Ֆուտզալի Հայաստանի Բարձրագույն խմբի 6-րդ տուրում «Յունիսպորտը» նոյեմբերի 24-ին Ավանի ակադեմիայի մարզադահլիճում մրցել է Բարձրագույն խմբի առաջնության գործող չեմպիոն և գավաթակիր «Երևանի» հետ և 6:5 հաշվով հաղթանակ է տարել թեժ պայքարում:
«Յունիսպորտի» կազմում խփած գնդակներով աչքի են ընկել Մամիկոն Դերմենջյանը, Տիգրան Վարդանյանը, Համլետ Մանուկյանը, Էդվարդ Մկրտչյանը, ևս երկու գոլ խփել է Սարգիս Մարգարյանը:
Դերմենջյանը, օգտվելով դարպասապահ Արթուր Մկրտչյանի սխալից, առաջ է շարժվել դեպի տուգանային հրապարակ, գնդակը խաղարկել թիմակցի հետ և ձախ եզրից կատարած հարվածով գրավել մրցակցի դարպասը: Տիգրան Վարդանյանը գոլով է եզրափակել թիմի հերթական գրոհը՝ դարպասային հրապարակում ստանալով գնդակն ու այն ուղարկելով անպաշտպան դարպասը: Առաջին կեսում «Երևանի» կազմում մեկ գնդակ ետ է բերել Գարիկ Գրիգորյանը և թիմերն ընդմիջման են գնացել 2:1 հաշվի պայմաններում:
Երկրորդ 20-րոպեում երկու թիմերի խաղացողները ևս 8 գոլ են հեղինակել: Երկրորդ կեսի մեկնարկում Գրիգորյանը դուբլ է ձևակերպել՝ հավասարեցնելով հաշիվը: Ավելի ուշ, «Յունիսպորտի» կազմում հեռահար գեղեցիկ հարվածով մրցակցի դարպասը գրավել է Համլետ Մանուկյանը՝ 3:2: Երկու րոպե անց Էդվարդ Մկրտչյանը եզրափակել է իր թիմի հերթական գրոհն ու մեծացրել է առավելությունը՝ 4:2: 26:56-րդ րոպեին Սարգիս Մարգարյանը, ստանալով թիմակցի՝ մրցակցի կիսադաշտից կատարած երկար փոխանցումը, «օդապարիկ» հարվածով գնդակը մրցակցի դարպասապահի վրայով ուղարկել է դարպասը: Եվս մեկ գնդակը Մարգարյանը հեղինակել է բավական զավեշտալի իրավիճակում. կանխելով մրցակցի դարպասապահի առաջխաղացումը՝ նա գրեթե կենտրոնական հատվածից խլել է գնդակն ու այն ուղարկել դատարկ դարպասը:
Ավելի ուշ «Երևանի» կազմում խփած գնդակներով աչքի են ընկել նաև Վարդան Արզոյանը, Աղասի Եղիազարյանը և Գարեգին Մաշումյանը: Ավելին անել, սակայն, Հայաստանի գործող չեմպիոնին չի հաջողվել՝ 6:5:
Անցկացրած 6 խաղերում «Յունիսպորտը» տարել է 6 հաղթանակ և այժմ 18 միավորով գլխավորում է առաջնության մրցաշարային աղյուսակը՝ մոտակա հետապնդող «Երևանին» գերազանցելով 3 միավորով:
«Յունիսպորտ» ակումբի գլխավոր հովանավորը Յունիբանկն է:
Ներկայացնում ենք տուրի կենտրոնական հանդիպման լուսանկարները՝
Տուրի բոլոր հանդիպումների արդյունքները՝
