UFC-ի կիսամիջին քաշային կարգի (մինչև 77 կգ) գործող չեմպիոն Իսլամ Մախաչևը մեկնաբանել է Հայաստանը ներկայացնող Արման Ծառուկյանի և բրազիլացի Չարլզ Օլիվեյրայի միջև հնարավոր ռևանշ-մենամարտի կազմակերպման մասին շրջանառվող լուրերը:

«Մենամա՞րտ թիվ մեկ հավակնորդի կարգավիճակի համար. նրանց միջև հավասար պայքար էր։ Երկուսն էլ արժանի են դրան։ Օլիվեյրան արդեն հաղթել է Գեյջիին, իսկ Արմանը հաղթանակների լավ շարք ունի և, կարծում եմ, հիմա նա է առաջին համարը։ Սա լավ մենամարտ է պարզելու համար, թե ով է հաջորդը պայքարելու տիտղոսի համար»,- Մախաչևի խոսքերը մեջբերում է MMAJunkie-ն։

Ինչպես ավելի վաղ հաղորդել էր լրագրող Լեո Գիմարայնշը՝ հղում անելով Մանուկ Հակոբյանի տեղեկություններին, հայ մարտիկը ռևանշ-մենամարտ կանցկացնի UFC-ի նախկին չեմպիոն, բրազիլացի Չարլզ Օլիվեյրայի հետ։

Սպասվում է, որ այս դիմակայությունը կկայանա սեպտեմբերի 19-ին՝ Լոս Անջելեսում անցկացվելիք UFC 331 մրցաշարի շրջանակում։

Հայ մարտիկ, UFC-ի թեթև քաշային կարգի դասակարգման աղյուսակում երկրորդ հորիզոնականը զբաղեցնող Արման Ծառուկյանը նշել է խառը մենամարտերի (MMA) պատմության հինգ մեծագույն ներկայացուցիչների անունները։

DAZN-ին տված հարցազրույցում մարզիկը ներկայացրել է իր վարկածով բոլոր ժամանակների լավագույնների հնգյակը, որն ունի հետևյալ տեսքը.

1. Ջոն Ջոնս
2. Ժորժ Սեն-Պիեր
3. Դեմետրիուս Ջոնսոն
4. Անդերսոն Սիլվա
5. Խաբիբ Նուրմագոմեդով

Հիշեցնենք, որ պրոֆեսիոնալ խառը մենամարտերում 29-ամյա Ծառուկյանն անցկացրել է 26 մենամարտ՝ տոնելով 23 հաղթանակ և կրելով ընդամենը 3 պարտություն: 15 դեպքում նա մենամարտն ավարտել է ժամանակից շուտ:

Ախալքալաքում ծնված մարզիկը պրոֆեսիոնալ օկտագոնում իր նորամուտը նշել է 2015 թվականի սեպտեմբերին, իսկ UFC-ում առաջին մենամարտն անցկացրել է 2019-ի ապրիլին: Ծառուկյանն ազատ ոճի ըմբշամարտի և խառը մենամարտերի սպորտի վարպետ է:

Հայտնի են դարձել UFC-ի թեթև քաշային կարգի դասակարգման երկրորդ համար Արման Ծառուկյանի հաջորդ մենամարտի մանրամասները։ Ինչպես հաղորդում է լրագրող Լեո Գիմարայնշը՝ հղում անելով Մանուկ Հակոբյանի տեղեկություններին, հայ մարտիկը ռևանշ-մենամարտ կանցկացնի UFC-ի նախկին չեմպիոն բրազիլացի Չարլզ Օլիվեյրայի հետ։

Սպասվում է, որ այս գերլարված դիմակայությունը կկայանա սեպտեմբերի 19-ին՝ Լոս Անջելեսում անցկացվելիք UFC 331 մրցաշարի շրջանակում։

Աղբյուրի փոխանցմամբ՝ պրոմոուշենը որոշել է էական փոփոխություն մտցնել մենամարտի ձևաչափում։ Նախապես ծրագրված էր անցկացնել 3 ռաունդանոց մարտ, և երկու մարտիկներն էլ իրենց նախապատրաստական և մարզումային փուլը սկսել էին հենց այդ հաշվարկով։ Սակայն ավելի ուշ UFC-ն վերանայել է որոշումն ու մենամարտը դարձրել 5-ռաունդանոց։

Հատկանշական է, որ չնայած ռաունդների ավելացմանը, այս մենամարտում նժարին դրված չի լինելու որևէ չեմպիոնական գոտի, այդ թվում՝ BMF տիտղոսը։

Հիշեցնենք, որ Ծառուկյանն ու Օլիվեյրան արդեն հանդիպել են օկտագոնում 2024 թվականի ապրիլին՝ պատմական UFC 300 մրցաշարում։ Այն ժամանակ 3 ռաունդ տևած համառ պայքարն ավարտվել էր Արման Ծառուկյանի հաղթանակով՝ մրցավարների ոչ միաձայն որոշմամբ։

Այսօր՝ օգոստոսի 1-ին, Երևանում կայացավ HYPE FC Armenia մարտարվեստների մրցաշարը։ Երեկոյի գլխավոր իրադարձությունը UFC-ի թեթև քաշային կարգի դասակարգման երկրորդ համար, պրոմոուշենի չեմպիոն Արման Ծառուկյանի և հնդիկ հայտնի աթլետ ու ֆիթնես-բլոգեր Անկիտ Բայանպուրիայի միջև սպասված դիմակայությունն էր։

Մենամարտն անցկացվում էր գրեփլինգի՝ Submission Only («Միայն հանձնվելով») բացառիկ կանոններով, որտեղ արգելված են ցանկացած տեսակի հարվածներ։ Այս խիստ ձևաչափում բացակայում են մրցավարական գնահատականներն ու միավորները․ հաղթանակը հնարավոր էր նվաճել միայն խեղդող կամ ցավեցնող հնարքների միջոցով՝ ստիպելով մրցակցին հանձնվել։ Նժարին դրված էր Արման Ծառուկյանի՝ Hype FC-ի չեմպիոնական գոտին։

Հայ մարտիկն օկտագոնում մրցակցին փրկվելու ոչ մի շանս չտվեց և ժամկետից շուտ ավարտեց գլխավոր մենամարտը։ Արման Ծառուկյանին պահանջվեց ընդամենը 2 րոպե 30 վայրկյան՝ թևի վրա ցավեցնող հնարք կիրառելու համար, ինչից հետո հնդիկ մարզիկը ստիպված եղավ անմիջապես հանձնվել։

Այսպիսով, Արման Ծառուկյանը վստահ և տպավորիչ հաղթանակ տոնեց հայրենիքում՝ հաջողությամբ պաշտպանելով իր չեմպիոնական տիտղոսը։

Օգոստոսի 1-ին Երևանում կայանում է խառը մենամարտերի HYPE FC Armenia սպասված մրցաշարը, որի գլխավոր իրադարձություններից մեկը Դավիթ «Կայսր» Խաչատրյանի և ռուսաստանցի Իբրահիմ «Նիկարխո» Իսլամովի միջև չեմպիոնական տիտղոսի համար մարտն էր: Պայքարն ընթանում էր առանց ձեռնոցների բռնցքամարտ ձևաչափով։

Իբրահիմ Իսլամովը, ով աչքի է ընկնում կանգնած դիրքում իր ագրեսիվ ոճով, HYPE FC-ի նախորդ մարտերում հաղթանակի էր հասել ժամկետից շուտ։ Մյուս կողմից՝ օկտագոն դուրս եկավ հայկական մարտարվեստի վետերան Դավիթ Խաչատրյանը, ով մրցաշարի մշտական և փորձառու մասնակիցներից է ու երկրպագուներին հայտնի է «Կայսր» մականունով։

Չնայած Իսլամովի նախորդ վաղաժամ հաղթանակներին՝ այս անգամ գլխավոր մենամարտը տևեց նախատեսված բոլոր 5 ռաունդները։ Գրանցվեց իսկական մարտական և անզիջում պայքար, որի արդյունքում մրցավարների ոչ միաձայն որոշմամբ հաղթանակը շնորհվեց ռուսաստանցի մարտիկին։ Այսպիսով, Իբրահիմ Իսլամովը նվաճեց HYPE FC-ի չեմպիոնական գոտին։

Երևանյան մրցաշարի շրջանակներում հանդես եկան նաև մի շարք այլ հայ մարտիկներ՝ գրանցելով և՛ տպավորիչ հաղթանակներ, և՛ ցավալի պարտություններ.

• Ռաֆայել «Buffalo» Աբրահամյան — Օլեգ «Berserk» Ուդոդ․ Աբրահամյանը հիանալի մարտ անցկացրեց և հաղթանակ տոնեց երկրորդ ռաունդում՝ տեխնիկական նոկաուտով (Dirty Boxing ձևաչափ)։
• Էդգար «Ռուբակա» Հովհաննիսյան — Ռամզան Մագոմաև․ Հովհաննիսյանը գեղեցիկ ոճով առավելության հասավ մրցակցի նկատմամբ՝ հաղթելով մրցավարների միաձայն որոշմամբ (Bare Knuckle ձևաչափ)։
• Ալեքսանդր «Ագուսյա» Բադալյանց — Ջոշուա «KOKO» Նիմակո․ Բադալյանցը զիջեց մրցակցին և պարտվեց երկրորդ ռաունդում՝ տեխնիկական նոկաուտով (Dirty Boxing ձևաչափ)։
• Նարեկ Պողոսյան — Շամիլ Իսմայիլով․ Պողոսյանը նույնպես չկարողացավ շարունակել մենամարտը և պարտություն կրեց երկրորդ ռաունդում՝ տեխնիկական նոկաուտով։

UFC-ի թեթև քաշային կարգի նախկին չեմպիոններ Խաբիբ Նուրմագոմեդովն ու Քոնոր Մակգրեգորը հրավիրված են Պորտուգալիայի ազգային հավաքականի և Սաուդյան Արաբիան ներկայացնող «Ալ-Նասրի» աստղային հարձակվող Կրիշտիանու Ռոնալդուի և Ջորջինա Ռոդրիգեսի հարսանյաց արարողությանը։ Այս մասին հաղորդում է Gossip Magazin պարբերականը։

Աղբյուրի տեղեկություններով՝ հարսանեկան խնջույքը կկայանա արդեն հաջորդ շաբաթ։ Հյուրերի ցանկում ընդգրկված են ինչպես հայտնի ֆուտբոլիստներ, այնպես էլ տարբեր ոլորտների համաշխարհային աստղեր։ Մասնավորապես, հրավիրվածների թվում են Ռիո Ֆերդինանդը, Վինիսիուս Ժունիորը, Կիլիան Մբապեն, Ռոդրիգոն, դերասաններ Վին Դիզելն ու Էսթեր Էքսպոսիտոն, երաժիշտներ Ռիհաննան, Ջենիֆեր Լոպեսը, Դրեյքն ու Թրևիս Սքոթը, հեռուստահաղորդավար Պիրս Մորգանը, ինչպես նաև հայտնի բլոգեր IShowSpeed-ը։

41-ամյա Կրիշտիանու Ռոնալդուն և 32-ամյա Ջորջինա Ռոդրիգեսը միասին են 2016 թվականից։ Ֆուտբոլիստն իր սիրելիին ամուսնության առաջարկություն էր արել 2025 թվականի օգոստոսին։ Պիրս Մորգանի հետ ունեցած զրույցում Ռոնալդուն նշել էր, որ հարսանիքը նախատեսում են կազմակերպել ԱԱ-2026-ից հետո՝ նախքան Սաուդյան Արաբիայի առաջնության նոր մրցաշրջանի մեկնարկը։

Զույգն ունի երկու ընդհանուր դուստր՝ Ալանա Մարտինան (ծնվել է 2017 թ․ նոյեմբերին) և Բելլա Էսմերալդան (ծնվել է 2022 թ․ ապրիլին)։ Բացի այդ, նրանք դաստիարակում են ևս երեք երեխայի՝ Կրիշտիանու-կրտսերին (ծնված 2010 թ․) և երկվորյակներ Մատեոյին ու Եվային (ծնված 2017 թ․), որոնք լույս աշխարհ են եկել փոխնակ մայրերի օգնությամբ։

Հիշեցնենք, որ 2018 թվականին Նուրմագոմեդովը հաղթել էր Մակգրեգորին՝ չորրորդ ռաունդում կիրառելով ցավեցնող հնարք։ Այդ մենամարտը MMA-ի պատմության մեջ մտել է որպես ամենաշահութաբեր և դիտված դիմակայությունը։ Դաղստանցի մարզիկն իր պրոֆեսիոնալ կարիերան ավարտել է 2020 թվականի հոկտեմբերին՝ մնալով անպարտելի. նրա ակտիվում գրանցված է 29 հաղթանակ և չեմպիոնական տիտղոսի երեք հաջող պաշտպանություն։

UFC թեթև քաշային կարգի առաջատար մարտիկներից Արման Ծառուկյանը մոտ է օկտագոն վերադառնալուն: Հայ մարզիկը տեղեկացրել է, որ պրոմոուշենն ամենամոտ ապագայում պաշտոնապես կհայտարարի իր հաջորդ մենամարտի մասին:

Ավելի վեր մամուլում լուրեր էին շրջանառվում, որ Ծառուկյանը կարող է ռևանշ-մենամարտ անցկացնել բրազիլացի Չարլզ Օլիվեյրայի հետ՝ BMF տիտղոսի համար: Ակնկալվում է, որ այդ մենամարտը կարող է կայանալ սեպտեմբերի 19-ին Լոս Անջելեսում նախատեսված UFC 331 մրցաշարի շրջանակում:

Իր տելեգրամյան ալիքում Ծառուկյանը կարճ մեկնաբանել է ստեղծված իրավիճակը՝ երկրպագուներին առաջարկելով կռահել առաջիկա մրցակցի անունը.

«Ժամանակը գրեթե եկել է: Շատ շուտով UFC-ն կհայտարարի իմ հաջորդ մենամարտի մասին: Ի՞նչ եք կարծում, ո՞վ է կանգնած լինելու իմ դիմաց: Թե՞ բոլորիս մեծ անակնկալ է սպասվում», — գրել է Ծառուկյանը:

Հիշեցնենք, որ Արման Ծառուկյանն իր վերջին մենամարտն անցկացրել է 2025 թվականի նոյեմբերին՝ UFC Fight Night 265 մրցաշարում: Այդ երեկո նա երկրորդ ռաունդում խեղդող հնարքով հաղթանակ էր տոնել Դեն Հուկերի նկատմամբ: Հայ մարտիկի ակտիվում առկա է 23 հաղթանակ և 3 պարտություն:

UFC-ի թեթև քաշային կարգի դասակարգման աղյուսակի երկրորդ համար Արման Ծառուկյանն օգոստոսի 1-ին հանդես կգա Երևանում կայանալիք «Hype Armenia» մրցաշարի գլխավոր իրադարձությունում:

Հայ մարտիկի մրցակիցը կլինի հնդիկ ֆիթնես-բլոգեր և նախկին ըմբիշ Անկիտ Բայանպուրիան:

Գոտեմարտը կանցկացվի գրեփլինգի կանոններով՝ «միայն հնարքով» ձևաչափով։ Սա նշանակում է, որ հաղթողին հնարավոր կլինի որոշել բացառապես ցավեցնող կամ խեղդող հնարքի հաջող կիրառման դեպքում:

Նժարին դրված է լինելու Hype լիգայի չեմպիոնական գոտին, որը Ծառուկյանը նվաճել է այս տարվա մարտին՝ «Hype Brazil» մրցաշարում խեղդող հնարքով պարտության մատնելով Մուհամադ Մոկաևին:

Ինչ վերաբերում է խառը մենամարտերում (MMA) Ծառուկյանի վիճակագրությանը, ապա նա պրոֆեսիոնալ կարիերայում անցկացրել է 26 մենամարտ՝ տոնելով 23 հաղթանակ և կրելով 3 պարտություն: Հայազգի մարտիկը վերջին անգամ օկտագոն է դուրս եկել 2025 թվականի նոյեմբերի 22-ին՝ «UFC Fight Night 265»-ի շրջանակում՝ խեղդող հնարքով հաղթելով Դեն Հուկերին:

Նշենք նաև, որ Ծառուկյանն արդեն սկսել է նախապատրաստվել UFC-ում իր հաջորդ մենամարտին: Ըստ մամուլում շրջանառվող լուրերի՝ այս աշնանը նա կարող է ռևանշ մենամարտ անցկացնել բրազիլացի Չարլզ Օլիվեյրայի հետ:

 

Посмотреть эту публикацию в Instagram

 

Публикация от Hype Fighting Championship (@hype.fighting)

Բռնցքամարտի փառքի միջազգային սրահի անդամ, գերծանր քաշային կարգում աշխարհի նախկին բացարձակ չեմպիոն, 59-ամյա ամերիկացի Մայք Թայսոնը խոսել է Դիեգո Մարադոնայի և Լիոնել Մեսսիի մասին:

The Ring ամսագրին տված հարցազրույցում լեգենդար բռնցքամարտիկին հիշեցրել են, որ նա վերջերս ներկա է եղել աշխարհի 2026 թվականի առաջնության եզրափակիչին՝ կրելով Լիոնել Մեսիի մարզաշապիկը։ Միևնույն ժամանակ, նա ժամանակին ջերմ հարաբերություններ է ունեցել Դիեգո Մարադոնայի հետ։ Հարցին, թե ի վերջո ով է մեծագույնը՝ Մեսսի՞ն, թե՞ Մարադոնան, Թայսոնը պատասխանել է.

«Ես միշտ Մարադոնային կհամարեմ պատմության մեծագույն ֆուտբոլիստը։ Բայց այն, որ նա մեծագույնն է, չի նշանակում, թե Մեսսին մեծագույնը չէ։ Ես ճանաչում էի Մարադոնային, բայց անձամբ չեմ ճանաչում Մեսիին։ Ես հարգում և սիրում եմ նրան, բայց չգիտեմ նրան այնպես, ինչպես գիտեի Դիեգոյին։ Նա հրաշալի տղա էր, ինձ համար եղբոր պես էր։ Մեսսին դա կհասկանա»,- պատասխանել է Թայսոնը։

Հիշեցնենք, որ ԱԱ-2026-ում Մեսսին դարձավ ութ գոլի հեղինակ՝ ռմբարկուների ցուցակում զբաղեցնելով երկրորդ հորիզոնականը և զիջելով միայն 10 գոլ խփած Կիլիան Մբապեին։

Աշխարհի 2026 թվականի առաջնության եզրափակիչում Արգենտինայի հավաքականը նվազագույն՝ 0-1 հաշվով զիջեց Իսպանիային։ Հանդիպման հիմնական ժամանակն ավարտվեց ոչ-ոքի (0:0), իսկ լրացուցիչ երկրորդ խաղակեսում միակ հաղթական գնդակը հեղինակեց կատալոնական «Բարսելոնայի» 26-ամյա հարձակվող Ֆերան Տորեսը։

Իր ողջ կարիերայի ընթացքում Մեսսին Արգենտինայի ազգային հավաքականի կազմում անցկացրել է 207 հանդիպում և խփել 125 գոլ: Ազգային թիմի հետ նա նվաճել է ԱԱ-2022-ի գավաթը, 2022 թվականի Ֆինալիսիման, երկու անգամ հաղթել է Ամերիկայի գավաթում (2021, 2024), ինչպես նաև դարձել է 2008 թվականի Օլիմպիական խաղերի չեմպիոն:

UFC-ի նախագահ Դանա Ուայթը հայտարարել է, որ պրոմոուշենի նախկին կրկնակի չեմպիոն Քոնոր Մաքգրեգորը վնասվածքի պատճառով չի կարողանա մարտերի մասնակցել առաջիկա մեկ տարվա ընթացքում:

«Քոնոր Մաքգրեգորը շարքից դուրս է մնացել մեկ տարով»,- ասել է Ուայթը Zuffa Boxing-ի մամուլի ասուլիսի ժամանակ։

Հիշեցնենք, որ հուլիսի 12-ին ԱՄՆ-ի Լաս Վեգաս քաղաքում կայացած UFC 329 մրցաշարում Մաքգրեգորը տեխնիկական նոկաուտով պարտվել էր Մաքս Հոլոուեյին՝ մենամարտի առաջին ռաունդում ոտքի ծանր վնասվածք ստանալու պատճառով։

Ավելի վաղ իռլանդացի մարտիկը պահանջել էր այդ դիմակայությունը ճանաչել չկայացած:
Նշենք, որ այս մարտիկների միջև առաջին հանդիպումը կայացել էր 2013 թվականին, որտեղ մրցավարների միաձայն որոշմամբ հաղթանակ էր տոնել Մաքգրեգորը։

Ընդհանուր առմամբ, Քոնորը խառը մենամարտերում (MMA) անցկացրել է 29 գոտեմարտ՝ գրանցելով 22 հաղթանակ և կրելով 7 պարտություն: