Լոնդոնի «Տոտենհեմի» գլխավոր մարզիչ Ժոզե Մոուրինյոն պատմել է, թե ինչպես է 2010 թվականին Միլանի «Ինտերից» տեղափոխվել Մադրիդի «Ռեալ»։ «Ներաձուրիների» ղեկին վերջին մրցաշրջանում Մոուրինյոն հաղթել էր Իտալիայի առաջնությունը, Իտալիայի գավաթը և Չեմպիոնների լիգան։
«Մինչև Չեմպիոնների լիգայի եզրափակիչը ես դեռ «Ռեալի» հետ պայմանագիր չէի կնքել։ Ոմանք ասում էին, թե իբր «սերուցքայինների» ներկայացուցիչները հանդիպումից առաջ եկել էին մեր հյուրանոց, բայց դա սուտ է։ Այդպիսի բան չի եղել։
Ես ցանկանում էի կարիերաս շարունակել «Ռեալում»։ Նրանք ուզում էին ինձ դեռ 2009-ին, բայց ղեկավարությունը թույլ չտվեց ինձ գնալ։ Ես արդեն մերժել էի «Ռեալին», երբ գլխավորում էի «Չելսին»։ Իսկ երեք անգամ նրանց չի կարելի ասել «ո՛չ»։ Որոշեցի հեռանալ «Ինտերից» «Բարսելոնայի» դեմ կիսաեզրափակիչից հետո, քանի որ գիտեի, որ հաղթելու եմ Չեմպիոնների լիգան։ Դա ճիշտ որոշում էր, բայց ես «Ինտերում» ավելի երջանիկ էի»,-Ժոզե Մոուրինյոյի խոսքն է մեջբերում Football Italia-ն՝ հղում կատարելով La Gazetta dello Sport-ը։
