ՖԻՖԱ-ի աշխատակից Ջեք Քոուլսը, որը ղեկավարում էր կազմակերպության միջոցառումների և հեռարձակումների երաժշտական մասը կազմակերպող բաժինը, ձերբակալվել է 14-ամյա տղայի հետ սեռական հարաբերություն ունենալու կասկածանքով։ Այս մասին հայտնում է Sky News-ը։
Քոուլսը բրիտանացի է և տղայի հետ ծանոթացել է ծանոթությունների հավելվածի միջոցով 2024 թվականի հոկտեմբերին: Նշվում է, որ դեռահասը Քոուլսին ասել է, որ ինքը 16 տարեկան է։ Անցյալ շաբաթ Ջեքը փորձել է կրկին հանդիպել տղայի հետ, սակայն իրավապահները ձերբակալել են նրան Մայամիում ՖԻՖԱ-ի գրասենյակի մոտ, որը բացվել է 2026 թվականի աշխարհի առաջնության նախապատրաստական աշխատանքների իրականացման համար:
Նշենք, որ 2026 թվականի աշխարհի առաջնությունը կհյուրընկալեն միանգամից երեք երկրներ՝ Ամերիկայի Միացյալ Նահանգները, Մեքսիկան եւ Կանադան։ Հանդիպումները կանցկացվեն հետևյալ քաղաքներում՝ Մեխիկո, Գվադալախարա, Մոնտերեյ (բոլորը՝ Մեքսիկա), Տորոնտո, Վանկուվեր (երկուսն էլ Կանադա), Նյու Յորք, Ֆիլադելֆիա, Բոստոն, Ատլանտա, Մայամի, Հյուսթոն, Դալլաս, Լոս Անջելես, Սան Ֆրանցիսկո, Կանզաս Սիթի, Սիեթլ (բոլորը՝ ԱՄՆ):
Աշխարհի գործող չեմպիոնն Արգենտինայի հավաքականն է։
