MLS-ի այս մրցաշրջանի եզրափակիչում կհանդիպեն ԱՄՆ-ի երկու խոշորոագույն քաղաքների՝ Նյու Յորքի ու Լոս Անջելեսի ներկայացուցիչները։
Եզրափակիչը կկայանա Լոս Անջելեսից ոչ հեռու գտնվող Քարսոն քաղաքում (Կալիֆորնիա), դեկտեմբերի 8-ին։
⚽ ԼԱ Գելեքսի
«Լոս Անջելես Գելեքսին» դուրս եկավ MLS-ի գավաթի եզրափակիչ՝ Արևմտյան կոնֆերենցիայի եզրափակիչում 1-0 հաշվով հաղթելով «Սիեթլին»։ Հանդիպման հերոսը դարձավ սերբ հարձակվող Դեյան Յովելիչը՝ խփելով իր հինգերորդ գոլը փլեյ-օֆֆում։ Այս գոլի շնորհիվ «Գելեքսին» 10 տարվա մեջ առաջին անգամ կխաղա MLS-ի գավաթի եզրափակիչում։ Նրանց մրցակիցը կլինի «ՌԲ Նյու Յորքը»։ Հանդիպմանը մասնակցել է նաև եվրոպական ֆուտբոլի աստղ Մարկո Ռոյսը՝ նվաճելով Արևմտյան կոնֆերենցիայի չեմպիոնի տիտղոսը։ Նա խաղադաշտում անցկացրեց 45 րոպե, իսկ առաջին խաղակեսից հետո հեռացավ վնասվածքի պատճառով։ Այսպիսով, «Լոս Անջելես Գելեքսին» դարձավ MLS-ի Արևմտյան կոնֆերենցիայի հաղթող և կարողացավ դուրս գալ եզրափակիչ։
Կազմի մասին․ Ամբողջ թիմի տրանսֆերային արժեքը գնահատվում է 61․4 մլն եվրո։
Լոսանջելեսյան թիմի կազմում բավականին շատ են հայտնի ֆուտբոլիստները։ Պաշտպանության հենասյունն են կազմում Ճապոնիայի հավաքականի նախկին ֆուտբոլիստներ Մայա Յոշիդան, Միկի Յամանեն, ինչպես նաև փորձառու ուրուգվայցի պաշտպան Մարտին Կասերեսը․ Յոշիդան ժամանակին հանդես է եկել «Սաութհեմփթոնում» և «Սամպդորիայում», իսկ Կասերեսը ներկայացրել է «Բարսելոնան» ու «Յուվենտուսը»։ Բայց, փորձառու ֆուտբոլիստը վերջին անգամ խաղադաշտ է եկել հուլիսին և մինչ այժմ ապաքինվում է վնասվածքից։ Պաշտպանությունում խաղում են նաև ամերիկացիներ Կուևասն ու Նելսոնը, ԱՄՆ-ի հավաքականի 21-ամյա ֆուտբոլիստ Յալեն Նիլն ու Արգենտինայի երիտասարդական հավաքականի ֆուտբոլիստ Խուլիան Աուդեն։
Կիսապաշտպանությունում առաջատարներն են Մարկո Ռոյսը ու Ռիկի Պուչը։ Վերջինս «Բարսելոնայի» ևս մեկ ներկայացուցիչ է, 25-ամյա ֆուտբոլիստն այս մրցաշրջանի կանոնավոր առաջնությունում խփել է 17 գոլ։ Նա նաև թիմի ամենաթանկարժեք ֆուտբոլիստն է՝ 15 մլն եվրո տրանսֆերային արժեքով։ Թիմի կիսապաշտպանությունում հանդես են գալիս նաև 24-ամյա ամերիկացի Էդվին Չերիլոն, նրա հայրենակից Մարկո Դելգադոն, իսպանացի Միգել Բերին, ուրուգվայցիներ Ֆագունդեսն ու Բրուգմանը։
Իսկ ահա հարձակման գծի առաջատարը Սերբիայի հավաքականի 25-ամյա հարձակվող Դեյան Յովելիչն է, ով թիմի ամենաարդյունավետ ֆուտբոլիստն էր այս մրցաշրջանում 25 գոլով։ Թիմի մյուս ռմբարկուն Բրազիլիայի երիտասարդական հավաքականի հարձակվող Գաբրիել Պեկն է։ Իսկ ահա թիմի երրորդ հարձակվողը երկար տարիներ հանդես է եկել «Գենկում»․ խոսքը Գանայի հավաքականի հարձակվող Ժոզեֆ Պաինտսիլի մասին է։ Թիմը մարզում է ամերիկացի մասնագետ Գրեգորի Վանին։
⚽ ՌԲ Նյու Յորք
«Ռեդ Բուլս» հոլդինգին (այլ ակումբներն են Զալցբուրգը, Լայպցիգը) պատկանող «Նյու Յորք Ռեդ Բուլսը» ևս դուրս է եկել MLS-ի գավաթի եզրափակիչ։ Սանդրո Շվարցի գլխավորած ակումբը կիսաեզրափակչում հաղթեց «Օրլանդո Սիթիին» (1-0) և վճռորոշ խաղում կհանդիպի «Լոս Անջելես Գելեքսիի» հետ։ «Նյու Յորք Ռեդ Բուլսը» կրկնեց իր լավագույն արդյունքը․ 2008 թվականին ակումբը ևս հասել էր MLS գավաթի եզրափակիչ, որտեղ պարտվել էր «Կոլամբուս Քրյուին» (1-3):
Կազմի մասին․ Ամբողջ թիմի տրանսֆերային արժեքը գնահատվում է 41․3 մլն եվրո։
Թիմի դարպասը պաշտպանում է Պարագվայի հավաքականի դարպասապահ Կարլոս Կորոնելը։ Պաշտպանությունում հանդես են գալիս Շվեդիայի երիտասարդական հավաքականի ֆոտբոլիստ Նոա Էլիեն, Կոլումբիայի հավաքականի պաշտպան Անրես Ռեյեսը, ԱՄՆ-ի հավաքականի ներկայացուցիչներ Տոլկինը և Դունկանը, ամերիկացիներ Շոն Դիլսը և Դիլան Նիլսը։
Կիսապաշտպանության առաջատարը «Լայպցիգի» նախկին ֆուտբոլիստ, Շվեդիայի հավաքականի կիսապաշտպան Էմիլ Ֆորսբերգն է, ով նաև թիմի գլխավոր ռմբարկուն է և ավագը։ Թիմում տոն են տալիս նաև Շոտլանդիայի հավաքականի ֆուտբոլիստ Մորգանը, Ուրուգվայի հավաքականի ֆուտբոլիստ Կարբալոն, 21-ամյա վենեսուելացի Կարմոնան և ԱՄՆ-ի երիտասարդական հավաքականի առաջատարներից մեկը՝ Դանիել Էդելմանը։ Գանացի Ռոնալդ Դոնկորը, ամերիկացի Ստրուդը ևս թիմի հիմնական կազմի անբաժան մասն են։ Ֆորսբերգը, Մորգանը և Կարբալոն թիմի ամենաթանկարժեք ֆուտբոլիստներն են՝ 5-ական մլն եվրո տրանսֆերային արժեքով։
Թիմի հարձակման գծի առաջատարը 23-ամյա բրազիլացի Էլիասն է։ 20-ամյա նորվեգացի Դենիս Գիենգարը, ժամանակին Բելգիայի հավաքական հրավիրված Դանզիրը և ԱՄՆ-ի երիտասարդական հավաքականի հարձակվող Հարփերը, Ճամայկայի հավաքականի հարձակվող Քորի Բյուրքը ևս հիմնական կազմի ֆուտբոլիստներ են։ Իսկ պատանի Ջուլիան Հոլը համարվում է ԱՄՆ-ի ամենահեռանկարային ֆուտբոլիստներից մեկը։
🏆 Մրցաշարի մասին
MLS-ը թարգմանվում է որպես «Ֆուտբոլի բարձրագույն լիգա», պրոֆեսիոնալ ֆուտբոլային առաջնություն է, ԱՄՆ-ի և Կանադայի ֆուտոբոլային լիգաների համակարգում առաջին դիվիզիոնը։ Մրցաշարը կանոնակարգվում է Միացյալ Նահանգների ֆուտբոլի ֆեդերացիայի կողմից։ Առաջնությանը մասնակցում է 29 ակումբ, որից 3-ը՝ Կանադայից։ Առաջիկայում մրցաշարին կմիանան ևս երկու ակումբներ՝ «Սան Դիեգոն» և «Սակրամենտոն»։
MLS-ի լիգան ձևավորվել է 1993 թվականի դեկտեմբերի 17-ին, որպես 1994 թվականի Աշխարհի գավաթի անցկացման Միացյալ Նահանգների հայտի մի մաս։ Առաջին մրցաշրջանը կայացել է 1996 թվականին՝ տասը թիմերի մասնակցությամբ։ Մրցաշարի գործող չեմպիոնը «Կոլամբուսն» է, որի կազմում հանդես էր գալիս նաև Հայաստանի հավաքականի հարձակվող Լուկաս Սելարայանը, ով մրցաշրջանի կեսից տեղափոխվեց սաուդյան «Ալ Ֆատեհ»։
Այս տարվա եզրափակիչի մասնակիցը՝ «ԼԱ Գելեքսին» ամենատիտղոսակիր թիմն է MLS-ում, որը ռեկորդային՝ 5 անգամ դարձել է չեմպիոն․ թիմը 10-րդ անգամ կմասնակցի եզրափակիչին։ 4 անգամ չեմպիոն է դարձել «Դի Սի Յունայթեդը», երեք անգամ՝ «Կոլամբուսը»։ Հետաքրքիր է, որ «Նյու Ինգլանդ» ակումբը 5 անգամ հասել է եզրափակիչ (կիսում է երկրորդ տեղն այդ ցուցանիշով ԴԻ Սի-ի հետ), բայց պարտվել է բոլոր դեպքերում։
Բոլոր չեմպիոնները․
Վար Բաբայան
