Կանանց ֆուտբոլը տարեցտարի ավելի ու ավելի է զարգանում: Այնուամենայնիվ, տղամարդկանց հետ հետաքրքրության մակարդակի և, հետևաբար, գումարի շուրջ եղած անջրպետը դեռևս հսկայական է։
Զարմանալի չէ, որ Անգլիայի և «Չելսիի» աստղ Լյուսի Բրոնզը վերջերս ասել է, որ կին ֆուտբոլիստների 99,9 տոկոսը չի կարողանա կարիերան ավարտելուց հետո վայելել կուտակած գումարները։
Բայց կոնկրետ որքա՞ն են վաստակում կին ֆուտբոլիստները․
Ցավոք, բավականին դժվար է միջին թվեր նշել. կանանց ֆուտբոլում աշխատավարձերը պաշտոնապես չեն բացահայտվում: Այնուամենայնիվ, հնարավոր է որոշ տեղեկություններ իմանալ միայն ամենաբարձր վարձատրվող կին ֆուտբոլիստերի վերաբերյալ։
Ներկայումս աշխարհի ամենաբարձր վարձատրվող կին ֆուտբոլիստը, ըստ ESPN-ի, «Բարսելոնայի» կիսապաշտպան Այտանա Բոնմատին է։ Նա նաև համարվում է աշխարհի լավագույն ֆուտբոլիստը։
Բոնմատին «Բարսելոնայի» և Իսպանիայի հավաքականի կիսապաշտպան է, որը 26 տարեկանում արդեն նվաճել է գրեթե հնարավոր ամեն բան։ Այտանան աշխարհի չեմպիոն է, Իսպանիայի հնգակի չեմպիոն, Իսպանիայի գավաթի վեցակի հաղթող, Չեմպիոնների լիգայի եռակի հաղթող և «Ոսկե գնդակի» կրկնակի դափնեկիր (2023, 2024 թվականներին):
Սեպտեմբերին կիսապաշտպանը, որին հավակնում էին աշխարհի բոլոր թոփ ակումբները, երկարաձգեց պայմանագրի ժամկետը «Բարսելոնայի» հետ մինչև 2028 թվականը և դրանով իսկ դարձավ աշխարհի ամենաբարձր վարձատրվող ֆուտբոլիստուհին։
Այտանայի նոր աշխատավարձի չափը, իհարկե, չի բացահայտվում։ Այնուամենայնիվ, ըստ La Tribuna-ի և Relevo-ի, նա այժմ «Բարսայում» տարեկան վաստակում է 750 հազարից մինչև 1 միլիոն եվրո:
Նույն Relevo-ն պնդում է, որ «Չելսին» պատրաստ էր նրան վճարել մինչև 11 միլիոն եվրո 4 տարվա ընթացքում։ Բայց Այտանան այնուամենայնիվ ընտրություն կատարեց հօգուտ հարազատ ակումբի։
Որքա՞ն է տարեկան 1 միլիոն եվրոն տղամարդկանց ֆուտբոլում․
Դատեք ինքներդ՝ աշխարհի ամենաբարձր վարձատրվող ֆուտբոլիստ Կրիշտիանու Ռոնալդուն, ըստ Forbes-ի, այս մրցաշրջանում պորտուգալացին միայն խաղադաշտում կվաստակի 220 միլիոն դոլար, Մեսսին՝ 60 միլիոն, Նեյմարը՝ 80 միլիոն, Մբապեն՝ 70 միլիոն։
Այսպիսով կարող ենք հետևություն անել, որ կանանց ֆուտբոլի ամենաբարձր վարձատրվող խաղացողը մի քանի անգամ ավելի քիչ է վաստակում, քան տղամարդկանց ֆուտբոլի եվրոպական որևէ միջակ, կամ կարգով ավելի ցածր ակումբում հանդես եկող խաղացողը։
Կանանց ֆուտբոլը արագորեն շարունակում է զարգանալ, սակայն փառքն ու գահը ֆուտբոլում դեռ պատկանում է տղամարդկանց։
