Երեկ՝ օգոստոսի 4-ին, ՈւԵՖԱ-ի Չեմպիոնների լիգայի 2026/27 մրցաշրջանի որակավորման երրորդ փուլի առաջին խաղում Հայաստանի գործող չեմպիոն «Արարատ-Արմենիան» Վազգեն Սարգսյանի անվան «Հանրապետական» մարզադաշտում կամային հաղթանակ տարավ Սլովենիայի գործող չեմպիոն «Ցելյեի» նկատմամբ (2-1)։

Երևանյան ակումբի գլխավոր մարզիչ Մանուել Տուլիպան հետխաղային ասուլիսի ժամանակ ամփոփել է հանդիպումն ու պատասխանել լրագրողների հարցերին։

— Խաղային ո՞ր դրվագում «Արարատ-Արմենիան» կարողացավ հաղթանակի նժարն իր կողմը թեքել։

«Չեմ ցանկանում առանձնացնել որևէ կոնկրետ դրվագ։ Կարող եմ միայն ասել, որ սա ընթացիկ մրցաշրջանում մեզ համար ամենաբարդ մրցակիցն էր, որին հանդիպել ենք։ «Ցելյեն» մեզ ավելի շատ դժվարություններ ստեղծեց, քան որևէ այլ թիմ։ Երբ նրանք գնդակով էին, մենք լուրջ խնդիրներ էինք ունենում, և հիմա հաստատ կարող եմ ասել, որ պատասխան խաղը մեզ համար շատ-շատ բարդ է լինելու։

Ցանկանում եմ ընդհանուր առմամբ շնորհակալություն հայտնել իմ ֆուտբոլիստներին քրտնաջան աշխատանքի համար։ Յուրաքանչյուր երեք օրը մեկ այսպիսի բարձրակարգ հանդիպումներ անցկացնելը շատ դժվար է։ Հատկապես, որ երեք օր առաջ խաղում էինք արհեստական խոտածածկի վրա, և մի շարք ֆուտբոլիստներ խաղադաշտում անցկացրել էին 90 րոպե։ Այնպես որ, գոհ եմ թիմի խաղից և ցանկանում եմ նաև շնորհակալություն հայտնել մարզչական շտաբին»։

— Կցանկանայի հարցնել Միշել Այվազյանի մասին։ Միգուցե մարզչի համար մի փոքր տարօրինակ լինի, որ առանձնացնում եմ 21-22 տարեկան ֆուտբոլիստի խաղադաշտ մտնելը, սակայն մենք Հայաստանում սովոր չենք տեսնելու, որ այդ տարիքի ֆուտբոլիստներին հաճախ վստահեն այսպիսի խաղերում, նույնիսկ եթե լավ խաղացողներ են եղել։ Ի՞նչ կասեք այս թեմայի վերաբերյալ. ամեն ինչ կախվա՞ծ է կոնկրետ ֆուտբոլիստից, թե՞ դուք վստահում եք այդ տարիքի խաղացողներին։

«Ես սիրում եմ հնարավորություն տալ այնպիսի ֆուտբոլիստների, որոնք փնտրում են այդ հնարավորությունները։ Մարզումների ժամանակ ջանասիրաբար աշխատում են, խաղադաշտում խելացի են գործում և մշտապես իրենց խաղը բարելավելու հնարավորություններ են փնտրում։ Այնպես որ, գլխավոր պատճառը դա է։ Միշելի առավելությունն այն է, որ նա կարող է խաղալ կիսապաշտպանության տարբեր դիրքերում։

Խորապես համոզված եմ, որ մարզիչները երբեք չպետք է վախենան երիտասարդ ֆուտբոլիստներին խաղադաշտում հնարավորություն տալուց։ Եթե խաղացողը պրոֆեսիոնալ է, գիտի, թե ինչ է անում, պատրաստ է խաղին և նվիրված է խաղում, չպետք է նայել տարիքին։ Վստահ եմ, որ Միշելը կարող է փայլուն ապագա ունենալ»։

— Րոպեներ առաջ ձեր տեղում նստած «Ցելյեի» գլխավոր մարզիչը հայտարարել է, որ պատասխան խաղում ամեն ինչ այլ կերպ է լինելու, և նրանք կբեկան դիմակայության ընթացքը։ Դուք էլ արդեն մի քանի անգամ նշեցիք, որ արտագնա հանդիպումը շատ բարդ է լինելու։ Ո՞րը պետք է լինի հաջողության հասնելու ձեր գլխավոր բանալին։

«Պարզ է, որ այն, ինչ ասել է մրցակցի մարզիչը, դա էլ պետք է ասեր։ Ես նույնպես ասացի այն, ինչ պետք է ասեի։

Բայց մի բան հաստատ հստակ է․ մենք մեծ հավակնություններ ունենք ու պատիվ ունենք ներկայացնելու այս փոքր երկիրը։ Հայաստանի, հայկական ֆուտբոլի մասին խոսելիս հիմնականում շատ են թերագնահատում մեզ, շատերը կարծում են, որ այստեղ անհրաժեշտ մակարդակ չկա։ Բայց դա այդպես չէ․ մենք ունենք որակյալ ֆուտբոլ և ակումբ, և բոլորին հաճույքով ապացուցում ենք հակառակը։

Բնականաբար, մենք ունենք մեր ծրագիրը և պատրաստ կլինենք։ Պատասխան խաղը մեզ համար չափազանց մեծ նշանակություն ունի։ «Արարատ-Արմենիան» պատրաստ է բարձրացնել հայկական ֆուտբոլի նշաձողը»։

— Որակավորման նախորդ երկու փուլերում թիմը երկու գնդակի առավելություն ուներ առաջին խաղերից հետո։ Սակայն պատասխան հանդիպումների առաջին խաղակեսերը խիստ լարված էին անցնում, և միայն դրանից հետո էր թիմը լուծում իր խնդիրները։ Այս անգամ թիմը երկու գնդակի առավելություն չունի։ Ի՞նչ պետք է անենք, որ առաջիկա առաջին խաղակեսն ավելի հաջող անցկացնի թիմը։

«Ամեն ինչ շատ պարզ է։ Երբ երկու գոլի առավելություն ունեինք, կարող էինք մեզ թույլ տալ պարտվել մեկ գոլի տարբերությամբ։ Հիմա պետք է կա՛մ հաղթել, կա՛մ ոչ-ոքի խաղալ։

Կրկին կրկնում եմ՝ ոչինչ և ոչ ոք մեզ չի կարող խանգարել երազել։ Ես ամեն ինչ կանեմ, որպեսզի այս երկիրը շարունակի երազել։

Հավաստիացնում եմ ձեզ, որ թե՛ ես, թե՛ ֆուտբոլիստները բոլոր ջանքերը կգործադրենք, որ Չեմպիոնների լիգայում հայտնվենք կամ առնվազն Եվրոպայի լիգայի խաղարկության լիգայի փուլում խաղանք։

Եթե դա մեզ մոտ չստացվի, չի նշանակի, թե ջանք ենք խնայել կամ եղել է նվիրվածության պակաս։ Դա կնշանակի միայն մեկ բան՝ որ մրցակիցը չափազանց ուժեղ է եղել», — նշել է պորտուգալացի մասնագետը։

Հիշեցնենք, որ թիմերի միջև որակավորման երրորդ փուլի պատասխան հանդիպումը կկայանա օգոստոսի 11-ին՝ Երևանի ժամանակով 22:15-ին։

Պորտուգալական հեղինակավոր A Bola պարբերականն անդրադարձել է ՈւԵՖԱ-ի Չեմպիոնների լիգայի որակավորման երրորդ փուլի առաջին խաղում սլովենական «Ցելյեի» նկատմամբ Հայաստանի չեմպոին «Արարատ-Արմենիայի» տարած կամային հաղթանակին (2-1):

Արտասահմանյան լրատվամիջոցի ուշադրության կենտրոնում է հայտնվել երկու պորտուգալացի մասնագետների «մենամարտը». Մանուել Տուլիպայի գլխավորած «Արարատ-Արմենիան» սեփական հարկի տակ առավելության է հասել Վիտոր Կամպելոսի թիմի նկատմամբ:

Պարբերականը ներկայացրել է հանդիպման հիմնական իրադարձությունները՝ նշելով, որ 21-րդ րոպեին Սվիտ Սեսլարը 11-մետրանոցով առաջ է մղել հյուրերին, ինչին 38-րդ րոպեին Արթուր Սերոբյանը պատասխանել է տուգանայինից կատարած հոյակապ գոլով: A Bola-ն առանձնահատուկ ընդգծել է 59-րդ րոպեին փոխարինման դուրս եկած Կառլոս Ֆրանսայի դերը, ում ընդամենը 11 րոպե է պահանջվել հաղթական գոլը խփելու և Տուլիպայի թիմին ՉԼ-ի անցումային փլեյ-օֆֆի պատմական ուղեգրին մոտեցնելու համար:

Անդրադարձում նշվում է նաև հայկական ակումբի կազմում պորտուգալացի ֆուտբոլիստների մասնակցության մասին. Բրունու Վիլսոնն ու Հուգո Օլիվեյրան դուրս են եկել մեկնարկային կազմում, իսկ Բենին և Բրունու Պերեյրան մնացել են պահեստայինների նստարանին:

Հիշեցնենք, որ պատասխան հանդիպումը կկայանա մեկ շաբաթ անց Սլովենիայում: Այս դիմակայության հաղթողը Չեմպիոնների լիգայի լիգայի փուլի ուղեգրի համար փլեյ-օֆֆում ուժերը կչափի «Մյալբյու» – «Սլովան Բրատիսլավա» զույգի ուժեղագույնի հետ (սլովակյան թիմն առաջին խաղում արտագնա հաղթանակ է տարել 2-1 հաշվով):

Չեմպիոնների լիգայի 2026/27 թթ. մրցաշրջանի որակավորման երրորդ փուլի առաջին խաղում Հայաստանի գործող չեմպիոն «Արարատ-Արմենիան» Վազգեն Սարգսյանի անվան «Հանրապետական» մարզադաշտում կամային հաղթանակ տարավ Սլովենիայի գործող չեմպիոն «Ցելյեի» նկատմամբ (2-1)։

Հյուրերից հանդիպման հաշիվը 22-րդ րոպեին բացեց Սվիտ Սեսլարը՝ անվրեպ իրացնելով 11-մետրանոց հարվածը։ Առաջին խաղակեսի վերջնամասում՝ 38-րդ րոպեին, Հայաստանի ազգային հավաքականի կիսապաշտպան Արթուր Սերոբյանը տուգանայինից կատարած հեռահար հարվածով վերականգնեց հաշվի հավասարությունը:

Երկրորդ խաղակեսում հայկական թիմին հաջողվեց առաջ անցնել հաշվի մեջ։ Խաղի 70-րդ րոպեին աչքի ընկավ 59-րդ րոպեին փոխարինման դուրս եկած Կառլոս Ֆրանսան՝ ձևակերպելով հանդիպման վերջնահաշիվը։

Նշենք նաև, որ այս հաղթանակը պատմական էր հայկական ակումբային ֆուտբոլի համար, քանի որ Չեմպիոնների լիգայի խաղարկության որակավորման երրորդ փուլում մինչ այս որևէ հայկական ակումբի չէր հաջողվել հաղթանակ տոնել։

Հիշեցնենք, որ թիմերի միջև որակավորման երրորդ փուլի պատասխան հանդիպումը կկայանա օգոստոսի 11-ին՝ Երևանի ժամանակով 22:15-ին։

Հարավկորեական «Ջեջու Յունայթեդի» և Մյունխենի «Բավարիայի» միջև կայացած ընկերական հանդիպմանը ուշագրավ դրվագով է աչքի ընկել «Նոայի» նախկին հարձակվող Մաթեուս Այաշը:

Բրազիլացի ֆուտբոլիստը շքեղ անցումից հետո գոլային փոխանցում է կատարել, ինչի արդյունքում նրա թիմակիցը գրավել է գերմանական գրանդի դարպասը: Թեև դիմակայությունն ավարտվել է «Բավարիայի» հաղթանակով՝ 2-1 հաշվով, Այաշի անցումն ու փոխանցումը բավականին տպավորիչ են ստացվել։

Հիշեցնենք, որ 29-ամյա հարձակվողը «Նոայից» պաշտոնապես հեռացել է այս տարվա հունիսի 4-ին՝ պայմանագրի ժամկետն ավարտվելու պատճառով: Բրազիլացին երևանյան ակումբին էր միացել 2024 թվականի հունիսի 30-ին: Այս ընթացքում նա «Նոայի» մարզաշապիկով անցկացրել է 77 պաշտոնական հանդիպում՝ դառնալով 32 գոլի և 8 գոլային փոխանցման հեղինակ: Խփած գնդակների քանակով Այաշը հանդիսանում է ակումբի բոլոր ժամանակների լավագույն ռմբարկուն:

«Նոայում» անցկացրած տարիների ընթացքում Մաթեուս Այաշը դարձել է Հայաստանի չեմպիոն և կրկնակի գավաթակիր:

Le Brésilien Matheus Aias a réussi un dribble exceptionnel face au Bayern Munich avant de délivrer une passe décisive pic.twitter.com/g80VhIM4HB

— L’Équipe (@lequipe) August 4, 2026

Այսօր՝ օգոստոսի 4-ին, ՈւԵՖԱ-ի Չեմպիոնների լիգայի որակավորման երրորդ փուլի շրջանակում Հայաստանի չեմպիոն «Արարատ-Արմենիան» կընդունի սլովենական «Ցելյեին»։ Հանդիպումը կկայանա Երևանի Վազգեն Սարգսյանի անվան «Հանրապետական» մարզադաշտում և կմեկնարկի ժամը 20։00-ին։

Վճռորոշ խաղից առաջ հյուրերի գլխավոր մարզիչ Վիտոր Կամպելոսը հանդես է եկել նախախաղային ասուլիսով՝ կիսվելով իր սպասելիքներով և գնահատելով հայկական ակումբի ներուժը։

«Միշտ հաճելի է, երբ լավ ես խաղում, ինքնավստահ ես ու գոհ ես կատարածդ աշխատանքից։ Մենք դեռ կատարելագործման, միմյանց ավելի լավ ճանաչելու և որոշ ֆուտբոլիստների ադապտացիայի փուլում ենք, ուստի գիտեմ, որ դեռ մեծ պոտենցիալ ունենք: Այնուամենայնիվ, կարող ենք գոհ լինել նրանից, թե ինչպես գործեցինք շաբաթ օրը կայացած խաղի երկրորդ կեսում»,- նշել է պորտուգալացի մասնագետը։

Խոսելով մրցակցի մասին՝ Կամպելոսն ընդգծել է, որ քաջածանոթ է հայկական թիմի որոշ ֆուտբոլիստների անհատական որակներին.

«Այժմ մեր ողջ ուշադրությունը կենտրոնացած է «Արարատ-Արմենիայի» վրա: Այս թիմի կազմում կան ֆուտբոլիստներ, որոնց ես ճանաչում եմ դեռ Պորտուգալիայում աշխատելու տարիներից, ուստի լավ գիտեմ նրանց բարձր որակները։ Վերլուծությունների միջոցով մենք տղաներին ցույց ենք տվել այն կետերը, որոնց վրա պետք է հատուկ ուշադրություն դարձնենք, ինչպես նաև այն գոտիները, որտեղ կարող ենք գտնել մեր հնարավորությունները։ Մրցակցի պաշտպանությունը բարդ է ճեղքել, քանի որ նրանք շատ լավ կազմակերպված թիմ են։ Ամեն դեպքում, մենք կանենք առավելագույնը, որպեսզի Սլովենիա վերադառնանք հաղթանակով»,- եզրափակել է «Ցելյեի» գլխավոր մարզիչը։

Ամստերդամի «Այաքսը» պաշտոնապես հայտարարել է կատալոնական «Բարսելոնայի» և Գերմանիայի ազգային հավաքականի դարպասապահ Մարկ-Անդրե տեր Շտեգենի տեղափոխության մասին։

Ակումբները համաձայնության են հասել, ըստ որի՝ 34-ամյա գերմանացին հոլանդական գրանդի կազմում հանդես կգա վարձակալական հիմունքներով. պայմանագիրը նախատեսված է մինչև 2027 թվականի հունիսի 30-ը։

Տեր Շտեգենը, ով իր պրոֆեսիոնալ կարիերան սկսել է հարազատ Մյոնխենգլադբախի «Բորուսիայում» (127 հանդիպում), «Բարսելոնայի» գույները պաշտպանում էր 2014 թվականից։ Կատալոնական ակումբի կազմում նա անցկացրել է 423 պաշտոնական հանդիպում՝ դառնալով ակումբի պատմության մեջ ամենաշատ խաղեր անցկացրած 11-րդ ֆուտբոլիստը, իսկ արտասահմանցիների շարքում զիջում է միայն Լիոնել Մեսսիին: «Բլաուգրանայի» հետ նա նվաճել է 21 տիտղոս, այդ թվում՝ 2015թ․ Չեմպիոնների լիգայի գավաթը և Լա լիգայի 7 չեմպիոնական տիտղոս։

Գերմանիայի հավաքականում 44 հանդիպում անցկացրած դարպասապահը նախորդ մրցաշրջանի երկրորդ հատվածը վարձավճարով անցկացրել էր իսպանական «Ժիրոնայում»՝ գլխավոր մարզիչ Միչել Սանչեսի ղեկավարությամբ։ Թեև վնասվածքի պատճառով նա այնտեղ սահմանափակվեց ընդամենը 2 հանդիպմամբ, այժմ Տեր Շտեգենը կրկին կաշխատի Միչելի հետ արդեն «Այաքսում»՝ փորձելով վերագտնել իր լավագույն մարզավիճակը Եվրոպայի քառակի գավաթակիր և Նիդերլանդների 36-ակի չեմպիոն ակումբում։

Տրանսֆերի վերաբերյալ իր մեկնաբանությունն է տվել Յորդի Կրոյֆը.

«Մարկն ակնառու նվաճումներ ունի, և նրա բարձր որակները համընդհանուր ճանաչում են գտել։ Նա անմիջապես կուժեղացնի մեր կազմը։ Ես և Մարկը լավ ենք ճանաչում միմյանց, և ես անհամբերությամբ եմ սպասում նրա հետ կրկին աշխատելուն։ Մենք բավականին երկար ժամանակ աշխատում էինք նրան այստեղ բերելու ուղղությամբ, ուստի շատ ուրախ ենք, որ պայմանագիրը ստորագրված է, և նա կարող է անցնել գործի»։

Վաղը՝ օգոստոսի 4-ին, Հայաստանի գործող չեմպիոն «Արարատ-Արմենիան» կանցկացնի ՈւԵՖԱ-ի Չեմպիոնների լիգայի որակավորման երրորդ փուլի իր առաջին հանդիպումը։

Երևանյան թիմը Վազգեն Սարգսյանի անվան «Հանրապետական» մարզադաշտում կհյուրընկալի սլովենական «Ցելյեին»։

Հատկանշական է, որ մրցակից թիմի պատվիրակությունն ու մամուլի ծառայության ներկայացուցիչներն այսօր արդեն հասցրել են ծանոթանալ գլխավոր արենային։ Սլովենական ակումբում խիստ տպավորված են մեր մարզադաշտով և արդեն հասցրել են մի շարք գեղեցիկ լուսանկարներ հրապարակել։

Հիշեցնենք, որ «Արարատ-Արմենիա» — «Ցելյե» չափազանց կարևոր դիմակայության մեկնարկը կտրվի վաղը՝ Երևանի ժամանակով 20։00-ին։

«Արարատ-Արմենիան» հայտնում է նոր համալրման մասին։ Երևանյան թիմին է միացել 29-ամյա պորտուգալացի հարձակվողական ոճի կիսապաշտպան Բերնարդու Օլիվեիրան։

Ինչպես տեղեկացնում է ակումբի մամուլի ծառայությունը, իր կարիերայի ընթացքում պորտուգալացի ֆուտբոլիստը հանդես է եկել հայրենիքը ներկայացնող մի շարք թիմերում։ Բեննիի նախորդ ակումբը եղել է Անգոլայի առաջնությունում հանդես եկող «Պետրո Լուանդան»։

Հիշեցնենք, որ վաղը՝ օգոստոսի 4-ին, «Արարատ-Արմենիան» կարևոր հանդիպում կանցկացնի եվրագավաթներում։ ՈւԵՖԱ-ի Չեմպիոնների լիգայի որակավորման երրորդ փուլի «Արարատ-Արմենիա» — «Ցելյե» առաջին դիմակայությունը կմեկնարկի ժամը 20։00-ին։ Հանդիպումը կցուցադրվի Առաջին ալիքի ուղիղ եթերով։

Հայաստանի Բարձրագույն խմբի 2026/27թթ․ մրցաշրջանի մեկնարկային տուրը եզրափակվեց գոլառատ և դիտարժան դիմակայությամբ: Անդրանիկ տուրի վերջին խաղում «Ալաշկերտը» Երևանի ֆուտբոլի ակադեմիայում ուժերը չափեց «Արարատի» հետ և վստահ հաղթանակ տոնեց՝ 3:0 հաշվով։

Առաջին խաղակեսում երկրպագուները գոլեր չտեսան, սակայն ընդմիջումից հետո դաշտի տերերը սկսեցին գործել անկասելի: Հանդիպման հաշիվը բացվեց 53-րդ րոպեին. Յուրա Մահտեսյանի նշանակած 11 մետրանոցն անվրեպ իրացրեց Կարեն Նալբանդյանը՝ առաջ մղելով ալաշկերտցիներին:

Խաղավերջում փայլեց Դոմի Մասումուն՝ դառնալով արագ դուբլի հեղինակ։ Նա աչքի ընկավ 75-րդ և 79-րդ րոպեներին՝ վերջնականապես կոտրելով հյուրերի դիմադրությունն ու դնելով այս դիմակայության վերջակետը:

Այս տպավորիչ հաղթանակից հետո «Ալաշկերտը» միացավ առաջատարների խմբին։ Մեկնարկային տուրից հետո աղյուսակն ունի հետևյալ տեսքը.

• 3-ական միավոր ունեն՝ «Ալաշկերտը», «Սարդարապատը», «Նոան» և «Արարատ-Արմենիան»։
• 1-ական միավոր են վաստակել՝ «Փյունիկը», «Ուրարտուն», ԲԿՄԱ-ն և «Շիրակը»։
• Միավոր չունեն՝ «Գանձասարը», «Վանը», «Արարատը» և «Սյունիքը»:

Տեսանյութը՝ ստորև․

Մրցաշարային աղյուսակն այս պահին

Հայաստանի չեմպիոն «Արարատ-Արմենիան» պատրաստվում է ՈւԵՖԱ Չեմպիոնների լիգայի որակավորման երրորդ փուլի՝ «Ցելյեի» դեմ կարևորագույն դիմակայությանը։

Օգոստոսի 4-ին կայանալիք առաջին խաղից առաջ թիմի գլխավոր մարզիչ Մանուել Տուլիպան հանդիպել է լրագրողների հետ և խոսել առկա խնդիրների, առաջիկա անելիքների ու թիմի տրամադրվածության մասին։

«Անդադար փնտրտուքների մեջ ենք՝ հասկանալու, թե ինչպես կարող ենք լրացնել վնասվածքների պատճառով առաջացած բացերը։ Ոչ մի րոպե չեմ դադարում մտածել եզրային պաշտպանների խնդրի լուծման շուրջ։ Բարդություններն ի հայտ եկան հատկապես Բալանտայի և Համբարձումյանի վնասվածքներից հետո, ինչի արդյունքում ստիպված էինք Օլիվեյրային կիրառել որպես կիսապաշտպան։

Ճիշտ է, Բուենոն որպես կենտրոնական պաշտպան շատ ավելի արդյունավետ է, սակայն եզրում ևս նա վստահելի է. թեև չի կարողանում ակտիվորեն միանալ գրոհներին, բայց ամուր է պահում իր գոտին։ Տեսնենք, թե առաջիկա խաղում ինչ լուծում կգտնենք։ Հնարավոր է՝ դա լինի Միշելին խաղադաշտ դուրս բերելը, ով նախորդ հանդիպման ժամանակ շատ լավ մտավ խաղի մեջ. այնպես որ ունենք մի քանի տարբերակ»,- նշել է Տուլիպան։

Պորտուգալացի մասնագետն ընդգծել է, որ թիմը չի պատրաստվում բավարարվել ձեռքբերածով.

«Մեր նախնական նպատակին մենք հասել ենք, քանի որ արդեն ապահովել ենք եվրագավաթային աշունը։ Այնուամենայնիվ, մնացած խաղերում պետք է լինենք առավելագույնս մրցունակ։ Մենք հարգում ենք մրցակցին, որն իր կազմում ունի բազմաթիվ որակյալ ֆուտբոլիստներ, սակայն այդ հարգանքը չի խանգարում մեր հավակնություններին։ Ոչինչ չի կարող կանգնեցնել մեզ մեր երազանքի հետևից գնալիս. անելու ենք ամեն ինչ Չեմպիոնների լիգա մտնելու համար»։

Խիտ գրաֆիկի և «պորտուգալական» դուելի մասին

«Մենք մեծ պատասխանատվություն ունենք երկիրը ներկայացնելու հարցում, իսկ դրա լավագույն ճանապարհը թե՛ առաջնությունում, թե՛ եվրագավաթներում լավ հանդես գալն է։ Խաղերին պատրաստվելու համար իսկապես շատ քիչ ժամանակ ունենք, իսկ վնասվածքների պայմաններում թիմն արագ վերադասավորելը կրկնակի բարդ է։ Որոշումներ կայացնելու տեսանկյունից ժամանակը խիստ սուղ է։

Ինչ վերաբերում է «Ցելյեի» հետ հանդիպմանը, ապա հետաքրքիր դիմակայություն է սպասվում, հատկապես ինձ համար, քանի որ մրցակցի մարզիչը նույնպես պորտուգալացի է։ Նրանք բարդ մրցակից են, բայց մենք կենտրոնանալու ենք, ուսումնասիրելու ենք նրանց թույլ կողմերն ու փորձելու ենք օգտվել առկա խնդիրներից։ Ակնհայտ է, որ նրանք էլ նույնն են անելու։ Առաջիկա դիմակայության համատեքստում ուզում եմ ընդգծել ամենակարևոր գործոնը՝ համեստ մնալը։ Առաջին երկու փուլերը հաղթահարելուց հետո պետք է ամուր կանգնած մնալ հողի վրա, որովհետև երբ կորցնում ես համեստությունդ, կորցնում ես նաև խաղային ինքնությունդ»,- եզրափակել է մարզիչը։

Հիշեցնենք, որ ՈւԵՖԱ Չեմպիոնների լիգայի որակավորման երրորդ փուլի «Արարատ-Արմենիա» — «Ցելյե» առաջին հանդիպումը կկայանա վաղը՝ օգոստոսի 4-ին՝ ժամը 20։00-ին։ Խաղը կցուցադրվի Առաջին ալիքի ուղիղ եթերով։