են. «Օ՜, ես դուրս եմ եկել բրազիլական ֆավելաներից»: Դե ինչ, հաջողություն եմ մաղթում ձեզ այս հայ խելագարի դեմ պայքարում: Արմանի մարմինը հունական աստծո մարմնի պես է: Եվ նա գերազանց տիրապետում է ըմբշամարտին»,- ասել է Ռոգանն իր յութուբյան ալիքում:

Հիշեցնենք, որ 29-ամյա Արման Ծառուկյանը խառը մենամարտերում (MMA) անցկացրել է 26 մենամարտ՝ տոնելով 23 հաղթանակ: Այս պահին նա զբաղեցնում է 15-րդ հորիզոնականը UFC-ի լավագույն մարտիկների վարկանիշում՝ անկախ քաշային կարգից (P4P): Միաժամանակ, նա թեթև քաշային կարգի (մինչև 70 կգ) վարկանիշային աղյուսակի առաջատարներից է և հանդիսանում է գործող չեմպիոն Իսլամ Մախաչևի տիտղոսի գլխավոր հավակնորդը:

UFC-ի թեթև քաշային կարգի դասակարգման երկրորդ համար Արման Ծառուկյանը 50 հազար ԱՄՆ դոլար կվճարի ամերիկացի հայտնի բլոգեր Ադին Ռոսին՝ ԱՄԷ-ն ներկայացնող Խամզատ Չիմաևի՝ UFC-ի տիտղոսային մենամարտում կրած պարտությունից հետո։

Հիշեցնենք, որ ավելի վաղ Ռոսն ու Ծառուկյանը գրազ էին եկել Չիմաևի և ամերիկացի Շոն Ստրիքլենդի միջև կայանալիք տիտղոսային գոտու համար մենամարտի ելքի շուրջ։ Արդյունքում Չիմաևը պարտություն կրեց, ինչի վրա էլ հենց խաղադրույք էր կատարել (գրազ էր եկել) ամերիկացի բլոգերը։

«Արմանն ինձ գրեց գիշերը՝ մենամարտից անմիջապես հետո։ Ես նրան հաղորդագրություն ուղարկեցի՝ «-50 հազար»։ Իսկ նա պատասխանեց. «Իհա՛րկե։ Դատավորի՞ն ես կաշառել»։ Բայց մենամարտը ծախված չէր, Ստրիքլենդը հաղթեց ռաունդներով՝ 3-2 հաշվով», — իր ուղիղ հեռարձակման (սթրիմի) ժամանակ պատմել է Ռոսը։

Նշենք, որ Խամզատ Չիմաևն իր պրոֆեսիոնալ կարիերայում անցկացրած 16 մենամարտերում կրեց իր անդրանիկ պարտությունը և UFC-ի անկախ քաշային կարգերի (pound-for-pound) վարկանիշային աղյուսակում 3-րդ հորիզոնականից նահանջեց 10-րդ տեղ։