«Ֆեներբահչեն» X սոցիալական ցանցում (նախկինում՝ Twitter) տեղեկացրել է, որ Ստամբուլի գլխավոր դատախազությունը հիմքեր չի գտել թիմի գլխավոր մարզիչ Ժոզե Մոուրինյուի նկատմամբ քրեական գործ հարուցելու համար։
Հիշեցնենք, որ Թուրքիայի առաջնության 25-րդ տուրի «Ֆեներբահչե»-«Գալաթասարայ» (0:0) հանդիպումից հետո պորտուգալացի մասնագետը նշել էր, որ մրցակցի պահեստային խաղացողներն ու մարզիչները «կապիկների պես թռել են»։ Դեղին-կարմիրները Մոուրինյուի նման հայտարարությունը համարել են ռասիզմ և ասել, որ դիմելու են դատարան, ինչպես նաև ՖԻՖԱ-ին և ՈւԵՖԱ-ին։
«Այն բանից հետո, երբ «Գալաթասարայը» մեր մարզիչ Ժոզե Մոուրինյուի դեմ ռասիզմի հիման վրա քրեական գործ հարուցեց, Ստամբուլի գլխավոր դատախազությունը որոշում կայացրեց, որ իրավախախտումներ և քրեական հետապնդման հիմք չկա։ Այսպիսով, որոշում է կայացվել մերժել քրեական գործ հարուցելը», — ասվում է «Ֆեներբահչեի» հայտարարության մեջ:
